ئه‌ڤرۆ نيوز:

نوونه‌ره‌كێ پارتى ديموكراتى كوردستان ل په‌رله‌مانێ كوردستانێ دده‌ته‌ زانين كو ئه‌و دخوازن نوونه‌رێن ده‌ڤه‌رێن كوردستانى يێن ده‌رڤه‌يى ئيدارا هه‌رێما كوردستانێ ژى پشكداريێ د لژنا ئاماده‌كرن و راستڤه‌كرنا دستوورێ هه‌رێما كوردستانێ دا بكه‌ن.

شوان شێخ ئه‌حمه‌د، سه‌رۆكێ لژنا ده‌ڤه‌رێن كوردستانى يێن ده‌رڤه‌يى ئيدارا هه‌رێما كوردستانێ ل په‌رله‌مانێ كوردستانێ د داخۆيانيه‌كا نڤيسكى دا ئه‌ڤرۆ رۆژا دوشه‌مبى رێكه‌فتى 27ى نيسانا 2015ێ راگه‌هاند: هه‌ر چه‌نده‌ بۆ دانانا ئه‌ندامێن لژنێ ئازاديا ته‌مام ب لايه‌نێن سياسى هاتيه‌ دان كو ئه‌و ب خوه‌ نوونه‌رێن خوه‌ ب دانن، به‌لێ پێداگيريێ ل سه‌ر وێ چه‌ندێ دكه‌ين كو دڤێت ده‌ڤه‌رێن كوردستانى يێن ده‌رڤه‌يى ئيدارا هه‌رێما كوردستانێ نوونه‌ر د لژنێ دا هه‌بن.

ئاماژه‌ ب وێ چه‌ندێ ژى هاتيه‌ كرن كو نوكه‌ وه‌سان هاتيه‌ دانان كو ئه‌وان ژى نوونه‌را هه‌بيت، به‌لێ د هه‌مان ده‌م دا ئازادى ژى دايه‌ لايه‌نێن سياسى ئه‌و نوونه‌رێن خوه‌ ب دانن.

شوان  شێخ ئه‌حمه‌د ئه‌ندامێ په‌رله‌مانێ كوردستانێ ل سه‌ر فراكسيۆنا زه‌ر دا زانين ژى كو هێشتا چاوانيا به‌لاڤكرنا ئه‌ندامێن لژنا 21 كه‌سى ديار نه‌بوويه‌ و هێشتا پارتى ژى بڕيار نه‌دايه‌ كا دێ ئه‌ندامێ وان ده‌ڤه‌ران هه‌بيت يان نه‌ و كا هه‌كه‌ هه‌بيت ژى دێ كێ ده‌ست نيشان كه‌ن.

ئه‌ڤرۆ نيوز:

حه‌يده‌ر شه‌شۆ فه‌رماندێ هێزا پاراستنا شنگال و ئه‌ندامێ جڤاتا ناڤه‌نديا ئێكه‌تيا نشتيمانى كوردستان راگه‌هاند كو ئه‌و يێ ئاماده‌كاريان بۆ گۆنگرێ راگه‌هاندنا پارته‌كا نوو دكه‌ن.

د راگه‌هاندنه‌كێ دا كو ب ناڤێ كۆميتا ئاماده‌كاريا كۆنگره‌يى ده‌رچوويه‌ هاتيه‌: “ئێزدى دوجاركى ل عيراقێ بێ پشك بووينه‌: جاره‌كێ وه‌كو وه‌لاتيێن كورد ل به‌غدا و جاره‌كێ ژى وه‌كو وه‌لاتيێن عه‌ره‌ب ل هه‌رێما كوردستانێ”.

حه‌يده‌ر شه‌شۆ بۆ رووداو دبێژيت: “ئه‌ڤ پارتيه‌ دێ بۆ هه‌موو ئێزديان بيت ل كوردستان و عيراقێ و وه‌لاتيێن وه‌لاته‌كێ دى نه‌شێن ببنه‌ ئه‌ندام”.

ده‌رباره‌يى په‌يوه‌نديا وان ب ئێكه‌تيێ ژى ڤه‌ دبێژيت: “بۆ من نينه‌ ئه‌ندامێ ئێكه‌تيێ و ڤێ پارتيێ بم د ئێك ده‌م دا”، دا زانين ژى كو هه‌تا نوكه‌ ناڤێ وێ پارتيێ نه‌هاتيه‌ ده‌ستنيشانكرن.