ئەڤرۆ:
ھەموو سالان ھونەرمەندێن کوردستانێ و ب ھەلکەفتا ھاتنا سالا نوو ئاھەنگێن خوەشیێ و تەناھی و ئارامیێ بۆ خەلکێ کوردستانێ دگێرن، لێ ئەڤ سالە جودایە ژ سالێن بۆری، بەرپەرێ ھونەری چەندین بۆچوونێن ھونەرمەندان وەرگرتینە.
ھونەرمەند ئسماعیل جمعە دیارکر کوردستان یا دکاودانەکی دا دەربازدبیت بتنێ پێشمەرگەی پێدڤی ب ھونەرمەندان ھەیە پشتەڤانیێ بکەن، گۆت: پشکداری چ ئاھەنگێن سەرێ سالێ نابم و نابینم دروستە ئاھەنگێن خوەشیێ ل سەرێ سالێ بھێنەگێران وەک رێزگرتن بۆ پێشمەرگەی وشەھید و خێزانێن شەھیدێن کوردستانێ، دگەشتا من یا ئەمریکا دا ژی گەلەک ژمن ھاتە خواستن کونسێرتان بگێرم، من نەگێران وەک رێزگرتن بۆ شەھیدێن کوردستانێ.
ئیسماعیل جومعە خواست سالا٢٠١٥ ب بیتە سالا خێر و خوەشیێ بۆ خەلکێ کوردستانێ و ھەموو خاکێ کوردستانێ ژ دەستێن تیرۆرستان بھێتە رزگارکرن و ئالایێ کوردستانێ بھێـتە بلندکرن و دەولەتا کوردی بھێتە راگەھاندن.
ھونەرمەند حاجی زاخۆیی، دیارکر کو رێزگرتن ھەمبەر دایکێن شەھیدێن کوردستانێ و پێشمەرگەی بەرھەڤ نینە ھەر چ ئاھەنگان بگێریت و گۆت: ب ئانەھیا خودێ ئەڤ نەخوەشیە ل سەر مللەتێ مە دەربازبیت و سالا ٢٠١٥ یا خێر و خوەشیێ بییت بۆ مللەتێ کورد، ھەر پشکداریەکا مە ھەبیت بتنێ دێ دگۆتنا سروود و سترانێن پێشمەرگەی دا بیت، من ل بەر نینە پشکداری چ ئاھەنگێن سەرێ سالێ بم
ھونەرمەند بلند ئیبراھیم ماوێ چەندین سالانە ئاھەنگێن سەرێ سالێ دگێریت و ھەر سال ب گێرانا دو ئاھەنگان ، لێ ئەڤ سالە ئاھەنگا ناگێریت، گۆت: رێزگرتن ھەمبەر شەھیدێن کوردستانێ و ژبەر کاودانێن تێدا دبۆرین، ئاھەنگان ناگێرم، ھونەرمەند بلندی ھیڤی بۆ سالا ٢٠١٥ خواستن و گۆت: ھیڤیا من ئەوە پێشمەرگێ کوردستانێ ب سەرکەڤیت، نەخوەشیێن ب سەرێ کوردان دا ھاتین ل ٢٠١٤ دووبارە نەبن، دیسا کارگێریا کوردی ب شێوەکێ گشتی شاشیێن خوە چاک بکەن و دژی گەندەلیا نافخوە راببن و مالا خوە پاقژ بکەن.
سترانبێژ ئیسلام زاخۆیی دیارکر کو رێزگرتن ھەمبەر گیانێ شەھیدێن کوردستانێ و رێزگتن بۆ بنەمالێن شەھیدان چو ئاھەنگان ناگێرم و دیسا چەندین داخازنامێن تایبەت ژی بۆ گێرانا ئاھەنگێن سەرێ سالێ ھاتینە لێ ناگێرم، ئیسلامی خواست کوردستان ئاڤەدان بیت و ب ئاشتی و تەناھی بژیت.
سترانبێژ رێکش سەیرانی، گۆت: پشکدارنابم دچو ئاھەنگان دا و ئاھەنگا سەرێ سالێ من ھەبوویە و مە ھەلوەشاند و بتنێ ھەکە ئاھەنگەک ب پێشمەرگەی ڤە گرێدایی بیت بۆ بلندکرنا مورالا وان بیت دێ پشکداربم، یان ژی بۆ کومکرنا ھاریکاریان بیت بۆ ئاواران، یان زارۆیێن شەھیدان کێشە نینە و خوەشحالین.
