ئه‌ڤرۆ نیوز:
به‌رپرسێ پشكا ئه‌زموونان ل رێڤه‌به‌ریا په‌روه‌رده‌یا دهۆك رۆژئاڤا دیار كر كو ده‌رگه‌هێ وه‌رگرتنا قوتابیێن ده‌ره‌كی ل پۆلا 5 بنه‌ره‌ت هه‌تا 11 ئاماده‌یی بۆ سالا خواندنێ 2015-2016 هاته ڤه‌كرن و هه‌تا 20/10/2015 پێشكێشكرن دێ یا به‌رده‌وام بیت.
خویا ژی كر كو ژ دایكبوویێن 1995 و به‌ر ب خوارێ مافێ هه‌ی پێشكێشی پۆلێن قۆناغا بنه‌ره‌ت بكه‌ن، ژ دایكبوویێن 1996 هه‌تا 1999 ژی هه‌كه دو سالان ل ئێك پۆل كه‌فت بن وان ژی مافێ خواندنێ ل قوتابخانه‌یێن رۆژ نامینیت و دشێن پێشكێشی ده‌ره‌كی بكه‌ن، لێ سالا خواندنێ 2013-2014 ناهێته هژمارتن كه‌فتن، هه‌روه‌سا ژ دایكبوویێن 2000 و پێهه‌ل هه‌كه دو سالان ل پۆلا خوه كه‌فت بن مافێ هه‌ی هه‌ر بمیننه ل خواندنا ب رۆژ.
ل دۆر وان قوتابیێن مافێ ده‌ره‌كی ل پۆلێن 10 و 11 ئاماده‌یی هه‌ی ، خالد ئه‌حمه‌د خالد دیار كر كو ئه‌و كه‌س دشێن پێشكێشی ڤان هه‌ردو پۆلێن ئاماده‌یی بكه‌ن یێن مافێ خواندنێ ل قوتابخانێ نه‌مینیت ئه‌و ژی ژ دایكبوویێن 1991 كور و 1990 كچ و به‌ر ب خوارێ، هه‌روه‌سا قوتابیێن دو سالان ل پۆلا خوه دمینن یان دێ چنه قوتابخانه‌یێن ئێڤاران یان ژی دێ پێشكێشی ده‌ره‌كی كه‌ن و گۆت:(ئه‌م یێن هاتینه ئاگه‌هدار كرن كو ئه‌ڤ ساله ژی پێشكێشكرن بۆ پۆلێن 10 و 11 پیشه‌یی نابیت).
ناڤهاتی ئاشكرا كر هه‌ر قوتابیه‌كێ پێشكێشی ده‌ره‌كی وه‌رزی دكه‌ت، پێدڤیه شه‌ش وێنان و كۆپیه‌كا ناسنامێ ل گه‌ل خوه بینیت و دێ سه‌ره‌دانا په‌روه‌ردێ كه‌ت و فۆرمه‌كێ وه‌رگریت و ل دووڤ دا دێ ل قوتابخانێ داگریت و پاشی دێ زڤڕینته په‌روه‌ردێ و فایل دێ بۆ هێته ڤه‌كرن و وه‌ك قوتابیه‌كێ ده‌ره‌كی دێ هێته وه‌رگرتن.
خویا ژی كر كو پشتی قوتابی دهێنه وه‌رگرتن، قوتابیێن ل سالا بۆری ئه‌زموونێن ده‌ره‌كی كرین جاره‌كا دی هه‌ر دێ چنه وان قوتابخانان.
ژێده‌ر: په‌یجێ راگه‌هاندنا په‌روه‌ردا دهۆك، رۆژئاڤا
ئه‌ڤرو نیوز،بارزان مزوورى
ئه‌فسه‌ره‌ك ژ هێزێن پێشمه‌رگه‌ى ل میحوه‌رێ ناوه‌ران بو مالپه‌رێ ئه‌ڤرو نیوز ئاشكرا كر كو ئه‌ڤروده‌مژمێر 5:40 خوله‌ك مه‌غره‌ب 4/9/2015 چه‌كدارێن تیرورستێن داعش ب سێ لاینڤه هێرش كره سه‌ر هێزێن پێشمه‌رگه‌ى ل میحوه‌رێ ناوه‌ران و ب چه‌كێ گران پێشمه‌رگه گوله‌باران كریه و پێشمه‌رگه‌ى ژى ب توندى به‌رسڤا هێرشا وان دا هه‌رسێ هێرشدا دایه و هاتن تێك شكاندن بێ كو زیان بگه‌هنه پێشمه‌رگه‌ى.
ناڤبرى دیار كر كو دهه‌رسێ هێرشێن وان دا، ب چه‌كێ دوشكا به‌رده‌وام پێشمه‌رگه گوله‌باران كر و چه‌كێ كاتیوشیا ب پێشمه‌رگه‌ى د وه‌ركر .
