ئه‌ڤرۆ نيوز:
نوكه كۆمبوونا په‌رله‌مانێ ئێكه‌تيا ئورۆپا بۆ داخوازكرنا هاريكاريێن زێده‌تر بۆ ئاواران ل عيراقێ و كوردستانێ.
بۆ ديتنا په‌خشێ ئێكشه‌ر: ڤێره كليك بكه
بنگەھێ (سایت) یێ تایبەتمەند ب دووڤچوونا مالپەرێن ئیسلامی یێن توندرەو ڤە ل سەر تۆرا ئەنترنێتێ، دیارکر کو تایێ رێکخستیا (داعش) یا تیرۆرستی ل وەلاتێ سعودیێ، تۆمارەکا دەنگێ کو دەمێ وێ ١٣ خۆلەکن ل ڤێ دووماھیێ بەلاڤکریە و تێدا ئەندامێن خوە ھاندەت بۆ پاقژکرنا دەڤەرا نیمچە گزیرتا عەرەبی ژ شیعان و داخواز ژ گەنجێن سعودی دکەت بگەھینە ناڤ رێزێن وێ رێکخستیا تیرۆرستی.
رێکخستیا داعش یا تیرۆرستی بەربرسیارەتیا خوە ژ ھێرشەکا خوەکوژی دژی مەزگەفتەکا شیعان ل باژێرێ دەمام یێ سعودی راگەھاندبوو، کو دبیتە ھێرشا خوەکوژی یا دویێ یا داعشێ دژی مزگەفتێن شیعان ل سعودیێ ل ٢٢ گولانا ٢٠١٥ و ٢٩ گولانا ٢٠١٥ کو د وان ھەردو ھێرشێن خوەکوژی دا ٢٥ شیعە ھاتبوونە کوشتن.
مالپەرێ (سایت) کو بنگەھێ وی ل ئەمریکا یە، دیارکر ژی کو د تۆمارەکا دەنگی دا کو دەمێ وێ ١٣ خۆلەکن، رێکخستیا داعشێ فەرمان دایە ئەندامێن خوە ل ھەر جھەکی کو (دوژمنێن ئیسلامی و ب تایبەتی شیعان بکوژن و چاوا ل سەر کوفرا خوە ڕا ل گزیرتا محەمەد پیغەمبەری دژین؟ ئەو کافرن و خوین و دراڤێ وان یێ حەلالە و پێدڤیە ل سەر وان بکوژین و دەربەدەربکەین، بەلکو پێدڤیە ل سەر ئاخێ ژ وان پاقژ بکەین”.
دھێتە زانین رێژەیا شیعان ل سعودیێ د ناڤبەرا ٦% ھەتا ١٠% یە ژ ھژمارا گشتی یا ئاکنجیێن سعودیێ کو ٢٠ ملیۆن کەسن و پتریا شیعان ل دەڤەرا رۆژھەلاتا سعودیێ دژین ب تایبەتی ل ھەردو پارێزگەھێن (قەتیف و ئیحسا).
ئه‌ڤرۆ نيوز، نيوار محه‌مه‌د سه‌ليم:
ژ بوو دانوستاندنێ ل سه‌ر لايه‌نێن ئێدارى و خزمه‌تكارى، نێچيرڤان بارزانى سه‌رۆكێ حوكمه‌تا هه‌رێما كوردستانێ ل پارێزگه‌ها دهۆكێ ل گه‌ل ئه‌ندامێن جڤاتا پارێزگه‌هێ كۆم بوو.
ژێده‌ره‌كى ژ جڤاتا پارێزگه‌ها دهۆك بۆ ئه‌ڤرۆ نيوز گۆت: “پشتى رۆژا سێشه‌مبى رێكه‌فتى 2ى خزيرانا 2015ێ سه‌ره‌دانا پارێزگه‌ها دهۆك كرى و دوهى د رێو ره‌سمێن ڤه‌كرنا ياريگه‌ها زاخۆ دا پشكداريى كرى، ئه‌ڤرۆ ل باره‌گايێ پارێزگه‌ها دهۆك ل گه‌ل ئه‌ندامێن جڤاتا پارێزگه‌هێ يێ د كۆمبوونێ دا”.
زێده‌تر گۆت: “مه‌ره‌م ژ كۆمبوونا سه‌رۆكێ حوكمه‌تا هه‌رێما كوردستانێ ل گه‌ل ئه‌ندامێن جڤاتا پارێزگه‌هێ به‌حسكرنه ل سه‌ر لايه‌نێن خزمه‌تكارى و كارگێرى”.
دا زانين ژى كو دێ به‌حسكرن ل سه‌ر وێ هژمارا زۆرا ئاواران ته‌وه‌ره‌كێ دى يێ كۆمبوونا نێچيرڤان بارزانى بيت ل گه‌ل ئه‌ندامێن جڤاتێ و ئه‌و داخوازيێن نوكه پارێزگه‌هێ د ڤان كاودانان دا هه‌ين.
