ئەڤرۆ:
ئەمیندارێ گشتی یێ وەزارەتا پێشمەرگەی دوھی د پرێس کۆنفرانسەکی دا راگەھاند، کو نوکە پێشمەرگەی پلانەکا مەزن بۆ ئازادکرنا شنگالێ و دەشتا نەینەوا یا ھەی، لێ چاڤەرێی دەمێ گونجاینە.
جەبار یاوەر دیار کر کو پشتی پێشمەرگە چوویە کۆبانێ، نوکە 70% د دەست ھێزێن یەپەگێ و یەپەژێ دا نە و گۆت: (چو پێشمەرگە ل کۆبانێ شەھید نەبووینە و ب تنێ حەفت ب سڤکی بریندار ببوون).
ناڤھاتی ئاشکرا ژی کر کو حەفتیا بھێت شاندەکێ وەزارەتا بەڕەڤانیا عیراقێ دێ ھێتە ھەولێرێ و پاشی شاندەکێ وەزارەتا پێشمەرگەی ژی دێ چیتە بەغدا دا کو پتر ھەماھەنگی د ناڤبەرا ھەردو ئالیان دا پەیدا ببیت و گۆت: (نوکە 10 وەلاتێن ناتۆ راھێنانان ب پێشمەرگەی دکەن و ئێک ژ وان تورکیایە).
نووترين نووچه
- سەرۆكێ حوكمەتێ و قونسلێ فلستینێ دووماهی پێشهاتێن رەوشا غەزە گەنگەشەكرن
- د. خەلیل غازی: داهاتێ دەزگەهێن حوكمەتا ئیراقێ بۆ گەنجینەیا وەلاتی ناچن
- هەكە دۆزێن مللەتان د هندەك ویستگەهاندا تووشی راوەستییانێ ژی ببن، چو جاران ب دووماهی ناهێن
- مەسرور بارزانی و پاتریاركێ كەنیسەیا ئاشۆرییا رۆژهەلاتی دوپاتیێ ل پێشڤەبرنا كەلتوورێ پێکڤەژیانێ دكەن
- پارتی ل گەل ئێك لیستییێ یە ل دەڤەرێن كوردستانی یێن ل دەرڤەی ئیدارەیا هەرێمێ
- لەیلا قاسم نموونەیا قەهرەمانییا كچا كوردە و سیمبۆلا ئازادیخوازیێیە
- نێچیرڤان بارزانی: پێشوازیێ ل خوە هەلوەشاندنێ و چەكدانانا پەكەكێ دكەین
- نێچیرڤان بارزانی و مەسرور بارزانی پیرۆزباهیێ ل بنگەهێ لالشێ دكەن
- مەسرور بارزانی: پشتەڤانییا حوكمەتێ بۆ ب هێزكرنا ژێرخانەیا ئابۆری دێ بەردەوام بیت
- بنگەهێ لالش خزمەتەكا بەرچاڤ یا جڤاكێ ئێزدیاتیێ كریە
سهرهكى نوچێن گرنگ
رێكه‌تنا هه‌رێمێ و به‌غدا چه‌ند سه‌ركه‌فتن بیت هند ژی شكه‌ستن تێدایه
راگه‌هاندكار و كادرێ پێشكه‌فتیێ ئێكه‌تیا نیشتمانیا كوردستانێ ژوان ئه‌حمه‌د سه‌عید بو ئه‌ڤرۆ نیوز راگه‌هاند چونا شاندێ كوردی و رێكه‌فتن ل گه‌ل به‌غدا بتنێ بابه‌ت و دوسه‌یه‌كا ئه‌بستراكت نینه كو په‌یوه‌ندی ب ته‌ڤایا پرسگریكێن دیڤه نه‌بیت ئانكو ئه‌ڤ بابه‌ته په‌یوه‌ندیداره ب سیاسه‌تا نه‌فتا هه‌رێمێ و په‌یوه‌ندیێن توركیا و هه‌رێمێ و توركیا و به‌غدا و پاشی ئه‌مریكا ره‌وشا ئه‌منی یا ده‌ڤه‌رێ ڤه هه‌یه.
ژوان ئه‌حمه‌د دیاركر كو ئه‌و رێكه‌فتنه چه‌ند سه‌ركه‌فتن بیت هند ژی شكه‌ستن تێدایه به‌روڤاژی بهایێ راستیا شكه‌ستنا مه‌نه و مه ده‌ستكه‌فت هه‌بوون چونكو چونا نه‌فتێ ژ ره‌تكرنه‌كا رها كره بابه‌ته‌كێ یاسایی و دیفاكتوییی جیگیر بو كوردان ل عیراقێ ل هه‌مان ده‌م دا ئه‌و نه‌فتا مه دهنارت بێخینه به‌رده‌ستێ عیراقێ نه‌چاربوین سه‌ودایه‌كێ ل سه‌ر بكه‌ین و پشكه‌كێ ب رێكا عیراقێ بهنێرین.
