ئه‌ڤرۆ نيوز:

پاش بۆرينا پێنج هه‌يڤان ژ به‌رسينگگرتنا پێشمه‌رگه‌ى و شه‌رێ ل گه‌ل داعش، هه‌رێما كوردستانێ پشته‌ڤانيا زێده‌تر د خوازيت و داخوازا چه‌كێ گران و فرۆكێن ئه‌باچى دكه‌ت.

رۆژناما واشنتۆن پۆست د راپۆرته‌كێ دا ب ناڤ و نيشانێن ب تنێ ل كوردستانێ ئاماژه‌ ب وێ چه‌نندێ كريه‌ كو هه‌ڤال و هه‌ڤپه‌يمانێن ئه‌مريكا “دڤێت هه‌موو هاريكارى بۆ بهێنه‌ كرن”.

ب گۆره‌يى راپۆرته‌كا رووداو، واشنتۆن پۆست نڤيسيه‌ “كوردان درێژترين سنورێ ل گه‌ل داعش هه‌يى، ژ به‌ر هندێ ژى پێدڤى ب هه‌ڤكاريا زێده‌ترن”.

هه‌ر د ڤێ ده‌ربارێ دا داخۆيانيه‌ك ژ فوئاد حسێن سه‌رۆكێ ديوانا سه‌رۆكاتيا هه‌رێمێ وه‌رگرتيه‌ و دبێژيت: “مه‌ داخوازا چه‌كێ گران ژ ئه‌مريكا كريه‌ و هه‌تا نوكه‌ ئيدارا ئۆبامايى ژى چو به‌رسڤێن دروست نه‌داينه‌ مه‌”.

ل دۆر رزگاركرنا مووسل ژى دبێژيت: “خه‌لكێ مووسل زێده‌ترى ئێك مليۆن كه‌سايه‌، داهش هه‌موو هێز و شيانێن خوه‌ ل وێرێ يێن كۆمكرين، كى دێ چيت وێرێ كۆنترۆل كه‌ت؟ هه‌رێما كوردستانێ نه‌شێت بێى چه‌كێ پێشكڤه‌فتى پشكداريێ د گرتنا مووسل دا بكه‌ت، دڤێت هه‌ليكوپته‌رێن ئه‌پاچى و ترۆمبێلێن سه‌ربازى يێن پێشكه‌فتى و مووشه‌ك و قه‌ناس ب كوردان بهێنه‌ دان”.

ئه‌ڤرۆ نیۆز، بارزان سلێمان:
ژێده‌ره‌كێ پارتى دیموكراتى كوردستان بۆ ئه‌ڤرۆ نیۆز راگه‌هاند، ئه‌ڤرۆ مه‌غه‌رب 4 ئه‌فسه‌رێن به‌رێ یێن له‌شكرێ عیراقێ ژ ئالیێ چه‌كدارێن داعشێ ڤه‌ ل مووسل هاتینه‌ سێداره‌دان.
به‌رپرسێ لقا 14 یا پارتى ل مووسل عسمه‌ت ره‌جه‌ب گۆت: پشتى چه‌كدارێن داعشێ تووشى شكه‌ستنێن مه‌زن ل سه‌ر ده‌ستێن پێشمه‌رگێ هه‌رێما كوردستانێ بووین، تووشى دلگرانیه‌كا مه‌زن بووینه‌ و هه‌موو خه‌لكێ مووسل لێ بویه‌ دوژمن، له‌ورا ده‌ست ب ده‌سته‌سه‌ركرن و كوشتنا خه‌لكێ بێ گونه‌هێ مووسلێ كرینه‌.
هه‌روه‌سا خوه‌یاكر، 10 ئه‌فسه‌رێن به‌رێ یێن له‌شكرێ عیراقێ ژ ئالیێ چه‌كدارێن داعشێ ڤه‌ هتینه‌ گرتن و 4 ژوان ئه‌فسه‌ران هاتنه‌ سێداره‌دان و ته‌رمێن وان راده‌ستى نوخوشخانا دادیێ ل مووسل كرینه‌، عسمه‌ت ره‌جه‌ب دیاركر، چه‌كدارێن داعشێ رێنمایێن نوو بۆ نه‌خوشخانێن مووسلێ دیار كرینه‌ كو نابیت ب هیچ ره‌نگه‌كى ده‌رمان بۆ خالكێ ئاسایى بهێنه‌ دان بتنێ بریندارێن داعشێ نه‌بن.
و نابیت بهیچ ره‌نگه‌كى نوشدارێن مووسلێ ژ باژێرێ مووسل ده‌ركه‌ڤن و هه‌ر نوشداره‌كێ به‌رۆڤاژى وان رێنمایان كار بكه‌ت هه‌مو ملك و ئه‌ملاكێن وى دێ هێنه‌ ده‌سته‌سه‌ركرن.