ئه‌ڤى ژێده‌رى نه‌ڤه‌شارت ژى كو د ڤێ كۆمبوونێ دا دێ داخواز هێته كرن كو پارينگه‌هه‌ك ل پارێزگه‌ها دهۆكێ ژى بهێته دانان دا كو پێدڤيێن سۆته‌مه‌نيێ دابين بكه‌ت ب تايبه‌ت كێشا نه‌مانا پاريزنگه‌ها كواشێ و به‌حسێ زێده‌كرنا پرۆژێن بنه‌جهكرنێ و به‌رفره‌هكرنا گۆندان و به‌لاڤكرنا پارچێن ئه‌ردى ل باژێر و باژێركان.
ئەڤرۆ نيوز:
ھەکە ئەڤ قەرە بۆ چێکرنا چەندین پرۆژێن بەرھەمدار بیت کارگەە پێبھێنە ڤەکرن و گەنج لێکار بکەن و بەرھەمەکی دروست بکەن و ئەو بەرھەمە ببیتە داھات، وی دەمی حوکمەت دشێت ب ڤی داھاتی قەرێن خوە بدەت، ل پتریا وەلاتێن ئیسلامی ئەڤ قەرە ھاتینە وەرگرتن و فەتوا پێھاتینە دان کو ژ لایێ دینێ ئیسلامێ ڤە ھاتینە حەلالکرن، کو ل دووڤ پرۆژە قانوونا قەری بۆ بھێزکرنا ژێرخانا ئابووری یا ھەرێمێ دێھێتە بکارئینان.
د.ئەحمەد سەفار پسپورێ ئابووری دیار دکەت کو دڤێت ئەڤ قەرە بھێتە بکارئینان بۆ وەبەرھێنانێ ئانکو بۆ لایەنێ بەرھەمی نە بۆ بەکاربرنێ چونکی ھەکە بو بکاربرنێ بیت یا بزەحمەتە حوکمەت بشێت ل داھاتی ڤان قەران بدەت و رەنگە مفا زێدەتر بچیتە سەر و حوکمەت ب ڤی قەری و ب ھێشتا قەران نەشێت بھێتە سەر پێن خوە ب ڤی شێوێ ئیدارەکرنا پارێ گشتی،چونکی پارەیەکێ زور بھەدەر دچیت.
مەلا ئیحسان رێکانێ سەرۆکێ لقێ دھۆک یێ ئێکەتیا زانایێن ئاینێ ئیسلامێ دیار کر کو ل ڤی دەمی دا ھەرێما کوردستانێ توشی قەیرانەکا دارایی بوویە و ئەڤێ قەیرانێ وەکریە ، ھەرێم پێدڤی ب ڤان قەران بیت کو پێدڤیە چ لایەنێن سیاسی ئەڤێ چەندێ بۆ خوە ب دەلیڤە نەزانن و پێ موزایدێن سیاسی بکەن، ھەول بدەن فی باری تێک بدەن و گوت( ل پتریا وەلاتێن ئیسلامی ئەڤ قەرە ھاتینە وەرگرتن و فەتوا پێھاتینە دان کو ژ لایێ دینێ ئیسلامێ ڤە ھاتینە حەلالکرن چونکی ژلایێ ئاینی ڤە ل دەمێ کو تشتەک دبیتە زەرورەت رێدچیتێ کو بھێتە حەلالکرن )
مەلا ئیحسان رێکانی دیار کر ژی کو ل زانکۆیا ئەزھەر کو ژێدەرێ فەتوایێن سنەیانە ئەڤ قەرە حەلالکرینە دیسان ل وەلاتێ سعودیێ کو پتریا زانایێن ئاینێ ئیسلامێ لێنە ب ملیاران قەر ژ وەلاتان کرینە و فەتوا داینە کو ئەڤ قەرە پێدڤیێن وەلاتی نە و حەلالن دیسان ل وەلاتێ تورکیا و ئوردنێ کو حکومەتێن وان ئیسلامی نە لێ ب ملیاران قەر وەرگرتینە دیسان مەلا عەلی قەرەداغی کو زانایێ یاینێ ئیسلامێ یە و سەروکێ ئێکەتیا زانایێن ئاینێ ئیسلامێ یە ل جیھانێ دیار کریە کو ل دەمێ زەرورەتێ حوکمەت دشێت ڤان قەران وەرگریت
د. ئەحمەد ێەفار پسپور د وارێ ئابووری دا دیار دکەت کو دوماھیک رێ یە حوکمەت پەنایێ بو دبەت چونکی وەرگرتنا قەری ئیشارەتەکێ ددەتە خەلکی کو ئەڤ حوکمەتە نە د بارێ ئاسایی دایە و سومعەتا دارایی یا حوکمەتێ تێکددەت و ئەڤ چەندە کارتێکرنێ ل لایەنێ وەبەرھێنانێ دکەت و کارتێکرنێ د سەردەریا وەلاتان دا دکەت،خالا دویێ سەبارەت ھەرێما کوردستانێ حوکمەتەکا ھەرێمەکێ یە نە حوکمەتا دەولەتەکێ یە و دانپێدانا نێڤدەولەتی و بەنکا ناڤەندی نینە کو ب شێت دراڤی دەربکەت، لەورا حوکمەتە نەچارە ڤی قەری بکەت .
