ئه‌ڤرۆ نیوز:
سوبه كومبوونا هه‌ر پێنج لایه‌نێن سیاسى یێن سه‌ره‌كى ل هه‌رێما كوردستانێ ل باژێرێ هه‌ولێرێ دێ هێته ئه‌نجامدان و په‌یڤدارێ مه‌كته‌با سیاسى یا یه‌كگرتووى ئیسلامى كوردستان دبێژیت: لایه‌ن دێ ل سه‌ر ئاستێ مه‌كته‌با سیاسى نوێنه‌رێن وان به‌رهه‌ڤى كومبوونێ بن.
هیوا میرزا په‌یڤدارێ مه‌كته‌با سیاسى یا یه‌كگرتووى ئیسلامى كوردستان گۆت” یه‌كگرتوو ژووره‌كا عه‌مه‌لیاتا د ناڤبه‌را هه‌ر پێنج لایه‌نێن سیاسى، پارتى و گوران و ئێكه‌تیى و یه‌كگرتوو و كومه‌ل پێكئینایه بۆ چاره‌كرنا پرسا سه‌رۆكایه‌تیا هه‌رێمێ و خوشبه‌ختانه هه‌موو ئالى د رازینه و سوبه ل سه‌ر ئاستێ مه‌كته‌ب سیاسى دێ كومبوون هێنه كرن.
ئه‌ڤرۆ نیوز:
سكرتێرێ مه‌كته‌با سیاسى یا پارتى دیموكراتى كوردستان راگه‌هاند چ حزبه‌كێ ماف نینه سیسته‌مێ حوكمى دیار بكه‌ت و پێدڤیه گه‌ل بریارێ ل سه‌ر شێوازێ حوكمى بده‌ت.
فازڵ میرانی، سكرتێرێ مه‌كته‌با سیاسى یا پارتى دیموكراتى كوردستان راگه‌هاند : مه ناكوكى ل سه‌ر شێوازێ هه‌لبژارتنا سه‌رۆكێ هه‌رێما كوردستانێ یێن هه‌ین، هه‌لبژارتنا سه‌رۆكێ هه‌رێما كوردستانێ ژ ئالیێ خه‌لكى ڤه، واتایێ وێ یه‌كێ نینه كو سیسته‌مێ حوكمرانیێ سه‌رۆكایه‌تیه.
ئه‌ڤرۆ نیوز، ئه‌یاد:
وه‌زیرێ وزێ و ژێده‌رێن سروشتی یێ توركی راگه‌هاند، په‌قینه‌ك د هێلا بۆریێن په‌ترۆلا كه‌ركووك _ یومورتالك كو په‌ترۆلا كه‌ركووكێ بۆ به‌نده‌رێ جیهان یێ توركی ل ویلایه‌تا ئه‌ده‌نا ڤه‌دگوهێزیت دروستبوویه.
ل دووڤ ئاژانسا ئه‌نادول یا توركی، وه‌زیرێ وزێ و ژێده‌رێن سروشتی یێ توركی تانه‌ر یه‌لدیز دیاركر كو ئه‌و په‌قین ل ده‌مژمێر ئێك و نێڤ ل سپێده‌یا چارشه‌مبی ل دووری پێنج كیلۆمه‌تران ژ باژێرێ جزیرێ یێ سه‌ر ب ویلایه‌تا شرناخێ ڤه هاتیه ئه‌نجامدان.
وه‌زیرێ توركی پارتیا كاركه‌رێن كوردستانێ (په‌كه‌كه) ب ئه‌نجامدانا ڤێ هێرشێ تۆمه‌تباركر و گوت ” ئه‌و په‌قین چو كارتێكرنێ ل چونا په‌ترۆلی و هنارتنا وی ب رێیا به‌نده‌رێ جیهان یێ توركی ناكه‌ت”.
ئه‌ڤرۆ نیوز، قائید میرو
هه‌موو كار ئاسانی دێ بۆ ئینانا گه‌شتیاران هێنه‌كرن ده‌سته‌یا گشتیا گه‌شت و گوزارێ و كۆمه‌له‌یا ئوتێل و خوارنگه‌هاند بڕیاردا، د ده‌مێ ئینانا گروپێن گه‌شتیاری دا 50%ێ بهایێ ئوتێل و خوارنگه‌هان بهێته كێمكرن.
