دیدار، هۆشەنگ تاجر:

سەرۆکێ ناڤەندا چاڤێ کورد بۆ گەشەپێدانا سیاسی دیار دکەت، ئەڤ هەلبژارتنە د رەوشەکا تایبەت دا دهێنە کرن، چونکی ل رۆژهەلاتا ناڤین گوهۆڕینێن گەلەک مەزن روو داینە و هێزێن سەر ب ئیرانێ ڤە ل ئیراقێ ژی نها گەلەک لاواز بووینە.

دلشاد نامق سەرۆکێ ناڤەندا چاڤێ کورد بۆ گەشەپێدانا سیاسی د دیدارەکا تایبەت دا بۆ رۆژنامەیا ئەڤرۆ دیار کر، ئەڤ هەلبژارتنە د دەمەکێ دا دهێنە کرن، کو ل رۆژهەلاتا ناڤین گوهۆڕینێن گەلەک مەزن روو داینە، هێزێن هەڤپەیمانێن ئیرانێ گەلەک لاواز بووینە، ل سووریێ رژێما بەشاری ژناڤچوویە و ل یەمەنێ ژی حوسیێن سەر ب ئیرانێ گەلەک لاواز بووینە، حزبوللا دربێن کوژەک لێ کەفتینە و حەماس ژی زۆر لاواز بوویە و گۆت: (هەکە بەرێ خوە بدەینە ئیراقێ، هەڤپەیمانێن ئیرانێ ژی پشتی گەفێن ئەمریکا و ئسرائیلێ بێدەنگ بووینە، ئانکو هێزێن سەر ب ئیرانێ ل ئیراقێ نها گەلەک لاوازن، ئەو یەک دێ کاریگەریا خوە ل سەر هەلبژارتنێن پەرلەمانێ ئیراقێ کەت، چونکی چەندین سالن هێزێن شیعە یێن نێزیکی ئیرانێ ل ئیراقێ ل سەر دەستهەلاتێ نە و نەشیاینە خزمەتا خەلکی بکەن، ب تایبەتی ژی هەکە ئەم بەرێ خوە بدەینە دەڤەرێن باشورێ ئیراقێ دبینین سەرەرای هەبوونا پارەیەکێ گەلەک مەزن لێ خزمەتا خەلکی نەهاتیە کرن، لێ حوکمەتا هەرێما کوردستانێ شیایە ب پارەیەکێ کێم گەلەک خزمەتێن مەزن پێشکێشی وەلاتیان بکەت).
ناڤهاتی ئەو یەک ژی دیار کر، گرۆپێن سەر ب ئیرانێ ب تایبەتی ژی حەشدا شەعبی گەلەک بزاڤ کرن یاسایەکێ ل پەرلەمانێ ئیراقێ د بەرژەوەندیا خوە دا دەرخینن، لێ ژ بەر گەفێن ئەمریکا بزاڤێن وان تووشی شکەستنێ هاتن، ئانکو لاوازبوونا هێزێن سەر ب ئیرانێ ل ئیراقێ دێ کاریگەریا خوە ل ئەنجامێ هەلبژارتنان کەت و گۆت: (هەکە ئەم بەرێ خوە بدەینە هەرێما کوردستانێ رەوشەکا جوداتر هەیە، چونکی ل هەرێما کوردستانێ پارتی شیایە خزمەتێن گەلەک مەزن پێشکێشی خەلکی بکەت و ل ئالیێ دی خەلکی دڤێت پارتی ب سەرکەفتنەکا مەزن بچیتە بەغدا دا پتر خزمەتا وان بهێتە کرن).
سەرۆکێ ناڤەندا چاڤێ کورد بۆ گەشەپێدانا سیاسی ئەو یەک ژی دیار کر، هەموو هێزێن سیاسی ل ئیراقێ دزانن بێی پشکداریا کوردان ب تایبەتی ژی پارتی دیموکراتی کوردستان چو پرۆسێن سیاسی ل ئیراقێ سەر ناگرن، پارتی هێزەکا مەزن و کاریگەرە و گۆت: (پارتی نە تنێ ل سەر ئاستێ ئیراقێ و دەڤەرێ بەلکو ل سەر ئاستێ نێڤدەولەتی دا ژی کاریگەریا خوە یا مەزن هەیە، ژ بەر ڤێ یەکێ ژی هەر هێزەکا سیاسی ل ئیراقێ بڤێت پشتی هەلبژارتنان حوکمەتێ ئاڤا بکەت دڤێت خوە نێزیکی پارتی بکەت و ئەو یەک ژی ژ بۆ کوردان گەلەک یا گرنگە).
