ئه‌ڤرۆ نیوز:

سه‌را چوونا بن ئه‌رد چوونا 30 سه‌نتیمێن پرا خانى لژنه‌یه‌ك ژ باژێرڤانى و قائیمقامى و پارێزگارێ دهۆكێ هاتیه‌ پێكئینان بۆ دووڤچوونا ئه‌نجامێن دووماهیێ. باژێرڤانیا زاخۆ ژى دبێژیت: هه‌كه‌ لیژنه‌یا زانستى ره‌زامه‌ندى ل سه‌ر دانانا پرێ نه‌دان، دێ ل سه‌ر كیستێ كۆمپانیا دیزاینه‌رى جاره‌كا دى سه‌ر ژ نوو هێته‌ درۆستكرن.

ئه‌ندازیار بژار مۆنیب بو رۆژنامه‌یا ئه‌ڤرۆ دیار كر، پرا خانى خه‌له‌تیه‌ك پشتى سه‌بكڕنێ تێدا هاتیه‌ كرن، ئانكۆ پێشنیاز ئه‌و بوو 20 سم بۆ بن ئه‌رد پرۆژه‌ بهێته‌ خوار، لێ نۆكه‌ گه‌هشتیه‌ زێده‌ترى 30 سم، ئه‌م ل گه‌ل سه‌رپه‌رشتێن پرۆژه‌ى و كۆمپانیایێ جڤیاین و گۆت: ل دۆر ڤێ مه‌ره‌مێ لیژنه‌یه‌ك ژ باژێرڤانیا نوونه‌رێ قائیمقامى و پارێزگه‌هێ تێدا پشكدارن، مه‌ خالێن خوه‌ نڤێسین و پێشكێشى پارێزگه‌هێ كرینه‌، بۆ هندێ بریارا ئێكلاكه‌ر د ڤێ ده‌ربارێ دا بده‌ن.
محه‌مه‌د حه‌سه‌ن شۆفێرێ ته‌كسیێ بوو د ناڤخۆیا زاخۆ دا كار دكه‌ت بۆ رۆژنامه‌یا ئه‌ڤرۆ دیار كر، هندى ئه‌م چاڤه‌رێ دكه‌ین هه‌ردو پرێن خانى و ئۆڤه‌رپاسا سه‌رێ گۆندى درۆست بن، لێ هه‌ر جاره‌كێ بهانه‌یه‌كێ كارى گیرۆ دكه‌ن و كه‌س نینه‌ لێپیچینه‌یان ژ كۆمپانیان وه‌ربگرن، ژ به‌ر هه‌موو هه‌ڤپشكێن ئێكن و گۆت: ژ قه‌ره‌بالغیێ كار تێدا بێ تام بوویه‌، رێیا سه‌ره‌كى د ناڤ بازارى دا و ل پشت بازارى دا ده‌رباز دبیت، ئه‌ڤه‌ ژى شۆفێرێن ته‌كسیان ژ هه‌موویان زێده‌تر زیانێ ژ گیروكرنا ڤان پرۆژه‌یان دبینن.
كۆمپانیا زانین ژى ئاشكرا كر، گرانیا قه‌بارێ پرا خانى سێ هزار ته‌نن، ژ به‌ر گڤاشتنا كێبلێن ده‌وروبه‌رێن پرێ بۆ راگرتنا به‌لانسا پرێ ژ هه‌ردوولایان ڤه‌ هاتینه‌ دانان، نێزیكى 10 سم پر هاتیه‌ خوار، ئه‌ڤه‌ ژى تسته‌كێ نۆرماله‌ ب ناڤێ كۆمپانیێ دبێژن: درێژاهیا پرا خانى 65 مه‌ترن و پشتى مه‌ راوێژ ژى ل گه‌ل دیزاینه‌رێ پرێ كرى ل گۆره‌ى پێشبینیان هه‌تا نهۆ چو كارتێكرنێن خوه‌ نه‌كرینه‌، چاره‌سه‌ریێن پێدڤى ژى بۆ دهێنه‌ كرن.
بژار مۆنیب ته‌كه‌ستكر، ئه‌ندازیارێن وان پله‌یا زانستى یا پرۆفیسۆر نینن بكارن وێ وه‌كو لێپیچینه‌وه‌ وێ بریارێ بده‌ن كا خه‌مسارى هاتیه‌ كرن یان ژى كێشه‌ نینن و گۆت: نه‌خشه‌سازێ پرێ پله‌یا وى یا زانستى پرۆفیسۆره‌، دێ مینیت راوێژ ب هنده‌ك پرۆفیسۆران بهێته‌ كرن، دووڤچوونا وى بابه‌تى دهێته‌ كرن، لیژنه‌یا زانستى بریار ل سه‌ر دانانا پرێ نه‌دان، جاره‌كا دى سه‌ر ژنوو دێ پر ل سه‌ر كیستێ كۆمپانیا دیزاینه‌رى هێته‌ درۆستكرن.

