ئه‌ڤرۆ:
بسپۆره‌كێ په‌یوه‌ندیێن نێڤده‌وله‌تی راگه‌هاند كو سه‌ره‌دانا سه‌رۆكێ هه‌رێما كوردستانێ بۆ بریتانیا و ئه‌و پێشوازیا گه‌رم یا كو لێ هاته كرن نیشا دده‌ت كو هه‌رێما كوردستانێ ئێدی رۆله‌كا كاریگه‌ر ل رۆژهه‌لاتا ناڤین دگێریت و بێگومان بهێزبوونا هه‌رێما كوردستانێ كاریگه‌ریا خوه یا باش ل پارچێن دی یێن كوردستانێ ژی دكه‌ت.
د. ئه‌رده‌شێر په‌شه‌نگ بسپۆرێ په‌یوه‌ندیێن نێڤده‌وله‌تی راگه‌هاند كو كێمتر ژ مه‌هه‌كێ دو روودانێن گه‌له‌ك گرنگ و دیرۆكی روو دان، یا ئێكێ سه‌ره‌دانا سه‌رۆكێ فره‌نسا ئیمانوێل ماكرۆن بۆ هه‌رێما كوردستانێ بوو و یا دویێ ژی سه‌ره‌دانا به‌رێز نێچیرڤان بارزانی سه‌رۆكێ هه‌رێما كوردستانێ بۆ بریتانیا بوو، ئه‌ڤ هه‌ر دو روودانه د ماوه‌یێ كێمتر ژ مه‌هه‌كێ نیشا دده‌ن كو هه‌رێما كوردستانێ ئێدی رۆله‌كا كاریگه‌ر ل ده‌ڤه‌رێ دگێریت و وه‌لاتێن بهێز یێن جیهانێ وه‌كو فره‌نسا و بریتانیا ژی گه‌له‌ك گرنگیێ دده‌نه هه‌رێما كوردستانێ و گۆت: (گه‌له‌ك فاكته‌ر هه‌نه كو وه‌سا كرینه نها بریتانیا و فره‌نسا پتر ژ هه‌ر جاره‌كێ گرنگیێ بده‌نه هه‌رێما كوردستانێ، چونكو د شه‌رێ ل دژی داعشێ دا هه‌رێما كوردستانێ رۆله‌ك سه‌ره‌كی گێرا و خالا دی پێكڤه‌ژیانا نها ل هه‌رێما كوردستانێ بۆ هه‌موو جیهانێ ب تایبه‌تی ژی بۆ وه‌لاتێن ئێكه‌تیا ئورۆپا گه‌له‌ك گرنگه، هه‌رێما كوردستانێ بوویه مودێله‌كا رێڤه‌به‌ریا دیموكراتی ل هه‌موو رۆژهه‌لاتا ناڤین و ژ به‌ر هندێ ژی بریتانیا پشته‌ڤانیێ ل كوردستانه‌كا بهێز ل ئیراقێ دكه‌ت).
ناڤهاتی د پشكه‌كا دی یا ئاخڤتنا خوه دا ئه‌و یه‌ك ژی دیار كر نها وه‌كو به‌رێ نینه و ئێدی كورد د هه‌ر گوهۆرینه‌كێ دا خوه‌دان رۆلن، ژ به‌ر هندێ ژی وه‌لاتێن زلهێزێن جیهانێ نه‌شێن وه‌كو سه‌دسالا بۆری بێی كوردان چو به‌رنامه‌كێ ل ده‌ڤه‌رێ بجه بكه‌ن، ئانكۆ كورد بووینه هێزه‌كا كاریگه‌ر و ئێدی وه‌لاتێن وه‌كو بریتانیا و فره‌نسا نه‌چارن ژ بۆ هه‌ر پێنگاڤه‌كا نوو ل رۆژهه‌لاتا ناڤین هزرا كوردان ژی بكه‌ن، بێگومان ئه‌و یه‌ك ژی بۆ سیاسه‌تا راست و دروست یا سه‌ركردایه‌تیا سیاسی یا هه‌رێما كوردستانێ ڤه‌دگه‌ریت كو شیایه تا راده‌یه‌كێ باش به‌رگیریێ ژ مافێن كوردان بكه‌ن و پێگه‌هێ هه‌رێما كوردستانێ ژی بهێزتر لێ هاتیه و گۆت: (بهێزبوونا پێگه‌هێ دبلۆماسی یێ هه‌رێما كوردستانێ بوویه جهێ دلگرانیا وه‌لاتێن رۆژهه‌لاتا ناڤین، چونكو تشتێ نها دیار دبیت وه‌لاتێن رۆژئاڤایی دخوازن هنده‌ك ژ وه‌لاتێن رۆژهه‌لاتا ناڤین لاواز ببن و ژ به‌ر هندێ ژی پشته‌ڤانیێ ل هه‌رێما كوردستانێ و پێكڤه‌ژیانا نها ل هه‌رێما كوردستانێ دكه‌ن، ب تایبه‌تی ژی گوهۆرینه‌كا به‌رچاڤ د سیاسه‌تا بریتانیا ل هه‌مبه‌ر ئیراقێ و هه‌رێما كوردستانێ دا هه‌یه).
بسپۆرێ په‌یوه‌ندیێن نێڤده‌وله‌تی د دووماهیا ئاخڤتنا خوه دا ئه‌و یه‌ك ژی دیار كر كو بزاڤێن سه‌رۆكێ هه‌رێما كوردستانێ بۆ بهێزكرنا پێگه‌هێ سیاسی یێ هه‌رێما كوردستانێ بوویه جهێ دلخوه‌شیا هه‌موو كوردان، چونكو ئه‌ڤرۆكه هه‌ر گوهۆرینه‌ك ل هه‌رێما كوردستانێ روو بده‌ت كاریگه‌ریا خوه ل كوردێن هه‌موو جیهانێ دكه‌ت، ژ به‌ر هندێ ژی كوردێن هه‌ر چار پارچێن كوردستانێ ژ پێشڤه‌چوونێن نها ل هه‌رێما كوردستانێ كه‌یفخوه‌شن و گۆت: (ده‌مێ سه‌رۆكێ هه‌رێما كوردستانێ سه‌ره‌دانا بریتانیا یان هه‌ر وه‌لاته‌كێ دی دكه‌ت، یان ژی ده‌مێ سه‌ركردێن جیهانێ سه‌ره‌دانا هه‌رێما كوردستانێ دكه‌ن به‌حسێ كوردان دهێته كرن، ئانكۆ وی ده‌می تنێ بابه‌ت هه‌رێما كوردستانێ نینه، ئانكۆ ب گشتی پرسا كوردان ل رۆژهه‌لاتا ناڤین دبیته رۆژه‌ڤا جیهانێ و ئه‌و یه‌ك ژی بۆ هه‌موو كوردان گرنگه، بێگومان بهێزبوونا هه‌رێما كوردستانێ دهێته رامانا بهێزبوونا هه‌موو كوردان).
نيشاندان