دلشاد نامق د دووماهیا ئاخڤتنا خوە دا ئەو یەک ژی دیار کر، گرنگە پشتی هەلبژارتنان هەم ل هەرێما کوردستانێ و هەم ژی ل ئیراقێ ئەو هێزێن باوەریا وان ب دیموکراسیێ، ب پێکڤەژیانێ هەیە بشێن پێکڤە کار بکەن، گرنگە بەرەیەکێ نوو یێ سیاسی ل ئیراقێ بهێتە ئاڤا کرن کو ئارمانجا وێ خزمەتکرنا هەموو ئیراقێ بیت ل گەل هەرێما کوردستانێ، چونکی حوکمەتا نها یا ئیراقێ وەکو پێدڤی خزمەتا خەلکی نەکریە و ل دەڤەرێن دی یێن ئیراقێ خەلک ژ حوکمەتا نها رازی نینن و ژ بەر ڤێ یەکێ ژی دبیت هەلبژارتنێن ڤێجارێ ل ئیراقێ ببنە ئەگەرێ گوهۆرینێن گەلەک مەزن.

دوهی دوشەمبی 27/10/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل ئیلبروس كوتراشیڤ، بالیۆزێ رووسیا ل ئیراقێ كر.
حوكمەتا هەرێما كوردستانێ د بەیاننامەیەكێدا بەلاڤكر» د دیدارێدا كو ماكسیم روبین، قونسلێ گشتیێ رووسیا ل هەرێما كوردستانێ بەرهەڤبووی، پێشڤەبرنا هەڤبەندیێن دو ئالییانە و دوماهی گوهۆڕینێن رەوشا گشتییا ئیراقێ و دەڤەرێ هاتنە گەنگەشەكرن» .
حوكمەتا هەرێما كوردستانێ د بەیاننامەیا خوە دا دیاركر ژی» د پشكەكا دی یا دانوستاندناندا، بیر و بۆچوون ل دۆر پرۆسەیا هەلبژارتنێن جڤاتا نوونەرێن ئیراقێ هاتنە لێكگۆهارتن».

دوهی دوشەمبی 27/10/2025، ب بەرهەڤبوونا مەسرور بارزانی، جێگرێ سەرۆكێ پارتی دیموكراتی كوردستان ئاهەنگا جەماوەرییا سنوورێ ئیدارەیا سەربخوە یا سۆران ب هەردو لقێن 10 و 26 ل یاریگەها وەزرشییا سۆران بۆ هەوا بانگەشەیێ و پشتەڤانییا سەرئێخستنا لیستا 275 یا پارتی بۆ خولا شەشێ یا جڤاتا نوونەرێن ئیراقێ بڕێڤەچوو.
جێگرێ سەرۆكێ پارتی د ئاهەنگێدا پەیڤەك پێشكێشكر و راگەهاند» پێدڤییە ئەم پشكداریێ د ڤان هەلبژارتناندا بكەین بۆ وێ چەندێ خەلكەكێ دی ل شوونا مە بڕیارێ نەدەت، بۆ وێ چەندێ خوشك وبرایێن هەوە، نوونەرێن راستەقینەیێن هەوە، دلسۆزێن رێبازا پارتی و بارزانی بشێن ل سەنگەرێ بەراهیێ ل جڤاتا نوونەرێن ئیراقێ بەرگریێ ژ مافان بكەن».
مەسرور بارزانی گوت ژی» لەوما پێدڤییە ئەم پشتەڤانێن وان بیت و پێدڤییە ل رۆژا هەلبژارتنان ئەم و كەسوكارێن مە و هەڤال و دۆستێن مە بچینە سەر سندووقێن دەنگدانێ بۆ وێ چەندێ مەزنترین سەركەفتن بۆ لیستا پارتی دیموكراتی كرودستان ب دەستڤە بینین».
جێگرێ سەرۆكێ پارتی روو ل ئەندام و لایەنگرێن پارتی كر كو ب ئارامی و ب شێوەیەكێ شارستانی پشكداریێ د ڤان هەلبژارتناندا بكەن و گوت» ئەم ب رەوشتێ بلند یێ پارتایەتی و رێبازا بلند یا بارزانی بانگەشەیێ دكەین، ل سەرخوە، بەلێ پێنگاڤێن ب هێز، ب باوەری ب خوەبوون ب دەنگێن هەوە دێ بەر ب سەركەفتنێ چین».
مەسرور بارزانی د ئاهەنگێدا گوتە جەماوەرێ بەرهەڤبووی» خەلك دەمێ هەوە دبینیت، ئەوێ دۆستێ پارتی بیت دلێ وی دێ یێ خوەش بیت، پشتڕاستم ژی ئەوێ نەحەز بیت ب دیتنا هەوە دێ تمام بێ هیڤی بیت».
گوت ژی» پێشتر ژی بڕیارا نەحەزان ئەوبوو مە ب راوەستینن، د هەلبژارتنێن پێشتر دا ژی مە گوتە وان كو نەشێن» نوكە ژی نەشێن مە راوەستینن، ڤێجارێ ئاخڤتنا مە تنێ درووشم نینە، مە ب كریار سەلماندییە كو ئەوا دبێژین، دشێین بكەین و دێ شێین ژی».
