ئەڤرۆ نیوز،زنار تۆڤی:
وەزیرێ دەرڤە یێ کۆمارا نەمسا سیباستیان کورتیس دپرێس کونفرانسەکی دا دیارکر کو وەلاتێ وی دڤێت کۆنسلخانەیا خوە ل هەرێما کوردستانێ ڤەکەت.
مەرەم ژڤەکرنا کونسلخانێ ئەوە کو وەلاتێ نەمسا ژ نێزیک هایداری رەوشا کوردستانێ بیت و هەروەسا ئەو دێ شێن پتر هاریکاری و پێدڤیان گەهیننە ئاوارەیان کوردستانێ..
ئەڤرۆ نیۆز، قائید میرۆ:
ژ ئەگەرێ بوردۆمانا فڕۆکەیێن ھەڤپەیمانان و تۆپخانەیێن پێشمەرگەی ل دۆڕیانا کەسکێ ھژمارەکا تیرۆرستێن داعش ھاتنە کوشتن.
عەقید دلشاد مەولوود، بەرپرسێ ھۆبا راگەھاندنا فەرماندێ زێرەڤانی بۆ ئەڤرۆ نیۆز گۆت: “دەمژمێر نەھی شەڤا بۆری، پشتی دەستکەفتنا زانیاریان ھێزێن پێشمەرگەی ب رێیا ئەردی و ھەڤپەیمانان ل ئەسمانی دوو بنگەھێن تیرۆرستێن داعش ل گوندێ تەشتێ یێ نێزیک دۆڕیانا کەسکێ بوردۆمانکرن”.
عەقید دلشاد گۆتژی: “ب گورەی زانیاریێن دەست فەرماندەیێن زێرەڤانی کەفتین ژ ئەگەرێ بوردۆمانا شەڤا ترۆمبێلەکا جۆرێ پیکاب مەرزیە ھاتیە ژناڤبرن و 9 چەکدارێن داعش ھاتینە کوشتن”.
ئەڤرۆ
بریارە قەیرانا سوتەمەنیێ و کێم و خراپیا کوالیتا پەنزینێ ئاشتی ھەورامی وەزیرێ سامانیچن سرۆشتی بچیتە پەرلەمانێ کوردستانێ .
د.عیزەت سابیر لژنا پیشەسازی و وزە و ژێدەرێن سروشتی ل پەرلەمانێ کوردستانێ راگەھاند: سوبە رۆژا دو شه‌مبى رێكه‌فتى ٢٩حوزەیرانێ ٢٠١٥ ئاشتی ھەورامی وەزیرێ سامانێن سروشتی ل گەل لژنا تایبەتمەند ل پەرلەمانی کۆمبیت.
ناڤبری ئەو چەندە ژی دیارکر کۆمبوون دێ یاڤەکری بیت،لێ بابەتێ سەرەکی یێ گەنگەشەیێ سەر کێمی و خراپیا کوالیتا پەنزینێ بیت .
ئەڤرۆ:
وەزیرێ پەرەوەردێ ل حوکمەتا ھەرێما کوردستانێ د. پشتیوان سادق دیارکر وەکو وەفاداریەک بۆ زارۆیێن شەھیدێن شەڕێ تیرۆرستێن داعش بریار ھاتە دان کو سێ ھزار کورسیێن خواندنێ بێ بەرامبەر بدەنە زارۆیێن وان شەھیدان، گۆت ژی چ بۆ وان شەھیدان بھێتە کرن ناگەھیتە دلۆپەکا خوینا وان.
د راگەھاندنەکێ دا کو ل مالپەرێ فەرمی یێ وەزارەتا پەروەردێ بەلا بوویە دیار دکەت کو ئەڤ بریارا وەزارەتا پەروەردێ بۆ زارۆیێن شەھیدان قوتابخانێن سابیس و سیستەمێ ئنگلیزی و خواندنا ئەھلی ژی ڤەدگریت، قوتابی ژی د ئازادن چ جھەکی بۆ خوە ب ھەلبژێران کو درێژیێ بدەنە خواندنا خوە.
