ئه‌ڤرۆ نیوز:
فوئاد حسێن سه‌رۆكێ دیوانا سه‌رۆكایه‌تیا هه‌رێما كوردستانێ راگه‌هاند كومبوونا بهێت یا 5 لایه‌نان دێ دووماهى كومبوون بیت ل سه‌ر پرسا سه‌رۆكایه‌تیا هه‌رێمێ.
فوئاد حسێن د كۆنفرانسه‌كێ رۆژنامه‌ڤانى دا راگه‌هاند” رۆژا 4 شه‌مبى یا بهێت دێ لایه‌نێن سیاسى دووماهى كومبوون ئه‌نجام ده‌ن و گۆت” دڤێت به‌ره‌ڤ بریارا دووماهیێ بچین.
ئه‌ڤرۆ بۆ جارا چوارێ، پێنج لایه‌نێن سیاسى ل سه‌ر پرسا سه‌رۆكایه‌تیێ كوم بوون و نه‌گه‌هشتنه سازانێ.
ئەڤرۆنیۆز:
ژێدەرەکى بۆ ئەڤرۆ نیوز راگەھاند کو د کۆمبوونا ئەڤرۆ یا ھەر پێنج لایەنێن سیاسی دا ئەوا ل سلێمانيێ ھاتیە کرن، پارتی دیموکراتی نەرمی نیشاندایە و رازیبوویە کو دانوستاندن ل سەر کێمکرنا دەستھەلاتێن سەرۆکێ ھەرێمێ بھێنە کرن، لێ د ھەمان دەم دا تەکەستی ل سەر وێ چەندێ کریە کو سەرۆک راستەوخو ژ لایێ وەلاتیان ڤە بھێتە ھەلبژارتن نەک برێیا پەرلەمانی.
ل گور وی ژێدەری بزاڤا گۆڕان د دانوستاندنان دا داخواز کریە کو جێگرەکێ دی ژی بۆ سەرۆکێ ھەرێمێ بھێتە دانان ئانکو سەرۆکێ ھەرێمێ دو جێگر ھەبن کو یێ دووێ ل دووڤ ئیستیحقاقێ ھەلبژارتنان بەھرا گۆڕان بیت، لێ پارتی رازیبوونا خو ل سەر ڤێ چەندێ دیار نەکریە و دایە زانین کو فەرە سەرۆکێ ھەرێمێ ب تنێ ئێک جێگر ھەبیت.
ئه‌ڤرۆ نیوز:
فرسه‌ت سۆفی ئه‌ندامێ لژنا دانوستندكار یێ پارتى دیموكراتى كوردستان راگه‌هاند” كومبوونێن 5 قولى دێ د به‌رده‌وام بن و لایه‌ن یێن هاتینه راسپاردن كو خالێن هه‌ڤپشك و خالێن ناكوك ب حزبێن خوه بگه‌هینن بۆ وێ یه‌كێ ل ناڤ حزبێن خوه دیراسه بكه‌ن و گۆت”
بریاره رۆژا 4 شه‌مبى ل باژێرێ هه‌ولێرێ بۆ جاره‌كادى هه‌ر 5 لایه‌ن كومببن”.
ئه‌ڤرۆ نيوز:
ئه‌ندامه‌كێ مه‌كته‌با سیاسى یا پارتى دیموكراتى كوردستان راگه‌هاند، هه‌كه لايه‌نێن سياسى نه‌گه‌هنه رێكه‌فتنێ دڤێت بۆ بۆچوونا خه‌لكى ڤه‌گه‌رن، ئاماژه ب وێ چه‌ندێ ژى كر كو پارتى يا رژده ل سه‌ر وێ چه‌ندێ سه‌رۆكێ هه‌رێما كوردستانێ د ناڤ خه‌لكى دا بهێته هه‌لبژارتن.