كادرێ ئێكه‌تیا نیشمانی درێژی ب گوتنێن خوه دا و گوت: “ئه‌ڤه ژی ره‌خه‌كا بابه‌تی یه ئه‌رێ حكومه‌تا هه‌رێمێ دێ رۆن كه‌ت بو خه‌لكی كو نها 375 هه‌زار به‌رمیلێن نه‌فتێ د رۆژه‌كێ دا ره‌وانه دكه‌ت، ئه‌رێ 175 هه‌زارێن دی دێ چ ب سه‌ر ئێت و ئه‌رێ داهاتێ وێ چیته كیڤه و چه‌وا ئێته خه‌رجكرن ئانكو لایه‌نه‌كێ مه‌زنێ سیاسه‌تا نه‌فتێ ل كوردستانێ نه زه‌لاله و پێدڤیه بهێته رۆنكرن “.
ناڤبری ئاماژه ب ئه‌وان باندورێن هه‌ی دازانین كو دڤێ پرسگرێكێ دا ئیران و ئه‌مریكا كاریگه‌ریه‌كا مه‌زن هه‌بوو ل سه‌ر ئه‌وێ چه‌ندێ هه‌ر دولا كومبن بو دانوستاندنێ و لێك تێگه‌هشتنێ و ره‌وش ژی ب خوه هاریكاره‌كێ باش بوو چونكو دوژمنه‌كێ هه‌ڤبه‌ش ل به‌رسنگێ وانه ئه‌و ژی داعشه له‌ورا هه‌مو لایه‌ن گه‌هشتنه ئه‌وێ رایێ كو ب تنێ ب پێكڤه و لێكتێگه‌هشتن دشێن ئاریشه‌یێن ناڤبه‌را خوه چاره بكه‌ن.
ژ وان ئه‌حمه‌د ئه‌وێ چه‌ندێ ژی دیار دكه‌ت كو ئه‌ڤا جهێ هزركرنێ یه دڤێ رێكه‌تنێ دا ب تنێ دوسه‌یا نه‌فتێ بوویه ل ده‌مه‌كی دا زور ئاریشه ل گه‌ل به‌غدا هه‌نه ژ ئاریشه‌یا خاك و سامان و به‌شداریا سیاسی و دڤێ جارێ دا به‌غدا ل پێگه‌هه‌كێ بهێزتر بو پوسته‌كێ لاواز دایه كوردان كو به‌حسێ ماده‌یێ 140 نه‌ئێته‌كرن و ب رایا من ئه‌ڤه ئه‌و بۆچوون توخ دبیت كو سه‌ركردایه‌تیا سیاسی یا كوردی د پێخه‌مه‌تا سامانی دا خاك ژ ده‌ست دا و بێ باكه ژ خاكا كوردستانێ و هیڤی یا من ئه‌وه ب وی شێوه‌ی نه‌كه‌ڤیت.
هه‌روه‌سا ژوان دبیت رێكه‌تنه ده‌ستپێكه‌ك بیت و دبێژیت: “بۆ لێكتێگه‌هشتنێن دی ژی ل سه‌ر ماده‌یا 140 و بودجه‌ی و چه‌كداركرنا هێزا پێشمه‌رگه‌ی و ته‌ڤایا دوسه‌یێن هه‌لاویستی چونكو نابیت ب ئێك تریلیون دینار ته‌ڤایا ئاریشه‌یێن پێشمه‌رگه‌ی ل گه‌ل به‌غدا چاره بن كو ئاریشه‌یه‌كا مه‌زنه ژ وان پرچه‌كرنا پێشمه‌رگه‌ی و مه‌رجعیه‌تا پێشمه‌رگه‌ی و توخیبێ چالاكیێن پێشمه‌رگه‌ی هه‌ماهه‌نگیا هێزا پێشمه‌رگه‌ی و سوپایێ عیراقێ”.
ب تنێ ئه‌ڤ ده‌ڤه‌رێن كوردستانى ماينه ژێر ده‌ستێ داعش
ئه‌ڤرۆ نيوز:
دوهى 3\12\2014 د كۆنگره‌كێ رۆژنامه‌ڤانى دا، فه‌ريق جه‌بار ياوه‌ر ئه‌ميندارێ گشتيێ وه‌زاره‌تا پێشمه‌رگه‌يى راگه‌هاند كو پێشمه‌رگه‌يى گه‌له‌ك سه‌ركه‌فتنێن مه‌زن ل ڤان رۆژان يێ ب ده‌ست ڤه ئيناين و ب تنێ چه‌ند جهه‌كێن كێم ماينه كو بهێنه ئازادكرن و ئه‌ڤێن دى هه‌موو ناكه‌ڤنه به‌ر ده‌ڤه‌رێن كوردستانى يێن ژ ده‌رڤه‌يى ئيدارا هه‌رێما كوردستانێ.