رێکشی گۆتژی: بتنێ سترانبێژی دو رۆژ ھەنە کو مفا بۆ وی تێدا بیت، سەرێ سالێ و جەژنا نەورۆزێ و ھەکە سالێ ھەموویێ بەتال بیت دشێت مفایەکێ وەربگریت، لێ مە ئەو مفا نەڤێت.
ئەڤرۆ:
د ديداره‌كێ دا بۆ رۆژناما ئه‌ڤرۆ كو ئه‌مير ئه‌ترووشى به‌رهه‌ڤكريه تێدا ئاماژه ب وێ چه‌ندێ هاتيه كرن كو نەرازیبوونا ماموستایێن ھەرێما کوردستانێ ل دور وەرگرتنا ئابوونێن ھەیڤانە ژ لایێ ئێکەتیا ماموستایێن کوردستانێ ڤە کو ھەیڤانە سێ ھزار دینار بوون وەکر کو چاڤخشاندنەک د ڤێ بریارێ دا بھێتە کرن و ل دووماھیێ بریار ھاتە لادان و ئابوونێن ھەیڤانە بۆنە ب تنێ ھزار دینار و دو ئابوونێن و سالان پێکڤە ھێنە وەرگرتن. لێ سەرۆکێ ئێکەتیا ماموستایێن کوردستانێ لقێ دھۆک دیار کر کو پشتی ئابوونە بووینە ھزار دینار، ئێدی ھاریکاری بۆ ماموستایان نامینن یان ژی دێ گەلەک کێمتر لێ ھێن.
مەکتەبا تەنفیزیا ئێکەتیا ماموستایێن کوردستانێ د دووماھی کۆمبوونا خوە دا بریار دایە ئابوونێن ھەیڤانە یێن ژ ماموستایان دھێنە وەرگرتن ژ سێ ھزار دینارێن ھەیڤانە ببنە ب تنێ ھزار دینار، بەلێ ل دەستپێکا سالا 2015 دێ ئەڤ بریارە کەڤیتە د وارێ جێبەجێکرنێ دا و دێ ئابوونێن دو سالان پێکڤە ھێنە وەرگرتن کو 24 ھزار دینارن و ل گەل ھندێ ژی دێ ناسنامێن ماموستایان ھێنە نووکرن و ھزار دینار بۆ ڤێ چەندێ ژی ھێنە وەرگرتن، ئانکو د ل مەھا ئێک ژ سالا بھێت دێ ھەر ماموستایەکێ ئەندام د ئێکەتیا ماموستایێن کوردستانێ دا 25 ھزار دیناران وەکو ئابوونە دەتە ئێکەتیا ماموستایێن کوردستانێ و ڤێ چەندێ دەنگێن نەرازیبوونێ یێن ماموستایان ژی بلندکرینە.
بێوار عەلی حەمو ماموستایەکێ دھۆکێ یە دیار کر، ئەڤە پتر ژ دو سالانە ئەو بوویە ئەندامێ ئێکەتیا ماموستایێن کوردستانێ لقێ دھۆک و ھەیڤانە ژی ئابوونێن خوە ددان، بەلێ چو جاران ھاریکاری ژ وان وەرنەگرتینە و گۆت: کەسێ ئەز ئاگەھدارنەکرینە کو بەرامبەر وان ئابوونان وی ماف ھەیە جاران و د ھندەک ھەلکەفتان دا دێ شێت ھاریکاریێ ژ ئێکەتیا ماموستایێن کوردستانێ وەرگریت و گۆت: یا ژ من ڤە دانا ھاریکاریا دادی تێدا نینە، چونکو گەلەک ماموستا ھەنە چو ھەلکەف بۆ چێنابن و نەشێن چو پارا وەربگرن و ب چو رەنگەکی مفادار نابن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک تایبەت بۆ ئەڤرۆ دیار کر، بەری دو سالان کونفرانسێ ئێکەتیا ماموستایێن کوردستانێ ھاتبوو کرن و پاشی کۆنگرە ژی ھاتیە کرن و تێدا بریار ھاتبوو دان کو ل دەستپێکا سالا 2015 ئابوونێن ماموستایان ببنە ھەیڤانە ھزار دینار و ئابوونێن دو سالان پێکڤە بھێنە وەرگرتن و ناسنامە ژی بھێنە نووکرن و گۆت: نھا ئەم یێ کار د ڤێ بریارێ دا دکەین و دێ کەڤیتە کاری.