مه‌سرور بارزانى ئه‌ندامێ مه‌كته‌با سياسى يا پارتى ديموكراتى كوردستانه، ده‌رباره‌يى پرسا سه‌رۆكاتيا هه‌رێما كوردستانێ راگه‌هاند: “پارتى يا رژده ل سه‌ر وێ چه‌ندێ كو سه‌رۆكێ هه‌رێما كوردستانێ د ناڤ خه‌لكى هه‌لبژێريت”.
مه‌سرور بارزانى ئاماژه ب وێ چه‌ندێ ژى كر كو هه‌كه لايه‌ن رێكه‌فتن تشته‌كێ باشه، به‌لێ هه‌كه لايه‌ن رێ نه‌كه‌فتن دڤێت بۆ بۆچوونا خه‌لكى ڤه‌گه‌رن، دا كو چاوانيا هه‌لبژارتنا سه‌رۆكێ هه‌رێمێ ديار بكه‌ن.
چه‌ند رۆژه هه‌ر پێنج لايه‌نێن سياسى ل هه‌رێما كوردستانێ “پارتى، گۆڕان، ئێكه‌تى، يه‌كگرتوو و كۆمه‌ل” د كۆمبوونێن به‌رده‌وام دانه بۆ گه‌هشتن ب رێكه‌فتنێ ل سه‌ر پرسا سه‌رۆكاتيا هه‌رێمێ و راستڤه‌كرنا قانوونا سه‌رۆكاتيا هه‌رێمێ.
ئه‌ڤرۆ نيوز:
به‌رى ده‌مه‌كێ كێم كۆمبوونا هه‌ر پێنج لايه‌نێن سياسى يێن پشكدار د په‌رله‌مانێ كوردستانێ ل ئۆتێلا گراند مليۆم ل پارێزگه‌ها سلێمانيێ ل دۆر ئێكلاكرنا پرسا سه‌رۆكاتيا هه‌رێمێ ب دووماهى هات.
ئه‌ڤ كۆمبوونا ڤان لايه‌نێن سياسى يا چارێ بوو پشتى سێ ل پارێزگه‌ها هه‌ولێر ئه‌نجام داين، چو ژى ژێ نه‌هاتيه زانين كا ئايا نێزيكى چو رێكه‌فتنان بووينه يان ژى هێشتا بۆچوونێن وان ژێك د دوورن، بڕيار ژى دايه چو داخۆيانيا ل سه‌ر ڤێ كۆمبوونێ نه‌ده‌نه ده‌زگه‌هێن راگه‌هاندنێ.
ئه‌ڤ پێزانينێن ل به‌ر ده‌ست ئه‌ڤرۆ نيوز ئاماژێ ب وێ چه‌ندێ ژى دكه‌ن كو نوكه ب تنێ كێشه ل سه‌ر شێوازێ هه‌لبژارتنا سه‌رۆكێ هه‌رێمێ ماينه كو پارتى پێداگريێ ل سه‌ر وێ چه‌ندێ دكه‌ت ژ لايێ خه‌لكى ڤه بيت و لايه‌نێن ژى دخوازن د ناڤا په‌رله‌مانى دا بيت، بۆ ڤێ مه‌ره‌مێ ژى پارتى پرۆژه‌كێ نوو بربوو ناڤ كۆمبوونا لايه‌نێن سياسى.
هه‌تا نوكه نه‌هاتيه زانين ژى كا دێ به‌رده‌وامى ب ڤان ره‌نگه كۆمبوونان هێته دان، يان ژى دێ دووماهى كۆمبوون بيت، ئانكو ژڤانێ چو كۆمبوونا بهێت نه‌هاتيه دياركرن.
ئه‌ڤرۆ نيوز:
د پرێس كونفرانسه‌كی دا ئه‌ڤرۆ رێكه‌فتی 23ى ته‌باخا 2015ێ به‌رپرسێ راگه‌هاندنا به‌ره‌ڤانیا باژێری ل دهۆكێ ئامارا وه‌رزێ هاڤینێ بۆ رۆژنامه‌ڤانان دا دیار كرن.