ئه‌ڤرۆ:
قاسم سمێر فه‌رماندێ پێشمه‌رگه‌ى ل میحوه‌رێ شنگال دیار كر كو وان گه‌له‌ك پێخوه‌شه‌ تله‌عفه‌ر به‌رى شنگالێ بهێته‌ رزگاركرن، چونكو تیرورسَتێن داعش یێن ئه‌فغانى و پاكستانى و وه‌لاتێن دى یێن بیانى د شنگالێ دا نه‌ماینه‌ ئه‌و تیرۆرستێن د ناڤ شنگال دا نوكه‌ شه‌ڕى دكه‌ن هه‌موو عه‌ره‌بێن ده‌وروبه‌رێن شنگالێ و تله‌عفه‌رێنه‌ و بۆ ئه‌ڤرۆ گۆت:(رزگاركرنا شنگال 12 ده‌مژمیران ڤه‌ناكێشیت).

ئه‌ڤرۆ نیوز:
سه‌رۆكێ كۆتلا برایه‌تى و پێكڤه‌ ژیانێ ل جڤاتا پارێزگه‌ها نه‌ینه‌وا بۆ ئه‌ڤرۆ دیار كر كو پشتى بزاڤێن وان یێن به‌رده‌وام ئه‌و شیان حوكمه‌تا عیراقێ رازى بكه‌ن بۆ ڤه‌گوهاستنا هه‌موو پۆلیسێن ئێزدى ژ به‌غدا و پارێزگه‌هێن دى یێن عیراقێ بۆ ناحیا سنوونێ و ده‌ڤه‌را شنگال و گۆت” ل ده‌مه‌كێ نێزیك ئه‌ڤ بڕیاره‌ دێ كه‌ڤیته‌ د وارێ ب جه ئینانێ دا و چ پۆلیسێن ئێزدى ل به‌غدا نامینن”. سه‌یدو چه‌تو، سه‌رۆكێ كۆتلا برایه‌تى و پێكڤه‌ ژیانێ ل جڤاتا پارێزگه‌ها نه‌ینه‌وا ئاشكرا كر كو ده‌مێ پارێزگه‌ها نه‌ینه‌وا كه‌فتیه‌ د بن ده‌ستێن رێكخراوا تیرۆرستى یا داعش دا حوكمه‌تا عیراقى ب بڕیاره‌كێ هه‌موو پۆلیسێن ئێزدى ڤه‌گوهاستنه‌ به‌غدا و هنده‌ك پارێزگه‌هێن دى یێن عیراقێ، به‌لێ پشتى بزاڤێن به‌رده‌وام ژ لایێ جڤاتا پارێزگه‌ها نه‌ینه‌وا ڤه‌ هاتینه‌ كرن ئه‌و شیان وه‌زیرێ به‌رگیرى و ناڤخوه‌ یێ عیراقێ رازى بكه‌ن جاره‌كا دى بڕیارێ بده‌ت هه‌موو پۆلیسێن ئێزدى ژ به‌غدا بۆ ده‌ڤه‌را شنگال و ناحیا سنوونێ بهێنه‌ ڤه‌گوهاستن.
ناڤهاتى ئاماژه‌ دا وێ چه‌ندێ كو نوكه‌ 12 یه‌كێن ئێدارى یێن سه‌ر ب پارێزگه‌ها نه‌ینه‌وا ڤه‌ د رزگاركرینه‌ و د بن كۆنترۆلا هێزێن پێشمه‌رگه‌ێ كوردستانێ دانه‌ و گۆت:” مه‌ داخواز ژ به‌غدا كریه‌ بۆ رزگاركرنا هه‌موو ده‌ڤه‌رێن دێ یێن سه‌ر ب پارێزگه‌ها نه‌ینه‌وا ڤه‌ ب هه‌موو شیانێن خوه‌ هاریكاریا هێزێن پێشمه‌رگه‌ى بكه‌ت”.

