دوهی سێشەمبی 21/1/2025، نێچیرڤان بارزانی، سەرۆكێ هەرێما كوردستانێ ل گەل تۆماسۆ سانسۆنێ، قۆنسلێ گشتیێ نوو یێ ئیتالیا ل هەرێما كوردستانێ كۆمبوو و پیرۆزباهییا دەستبكاربوونێ لێ كر.
د كۆمبوونێدا نێچیرڤان بارزانی هیڤییا سەركەفتنێ بۆ قۆنسلێ گشتیێ نوو یێ ئیتالیا خواست و هەموو پشتەڤانییەكا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی دەربڕی.
قۆنسلێ گشتیێ نوو یێ ئیتالیا ژی خوەشحالییا خوە ب دەستبكاربوونێ ل هەرێما كوردستانێ نیشاندا و دوپاتكر وەلاتێ وێ ب گرنگییەكا مەزنڤە دنێریتە پەیوەندیێن خوە ل گەل هەرێما كوردستانێ و دخوازیت د هەموو واراندا هاریكارییا هەڤپشك یا د ناڤبەرا واندا پێشڤەببەت.
گرنگترین وارێن پەیوەندییا ئیتالیا ل گەل ئیراقێ و هەرێما كوردستانێ، رەوشا دەڤەرێ و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.

مەسرور بارزانی، سەرۆكێ حوكمەتا هەرێما كوردستانێ ل رۆژا ئێكێ یا پشكداریكرنێ د كۆڕبەندێ ئابووریێ جیهانی ل داڤۆس ل سویسرا، (مالا كوردستانی) ڤەكر و خوەشحالییا خوە دیاركر كو جارا دویێیە ب ناڤێ مالا كوردستانی پشكداریێ د كۆڕبەندێ داڤۆس دا دكەن.
د وی رێوڕەسمیدا كو لەتیف رەشید، سەرۆككۆمارێ ئیراقێ و هەژمارەكا وەبەرئێنەر و خودانكارێن كوردستانی بەرهەڤ بوون، سەرۆكێ حوكمەتا هەرێما كوردستانێ گۆت» خوەشحالێن كو بۆ سالا دویێ ب ناڤێ مالا كوردستانی، پشكداریێ د كۆڕبەندێ ئابووریێ جیهانی ل داڤۆس دا دكەین.سوپاسییا وان ژی دكەم یێن رۆل د دروستكرنا مالا كوردستانی ل داڤۆس هەبووی،ب تایبەتی ژی خالد خۆشناو كو ئەركێ دروستكرنا مالا كوردستانێ ل داڤۆس كێشای».
مەسرور بارزانی بەرچاڤكر ژی كو د شیاندایە هەرێما كوردستانێ ببیتە دەرگەهەك بۆ ئیراقێ و دەڤەرێ، تاكو پێشكەفتنا ئابووری ل دەڤەرێ پێشڤەببەن.
سەرۆكێ حوكمەتا هەرێمێ د پشكەكا دی یا پەیڤا خوە دا باسێ شەهید پێشڕەو دزەیی كر و گۆت» د جهێ خوەدایە ل ڤێرێ بیرئینانا شەهید برایێ مە شەهید پێشڕەو بكەین كو ل سالا بۆری ب نیاز بوو ل گەل مە پشكدار ببیت، بەلێ ژ ئەگەرێ وێ چەندێ كو چەند گرفتەك بوو پەیدابوون، نەشیا پشكدار ببیت، كو مخابن ب شێوەیەكێ ستەمكارانە شەهید بوو، ئەم بیرئینانا وی بلند رادگرین و خوەشحالم ئەڤسالە كاك رۆژ كوڕێ شەهید پێشڕەو دزەیی ل گەل مە یێ پشكدارە، ب پشتەڤانییا خودایێ مەزن، دێ جهێ بابێ خوە شەهید پێشڕەو دزەیی گریت».
