ئه‌ڤرۆ نيوز:
به‌رپرسێ فايلا مرۆڤايه‌تى ل بالوێزخانا فره‌نسا ل عيراقێ راگه‌هاند كو 90% ژ وان هاريكاريێن حوكمه‌تا فره‌نسا گه‌هاندينه عيراقێ بۆ هه‌رێما كوردستانێ هاتينه ره‌وانه‌كرن.
به‌رپرسێ فايلا مرۆڤايه‌تى ل بالوێزخانا فره‌نسا و پارێزگارێ دهۆكێ، فه‌رهاند ئه‌مين كۆنگره‌كێ رۆژنامه‌ڤانيێ هه‌ڤپشك ئه‌نجام دا، تێدا مايكل گێرڤن سۆپاسيا پارێزگه‌ها دهۆكێ كر ژ به‌ر هاريكاريكرنا وان ئاواران.
مايكل گێرڤن گۆت: “مه‌ره‌م ژ سه‌ره‌دانا مه بۆ پارێزگه‌ها دهۆكێ ئه‌وه كو هاريكاريا بگه‌هيننه ئاواران و بێژينه هه‌وه كو حوكمه‌تا فره‌نسا ل سه‌ر ره‌وشا ئاوارێن پارێزگه‌ها دهۆكێ يا ئاگه‌هداره”.
به‌رپرسێ فايلا مرۆڤايه‌تى ل بالوێزخانا فره‌نسا ل عيراقێ زێده‌تر گۆت: “پشتى نيڤرۆ دێ سه‌ره‌دانا ئێك ژ كه‌مپێن ئاواران كه‌ين و هاريكاريان گه‌هينينێ”.
ده‌رباره‌يى هژمارا هاريكاريێن وان ژ ده‌سپێكێ هه‌تا نوكه بۆ ئاواران گۆت: “مه چو هژمارێن ده‌ستنشيانكرى نينن ژ به‌ر كو مه ئێكسه‌ر داينه ده‌ست حوكمه‌تا عيراقێ، به‌لێ 90% ژ وان بۆ كوردستانێ هاتينه ره‌وانه‌كرن ژ به‌ر كو پتريا ئاواران هاتينه هه‌رێما كوردستانێ”.
ل هه‌مبه‌ر گۆتنێن ناڤبرى، پارێزگارێ دهۆكێ دا زانين كو ل هنده‌ك كه‌مپان هنده‌ك كێماسى هه‌نه و ئه‌و دێ وان كێماسيان چاره كه‌ن ب تايبه‌ت كێشێن نووژه‌نكرنێ.
پارێزگارێ دهۆكێ گۆت: “بابه‌تێ گلێشى ژى بوويه كێشه بۆ پارێزگه‌ها دهۆكێ به‌رى نوكه بۆ كارگه‌ها گلێشى ل كواشێ دهاته ره‌وانه كرن، به‌لێ ئه‌و ژى ڤێرا ناگه‌هن، ئه‌ڤه ژى هه‌موو يا بوويه ئاريشه بۆ ژينگه‌هـ و ساخله‌ميێ ژى”، دا زانين ژى كو فره‌نسا سۆز دا وێ كێشى ژى چاره بكه‌ن.
نيشاندان
