ئه‌ڤرۆ، نه‌وزاد هلۆری:
پرانیا وه‌لاتێن جیهانێ كه‌لتوور و داب و نه‌ریت و فه‌رهه‌نگا گه‌لێ خوه ب رێیا گه‌شتیاران به‌لاڤ دكه‌ن، زێده‌باری كو پرانیا گه‌شتیارێن دهێنه كوردستانێ بیانی نه ب تایبه‌تی عه‌ره‌ب، به‌لێ كورد نه‌شیاینه كه‌لتورێ خوه بو وان بده‌ن نیاسین و به‌لاڤ بكه‌ن.
به‌ختیار عه‌بدوللا، گه‌نجه‌كێ دهۆكێ یه دیاركر كو جهێ داخێ یه جهێن گه‌شت و گۆزاریێن كوردستانێ ب روتینی ب رێڤه دچن و گۆت: (هاتنا گه‌شتیارێن بیانی و عیراقی بۆ هه‌رێما كوردستانێ ده‌لیڤه‌كا زێرینه كو ژبلی ئابوور و داهات، هه‌ڤده‌م ئه‌م ب رێیا وان كه‌لتوور و زمانێ خوه بده‌ینه نیاسین ژبه‌ركو پرانیا ده‌ستهه‌لات و حوكمرانیێن عیراقێ كورد ب مرۆڤێن خراب داینه نیاسین و دڤێت بو وان ب كریار بهێته سه‌لماندن كو كورد ملله‌ته‌كێ ره‌سه‌نن و مرۆڤایه‌تی ل ده‌ڤ وان هه‌یه و خودان كه‌لتور و زمان و داب و نه‌ریتن).
زه‌كی محه‌مه‌د، خودانێ ئێك ژ هاڤینگه‌هێن ده‌ڤه‌را ئامێدیێ و شێلادزێ دیار كر كو پرانیا گه‌شتیارێن دهێنه هاڤینگه‌ها وان خه‌لكێ بیانی نه ب تایبه‌تی یێن عیراقێ نه و عه‌ره‌ب ب گشتی و گۆت: (رۆژانه دناڤبه‌را هزار بۆ سێ هزار گه‌شتیارێن ناڤخوه و بیانی سه‌ره‌دانا جهێ مه دكه‌ن، مه چه‌ندین نوژه‌ن كرنێن نوو ژی ئه‌نجام داینه، هه‌ر چه‌نده به‌ری نوكه هنده‌ك جاران رێ ب ئه‌نجامدانا چالاكیێن كه‌لتوری دهاتنه‌دان، به‌لێ نوكه ژ به‌ر كۆرۆنایێ ئه‌ڤ یه‌ك ناهێنه كرن، ئومێده‌وارین كو كۆرۆنا نه‌مینیت داكو جهێن شوله‌ژێ و گروپ ژی بشێن چالاكیان ئه‌نجام بده‌ن، نوكه یا ل سه‌ر مه پێدڤی ئه‌وه كو ب رێیا سترانا و ئاخفتنێ كه‌لتوری بگه‌هینین وان).
یاسین محه‌مه‌د، ماموستایه‌كه ل سه‌ر بابه‌تی گۆت: (بێگومان ب گه‌له‌ك رێیا مرۆڤ دشێت فه‌رهه‌نگ و داب و نه‌ریت و كه‌لتوورێ گه‌لێ خوه دناڤ تاكێن جڤاكی به‌لاڤ بكه‌ت ژ وانان ب رێیا گه‌شتیاران، سوپاس بۆ خودێ كوردستان وارگه‌ه و گه‌وهه‌ره‌كا هه‌ره ب بهایه ب هه‌بوونا هزاران جهێن سرۆشتی یێن گه‌شتیاری و ئاڤ و كانی و رووبار و داروباره‌كێ هه‌ره جوان ل كوردستانێ هه‌یه، به‌لێ جهێ داخێ یه نه ژ روویێ ئابووری نه ژی كه‌لتووری كوردان وه‌كو پێدڤی مفا ژێ وه‌رنه‌گرتیه).
ماموستا یاسین زێده‌تر گۆت: (دڤێت هه‌ماهه‌نگیه‌كا هه‌ره باش دناڤبه‌را وه‌زاره‌تا ره‌وشه‌نبیری و گه‌شتوگۆزارێ هه‌بیت و چه‌ندین چالاكیێن هونه‌ری و ره‌وه‌شنبیری و جودا ل جهێن گه‌شتوگۆزاری و گرنگ بكه‌ن و تێدا زمان و فه‌رهه‌نگ و كه‌لتوورێ خوه تێدا به‌لاڤ بكه‌ن ژبه‌ركو گه‌شتیارێن بیانی ده‌ما دهێنه كوردستانێ ژبلی گه‌ریان و سه‌ره‌دان و خوشی و زه‌وق و گوهۆرینا كه‌ش و هه‌وای، هه‌ڤده‌م دخوازن فێری زمان و كه‌لتورێ كورده‌واری ژی بن).
یاسین دیار كر ژی كو هه‌ر چه‌نده نوكه كۆرۆنایێ كارتێكرن ل ڤێ یه‌كێ كریه، به‌لێ ئه‌ڤ یه‌ك نابیته بهانه و گۆت: (كورد ئێكه ژ وان گه‌لێن جیهانی كو خودان كه‌لتوره‌كێ زه‌نگینه و چه‌ندین جور و ره‌نگ هه‌نه، ژ وانا ستران و ده‌وات و یاری، د شیاندایه ب رێیا وان گرووپان كه‌لتورێ خوه بده‌نه نیاسین، به‌لێ ل جهێن گه‌شت و گۆزاری ئه‌ڤ چه‌نده ناهێته كرن هه‌تا جهێن مه یێن گه‌شت و گوزاری ل جهێ سترانێن كوردی داننه سه‌ر یێن عه‌ره‌بی و بیانی دداننه سه‌ر).
ل گوره‌ی راپرسیه‌كێ كو ل سه‌ر تورێن جڤاكی هاتیه ئه‌نجامدان و تێدا 401 كه‌سان ده‌نگ ل سه‌ر دایه، كا ئه‌رێ ل جهێن گه‌شت و گۆزاری پتر كورد دهێنه دیتن یان ژی عه‌ره‌ب و بیانی، د به‌رسڤ دا 61 كه‌سان كو دبیته 15,2% گوتیه كورد دهێنه دیتن، د هه‌مبه‌ر دا 340 كه‌سان كو دبیته 84,8% گوتیه عه‌ره‌ب و بیانی دهێنه دیتن.
نيشاندان