رائيدێ مافپه‌روه‌ر بێوار عه‌بدولعه‌زیز حه‌مید، به‌رپرسێ راگه‌هاندنا به‌ره‌ڤانیا باژێری ل دهۆكێ، گۆت: “د ماوێ 10 سالێن بۆرى دا، وه‌كو ئه‌ڤ ساله روودانێن ئاگربه‌ربوونێ ب پيش و په‌له‌خى په‌يدا نه‌بووينه كو ب ره‌گه‌كى د سێ هه‌يڤێن بۆرى دا 590 روودانێن ئاگربه‌ربوونا پيش و په‌له‌خى هاتينه تۆماركرن كو تێدا پتر ژ 42 هزار دۆنه‌مێن ئه‌ردى هاتينه سۆتن”.
رائيدێ مافپه‌روه‌ر گۆتژى: “پتريا ڤان روودانان ژ ئه‌گه‌رێ توپبارانكرنا فرۆكێن جه‌نگى يێن توركيا ل سنورێ قه‌زا ئامێديێ بووينه و تيمێن مه بۆ ماوێ چه‌ندين رۆژان ل ڤان چيايان هه‌تا كونترۆلا ڤان ئاگرا هاتيه كرن”.
ئه‌و چه‌نده ژى ئاشكه‌را كر كو ئه‌ڤ ساله 29 كه‌س بووينه قوربانى ڤان روودانا كو 21 كه‌س خه‌ندقينه كو پتريا وان ئاواره بووينه و ژ ئه‌گه‌رێ نه‌شاره‌زايا ده‌ڤه‌رێ بووينه و هه‌شت كه‌س سۆتينه.
دا زانين ژى كو ل ده‌سپێكا ئه‌ڤ ساله هه‌تا نوكه 1982 روودان هاتينه تۆماركرن و ب كۆژمێ سێ مليار و 250 مليۆن و 50 هزار ديناران زيان هه‌بووينه.
به‌رپرسێ راگه‌هاندنا به‌ره‌ڤانیا باژێری ل دهۆكێ ل دووماهيێ ژى داخواز ژ وه‌لاتيان كر كو ل گه‌ل تيمێن ئاگر ڤه‌مراندنێ د هاريكار بن دا كو بشێن كونترۆلا ئاگران بكه‌ن ژ به‌ر كو هێشتا وه‌رزێ هاڤينێ يێ مايى و دبيت هێشتا روودانێن ئاگر به‌ربوونێ په‌يدا ببن.
ئه‌ڤ به‌رچاڤكرنا ئامارا رێڤه‌به‌ريا به‌ره‌ڤانيا باژێرى د ده‌مه‌كى دايه كو ئه‌ڤرۆ ژى ئاگر به‌ربوو ئاقارێن گۆندێن ده‌وروبه‌رێ باژێر دهۆكێ ل رۆژهه‌لاتێ پارێزگه‌هێ.
ئەڤرۆ، زنار تۆڤی:
نوونەرێ حوکمەتا ھەرێما کوردستانێ ل ئێکەتیا ئورۆپا بۆ ئەڤرۆ نیوز خویاکر:کو ئەڤڕۆ رۆژا ئێکشەمبی 23ى ته‌باخا 2015ێ ئێکەتیا ئورۆپی ب فەرمی دێ ئۆفیسا خوە ل ھەولێرا پایتەخت ڤەکەت.
ڤەکرنا ڤێ ئۆفیسێ ب ھەماھەنگیا ئێکەتیا ئورۆپا ل ھەرێما کوردستانێ،پشتی ھەولێن سەرکردایەتیا سیاسیا کوردستانێ و بتایبەتی سەرۆک مەسعود بارزانی و نێچیرڤان بارزانی و فەرمانگەھا پەیوەندیێن دەرڤە و نوونەراتیا حوکمەتا ھەرێما کوردستانێ بووینە ل ئێکەتیا ئورۆپا و گۆت ژی: “ڤەکرنا ئۆفیسا ئێکەتیا ئورۆپا ل ھەولێرێ بریارەکا گرنگا ئێکەتیا ئورۆپایە بۆ بھێزکرن و پەرەپێدانا پەیوەندیێن دناڤبەرا ھەرێما کوردستانێ و ئێکەتیا ئورۆپا دا”.
