ئەڤرۆ:
ھادی عامری بەرپرسێ لەشکرێ بەدر یێ شیعی د پەیچێ خوە یێ تایبەتدا ل سەر تۆرا جڤاکی یا فیسبووکی بەحسێ رێککەفتنا د ناڤبەرا لەشکرێ بەدر و بەرپرسێن ئێکەتیێ دا دکەت ل دۆر رزگارکرنا جەلەولا و پاشی چۆلکرنا ھەردو دەڤەرێن سەعدیە و جەلەولا ژلایێ ئێکەتیێ ڤە دیاردکەت و دبێژیت” دەربارەی ئۆپەراسیونا رزگارکرنا ھەردو ناحیێن جەلەولا و سەعدیە ژ دەستێ تیرۆرستێن داعش ژلایێ ھێزێن شیعی ڤە،گەلەک گوتگوتک بۆ ڤێ ئۆپەراسیۆنا سەرکەفتی ھاتنە گوتن، بەلێ بریارا ئازادکرنێ یا عیراقێ بوو، ھەروەسا برایێن ئیرانی ژی ھاریکاریا مە دکر د رزگارکرنا وان دەڤەران دا”. زێدەتر دبێژیت”دەربارەی جەلەولا ھندەک ژ سەرکردێن ئێکەتیا نیشتمانی یا کوردستانی داخواز ژمە کر کو ھاریکاریا وان بکەین بۆ ئازادکرنا وێ ناحیێ، ئەم ژی ل گەل ئێکەتیێ وەسا رێککەفتین ھەکە جەلەولا ھاتە ئازادکرن، ھەر دەمێ باژێر ژ مین و تەقەمەنیێن داعش ھاتە پاقژکرن، دڤێت ھەموو ھێزێن ئێکەتی نیشتمانی کوردستان ژوی باژێری دەر بکەڤن و و رادەستی مە بکەن”.
ھادی عامری گوت ژی”ئەڤ رێککەفتنە د ناڤبەرا مەدا ھاتیە کرن و ئەم د پابەندین ب بەندێن وێ رێککەفتنێ” و سوپاسیا ئێکەتیێ ژی دکەت ژبۆ ھاریکاریا وان بۆ ئازادکرنا جەلەولا.

ئه‌ڤرۆ نيوز:

ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند كو هه‌تا نوكه‌ چو تشتێ كونكريتى د ناڤبه‌را هه‌ولێر و به‌غدا دا نينه‌ و دانوستاندنێن فه‌رمى ئه‌ڤرۆ دێ ده‌سپێكه‌ن.

د داخۆيانيه‌كێ دا بۆ مالپه‌رێ فه‌رميێ حوكمه‌تا هه‌رێما كوردستانێ، سه‌فين دزه‌يى، ئاخفتنكه‌رێ ب ناڤێ حوكمه‌تا هه‌رێما كوردستانێ گۆت: “د رۆژا ئێكێ يا سه‌ره‌دانا شاندێ بلندێ حوكمه‌تا هه‌رێما كوردستانێ بۆ به‌غدا دا، كو دوهى رۆژا ئێكشه‌مبى 30\11\2014 هاتبوو ئه‌نجامدان، چه‌ندين ديدار و پرۆتۆكۆل د ناڤبه‌را شاندى ب سه‌رۆكاتيا نێچيرڤان بارزانى ل گه‌ل سه‌رۆك وه‌زير و سه‌رۆك كۆمار و سه‌رۆكێ په‌رله‌مانى و هژماره‌كا به‌رپرسان هاتنه‌ ئه‌نجام دان”.

زێده‌تر گۆت: “هێشتا چو تشتێ كونكريتى د ناڤبه‌را هه‌ولێر و به‌غدا دا نه‌هاتيه‌ كرن و كۆمبوون و دانوستاندنێن فه‌رمى بۆ چاره‌كرنا كێشا و دوسيێن هه‌لاويستى د ناڤبه‌را هه‌ردو لادا ئه‌ڤرۆ رۆژا دوشه‌مبى دێ د ناڤبه‌را هه‌ردو تيمێن دانوستاندنكارێن حوكمه‌تا هه‌رێما كوردستانێ و حوكمه‌تا عيراقێ ده‌ست پێ كه‌ن.

ئاخفتنكه‌رێ ب ناڤێ حوكمه‌تا هه‌رێما كوردستانێ ئاشكه‌را ژى كر كو پشتى ب دووماهى هاتنا كۆمبوونان، دێ راگه‌هاندنێن فه‌رمى ده‌رباره‌يى ئه‌نجامێن كۆمبوونێ هێنه‌ به‌لاڤكرن.