ناڤبرى گوت ژى داعش كه‌ش و هه‌وایێ ئه‌ڤرو بخو ب ده‌لیڤه دانایه هێرشێ بكه‌نه سه‌ر پێشمه‌رگه‌ى، چونكو توز ل میحوه‌رێن پێشمه‌رگه‌ى یا هه‌ى.
ئه‌ڤرۆ نیوز:
گه‌نجه‌ك ل شرنه‌خێ ژ ئالیێ هێزێن تایبه‌ت یێن سوپایێ توركیا ل تاخه‌كێ دیجله ل شرنه‌خێ باكوورێ كوردستانێ دهێته برینداركرن، پاشان دهێته كوشتن و ته‌رمێ وى ل دووڤ ترومبێله‌كا سه‌ربازى ڤه دهێته گرێدان و راكێشان.
سه‌لاحه‌دین ده‌میرتاش هه‌ڤسه‌رۆكێ هه‌ده‌پێ ل سه‌ر ڤى وێنه‌ى ل فێسبوكێ خوه نڤیسى یه: سه‌حكه‌نه ڤى وێنه‌ى، ئه‌ڤه دوهى ل شرنه‌خ یێ چێبووى، كه‌س ڤێ یه‌كێ ژبیر نه‌كه‌ن، ژبه‌ر كو ئه‌م ژبیر ناكه‌ین.
ل دووڤ پێزانینان، ئه‌ڤ كه‌سێ هاتیه كوشتن، ناڤێ وى لوقمان بێرلیكه و ده‌رهێنان بۆ كورته فلمه‌كێ كریه و رۆل ژى تێدا هه‌بوویه.
ئه‌ڤرۆنیۆز، ئه‌یاد به‌روارى
فه‌رمانده‌كێ له‌شكرێ روسی راگه‌هاند، هێرشێن ئه‌سمانی یێن روسی ل سووریێ هه‌تا راده‌كێ مه‌زن شیانێن له‌شكری یێن تیرۆرستان ل سووریێ یێن لاواز كرین و تیرۆرست یێ به‌ر ب ئورۆپا ڤه دره‌ڤن.
جه‌نه‌رال ئه‌ندرێه كارتابولوف فه‌رماندێ ئۆپه‌راسیۆنان ل ده‌سته‌یا ئه‌ركانێن له‌شكرێ روسی بۆ رۆژنامه‌ڤانان گوت” فرۆكێن روسی د سێ رۆژێن بۆری دا 60 هێرشێن ئه‌سمانی ئه‌نجامداینه و 50 جه و ژێرخانا رێكخستیا داعشێ ئارمانجێن وان هێرشان بوون و د وان سێ رۆژان دا بنگه‌هێ دارایی و ته‌كنیكی یێ تیرۆرستان و شیانێن وان یێن شه‌ری هه‌تا راده‌كێ یێن لاوازبووین و ئارمانجا سه‌ره‌كی یا فرۆكێن روسی خالێن پشكنینێ و عومبارێن چه‌كی و ته‌قه‌مه‌نیان و بنگه‌هێن په‌یوه‌ندیكرنێ و كارخانێن چێكرنا چه‌كی ئه‌وێن تیرۆرستێن خوه‌كوژ بكاردئینن و سه‌ربازگه‌هێن مه‌شقكرنا تیرۆرستانه و دێ هێرشێن ئه‌سمانی زێده‌تر و ب هێزتر لێكه‌ین”.
جه‌نه‌رال كارتابولوف گوت ژی” ترسه‌كا مه‌زن یا كه‌فتیه دناڤ تیرۆرستان دا ژبه‌ر هێرشێن ئه‌سمانی یێن روسی و هه‌تا نوكه 600 تیرۆرست ژ جهێن خوه یێن ره‌ڤین و بزاڤا ده‌ربازبوونێ بۆ ئورۆپا دكه‌ن”.