جه‌بار ياوه‌ر گۆت: “ل هه‌يڤا بۆرى پێشمه‌رگه‌يى سه‌ركه‌فتنێن مه‌زن يێن تۆماركرين ل ده‌ڤه‌را زومار 15 گوند و ناحيا جه‌له‌ولا و سه‌عيده ل گه‌ل 50 گوندان رزگار كرن، ديسا ده‌ڤه‌را خرابه رووت باشوورێ كه‌ركووك و هه‌موو گوندێن قه‌زا مه‌خمور ژى هاتينه پاقژكرن”.
زێده‌تر گۆت: “ب تنێ شنگال و قه‌ره‌قوش و به‌عشيقه و به‌رتلا يێن ماين و پلان ژى هاتينه دانان و پێدڤى ب ده‌مێ گونجايى هه‌يه بۆ رزگار كرنا وان ده‌ڤه‌ران و ژبلى ڤان چو ده‌ڤه‌رێن دى يێن كوردستانى د ده‌ستێ داعش دا نه‌ماينه، به‌لێ گه‌له‌ك بزاڤ كرينه د ماوێ بۆرى ته‌لوه‌رد و سكرێ مووسل بگرن، به‌لێ بزاڤێن وان شكه‌ستن ئيناينه”.
ده‌رباره‌يى پشكداريكرنا هێزێن پێشمه‌رگه‌يى ل ده‌ڤه‌رێن دى يێن عيراقێ ژى گۆت: “د پاشه‌رۆژێ دا، فه‌رماندێ هێزێن چه‌كدار، ئانكو سه‌رۆكێ هه‌رێما كوردستانێ هه‌كه فه‌رمانێ بده‌ت، ئه‌م د ئاماده‌ينه بۆ رزگاركرنا هه‌موو ده‌ڤه‌رێن عيراقێ ب پشته‌ڤانيا هه‌ڤپه‌يمان و سۆپايێ عيراقێ”.
د روودانه‌كێ دا 19 كه‌س بوونه قوربانى
ژێده‌ره‌كى ژ رێڤه‌به‌ريا هاتنوچوونا قه‌زا شێخان راگه‌هاند كو ئه‌ڤرۆ سپێدێ ژ ئه‌نجامێ وه‌رگه‌ريانا پاسه‌كا قوتابيان ل سنورێ قه‌زا شێخان 19 كه‌س بوونه قوربانى.
دلشاد محه‌مه‌د په‌يامنێرێ راديۆيا ترافيك كو د هه‌مان ده‌م دا كارمه‌ندێ رێڤه‌به‌ريا هاتنوچوونێ يه ل شێخان راگه‌هاند كو ئه‌ڤرۆ سپێدێ ل نێزيك گوندێ مێرسيدا پاسه‌كا قوتابيان وه‌رگه‌ريا و ئه‌نجام دا 19 كه‌س بريندار بوون.
دلشاد محه‌مه‌د گۆتژى: “ژ ڤان 19 كه‌سان كو هه‌موو قوتابى بووينه، 12 كچ بوون و 7 ژى كوڕ بوون و 11 ژ وان بۆ نه‌خۆشخانا شێخان هاتينه ره‌وانه كرن و هه‌ش ژى بۆ دهۆك هنارتينه ب مه‌ره‌ما چاره‌كرنێ”.
ئەڤرۆ نیوز بەھرا پارتی ژ پۆستێن سلێمانیێ ئاشکەرا دکەت
ئه‌ڤرۆ:
سەرۆکێ فڕاکسیۆنا پارتی دیموکراتی کوردستان ل جڤاتا پارێزگەھا سلێمانیێ ئاماژێ ب وێ چەندێ دکەت، کومبوونا داھاتی دووماھی کۆمبوونە بۆ ئیکلاکرنا پۆستێ پارێزگارێ سلێمانیێ و کومبوون ناھێتە درێژکرن، بەلێ ئێکەتی و گۆڕان رێککەفتینە و ئەم ژی دێ ب گۆرەی ئیستیحقاقێن خوە یێن ھەلبژارتنێن جڤاتا پارێزگەھا سلێمانیێ پشکداریێ د حوکمەتا نافخوەیا سلێمانیێ دا کەین.
