ئه‌ڤرۆ نیوز:
نه‌ته‌وێن یه‌كگرتى د راپۆرته‌كێ دا ئاشكراكریه كو 25 هزار وه‌لاتیێن بیانى چوونه ناڤ داعش و رێكخراوا قاعیده ل سووریا و عیراقێ.
ل دووڤ راپۆرته‌كا نه‌ته‌وێن یه‌كگرتى كو ئه‌ڤرۆ هاتیه به‌لاڤكرن: ژ 100 ولاتان زێده‌تر ژ 25هزار ولاتیێن بیانى په‌یوه‌ندى ب قاعیده و داعش ل سووریا و عیراقێ كرینه.
هه‌ڤده‌م هوشداریا وێ یه‌كێ دان كو ژماره‌كا زور ژ وان كه‌سێن چووینه ناڤ داعش دێ ل ئاینده‌ى بنه گه‌ف بۆ سه‌ر ئاسایشا جیهانێ.
ئه‌ڤرۆ نیوز:
مه‌سرور بارزانى راوێژكارێ ئه‌نجومه‌نێ ئاسایشا هه‌رێما كوردستانێ ددیداره‌كێ دا ل گه‌ل جێگرێ بالیوزێ سوێد ل به‌غدا به‌حسێ پێشڤه‌چوونێن سیاسى و ئێمناهیێ ل عیراقێ و ده‌ڤه‌رێ و روى ب روى بوونا داعش كر و ئاماژه ب وێ یه‌كێ كر كو هێزا داعش ب چاڤ به‌رێ، یێ لاواز بووى و نوكه ب تنێ زێده‌تر به‌ره‌ڤانیێ دكه‌ت ژ وێ یه‌كێ كو بخوازن جهه‌كێ دى داگیر بكه‌ن.
ئه‌ڤرۆ نیوز:
هشیار زێبارى وه‌زیرێ دارایى یێ عیراقێ راگه‌هاند كو ئه‌ڤرۆ به‌غدا 527 ملیار و 432 ملیون دینار ژ به‌غدا بۆ هه‌رێما كوردستانێ هنارتن.
هشیار زێبارى وه‌زیرێ دارایى یێ عیراقێ بۆ ئاژانسا رویته‌رز راگه‌هاند كو ئه‌ڤرۆ حوكمه‌تا عیراقێ وه‌ك بودجێ هه‌یڤا 3 كوژمێ 455 ملیون دولار بۆ هه‌رێما كوردستانێ هنارتن و گۆت: هه‌ردو ئالى پابه‌ندى رێككه‌فتنێ نه، و هنارتنا ڤى كوژمێ پاره‌ى ژ ئالیێ به‌غدا ڤه، رامانا وێ چه‌ندێ كو به‌غدا ژى یا پابه‌نده ب رێككه‌فتنێ.
ئه‌ڤرۆ نیوز:
فوئاد حسێن سه‌رۆكێ دیوانا سه‌رۆكاتیا هه‌رێما كوردستانێ راگه‌هاندنه‌ك ل دۆر ره‌وشا ساخله‌میا مه‌سعود بارزانى سه‌رۆكێ هه‌رێمێ به‌لاڤكریه و تێدا ره‌تكر كو ره‌وشا وى ساخلمیێ تێكچووبیت و دیاركریه: ره‌وشا وى یا ساخله‌میێ زور یا باشه، و ئه‌ڤرۆ پشكدارى د پێشانگه‌ها نێڤده‌وله‌تا یا پرتووكان دا كریه ل هه‌ولێرێ، به‌لێ ژبه‌ر كو په‌رسیڤ یێ هاتیه، ئالوزى دده‌نگى دا بۆ دروست ببون، له‌وما نه‌شیا گوتاره‌كێ پێشكێش كه‌ت.
لیژنا پێشمەرگەيی ل پەرلەمانێ کوردستانێ ئاماژە ب وێ چەندێ دکەت، ھژمارەکا زۆرا پێشمەرگەیان دەست ژ کارێ خوە بەرداینە و زووریا ھژمارا وان جھێ مەترسیێ یە.