ئەڤ بریارا وەزیرێ پەروەردێ دوھی ٢٧-٦-٢٠١٥ د سەرەدانەکا وەزیری دا ھات بۆ باژێرێ کەرکووکێ و سەرەدانا وی بۆ ئەزموونێن دووماھیا سالێ یێن پۆلا ١٢ ئامادەیی ل وی باژێری، کو دوھی ژ نوو ئەزموونان ل وی باژێری دەست پێ کر.
ئەڤرۆ:
پەیڤدارێ وەزارەتا کارەبێ ل حوکمەتا ھەرێما کوردستانێ یاسین حەسەن دیارکر کو ژ بەر دابین کرنا سوتەمەنیێ بۆ وێستگەھێن بەھەمئینانا کارەبێ پتریا وێستگەھێن ژ کار کەفتی ڤەگەریانە کار کرنێ، ژ نوکە پاش ژی خشتێ کارەبێ دێ ھێتە گوھۆرین و ماوێ پێدانا کارەبا نشتیمانی دێ ھێتە زێدە کرن.
یاسین حەسەن ھەروەسا بۆ خەندان گۆت ھەکە ئێک رۆژ ھاتنا سوتەمەنیێ بۆ یەکەیێن بەرھەمئینانا کارەبێ ب راوەستیت دێ گرفتا بەرھەمئینانێ و دابین کرنا کارەبێ دروست بیت، بەلێ ھەکە ب ڤی رەنگی بیت دێ دەمژمێرین کارەبا نشتیمانی زێدە بن.
ژ لایەکێ دیڤە رێڤەبەرێ گشتی یێ کارەبا سلێمانیێ سالار حیسامەدین دیارکر کو پشتی سوتەمەنیا پێدڤی بۆ کارەبێ ھاتیە دابین کرن چار وێستگەھێن دی یێن بەرھەمئینانا کارەبێ ل ھەرێمێ کەفتنە کاری و نێزیکی ٤٠٠ ھەتا ٥٠٠ مێگاواتێن کارەبا نشتیمانی زێدە کرینە، ھەروەسا ئەو ژی بۆ SNN گۆت کو د ماوێ دو رۆژێن بۆری دا شیاینە ٢٣ دەمژمێر و نیڤا ھەتا ٢٤ دەمژمێران کارەبا نشتیمانی بدەنە وەلاتیان ل سەانسەری ھەرێما کوردستانێ.
ئەو ژی دیارکر کو ھەکە ئەڤ سوتەمەنیا ھەتا نوکە دھێتە دابین کرن یا بەردەوام بیت ئەو دێ شێن ٢٣ دەمژمێران ھەتا ٢٤ دەمژمێران کارەبێ بدەنە وەلاتیێن ھەرێما کوردستانێ، کو ھەتا سێ ھزار مێگاواتێن کارەبێ ھەرێم بەرھەم دئینیت.
رێڤەبەرێ کونترۆلا بەلاڤ کرنا گشتی یا کارەبا ھەرێمێ دیارکر کو ھەکە دابین کرنا سوتەمەنیێ ب ڤی رەنگی یا بەردەوام بیت، کارەب ژی ب ڤی رەنگێ ھەیی دێ یا بەردەوام بیت.
ئەڤرۆ:
پارێزگەرێ بانکا ناڤەندیا عیراقێ دیار کر کو پرۆژێ ژێبرنا سفرێن سەر پارێ عیراقی ل دەستپێکا سالا ٢٠١٧ دێ ھێتە ب جھئینان و گۆت: “بانکا ناڤەندی پێنگاڤێن دەستپێکی بۆ ڤێ مەرەمێ ھاڤێتینە”.
عەلی عەلاق، پارێزگەرێ بانکا ناڤەندی یا عیراقێ ئاشکرا ژی کر، ئارمانجا وان ژ ژێبرنا سفرێن ل سەر پارێ عیراقی، پشتەڤانیە ل دینارێ عیراقی، دا کو ببیتە پارەک بشێت ھەڤرکیێ د گەل پارێن دیتر یێن بیانی بکەت و گۆت: “پرۆژێ ژێبرنا سفران ل سەر پارێ عیراقی، پرۆژەکێ ستراتیژیە ژ بۆ خزمەتکرنا ئابوورێ وەلاتی”.