دلاوەر ئاژگەیی نوونەرێ حوکمەتا ھەرێمێ ل ئێکەتیا ئورۆپا زێدەتر گۆت: “ئەڤ ئۆفیسە دەسکەفتەکێ دیرووکیە بۆ ھەرێما کوردستانێ و پالپشتەکێ بھێزە و پەیامەکا روونا ئێکەتیا ئورۆپایە بۆ گرنگی پێدانێ ب ھەرێما کوردستانێ و پێگەھێ وێ ل ناڤچەیێ و جیھانێ دا”.
ھەروەسا دیارکر ژی:پەیوەندیێن دناڤبەرا ھەرێما کوردستانێ و ئێکەتیا ئورۆپا د ماوێ بۆریدا پێشکەفتنەکا بەرچاڤ ب خوەڤە دیتیە و گەھشتیە ئاستەکێ باش و نوونەراتیا حوکمەتا ھەرێمێ شیایە پێگەھێ کوردستانێ ل ناڤەندێن گرنگێن ئێکەتیا ئورۆپی و ب تایبەتی کۆمسیۆنا ئورۆپا و پەرلەمانێ ئورۆپا بلند بکەت و چەندین دەستکەفتێن گرنگ بۆ کوردستانێ بدەستڤە بینیت.
ناڤھاتی دیارکر ژی:نوونەراتیا حوکمەتا ھەرێمێ ل ئێکەتیا ئورۆپا دێ بەردەوام بیت ل کارکرنێ ژبۆ درۆستکرنا پرەکا ب ھێز د ناڤبەرا کوردستانێ و ئێکەتیا ئورۆپا ژ پێناڤێ بەرژەوەندا سیاسی و ئابووری و بازرگانی دناڤبەرا ھەردو لایان دا.
ئه‌ڤرۆ نيوز:
سه‌رۆك وه‌زيرێن عيراقێ سێ وه‌زيرێن حوكمه‌تا عيراقێ دێ گوهۆڕيت و گۆرانكاريان ژى ل چه‌ند وه‌زاره‌تان كه‌ت و مه‌رجه‌عيه‌تا ئاينى ژى ل عيراقێ پشته‌ڤانيا وى دكه‌ت.
ب تۆمه‌تا گه‌نده‌ليێ بڕياره د چه‌ند رۆژێن داهاتى دا حه‌يده‌ر عه‌بادى سه‌رۆك وه‌زيرێن عيراقێ دێ گوهۆڕينان د چه‌ند وه‌زاره‌تان دا كه‌ت ب تايبه‌ت ده‌ست ژ كاركێشانا وه‌زيرێ كاره‌بێ و تێكه‌لكرنێ ل گه‌ل وه‌زاره‌تا په‌ترۆلێ و وه‌زاره‌تا ژێده‌رێن ئاڤێ ل گه‌ل چاندنێ.
ئه‌ندامه‌كێ ده‌وله‌تا قانوونێ ژى كو ناڤێ خوه ئاشكه‌را نه‌كريه بۆ ميديا عيراقى راگه‌هانديه كو دهێته پێشبينيكرن وه‌زاره‌تا خواندنا بلند و په‌روه‌ردێ ژى ببنه ئێك.
مه‌رجه‌عيه‌تا ئاينى ژى ل عيراقێ راگه‌هانديه كو ئه‌و پشته‌ڤانيا گوهۆڕينێن عه‌بادى دكه‌ت و داخواز ژێ دكه‌ت كو ڤان گوهۆڕينا بێ ڤه‌گه‌ريان بۆ لايه‌نێن سياسى بكه‌ت ژ به‌ر كو داخوازيێ خه‌لكى نه.