ئه‌ڤرۆ نیوز:

ئێكه‌تیا ئوروپا د كومبوونا بروكسلدا رێككه‌فتن كو 100 هزار ناڤه‌ندێن ڤه‌حه‌واندنێ بۆ پێشوازیكرنا په‌نابه‌ران ب درێژاهیا رێكا یونان تا ئه‌لمانیا بهێنه‌ دابینكرن.
هه‌روه‌سا سه‌ركردێن ولاتێن ئێكه‌تیا ئوروپا رێككه‌فتن ل سه‌ر وێ یه‌كێ كو ئێكه‌تیا ئوروپا بۆ چاڤدێریكرنا سنوران، چالاكیێن خوه‌ ل سه‌ر سنورێن یونان ومه‌كدونیا زێده‌تر لێ بكه‌ن بۆ توماركرنا ناڤێ وان كه‌سێن دخوازن ده‌رباز دبن.

ئه‌ڤرۆنیۆز، ئه‌یاد به‌روارى
سه‌رۆكێ توركی هێزێن كوردی ل سووریێ ب وێ چه‌ندێ تومه‌تباركرن كو بزاڤا كونترۆلا باكوورێ سووریێ دكه‌ن و گوت توركیا وێ چه‌ندێ قه‌بوول ناكه‌ت.
سه‌رۆكێ توركیا ره‌جه‌ب ته‌یب ئه‌ردۆگان ل باژێرێ غازی ئه‌نتاب یێ توركی نه‌رازیبوونا توركیا ژ وێ پێرابوونا هاتیه‌ كرن ئه‌وژی باژێركێ (گرێ سپیێ) بوویه‌ پشكه‌ك ژ ئیدارا خوه‌سه‌ر یا كوردان.
سه‌رۆكێ توركی ره‌خنه‌ ل وان وه‌لاتێن پشته‌ڤانیا هێزێن پاراستنا گه‌ل دكه‌ن، لێ ئاماژه‌ ب ناڤێ چو ژ وان وه‌لاتان نه‌كر و گوت ژی” 1400 ئه‌ندامێن پارتیا كاركه‌رێن كوردستانێ (په‌كه‌كه‌) یێن دناڤ رێزێن هێزێن پاراستنا گه‌ل دا”.
ئه‌ردۆگانی گوت ژی” یا وان دڤێت كونترۆلكرنا هه‌موو باكوورێ سووریێ یه‌، ئه‌ز ب رۆهنی دێ بێژم ئه‌م قه‌بوول ناكه‌ین باكوورێ سووریێ ببیته‌ قوربانیا پرۆژێ وان د بن هه‌ر ره‌وشه‌كێ دا، چونكی ئه‌ڤه‌ گه‌فه‌ ل سه‌ر مه‌ و ئه‌سته‌مه‌ بۆمه‌ وه‌كو (توركیا) بێژین (به‌لێ) بۆ ڤێ گه‌فێ”.
هێزێن پاراستنا گه‌ل، بالێ له‌شكریێ په‌یه‌دێ ل خزیرانا بۆری باژێركێ (گرێ سپیێ) یێ سنۆری ل گه‌ل توركیا ژ ده‌ستێ داعشێ رزگاركربوو ب پشته‌ڤانیا ئه‌سمانی یا ئه‌مریكی و ل هه‌فتیا بۆری ژی بریارهاته‌ دان بچیته‌ ب سه‌ر ئیدارا خوه‌سه‌ریا كوردی ڤه‌.