ئه‌ڤرۆ نيوز:

ل دۆر رەوشا ئافرەتێن زیندانکری ل چاکسازیا سنێلا و ئافرەتان ل دھۆکێ و چەوانیا رەفتاکرنێ ل گەل وان، رێڤەبەرێ چاکسازیا سنێلا و ئافرەتان ل دھۆکێ دبێژیت “ژ ھەموو ئالیان ڤە سەرەدەریا ژ ھەژی ل گەل دھێتە کرن و نھا ئاڤاھیەک تایبەت بۆ وان دھێتە دروستکرن”.
زەکی سالح موسا رێڤەبەرێ چاکسازیا سنێلا و ئافرەتان ل دھۆکێ بۆ رۆژناما ئەڤرۆ دیار کر کو، ھەر ئافرەتەکا ب بریارا دادوەری بھێتە زیندانکرن پێشەکی رەوانەی نۆشداران دھێنەکرن ژبۆ ئەنجامدانا ھەموو تاقیکرنێن نەخۆشیان، داکو بزانن کا چ نەخۆشیێن ڤەگر ل جەم ھەنە یان نە و راپۆرتا پزیشکی دێ چیتە د ناڤ بادەکا وان دا و بۆ پشکا ئافرەتان دھێنە رەوانەکرن و ل پشکا راگرتیان دھێتە زیندانکرن ھەتا رۆژا دادگەھکرنێ.
رێڤەبەرێ چاکسازیا سنێلا و ئافرەتان ل دھۆکێ ل دۆر پاسەوان و کارمەندێن وان گۆت “ھەموو پاسەوان و نۆشدار و مامۆستا و فەرمانبەرێن مە ئافرەتن و ب ھیچ شێوەکی نابیت زەلام نێزیکی لایێ ئافرەتان ببن، چونکی ئافرەت دشێت سەرەدەریێ دگەل ئافرەتا بکەن تا وی رادەی ئینان و برنا وان بۆ دادگەھێ، پاسەوانێن مە یێن ژن دگەل دچن”.
زەکی سالح موسا ئاماژە ب رەوشا سلامەتیا وان کر کو، ھەموو نۆشدارێن بسپۆر، بگرە ژ نۆشدارا ددانا و یا گشتی و یا ئافرەتان بۆ وانا دابین کرینە و گۆت “لێ نۆشدارا مەیا دەروونی نھا ڤەقەتیایە، ژبەر قەیرانا دارایی مە داخوازا نۆشدارا دەروونی نەکریەڤە، لێ دبینم نۆشدارا دەروونی رۆلەکێ گرنگێ بۆ زیندانیان ھەی”.
ل دۆر ئاڤاھیێ زیندانێ زەکی دیار کر کو، بەری نھا کێم زیندانی ھەبوون، لێ پشتی ھاتنا ئاواران و قەیرانا دارایی رۆژانە گەلەک ئاریشە روو ددەن و زیندانی پتر لێھاتینە، لەورا نھا پێدڤی ئاڤاھیەکێ مەزنترن و گۆت ” پشکا ئافرەت و سنێلان دێ ھێنە ژێک جوداکرن و بنە دو ئاڤاھی، لێ نھا کار د ئاڤاھیێ ئافرەتان دا دھێتەکرن، لێ یێ سنێلان ژبەر قەیرانا دارایی ھێشتا مە دەست نەھاڤێتیێ، چونکی ھەموو پرۆژە ھاتینە راوەستاندن”.
رێڤەبەرێ چاکسازیا سنێلا و ئافرەتان ل دھۆکێ ل دۆر چەوانیا دەم بوراندنێ ئاشکرا کر کو تشتێ ھەری گرنک دەم ناھێتە فەوتاندن و گرنکی ب دەمی دھێتە دان و گۆت “مە قوتابخانا ب لەز یا ھەی و باوەرناما باوەرپێکری دھێتە وەرگرتن و مە وەرشێن دارتاشی و سەرتراشین و درینگەە و کۆمپیوتەر ھەنە کو فێری ھەموو تشتا دبن، ھەروسا وەرزش بەردەوام دھێتەکرن”.
محەمەد ئەحمەد سنێلەیەکە د ژیێ ١٧ سالیێ دایە و ھاتیە حوکمکرن دیار کر کو، پاسەوان و فەرمانبەرێن چاکسازیێ گەلەک دباشن و ھەموو تشتا بۆ دابین دکەن و ھەست پێ ناکەن کو د زیندانکرینە، لێ تشتێ نەباش ل ڤێرێ ئەوە فەرق و جوداھیێ دکەن د ناڤ بەرا زیندانیان دا، لەورا داخاز کر کو ئەو تشت نەمینیت و گۆت “خواندنا مە ژدەست مە نەچوویە و مە ل ڤێرە تمام کریە، ھەروسا فێری گەلەک سەربۆرا بووینە کو ھەکە دەرکەڤین تووشی چو ئاریشا نەبینەڤە”.
ڤیان حەسەن ئافرەتەکا د ژیێ ٢٤ سالیێ دایە، شەش سالان ھاتیە حوکمکرن و ئەڤە سالەک بۆری دیار کر کو، ھەر زیندانیەک ب ھەر کارەکی ھاتبیتە گرتن یێ پەشیمانە، زێدەباری کو چاڤدێر و پاسەوانێن وان ھەموو ئافرەتن و گەلەک دباشن و سەرەدەریەکا باش دگەل دکەن، لێ زیندان نەجھەکێ خۆشە و گۆت “من ل ڤێرە زارۆیەکێ بووی”.
ھەروەسا ڤیانێ گۆت “داخوازا من ئەوە حوکمەت ژلایێ مادی ڤە ھاریکاریا مە بکەت، چونکی ئەم زۆر د پێدڤینە، ھەروسا دخوازم زارۆیێن مە بیننە دەف مە و ئەڤە چەند جاران مە داخواز کریە لێ نائینن، چونکی مە ژی مافێ دیتنا زارۆیێن خوە ھەیە”.
ل داویێ رێڤەبەرێ چاکسازیا سنێلا و ئافرەتان ل دھۆکێ بەحسێ ئافرەتێن دوگیان کر و گۆت “حالەتێن ئافرەتێن دوگیان دکێمن، لێ مە نۆشدارێن ئافرەت ھەنە کو سەرەدەریێ دگەل وانا بکەن ھەتا زارۆبوونێ و ئەو زارۆ ل دەف دەیکا خوە مەزن دبیت ئەم رێگر نەبووینە”.