ناڤھاتی ئاماژە ب وێ چەندێ ژی کر، بانکا ناڤەندی یا کار ل سەر میکانیزمێن کارپێکری دکەت بۆ ب جھئینانا ڤی پرۆژەی و گۆت: “ئەم پێشبینی دکەین ل دەستپێکا سالا ٢٠١٧ پرۆژە دێ ھێتە ب جھئینان”.
گۆتژی: “بانکا ناڤەندی ب رێیا ھەلبژارتنا دیزاین و کۆمپانیا و ئەو وەلاتێ دێ پارەی چاپ کەت، پێنگاڤێن دەستپێکی بۆ ب جھئینانا پرۆژەی ھاڤێتین”.
پارێزگەرێ بانکا ناڤەندی خویا ژی کر، ئێخستنا پارێ نوو بۆ ناڤ بازاری رامانا ژناڤبرنا پارێ کەڤن نادەت، بەلکو پارێ کەڤن ھەتا نێزیکی ١٠ سالێن دی دێ کار پێ ھێتە کرن و د ڤی دەمی ژی دا بانکا ناڤەندی دێ شێت پارێ کەڤن کۆم بکەت و پارێزگاریێ ل بازاری و ھەبوونا پارێ کاش بکەت.
ئه‌ڤرۆ نيوز:
بڕیارە ل دەستپێکا ھەیڤا داھاتی بھێنڤەدانا پەرلەمانێ عیراقێ یا وەرزێ ھاڤینێ ب دووماھی بھێت و پەرلەمان دەست ب کۆمبوونێن خوە بکەت، نوونەرەکێ کورد ژی داخواز دکەت، پەرلەمانتارێن کورد ئاریشێن د ناڤبەرا حزبێن خوە ل ھەرێما کوردستانێ نەبەنە بەغدا و ب ئێک دەنگ و رەنگ بچنەڤە پەرلەمانێ عیراقێ.
ئەحمەد حاجی رەشید، سەرۆکێ فڕاکسیۆنا کۆمەلا ئیسلامی ل پەرلەمانێ عیراقێ بۆ رۆژناما ئەڤرۆ گۆت” بڕیارە ل دەستپێکا ھەیڤا داھاتی بھێنڤەدانا پەرلەمانێ عیراقێ ب دوماھی بھێت و ئەم وەکی پەرلەمانتارێن کورد ڤەگەڕێین بەغدا، خویایە نوکە ژی ل ھەرێما کوردستانێ ئالۆزی کەفتیە د ناڤبەرا لایەنێن سیاسیێن ھەرێما کوردستانێ دا، بەلێ کارێ مە وەک پەرلەمانتارێن کورد ل بەغدا ئەوە بەرگریێ ل ھەرێما کوردستانێ بکەین و ئێک دەنگ و ئێک رەنگبین ھەمبەر ئاریشێن مە ل گەل بەغدا ھەین، مە وەکی فڕاکسیۆنا کۆمەلا ئیسلامی بڕیاردایە، کۆمبوونەکا ھەڤپشک د ناڤبەرا لایەنێن کوردی ل بەغدا ئەنجام بدەین، چونکی دڤێ قۆناغێ دا یا پێدڤیە ئەم ئێک دەستبین و نابیت ب چو شێوەکی ناکوکیێن ل ھەرێمێ دگەل خوە ببەینە بەغدا”.
رەشیدی گۆت ژی” رەوشا عیراقێ یا بەرەڤ ئالۆزیەکا پتر دچیت، ئەم دڤێت سەرەدەریەکا ھشیارانە ل گەل ڤێ رەوشێ بکەین، ژ بەر کو پتر رەوش ل عیراقێ ئالۆز بوویە و ئاریشە کوورتر بووینە، ب تایبەتی عیراق ناخوازیت پێگیریێ ب قانوونا بودجەیا گشتی ا سالا ٢٠٠١٥ێ بکەت، لەوما دڤێت ئەم بشێین خوە بکەینە ئێک ھەتا بەرسیڤا بەغدا بدەین”.