ل دوماھیێ مەلا ئیحسان رێکانی دبێژیت پێدڤیە چ لایەنێن سیاسی ڤێ چەندێ ب دەلیڤە نەزانن و مەرەمێن سیاسی ل دوڤدا ھەنە ئەڤە نە کارێ ئەندام پەرلەمانی یە بەلکو پێدڤی ب لیژنەیەکا تایبەت ھەیە ژ لایێ زانایێن ھەرێمێ دیار بکەن و فەتوایەکا فەرمی پێشکێشی پەرلەمانی بکەن چونکی کاری پەرلەمانی نینە فەتوایان بدەت.
د.ئەحمەد سەفار دبێژیت ژی : چارەسەری ئەوە کو چارەسەریا گەندەلیا دارایی ریفورمەکا ئیداری یا دروست بھێتەکرن ل سەر بنەمایەکێ زانستێ ئابووری، ھەرێمێ بھێتە برێڤە برن چونکی ئەو سەروەت و سامانێ ل ڤێ ھەرێمێ ھەی دشێت سێ وەلاتێن وەکو عیراقێ بخودان کەت، بێ کو پێدڤی ب قەرا ھەبیت و گوت( ئەگەر ئەڤ قەرە بو چێکرنا چەندین پروژێن بەرھەمدار بیت چەند کارگەھەک پێبھێنە ڤەکرن و بسەدان گەنج لێکار بکەن و بەرھەمەکی دروست بکەت و ئەو بەرھەمە ببیتە داھات وی دەمی حوکمەت دشێت ب ڤی داھاتی قەرێن خوە بدەت و بیتە سەرمایەک بو ھەرێمێ لێ جھێ داخێ یە کو ئەو کارگەھێن ھەین ل ھەرێمێ ھاتینە ژناڤبرن و نەھاتینە پێشڤەبرن و بۆ ھندەک مەرەمێن تایبەت ھاتنە بکارئینان .
سوران عومەر ئەندامێ لیژنا دارایی ل پەرلەمانێ کوردستانێ دیار کر ل دووڤ پرۆژە قانوونا قەری بو بھێزکرنا ژێرخانا ئابووری یا ھەرێمێ دێ ھێتە بکارئینان، نەک بۆ پرۆژێن ماینە ھلاویستی و موچەیان و بودجا حزبان ژ ڤی قەری ناھێتە دان، لێ جھێ داخێ یە کو ھەتانوکە حوکمەتێ چ پرۆژە نەخستینە بەردەم پەرلەمانی کو ڤان قەرا لێ بمەزێخیت و دھێتە زانین قەرە دێ ژ بەنکا گولدمان ساکس یا ئەمریکی و دوچە یا ئەلمانی ھێنەکرن.
ئەڤرۆ نیوز:
ئەڤرۆ دێ ل پەرلەمانێ ئورۆپا کۆنفرانسەک ل سەر رەوشا ئیرانێ و رۆژھەلاتێ کوردستانێ ھێتە سازکرن. د کۆنفرانسێ دا مەترسیێن بەرنامێ ناڤۆکی یێ ئیرانێ یا ل سەر رۆژھەلاتا ناڤین و جیھانێ و زۆرداریا ل سەر گەلێ کورد و یەکگرتنا ھێزێن سیاسی یێن کورد ل رۆژھەلاتێ کوردستانێ دھێتە گەنگەشەکرن.
کۆنفرانسێ ل پەرلەمانێ ئوروپا ل ژێر ناڤێ قەیرانا ل رۆژھەلاتا ناڤین و رەوشا ئیرانێ و کوردان دھێتە گێران. ئەڤ کۆنفرانس ل سەر پێشنیاز و بەرھەڤیێن کۆما دۆستێن کوردان ل پەرلەمانێ ئوروپا دھێتە سازکرن و تێدا نوونەرێن کورد، ئازەری، فارس و عەرەبێن ئیرانێ و ئەندامێن پەرلەمانێ ئوروپا، نوونەرێن سازیێن مافێن مرۆڤی و لیژنا رۆژھەلاتێ کوردستانێ یا کۆنگرێ نەتەوا کورد پشکداریێ دکەن و مەرەم ژ سازکرنا ڤێ کۆنفرانسێ گەنگەشە کرنا رەوشا ھەرێمێ ب گشتی و یا رۆژھەلاتێ کوردستانێ ب تایبەتیە.