ناڤبری دیار کر، وەرگرتنا سێ ھزار دینارێن ھەیڤانە وەکو ئابوونە نەرازیبوونێن مەزن ژ دەڤ ماموستایان دگەھشتنە مە و من باوەرە پشتی بووینە ھزار دینار ئەڤ نەرازیبوونە نامینن و دێ پتر ب دلێ ماموستایان بیت و گۆت: ئەم وەکو لقێن مەزن دھۆک و ھەولێر و سلێمانیێ ل گەل ڤێ بریارێ ینە، بەلێ لقێن بچووک یێن قەزایان نەشێن ب ھزار دیناران کارێ خوە یێ ھەیڤانە ئەنجام بدەن، چونکو ھەیڤانە چو داھات نەبن، کارەکێ ب زەحمەتە بھێتە کرن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک خویا کر، پێشنیازا مە ئەوە کو د شەش ھەیڤێن ئێکێ دا ژ سالا 2015 چو ھاریکاری بۆ ماموستایان ناھێنە کرن، بەلێ پشتی ھینگی رەنگە ھندەک ھاریکاری بھێنە کرن، بەلێ ئەو ھاریکاری ژی دێ د کێم بن و گۆت: ل گۆرەی ناسنامان مە نێزیکی 17 ھزار ئەندامان ھەنە، بەلێ ئەندامێن کارا یێن کو ھەیڤانە ئابوونا ددەن و ب ئێکەتیا مە ڤە د گرێدای، ب تنێ ھەشت ھەتا نەە ھزار ئەندامانە و وەکو دی ژی ھەیڤانە ئەندامێن مە د زێدەبوون و کێمبوونێ دانە.
وەھبی ئاماژە دا وێ چەندێ، ژ وان ئابوونێن د ئەڤ سالە دا ھەیڤانە د گەھشتە بەردەستێ مە، د ئەڤ سالە دا 100 ملیون دینار ژ لایێ مە ڤە ل سەر ماموستایێن دھۆکێ ھاتینە بەلاڤکرن و د گەلەک بیاڤان دا ھاریکاریا ماموستایان ھاتیە کرن، بۆ نموونە بۆ وەغەرکرنێ ملیونەک و 100 ھزار دینار داینە ماموستایان، ھەروەسا ھاریکاری بۆ داوات و شەھیان و بوونا زارۆیان و خانی ئاڤاکرنێ و ھندەک بیاڤێن دی ھاریکاری ھاتینە کرن و گۆت ژی: پشتی ئابوونە دبنە ھزار دینار، مەحالە ئەڤ ھاریکاریا نھا بھێتە کرن و دێ گەلەک کێمتر بیت.
سەرۆکێ ئێکەتیا ماموستایێن کوردستانێ لقێ دھۆک دا زانین، مە چو داھات و بودجە نینن، ب تنێ مە چاڤ ل ئابوونایە بۆ ب رێڤەبرنا کارێ خوە و گۆت: ئەڤە داخوازیا ھەموو ماموستایانە کو ئابوونە ببنە ھزار دینار، بەلێ ب راستی ژی بەرامبەر کێمبوونا ئابوونان ھاریکاری ژی دێ گەلەک کێمتر لێ ھێن.
ئەڤرۆ:
پرسا گەفێن داعش ل سەر سیاسەتا دەرڤە و ناڤخۆیی یا فرەنسا دێ ئێک ژ پرسێن گرنگێن ڤی وەلاتی بیت ل سالا 2015.
فرەنسا د بەرھەڤیێن گێڕانا ئاھەنگێن سەرێ سالا نوو دا، پێرابوونێن ئێمناھیێ یێن توند ئەنجامداینە، ب تایبەتی ل پاریس و دەڤەرێن گەشتیاری و دھێتە چاڤەرێکرن سالا 2015 ببیتە سالا زێدەتر کرنا پێرابوونێن ئێمناھیێ ل ھەمبەر کریارێن توندوتیژیێ.
فرەنسا کو پشکەکا گرنگ یا ھەڤپەیمانیا نێڤدەولەتی یە دژی داعش، د ھەمان دەم دا ئێک ژ وان وەلاتێن ئورۆپی یە کو پتر ژ ھزار و 200 وەلاتیێن وێ چووینە ناڤ داعش ل سووریا و عیراقێ.
ئەڤرۆ:
ھەڤسەرۆکێ HDP راگەھاند کو د رەوشا نھا دا بۆ گەلێ کورد ئازادکرنا شنگال و کۆبانێ و ھەموو دەڤەرێن کوردستانێ ژ ھەر تشتەکێ گرنگترە و شنگال پشکەکە ژ ئاخا باشورێ کوردستانێ و کەس نەشێت ژێ جودا بکەت، ئاخڤتنا من یا سەبارەت ب شنگالێ ژ ئالیێ ھندەک دەزگەھێن راگەھاندنێ ڤە بەرۆڤاژی ھاتە بەلاڤ کرن و ئەم دخوازین دێرسم و شنگال د ناڤ کوردستانێ دا خوەدان تایبەتمەندیێن خوە بن.
