ئه‌ڤرۆ نيوز:

ب كۆره‌يى نڤيساره‌كا په‌رله‌مانێ كوردستانێ راگه‌هانديه‌ كو رۆژا دوشه‌مبى 13ى نيسانا 2015ێ په‌رله‌مانێ كوردستانێ دێ روونشتنا خوه‌ يا ئاسايى يا هه‌شتێ ژ خولا بهارێ گێرێت و دێ دانوستاندنێ ل سه‌ر پرۆژێ قانوونا ئاماده‌كرنا پرۆژێ دستوورێ هه‌رێما كوردستانا عيراقێ كه‌ت.

هه‌ر ب گۆره‌يى ڤێ نڤيسارا په‌رله‌مانى هاتيه‌: ب گۆره‌يى حوكمێن برگا “1” يێ ماددێ “20” ژ په‌يره‌وێ ناڤخۆ يێ په‌رله‌مانێ كوردستانێ – عيراق ژماره‌ “1” يێ سالا 1992 يێ راستڤه‌كرى، ده‌سته‌يا سه‌رۆكاتيا په‌رله‌مانى بڕيار دا روونشتنا ژماره‌ “8” يا خولا بهارێ ژ خولا هه‌لبژارتنا چوارێ يا په‌رله‌مانى ل ده‌مژمێر 11ى پێش نيڤرۆيا رۆژا دوشه‌مبى رێكه‌فتى 13ى نيسانا 2015ێ بيت”.

دايه‌ زانين ژى دێ به‌رمانێ كارێ ژ ته‌وه‌ران پێك هێت يێ ئێكێ دێ دانوستاندن بيت ل سه‌ر پرۆژێ ئاماده‌كرنا پرۆژێ دستوورێ هه‌رێما كوردستانێ – عيراق بۆ راپرسيێ، ب گۆره‌يى مادێن “72 و 74 و 75″ ژ په‌يره‌وێ ناڤخۆ يێ په‌رله‌مانێ كوردستانێ ژماره‌ “1”يێ سالا 1992ێ يێ راستڤه‌كرى.

يا دويێ ژى دێ دانوستان بيت ل سه‌ر پرۆژێ قانوونا پاراستنا مافێن پێكهاتێن نه‌ته‌وى و ئاين و تيرێن ئاينى ل هه‌رێما كوردستانێ – عيراق ب گۆره‌يى مادێن “72 و 74 و 75″ ژ په‌يره‌وێ ناڤخۆ يێ په‌رله‌مانێ كوردستانێ يێ ژماره‌ “1”يێ سالا 1992ێ يێ راستڤه‌كرى.

ئه‌ڤرۆ نيوز:

يوسف محه‌مه‌د سه‌رۆكێ په‌رله‌مانێ كوردستانێ و كوسره‌ت ره‌سول جێگرێ سكرتێرێ گشتێ ئێكه‌تى نشتيمانى كوردستان ده‌ستپێكر.

د كۆنگرێ رۆژنامه‌ڤانى دا يوسف ئه‌حمه‌د سه‌رۆكێ په‌رله‌مانى دا زانين كو ئه‌و بۆچوونێن ناڤا په‌رله‌مانى بۆ ئێكه‌تى نشتيمانى كوردستان هاتنه‌ به‌حسكرن و دێ بۆچوونا خوه‌ ل سه‌ر ديار كه‌ن.

كوسره‌ت ره‌سول جێگرێ سكرتێرێ گشتێ ئێكه‌تى نشتيمانى كوردستان دا زانين كو ئه‌وان پێدڤى ب دانوستاندێن زێده‌تر د ڤێ ده‌ربارێ دا هه‌يه‌ و دێ پاشان بڕيارێ ل سه‌ر ده‌ن.

دا زانين ژى كو ئه‌وان هێشتا بڕيارا خوه‌ نه‌دايه‌ و چو بۆچوونێن وه‌سا ژى نينن كو به‌رامبه‌ر پۆستێ سه‌رۆكاتيا هه‌رێمێ داخوازا پۆستێ سه‌رۆكێ حوكمه‌تێ كربيت.

د به‌رامبه‌ر وێ چه‌ندێ ژى يوسف محه‌مه‌د ئاشكه‌را كر كو ئه‌وان هه‌تا نوكه‌ خوه‌ ئێكلا نه‌كريه‌ و ئه‌و دێ پتر دانوستاندنێ ل سه‌ر ڤێ پرسێ كه‌ن.

به‌رى ماوه‌كى سه‌رۆكاتيا په‌رله‌مانێ كوردستانێ ل گه‌ل ئێكه‌تى نشتيمانى كوردستان ل دۆر راستڤه‌كرنا دستوورى و ماوێ سه‌رۆكاتيا هه‌رێما كوردستانێ كۆمبوو.