پشتی راگەھاندنا ئەنجامێن ھەلبژارتنێن جڤاتێن پارێزگەھێن ھەرێما کوردستانێ، ژ بەر نێزیکبوونا ھژمارا کۆرسیێن ئێکەتیێ و گۆڕان چو لایەنەک نەشیا پتریا دەنگێن جڤاتێ بۆ مسۆگەرکرنا پۆستێ پارێزگاری بدەستڤەبینیت و ئەڤە ژی بۆ ئەگەرێ وێ چەندێ ھەتا نوکە ئەڤ پرسە بھەلاویستی بمینیت و دووماھیێ ژی ھەردو لایەن گەھشتنە رێککەفتنێ کو پۆستێ پارێزگارێ سلێمانیێ ب دو سالێن ئێکێ بۆ ئێکەتیێ و دو سالێن د دووڤدا بۆ گۆڕان بیت، د ھەمبەر دا دو سالێن پارێزگەریا ھەلەبجە بۆ بزاڤا گۆڕان و دو سالێن دوماھیێ ژی بۆ ئێکەتیێ، بڕیارە ل رۆژا 11\12\2014 ێ کۆمبوونا جڤاتا پارێزگەھا سلێمانیێ بھێتە گرێدان پرسا دانانا پارێزگاری ب دوماھی بھێت.
زیاد کاکە رەزا، سەرۆکێ فڕاکسیۆنا پارتی دیموکراتی کوردستان ل جڤاتا پارێزگەھا سلێمانیێ بۆ رۆژناما ئەڤرۆ دیارکر، کو بڕیارە رۆژا 11ی ڤێ دوماھی کومبوونا جڤاتا پارێزگەھا سلێمانیێ بھێتە گرێدان و گۆت” ئێکەتی و گۆران ل سەر پۆستێ پارێزگارێ سلێمانیێ و ھەلەبجە رێککەفتینە و تنێ مایە بەربژێرێن خوە پێشکەش بکەن، ئەم ژی وەکی پارتی خوەشحالین بۆ ئەڤێ رێککەفتنێ، ژ بەر کو ئەڤە چەندین ھەیڤ بورین و ئاریشەیا دانانا پارێزگاری چارەسەر نەبوو، بڕیارە ل رۆژا 11ی ڤێ ھەیڤێ کومبوونا جڤاتا پارێزگەھا سلێمانیێ بھێتە گرێدان و دووماھی کومبوون بیت و ناھێتە درێژکرن، بەلێ رێککەفتن جارێ تنێ د ناڤبەرا ئێکەتیێ و گۆران دا ھاتیەکرن و پارتی و ئیسلامی تێدا د پشکدار نینن، بەلێ سۆزا دای دێ حوکمەتەکا ھەڤبەش پێک بینن و چو لایەنێن سەرکەفتی د ھەلبژارتناندا ناھێنە پشتگوە ھاڤێتن، مە ژی وەکی فڕاکسیۆنا پارتی خوە بەرھەڤکریە ب گۆرەی ئیستیحقاقێن خوە یێن ھەلبژارتنان پشکداریێ د ئیدارەیا خوەجھا پارێزگەھا سلێمانیێ دا بکەین و پۆستێ قایمقامەکی و چار رێڤەبەرێن ناحیان و دو رێڤەبەر بەھرا مەنە”.
زیادی گۆت ژی” ھەکە ئێکەتیێ و گۆڕان ب گۆرەی کۆرسیێن مە پۆست نەدانە پارتی، ئەڤە ئەم د پشکداریێ حوکمەتا سلێمانیێ ناکەین، چونکی بەری چەند رۆژان لیژنەیەک بۆ بەلافکرنا 10 ھزار یەکەیێن ئاکنجیبوونێ ل جڤاتا پارێزگەھا سلێمانیێ ھاتە پێکئینان، بەلێ تنێ ھەردو لایەن پێکھاتن و نەھێلا ئەم پشکدار ببین، ئەڤا بۆری دۆبارە نابیت، چونکی ئێک ژ ئاریشەیێن مە وەکی پارتی ل سلێمانیێ نەبوونا دەستھەلاتێ بوو، ھەتا نوکە رێ نەدھاتە دان ئەم بشێین خزمەتا ئەڤی باژێڕی بکەین و ئەڤە ژی ب ئەگەرێ ڤێ ئەزموونا دو ئیدارەیا سالێن بۆری و ژ نوکە پێڤە، ئەم ژی ناھێلین غەدر ل خەلکێ پارتی ل ڤی سنۆری بھێتەکرن و دێ خزمەتا ھەموو خەلکی کەین بێ جوداھیا سیاسی”.