مەسرور بارزانی رۆناهی ژی ئێخستە سەر پڕۆسەیا دەستبكاربوونا سەرۆكێ نوو یێئەمریكا و ب رۆژەكا دیرۆكێ بۆ ئەمریكا هەژمارت، ژ بەر سویند خوارنا سەرۆك ترەمپی و ب فەرمی دەستبكاربوونا وی وەكو سەرۆكێ ئەمریكا، ب ڤێ هەلكەفتی ژی ب ناڤێ هەموو خەلكێ كوردستانێ پیرۆزباهی ل سەرۆك ترەمپی كر و هیڤی خواست بشێین پەیوەندیێن ستراتیژی یێن هەرێما كوردستانێ ل گەل ئەمریكا پێشڤەببەین و وەكو هەڤپەیمانەك بەردەوام د وێ چەندێ دا كو ئاشتیێ و سەقامگیریێ ل دەڤەرێ پێشڤەببەین و بپارێزین. د هەمان دەمدا هیڤییا وێ چەندێ ژی خواست كو ئەمریكا زێدەتر هاریكارییا هەرێما كوردستانێ بكەت، ب تایبەتی ژی ژ روویێ پاراستنا هەرێما مە و پێشئێخستنا ئابوورێ وێ.
سەرۆكێ حوكمەتا هەرێمێ د پشكەكا دی یا ئاخڤتنێن خوە دا، رۆناهی ئێخستە سەر گوهۆڕینێن ب لەز یێن دەڤەرێ و نموونەیا گوهۆڕینێن سووریێ ئینا و گۆت: ڤێ چەندێ وەكریە خەلكێ مە چاڤەڕێ بیت بزانیت ئەو گوهۆڕینە دی بەر ب كیڤە چیت، ئەم دێ هەموو بزاڤان كەین بۆ وێ چەندێ نەچینە دناڤ كێشەیاندا، بەلێ هەكە بشێین رۆلەكێ ئەرێنی ببینین د باشتركرنا سەقامگیری و ئاسایشا دەڤەری، خەمساریێ ناكەین و هەر ژ ڤی روانگەهی ڤە مە چەندین دیدار و سەرەدان بۆ وەلاتێن دەروبەرێ ئیراقێ یێن ئەنجامداین، تاكو ئەم بشێین رۆلەكێ ئەرێنی بگێرین بۆ وێ چەندێ ئاشتی و سەقامگیری ل دەڤەرێ بمینیت و كێشە و گرفت كاریگەرییا ئەرێنی ل سەر رەوشا مە نەكەن.
مەسرور بارزانی گۆت ژی: پێدڤییە كوردستان پشكەك بیت ژ وان گوهۆڕینێن باش یێن ل دەڤەرێ روو ددەن، هەروەسا ئاماژەكر كو هیچ تشتەك ژ وێ چەندێ باشتر نینە كو ئەم ل كوردستانێ ئێكهەلویست و ئێكدەنگ و ئێكڕێز بین، بزاڤێن جدی ژی یێن هەین ل ناڤ كوردستانێ كو ئەم بیر و بۆچوونێن خوە ژ هەڤدو نێزیك بكەین، بەلێ ل سووریێ ژی ل سەر ڤەخواندنا سەرۆك مەسعود بارزانی، مەزلوم عەبدی سەرەدانا هەولێرێ كر، هەروەسا ل گەل ئالیێن دی یێن كوردستانێ ل سووریێ ئاخڤتییە كو پێكڤە بشێن ئێكڕێزی و ئێكهەلویستیێ نیشان بدەن، هەڤدەم پێكڤە داخوازا مافێن خوە یێن رەوا بكەن. هیڤیدارین بگەهنە ئەنجامەكی ل گەل دەستهەلاتا نوو ل سووریێ، بەلكو خەلكێ كوردستانێ ل رۆژئاڤا بگەهنە مافێن رەوا یێن خوە و بشێن رەوشەكا نوو بۆ خەلكێ كوردستانێ ل دەڤەرێ دروست بكەین.
هەر د پەیڤا خوە دا، سەرۆكێ حوكمەتا هەرێمێ باس ل بزاڤێن ژ بۆ ب دەستڤەئینانا مافێن خەلكێ كوردستانێ ل بەغدایێ كر و ئەو چەندە بەرچاڤكر كو ل رۆژێن داهاتی دێ كارێ گەلەك جدی ل بەغدا هێتە كرن بۆ وێ چەندێ شایستەیێن دارایی یێن خەلكێ كوردستانێ بهێنە مسۆگەركرن. هەڤدەم دوپاتی ژی ل مافێن دستووری یێن خەلكێ كوردستانێ كر. د ڤی چارچۆڤەیدا ژی سوپاسییا هەر ئێك ژ سەرۆككۆمارێ ئیراقێ و وەزیرێن كورد و ئەندامێن فراكسیۆنێن كوردستانی ل جڤاتا نوونەرێن ئیراقێ كر ل بەرامبەر كو هەموو د هاریكار و پشتەڤان بوون د وێ چەندێ دا بشێن دانوستاندنێن باش ئەنجام بدەن. ئەوژی دوپاتكر كو چاڤەڕێی وێ چەندێ نە دانوستاندن ببنە كڕیار و ئێدی بابەتێ شایستەیێن دارایی یێن هەرێما كوردستانێ نەبیتە كێشە د ناڤبەرا هەولێرێ و بەغدایێ دا.