سەلاحەدین دەمیرتاش ھەڤسەرۆکێ پارتا دیمۆکراسیا گەلان (HDP) پشتی کۆنگرا پارتا خوە یا لقێ دێرسمێ د داخۆیانیەکا تایبەت دا بۆ رۆژناما ئەڤرۆ راگەھاند کو د ھندەک کەنالێن راگەھاندنێ دا ئاخڤتنا وی یا ل سەر شنگالێ ب بەرۆڤاژی ھاتیە بەلاڤکرن و گۆت: (من نە گۆتیە شنگال ژ کوردستانێ جودایە و دڤێت سەربخوە بیت و ئەز جارەکا دی دوپات دکەم کو کەس نەشێت شنگالێ ژ کوردستانێ قوت بکەت و شنگال پشکەکا گرنگ ژ ئاخا کوردستانێیە).
ھەڤسەرۆکێ HDP ھەروەسا دیار ژی کر د رەوشا نھا دا یەکگرتنا پارت و ئالیێن سیاسی یێن کوردستانێ و گەلێ کورد بابەتا ھەری گرنگە و ل ھەر جھەکێ گەلێ کورد و ھێزێن کوردستانی ژ گەریلا، پێشمەرگە ھەتا شەرڤانێن یەکینەیێن پاراستنا گەل بەرخوەدانیێ بۆ ئازادیا کوردستانێ دکەن و گۆت: (ئەز ناخوازم بەرسڤا برێز ھێمن ھەورامی بدەم ژ بەر کو ئاخڤتنێن وی خزمەتا کوردستانێ ناکەت، ئەز دخوازم جارەکا دی بێژم کو من د ئاخڤتنا خوە یا ل سەر شنگالێ دا بەرێ نھا من گۆت کو ئەم ژ ئازادکرنا شنگالێ کەیفخوەشین و دڤێت ھەموو ئاخا کوردستانێ ل ژێر دەستێ تیرۆرستان بھێتە رزگارکرن و جارەکا دی دوپات دکەم کو شنگال پشکەکا گرنگ یا کوردستانێیە).
دەمیرتاش د پشکەکا دی یا ئاخڤتنا خوە دا ژی راگەھاند کو ھەر پارتەکی کوردی خوەدان بەرنامە و سیاسەتەکا جودایە و ژ ھەڤ جودانە و گەلەک ئاساییە د ھەر کارەکی دا خوەدان یەک بەرنامە و سیاسەتەکا وەک ھەڤ نەبن و گۆت: (بۆ من، پارتا من و گەلێ کورد ئازادکرنا شنگالێ و کۆبانێ ل ژێر دەستێ تیرۆرستان تشتەکی پیرۆزە و ب تایبەت بەرخوەدانا ھێزێن کوردی ل کۆبانێ و شنگالێ د یەک سەنگەری دا ل دژی تیرۆرستان جھێ شانازیێیە و گەلێ کورد و ھێزێن کوردی زێدەتر نێزیکی ھەڤدو کریە و دڤێت ھەر کەس و ئالیەک د ئاخڤتن و داخۆیانیێن خوە دا یەکگرتنێ بکەنە بناغە نە دژاتیا ھەڤدو بکەن، ژ بەر ڤێ چەندێ ژی ئەز بەرسڤا برێز ھەورامی نادەم ژ بەر کو گەلێ کورد ھەموو پارت و ئالیێن سیاسی باش راستیا رەوشا نھا باش دزانن).
د بەردەوامیا ئاخڤتنا خوە دا سەلاحەدین دەمیرتاش ھەڤسەرۆکێ HDP راگەھاند ژی کو ھندەک دەزگەھێن راگەھاندنێ ب زانەبوون ئاخڤتنێن وی بەرۆڤاژی کرینە و گۆت: (ئەز دخوازم ب رێیا رۆژناما ھەوە جارەکا دی ئاخڤتنێن کو من بۆ شنگالێ کریە دوپات بکەم، یا یەکێ شنگال ئاخا کوردستانێیە و کەس نەشێت ڤێ راستیێ ئینکار بکەت، یا دویێ ل دووڤ سیاسەت و باوەریا مە دڤێت شنگال د ناڤ کوردستانا ئازاد دا خوەسەر بیت و ئەم ھەمان داخوازیێ بۆ دێرسمێ ژی دکەین، ژ بەر کو شنگال ل گەل ناسنامەیا خوە یا کوردایەتیێ خوەدان ناسنامەیا تایبەت یا ئێزیدیتیێیە و ب ھەمان رەنگی دێرسم ژی ل گەل ناسناما کوردایەتیێ خوەدان ناسناما عەلەوییە و دڤێت بۆ پاراستنا وان تایبەتمەندیێن خوە د ناڤ کوردستانا ئازاد دا خوەسەر بن).