رۆژنامەڤان باران ئالان ژ بروکسیلێ راگەھاند کو پشتی روونشتنا پەرلەمانی و گەنگەشەیا تایبەت یا ل سەر رەوشا رۆژھەلاتا ناڤین و بەرنامێ ناڤۆکیا ئیرانێ، کۆما دۆستێن کوردان ل پەرلەمانێ ئوروپا دیار کرن کو ئالیەکی گەنگەشا پەرلەمانێ ئوروپا کێم مایە و ئەو ژی رەوشا گەلێ کورد ل رۆژھەلاتێ کوردستانێ و باندۆرا قەیرانا ل رۆژھەلاتێ ناڤین ل سەر ئیرانێ و کوردایە و دڤێت ئەڤ بابەت تایبەت بھێتە گەنگەشە کرن و پشتی روونشتنا ل گەل نوونەرێن کوردێن رۆژھەلات ل ئوروپا و لیژنا رۆژھەلاتێ کوردستانێ د کۆنگرێ نەتەوا کورد دا بریارا دان ڤێ کۆنفرانسێ ساز بکەن و ب چاڤێ کوردان ڤە رەوشا ئیرانێ، کوردستانێ و گەلێن ھەرێمێ بھێتە نرخاندن.
بارانی راگەھاند کو د کۆنفرانسێ دا چاوانیا پاراستنا مافێن کوردان و بێدەنگیا ئوروپا و جیھانێ ل ھەمبەر زۆرداریێن ئیرانێ ل سەر گەلێ کورد و گەلێن دی یێن وەک بەلوچ، ئازەری و عەرەب و سوننەیان دێ ھێتە بەرچاڤ کرن و گۆت: (ل دووڤ زانیاریێن کەڤتنە د دەستێ من دا کەسێن پشکدارێ کۆنگرێ بن، نوونەرێن پارتێن سیاسی نینن و زێدەتر دێ نوونەرێن سازیێن سڤیل یێن رۆژھەلاتێ کوردستانێ ل ئوروپا و دۆستێن کوردان و نوونەرێن گەلێن بەلوچ، فارس، ئازەری و عەرەبێن ئیرانێ بن و دێ پشتی کۆنفرانسێ کۆمەکا پێشنیازا بدەنە سەرۆکاتیا پەرلەمانێ ئوروپا و پەرلەمان و حوکمەتێن ئەندام د ئێکەتیا ئوروپا دا).
ل ئالیێ دی ھانس رونتیر ئەندامێ پەرلەمانێ ئوروپا ژی راگەھاند کو ھەر کۆنفرانسەک ل سەر کوردان زێدەتر سەرنجا جیھانێ رادکێشیتە سەر رەوشا کوردان و جیھان باشتر دەلیڤا ناسکرنا گەلێ کورد دبینیت و گۆت: (ب تایبەت پشتی بەرخوەدانا پێشمەرگە و شەرڤانێن کوردان ل باشور و رۆژئاڤا کوردستانێ ناڤ و دەنگێ کوردان بلند بوویە و سەرەدانا بەرێز بارزانی سەرۆکێ ھەرێما کوردستانێ بۆ ئەمریکا و ئوروپا بوویە سەدەمێ پشتەڤانیا زێدەتر بۆ کوردان و نھا ژ ھەر دەمە زێدەتر ئوروپا پشتەڤانیێ ل مافێ چارەنڤیسێ کوردان دکەت و مە ژی پێدڤی دیت د ڤێ رەوشا نھا دا کوردێن ئیرانێ و زۆرداریێن ل سەر وان ژی بھیننە رۆژەڤا ئوروپا، ژ بەر کو ئیرانێ پشتی دەستپێکرنا سەرھلدانێن ل وەلاتێن عەرەبی زۆرداریا ل سەر گەلێ کورد و بەلوچ و عەرەبێن سوننە زێدە کریە و دترسیت کو رەوشا وێ ژی ئالۆز ببیت).
ھانس رونتیر ھەروەسا دیار ژی کر د ڤێ قۆناغێ دا دڤێت ئوروپا زێدەتر فشارێ بێخنە سەر ئیرانێ دا کو بەرنامێ چێکرنا چەکێن ئەتۆمی زێدەتر پێشڤە نەبەت و گۆت: (کریارێن رژێما سووریێ، یەمەنێ و ئالۆزیێن د ناڤبەرا شیعە و سونێن ھەرێمێ دا و دوژمناتیا د ناڤبەرا ئیران و سعوودیێ دا وەسا دکەت کو مرۆڤ بکەڤیتە د ناڤا ترسا بکار ئینانا چەکێن کیمیاوی دا و بۆ ڤێ چەندێ ژی دڤێت چاڤێن ئوروپا ل سەر ئیرانێ بن و ھەمان دەمی دا سعوودیێ و تورکیا ژی د بن چاڤدێریێ دا بن ژ بەر کو دیار نابیت کا ئەو وەلاتە دێ چ کەن و ژ بەر ھندێ ژی پێدڤیە ھەردەم ھشیار بین، بۆ ڤێ چەندێ ژی دڤێت کۆنفرانسێن ل سەر رەوشا رۆژھەلاتا ناڤین، کوردان، عەرەبان و پاشەرۆژا ھەرێمێ دا بەردەوام بھێنە سازکرن).