مەسرور بارزانی، سەرۆكێ حوكمەتا هەرێما كوردستانێ د چارچۆڤەیێ پشكداریكرنێ د كۆڕبەندێ ئابووریێ جیهانیدا ل داڤۆس ل سویسرا چەندین دیدار و كۆمبوون ل گەل بەرپرسێن بلند یێن وەلاتێن جیهانێ ئەنجامدان.
دوهی سێشەمبی 21/1/2025، مەسرور بارزانی، سەرۆكێ حوكمەتا هەرێما كوردستانێ ل گەل ئیلهام عەلیێڤ، سەرۆككۆمارێ ئازرەبایجانێ كۆمبوو. د دیدارەكێدا سەرۆك عەلیێڤ خوەشحالییا خوە ب كۆمبوونێ نیشاندا و ئاماژە ب پەیوەندیێن دێرین د ناڤبەرا ئازەربایجانێ و گەلێ كورد كر، سەرۆكێ حوكمەتا هەرێمێ ژی بۆ ئازەربایجانێ ڤەخواند و راگەهاند ژی كو د بەرنامەیێ وی دایە سەرەدانا ئیراقێ و هەرێما كوردستانێ بكەت، هەروەسا بەرهەڤی ژی بۆ دەستپێكرنا گەشتێن ئەسمانی د ناڤبەرا باكۆ و هەولێرێ دا دیاركر.
مەسرور بارزانی سوپاسییا پشتەڤانی و هەماهەنگییا كۆمارا ئازەربایجانێ كر و دوپاتی ل گرنگییا ب هێزكرنا پەیوەندیێن دو ئالییانە د هەموو واراندا كر.
هەر ل داڤۆس سەرۆكێ حوكمەتا هەرێمێ ل گەل ئەلیكساندەر دیكروو، سەرۆك وەزیرێن بەلجیكا كۆمبوو، دیدارەكێدا سەرۆك وەزیرێن بەلجیكا ئاماژە ب گرنگییا پێگەهێ هەرێما كوردستانێ كر و بەرهەڤییا وەلاتێ خوە بۆ زێدەتر پێشئێخستنا پەیوەندیێن د ناڤبەرا هەرێما كوردستانێ و بەلجیكا دا.
مەسرور بارزانی سوپاسییا هاریكاری و پشتەڤانییا بەلجیكا بۆ هەرێما كوردستانێ كر، هەروەسا هەردو ئالی د هەڤڕا بوون ل سەر پێشڤەبرنا هاریكاری و هەماهەنگییا دو ئالییانە، ب تایبەتی د وارێن لێكگوهارتنا بازرگانی و ئابووری.
گرنگییا پاراستنا مافێن دستووری یێن هەرێما كوردستانێ، رەوشا گشتییا ئیراقێ و دەڤەرێ، گوهۆڕین و پێشهاتێن سووریێ، چەند تەوەرێن دی یێن دانوستاندنان بوون.
هەر ل داڤۆس مەسرور بارزانی، سەرۆكێ حوكمەتا هەرێمێ ل گەل یان لیپاڤسكی، وەزیرێ دەرڤەیێ كۆمارا چیك كۆمبوو، د دیدارەكێدا پێشڤەبرنا پەیوەندیێن هەرێما كوردستانێ و كۆمارا چیك د وارێن جۆراوجۆردا، ب تایبەتی د وارێ هەمەجۆركرنا ئابوورێ، هاتتە گەنگەشەكرن.
د پشكەكا دی یا كۆمبوونێدا، دوپاتی ل گرنگییا پاراستنا ئاسایش و ئارامییا هەرێما كوردستانێ و ئیراقێ هاتە كرن، بیر و بۆچوون ژی ل دۆر دوماهی پێشهات و گوهۆڕینێن سووریێ هاتنە لێكگوهارتن.