وەزیرێ دەرڤە یێ ئەلمانیا: بەغدا ژ نوو تێگەھشت
ئەڤرۆ:
60 وەلاتێن ئەندام د ھەڤپەیمانیا دژی داعش دا، دوھی بۆ جارا ئێکێ ب سەرپەرشتی یا جۆن کێری وەزیرێ دەرڤە یێ ئەمریکا کۆمبوونەکا بەرفرەە ئەنجامدان کو ھژمارەکا وەلاتێن عەرەبی ژی تێدا بەرھەڤ ببوون.
کار و چالاکیێن وەلاتێن ھەڤپەیمان د کۆمبوونێ دا ھاتنە بەحسکرن و دانوستاندن ل سەر چەند پرۆژێن دی ھاتە کرن، ب تایبەت بۆ ھاریکاریکرنا ھێزێن ل ناڤ عیراق و سووریێ دژی داعش.
جۆن کێری دیار کر، ژ دەستپێکا دروستبوونا ھەڤپەیمانیا دژی داعش، شیاینە ھزار جاران ب فرۆکان ھێرشێ بکەنە سەر تیرۆرستان و گۆت:( موسلمانێن جیھانێ ھەموو ل ھەمبەر کارێن داعش د ھەڤڕانە و کارێن وان رەت دکەن).
شتاینمایەر وەزیرێ دەرڤە یێ ئەلمانیا راگەھاند، ئەو سەرکەفتنێن د سێ ھەیڤێن بۆری دا ل سەر داعش ھاتینە تۆمارکرن، وێ چەندێ ناگەھینن کو مەترسیا داعش نەمایە و گۆت:( بەغدا ژ نوو تێگەھشت کا بۆچی مە ھاریکاریا پێشمەرگەی دکر).
کرواتیا یا بەرھەڤە ھاریکاریا پیشمەرگەی بکەت
ئەڤرۆ:
مەسعود بارزانی سەرۆکێ ھەرێما کوردستانێ دوھی پێشوازی ل ئانتی کۆترۆ مانۆڤیچ وەزیرێ بەڕەڤانیا کرواتیا کر.
د دیدارەکێ دا، وەزیرێ بەڕەڤانیا کرواتیا راگەھاند کو گەفێن تیرۆرستێن بۆ سەر ھەێما کوردستانێ ب تنێ مەترسی نینن، بەلکو بۆ ھەموو وەلاتان مەترسینە و سوپاسیا گەلێ کوردستانێ و ھێزا پێشمەرگەی کر کو دلێرانە شەڕێ تیرۆرستێن داعش دکەن و گۆت:(کرواتیا یا بەرھەڤە د وارێ سەربازی و مەشقکرنێ دا ھاریکاریا ھێزێن پێشمەرگەی بکەت).
د ھەمبەر دا، راگەھاند کو شەڕێ تیرۆرێ ب ئالیەکی ب تنێ ناھێتە کرن، بەلکو گەفەکە بۆ ھەموو ئالیەکی و روو ب رووبوونا وێ ژی پێدڤی ب بزاڤەکا ھەڤپشکا ھەموو ئالیەکی ھەیە و گۆت:(پشتی ھێرشا تیرۆرستان بۆ سەر کوردستانێ، پێشمەرگەی ب شیانێن کێم و چەکەکێ کەڤن، شیا قارەمانانە ھێرشا داعش رابگرن و بشکێنن).
حوكمه‌تا هه‌رێمێ:هه‌تا دووماهيا سالێ دێ هه‌موو مووچان ده‌ت
ئه‌ڤرۆ نيوز:
سكرتێكرێ جڤاتا وه‌زيرێن كوردستانێ ئاشكه‌را كر كو به‌غدا دێ ئێك مليار دولارێن دى بۆ هه‌رێما كوردستانێ ره‌وانه كه‌ت، راگه‌هاند ژى هه‌تا دووماهيا سالێ دێ هه‌موو مووچێن فه‌رامبه‌ران هێنه به‌لاڤكرن.
باسنيوز، ژ زارێ د. ئارمانج ره‌حيم سكرتێرێ جڤاتا وه‌زيرێن هه‌رێما كوردستانێ به‌لاڤكريه كو ب گۆره‌يى ئه‌و رێكه‌فتنا هاتيه كرن هه‌تا دووماهيا ئه‌ڤ ساله حوكمه‌تا هه‌رێمێ دێ ئێك مليار دولارێن دى ژى ره‌وانه‌يى هه‌رێمێ كه‌ت.
سكرتێرێ جڤاتا وه‌زيران گۆت: “پشكه‌كا زۆر يا وى پاره‌يى ل گه‌ل داهاتێ ناڤخۆ و داهاتێ په‌ترۆلێ دێ بۆ مووچێ وان سێ هه‌يڤێن مووچه‌خوارێن هه‌رێمێ بيت”.
