ئه‌ڤرۆ، هه‌له‌بجه، عه‌زیز هه‌ورامی
نڤیسه‌ر و سیاسه‌تمه‌داره‌ك د دیداره‌كێ دا ل گه‌ل رۆژناما (ئه‌ڤرۆ) دبێژیت، ئه‌وا ل به‌غدا روو دده‌ت یا چاڤه‌رێكری بوو، كو به‌ری ئه‌نجامدانا هه‌لبژارتنان ل ئیراقێ مه دیاركربوو كو ئه‌و پرۆسه دێ ئیراقێ ئێخیته به‌رده‌م چاره‌نڤیسه‌كێ نه‌دیار، ب تایبه‌تی ئه‌و چه‌ندا په‌یوه‌ندی ب حه‌شدا شه‌عبی و هێزێن نێزیك ژ ئیرانێ ڤه هه‌ی، هه‌كه ئه‌نجامێن هه‌لبژارتنان ب دلێ وان نه‌بیت و نه‌شێن پێگه و ئیمتیازاتێن خوه بپارێزن.
ئه‌بو به‌كر عه‌لی، نڤیسه‌ر و سیاسه‌تمه‌دار بۆ (ئه‌ڤرۆ) گۆت” ئه‌و لایه‌ن دخوازن كاخه‌زان تێكهه‌ل بكه‌ن و فشاران دروست بكه نبۆ قه‌ره‌بووكرنا پاشخستن شكه‌ستنا وان د هه‌لبژارتنان دا، نوكه ژی ئیراق یا ل به‌رده‌م دو رێیان دایه، هه‌لبژارتن یێن هاتینه ئه‌نجامدان، هنده‌ك گورانكاری یێن هاتینه كرن، دو هیز و ئیراده كاردكه‌ن، ئیراده‌ك دخوازیت هه‌لبژارتنان بكه‌ته ده‌ستپێكا قۆناغه‌كا نوو و دناڤ شیعان دا ره‌وتێ سه‌دری ببیته بریارده‌رێ ئێكێ، زۆرینه‌كا نیشتمانی د چارچۆڤێ ئیراقێ دا دروست ببیت كو سه‌دری دخوازن، ئیرادا دویێ ژ هێزێن نێزیك ژ حه‌شدا شه‌عبی و ئه‌وێن ناڤێ خوه كریه ( چارچۆڤێ هه‌ماهه‌نگیا شیعی) ب تایبه‌تی هادی عامری و نوری مالكی، پێك دهێت و دخوازن ب هه‌مان شێوێ پێشتر حوكمه‌تا ئیراقی یا ته‌وافوقی بیت بۆ وێ چه‌ندێ پشكداریه‌كا كاریگه‌ر د رێڤه‌برنا ده‌وله‌تێ دا هه‌بیت و ئیمتیازات و پێگه‌هێ خوه ژده‌ست نه‌ده‌ن”.
ئه‌بوبه‌كری ئاماژه كر كو ب ڤێ چه‌ندێ ده‌رگه‌ه ل سه‌ر زێده‌تر ژ سیناریۆیه‌كی یێ ڤه‌كریه، هێشتا زوویه به‌حس ل ئێكلاكرنا ململانێیان بكه‌ین، چاڤه‌رێ دهێته كرن ژی فشار زێده‌تر ببن و دبیت به‌ر ب توندوتیژیه‌كا زێده‌تر بچن.
گۆت ژی” ب دیتنا من هه‌كه حوكمه‌تا زۆرینه‌ژی ب رێیه‌ریا ره‌وتێ سه‌دری بهێته پیكئینان، كێشێن ئیراقێ چاره‌سه‌ر نابن، چونكه ئه‌و كێشه د كوورن و ره‌وتێ سه‌دری ژی كێشا خوه یا هه‌ی و ده‌ستێوه‌ردان ژی دێ ئالۆزیان زێده‌رت لێكه‌ن، له‌وما یا ب زه‌حمه‌ته ئیراق بچیته قۆناغه‌كا نوو”.
سه‌باره‌ت لایه‌نێن كوردی، دبێژیت” كورد نه‌شێن ب ئازادی هژمارا كورسیێن خوه بكاربینیت و بریارێ بده‌ن، بۆ نموونه د ئازاد نینن بریارێ بده‌ن ل گه‌ل ره‌وتێ سه‌دری زۆرینه‌یا په‌رله‌مانی پێك بیننو حوكمه‌تێ دروست بكه‌ن و گوه نه‌ده‌ن هه‌لویستێ ئیرانێ و نوری مالكی و هادی عامری، هه‌تاكو پشتی پێكئینانا حوكمه‌تێ ژی، هه‌كه به‌رۆڤاژی خواستێن كوردان ژی بلڤیت، كاخه‌زا خوه‌ڤه‌كێشانێ ژ حوكمه‌تێ بكاربینن”.
پتر رۆهنكر” راسته كورد وه‌كو هژماره‌كا فراكسیۆنان دێ چنه به‌غدا، به‌لێ ده‌رئه‌نجامێ دووماهیێ گه‌ل و پێكهاته‌نه، له‌وما یا پێدڤیه هه‌موو لایه‌نێن كوردی پێكڤه بزانن كو فراكسیۆنێن پێكهاته‌كێ دیاركری نه و هژماره‌كا بابه‌تێن گرنگ و ستراتیژی یێن هه‌ین كو په‌یوه‌ندی ب به‌رژه‌وه‌ندیێن گشتی و چاره‌نڤیس و پاشه‌رۆژا هه‌رێما كوردستانێ و ده‌ستكه‌فتێن وێ یێن هه‌ین و قابلی وێ چه‌ندێ نین نكو ل سه‌ر د ناكۆك بن و ئه‌ركێ نیشتمانی یه د وان پرسان دا هه‌ماهه‌نگیێ بكه‌ن و د ئێك هه‌لویست بن”. ل دووماهیێ گۆت” ب گرنگی دبینم پارتی و ئێكه‌تی هه‌ڤپه‌یمانیه‌كێ ل به‌غدا دروست بكه‌ن”.
نيشاندان