هەر دوهی سێشەمبی 21/1/2025، مەسرور بارزانی، سەرۆكێ حوكمەتا هەرێمێ ل داڤۆس ل گەل شاندەكێ وەلاتێ بەحرەین كۆمبوو، كو یێ پێكهاتیبوو ژ شازادە عیسا بن سەلمان ئال خەلیفە، شێخ سەلمان بن خەلیفە ئال خەلیفە، وەزیرێ دارایی و ئابوورێ نیشتمانی، عەبدوللا عادل فەخرۆ، وەزیرێ پیشەسازی و بازرگانی و شێخ سەلمان ئەحمەد ئال خەلیفە، سەرۆكێ دیوانا جهنشینێ بەحرەینێ.
شاندێ بەحرەینی سلاڤ و رێزێن شاه حەمەد بن عیسا ئال خەلیفە، شاهێ بەحرەین و جهنشین و سەرۆك وەزیرێن بەحرەینێ گەهاندنە سەرۆكێ حوكمەتا هەرێمێ و بەرهەڤییا وەلاتێ بەحرەینێ بۆ پێشڤەبرنا پەیوەندییان ل گەل هەرێما كوردستانێ د وارێن جۆراوجۆر دا نیشاندا.
مەسرور بارزانی سوپاسییا پشتەڤانییا وەلاتێ بەحرەین كر، ب تایبەتی شاه حەمەد و خواستا زێدەتر ب هێزكرنا پەیوەندیێن دو ئالییانە دوپاتكر.
هەر د بەردەوامییا دیدارێن خوە دا ل داڤۆس، دوهی سێشەمبی 21/1/2025، مەسرور بارزانی، سەرۆكێ حوكمەتا هەرێمێ ل گەل عەیدەرۆس زوبەیدی، جێگرێ سەرۆكێ جڤاتا سەرۆكایەتییا یەمەن و سەرۆكێ جڤاتا ئینتیقالییا باشوورێ یەمەن كۆمبوو.
د دیارەكێدا رەوشا گشتییا ئیراقێ و یەمەنێ و گوهۆڕینێن سووریێ هاتنە گەنگەشەكرن، هەردو ئالی د هەڤڕابوون ل سەر پێدڤییا پاراستنا ئاسایش و ئارامییا دەڤەرێ.
هەر ل داڤۆس، سەرۆكێ حوكمەتا هەرێمێ ل گەل خالد ئەلفالح، وەزیرێ وەبەرئێنانێ ل وەلاتێ سعودیێ كۆمبوو، دیدارەكێدا وەزیرێ سعودی سلاڤ و رێزێن شاهـ سەلمان و شازادێ جهنشین محەمەد بن سەلمان گەهاندنە سەرۆكێ حوكمەتا هەرێمێ و خواستا وەلاتێ خوە بۆ پێشڤەبرنا پەیوەندیێن دو ئالییانە دوپاتكر.
مەسرور بارزانی، سەرەرای ئاماژەدانێ ب پەیوەندیێن دێرێن د ناڤبەرا هەرێما كوردستانێ و سعودیێ، بەرهەڤییا هەرێما كوردستانێ ژی بۆ ب هێزكرنا پەیوەندییان ل گەل وەلاتێ سعودیێ دیاركر.

چاڤدێرێن سیاسی ل تورکیا و باکورێ کوردستانێ دیار دکەن، داخۆیانیێن ئەردۆغانی و بەرپرسێن دی یێن تورکیا جهێ گومانێ نە، هێشتا ژی ئەردۆغان بەحسێ شەڕی و ژناڤبرنا پەکەکێ دکەت، د دەمەکێ دا کو نها بەحسێ ئاشتیێ دهێتە کرن دڤێت زمانێ ئەردۆغانی و بەرپرسێن دی یێن تورکیا بهێتە گوهۆڕین و خالا دی ژی هەتا نها دیار نینە کا ئارمانجا ئەردۆغانی چیە، چونکی ژ بۆ مافێن کوردان هەتا نها ئەردۆغانی چو نەگۆتیە، یا نها ئەردۆغان بەحس ژێ دکەت بابەتێ دەست بەردانا پەکەکێ یە ژ چەکی، لێ پرسا کوردی تنێ گرێدایی پەکەکێ و دەست بەردانا ژ چەکی نینە.