نادر رۆستی، په‌یڤدارێ ده‌سته‌یا گشتیا گه‌شت و گوزارێ ب ئه‌ڤرۆ نیۆز راگه‌هاند” ده‌سته‌یا گشتیا گه‌شت و گوزارێ ب مه‌ره‌ما دانوستانان ل دۆر ره‌وشا گه‌شت و گوزارێ دگه‌ل لایه‌نێن په‌یوه‌ندیدار كۆمبوویه و تێدا ب هویری ره‌وشا گه‌شتیاران بۆ هه‌رێما كوردستانێ هاتیه گوتوبێژكرن.
رۆستی دیاركر، دگه‌ل كۆمه‌له‌یا ئوتیل و خوارنگه‌هان گه‌هشتینێ رێكه‌فتنێ، دده‌مێ هاتنا گروپێن گه‌شتیاری دێ 50%ێ بهایێ ئوتێل و خوارنگه‌هان هێته كێمكرن، ئه‌ڤه‌ژی بۆ پتر راكێشانا گه‌شتیاران و هه‌موو كار ئاسانی دێ بۆ ئینانا گه‌شتیاران هێنه‌كرن.
ئه‌ڤرۆ نيوز، نيوار محه‌مه‌د سه‌ليم:
وەزارەتا پەروەردێ بریار دا کو ھەموو باخچە و پولا ئێکێ بنەرەتی خواندن ب زمانێ ئێنگلیزی بیت و ل سالا خواندنێ 2015-2016 بریارە ھەموو باخچێن پارێزگەھا دھۆکێ و 42 قوتابخانێن بنەرەتی کو نێزیکی پێنج هزار قوتابی دێ مفاداربن ژڤێ چەندێ و خواندن ب زمانێ ئینگلیزی بیت بابەتێن (بیرکاری – زانستەکان) دێ ئەڤ سیستەمە لێ ھێتە بجهـ ئینان و ل سالا خواندنێ 2016-2017 بریارە ھەموو قوتابخانە ل ھەرێما کوردستانێ ڤی سیستەمی پەیره‌و کەن”.
عه‌بد یوسف ئه‌حمه‌د رێڤەبەرێ گشتی یێ پەروەردا پارێزگەھا دھوکێ بۆ ئه‌ڤرۆ نيوز دیار کر کو بریار ھاتیە دان ھەموو باخچە و قوتابخانێن ھەرێما کوردستانێ پوۆا ئێکێ بنەرەتی بابەتێن (بیرکاری – زانست) خواندن ب زمانێ ئێنگلیزی بیت”.
ھەروەسا رێڤەبەرێ گشتی گۆت : “پشتی وەزارەتا پەروەردێ ڤەکولین کرین کو سیستەمەکێ ب ڤی رەنگی ل ھەرێما کوردستانێ بھێتە بجهـ ئینان بریار ھاتە دان کو ئەڤ سیستەمە بھێتە بجھئینان و ھەموو پێدڤیێن بجهـ ئینانا ڤی سیستەمی ژ ھەموو لایەکی ڤە ژ ڤەکرنا خولا بۆ مەشق کرن و ئامادەکرنا ماموستایان و پەیرەوپروگرامێ خواندنێ ئامادەکرینە و بۆ ماوێ نێزیکی 60 رۆژان دێ ماموستا بۆ ڤێ مەرەمێ ھێنە مەشق کرن”.
ئەڤرۆ نیوز، زنار تۆڤی:
ئاژانسا ئانادۆل یا تورکی دا دیارکرن پشتی ئەمریکا چەندین ھەولداین بۆ بکارئینانا بنگەھێ ئنجەرلیک یێ ئەسمانی ل دژی داعشێ،لێ تورکیا رێک پێ نەددا و رازی نەدبوو کو ئەمریکا وی بنگەھی بکاربینیت،لێ پشتی گفتۆکرنەکا درێژ دناڤبەرا ھەردو وەلاتان دا ئەڤرۆ رۆژا چارشەمبی حووکمەتا تورکیا ب فەرمی بنگەھێ ئنجەرلیک یێ تورکی رادەستی ھێزێن ئەمریکی کر،لەورا ژ ئەڤرۆ پێڤە ئەمریکا دێ شێت ب ساناھیتر جھێن داعشێ بۆردومان کەت،دھەمان دەمدا راگەھاندنا وەزارەتا دەرڤە یا تورکی ئاشکەراکر:ئەو رێکەفتنە دگەل واشنتن بۆ لێدانا داعشێ یە،نەکو بۆ پشتەڤانیا شەرڤانێن کوردە ل سۆریێ.