هەروەسا ئاماژە دا» خەلكەكێ دی خوە تاقیكریە، هەوە ژی دەلیڤە ب هەموو ئالییەكێ سیاسی دایە، كو بهێن خوە تاقی بكەن و بزانن چ دەستكەفتەك بۆ خەلكێ كوردستانێ دێ ب دەست ئینن. ب پشتڕاستیڤە دشێن ئێك راستیێ بۆ هەوە باس بكەم، هەر چ دەستكەفتە ب سەرپەرشتییا پارتی ب دەستڤە هاتیە، هیچ ئالییەك بێی پارتی نەشیایە هیچ دەستكەفتەكی بۆ ڤی مللەتی ب دەستڤەبینیت، لەوما ئەوێن هەڤپەیمانێن پارتی بوون، پشكدار بوون د سەركەفتناندا، ئەوێن ل گەل پارتی ژی راوەستییان، شانازیێ ب سەركەفتنێن پارتی دكەن، ئەو ب خوە ژی دشێن شانازیێ ب پشكداربوونا خوە بكەن، بەلێ ئەوێن نەحەزێن پارتی بوون، ئەوێن دخواست رێگریێ ل پارتی بكەن، ئەوێن دخواست خەلكێ كوردستانێ بۆ بەرژەوەندیێن خوە بكاربینن، نوكە وان هەموویان دبینین ئەو ل كیرێ نە و پارتی ل كیرێ یە».
جێگرێ سەرۆكێ پارتی د پشكەكا دی یا پەیڤا خوە دا گوت» بێگومان نوكە پارتی ل سەر ئاستێ كوردستانێ هیچ هەڤڕكەك نینە و ب هێزترین حزبا سیاسییا كوردستانێیە، دخوازین وێ هێزێ ببەینە بەغدا و ل وێرێ بەرگریێ ژ مافێن دەستوورێ یێن خەلكێ كوردستانێ و هەموو ئیراقێ بكەین، چیایێن ڤێ دەڤەرێ و كوردستانێ دیدەڤانێن خەبات و قوربانیدانا پارتی و پێشمەرگەینە، پارتی دیرۆكەكا پڕ ژ سەروەریێ و قوربانیێ هەیە، قووناغەكا پڕ ژ دەستكەفت و پڕۆژەیان هەیە، هەروەسا پاشەڕۆژەكا پڕ ژ هیڤی و ئومێدان هەیە».
مەسرور بارزانی هەڤدەم گوت ژی» ئەم بۆ دو مەرەمان داخوازا باوەرییا وەلاتییان دكەین، ئێك: ئەم دخوازین وەلاتی بەردەوام بن د دانا باوەریێ ب مە تاكو بەردەوام بین د خزمەتكرنا وان، دخوازین دەنگێن وەلاتییان ل گەل مە بن بۆ وێ چەندێ بەرگریێ ژ دەستكەفتێن خوە بكەین، نەك تنێ ئەو دەستكەفتێن هەین دڤێت بەرگریێ ژێ بكەین و بپارێزین، بەلكو پارتی بەرنامەیەك هەیە بۆ پاشەڕۆژەكا باشتر و كوردستانەكا ئاڤەدانتر، لەوما مە پێدڤی ب دەنگ و باوەرییا هەوە هەیە، پێدڤییە كوردستان ژی بەر ب قووناغەكا گەشتر ببەت».
گوت ژی» دەمێ ئەم داخوازا باوەرییا هەوە دكەین دشێین ئاماژێ ب دەستكەفتێن خوە بدەین، ئەم تنێ سۆزا نادەین و تنیچ نائاخڤین، دەمێ سۆزێ د دەین بجهـ دئینین، دەمێ د ئاخڤین ئەنجام د دەین، دەمێ مە گوتیە هەوە دێ خزمەتا هەوە كەین، مە خزمەتا هەوە كر، نوكە ژی پێدڤییە زێدەتر خزمەتا هەوە بكەین، بەلێ بۆ وێ چەندێ سەركەفتیتر بین د خزمەتكرنا هەوە دا، مە پێدڤی ب پشتەڤانییا هەوە هەیە، لەوما ل گەل مە بن بۆ وێ چەندێ پێنگاڤان بەر ب پاشەڕۆژەكا گەشتر ب هاڤێژین».
جێگرێ سەرۆكێ پارتی د پەیڤا خوە دا دیاركر ژی» مە پێشتر سۆز دابوو هەوە كو دێ خزمەتا هەوە كەین و دێ بۆ هەوە پڕۆژەیان ئەنجام دەین، شۆرشا ئاڤەدانییا پارتی دەستپێكریە، كابینەیێن ئێك ل دووڤ ئێك یێن حوكمەتا هەرێما كوردستانێ كو پارتی سەرپەرشتییا وان دكر، بەرێ بنیاتێ ئاڤەدانكرنا كوردستانێ دانایە، ئەم دێ رۆژ ل دووڤ رۆژێ پرۆژەیێن زێدەتر بۆ هەوە ئەنجام دەین، ئەوا دكەین ژی منەت نینە و ب ئەركێ خوە دزانین و شانازیێ ب خزمەتكرنا هەوە دكەین».