د ڤێ دەربارێ دا زەکەریا یاپیجی ئۆغلۆ سەرۆکێ (هۆداپار) ل باکورێ کوردستانێ د داخۆیانیەکێ دا بۆ دەزگەهێن راگەهاندنا تورکیا دیار کر، نابیت بابەتێ چاوانیا چارەسەرکرنا پرسا کوردی ل تورکیا بهێتە گرێدان ب بابەتێ دەست بەردانا ژ چەکی ژ ئالیێ پەکەکێ ڤە، چونکی پرسا کوردی ل تورکیا دڤێت بهێتە چارەسەرکرن، تورکیا نەچارە ژ بۆ چارەسەرکرنا پرسا کوردی گوهۆڕینێن مەزن بکەت، دڤێت دستوورێ تورکیا ژی بهێتە گوهۆڕین، لێ مخابن هەتا نها ژ بۆ چارەسەرکرنا پرسا کوردی ل تورکیا ب کریاری چو نەهاتیە کرن و ئەو یەک ژی جهێ گومانێ یە، چونکی دڤێت کورد ل تورکیا بگەهنە مافێن خوە و نها گەلەک ئاستەنگی هەنە دڤێت نەمینن.
ناڤهاتی ئەو یەک ژی دیار کر، هەتا نها نە ئەردۆغان و نە ژی دەولەت باخچەلی بەحسێ ڤێ یەکێ ناکەن کا دێ چاوا پرسا کوردی ل تورکیا چارەسەر کەن، بەحسێ ئاشتیێ دکەن و بەحسێ هندەک تشتێن دی دکەن، لێ بابەتێ سەرەکی و گرنگ چاوانیا چارەسەرکرنا پرسا کوردی یە و مخابن هەتا نها کەس بەحسێ وێ ناکەت و گۆت: (هەکە ب کریاری ژ بۆ چارەسەرکرنا پرسا کوردی ل تورکیا هندەک تشتێن بەرچاڤ نەهێنە کرن، بێگومان باوەریا کوردان ژی ب قۆناغا نها ناهێت و چو ئەنجامێن خوە ژی نابن).

سەرۆك بارزانی ل گەل مەزلوم عەبدی چاوانییا رەفتاركرنا ئالیێن كوردی ل گەل رەوشا نوكە یا سووریێ گەنگەشەكر.
بارەگەهێ بارزانی ل پێگەهێ فەرمیێ خوە بەلاڤكر» ل سەلاحەدین سەرۆك مەسعود بارزانی پێشوازی ل مەزلوم عەبدی، فەرماندەیێ گشتیێ هێزێن سووریا دیموكرات كر.
د دیدارەكێدا رەوشا سووریێ و دوماهی پێشهاتێن ئەمنی و سیاسی یێن سووریێ و هەروەسا چارچۆڤەیێ گشتیێ رەفتاركرنا ئالیێن كوردی ل گەل رەوشا نوكە یا سووریێ و چاوانییا وەرگرتنا هەلوەستەكێ هەڤپشكێ ئالیێن كوردێن سووریێ هاتە گەنگەشەكرن.
هەروەسا دوپاتی ل وێ چەندێ هاتە كرن، كو پێدڤییە ئالیێن كوردێن سووریێ بێی دەستێوەردانا هیچ ئالییەكی و ب رێكێن ئاشتیانە بڕیارێ ل چارەنڤیسێ خوە بدەن و ژ پێخەمەت گرەنتیكرنا مافێن وان ب ئێكڕێزی و ئێكهەلوەستییا هەڤپشك ل گەل حوكمڕانییا نوو یا سووریێ بگەهنە تێكگەهشتنێ و رێككەفتنێ و فاكتەرێ ئاشتیێ و سەقامگیریێ بن و رێگریێ بكەن ل دوبارەبوونا وان نەهامەتیێن ب سەر گەلێ كورد و پێكهاتەیێن دی یێن سووریێ هاتین.
مەزلوم عەبدی، فەرماندەیێ گشتیێ هێزێن سووریا دیموكرات (هەسەدە) ل تۆرا جڤاكییا ئێكس پەیامەك ل دۆر كۆمبوونا خوە ل گەل سەرۆك بارزانی بەلاڤكر و گۆت» كۆمبوونا مە ل گەل سەرۆك مەسعود بارزانی جهێ خوەشحالیێ بوو».