ئه‌ڤرۆ نیوز،زنار تۆڤى:
وه‌لاتێن هه‌ڤپه‌یمانێن دژى رێكخراوا تیرورستى یا داعش،مۆله‌ته‌كا سێ هه‌یڤى ب سه‌روك وه‌زیرێن عێراقێ عه‌بادى دده‌ن بۆ جێبه‌جێكرنا به‌لێنێن وى به‌رامبه‌ر سوننه‌یێن عێراقێ،ژێده‌ره‌كێ نه دڤیا ناڤێ خوه ئاشكه‌را بكه‌ت رادگه‌هینیت،وه‌لاتێن هه‌ڤپه‌یمانێن دژى داعشێ،مۆله‌ته‌كا سێ هه‌یڤى ب حه‌یده‌ر عه‌بادى سه‌روك وه‌زیرێن عێراقێ دایه،بۆ جێبه‌جێكرنا وان سوزێن وى داین به‌رامبه‌ر سوننه‌یان و دبێژیت: ئه‌گه‌ر عه‌بادى وان سوزان بجه بینیت،وه‌لاتێن هه‌ڤپه‌یمان ئه‌و سوزێن ل كونگرێ دووێ یێ”پاریس” دا یێن داینه عه‌بادى دێ جێبه‌جێ كه‌ن.
ئاماژه ب وێ چه‌ندێ ژى دایه،ئه‌و سوزێن كو پێدڤیه عه‌بادى ل به‌رامبه‌ر سوننه‌یان بجه بینیت پێكهاتینه،ژ دلنیاكرنا سوننه‌یان و پرچه‌ككرنا هوزێن سوننى و په‌سه‌ندكرنا یاسایێ”پاسه‌وانێن نیشتیمانى” و ده‌ستپێكرنا ئاشتبوونه‌یا نیشتیمانى و هه‌لوه‌شاندنا فه‌رمانا گرتنا سیاسیێن سوننى كو ژلایێ دادگه‌هێ ڤه ل دووڤ ماددێن”تیرور و گه‌نده‌لیێ” هاتینه ده‌ركرن و ده‌ركرنا لێبورینا گشتى بۆ زیندانیان.
وى ژێده‌رى ئه‌وژى ئاشكه‌راكریه،ل به‌رامبه‌ر جێبه‌جێكرنا وان داخوازیان،ئه‌مریكا و بریتانیا به‌لێن ب “عه‌بادى”داینه،كو شیانێن داعشێ د بوارێ راگه‌هاندن و ترساندنا وه‌لاتیان ب ته‌مامه‌تى دێ لاوازكه‌ن و دبێژیت:ئه‌مریكا بریتانیا و فره‌نسا و سعودیه سۆزداینه كو دێ كارى بۆ بنبركرنا ژێده‌رێن داهاتێ رێكخراوا تیرورستى یا داعشێ كه‌ن و ئه‌گه‌ر حكومه‌تا عێراقێ سوزێن خوه بینته جه. به‌حسێ هندێ ژى كریه،هه‌ر ئێك ژ وه‌لاتێن توركیا و په‌یمانا”ناتۆ” ژى سه‌روك وه‌زیرێن عێراقێ دلنیاكریه،كو چاڤدێریا زێده‌تر سنورێن دناڤبه‌را عێراق و توركیا دا بكه‌ن، ب مه‌به‌ستا رێگریكرنێ ل ده‌ربازبوونا چه‌كدارێن داعش بۆ ناڤ ئاخا عێراقێ،هه‌ر ئێك ژ فره‌نسا و بریتانیا ژى ئه‌و سوز داینه،كو رێگریێ ل گه‌نجێن وه‌لاتێ خوه بكه‌ن و نه‌هێلن بگه‌هنه داعشێ،وى ژێده‌رى ئاشكه‌راكریه كو وه‌لاتێن هه‌ڤپه‌یمانان مۆله‌ته‌كا سێ هه‌یڤى دایه عه‌بادى بۆ بجه ئینانا سۆزێن خوه كو دكونگرێ دووێ یێ پاریسێ دا به‌حس لێكریه.