ئاماژه ب وێ چه‌ندێ ژى دا كو سه‌رۆكێ حوكمه‌تا هه‌رێما كوردستانێ فه‌رمانبه‌ران پشت راست دكه‌ت كو مووچێ چو فه‌رمانبه‌ران ناسوژيت و گۆتژى: “پشتى رێكه‌فتنا ل گه‌ل وه‌زيرێ په‌ترۆلا هه‌ولێر هاتيه كرن، 500 مليۆن دولار ژ به‌غدا هاتينه و دو جارێن دژى دێ 500 مليۆن دولار هێن دا هه‌تا دووماهيا ئه‌ڤ ساله هه‌موو موووچان بده‌ين”.
سكرتێرێ جڤاتا وه‌زيران ئاماژه ب وێ چه‌ندێ ژى دا كو فه‌رمانبه‌ر هه‌تا دووماهيا ئه‌ڤ ساله دێ هه‌موو مووچێن خوه وه‌رگرن و گۆت: “ل سالا بهێت فه‌رمانبه‌رێن هه‌رێمێ دێ د ده‌مێ خوه دا مووچه‌يى وه‌رگرن و چو كێشه نامينن”.
بەنکێن ئەھلی دێ قەران دەنە وەلاتیان
ئه‌ڤرۆ:
سەرۆکێ لیژنا دارایی ل پەرلەمانێ کوردستانێ بۆ ئەڤرۆ دیارکر پێشبینی دھێتە کرن ھەتا ھەیڤا شەش ژ سالا 2015 قەیرانا دارایی بەر ب چارەسەری بچیت، گۆت ژی پیشنیاز ھاتیە کرن ل سالا 2015ی َبەنکێن ئەھلی ھەموو جۆرین قەران بدەنە وەلاتیان و حوکمەت مفایی وان ژ پێش وەلاتیانڤە ب دەتە بەنکان.
عزەت سابر سەرۆکێ لیژنا دارایی ل پەرلەمانێ کوردستانێ بۆ ئەڤرۆ دیارکرکو چەندێن گرەنتیی ھەنە حکومەتا ھەرێما کوردستانێ ل سالا 2015 ژ قەیرانا دارایی خلاس بیت ئەوژی رەوانەکرنا رێژەکا زور یا پترولێ یە ژ ھەرێمێ بۆ دەرڤەی وەلاتێ وریکەفتن دگەل بەغدا و ئەنجامدانا چاکسازیا د سیستەمی ئابووریێ ھەرێمێ دا و کێم مەزاختن.
سەرۆکێ لیژنا دارایێ گۆت ژێ ژ قەیرانا ھندەک کۆمپانیی مفادار بووینە و ھندەک کۆمپانیان ژی ھاریکاریا حکومەتێ کریە و پارە ب قەرز داینە حکومەتێ بیێ مفایی خوە ب ھاڤیژینە سەر، لێ ھندەک کۆمپانی مفاداربووینە د قەیرانا دارایێ ھەرێمێ دا ب تایبەتی ژی دەمێ بھایێ سووتەمەنیێ گران دبیت.
عزەت سابر ئاشکرا کرکو سالا 2015 رەنگە حکومەتا ھەرێمێ نەشێت بودجا خوە بدانیت ئانکو پشت بەستنێ ل سەر داھاتیێ خوە بکەت چونکو ل دەزگەھێن جیھانی ھاتیە بەلاڤکرن دێ سالە 2015 بھایێ ئێک بەرمیلا پترۆلی بیتە 60 دۆلار ئەڤە ژی کوژمەکێ گەلەک کێمە و نەشێن پێشبینێ بکەن ل ھەرێمێ ل سالا 2015ێ دێ شێن بودجێ دانن یان نە چونکو ھەکەر بھایێ پترۆلێ ئەرزان بیت و ببیتە 60 دۆلار مفایی ھەرێمێ دێ گەلەک کێم بیت چونکو ھەرێمێ پارەیی ڤەگوھاستنێ و کۆمپانیان و مەزاختیێن دی ب دەت ژ بھایێ فروتنا پترولی لەورا ھەکەر رۆژانا ئێک ملیۆن
بەرمیلێن پترولی بھێنە فروتن پترا بەشێن مەزاختین ھەرێما کوردستانێ ناکەت.
سەرۆکێ لیژنا دارایی ل پەرلەمانێ کوردستانێ دیارکرکو نوکە ئەم مژوولی دانانا پرۆژە یاسایەکێ نە بۆ ھندی ل سالا 2015ێ بەنکێن ئەھلی قەرزان بدەنە وەلاتیان داکو پرژۆەیێن ئاڤادانکرنێ و چاندنێ و پیشەسازی و ئاڤاکرنا خانیان نەھێنە راوەستاندن و بەردەوامی پێ بھێتە دان ئەو مفایی بەنکین ئەھلی دھاڤینە سەر دێ حکومەت ژ پێش وەلاتیان ڤە دەت ئەم ھەولدین ڤێ پرۆژە قانوونا خوە ل پەرلەمانی پەسەند بکەین و سالا 2015ێ کار پێ بھێتە کرن.