سەبارەت سیستەمێ حوكمڕانیێ ل ئیراقێ، جێگرێ سەرۆكێ پارتی گوت» پێدڤییە هەر كەسەك هزر د وێ چەندێ دا بكەت كو ئیراقێ یێ بەر ب ناڤەندیبوونێ دەبت، ئەو یێ بەر ب دیكتاتۆریەتێ پێنگاڤان د هاڤێژیت، مە خەلكەكێ هشیار هەیە، پێشمەرگەیێن قەهرەمان ژی هێشتا یێن هەین، رۆلێن پێشمەرگەی هێشتا هەنە، ئەو هزرا ئازادیێ ئەوا ل كوردستانێ هاتیە چەسپاندن، هێشتا یا بەردەوامە، ب هیچ جۆرەكی رێ نادەین جارەكادی ئیراق بەر ب دیكتاتۆریتێ و ناڤەندیبوونێ بزڤریت».
مەسرور بارزانی گوت ژی» دخوازین ئەزموونا خوە ل گەل ئالیێن دی یێن ئیراقێ هەڤپشكیێ پێ بكەین، دخوازین هاریكارییا وان ژی بكەین، دخوازین ئیراق كو وەلاتەكێ زەنگینە، بەختەوەر بیت، پێشبكەڤیت وپێشكەفتنا ئابۆری ل هەموو وەلاتی یا بەردەوام بیت».

سەرۆكێ حوكمەتا هەرێما كوردستانێ، بلندترین پر ل هەرێما كوردستانێ ل ئیدارەیا سەربخوە یا سۆران ڤەكر و د رێوڕەسمێ ڤەكرنا وێ پرێ دا راگەهاند: ئەڤە پشكەكە ژ پڕۆژەیێن مە.
دوهی دوشەمبی 27/10/2025، مەسرور بارزانی، سەرۆكێ حوكمەتا هەرێما كوردستانێ، بلندترین پر ل هەرێما كوردستانێ ل ئیدارەیا سەربخوە یا سۆران ڤەكر و گوت « بەری هەموو تشتەكی، پیرۆزباهیێ ل هەوە دكەم، ئەڤە پشكەكە ژ وان پڕۆژەیێن كو حوكمەتا هەرێما كوردستانێ هەین بۆ پێشڤەبرنا رێ و پران و باشتركرنا هاتنوچوونێ ل باژێران، بۆ وێ چەندێ هەم گەشتیار بشێن زێدەتر سەرەدانا ڤێ دەڤەرێ بكەن كو جهەكێ گەلەك سەرنجڕاكێشە، هەم خەلكێ مە ژی بشێت باشتر مفای ژ وان رێ وپران وەربگریت، هەم بۆ سەلامەتییا خوەژی، ب ڤی جۆری و ب ڤی ئاستێ بلند كو هاتیە دروستكرن، ب راستی جهێ شانازیێیە. دەستخوەشیێ ل كۆمپانییا جێبەجێكار دكەم و هیڤیدارم هەردەم د سەركەفتی بن».
دیاركر ژی» من داخواز ژی ژ وەلاتیێن خوەشتڤی هەیە، رێنمایێن وەزارەتا ناڤخوە و هاتنوچوونێ ل بەرچاڤ بگرن، سەلامەتییا خوە و وەلاتییان ل بەرچاڤ بیت».
پتر گوت» وەك هەردەم من داخوازییەكا دی ژی هەیە، ژینگەها وەلاتێ خوە بپارێزن .جارەكادی دی پیرۆزە ل هەموو ئالییەكی».
ژ ئالییەكێ دی ڤە، مەسرور بارزانی، سەرۆكێ حوكمەتا هەرێما كوردستانێ سەرەدانا پڕۆژەیێ دوسایدیێ هۆلا هەلكەفتان – تاخێ ئازادی ب رێیا 40 مەتری/ قەزا ناڤەندا سۆران كر.
سەرۆكێ حوكمەتا هەرێما كوردستانێ د داخۆیانییەكا رۆژنامەڤانیدا راگەهاند» ئەڤرۆ هاتین بۆ ڤەكرنا ئۆڤەرپاسا دەرگەهێ سۆران كو سوپاس بۆ خودای تمام بوو. ئەڤە ژی ( دو سایدێ هۆلا هەلكەفتان – تاخێ ئازادی) پشكەكا دی یە ژ پڕۆژەیەكێ دی یێ دروستكرنا پرەكێ كو دەمەكێ دەست پێ هاتیە كرن و ل دەمەكێ زوو دێ ب دووماهی هێت. ئەڤە ژی هەموو دێ كەڤیتە خزمەتا خەلكێ ڤێ دەڤەرێ».
سەرۆكێ حوكمەتا هەرێمێ دوپاتكر ژی» ئارمانجا مە ئەوە كو رەوشا ڤی باژێری، ڤێ دەڤەرێ ب شێوەیەكێ گشتی باشتر بكەین و رێ وپران باشتر بكەین. سەرنجا خەلكی زێدەتر بۆ ڤێ دەڤەرێ رابكێشین، جهەكێ گەشتیارییە، جهەكێ گەلەك سەرنجڕاكێشە».