شاندێ سه‌رۆكاتيا په‌رله‌مانى ژ يوسف محه‌مه‌د و جه‌عفه‌ر ئێمينكى و فه‌خره‌دين قادر، سه‌رۆك و جێكر و سكرتێرێن په‌رله‌مانى ل گه‌ل هه‌ر ئێك ژ كوسره‌ت ره‌سۆل جێگرێ ئێكێ يێ سكرتێرێ گشتيێ ئێكه‌تى نشتيمانى كوردستان و مه‌لا به‌ختيار، به‌رپرسێ ده‌سته‌يا كارگێرى يا مه‌كته‌با سياسى يا ئێكه‌تى نشتيمانى كوردستان و عومه‌ر فه‌تاح ئه‌ندامێ مه‌كته‌با سياسى يا ئێكه‌تيێ و بێگه‌رد ته‌له‌بانى سه‌رۆكا فراكسيۆنا ئێكه‌تيێ ل په‌رله‌مانێ كوردستانێ كۆمبوون.

مه‌ره‌م ژ ڤێ سه‌ره‌دانێ دانوستاندنه‌ ل سه‌ر پرسا راستڤه‌كرنا دستوورێ هه‌رێما كوردستانێ و پرسا ماوێ سه‌رۆكاتيا هه‌رێمێ و ويلايه‌تا بارزانى.

به‌رهه‌م سالح جێگرێ دويێ يێ سكرتێرێ گشتێ ئێكه‌تى نشتيمانى كوردستان پشكداريى د ڤێ كۆمبوونێ دا نه‌كربوو و ئه‌گه‌رێ پشكداينه‌كرنێ ژى نه‌هاتينه‌ زانين، به‌لێ پێشبينى دهێته‌ كرن كو ژ ده‌رڤه‌يى وه‌لاتى نه‌ڤه‌گه‌ريابيت.

ئەڤرۆ نیۆز، قائید میرۆ:
ل زانکۆیەکا باژێڕێ ھەولێرێ ئالایێ کوردستانێ دھێتە لادان و ئالایێ عێراقێ دھێتە بلندکرن، لەوڕا ئالۆزی کەفتیە ناڤبەرا قوتابیان و قوتابیێن کورد ب توندی نەڕازیبوونا خوە دایە نیشاندان.

رائید کاروان عەبدولکەریم، پەیڤدارێ پۆلیسێن ھەولێرێ بۆ ئەڤرۆ نیۆز راگەھاند: “ئەڤرۆ ھژمارەکا قوتابیێن عەرەب ل زانکۆیا حەیات یا باژێڕێ ھەولێرێ ئالایێ کوردستانێ ل سەر زانکۆیێ ئینایە خوار و پێکدادان ناڤبەرا قوتابیێن کورد و عەرەب چێبوویە”.
رائید کاروانی گۆتژی: “پۆلیس گەھشتنیە جھێ روودانێ و بزاڤێن تێنەکرن بھێتە کۆنتڕۆڵکرن”، قوتابیێن کورد تەکەز کرن، رازی نابین ئالایێ عێراقێ ل جھێ ئالایێ کوردستانێ بھێتە ھلدان.

ئه‌ڤرۆ نيوز:

بڕيار بوو رۆژا پێنجشه‌مبى سه‌رۆكاتيا په‌رله‌مانێ كوردستانێ ل گه‌ل ئێكه‌تى نشتيمانى كوردستان كۆم بيت دا كو هه‌لويستێ وان ل دۆر پرسا دستوورى و زێده‌كرنا مازێ سه‌رۆكاتيا هه‌رێمێ بزانيت، به‌لێ ژ به‌ر ئاماده‌نه‌بوونا هه‌ردو جێگرێن سكرتێرێ گشتى ئه‌ڤ روونشتنه‌ بۆ رۆژا شه‌مبى رێكه‌فتى 11ى نيسانا 2015ێ هاته‌ پاشخستن.

پێشتر سه‌رۆكاتيا په‌رله‌مانێ كوردستانێ يێ پێكهاتى ژ يوسف محه‌مه‌د و جه‌عفه‌ر ئێمينكێ و فه‌خره‌دين قادر، سه‌رۆك و جێگر و سكرتێرێن په‌رله‌مانى سه‌ره‌دانا هه‌ر ئێك ژ يه‌كگرتوو و كۆمه‌لێ و گۆڕان كريه‌ و بۆچوونا وان ل سه‌ر پرسا سه‌رۆكاتيا هه‌رێمێ و راستڤه‌كرنا دستوورى وه‌رگرتيه‌.

ئه‌ڤرۆ نيوز:

ئه‌ندامه‌كێ جڤاتا سه‌ركرداتيا پارتى ديموكراتى كوردستان راگه‌هاند، ئێكشه‌مبيا بهێت جڤاتا سه‌ركرداتيا پارتى دێ بۆ دانوستاندنێ ل سه‌ر پرسا دستوورى و سه‌رۆكاتيا هه‌رێمێ كۆمبيت.