د دووماھیا ئاخڤتنا خوە دا ژی سەلاحەدین دەمیرتاش ھەڤسەرۆکێ HDP راگەھاند کو یێ کو بریارێ ل سەر پاشەرۆژا شنگالێ بدەت خەلکێ شنگالێ ب خوەیە و گۆت: (بریارا خەلکێ شنگالێ بۆ پاشەرۆژا وان چ بیت بۆ مە جھێ رێزگرتنێیە و داخواز ژ ھەر ئالیەکی کوردستانی دکەم کو د جھێ دژاتیا ھەڤدو بکەن بلا ئەم پێکڤە کار بۆ یەکگرتنێ بکەین و خالێن جودا بدەینە ئالیەکێ و ل سەر خالێن ھەڤپشک بۆ یەکگرتنا کورد و کوردستانێ کار بکەین. ژ خوە روودانێن ل شنگال، کۆبان و دەڤەرێن دی یێن کوردستانێ سەلماندن کو ئەم دەمێ یەکگرتی و ب ھێز بین دێ بشێین خوە بگەھیننە ئازادیێ و گەلێ خوە ل دژی ھەر ھێرشەکی ب پارێزین).
ئەڤرۆ:
فەرید ئەسەسەرد ئەندامێ سەرکردایەتیا ئێکەتی نیشتمانی کوردستان پەسنا ناما سەرۆکێ ھەرێمێ کر ئەوا بۆ وەزارەتا پێشمەرگەی ئاراستەکری و ب دیتنا وی پێدڤی بوو ئەو نامە ھەر ژ دەمێ شەڕێ مەخموورێ ھاتبا بجھئینان، دیسا دبێژیت: “دبیت شەڕێ رزگارکرنا شنگالێ بۆ دەمەکێ درێژ ڤەکێشیت”.
فەرید ئەسەسەردی بۆ رۆژناما ئەڤرۆ گوت: “ل دەستپێکێ ھاتبوو راگەھاندن کو شنگالێ و دەوروبەرێن چیایێ شنگالێ یێن ھاتینە رزگارکرن، لێ نۆکە بەحسێ وێ چەندێ دھێتە کرن کو تیرۆرستێن داعشێ یێن دناڤ ھندەک جھان دا ل باژێرێ شنگالێ و شەڕ ژی د ناڤبەرا پێشمەرگەی و تیرۆرستێن داعشێ ل وان جھان دھێتە کرن، ئەڤ چەندە ژی رامانا وێ ئەوە کو پشکەک ژ شنگالێ ل وی دەمی ھاتبوو رزگارکرن و ھێزێن پێشمەرگەی یێن چووینە دناڤ شنگالێ دا و شەڕ نۆکە تاخ ب تاخ و کولان ب کولان دناڤ باژێری دا دھێتە کرن. ب ڤێ چەندێ دێ گەھینە وی ئەنجامی کو ھێشتا ھێزێن پێشمەرگەی دێ چنە شنگالێ و داعش ب خوەژی دێ ھەر ھێزێن خوە بۆ شنگالێ ھنێریت و دبیت بگەھیتە وی رادەی کو درێژی ب شەڕی بھێتە دان”.
ب دیتنا ناڤبری: “ھەکە پێشمەرگەی د دەمەکێ دیارکری دا شیا شەڕی ئێکلا بکەت و دەستێ خوە دانیتە سەر ھەموو باژێرێ شنگالێ و رزگار بکەت و تیرۆرستێن داعش ل وی باژێری ژناڤ ببەت، بیگومان دێ دووماھی ب شەڕێ شنگالێ ھێت، لێ پشتی ھێزێن پێشمەرگەی چووینە دناڤ شنگالێ دا، داعش بەرەیەکی دی یێ شەڕی ل مەخموورێ و گوێێ دەستپێکر بۆ وێ چەندێ فشارا پێشمەرگەی د ناڤ شنگالێ دا ل سەر چەکدارێن داعشێ کێم ببیت و دبیت ئەڤە ببیتە ئەگەر کو پێشمەرگە نەشێن ھێزێن دی بۆ شنگالێ بھنێرن و دبیت شەڕ ھەر ب وی شێوەی بەردەوام بیت ھەتا لایەک بشێت سەرکەفتنێ تۆمار بکەت”.