ئه‌ڤرۆ نیوز،زنار تۆڤى:
ژ ئه‌گه‌رێ بلندبوونا پلێن گه‌رمێ ل زۆربه‌یا ده‌ڤه‌رێن عێراقێ ئه‌ڤرۆ روژا چارشه‌مبى حووكمه‌تا عێراقێ بریاردا كو سۆبه‌هى رۆژا پێنجشه‌مبى 30/7/2015 ببیته بهێنڤه‌دانا فه‌رمى ل سه‌ر جه‌م دام و ده‌زگه‌هێن حكوومى،هه‌روه‌سا رۆژا ئێكشه‌مبیا بهێت ژى ژ ئه‌گه‌رێ بلنبوونا پلێن گه‌رمێ 2/8/2015 كریه بهێنڤه‌دانا فه‌رمى بۆ هه‌مى فه‌رمانبه‌رێن حووكمه‌تێ.
ئه‌ڤرۆ نیوز،زنار تۆڤى:
پشتى ئه‌ڤرۆ رۆژا چارشه‌مبى 29/7/2015 ب به‌رهه‌ڤبوونا سه‌رۆكێ په‌رله‌مانى لیژنا یاسایى ل په‌رله‌مانێ كوردستانێ كۆمبوونا خوه بۆ به‌رهه‌ڤكرنا پرۆژه یاسایێ سه‌رۆكاتیا هه‌رێمێ ئه‌نجام دا،لێ فراكسیۆنا پارتى دوێ كۆمبوونێ دا به‌رهه‌ڤ نه‌بوو، له‌ورا د هه‌مان ده‌مدا په‌یڤدارێ فراكسیۆنا پارتى ل په‌رله‌مانێ كوردستانێ كۆنگره‌كێ رۆژنامه‌ڤانى ئه‌نجام دا و تێدا دیاركركو سه‌رۆكێ په‌رله‌مانێ كوردستانێ حزبایه‌تیێ دكه‌ت و ئه‌ركه‌كێ حزبایه‌تیێ د په‌رله‌مانى دا دگێریت.
محه‌مه‌د عه‌لى یاسین په‌یڤدارێ فراكسیونا پارتى ل په‌رله‌مانێ كوردستانێ گۆت ژى:سه‌رۆكێ په‌رله‌مانى ئه‌گه‌رێ تێكدانا سازانێ یه،كو به‌رى هنگێ كریه،هه‌روه‌سا سه‌رۆكێ په‌رله‌مانى پیشێلیا یاسایێ په‌رله‌مانى كریه و بێ لایه‌نیا خوه ژ ده‌ستدایه.
ئەڤرۆ نیوز،زنار تۆڤی:
ئاژانسا ئانادۆل یا تۆرکی دا دیارکرن کو ئەڤرۆ رۆژا چارشەمبی ٢٩-٧-٢٠١٥ دەستەیا دۆزگەریا گشتی یا ئەنقەرێ دوسیەیەک بۆ راکرنا پارێزبەندیێ ل سەر ھەڤسەروکێ پارتا دیموکراتیا گەلان(ھەدەپە) سەلاحەدین دەمیرتاشی ڤەکر،ژ پێخەمەت پارێزبەندی ل سەر بھێتە راکرن.
ئەڤ چەندە ھات پشتی کو دەمیرتاشی د داخویانیەکێ دا بەری ھەلبژارتنێن پەرلەمانێ تورکیا دا گۆتی،کو ئاکەپێ تیمەک ژ ٣٥٠٠ کەسان پێکئینایە ژبۆ مەرەما سەختەکاریێ دھەلبژارتنان دا،لەورا جێگرێ سەرۆکێ ئاکەپێ سولێمان سۆیلۆ دوسیەیەک ل دژی سەلاحەدین دەمیرتاشی ل سەر ڤێ مژارێ ڤەکریە،ھەروەسا دەستەیا دۆزگەریا گشتی داخۆیانیا دەمیرتاشی ب بەزاندنا سنۆرێن ئازادیا دەربرینێ ل تورکیا وەسفکریە.
لەورا دوسیەیەک بۆ راکرنا پارێزبەندیێ(حێانە) لسەر وی ئامادەکریە و برێیا وەزارەتا داد یا تورکی ھنارتیە پەرلەمانێ وی وەلاتی. ھەروەسا دیارکریە:ئەگەر سەرۆکاتیا پەرلەمانێ تورکیا ڤێ دوسیەیێ بێخیتە دبەرنامەیێ کاری دا،پەرلەمانتار دێ دەنگی ل سەر راکرنا پارێزبەندیێ ل سەر دەمیرتاشی دەن،ئەگەر پارێزبەندی ل سەر دەمیرتاشی ھاتە راکرن.
ئەڤ چەندە دێ کارتێکرنەکا مەزن کەتە سەر ھەدەپێ و دێ زیانێن مەزن گەھنێ.
نيشاندان