عه‌لى حسێن ئه‌ندامێ جڤاتا سه‌ركرداتيا پارتى ديموكراتى كوردستان بۆ مالپه‌رێ فه‌رميێ پارتى ديموكراتى كوردستان KDP.info گۆت: “بڕياره‌ رۆژا ئێكشه‌مبى جڤاتا سه‌ركراتيا پارتى ديموكراتى كوردستان كۆمبوونا ئاسايا خوه‌ ئه‌نجام بده‌ت كو هه‌ر سێ هه‌يڤان جاره‌كێ ئه‌نجام دده‌ت”.

ئاماژه‌ ب وێ چه‌ندێ ژى كر كو كۆمبوونا ڤێ جارێ دێ زێده‌تر گرێدايى ره‌وشا نوكه‌ يا كوردستانێ وه‌كو دستوورى و سه‌رۆكاتيا هه‌رێمێ و كۆمه‌كا دى يا پرسان بيت.

دا زانين ژى كو د كۆمبوونێ دا دێ بۆچوونا پارتى ل دۆر وێ پرسێ هێته‌ دياركرن كا چاوان دانوستاندن ل سه‌ر بهێته‌ كرن و ب چو ره‌نگ بيت و گۆت: “بۆچوون دێ د ڤى وارى دا هێنه‌ گوهۆڕين”.

ئه‌ڤرۆ نيوز:

قونسلخانا ئيرانى ل سلێمانێ رادگه‌هينيت كو ئه‌وان ژى دڤێت سيسته‌مێ دانا ڤيزايێ ب هه‌رێما كوردستانێ وه‌كو توركيا لێ بهێت، ئانكو ڤيزا نه‌مينيت، به‌لێ حوكمه‌تا ناڤه‌ندى يا عيراقى رازى نابيت.

حه‌ميد ره‌زا به‌يداق به‌رپرسێ قونسلخانا ئيرانێ ل سلێمانيێ بۆ ئاوێنه‌ گۆت: “چه‌ندين جاران مه‌ داخواز ژ حوكمه‌تا ناڤه‌ندى كريه‌ كو ڤيزا ناڤبه‌را هه‌رێما كوردستانێ و ئيرانێ نه‌مينيت ب تنێ ل سه‌ر پاسپۆرتا گه‌شتياران هاتن و چوون ل سه‌ر بهێته‌ نڤيسين، به‌لێ ئه‌وان ره‌زامه‌ندى ده‌رنه‌بڕيه‌ و ئه‌و پرۆتۆكۆل د ناڤبه‌را سه‌فاره‌تا ئيران و حوكمه‌تا ناڤه‌ندى دايه‌.

نوكه‌ چوونا وه‌لاتيان ژ هه‌رێما كوردستانێ بۆ وه‌لاتێ توركيا ب رێيا ڤيزايێ نه‌ما و ب تنێ ئه‌و پێدڤى ب نڤيساره‌كێ نه‌ كو دشێت ل سه‌ر ئه‌نترنێتێ ب ده‌ست خوه‌ بێخن يان ژى ژ كۆمپانيێن گه‌شتيارى ب بهايێ پێنج هه‌تا 10 هزار ديناران، هه‌مبه‌ر وێ چه‌ندێ يا وه‌لاتێ ئيرانێ ب رێيا ڤيزايێ يه‌ و ب 35 هه‌تا 50 دۆلاران دهێته‌ فرۆتن.

ئەڤرۆ نیوز، زنار تۆڤی:

ئەڤرۆ رۆژا ئەینی 1ى نيسانا 2015ێ و ل ده‌مژمێر 5:30 ده‌قيقه‌ ل گۆندێن سنورى بۆ ماوێ چه‌ند ده‌قيقان ژ لایێ توپخانێن سوپایێ تورکی ب چەند گولە توپان ھاتنە توپبارانکرن و ڤێ چەندێ ترسەک ل دەف خەلکی پەیداکر.

دلوڤان ئەحمەد وه‌لاتيه‌كێ وان گۆندايه‌ بۆ ئەڤرۆ نیوز راگەھاند: ئەڤرۆ روژا ئەینی گەلەک ژ خەلکێ ب مەرەما سەیرانێ قەستا وان گوندێن سنوری وەکو گوندێن کێستە و نزدورێ کریە و ھەروەسا گەلەک خەلک چووینە چیایی بو ئینانا گژ و گیایێ بوھارێ، لێ ل دەمێ توپخانێن تورکی توپ ھاڤێتینە گوندێن نزدورێ و رویسێ ترسەک لدەف خەلکێ پەیدا کر، ھەر چەندە زیانێن گیانی نەبوون،لێ ھەر زوو خەلکی ئەو دەڤەر بجهـ ھێلان، ژ پێخەمەت پاراستنا گیانێ خوە.