ل دۆر گرنگیا شنگالێ، گۆت: “پشتی رزگارکرنا رەبیعە و سنوونێ و شنگالێ، داعشێ پەیوەندیا راستەوخوە د ناڤبەرا مووسلێ و تلەعفەرێ ل گەل سنۆرێ سووریێ نەما و ئەڤە چەندە ژی بوویە مەترسی بۆ داعشێن ل مووسلێ ماین”.
د بەرسڤا پرسیارەکا ئەڤرۆ دا ل دۆر ئەگەرێن درێژیا شەڕێ شنگالێ و ئایا دێ وەکو شەڕێ کۆبانێ لێ ھێت و بۆ چەندین ھەیڤان ڤەکێشیت، گۆت: “دبیت شەڕێ شنگالێ بۆ دەمەکێ درێژ ڤەکێشیت، بەلێ ھەتا نۆکە بالا دەستیا ستراتیژی یا د دەستێ پێشمەرگەی دا”.
ل دۆر پرسا رادەیا ھەبوونا ھەڤکاریێ و ھەماھەنگیێ د ناڤبەرا ھێزێن پێشمەرگێن کوردستانێ دا، ب تایبەتی پشتی ناما سەرۆکێ ھەرێما کوردستانێ بۆ وەزارەتا پێشمەرگەی، ڤی ئەندامێ سەرکردایەتیا ئێکەتیێ گۆت: “بەرەیێ شەڕێ پێشمەرگەی ل گەل داعش یێ بەرفرەھە کو ژ کۆبانێ ھەتا جەلەولایێ ئێک بەرەیە و ئێک فەرماندەیا گشتی یا پێشمەرگەی یا ھەی ئەوژی سەرۆکێ ھەرێمێ یە و ئێک وەزیرێ پێشمەرگەی ژی یێ ھەی کو مستەفا سەید قادرە، رادەیا ھەماھەنگیێ د ناڤبەرا ھێزێن پێشمەرگەی دا پێدڤیە ژ لایێ سەرۆکێ ھەرێمێ و وەزیرێ پێشمەرگەی ڤە بھێتە دیارکرن، دیسا ئەڤ شەڕە ئێک شەڕە دھێتە کرن دژی داعش و نەکو شەڕەک پارتی دکەت و شەڕەک ئێکەتی دکەت، بەلکو ئێک شەڕە کو کورد دکەت دژی داعش و ب ڤی شێوەی رەفتار یا ل گەل ڤی شەڕی ھاتیە کرن، لێ دبیت ھندەک سستی د ئەندازەیا ھەماھەنگیێ د ناڤبەرا ھێزێن پێشمەرگەی دا ھەبیت”.
ب دیتنا ڤی ئەندامێ سەرکردایەتیا ئێکەتیێ، ناما سەرۆکێ ھەرێما کوردستانێ بۆ وەزارەتا پێشمەرگەی ھنارتی یا ھەژی بوو و پێدڤی بوو ھەر ژ شەڕێ مەخموورێ ھاتبا بجھئینان و ئەڤ شەڕە شەڕێ گەلێ کوردە دژی داعش و نە بتنێ شەڕێ پارتی و ئێکەتیێ و ئیسلامیان یە و مە ھەمووان ئێک دوژمنێ ھەيی.
ئەڤرۆ:
جێگرێ نوونەرێ بەردەوامێ عیراقێ ل نەتەوێن ئێکگرتی دیارکر کو سەرکەفتنێن پێشمەرگەی ل شنگالێ بدەست ڤە ئیناین، پێنگاڤەکا گرنگ بوو بۆ پاشڤەبرنا داعشێ ل دەڤەرێ.
د.سەلوان شنگالی جێگرێ نوونەرێ بەردەوامێ عیراقێ ل نەتەوێن ئێکگرتی دیارکر کو دڤێت حوکمەتا ھەرێما کوردستانێ ب ھووری سەنگا خوە بێخیتە سەر بیاڤێن راھێنانا پێشمەرگێ کوردستانێ ئەوا ژلایێ ھێزێن ھەڤپەیمانان ڤە پێشکێش دکەن و تایبەت وەلاتێ ئەمریکا و بۆ ئەڤرۆ گۆت” بەرسینگرتنا پێشمەرگەی بەرامبەر تیرۆرستێن داعشێ دیاردکەت و د سەلمینیت کو ھێزێن کوردی پشکەکا گرنگە ژ ھێزا ناڤدەولەتی و جیھانی و کورد فاکتەرەکێ گرنگە بۆ تەناھی و ئارامیا دەڤەرێ، دیسا رۆلەکێ گرنگ ھەیە بۆ پاراستن و بجھئینانا پرەنسیپێن مرۆڤایەتی ئەوێن کومەلگەھا پێشکەفتی باوەری پێ ھەی، ئەڤە رێیەکا گرنگ بوو بۆ نیاسینا دۆزا کوردان بۆ جیھانێ”.