ناڤبری ئەوژی خۆیا کرکو پارەیێ حکومەتا عێراقی ل دووڤ ریکەفتنێ دگەل ھەرێمێ کو رۆژانە 150 بەرمیلێن پترۆلێ ب رێیا بەغدا رەوانەی دەرڤە بکەت بەرامبەر دا حکومەتا عیراقی پارەیێ بدەتە ھەرێمێ ئەڤ کوژمێ پارەیی گەھشت و حکومەتا ھەرێما کوردستانێ بریارا دا ژ وی پارەیی 60% بۆ مۆچێ فەرمانبەران بھێتە تەرخانکرن یێ دیتر ژی بۆ پرۆژەیێن ئاڤادانکرنێ بھێتە تەرخانکرن.
عزەت سابر سەرۆکێ لیژنا دارایی گۆت: یا گرنگە حکومەت پێداچوونی د گرێبەستا خوە دا بکەت دگەل کۆمپانیا کارەبێ چونکو سالانە کوژمێ ئێک ملیار دولاری دھێتە تەرخانکرن بۆ کومپانی و بھایەکێ مەزن ژ گازێ بێ بەرامبەر بۆ کۆمپانیی دھێتە دابینکرن و گازا سروشتی بھێتە تەرخانکرن بۆ کومپانیا کارەبی و مەزاختی بھێنە کێمکرن داکو ھەرێم بشێت داھاتیێ خوە زێدە بکەت.
راوێژکارێ ئاسایشا ئابووری: شەرێ داعش پترۆلا عیراقێ ب 20 ملیار دۆلاران زەرەر کریە
راوێژکارێ حوکمەتا ھەرێما کوردستانێ بۆ کارۆبارێن وزێ بۆ بەرپەرێ ئابووریێ رۆژناما ئەڤرۆ دیارکر کو ھەر دو حوکمەتێن بەغدا و ھەولێرێ یێ بزاڤا دکەن کو دەستورێ عیراقێ بیتە بنەما بۆ چارەسەرکرنا کێشێن دناڤبەرا ھەر دو کاندا و ب رونشتن و ئاخفتن کێشە بھێنە چارەسەرکرن و ئێکلاکرن.
ئەڤرۆ ، سالار دۆسکی:
د. بێوار خنسی زێدەتر گۆت: شەرەکێ گەلەک مەزن ل عیراقێ دھێتەکرن و تیرۆرێ دەڤەرەکا مەزن گرتیە و داعش نێزیکی 50 ھزار مەترێن چارگوشە ل عیراقێ دەستەسەرکرینە کو دبیتە چارێکەکا عیراقێ، ل دووڤ ئامارێن وەزارەتا پەترۆلا عیراقێ خوسارەتیێن پەترۆلێ 20 ملیار دۆلارن و ھەکە پێشمەرگە نەبا دبیت خوسارەتیا عیراقێ ژ 40 ملیارا دا دەربازبیت، پێنگاڤا نێزیکبوونا ھەولێرێ و بەغدا دێ گەلەک باش بیت چونکە شەرێ دولا ل گەل عیراقێ دەست پێکریە، دابەزینا پەترولێ 100 دۆلاران بۆ کێمتر ژ 70 دۆلاران، ب ڤێ چەندێ میزانیا عیراقێ 27% کێمتر لێ ھاتیە، چونکە داھات 95% ژ پەترۆولێ یە و کارتێکرن ل ھەرێما کوردستانێ ژی ھاتیەکرن.
ناڤبری ئاشکراکر کو ھەرێما کوردستانێ نوکە 320 ھزار بەرمیلان بەرھەم دھینت و دفرۆشت و شیانێن ھەین دووماھیا ئەڤ سالە بکەتە 400 ھزار بەمیل د رۆژەکێ دا ، پێنگاڤا رادەستکرنا 150 ھزار بەمیلان د رۆژەکێ دا بەرامبەر 500 ملیۆن دۆلاران کارەکێ باش بوویە ھاتیەکرن، قۆناغا بھێت 500 ملیۆن دۆلارێن دی ژی دێ ھێن بەرامبەر بەردەوام بوونا 150 ھزار بەرمیلێن پەترۆولێ ب رێیا کۆمپانیا سۆَمۆ، ئەڤە ھەموو بەرامبەر ھنارتنا ڤی پارەی یە دا ھەرێما کوردستانێ بشێت مووچێن فەرمانبەرێن خوە بدەت.
