ئه‌ڤرۆ نيوز:

ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ راگه‌هاند كو ب هيڤيا مێشكێ مه‌لا به‌ختيار ڤه‌ هه‌ڤهاتن ل ڤى وه‌لاتى ژ دايك نابن.

محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ، ل سه‌ر په‌يجێ خوه‌ يێ تايبه‌تێ فه‌يسبۆكى نڤيسينه‌ك به‌لاڤكريه‌ و تێدا ره‌خنه‌ ل هه‌وليستێ مه‌لا به‌ختيار به‌ربرسێ مه‌كته‌با كارگێرى يا ئێكه‌تى نشتيمانى كوردستان گرتينه‌.

محه‌مه‌د عه‌لى ياسين دبێژيت: “ب هيڤيا عه‌قلێ مه‌لا به‌ختيار ڤه‌، هه‌ڤهاتن و دامه‌زراوه‌ ل ڤى وه‌لاتى ژ دايك نابن”، ئاماژێ ب وێ چه‌ندێ ژى دكه‌ت كو گۆتارا مه‌لا به‌ختيار هه‌ناسه‌يا زڤرينێ بۆ خالا سفرێ دووپاتكره‌ ڤه‌.

ئه‌ڤ په‌رله‌مانتاره‌ مه‌لا به‌ختيار ب نه‌خۆشه‌كێ”ئولیگارک” وه‌سف دكه‌ت كو تەڤ سازیێن وەلاتی و هەولێن چاکسازیان پشت گوه، دهاڤێت ده‌ما دبێژیت: “هەر شتێك لەگەڵ یەكێتیی نیشتیمانیی كوردستان پێشتر گفتوگۆی لەسەر نەكرابێت، لە هیچ وەزارەتێك، لە هیچ حكوومەتێك، لە هەر كەسێكەوە دەرچێت، قبوڵی ناكەین هەموو شتێك ئەبێت پێشتر گفتوگۆی لەسەر بێت و پرۆژەی هاوبەشمان هەبێت و رازی بین ئینجا ئەوە جێبەجێ‌دەكەین چونكە ئێمە یەكێتین”.
دده‌ته‌ زانين ژى كو هندى ئەو خۆدانێن خوە و ڤان عەقلێن سیاسی بن نەشێن چاڤەرێ چاکسازیان بن و نەشێن پێنگاڤێن بەردەوام د پرۆسێسا دامەزراوەیی کرنا وەلاتی دا بهاڤێژن و دبێژيت: “دڤێت ئەڤ کەسە و عەقلیەتێن ب ڤی میناکی بهێنە نەچارکرن کو ژ مەیدانا سیاسی دەربچن”.

ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ زێدتر دبێژيت: “زمانێ هەرەشە و “قبوول ناکەین” سەردەمێ خوە دەرباز کریە. هەرچەندە یا دیارە کو ئەڤ بەرێزە گەلەک تشتێن دی ژی قبوول ناکەت، لێ راستینە. ل ڤی وەلاتی دامەزراوە و سازی د قووناغا خۆیا ئاڤابوونێ دانە و چو ئالیەک نکاریت ببیتە رێگر بەردەم ڤێ پرۆسێسێ ژ بەر کو هیممەتەکا نیشتمانی د گەلدایە”.

ئه‌ڤرۆ:

رێڤەبەرا گشتیا بەرھنگاربوونا توندوتیژیا دژی ژنان ل ھەرێما کوردستانێ ئاشکرا کر کو د سالا 2014 دا 30 ژن ھاتینە کوشتن و 41 ژی خوە کوشتیە و 81 ژنان ژی خوە سۆتیە.

کوردۆ عومەر عەبدوللا، رێڤەبەرا گشتیا بەرھنگاربوونا توندوتیژیا دژی ژنان ل ھەرێمێ بۆ خەندان راگەھاند، د ئەڤ سالە دا شەش ھزار173 سکالا ھاتینە تۆمارکرن و گۆت “ژ وان سکالایێن ھاتینە تۆمارکرن 127 دەستدرێژیێن سێکسی نە”.
خویا ژی کر، د ئەڤ سالە دا ھزار و 784 سکالا پتر ژ پار ھاتینە تۆمارکرن و گۆت “ئەگەرێ ڤێ زێدەبوونێ ژی ئەوە کو ڤەکۆلینکرن ل توندوتیژیا خێزانی ژی ھەر ل دەف مە دھێتە کرن، ل دووڤ قانوونێ ھەتا کەسێن پلە چار بۆ لایێ مە دھێنە ھنارتن، لێ مە داخواز ژ دادوەران کریە ھەموو جۆرە توندوتیژیەک ژ لایێ ھەر ئەندامەکێ خێزانێ ڤە بھێتە کرن بۆ رێڤەبەریا مە بھنێرن”.

ئەڤرۆ:
رێڤەبەرێ گشتیێ پەروەردا پارێزگەھا دھۆکێ دیار کر کو سوباھی 1\1\2015 و رۆژا شەمبی 3\1\2015 ل سنۆرێ پێنج پەروەردان دەوامە و چاران ژی بھێنڤەدانە.
عەبد یوسف، رێڤەبەرێ گشتیێ پەروەردا دھۆکێ ئاشکرا کر، ژ ئەگەرێ وێ رەوشا پەیدابووی و دەمەک ژ دەواما ئاسایی یا قوتابخانان چووی، زیان ب ھژمارەکا زۆرا قوتابیان گەھشت و بۆ ئەڤرۆ گۆت: “بۆ قەرەبووکرنا وی دەمێ ژ قوتابیان چووی، ئەم نەچارین بھێنڤەدانان نەھێلین”.
ئاماژە دا ب وێ چەندێ ژی کر، پارێزگەھا دھۆکێ رەوشەکا تایبەت ھەیە و جودایە ژ پارێزگەھێن دی و گۆت: “سوباھی 1\1\2015 و شومبیا بھێت 3\1\2015 ل پەروەردێن دھۆک رۆژھەلات و رۆژئاڤا، سێمێل، زاخۆ و تلکێف دەوامە، لێ ل سنۆرێ پەروەردێن شێخان، ئاکرێ، بەردەرەش و ئامێدیێ بھێنڤەدانە”.

دەربارەی وان قوتابخانێن ل سنۆرێ پەروەردێن دھۆک رۆژھەلات و رۆژئاڤا، سێمێل، زاخۆ و تلکێف یێن زوو دەوامکری ب تایبەت قوتابیێن پۆلێن 12 ئامادەیی و نەھێ بنەرەتی عەبد گۆت: “بۆ وان ژی ھەر دەوامە و ئەم نەشێین ل ھندەک قوتابخانان دەوام بیت و ل ھندەکان نە”.