ئه‌ڤرۆ نيوز:
سه‌رۆكێ فراكسيۆنا يه‌كگرتوو ل په‌رله‌مانێ كوردستانێ به‌رسڤا په‌رله‌مانتاره‌كێ فراكسيۆنا گۆڕان ب دژوارى دده‌ت و رادگه‌هينيت: “ب هزاران ئه‌ندامێن يه‌كگرتوو ل سه‌ر ده‌ستێ گۆڕانخوازان هاتينه زيندانكرن و بێحورمه‌تى و سكڤاتى ل گه‌ل هاتيه كرن”.
ئه‌بۆ به‌كر هه‌له‌ده‌نى، سه‌رۆكێ فراكسيۆنا يه‌كگرتوو ئيسلامى كوردستان ل په‌رله‌مانێ كوردستانێ د روونكرنه‌كێ دا كو وێنه‌ك ب ده‌ست ئه‌ڤرۆ نيوز كه‌فتيه، به‌رسڤا په‌رله‌مانتاره‌كێ فراكسيۆنا گۆڕان ب دژوارى دده‌ت ل به‌رامبه‌ر گۆتنا ئاخفتنێن كرێت ب جزبا وى و دبێژيت: “ب هزاران ئه‌ندامێن يه‌كگرتوو ل سه‌ر ده‌ستێ گۆڕانخوازان هاتينه زيندانكرن و بێحورمه‌تى و سكڤاتى ل گه‌ل هاتيه كرن و نوكه ژى چاكسازيان ب مه د فرۆشن”.
د وێ روونكرنێ دا، سه‌رۆكێ فراكسيۆنا يه‌كگرتوو به‌حسێ په‌رله‌مانتار ئه‌نوه‌ر قادر ئه‌ندامێ فراكسيۆنا گۆڕان ل په‌رله‌مانێ كوردستانێ دكه‌ت و دبێژيت: “خيانه‌ت ئه‌وه جه‌نابێ ته تشته‌ك د مێشكى دا نينه بوويه ئه‌ندامێ لژنا قانوونى. تو هه‌موو تشتان دزانى ژبلى قانوونێ و هه‌ڤالێن من دزانن ئه‌ڤه ساله‌ك و چار هه‌يڤه ب ئێك ده‌سته‌واژه ژى ته خزمه‌ت ب لژنا قانوونى نه‌كريه”.
دبێژيتژى: “ئه‌وى په‌رله‌مانتارى ئاخفتنێن كرێت گۆتينه يه‌كگرتوو كو ب هزاران ئه‌ندامێن (زيندانى و بێ پشك و بێحورمه‌تى و سڤكاتى) پێ كريه و ل سه‌ر ده‌ستێ هنده‌ك گۆڕانخوازان كو ل گه‌ل وى هاريكار بووينه و ديموكراسيێ و چاكسازيێ ل به‌رێ هه‌لدگرن و هوون ب خوه پشكدارێن هه‌ره كارا يێن ب هه‌ده‌ردانا مالێ گشتى و بنه‌جهكرنا گه‌نده‌ليێ نه ل ڤێ هه‌رێمێ”.
ده‌قێ روونكرنێ
وه‌ڵامێك بۆ وته نه‌شیاوه‌كانی په‌رله‌مانتارێكی فراكسیۆنی گۆڕان
له چاوپێكه‌وتنێكی گۆڤاری لڤیندا ئه‌نوه‌ر قادر له فراكسیۆنی بزوتنه‌وه‌ی گۆڕان كۆمه‌لێك وته‌ی نه‌شیا و و جوێنی ئاڕاسته‌ی یه‌كگرتووی ئیسلامی كردووه كه پاڵ بزوتنه‌وه‌ی گۆڕاندا نه‌بوایه زاتی ئه‌وه‌ی نه‌ده‌كرد به ئێمه مان بلێ (خائن و دووڕ و چه‌واشه‌كار و بێ جورئه‌ت و ترسنۆك و له‌باردا نه‌بوو).