د.سەلوان شنگالی گۆت ژی” نابینم چو گوھۆرین د نەخشێ سیاسی و نێڤدەولەتی دا ل دەڤەرێ بھێنەکرن، لێ دێ گوھۆرینێن سیاسی یێن مەزن د نەخشێ دەولەتان دا ھێنەکرن پشتی ب دووماھی ھاتنا شەرێ تیرۆرێ و دێ د بەرژوەندیا کوردێن رۆژئاڤا و باشور و ھەتا رادەکێ دوور وان پارچێن مای، ئەڤە دھێت پشتی گرنگیەکا مەزن ژلایێ وەلاتێن جیھانێ ڤە ب دۆزا رەوا یا مللەتێ کورد ھاتیە دان ، نابینم کوردێن رۆژئاڤا و باشور ئێک بگرن لێ پێشبینی دکەم و ئەو ھیڤیا مەیە.
ل دووڤ بوچوونا ناڤبری” پێدڤیە حوکمەت و سەرکرداتیا کوردستانێ پتر گرنگیێ بدەنە دەڤەرێن مادێ ١٤٠ و باوەریا وان دەڤەرێن رزگار کری بۆ لایێ خوە ڤەکێشن، دیسا وەرگرتنا ھەلویستان ھەمبەر بریارێن عیراقێ، یان دڤێن کوردان رۆلەکێ باش ھەبیت ل عیراقێ و دیتنا ھندەک چارەیان بۆ دەڤەرێ…دیسا کورد ب خوە ب دەرفەت بزانن ئەو ھاریکاریێن ەلاتێن جیھانێ کو ھاتینە کوردستانێ و مفا وەرگرتن ژ وان پەیوەندیین ل گەل بەغدا کو تێک نەچن، دیسان خورتکرن و رێکخستنا بەرەیێ کوردی و ل سەر مافێن خوە د مادێ ١٤٠ دا و پێشمەرگە و پەترۆلێ پاشڤە نەزڤرن”.
ھێشتا ژی گۆت” دڤێت کورد بریارا چارەنڤیسێ خوە بدەن، یان ل گەل عیراقێ بمینن و رۆلێ خوە یێ گرنگ ھەبیت، یان ژی کار بکەن ب شێوەکێ بەرچاڤ بۆ سەرخوەبوونا کوردستانێ و ئەڤە دڤێت ب رازیبوونا ھەموو ئالیێن سیاسیێن کوردستانێ بیت، ل دووڤ پرنسیپێن قانوونی و دستووری”.
ئه‌ڤرۆ نیوز، ره‌وان نهێلى
پشتى په‌سه‌ندكرنا بودجێ سالا 2015، حكومه‌تا عیراقێ دێ 55 هزار كه‌سان بۆ هه‌موو پارێزگه‌هێن عیراقێ دامه‌زرینیت.
شێركو جه‌وده‌ت ئه‌ندامێ لژنا دارایى ل په‌رله‌مانێ كوردستانێ دیاركر كو ژ 55 هزار پلێن دامه‌زراندنێ، به‌هرا هه‌رێمێ 5 هزار و 500 كه‌سن و گۆت: پشتى په‌سه‌ندكرنا بودجه‌ى، حكومه‌تا هه‌رێمێ دێ پشكا وه‌زاره‌تان دیار كه‌ت و دێ رێنمایى بۆ دامه‌زراندنێ ده‌رچن.
شێركو جه‌وده‌ت سه‌باره‌ت پشكا پارێزگه‌هان گۆت: پشكا پارێزگه‌هان دێ ل سه‌ر بنه‌مایێ ژمارا ئاكنجیبوونێ بیت.
ل سالا 2014 ژ ئه‌گه‌رێ په‌سه‌ندنه‌بوونا بودجه‌ى، پرۆسا دامه‌زراندنێ راوه‌ستیابوو.
