ئەڤرۆ نيوز:
مامۆستایەکێ زانکۆیا دھۆکێ راگەھاند، ترسا وێ چەندێ ھەیە نەبتنێ ھەرێما کوردستانێ ببیتە ئارمانجا ھەڤپەیمانیا چار قۆلی، بەلکو ھەرێم بگەھیتە قەناعەتەکێ کو پێتڤیە بچیتە دناڤدا و ب ڤێ چەندێ سەربورا ھەرێما کوردستانێ بەر ب ئاقارەکێ دی بچیت.
ئدریس مووسا ماۆستایێ پەیوەندیێن نێڤدەولەتی ل زانکۆیا دھۆکێ بۆ رۆژناما ئەڤرۆ گوت” دو پێشڤەچوونێن گرنگ یێن روژەڤێ ل سووریێ وعیراقێ گرێدای روسیانە. ل سووریایێ، روسیا ئاستێ ھەبوونا لەشکری بلندکر و ل گەل ئیرانێ وسووریێ وعیراقێ گەھشتە رێککەفتنەکا چار قولی. دھێتە گوتن مەرەما ڤان پێنگاڤان ئەوە داعش بھێتە ژناڤبرن، لێ موسکۆ ئەڤرۆ مفای ژ زنجیرەکا پێشڤەچوونان دبینیت ب مەرەما زێدەکرنا سەنگا خوە، نەبتنێ ل سووریێ وعیراقێ، بەلکو ل رۆژھەلاتا ناڤەراست ب شێوەکێ گشتی. ژ بەر کو ئەڤ چەندە دبەرژەوەندیا ئەمریکا دا نینە، ل گەل روسیا، ئەمریکا دیبیتە ئێک ژ سەرکێشێن دوو قولپان وئەڤ ھەردوو قولپە دێ ھەڤرکیێ بۆ کارتێکرنێ کەن، ودھەبوونا ڤێ سیناریویێدا، رولێ گرنگێ ھەرێما کوردستانێ دیاردبیتن.
لدۆر پێشڤەچوونێن نوو و کارتێکرنا وان ل سەر ئەمریکا دبێژیت ” ھەبوونا لەشکرێ ئەمریکی ل عیراقێ تا رادەیەکی گەرەنتیا کارتێکرنا ئەمریکی ل عیراقێ دکر و ڤەکێشانا وی ڤالاتیەک پەیداکر. وەلاتێن ھەرێمی بزاڤ دکرن ڤێ ڤالاتیێ تژی بکەن ومفادارا ئێکێ ژ ژناڤچوونا رژێما بەعس ل عیراقێ ئیرانە، وئەڤ چەندە ل سەر حیسابا سعودیێ یە کو ھەڤرکا ئیرانێیە و ھەڤپەیمانا ئەمریکا یە”.
ل دۆر مەرەمێن روسیا ژ مایتێکرنا وێ، ئیدریسی گوت” روسیا بزاڤ دکەت ھەبوونا خوە ل عیراقێ ب ھێز بێخیتن وسروشتێ سیاسی ل بەغدا دەلیڤا ڤێ چەندێ ددەتن. سێگوشا روسی-ئیرانی-سوری دوور نینە بیتە چارگوشا روسی-ئیرانی-سوری-عیراقی ژ بەر پەیوەندیێن روسیا ل گەل ئیرانێ وسووریێ وگرێدانا تایفی دناڤبەرا ئیرانێ وعیراقێ وسووریێ، ھەروەسا کارتێکرنا ئیرانی ل سەر عیراقێ زێدەباری ھەڤرکیا سێگوشێ ل گەل ئەمریکا وکێشانا عیراقێ بۆ چارگوشێ ودەرخستنا وێ ژ مەیدانا کارتێکرنا ئەمریکی”.
دەربارێ ھەرێما کوردستانێ و ئاستێ گرنگیدانا ئەمریکا ب ھەرێمێ پێتڤیە ب چوو ئاوایەکی بیت گۆت”رەوشا ھەرێما کوردستانێ گەلەک یا ھەستیارە. گەفا ئەمنی ل سەر ھەرێمێ یا ھەی، بارێ ئابووری یێ لاوازە وکارتێکرنا ئیرانێ یا دیارە. لەوما ترسا وێ چەندێ ھەیە نەبتنێ ھەرێما کوردستانێ ببیتە ئارمانجا چارگوشێ، بەلکو ھەرێم بگەھیتە قەناعەتەکێ کو پێتڤیە بچیتە دناڤا چارگوشێدا و بڤێ چەندێ سەربورا ھەرێما کوردستانێ ئەوا ب ھاریکاریا رۆژئاڤای ھاتیە ئاڤاکرن و بھێزکرن وپاراستن، بۆ جارا ئێکێ پشتی پتر ژ بیست وپێنج سالان، بەر ب ئاقارەکێ دیتر بچیت. ئەوا پێتڤیە ل سەر ئەمریکا بھێتەکرن ژبو رێگریکرنێ ل ڤێ چەندێ ئەوە پێگەھێ کوردی ب ھێزتر بێخیت، ب تایبەتی ژلایێ ئابووری ولەشکری ڤە وئەڤ چەندە فاکتەرەکە ژبۆ کارتێکرنێ ل سەر بەغدا وتەھرانێ ودیمەشقێ. پێتڤیە ھەرێما کوردستانێ ب ھشیارێ سەرەدەریێ دگەل پێشڤەچوونان بکەت و ل گەل گوھۆرینا جوریا سیاسەتا ئەمریکی وب ھێزکرنا ھەرێما کوردستانی کو ل پاشەروژێ د کەمپا روژئاڤادا جھگیربیت ودھەڤکێشا ھێزێ دا ل رۆژھەلاتا ناڤەراست یا کارێگەر بیت”.