سەرۆكێ حوكمەتا هەرێمێ رۆهنكر ژی» دخوازین خزمەتكوزاریێن زێدەتر پێشكێشی وەلاتییان بكەین. دەلیڤەیێن كاری ژی بۆ خەلكێ دەڤەرێ پەیدا بكەین و زێدەتر وەبكەین خەلكەك ب ساناهیتر بشێت سەرەدانا ڤێ دەڤەرا جوان بكەت».
سەرۆكێ حوكمەتا هەرێمێ ئاماژە ب وێ چەندێ ژی دا» بەرنامەیێ مە وەسایە كو پترییا باژێران ب جوت سایدی پێكڤە گرێدەین، ئانكو جادەیان بەفرەه بكەین، جادەیێن باشتر دروست بكەین. هەموو د بەرنامەیدا هەیە. بەلێ من نەڤێت ئاماژە ب تاك تاكێ وان جهان بدەم، هەتا ب دووماهی دهێن، پشتی كو ب دووماهی بهێن، ئینشائەللا هوون ب خوە دێ بینن».
هەر د بەردەوامییا سەرەدانا خوە دا بۆ ئیدارەیا سەربخوە یا سۆران، مەسرور بارزانی، سەرۆكێ حوكمەتا هەرێما كوردستانێ سەرەدانا كارێن بجهئینانا ماستەرپلانا (گەلی عەلی بەگ) كر.
سەرۆكێ حوكمەتا هەرێمێ د داخۆیانییەكا رۆژنامەڤانیدا هیڤی خواست، پڕۆژەیێ نوو یێ گەلی عەلی بەگ، نەك تنێ بۆ خەلكێ كوردستانێ و ئیراقێ، بەلكو ببیتە جهەكێ گەشتیاریێ جیهانی بۆ گەشتیاران ل رۆژهەلاتا ناڤین و وەلاتێن دی ژی، تاكو بشێن سروشتێ جوان و دلڤەكەرێ دەڤەرێ ببینن.
مەسرور بارزانی دوپاتی ل پێدڤییا بجهئینانا پڕۆژەیێن مەزن كر بۆ راكێشانا گەشتیارێن جیهانی، ب تایبەت وان ئەو گەشتیارێن كو حەزا دیتنا سروشتێ كوردستانێ ژ نێزیك هەی، هەڤدەم، ئاماژە ب وێ چەندێ كر، كو دخوازن خەلكێ دەڤەرێ ژی مفادار بن ژ هاتنا گەشتیاران.
ل درێژییا ئاخڤتنێن خوەدا، سەرۆكێ حوكمەتا هەرێما كوردستانێ رۆهنكر» ماستەر پلانا گەشتیارییا گەلی عەلی بەگ، پشكەكە ژ پڕۆژەیەكێ گەلەك مەزنتر، كو ژ دەستپێكا گەلی عەلی بەگ دەست پێ دكەت هەتا بێخال و هەموو دەڤەرێ ڤەدگریت».
سەرۆكێ حوكمەتا هەرێمێ دوپاتكر ژی كو دەڤەرا سۆران، ب گۆڕەی سروشتێ جوگرافیێ دەڤەرێ، ل پاشەڕۆژێ دێ بیتە جهەكێ گەشتیاریێ گەلەك سەرنجڕاكێش.

ب بەرهەڤبوونا مەسرور بارزانی، جێگرێ سەرۆكێ پارتی دیموكراتی كوردستان، كەرنەڤالێ بانگەشەیا هەلبژارتنا یا كەركووك، گەرمیان، بەغدا و دیالا یا پارتی بڕێڤەچوو.
د كەرنەڤالێدا مەسرور بارزانی پەیڤەك پێشكێشكر . ئەڤە دەقێ وێ یە:
بەرهەڤبوویێن هێژا
خەلكێ خەباتكەر و قەهرەمانێ دلێ كوردستانێ..
گەلەك خوەشحال و بەختەوەرم ئەڤرۆ د خزمەتا هەوەیێن بەرێز و خوەشتڤی دامە بۆ بانگەشەیا هەلبژارتنێن ڤێجارێ یێن جڤاتا نوونەرێن ئیراقێ، خوەشحالم كو بەربژارێن مە ئەڤرۆ ل گەل مە ل ڤێرێ د بەرهەڤن وب خێرهاتنەكا گەرم لێ دكەین.
هەكە دەلیڤەیێ بدەن من پێخوەشە ڤێ بانگەشەیێ ب هۆزانەكا خوە ل سەر كەركووكێ دەست پێ بكەم ب ناڤێ (دەردەدلێ كەركووك)..
پێم دەڵێن قودسی كوردانە
كەی ئەمە رەوا و ویژدانە؟
بۆ قودس لە من پیرۆزتر بێت؟
ناوی لە من ئازیزتر بێت
مێژووم پڕە لە سەروەری
خەبات دژی داگیركەری
شاری ئەنفال و قوربانیم
داگیركراو و زیندانیم
خاوەنەكانم دەركران
هاوردە لە شوێنیان دانران
بۆ مێژووی من لەبیر دەكەن؟
ناو و نیشانم لێڵ دەكەن
بۆ وا ناوم كەم دەكەن؟
بە شوێنی تر دەمشوبهێنن
شاری پێكەوەژیانم
پێشمەرگەیە پاسەوانم
فەرموودەی بارزانی جوانە:
كەركووك دڵی كوردستانە

بەرێزان..