ئه‌ڤرو نیوز،بارزان مزوورى
ژێده‌ره‌ك ژ رێكخراوا چه‌كدارێن ئازاد دناڤ باژێرێ مووسل بو مالپه‌رێ ئه‌ڤرو نیوز ئاشكرا كر كو ئه‌ڤرو ئیڤارى 3/6/2015 چه‌كدارێن تیرورستێن داعش ب رێیا به‌لاڤ كرنا به‌لاڤوكا دناڤ بازارى دا ل تاخێن ناڤ باژێرێ مووسل ل سه‌ر وان به‌لاڤوكا نڤیسایه كو هه‌ر كه‌سێ روژیا نه‌گریت دێ لێڤێن وى ژێڤه‌كه‌ن ب كێره‌كا خوش .
وى ژێده‌رى دیار كر كو هنده‌ك جهێن به‌رنیاس ل ناڤ بازارێ مووسل كه‌ره‌ڤان داناینه كو هه‌ركه‌سێ بهێته ده‌سته‌سه‌ركرن ژبه‌ر نه‌گرتنا روژیا دێ ناڤێ وى هێته توماركرن لدوڤ دا ل به‌رده‌رگه‌هێ كه‌ره‌ڤانێ لێڤێن وى ژێڤه‌كه‌ن .
ئه‌ڤرۆ نیوز: ده‌قێ گوتارا نێچیرڤان بارزانى د رێوره‌سمێن ڤه‌كرنا یاریگه‌ها زاخۆ یا نێڤده‌وله‌تى دا:
ئاماده‌بوویێت خۆشتڤی،
وه‌رزشڤان و وه‌رزشدۆستێت باژێڕێ عه‌زیرێ زاخۆ،
خه‌لكێ هێژایێ دەڤەرا زاخۆكا ده‌لال،
ئێڤاریا وە باش،
هون هه‌می ب خێر بێت سەرچاڤا…
ئەز گەلەك كەیفخۆشم ئەڤرۆ ل ڤێ ئێڤاریێ بەشدار دبم دگه‌ل هه‌وه بۆ ڤەكرنا یاریگەها زاخۆ ، كو ل سه‌ر ئاستێ هه‌رێما كوردستانێ و عیراقێ، یاریگه‌ها هه‌ری مۆدێرن و هه‌ری جوانه پیرۆز بیت ل شارێ زاخۆ. ڤه‌كرنا ڤێ وەرزشگەهێ ل هه‌می وه‌رزشڤانێت زاخۆ، ل خه‌لكێ دەڤەرا زاخۆیا دەلال و خۆشتڤی ، ل كوردستانێ، ل عێراقێ پیرۆز دكەین.
ئه‌ڤ یاریگه‌هه به‌شه‌كێ دیه ژ چیرۆكا سه‌ركه‌فتنا ملله‌تێ مە، كو ب درێژاهیا دیرۆكێ قوربانیی دا و سۆزا دگه‌ل خۆ دای، كو سه‌ركه‌ڤیت و دێ هه‌ر و هه‌ر پێشكه‌ڤیت.
دەنگا وە بڵندە بۆ پارێزگەهبوونی، ئەڤە بەری نها ژی مە بەحس كریە، ئەڤە حەقەكێ وەیە، خەباتا وە، خۆڕاگرییا وە، خزمەتا وە ل هەر ئاستەكێ ل قوربانیدانێ ل خەباتێ، ل ئابووریا ئەڤ وەلاتەی حەقێ وەیە، بەلێ دڤێت بێهنا وە دگەل ڤێ مژارێ یا فرە بیت، مەسەلێ پەیوەندی ب بڕیارا یەك كەسی ڤە نییە، بەلكو پەیوەندی یا ب هەرێما كوردستانێ و لایەنێت سیاسی و عێراقێ ڤە هەی. ئەو تشتێ ڤێ گاڤێ ئەز دكارم بێژم ئەوە كو ئەم سۆزێ ددەین دەستهڵاتا فەرمانگەهێت زاخۆ ئەم زێدە بكەین بۆ ڤێ قۆناغێ و بێگومان مەسەلا پارێزگەهبوونێ ژی دێ ل بیرا مە بیت.
ئەڤ یاریگەهە ئەڤرۆ ل زاخۆ هاتە ڤەكرن، پاداشته‌كێ بچویكه بۆ خه‌بات و تێكۆشین و قوربانیدانا مه‌زنا خه‌لكێ خۆڕاگرێ زاخۆ، كو د هه‌می شۆڕه‌ش و سه‌رهلدانێت كوردستانێدا، گیان و خوین و شه‌هید دانه و پێشكەشی كوردستانێ و ملله‌تێ كورد كرینه.
