ئەڤرۆ:
سەرۆکێ لژنا نەزاھێ ل پەرلەمانێ کوردستانێ دیارکر کو توڕا جڤاکی یا فێسبووکێ شیا بڕیارەکا پەرلەمانێ کوردستانێ ب ھەلوەشینت، عەمەر کوچەر سەرۆکێ لژنا نەزاھێ بۆ بەرپەرێ قانوونیێ ئەڤرۆ گۆت: بلا ئەندامێ پەرلەمانی وەکو رێڤەبەرێ ناوچەکێ یان رێڤەبەرەکێ گشتی، ترۆمبێل ھەبیت، و ل ڤێرە کەس نابێژیت گەندەلیە گۆتژی: ئەز نە ل گەل ئەڤان جورە بڕیارا مە، بڕیارەک ئەڤرۆ دەرکەڤیت و سۆبەھی بھێتە ھەلوەشاندن، ئەڤە لاوازیێ ددەتە سەرۆکاتیا پەرلەمانێ کوردستانێ.
عەمەر کوچەر، سەرۆکێ لژنا نەزاھێ گۆت: بلا ئەندامێ پەرلەمانی وەکو رێڤەبەرێ ناوچەکێ یان دەڤەرەکێ یان رێڤەبەرەکێ گشتی، ترۆمبێل ھەبیت، و ل ڤێرە کەس نابێژیت گەندەلیە، ھەکە خزمەتا مللەتێ خوە بکەت، لێ بلا ترۆمبێلەکا سرۆشتی و نۆرمال بیت و نە یا جودابیت ژ خەلکەکێ دی گۆتژی: پێدڤیە ترۆمبێل ھەر بۆ پەرلەمانی بن و ل دەمێ خۆل ب دووماھی ھات، بلا بۆ پەرلەمانی بھێنە زڤراندن، ھەردیسا بلا مەزاختی ژی ل سەر ئەندامێن پەرلەمانی بیت، ئەڤە دا دادپەروەی ھەبیت بەرامبەر پارێ زێدە کو بھێتـە مەزاختن، چونکو ئەز نە ل گەل ڤێ چەندێ مە.
عەمەر کوچەری ئاشکراکر ژی کو، پتر ژ ١٠٠ ترۆمبێلان پەرلەمانی ھەنە، و ھەموو مونیکانە و پەرلەمانی بۆ کڕینە و ئەڤە یێن شیرەتکارێن پەرلەمانی نە و ھاتن و چوونێ پێ دکەن و مەزاختی ژی ل سەر پەرلەمانی یە، لێ نزا ئەڤە چ پێ دکەن و ھەموو ل سەر کیستێ پەرلەمانی و ئەڤە شاشی یە.
سەرۆکێ لژنا نەزاھێ ئەوژی دیارکر کو بەرۆڤاژی ئەندامێ پەرلەمانی نوونەرێ مللەتی یە و چەندین ھەیڤە ئەندام پەرلەمان، لێ ھندەک د بێ ترۆمبێلن و ب تەکسیا ھاتنوچوونێ دکەن، و ئەڤە حەفت ھەیڤە نەشێن بریارەکێ بدەن، لێ پشتی بڕیارا نوو دای، دڤێت سەرۆکاتیا پەرلەمانی بەرسڤێ بدەت، بۆچی بڕیار دا؟ و بۆچی ھەلوەشاند؟ و گۆتژی: دانا بڕیارێ و ھەلوەشاندن وێ، شکاندنا کەسایەتیا پەرلەمانتارانە و گۆت: ترۆمبێلێن پەرلەمانتاران دا ھێنە کرین ب قست و دا ژ بەر مووچێ وان ھێتە برین، و پەرلەمانی ژ کومپانیەکێ کری بوون و دا پەرلەمان وی پارەیی زڤرینت.
ل دۆر بابەتێ فرۆتنا گازێ ژی ل گەل داعش، سەرۆکێ لژنا نەزاھێ گۆت: لژنەک ل سەر ئاستێ بلند ئانکو یێ حوکمەتێ ھاتیە پێکئینان و دوو ئەندام پەرلەمان، ئەندامێن لژنێ بووینە و ل دووڤ زانیاریان ب دووماھی ھاتیە و دێ بۆ سەرۆکاتیا پەرلەمانێ کوردستانێ ھێتە بلندکرن و ھەتا نوکە ھژمارا ئەوان کەسان نەیا دیارکریە.
ل دووماھیێ عەمەر کوچەری خۆیاکر کو، ھندەک کەس ب ڤێ تومەتێ ھاتینە گرتن و ھندەک ھاتینە تۆمەتبارکرن و دووڤچوون ل سەر یا بەردەوامە و چێبوونا لژنەکێ بۆ مفا وەرگرتن بوو ژ دەمی و چێبوونا گەلەک لژنا دا دەمی کوژیت.

ئه‌ڤرۆ نیوز:
پشتى به‌لاڤبوونا ده‌نگوباسێ نه‌خۆشكه‌فتنا سه‌ربه‌ست بابیرى ئه‌ندامێ جڤاتا سه‌ركردایه‌تیا پارتى دیموكراتى كوردستان، ناڤبرى راگه‌هاند كو چو راستى بۆ وى بابه‌تى نينه‌.