ئەز سوپاسییا خۆڕاگرییا هەوە دكەم، سوپاسییا بێهنفرەهییا هەوە دكەم، سوپاسییا هەوە دكەم سەرەرای وێ هەموو ستەما كو ل هەوە هاتیە كرن، هێشتا خوونا هەوە یا زەرە ودلێ هەوە بۆ كوردستانێ لێ ددەت.
ئەڤ هەلبژارتنە بۆمە د گرنگن چونكە نوكە ل سەر ئاستێ هەرێما كوردستانێ پارتی ب هێزترین حزبا سیاسییە و هیچ ئالییەك نینە بشێت ل ئاستێ كوردستانێ هەڤڕكییا پارتی بكەت، بەلێ مە دڤێت ڤێجارێ بچین و ل بەغدایێ بەرگریێ ژ مافێن دەستووری یێن هەموو خەلكێ كوردستانمێ و بگرە یێن هەموو ئیراقێ ژی بكەین. گرنگە ئەم پشكداریێ د وان هەلبژارتناندا بكەین چونكە مخابن پێشتر خەلكەكێ دی ب نافێ نوونەرایەتییا خەلكێ كوردستانێ، چوون رێككەفتنەكا نهێنی ل گەل هەڤدو كر و هەڤپەیمانی دروستكر و ل شوونا وێ چەندێ بەرگریێ ژ مافێن خەلكێ كوردستانێ بكەن، تنێ بۆ بەرژەوەندییا تایبەتییا خوە كاركر، ڤێجارێ پارتی دێ چیت بۆ وێ چەندێ بەرگریێ ژ مافێن خەلكێ كوردستانێ بكەت نەك بەرژەوەندییا كەسی.
ئەڤ خوەشتڤییە، ئەڤ بەرێزە بەربژارێن هەوەنە، كچ و كۆڕ و خوسم و برایێن هەوەنە، دێ چن بۆ وێ چەندێ داخوازا مافێن هەموو خەلكێ ئیراقێ بكەن، داخوازا مافێن خەلكێ كوردستانێ یێ ستەملێكری كەن، مافێن هەموو پێكهاتە و ئایین و ئایینزایان بكەن، ئەو ناچنە وێرێ داخوازا رێككەفتنێن نهیچنی یان هەڤپەیمانیێ ل گەل ئالیێن دی بۆ بەرژەوەندییا حزبی و كەسی بكەن، دێ چنە وێرێ بۆ چەسپاندنا مادەیا 140 و بۆ بجهئینانا هەموو مادەیێن دەستووری.
ئەوا هەتا نوكە ل كەركووكێ و دەڤەرێن دابرای دەرحەق هەموو نەتەوە و ئایینێن دی هاتیە كرن، ب راستی ستەمەكا مەزنە و ئێدی ئەو ستەمە ناهێتە قەبوولكرن، ئەم دزانین كو ب چەندین شێوازان ئەڤ ستەمە هەتا نوكە یا بەردەوامبوو، راستە گەلەك جاران ئەڤ ستەمە ب شێوەیێ قانوونی كریە، بەلێ ستەم هەر ستەمە قانوون ل گەل بیت یان قانوون ل گەل نەبیت، لەوما ئەم دێ روو ب روویێ هەموو ستەمكارەكی راوەستین ودێ مافێن خوە وەرگرین.
دڤێت مادەیا 140 وەك خوە بهێتە بجهئینان، دڤێت مادەیێن دەستووری یێن هاتینە بنپێكرن وەك خوە بهێنە بجهئینان، نابیت ئێدی دەستوور ببیتە بژاردەیێ دەستێ هندەك كەسان ب كەیفا خوە وان مادەیێن ب دلێ وان بجهبینن، ئەو مادەیێن كو بۆ بەرژەوەندیێن هەموو خەلكێ ئیراقێ و ب تایبەتی خەلكێ كوردستانێ نە، بهێنە پشت گوه هاڤێتن و بنپێكرن، ئەم ئێدی ڤێ چەندێ قەبوول ناكەین، ڤێجارێ شەڕێ مە ل جڤاتا نوونەرێن ئیراقێ دێ بۆ بجهئینانا دەستووری بێی جوداهی و بێی كێماسی بیت.