ئه‌ڤرو نیوز:
مه‌لا به‌ختیار به‌رپرسێ ده‌سته‌یا كارگێرى یا مه‌كته‌با سیاسى یا ئێكه‌تیا نیشتمانى كوردستان راگه‌هاند ” ئه‌گه‌ر هه‌لبژارتنێن پێشوه‌خت بهێنه كرن، ئێكه‌تیێ دێ به‌ربژێره‌كێ بهێز بۆ پۆستێ سه‌رۆكێ هه‌رێمێ هه‌بیت”
به‌رپرسێ ده‌سته‌یا كارگێرى یا مه‌كته‌با سیاسى یا ئێكه‌تیا نیشتمانى كوردستان ئاماژه ب وێ یه‌كێ ژى كر” ئه‌گه‌ر سازان چێ نه‌بیت، ئێكه‌تیێ پرۆژه‌كێ جودا دێ بۆ هه‌لبژارتنێن پێشوه‌خت هه‌بیت”
ئه‌ڤرۆ نیوز ، له‌زگین جۆقى:
رێڤه‌به‌رێ كاروبارین ئیزدیان ل پارێزگه‌ها دهۆكێ بۆ ئه‌ڤرۆ نیوز دیاركر كو ئه‌ڤ ساله چوو فه‌رمانبه‌رێن كاروبارێن ئێزدیان ل دهۆكێ جه‌ژنا جه‌مایێ ناكه‌ن و دێ ل رۆژێن بهێنڤه‌دان ژى هه‌موو فه‌رمانبه‌رێن گریدایى رێڤه‌به‌ریا كاروبارێن ئێزدیان ل دهۆكێ ده‌وامێ كه‌ن ب مه‌ره‌ما هندێ بشێین خزمه‌تا ئاواران بكه‌ین ب تایبه‌تى ژى یا كچ وژن وزارۆیێن ره‌ڤاندى.
ئەڤرۆ نيوز:
بڕیاردەرا لیژنا ساخلەمیێ ل پەرلەمانێ کوردستانێ راگەھاند کو ھەتا نھا ھیچ حالەتێن توشبوونێ ب نەخۆشیا کۆلێرێ ل ھەرێما کوردستانێ نەھاتینە تۆمارکرن و ژ بۆ بەرھنگاربوونا ڤێ نەخۆشیێ بەرھەڤیێن ھەری باش کرینە، لێ ئاوارێن عەرەب مەترسینە بۆ بەلاڤبوونا کولێرێ.
ئاواز حەمید ئەفەندی، بڕیاردەرا لیژنا ساخلەمیێ و ژینگەھێ ل پەرلەمانێ کوردستانێ بۆ مالپەڕێ فەرمیێ پارتی دیمۆکراتی کوردستان دیار کر کو ئەو ب ھووری ھایدار نینن کو وەزارەتا ساخلەمیا عیراقێ چ بۆ نەخۆشیا کولێرێ کریە، لێ ل ھەرێما کوردستانێ ژ بۆ بەرھنگاربوونا بەلاڤبوونا ڤێ پەتایێ بەرھەڤیێن ھەری باش کرینە و گۆت “ھەر سال ھەوا دژی بەلاڤبوونا ڤێ نەخۆشیێ ل ھەرێمێ دھاتەکرن، لێ ئەڤ سالە ھەر زوو ھەوا دژی کولێرێ ھاتەکرن”.
بڕیاردەرا لیژنا ساخلەمیێ و ژینگەھێ ل پەرلەمانێ خویا ژی کر کو ل ھەندەک نەخۆشخانێن ھەرێما کوردستانێ پشکەکا قاتێن نەخۆشخانێن خوە ب ھەمی پێدڤیان ڤە بۆ ھەر حالەتەکێ نەخۆشیا کولێرێ دابین کرینە، لێ ھێشتا ھیچ حالەتەکێ نەخۆشیا کۆلێرێ ل ھەرێمێ نەھاتیە تۆمارکرن.
ئاواز حەمید ئەفەندی، بڕیاردەرا لیژنا ساخلەمیێ و ژینگەھێ ل پەرلەمانێ کوردستانێ ئاشکرا کر کو ھاتنا بەردەوام یا ئاوارێن عەرەب ژ وان دەڤەرێن ئەڤ نەخۆشیە تێدا بەلاڤبوو بۆ ھەرێما کوردستانێ مەترسی زێدە بوویە و گۆت “ھاتنا رێژەکا زۆرا ئاوارێن دەڤەرێن عیراقێ ئەگەرێن سەرەکینە کو نەخۆشیا کولێرێ ل ھەرێما کوردستانێ بەلاڤ ببیت، لەورا حوکمەتا ھەرێمێ ژی گرنگیەکا باشە دایە سەر کەمپان”.
ئەڤرۆ نیوز:
جڤاتا رۆحانیا ئێزدیان بۆ ئەڤرۆ دیار کر کو بریار ھاتە دان ئەڤ سالە رێورەسمێن جەژنا جەمایێ نەھێنە گیران ژبەر بارودوخێ ھەرێما کوردستانێ و تایبەت یێن کوردێن ئێزدی کو مال و مولکێن خوە ھیلاینە و دبن خیڤەتان دا دژین. ل دامودەزگەھێن حوکمەتا ھەرێمێ بۆ ماوی حەفت رۆژان دێ بۆ فەرمانبەرێن ئێزدی بیتە بھنڤەدان.