مەزلوم عەبدی هەروەسا نڤیسی» مە دانوستاندن ل سەر وان گوهۆڕینان كر یێن سووریا تێدا دەرباز دبیت و مە پێكڤە دوپاتكر، كو پێدڤییە هەلوەستێ كوردان ل سووریێ یێ ئێكگرتی بیت و دڤێت دانوستاندن ل گەل دیمەشقێ ب شێوەیەكێ ئاشتیانە بیت و مافێن گەلێ كورد بهێنە پاراستن».
هەروەسا گۆت» مە دوپاتی ل وێ چەندێ كر، كو گرنگییا ئێكڕێزییا كوردان سەقامگیرییا دەڤەرێ ب گشتی بەرپرسیارەتییا مە هەموویانە و دێ پێكڤە هاریكارێن هەڤدو بین».

نوونەرا حوكمەتا هەرێما كوردستانێ ل واشنتۆن دێ پشكداریێ د رێوڕەسمێ دەستبكاربوونا دۆنالد ترەمپی سەرۆكێ هەلبژارتیێ ئەمریكا دا كەت كو بڕیارە ل رۆژا دوشەمبی 20/1/2025 ب رێڤەبچیت.
رێوڕەسمێ سویندخواندن و دەستبكاربوونا سەرۆكێ ئەمریكا یێ هەلبژارتی دۆنالد ترەمپ ل سپێدەهییا رۆژا دوشەمبییا داهاتی ب دەمێ ئەمریكا ل كەنیسەیا سەینت جۆن ل واشنتۆن و كۆچكا سپی دێ ب رێڤەچیت.
نوونەرایەتییا حوكمەتا هەرێما كوردستانێ ل واشنتۆن راگەهاند» ب خوەشحالیڤە دێ تریفە عەزیز، نوونەرا حوكمەتا هەرێما كوردستانێ ل واشنتۆن، پشكداریێ د رێوڕەسمێ دەستبكاربوونا سەرۆكێ هەلبژارتیێ ئەمریكا دۆنالد ترەمپی دا كەت وەكو سەرۆكێ 47 یێ ئەمریكا».
دیاركر ژی» حوكمەتا هەرێما كوردستانێ ب خوەشحالیڤە چاڤەڕێیە ژ نێزیكڤە ل گەل ئیدارەیا نوو یا ئەمریكا كار بكەت بۆ پتر ب هێزكرنا هەڤپشكییا بەردەوام د ناڤبەرا ئەمریكا و هەرێما كوردستانێ دا» .
نوونەرایەتییا حوكمەتا هەرێما كوردستانێ ل واشنتۆن راگەهاند ژی» پێكڤە دشێین بەردەوام بین د پێشڤەبرنا ئاشتێی و سەقامگیریێ و خوەشگوەزەرانیێ ل دەڤەرا مە و دەرڤەی دەڤەرێ ژی»

عەزیز هەورامی:

رەوشا دەڤەرێ دخوازیت ئێكگرتن ل ناڤ كوردان كورد ل هەموو پارچان هەبیت، دیزاینا رۆژهەلاتا ناڤین یا دهێتە كرن، سەرۆك مەسعود بارزانی فاكتەرێ مەزنە بۆ ئێكسختنا گەلێ كورد.
ئاسۆ كەریم، نڤیسەر، بۆ رۆژنامەیا (ئەڤرۆ) گۆت» حزبێن سیاسی ل پارچێن كوردستانێ د ئێكگرتی نینن، دیزاینەكا نوو ژی یا بۆ رۆژهەلاتا ناڤین دهێتە كرن، هەر نەتەوەیەكێ ئێكگرتی بیت د وێ دیزانكرنێدا دشێت جهێ خوە ب هێز بكەت، نوكە دەمێ وێ چەندێیە كورد د ئێكگرتی بن و جۆرەكێ هەڤكاریێ د ناڤبەرا پارچێن كوردستانێدا هەبیت، وەكو فاكتەرێ سەركەفتنێ.
ئاسۆ كریم گۆت ژی» ئەم ل باشوورێ كوردستانێ ژ روویێ دستووریڤە مە دانپێناكرنەك یا هەی ل سەر ئاستێ ئیراقێ و هەرێمایەتی و نێڤدەولەتی، چەند بەرەیێ مە یێ ناڤخوەیی یێ ئێكڕێز بیت زێدەتر د شیاندایە پێنگاڤان بەر ب پێشڤە ببەین، ئارمانجا ستراتیژییا مە نێزیك ببین، رەوشا مە ژی ژ ئالیێ وان هێزێن دەست د دیزاینكرنا دەڤەرێدا هەی دێ ل بەرچاڤ هێتە وەرگرتن، دشێن رۆلەكێ باشتر ب گێرین».