قه‌هره‌مانی و مێرخاسی یێت خه‌لكێ زاخۆ ل شۆڕه‌شا ئه‌یلوولا مەزن، ڕۆلێ وان د شۆڕه‌شا گولانێدا ڕۆله‌لێ مه‌زن و به‌رچاڤه، ئه‌ڤرۆ ژی كو كوردستان به‌رامبه‌ری دڕنده‌ترین رێكخستنا تیرۆرێ، به‌ڕه‌ڤانیێ ل كوردستانێ و كوردستانیان و ل هه‌می مرۆڤاهیێ دكه‌ت، دیسا خه‌لكێ زاخۆ و ڤێ ده‌ڤه‌را هێژا، خودانێت سه‌ربلندی و قه‌هرمانییه‌كا مه‌زنن، سه‌ركه‌فتنێت ئه‌ڤرۆ یێت كوردستانێ، ب خوینا گه‌شا ب ده‌هان شه‌هیدێت كوردستانێ ل وان دەڤەران ژی دەڤەرا زاخۆ هاتینە بدەستڤە ئینان.
ژبه‌ر هندێ زاخۆكا ده‌لال، باژێڕێ ژیانێ، هێژایی گه‌له‌ك و گه‌له‌ك خزمەتێن زێدەترە ل تشتێن كو ئەڤرۆ ئەم دبینین. هه‌ر خزمه‌ته‌كا بێتە كرن، هەر پڕۆژەیەكا بێتە بجهئینان بەرسڤەكە ژبۆ ماندیبوونا پێشمەرگە یێت مە یێت قەهرەمان یێت ڤێ دەڤەرێ، بەرسڤەكە بۆ خوینا شەهیدا، بەرسڤەكە بۆ ماندیبوونا دەڤەرا زاخۆ كو هەمیشە پێشەنگ بوونە ل پاراستنێ و بەرخوەدانێ و خەباتێ خوە ماندیكرنێ بۆ وان دەستكەفتێت كو مللەتێ مە خەبات بۆ كری و شەهد بۆ دای و خوین بۆ ڕێشتی.
ئه‌ڤرۆ ژی كو ئه‌م هه‌می پێكڤه ڤێ یاریگه‌هێ ڤه‌دكه‌ین، ئه‌م ب ڕێز و پێزانینه‌كا مه‌زن، گیانێ پیرۆزێ وان هه‌می شه‌هیدا، شه‌هیدێت شۆڕەشا ئه‌یلوولێ، شه‌هیدێت گولانێ، شه‌هیدێت ئه‌نفالا، گرتی و بێسه‌روشوینا، شه‌هیدێت ئه‌ڤرۆ یێت شه‌ڕێ دژه‌تیرۆرێ دئینینه‌ڤ بیرا خۆ، سه‌رێ خۆ ل به‌ر مه‌زناهیا گیانێ وان دچه‌مینین، سلاڤا بۆ گۆڕا وان ئازیزا دهنێرین و سۆزێ نەڤەدكەین كو لسەر ڕێكا وان دێ بەردەوام بین بۆ ئازادیا كوردستانێ.
هه‌ر د ڤێ هه‌لكه‌فتنێدا، تڤیا جامێریا خه‌لكێ زاخۆ و دهۆكێ و به‌هدینا ب گشتی ژبیر نه‌كه‌ین، كو گه‌له‌ك مه‌ردانه ده‌رگه‌هێ دل و مال
و گوند و باژێڕ و ده‌ڤه‌را خۆ، بێ جوداهی بۆ خوشك و برایێت خۆ یێت ئاواره و په‌نابه‌رێت ژ هه‌می پێكهاتێت دینی و نه‌ته‌وه‌یی ڤه‌كرن و ب دلگه‌رمی پێشوازی ل وان كر، ب هه‌می ڕه‌نگا هاریكاریا وان كر، د جهێ خۆ دایە ب ناڤێ حكوومەتا هەرێما كوردستانێ سوپاسییەكا گەرم یا خەلكێ دەڤەرا زاخۆ و دهۆك و بادینا ب گشتی بكەین بۆ وێ جامێریا وان كری و دەرگەهێ خۆ ڤەكری ب وان عەزیزێت لێقەومایی ئەوێت كو بەرێ خۆ دایە دەڤەرا وان، سوپاس بۆ وە هەمیان، سوپاس بۆ زاخۆ، سوپاس بۆ دهۆك، سوپاس بۆ هەموو باژێڕێن دەڤەرا بادینا، ئاكرێ بەردەڕەش و ئامێدیێ و هەمی دەڤەران.
ب تایبه‌تی گه‌له‌ك و گه‌له‌ك سپاسیا هه‌می خه‌لكێ ده‌ڤه‌رێ دكه‌ین كو ده‌ستپێكا سالا خاندنێ، گه‌له‌ك ته‌حه‌مول كر و زارۆكێت وان بۆ ده‌مه‌كێ درێژ، ژ خوندنێ پاشكه‌ڤتن، چونكی هه‌می قوتابخانه ببوونه په‌ناگه‌ها خوشك و برایێت ئاواره و په‌نابه‌ر، ئەڤ خۆڕاگریا وە جهێ سوپاس و پێزانینێ یە.