ئه‌و په‌رله‌مانتاره جوێن به یه‌كگرتوویه‌ك ده‌دات كه هه‌زاران ئه‌ندامی (زیندانی و بێ به‌ش و بێحورمه‌تی و سوكایه‌تی) یان پێكراوه له‌سه‌رده‌ستی هه‌ندێك گۆڕانخواز كه له‌گه‌ڵ تۆدا هاوكارن و لافی چاكسازی و دیموكراسیشمان به‌سه‌ره‌وه لێده‌ده‌ن و به‌شدارێكی كارابوون له به‌هه‌ده‌ردانی سامانی گشتی و چه‌وساندنه‌وه و گه‌نده‌ڵی له‌م هه‌رێمه‌دا.
نه‌مده‌ویست له ئاستی كه‌سێكی وادا قسه بكه‌م به‌ڵام له‌به‌ر هه‌ندێك ئیعتیبار به كورتی ده‌ڵێَم خیانه‌ت كامه‌یه:-
1. خیانه‌ت ئه‌وه‌یه تۆ له‌سه‌ر كورسی په‌رله‌مانێك دانیشتویت و شایسته‌ی نیت.
2. خیانه‌ت ئه‌وه‌یه جه‌نابت سه‌ره واو ێكت له مێشكدا نی یه‌و بویته ئه‌ندامی لیژنه‌ی یاسایی. كه هه‌موو شتێك ده‌زانیت جگه له یاسا و هاوكارانم ده‌زانن ئه‌م ساڵ و چوار مانگه به‌یه‌ك ده‌سته‌واژه و ڕسته خزمه‌تت به لیژنه‌ی یاسایی نه‌كردوه.
3. خیانه‌ت ئه‌وه‌یه هه‌موو كاری په‌رله‌مانتاری له جنیۆوداندا خڕ بكه‌یته‌وه.
4. خیانه‌ت ئه‌وه‌یه خۆت لێبگۆڕێت، ئاخر چیت له ئێمه‌زیاتر كردوه، هه‌موو خه‌ڵكی كوردستان ده‌زانێت كه ئه‌گه‌ر یه‌كگرتوو (نیسابی 23 ی حوزه‌یران) و (نیسابی لیژنه‌ی یاسایی) (نیسابی واژۆی لیژنه‌ی یاسایی) ته‌واو نه‌كردایه كۆبونه‌وه‌ی نائاسایی له دایك نه‌ده‌بوو.
بۆیه ئامۆژگاریت ده‌كه‌م ده‌ست له‌م موهاته‌راته هه‌ڵبگریت تۆ مافی ئه‌وه‌ت نی یه موزایه‌ده به‌سه‌ر ئێمه مانانه‌وه بكه‌یت كه هه‌موو ته‌مه‌نمان له خزمه‌تی (شۆڕش و خه‌ڵك و كوردایه‌تی و چاكسازی و نیشتمان په‌روه‌ریدا) به‌سه‌ربردوه. ته‌نها قامێكمان له قه‌ڵافه‌تی شێره به‌فرینه‌ی تۆ (ئازایی و جورئه‌ت و رۆشنبیری و بوێری و یاسایی و راستگۆ) تره.
جوێندان و په‌لاماردانی ئێمه و مانان جگه له گه‌مژه‌یی و ناحاڵی بوون هیچی تر نی یه چونكه خه‌ڵك هه‌موان ده‌ناسن و ئه‌و شاهیدیه بۆ خه‌ڵكی كوردستان به‌جێده‌هێڵم.
(والعاقل یكفیه الاشاره)
ئه‌بوبه‌كر هه‌ڵه‌دنی
نيشاندان