ناڤبری ئاماژە بۆ وێ چەندێ ژی كر» رۆلێ سەرۆك بارزانی، ژ بەر كو سەركردەیەكێ هەرە مەزن یێ كوردستانێ یە و ئەزموون و پێگەه ل سەر ئاستێ هەرێمایەتی و نێڤدەولەتی یێ هەی، دشێت رۆلەكێ گرنگ د ئێكخستنا هێزان و خەلكێ كوردستانێ دا ب گێریت، ئەو چەندە ژی ژ سەرۆك بارزانی دهێتە چاڤەڕێكرن».
ئاسۆ كەریم رۆهنكر ژی» دو هێزێن سەرەكی یێن د هەرێما كوردستانێدا هەین، زێدەتر ژ 30 سالایە، رۆلی دگێرن و هەر پێشكەفتنەكا ب دەستڤە هاتبیت ل بن سیبرا پێكڤەكاركرنێ بوو، هەردو هێزێن سەرەكی (پارتی و ئێكەتی) د كۆمبوونا نە ئاسایییا جڤاتا وەزیرێن هەرێما كوردستانێدا د پشكداربوون، باشە هەكە بۆچوونا كوردی بهێتە ئێكخستن ل بەرامبەر بەغدایێ و گوهۆڕینێن دەڤەرێ، هەروەسا پەرلەمان و حوكمەت و سەرۆكایەتی بهێنە دروستكرن، ئەڤ چەندە دێ وەكەت پێگەهێ هەرێما كوردستانێ ب هێز ببیت و دۆستێن مە پشتبەستنێ ل سەر بكەن و بەغدا ل دووڤ داخوازیێن كوردستانێ بهێت».

نێچیرڤان بارزانی، سەرۆكێ هەرێما كوردستانێ، پێشوازی ل ڤیكتۆریا تەیلەر، جێگرا هاریكارێ وەزیرێ دەرڤەیێ ئەمریكا بۆ كارەبارێن رۆژهەلاتا نێزیك و شاندەك د گەلدا كر.
ب گۆڕەی بەیاننامەیەكا سەرۆكایەتییا هەرێما كوردستانێ، د كۆمبوونەكێدا، پەیوەندیێن ئەمریكا ل گەل ئیراقێ و هەرێما كوردستانێ، پەیوەندیێن هەولێر – بەغدا، بزاڤێن پێكئینانا كابینەیا نوو یا حوكمەتا هەرێما كوردستانێ، رەوشا سیاسییا ئیراقێ و دوماهی پێشهاتێن دەڤەرێ هاتنە گەنگەشەكرن، هەروەسا ل دۆر گوهۆڕینێن سووریێ، نێچیرڤان بارزانی و ڤیكتۆریا تەیلەر بیر و بۆچوون لێكگوهارتن.
هەردو ئالی د هەڤڕا بوون ل سەر گرنگییا چارەسەركرنا كێشەیێن هەولێرێ و بەغدایێ ب گۆڕەی دستووری و قانوونێ و رێككەفتنان، هەروەسا دوپاتی ل پاراستنا ئارامیێ و سەقامگیریێ ل دەڤەرێ و دوورئێخستنا ئیراقێ ژ ئالۆزیێن رۆژهەلاتا ناڤین كر.

سەرۆكایەتییا هەرێما كوردستانێ بەیاننامەیەك ل دۆر رێككەفتنا ئاگربەستا غەزە د ناڤبەرا بزاڤا حەماس و ئیسرائیلێ دا بەلاڤكر.
سەرۆكایەتییا هەرێما كوردستانێ د بەیاننامەیا خوە دا پێشوازی ل ئاگربەستێ كر و هیڤی خواست ببیتە پێنگاڤەك بەر ب ئاشتییا بەردەوام ل دەڤەرێ.
سەرۆكایەتییا هەرێما كوردستانێ دوپاتكر ژی» دوماهی ئینان ب توندوتیژیێ تاكو رێكە بۆ پشتڕاستبوونێ ژ پاشەڕۆژەكا باشتر بۆ هەموویان. داخوازێ ژی ژ هەموو ئالییان دكەین پێگیر بن ل دانوستاندنێ و كاركرنێ بۆ سەقامگیریێ و گەشەكرنێ».