دیرۆكا مە ل گەل كەركووكێ دیرۆكەكا دێرینە، كەركووك تنێ پشكەك نینە ژ ئاخا كوردستانێ، كەركووك دلێ كوردستانێیە، ل سەر كەركووكێ بارزانیێ نەمر، بارزانیێ باب شۆڕشەك ل سەر دانا، ڤێجارێ ئەم د بەرهەڤین خوون و گیانێ خوە ژی ل سەر كەركووكێ دانین و هەر دێ زڤرینین. كەركووك ئاخەك نینە بشێین دەستان ژێ بەردەین، نە شەهیدێن مە دەست ژێ بەردایە، نە ئەم دەست ژێ بەردەین و رۆژەكێ ژ رۆژان دێ هەر كەركووك زڤریتە ب سەر كوردستانێ ڤە، بەلكو نەحەزێن كوردستانێ بزاڤێن جدی بكەن بۆ وێ چەندێ ئاخا مە داگیر بكەن، چەندین جاران ئاخا مە داگیركریە، بەلێ چو جاران نەشیاینە ئیرادەیا ە داگیر بكەن. بەرسڤ ل دەف مە هەیە كا چاوان دێ شێین خزمەتا هەموو ئیراقێ كەین، چاوان دێ شێین خزمەتا كەركووكێ كەین، چاوان دێ شێین خزمەتا هەموو دەڤەرێن دی یێن ڤەقەتیای كەین، چونكە دیرۆكا پارتی یا دیارە، دەستكەفتێن مە، پڕۆژەیێن مە بەلگەنە بۆ وان ئاخڤتنان كو پارتی دێ كەت، كو پارتی دبێژیت رێ بدەنە من، باوەرییا بدەنە من بهێم خزمەتا كەركووكێ بكەم، بەلگەیێن مە د دیارن كو دشێین خزمەتا كەركووكێ بكەین.
پێدڤییە خەلكێ كەركووكێ راستییان بزانن، پێدڤییە بزانن ئەوا ل دیرۆكێ خوە كریە قوربانی ، پارتی بوویە و رۆلێن پارتی بوون و كەسوكارێن هەوە بوون، دڤێت خەلكێ كەركووكێ یێ هشیار و ئاگەهدار بیت كو ئەوێن یاری ب چارەنڤیسێ خەلكێ كەركووكێ كری و ل سەر بەرژەوەندیێن هەوە بۆ دەستكەفتێن كەسی یێن خوە و حزبێن خوە رێككەفتن كرین، گەلەك د جودا و د دیارن و ئەو بیاڤێ بووی هەتا نوكە نەشیاینە خزمەتا خەلكێ كەركووكێ بكەن، ڤیجارێ داخوازییا مە ژ خەلكێ كەركووكێ ئەوە، رێ ب پارتی بدەن بهێین خزمەتا هەوە بكەین.
بەرێزان..
من گوهلێبوو ئەو برادەر دبێژن ئێك ملیۆن دەنگ، ئەڤە چالێنجەكە كو برایێ من یێ بەرێز نێچیرڤان بارزانی راگەهاندی، ئەز پرسیارا هەوە دكەم، ئایا دێ شێین ئێك ملیۆن دەنگان ئینین یان نە؟ دێ شێین زڤرینە كەركووكێ یان نە؟ بەلێ دشێین، دشێین بزڤرینە كەركووكێ، دشێین ئێك ملیۆن دەنگان ژی بینین، دشێین پارتی ببیتە مەزنترین و سەركەفتیترین لیست د ڤان هەلبژارتناندا، دەمێ پارتی ئیرادە هەبیت دێ كەت، چونكە ئەوا پارتی گوتی یا ئەنجامدی، ژ نوكە و وێڤە ژی هەر چ پارتی بێژیت دێ شێت ئەنجام دەت، بەلێ دشێن ئەنجام بدەین.
خوشك و برایان..
ئەم شانازیێ ب دیرۆكا خوە وقوربانیێن خوە وخوونا شەهیدێن خوە و بنەمالێن سەربلندێن شەهیدێن خوە و دەستكەفتێن خوە و پڕۆژەیێن خوە و بیر و بۆچوونێن خوە سەرۆكێ خوە و رێبازا خوە و پارتا خوە دكەین.
سەحكەنە بەرامبەر پارتی، بزانن كی دی ژ بلی پارتی، بێی پارتی، هیچ دەستكەفتەك بۆ خەلكێ كوردستانێ هەبوویە؟ هەكە دەستكەفت ژی هەبیت، ل وان دەمان بوویە كو هەڤپەیمانێن پارتی بوون، ل وان دەمان بوویە كو كورد ئێكڕێز بوون، لەوما ئەم نەتنێ بۆ پارتییان، بەلكو بۆ هەموو خەلكێ كوردستانێ و بۆ هەموو خەلكێ ئیراقێ، داخواز دكەین هاریكارییا مە بكەن بۆ وێ چەندێ دادپەروەری بهێتە چەسپاندن، تاكو مافێ هەموو كەسەكی وەك خوە بهێتە بجهئینان و هیچ جوداهی د جهئینانا مافێن هەموو خەلكێ ئیراقێدا نەهێتە كرن.
