ئه‌ڤرۆ نيوز:

فراكسيۆنا زه‌ر ل په‌رله‌مانێ كوردستانێ ره‌خنێن دژوار ئاراسته‌يى هه‌لويستێن هه‌ڤسه‌رۆكێن گشتى يێن هه‌ده‌په‌ و كه‌چه‌كه‌ كرن و ئاماژه‌ ب وێ چه‌ندێ دكه‌ن كو داخۆيانيێن وان خزمه‌تكرنا بۆ دوژمنان نه‌ بۆ ئێكرێزيا ئه‌ردێ كوردستانێ.

د راگه‌هاندنه‌كێ دا كو كوپيه‌ك بۆ ئه‌ڤرۆ نيوز هنارتيه‌، فراكسيۆنا زه‌ر ل په‌رله‌مانێ كوردستانێ راگه‌هاند: د ده‌مه‌كى دا كو خه‌لكێ ئازاديخواز و دژى تيرۆرا جيهانى و هه‌موو جه‌ماوه‌رێ كوردستانێ ل هه‌موو پارچان، ب گه‌رمى ل پێنگاڤێن پێشمه‌رگه‌يى د نێرن و سه‌ركه‌فتنێن وان بووينه‌ هيڤى و مزگينيێن خوه‌ش بۆ گۆڕانێن خه‌ونا تارى په‌رستان و هاڤێتنا رێكخراوا نوندڕه‌وا داعش بۆ ناڤ زبلخانا مێژوويێ، به‌لێ مخابن هه‌ڤده‌م ل گه‌ل وان ديتنێن مللى يێن هێزێن كوردستانى و خه‌لكێ هه‌ر چار پارچێن كوردستانێ، ل ڤێره‌ و ل وێراهه‌نێ هنده‌ك داخۆيانى، كو نه‌ د مفايێ دوزا كوردستانێ و نه‌ د مفايێ ئێكه‌تى و رێزێن هێزێن سياسى يه‌ دهێنه‌ دان، ب تنێ دوژمنێن دوزا كوردستانێ ب وان ره‌نگه‌ داخۆيانيان خوه‌ش دبن.

ئاماژه‌ ب وێ چه‌ندێ ژى كر كو ل جهێ پيرۆزباهى كرن ل شه‌رێ پێشمه‌رگه‌ و شه‌رڤانان، هه‌ر ژ كۆبانێ هه‌تا شنگال و جه‌له‌ولا، سه‌لاحه‌دين ده‌ميرتاش، هه‌ڤسه‌رۆكێ گشتيێ پارتى ديموكراتى گه‌لان “HDP” داخواز دكه‌ت، شنگال ببيته‌ هه‌رێمه‌كا سه‌ربه‌خۆ، ئه‌ڤه‌ د ده‌مه‌كى دايه‌، كو هه‌موو خه‌لكێ كوردستانێ د ديرۆكا خوه‌ دا ب به‌رده‌وامى به‌رامبه‌ر پارچه‌ پارچه‌بوونا خه‌لكێ كوردستانێ راوه‌ستيايه‌، شنگال ژى پشكه‌كا گرنگا قوربانيدانا ئه‌وێ سياسه‌تێ يه‌، كو دوژمنان د ده‌مێ بۆرى دا دايه‌.

د وێ راگه‌هاندنێ دا هاتيه‌ ژى: ژبلى خه‌لكێ ئازاركێشێ شنگال و دامه‌زراوێن قانوونى يێن كوردستانێ و ئه‌و هێز و لايه‌نێن خوين د پێناڤى ئازاديێ دا رێتى، كه‌سێ دى ماف نينه‌ به‌حس ل شنگال بكه‌ت، ب تايبه‌ت دابڕانا ئه‌و پشكا عه‌زيزا وه‌لاتى ژ خاكێ مه‌”.

هه‌ر د وێ راگه‌هاندنێ دا فراكسيۆنا زه‌ر ل په‌رله‌مانێ كوردستانێ ره‌خنێن دژوار ل جه‌ميل بايك، هه‌ڤسه‌رۆكێ كۆما جڤاكێن كوردستانێ “KCK” دگريت و ئاماژه‌ ب وێ چه‌ندێ دايه‌ كو جه‌ميل بايك ل دژى پارچه‌بوونا عيراقێ راوه‌ستيايه‌ و دبێژيت: “دڤێت عيراق ب ئێكگرتى بمينيت”. ل دووماهيێ ژى داخوازێ ژ جه‌ميل بايك دكه‌ين، بۆچى هند خه‌مێ ژ ئێكه‌تيا ئه‌ردێ عيراقێ دايه‌ و ئه‌ڤ بۆچوونه‌ خزمه‌ت ب كيرێ و كێ دكه‌ت؟.

ئه‌ڤرۆ نيوز، ناجی به‌ده‌ل:

خه‌یری بوزانی ریڤه‌به‌رێ گشتیێ كاروبارێن ئیزدیان ل وه‌زاره‌تا ئه‌وقاف و كاروبارێن ئاينى ل حوكمه‌تا هه‌رێما كوردستانێ بو ئه‌ڤرۆ نیوز راگه‌هاند: “ب هه‌ماهه‌نگی ل گه‌ل وه‌زاره‌تێ ل سه‌ر چاوانیا پشته‌ڤانیكرن و كاركرن بۆ شنگالێ، نه‌خشه‌ رێيه‌ك هاتیه‌ دانان ب پێنج قووناغان رزگاركرن و پاقژكرن و پاراستن و خزمه‌تگوزاری و هاریكاریكرنا عیراقێ و هه‌رێمێ و نێڤده‌وله‌تی و ڤه‌گه‌راندنا خه‌لكێ وێ بهێته‌ ئه‌نجام دان”.

ناڤری ئه‌و چه‌نده‌ ژی دیاركر كو ب ئاوایه‌كی ژێرخانا شنگالێ ب خوه‌ نه‌ ل ئاستێ پێدڤی بوو، ئه‌وا هه‌يی ژی نه‌مایه‌ و زێده‌باری ئه‌و عه‌ره‌بێن ل كومه‌لگه‌هـ و باژێرێن شنگالێ ژى مابوون مال و مولكێ خه‌لكی تالانكرن، ئه‌ڤه‌ ژی ره‌نگڤه‌دانه‌ك هه‌بوو ل سه‌ر ئه‌وێ ده‌ڤه‌رێ.

خه‌یری بوزانی ئه‌و گۆتژى: “ئه‌و زیره‌كی و خوراگریا پێشمه‌رگه‌يی و شه‌رێ وان ل گه‌ل داعش و ب هاریكاریا هیزێن هه‌ڤپه‌یمانا شیان جهه‌كێ مه‌زن ب ئه‌وان پاقژ بكه‌ن، لێ چاوانیا راهێنانێن داعش ل سه‌ر شه‌ری ل سه‌ر كولانان دهاته‌كرن و شاره‌زایه‌كا باش د وێ بیاڤی داهه‌یه‌، له‌وران ل هه‌ر جهه‌كێ ئه‌و خوه‌ دڤه‌كێشنه‌ شه‌رێ ناڤ كولانان”.

خه‌یری بوزانی ئاماژه‌ ب وێ چه‌ندێ ژى كر كو ژ هاتنا داعش هه‌تا نوكه‌ 16 مه‌زارێن ئێزديان ژ ناڤبرينه‌.