بریکارێ میرێ ئێزدیان حازم تەحسین بەگ بۆ ئەڤرۆ دیار کر کو ئەڤ سالە وەکو سالا بۆری رێورەسمێن جەژنا جەمایێ ناھێنە گێران ژبەر بارودوخێ ھەرێما کوردستانێ و ئاوارەبوونا وەلاتیان و رەڤاندن و کوشتنا خەلکێ سڤیل و بیگونەە ل سەر دەستێن تیرۆرستێن داعش.
کەریم سلێمان شیرەتکارێ جڤاتا رۆحانیا ئێزدیان بۆ ئەڤرۆ دیار کر کو بریارا ھاتیە دان رێورەسمێن جەژنێ نەھێنە گێران، چونکی خەلکێ ئاوارەیە و بارێ ئابووری ژی نەیی باشە و گۆت “ب تنێ ئەو رێورەسمێن فەرز دێ ل پەرستگەە لالش ھێنە کرن”
ھادی دوبانی رێڤەبەرێ کاروبارێن ئێزدیان ل پارێزگەھا دھۆکێ دیار کر کو ل رۆژا سێ شەمبیا بھێت ٦-١٠-٢٠١٥ دێ رێورەسمێن جەژنا جەمایێ دەست پێ کەت ھەتا رۆژا ١٢-١٠ دێ بەردەوام بن و رۆژا ١٣-١٠ دێ بیتە جەژن و د ڤێ ماوەی دا دێ بیتە بھنڤەدان بۆ ھەموو فەرمانبەرێن ئێزدیان ل ناڤ دامودەزگەھێن حوکمەتا ھەرێما کوردستانێ.
ئه‌ڤرۆ نيوز:
داسن فاروق بەگ ژ بنەمالا میرێ ئێزدیان بۆ رۆژناما ئەڤرۆ دیارکرکو لایەنێن سیاسی گەنگەشی ل سەر پرسا سەرۆکاتیا ھەرێمێ ناکەن، بەلکو مەرەما وان سەرۆک بارزانی و ئەوا ئەو لایەنێن سیاسی دکەن مەزنترین شاشی و مەترسیە ل سەر پاشەرۆژا پێکھاتێن کوردستانێ، تایبەتێ مەترسیا ل سەر پاشەرۆژا کوردێن ئێزدی، ژ بەر کو پارتێ ھەر ژ دامەزراندنا خوە ھەتا نوکە کارکریە بۆ دەستڤەئینان و پاراستنا مافێن کوردێن ئێزدی و ئەڤ چەندە ناھێتە ڤەشارتن لەوما کوردێن ئێزدی ل گەل مانا سەرۆک بارزانی نە.
میر داسن فاروق بەگ بۆ ئەڤرۆ گوت” ئەم ئاگەھدارین کو سەرۆک بارزانی دپەێوەندیێن بەردەوام دایە ل گەل ھەڤپەیمانان بۆ رزگارکرنا شنگالێ و ھەموو دەڤەرێن دێ یێن کوردستانێ” خویاکر ژی” ژبلێ پارتی دیموکراتی کوردستان و سەرۆک بارزانی، لایەنێن دێ یێن سیاسی پێخوەش نینە مافێن کوردێن ئێزدی د پاراستی بن ھەتاکو ھندەک لایەنێن سیاسی ب ئاشکرایێ ھەڤدژیا کوردێن ئێزدی دکەن، ئەڤجا چاوان ئەو لایەنێن سیاسی دێ مافێن مە پارێزن وبەرەڤانیێ وەکو سەرۆک بارزانی ژ کوردێن ئێزدی کەن”.
میر داسن فاروق بەگ ئاشکرا کرکو دڤی بارودوخێ ھەستیار و نازک دا، ل شوینا لایەنێن سیاسی پشتەڤانیا مانا سەرۆک بارزانی بکەن بۆ ب دووماھیی ئینانا تێرورستان وڤەگەراندنا ئاواران بۆ سەر مال ومولگێن وان ب ڕیێن ھەمە جۆر، یێ ئالۆزیان دروست دکەن ئەڤە ژی چوو خزمەتی ناگەھینتە دوزا مللەتێ کورد وگەلەک ژ خەلکێ مە دەست ب کوچکرنێ یا کری ژبەر ڤان ئالۆزیێن لایەنێن سیاسی دروست دکەن”.
میر داسنی داخواز ژ ھەموو لایەنێن سیاسی کر چو ئاستەنگ وئاریشان بۆ پرسا سەرۆکاتیا ھەرێما کوردستانێ دروست نەکەن و د ھەڤکار بن ل گەل سەرۆک بارزانێ بۆ پاراستنا مافێن ھەموو پێکھاتێن کوردستانێ ب تایبەتی ژی کوردێن ئێزدی.
نيشاندان