سه‌ربه‌ست بابيرى، ئه‌ندامێ جڤاتا سه‌ركردایه‌تیا پارتى دیموكراتى كوردستان، تایبه‌ت بۆ ئه‌ڤرۆ نیوز دیاركر كو ب تنێ ئه‌و گۆتگوتكن و گۆت: “چو راستى بۆ وى ده‌نگو باسى نینن و ره‌وشا من یا ساخله‌میێ گه‌له‌ك یا باشه‌”.
دیسا بابیرى ئاماژه‌ ب وێ چه‌ندێ ژى كر كو ئه‌و گۆتن ب تنێ بوقێن هنده‌ك لایه‌نانه‌ و گۆت: “هنده‌ك لایه‌ن ئه‌ڤان ده‌نگوباسان بۆ خوه‌ ب ده‌ستكه‌فت دبینن، به‌لێ هه‌موويان پشت راست دكه‌م كو چو راستى بۆ نينه‌”.

ئه‌ڤرۆ نيوز:

وه‌زيرێ كاره‌بێ ل حوكمه‌تا هه‌رێما كوردستانێ كێشه‌ و ئاريشێن ل هه‌مبه‌ر كه‌رتێ كاره‌بێ ل په‌رله‌مانێ كوردستانێ به‌حسكرن و ئاماژه‌ ب وێ چه‌ندێ كر كو وه‌زيرێ ژێده‌رێن سرۆشتى سوته‌مه‌نيا پێدڤى بۆ به‌رهه‌م ئينانا كاره‌بێ دابين ناكه‌ت.

روونشتنا په‌رلمانێ كوردستانێ بۆ دانوستاندن ل سه‌ر كێشێن ل سه‌ر كاره‌بێ يا به‌رده‌وامه‌ و سه‌لاحه‌دين بابه‌كر وه‌زيرێ كاره‌بێ، ئاماده‌يى روونشتنێ بوو و ل ده‌سپێكا روونشتنێ ژى كێشه‌ و ئاريشێن وه‌زاره‌تا وى هه‌ين به‌رچاڤكرن.

وه‌زيرێ كاره‌بێ ئاماژه‌ ب وێ چه‌ندێ كر كو نوكه‌ 10 ويێستگه‌هـ بۆ به‌رهه‌مئينانا كاره‌بێ ل هه‌رێمێ كار دكه‌ن و دو وێستگه‌هـ ژى د ئاماده‌نه‌، به‌لێ نه‌خستينه‌ كار، ئێك 640 مێگاواتێ خۆرماله‌يه‌ ژ به‌ر كو وه‌زاره‌تا ژێده‌رێن سرۆشتى سۆته‌مه‌نيێ بۆ دابين ناكه‌ت، نه‌خستيه‌ كار، د هه‌مان ده‌م دا ويستگه‌هێ غازا هه‌ولێر ژى 540 مێگا واته‌ و يێ ئاماده‌يه‌، به‌لێ هاتيه‌ راوه‌ستاندن ل سه‌ر رێكنه‌كه‌فتنا بهايێ كرينێ.

وه‌زيرێ كاره‌بێ ئاماژه‌ ب وێ چه‌ندێ ژى كر كو هاتنا مليۆن و نيڤ ئاواران بۆ هه‌رێما كوردستانێ و پێدانا كاره‌بێ ب ئه‌وان و ب ده‌ڤه‌رێن كوردستانى يێن ده‌رڤه‌يى ئيدارا هه‌رێمێ، ژ ئه‌گه‌رێن سه‌ره‌كى يێن كێميا كاره‌بێ نه‌.

ئه‌ندامێن په‌رله‌مانێ كوردستانێ ژى د روونشتنێ دا، ديتن و تێبينى و ره‌خنێن خوه‌ ل سه‌ر بهايێ كاره‌بێ ل هه‌رێمێ خستنه‌ به‌رچاڤ.

ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا هاتنوچوونێ ل پارێزگه‌ها دهۆك راگه‌هاند كو ئه‌و ل 31\12\2014 مامه‌لێن وه‌لاتيان ل رێڤه‌به‌ريێ برێڤه‌ نابه‌ن و ل 4\1\2015 ژى مامه‌لێن ترۆمبێلێن هژمارێن كاتى ب رێڤه‌ ناچن.

عه‌ميد فه‌خری ئه‌حمه‌د مه‌جيد، رێڤه‌به‌رێ رێڤه‌به‌ريا هاتنوچوونێ ل پارێزگه‌ها دهۆك، بۆ ئه‌ڤرۆ نيوز گۆت: “ل رۆژا چارشه‌مبى رێكه‌فتى 31\12\2014 مامه‌لێن وه‌لاتيان ل رێڤه‌به‌ريێ برێڤه‌ ناچن ژ به‌ر كو فه‌رمانبه‌رێن وان دێ مژوولى جه‌ردا سالانه‌ بن”.

زێده‌تر گۆت: “ل رۆژا ئێكشه‌مبى رێكه‌فتى 4\1\2015 ژى مامه‌له‌يێن ترۆمبێلێن كاتى برێڤه‌ ناچن ژ به‌ر جه‌ردا سالانه‌ يا بانكان ل پارێزگه‌ها دهۆكێ”.

رێڤه‌به‌رێ هاتنوچوونا پارێزگه‌ها دهۆكێ هيڤى خواست كو وه‌لاتى د رۆژا 31\12 دا سه‌ره‌دانا رێڤه‌بريا وان نه‌كه‌ن و يێن ترۆمبێلێن كاتى ژى ل 4\1 و گۆت: “ده‌وام بۆ فه‌رمانبه‌ران دێ ب ره‌نگه‌كێ دروست هه‌بيت و ب تنێ مامه‌لێن وه‌لاتيان برێڤه‌ ناچن”.