ناڤبری دیاکر کو وان ل دەزگەھێن راگەھاندنێ گوە لێبوویە ھەرێما کوردستانێ نوکە پەترۆلا خوە ب رێیا عیراقێ نافرۆشیت و ل سەر ڤێ چەندێ دبێژیت” ئەم ژی وەکی نوونەرێن کورد ل بەغدا پشتەڤانیا ھەرێما کوردستانێ دکەین، ب مەرجێ ب شێوەکێ سەربخوە پەترۆلێ بفرۆشیت و بەھرا موچە و بودجێ ھەرێما کوردستانێ بکەت، لەوما ئەز باوەرم دێ بۆڤ ێ ھەیڤێ بودجە کێمتر گەھیتە ھەرێما کوردستانێ ژلایێ بەغدا ڤە و ھندی ھەیڤا بۆری نابیت”.
ئەڤرۆ:
ئەندامەکێ سەرکردایەتیا پارتی دیموکراتی کوردستان راگەھاند، کۆمبوونا پەرلەمانێ کوردستانێ بێ پارتی و چەند لایەنێن دی، دووماھی ئینان بوو ب سازانا نیشتمانی و دەستپێکا پرت و بەلاڤکرنا ناڤمالا کوردان و دەستێوەردانا بیانیان بوو، خویاکر ژی بێ پارتی و سازانا نیشتمانی، پرسا سەرۆکاتیا ھەرێمێ چارە نابیت.
د. عەلی تەتەر ئەندامێ سەرکردایەتیا پارتی دیموکراتی کوردستان بۆ مالپەرێ فەرمیێ پارتی گوت” کۆمبوونا پەرلەمانێ کوردستانێ بێ پارتی و چەند لایەنێن دی، دووماھی ئینان بوو ب سازانا نیشتمانی و ھیڤیدارین زێدەتر ھەستیاری و ناکوکی دروست نەبیت و ب سادەیی رەفتارێ ل گەل ڤێ رووداوی نەکەین، چونکی بابەتەکێ چارەنڤیسێ نیشتمانی یە و پێدڤی ب دیالۆکێ و لێکتێگەھشتنێ یە کو ل گەل بارودۆخێ نوکە یێ کوردستانێ و دەڤەرێ بگونجیت”.
عەلی تەتەر زێدەتر گوت” ئەوا پەرلەمانی کری تێکدانا سازانێ بوو د ناڤبەرا حزب و لایەنێن سیاسی، چونکی پشتی روودانێن شوباتێ، ئۆپۆزسیۆن و ھەردو حزبێن دەستھەلاتدار ( پارتی و ئێکەتی) رێککەفتبوون کو پرسێن نیشتمانی یێن گرنگ و چارەنڤیساز ب سازانێ بھێنە چارەکرن، پارتی ھەتا نوکە ژی پێگیری ب ڤی پرنسیبی کریە، ھەکە نە، دشیا گەلەک قانوونان ل پەرلەمانێ کوردستانێ دەرباز بکەت، بەلێ ب پیلانا وان چار لایەنان، روویێ راستەقینەیێ خوە ئاشکراکر و سەلماند ھەر دەمێ دەرفەت بۆ پەیدا ببیت، چو (حیسابێ) بۆ سازانێ ناکەن”.
ڤی ئەندامێ سەرکردایەتیا پارتی ئەو چەندە ژی دووپاتکر کو” بێ پارتی و بێ سازانا نیشتمانی، ئەڤ پرسە ناھێتە چارەکرن و مافێ خەلکی یە سەرۆکێ خوە کو ب نوونەراتی و ئیرادا وان د ئاخڤیت ب ھەلبژێرن، نابیت کەسەکێ لاواز و بێ جەماوەر ببیتە سەرۆکێ ھەرێمێ، چونکی ل پەرلەمانی ب ساناھی یە دەنگ بھێنە کرین، یا دیارە ژی ھندەک لایەنێن بیانی و ناڤخوەیی بزاڤێ دکەن ل شوینا گەلێ کورد بریارێ بدەن، یا رۆھنە ژی کو چو لایەنەکێ کورستانی ژبلی پارتی بەربژارێ ب ھێز نینە کو بشێت دناڤ خەلکی دا ب سەرکەڤیت، لەوما یێ پیلانا ددانن خەلکی ژ وی مافی بێ بەھر بکەن”.
عەلی تەتەر ل دووماھیێ گوت” بێگۆمان نوکە باشترین بەربژار بۆ سەرۆکاتیێ ھەرێمێ، سەرۆک بارزانی یە”.
نيشاندان