ناڤبری ھێشتا ژی گۆت: شەرێ پێشمەرگێ ل کوردستانێ ل گەل داعش پێدڤی ب مەزاخیتەکێ زۆرە و زێدەباری ھاتنا نێزیکی 2 ملیۆن ئاواران ژ سورویا و باشور عیراقێ و دەڤەرێن کوردستانیێن دەرڤەیی ھەرێمێ بۆ کوردستانێ، ھەکە پێشمەرگێ کوردستانێ نەبا دا ئاوارە گەھەنە 4 ملیۆنان ل کوردستانێ چونکە ژ خانەقین و کەرکووک و ھەتا دگەھیتە شنگال ھەموو دا بەر ب کوردستانێ ھێن.
بێوار خنسی ھێشتا ژی گۆت: دەڤەرێن پەترۆلێ یێن دەستێ داعش دا ژ فەتحە ھەتا دگەھیتە کەسکێ و رێک و ھێلا بۆ جیھان دچیت ھاتیە راوستاندن، دیسا پێنچ زەڤیێن پەترۆلێ ل گەیارە د دەستی دانە، دیسا زەڤیەک ل ھەمان دەڤەر ھەیە د دەستی دایە، حەمرین، حوکمەتا عیراقێ نەشێت پەترۆلێ دەربێخیت و کەفتیە د دەستێ تیرۆرستێن داعش دا.
ناڤبری ھێشتا ژی گۆت: فرۆتنا 150 ھزار بەرمیلێن گازێ ب رێیا بەغدا گەلەک ب ساناھی کەتیە و دێ ڤالاھی ھێتە پڕکرن چونکە حوکمەتا بەغدا نوونەرێ خوە ھەیە، لێ تشتێ باش کلیلا بریارێ د دەستێ کوردان دایە و ھەر دەمێ پارە نەھات دێ ھێتەگرتن و دێ فرۆشین و دێ مفا ژێ ھێتـە وەرگرتن، دیسا نوکە پەترۆلا ھەرێما کوردستانێ ب رێکا تورێ و ب رێیا ھێلان و دیسا ب رێکان تانکەران ژی دھێتە فرۆتن و بەر ب زێدەبوونێ یە..کوردستان ژ 320 ھزار بەرمیلان دێ 150 ھزار بەرمیلان ل بەندەرێ جیھان رادەستی بەغدا کەت و 170 ھزاران دێ فرۆشیت و حوکمەتا ھەرَما کوردستانێ ئازادی ھەیە و ئەڤە ژی پێنگاڤەکا باشە ژلایێ قانوونی ڤە و رێکەفتنەکا فەرمی یە کو ھەرێم ماف ھەیە پەترۆلا زێدە ب فرۆششیت.
ناڤبری ئاشکراکر ژی کو ل دووڤ قانوونا ئوپێک وەلاتێ دبیتە ئەندام دڤێت دەولەت بیت و ژ 13 وەلاتان پێک دھێت و عیراق ئەندامە دوی وێ رێکخراوێ دا و ئەە نەکێشە بۆ فرۆتنا پەترۆلێ چونکە جیھانێ 33 وەلات ھەنە پەترۆولێ دفرۆشن، دیسا عیراق ب رێکا سۆمۆ ھەر سال پەترۆلێ دفرۆشیتە نێزیکی34کۆمپانیێن بیانی یێن بناڤ و دەنگ و راستەوخۆ ناھێتە فرۆتن بۆ وەلاتان.
د.بێوار خنسی ئەوچەندەژی گۆت: دڤێت پەترۆل گران بیت چونکە چ فاکتەر نین پەترۆل ئەرزان ببیت و بازارێ جیھانی نوکە رۆژانە پێدڤی ب 90 ھزار بەرمیلانە، شەرێ ھاتیەکرن شەرێ ئابووری یە و تایبەت دگەل رووسیا و ئیرانێ، روسیا نێزیکی 10 ملیۆن بەرمیلێن پەترولێ رۆژانە دەردێخیت و داھاتیێ وێ ل سەر پەترولێ یە، بۆ بەرمیلێ 110 دولار دانابوون و نوکە ئینا بن 80 دولاران دا ئەڤە فشارە بۆ سەر وەلاتان کو کێشێن خوە دگەل ئوکرانیا چارەسەرکەن، دیسا پشتەڤانیا ئیرانێ نەھێتەکرن دا لاواز بیت دبیاڤێ وزێ دا وپێشڤەچوونێ نەکەت، پێشبینی دکەم ھەتا دووماھیا ئەڤ سالە پەترۆل گران بیت ژ 100 دۆلاران ھەتا 110 بچیت.
نيشاندان
WP Facebook Auto Publish Powered By : XYZScripts.com