دلێر ماوەتی، جێگرێ سەرۆکێ لیژنا پێشمەرگەی ل پەرلەمانێ کوردستانێ بۆ ئەڤرۆ نیۆز گۆت: “د گەل دەستپێکرنا شەڕێ داعش ھەتا نوکە ھژمارەکا زوورا پێشمەرگەيی دەست ژ کارێ خوە بەردایە و ھندەک ژ وان ژی ژ لایێ بەرپرسێن وان ھاتینە لادان و کەس و کارێن خوە ل جھێ وان دامەزراندینە”.
ماوەتی گۆتژی: “لیژنا پێشمەرگەيی شیایە ھژمارەکا زوورا پێشمەرگەیێن دەست ژ کارێ خوە بەرداین و ھندەک ژی يێن ھاتینە فەسلکرن ڤەگەڕینیته سەر کارێ وان، بەلێ دەست ژ کار کێشانا پێشمەرگەيی ھژمارەکا ھندە زووره جھێ مەترسیێ یە، بەلێ ژ بەر کو دوژمن مفايی ژ زانیاریان نەبینیت ھژمارا وان ئاشکرا ناکەم”.
دکتور رەبیع شاکر مەھدی سەرۆکێ کوربەندێ ئەکادیمی بۆ ئاشتیێ ل یەمەنێ د داخۆیانیەکێ دا بۆ ئەڤرۆ نيوز دبێژیت، حوسیێن یەمەنێ ب سەر مەزھەبێ زەیدی (شیعی) ڤەنە و رێژا وان ل یەمەنێ ٢٥% يه و خۆیا دکەت کو سعودیێ ئەڤ شەرە بێ خواندنا ئەنجامان دەستپێکریە و ل دووڤ بوچوونا وی دێ کارتێکرنەکا خراب ل سەر رەوشا دەڤەرێ کەت و رەت ژی دکەت ئیرانێ ھەبوون ل یەمەنێ ھەبیت.
دکتور رەبیع زێدەتر بۆ ئەڤرۆ دبێژیت” وەلاتیێن یەمەنێ مەندەھوش بووینە ژ وی شەری و د وێ باوەریێ دا نەبوون کو سعودیە دێ وەلاتێ وان ب فرۆکان بومبەبارانکەت و ب دیتنا من ڤی شەری دێ کارتێکرنێن خراب ل سەر دەڤەرێ ھەبن، ژبەر کو سعودیێ ئەڤ شەرە بێ خواندنا ئەنجامان دەستپێکر”.
دیارکر ژی کو ھێرشێن فرۆکێن سعودی پتریا باژێرێن یەمەنێ ڤەگرتینە وەمو سەنعا، مەئرب، سەعدە، حەدیدە، تەعز، عەدن و زالع و پتریا دەزگەھێن گرنگ وەکو فرۆکخانە و سەربازگەهـ و نەخوەشخانە و ویستگەھێن کارەبێ کرینە ئارمانجێن خوە و پتریا ھێرشان ل سەر سەنعایا پایتەخت و سەعدە ھاتینە ئەنجامدان و ئەڤ ھێرشە بووینە ئەگەرێ ئاوارەبوونا ب ھزارەھا وەلاتیان.
ل دۆر حوسیێن یەمەنێ، دبێژیت” بزاڤەکا سیاسی ئایینی یا چەکدارە ب ناڤێ (انصار اللە) ل سالا ١٩٩٢ ھاتیە دامەزراندن و سەر ب مەزھەبێ زەیدی ڤەنە و رێژا وان ل یەمەنێ ٢٥% يه و ب حوسی ھاتینە نیاسین ژبەر دامەزرێنەرێ وێ (بەدرەدین حوسی) کو ل سالا ٢٠٠٤ ل سەر دەستێ لەشکرێ یەمەنی ھاتبوو کوشتن و باژێرێ سەعدە بنگەھێ وان یێ سەرەکی یە”.
ناڤبری خۆیاکر کو ھەموو وەلاتیێن یەمەنی و ژ کەڤندا ژی د چەکدارن و نوکە پتر ژ ٧٠ ملیۆن چارچێن چەکی یێن ل یەمەنێ ھەین.