ئه‌ڤرۆ نیوز:
ئومێد خوشناو سه‌رۆكێ فراكسیونا پارتى ل په‌رله‌مانێ كوردستانێ دیاركر كو شوره‌شا فێسبوكێ ل دۆر هه‌لوه‌شاندنا كرینا ترۆمبێلان بۆ په‌رله‌مانتاران سه‌ركه‌فت و گۆت: چ گومان تێدا نینه، هه‌رده‌م هه‌ر شوره‌شه‌كا ره‌وا بیت، دێ هه‌ر سه‌ركه‌ڤیت.
پشتى ل تورا كومه‌لایه‌تیا فێسبوكێ وه‌لاتیان نه‌رازیبوونا خوه ل دۆر كرینا ترۆمبێلان بۆ په‌رله‌مانته‌رێن كوردستانێ ده‌ربرى، دوهى سه‌رۆكایه‌تیا په‌رله‌مانى بڕیارا هه‌لوه‌ه‌شاندنا وێ بریارێ دا.
ئه‌ڤرۆ، سالار دۆسكی:
بتنێ(زریپۆش) د فلمان دا دیتی نه و چ جاران هزر ل چێكرنا ڤی كاری نه‌كریه، پشتی سه‌را سه‌نگه‌رێن پێشمه‌رگێ كوردستانێ كری ل ده‌ڤه‌را زمار و ل سه‌ر خواستا هه‌ڤالێ خوه كو ڤیا پیكه‌ما وان بۆ بكه‌نه (زریپۆش) رابوو كار ل سه‌ر كری و بۆ ماوێ هه‌یڤه‌كێ شیا ب جوانترین شێوه ترۆمبێله‌كا جوانا له‌شكه‌ری بۆ پێشمه‌رگێ كوردستانێ به‌رهه‌ڤ بكه‌ت و ب شێوێ (زریپۆش) یا جودابیت ژ هه‌ر ترۆمبێله‌كا له‌شكری.
سه‌فه‌رێ كوچه‌ر ماوێ 34 سالانه ئاسنگه‌رێ ده‌رگه‌ه و په‌نجه‌رانه، د هه‌ڤدیتنه‌كێ دا بۆ رۆژناما ئه‌ڤرۆ گۆت: پشتی ترۆمبێل ئینایه ده‌ف من و ترۆمبێلا هه‌ر پارچه پارچه‌كر و دووڤ دا پلێن ئینا ده‌ڤ من، دیسا (بژار ئاشه‌وی و شه‌وكه‌تێ فیته‌ر) ژی هاریكاریا من كریه موقه‌د‌مه‌كێ فه‌رماندا دهۆكێ هاریكاریا كارێ مه‌كریه و پشته‌ڤانیا دارایی ئه‌نجام دایه
سه‌فه‌ر گۆت: مه چێكریه و نه‌هاتیه تاقیكرن و هه‌موو نه (درعه) چونكۆ پلێتێ(درع) قاتێ وێ ئانكۆ( ته‌به‌قه) ب (30) وه‌رقێن دۆلاری یه، هه‌تا (13) قاتان چووینێ، تایرێن وێ یێن كۆمپانیێ نه وه‌ك هه‌موو هه‌مه‌ران و هه‌تا ب په‌قیت ژی دشێت خوه بگه‌هینته جهه‌كی، دیسان جامێن وێ ته‌لقه تێ ناچیت و فه‌رماندا دهۆكێ دوشكه‌كا فه‌رنسی راده‌ستی مه كریه ومه دانایه سه‌ر، سه‌فه‌رێ كوچه‌ر ئه‌وێ ب ئه‌نجامدانا ڤی كاری رابوویی ئاشكراكر كو وێنێ ڤێ گه‌له‌كێ جودایه ژ هه‌ر (موده‌رعه‌كا) دناڤا له‌شكه‌ری دا چونكه ئه‌ڤه ل به‌ر چیا نه‌هاتیه چێكرن،گۆت: ژبلی شوفێری و كه‌سێ ل گه‌ل د روونته خوارێ و كه‌سه‌ك ل سه‌ر دوشكێ یه و سێ كه‌س دشێن پشتا وێ دا شه‌ری بكه‌ن، خوه‌یاركر كو ئه‌ڤ كاره كریه بتنێ بۆ سلامه‌تی و پاراستنا جانێ پێشمه‌رگێ كوردستانێ و ژبه‌ر ڤێ یه‌كێ بویاغچیه‌كێ ترۆمبێلان ژی بێ به‌رامبه‌ر ئه‌ڤ كاره‌كریه پشتی زانی بۆ پێشمه‌رگێ كوردستانێ ئه‌ڤ كاره دهێته ئه‌نجامدان.
نيشاندان