هه‌روه‌سا من دڤێت ب ڤێ هەلكەتنێ سوپاسیا پارێزگەهێ دهۆكێ و دامودەزگەهێت وێ و بڕێڤەبەرێت گشتی ل دهۆكێ بكەین بۆ ئەو كارێ وان كری، بۆ ئەو خزمەتا وان كری د ڤێ هەیامێ دا، دەستخۆشیێ ل وان دكەم.
ئاماده‌بوویێت هێژا،
ژ لایه‌كێ دیڤه، ئه‌ڤرۆ كو ئەم ڤێ یاریگه‌هێ ڤه‌دكه‌ین، ئه‌م جاره‌كا دی بۆ هه‌می دۆستا و بۆ نه‌یارا ژی دسه‌لمینین، كو خه‌لكێ كوردستانێ به‌رامبه‌ر چ زه‌خت و زۆری و، به‌رامبه‌ر چ تیرۆر و شه‌ڕ و پیلانا ژی، ئیراده و خواستا خۆ یا بۆ ژیانێ و پێشكه‌ڤتنێ ژده‌ست ناده‌ت!، چ ئاسته‌نگ و دۆرپێچ و، چ بڕینا بودجه و مووچا، ئیسرارا مه یا بۆ به‌ره‌ڤ پێشڤه‌چوونێ و ئاڤاكرنێ و سه‌ركه‌فتنێ، لاواز ناكه‌ت، بەلكی ئیسرارا مە مكومتر دكەت بۆ سەركەفتن و گەهشتن ب وان ئارمانجا یێت كو شەهیدێت مە خوینا خۆ دای و پێشمەرگێ مە بۆ ماندی بووی و مللەتێ مە خەبات بۆ كری.
ئه‌ڤرۆ خۆراگری یا پێشمه‌رگێت مە، كارەكێ وەسا كریە كو ناڤێ پیرۆزێ پێشمەرگەی ل جیهانێ دەنگ ڤەدایە، لێرە ب ناڤێ وە سڵاڤ و ڕێزێت خۆ بۆ هەر پێشمەرگەیەكی ل خانەقیت تا دگەهیتە بەرۆكێت شەڕی ل شنگالێ دهنێرین و ب ناڤێ وە سڵاڤان بۆ وان دنێرین و دەستخۆشی و پیرۆزباهیێ ل وان دكەین بۆ وێ بەرگری و بەرخوادانا ئەڤرۆ ئەو دكەن بۆ پاراستنا دەستكەفتێت مللەتێ مە، بۆ پاراستنا خوینا شەهیدێت مە، بۆ پاراستنا ماندیبوونا مە، سڵاڤێت مە لێرە بۆ هەر پێشمەرگەیەكی ل شنگال تا خانەقین و كەركووك و هەمی دەڤەرێت كوردستانێ.
ئەڤرۆ ئەز گەلەك كەیفخۆش بووم یا كو من لڤیرە دیتی، كۆمەڵەكا گەنجێت رێكوپێك یێت ئافرەت من دیتن كو ل ئەكادەمیا زاخۆ یا لەشكەری هاتینە پەروەردەكرن، ئەڤە نیشانەیەكێ زۆر جوان و گرنگە كو دڤێت ئەم كارێ خۆ بەردەوام بكەین، بێگومان پشتەڤانیا ئافرەتان بۆ بەردەوامیا خەباتا مە تشتەكێ پێدڤی یە و ئەز پیرۆزباهیێ ل وە دكەم و هیڤیدارم نمونەیا وە زێدەتر ببیت.
جارەكا دی ئەز ڤەكرنا ڤێ یاریگەهێ ل خەڵكێ زاخۆ و كوردستان و هەمی عێراقێ پیرۆز دكەم.
ئێڤاریا وە باش و هون هەمی بخێر بێن و زۆر سوپاس….
ئه‌ڤرۆ نیوز:
نێچیرڤان بارزانى سه‌روكێ حكومه‌تا هه‌رێما كوردستانێ د رێوره‌سمه‌كێ دا ب به‌رهه‌ڤبوونا وه‌زیرێ وه‌رزشا عیراقێ و پارێزگه‌رێ دهۆكێ یاریگه‌ها زاخۆ یا نێڤده‌وله‌تى ڤه‌كر.
یاریگه‌ها زاخۆ یا نێڤده‌وله‌تى ل دووڤ رێنمایێن ئێكه‌تیا نێڤده‌وله‌تیا ته‌پا پێى ( فیفا) هاتیه دروستكرن و پتر ژ 20 ملیون دولار لێ هاتینه مه‌زاختن و جهێ 20 هزار وه‌لاتیان دكه‌ت.
نيشاندان