سەبارەت ئیرانێ ل یەمەنێ و پشتەڤانیا وێ بۆ حوسیان، دبێژیت” ئیران ل یەمەنێ نینە، لێ ژبەر ھەبوونا دۆرپێا ئابووری ل سەر یەمەنێ ژلایێ سعودیێ و ھندەک وەلاتێن ھەڤپەیمانێن وێ، یەمەن نەچارکر رێککەفتنەکا ئابووری و دەریایی ل گەل ئیرانێ ئیمزا بکەت و پشتی پێنج کومپانیێن فرۆکەڤانی یێن وەلاتێن کەنداڤی گەشتێن خوە بۆ یەمەنێ ل ٢١ ئیلۆنا ٢٠١٤ راوەستاندین، ئیرانێ و یەمەنێ رێککەفتنەک د وارێ ڤەگوھاستنا ئەسمانی دا ئیمزاکر کو ھەفتیانە ١٤ گەشتێن ئەسمانی ژ ئیرانێ بۆ یەمەنێ دھاتن و بەرۆڤاژی ژی ١٤ گەشت ژ یەمەنێ بۆ ئیرانێ و ئەڤ چەندە ئەگەرێ ھەلکرنا شەری بوو ژلایێ سعودیێ ڤە و ئیران تۆمەتبارکر کو ئەو ھاریکاریێن مرۆڤایەتی ئەوێن ئیران پێشکێشی یەمەنێ دکەت ب رێیا وان گەشتان، چەکە و نوکە بەردەوام و ب رێیا ١٨٠ فرۆکێن خوە ھێرشان دکەتە سەر یەمەنێ کو ھەتا نوکە چار ژ وان فرۆکان یێن ھاتینە ئێخستن”.
ناڤبری ئاماژە دا کو وەلاتێ سعودیێ گوژمێ ٣٠ ملیار دۆلاران بۆ شەرێ یەمەنێ تەرخانکرینە ژ بلی ملیارێن دۆلاران ئەوێن ل سەر وەلاتێن ھەڤپەیمانێن خوە د شەری دا بەلاڤکرین و گوت” ملیۆنەک و ھەفت ھزار وەلاتیێن یەمەنێ ژ ھەموو پارێزگەھان ناڤێن خوە وەکو خوەبەخش یێن تۆمارکرین و یێن گونجای بۆ شەری ژ وان دێ ھێنە ژێگرتن بۆ ھێرشکرنێ ل سەر سعودیێ”.
ئه‌ڤرۆ نيوز:
ساخله‌ميا سه‌رۆك بارزانى تێكچوو و نه‌شيا به‌ره‌ده‌واميێ بده‌ته پشكداريا خوه د پێشانگه‌ها پرتووكان يا هه‌ولێر دا ئه‌وا ژ لايێ ده‌زگه‌هێ مه‌دا يێ چاپ و وه‌شانێ هاتيه ڤه‌كرن.
د. فوئاد حسێن سه‌رۆكێ ديوانا سه‌رۆكاتيا هه‌رێما كوردستانێ راگه‌هاند كو بارێ ساخله‌ميا سه‌رۆكێ هه‌رێما كوردستانێ نه‌يا باشه و ژ به‌ر هندێ ژى نه‌شيا په‌يڤێ ل ده‌مێ ڤه‌كرنا پێشانگه‌هێ بخوونيت و زوو پێشانگه‌هـ بجهـ هێلا.
ژێده‌ر: رووداو
ئه‌ڤرۆ نيوز:
به‌رپرسێ ده‌زگه‌هێ جيهاد يێ راگه‌هاندنێ ئه‌وێ د ناڤ هێزێن حه‌شه‌د شه‌عبى دا د به‌ياننامه‌كێ دا راگه‌هاند كو ئه‌و شيانه ئێك ژ سه‌ركردێن چه‌كدارێن داعش ب ناڤێ “ئه‌بو زينه ئه‌لئه‌نسارى” بكوژن.
ئه‌بۆ زينه خه‌لكێ عيراقێ يه و ژ ئه‌نجامێن مووشه‌كه‌كێ بۆ سه‌ر باره‌گايێن چه‌كدارێن داعش ل رۆژئاڤايێ به‌غدا يا پايته‌خت هاتيه كوشتن.
نيشاندان