ئەڤرۆ نیوز، سالار دۆسکی:

سەرۆکێ لژنا نەزاھێ ل پەرلەمانێ کوردستانێ کو ژ فراکسیۆنا ئێکگرتوویا ئیسلامی یا کوردسستانێ یە، پێشتر ئاشکرا کر بوو کو وى ئەندامەتیا خوە راگرت وەک ھەلویست دژی نە نێزیک بوونا پارتێن سیاسی، به‌لێ ل رێکەفتی ٣٠-٩-٢٠١٥ عومەر کوچەر سەرۆکێ لژنا نەزاھێ ل سەرپەرشتیا کومبوونەکا لژنا ناڤبری کر.
عومەر کوچەر ھەمبەر شکاندنا ڤی ھەلویستی بۆ ئەڤرۆ نیۆز گۆت: سەرۆکێ لژنەکا گرنگا پەرلەمانێ کوردستانێ مە و گەلەک کێشە و ئاریشێن خەلکی د دەستێ مە دانە و دڤێت بھێنە چارەسەرکرن و ھەر ھەلویستێ مە ژی یێ جاران بۆ ھندێ بوویە پارتێن کوردی بەر ب سازانێ و کومبوونێ بچن و ئەڤە ژی ھەر بۆ خەلکی بوویە.
کوچەری گۆت ژی: ئەگەر بۆ دانا پارێزگەرەکی شەش ھەیڤ پێڤە بچن و پێکئینانا حوکمەتێ سالەک پێڤە بچیت، ئایا دانانا سەرۆکی دێ چەند پێڤەچیت؟

ئەڤرۆنیۆز، سالار دۆسکی:

ئەندامەکێ پەرلەمانێ کوردستانێ ژ لیستا زەر د پەیجێ خوەیێ تایبەتێ فەیسبووکی دا ئاماژە ب شەرەکێ گەرم کریە ل رۆژھەلاتا ناڤین و تایبەت وەلاتێن عیراق و سووریێ.
دلشاد شەعیان غەفار، ئەندامێ پەرلەمانێ کوردستانێ، دپەیجێ خوە دا گۆتیە ب ھاتنا رۆسیا بۆ سوریێ ئێدی ھەر تشتەک ئاشکرابوو، شەرێ جەمسەرێ رۆسیا و ئەمریکا ژ ساریێ بەر ب گەرمیێ دچیت و شەرێ ھەر دو جەمسەران ل سەر ھەڤپیەمانێن وانە.
دلشادی ئاماژەکریە وێ چەندێ ژی کو ل گەل دەسپێکرنا ئەڤی شەری، دڤێت کومبوونێن پێنچ قولی ب دووماھی بھێن، ئەگەر ھەبن ژی دڤیت خەلک چاڤەرێ نەکەت و ب بریارا گەلی دڤێت ئێدی بتنێ مەسعود بارزانی ب سەرۆک بزانین ھەتا ئەڤ شەرە ب دووماھی بھێت، چونکە دناڤبەرا ئەڤان ھەر دو شەران دا مە کوردان پێدڤی ب کەسەکێ خودان ھزر و شارەزا و دبلومات و لەشکەری ھەیە بۆ مفا وەرگرتن ژ گوھۆرینێن پێشبینی دھێتەکرن، چونکە ھەر شاشیەکا بھێتەکرن ل سەر ئاستێ سەرکرداتیا کوردی دێ باجا وێ پاشەرۆژێ زەرەمەند بین.