رێگریكرن ل سەركەفتنا پڕۆژەیان دەستكەفت نینە، رێگریكرن ل پێكئینانا حوكمەتێ دەستكەفت نینە تاكو شانازی پێ بهێتە كرن، شانازی ب وێ ئێكێ دهێتە كرن دلسۆزێ خەلكێ خوە بی و یێ بەرهەڤبی پێخەمەت خەلكێ خوە تو خوە بكەیە قوربانی. ئەو دەستكەفتێن ل كوردستانێ دبینین، ژ زاخۆ بگرە هەتا هەلەبجە ل هەموو باژێر و باژێركان كو دهێنە كرن، دەستكەفتێن ئێك ل دووڤ ئێك مە چەندین جاران باسكریە، ژ پڕۆژەیێ رۆناهی، هەژمارا من، قیركرنا رێ و پران، خزمەتگوزاریێن دیجیتالی، هەموو ئەو كارێن مە كرین ل كەرتێن ساخلەمیێ، پەروەردەیێ، خواندنێ، ل هەموو پشكێن خزمەتگوزاری، ئەو هەموو ئەو دەستكەفتەنە كو د شیاندایە ئەم بۆ كەركووكێ ژی بكەین، بەلێ مە پێدڤی ب باوەری و دەنگ و پشتەڤانییا خەلكێ كەركووكێیە، باوەرییا بدەنە مە بۆ وێ چەندێ كەركووكێ ژی وەك هەموو باژێرێن كوردستانێ پێشبێخین و بەر ب پێشڤە ببەین. گونەهە باژێرەكێ وەك كەركووكێ ئەو هەموو قوربانی داین، ل سەر دەریایەكا پەترۆلێ دژیت، هێشتا كارەبا نەبیت، رێ و پرێن وێ ب ڤی جۆری بن، یان خەلكێ هێشتا كێشەیا ژیارێ هەبیت، ئەو شەڕێ ل گەل هەرێما كوردستانێ دهێتە كرن، ل گەل كەركووكێ ژی دهێتە كرن، ئەو بودجە بڕینە، ئەو خزمەتنەكرنە ل گەل خەلكێ كەركووكێ ژی دهێتە كرن، خەلكێ كەركووكێ ژ كوردستانێ نەهاتیە جوداكرن، چونكە ناهێتە جوداكرن، كەركووك كوردستانە و دڤێت ئەم وی شەڕی بكەین بۆ وێ چەندێ مافێن وی خەلكی بزڤرن، ئەز دزانم هەوە چەند زەحمەت كێشایە، هە وە چەند ئازار دیتینە، ژ هەموو روویەكی ڤە، ژ روویێ ژیارێ، ژ روویێ ئابۆری، ژ روویێ سیاسی، ژ روویێ ئاسایشێ و ئارامیێ، پێدڤی بوو كەركووك نوكە نموونەیا پێكڤەژیانیچ با ل سەر ئاستێ ئیراقێ و هەموو جیهانێ. ئەز دشێم بێژمە هەوە كەركووك د دەستێ پارتی دا بیت، دێ بیتە نموونەیا پێكڤەژیانێ ل سەر ئاستێ هەموو جیهانێ.
هەوە هەموو خەلكێ دی تاقیكر، ئالیێن دی هەوە تاقیكرن، ل شوونا خزمەتا هەوە بكەین، هوون بكارئینان بۆ بەرژەوەندییا خوە، رێ بدەن پارتی خوە بكەتە قوربانی هەوە، رێ بدەن پارتی خزمەتا هەوە بكەت.
خوشك وبرایان…
ئینشائەللا هوون هەموو دێ پشتەڤانێن سەرسەختێن پارتی بن بۆ وێ چەندێ پارتی پترییا دەنگان ل كەركووكێ بینیت، پشتەڤانییا ڤان خوشك و برایێن خوە یێن بەربژار بكەن بۆ وێ چەندێ سەربكەڤن.
هەموو دەڤەرێن ڤەقەتیای یێن كوردستانێ دڤێت ئێك ل دووڤ ئێك بزڤرنە ب سەر نیشتمانی ڤە، دڤێت خانەقین و مەخموور و زوممار و شنگال بزڤرن، نابیت هیچ بهۆستەكا ڤێ ئاخێ ل بن دەستێ داگیركەران ڤە بمینیت. هەكە وان باوەری ب دیموكراسییەتێ و فیدرالییەتێ هەیە، بلا بهێن خالێن دەستووری بجهبینن، بەلێ خەلكەك هبەیت خوە ژ چەسپاندنا مافێن دەستووری ڤەدزیت، دڤێت ئەم بچین و نەچارین بكەین كو ئەڤ دەستوورێ بۆ هەموو ئیراقێ هاتیە نڤیسین و تنێ مولكێ ئالییەكی و پشكەكا تایبەت نینە، مولكێ مە هەموویانە و دڤێت هەموو بڕگەیێن وی وەك خوە بهێنە بجهئینان، مادەیا 140 وەك خوە بهێتە بجهئینان و هەموو خەلك ب مافێن خوە شاد بن.
ئەم دخوازین پڕۆژەیێ رۆناهی بگەهیتە كەركووكێ، دخوازین خزمەتگوزاری بگەهنە كەركووكێ، دخوازین پێكڤەژیانا راستەقینە و ئاشتەوایییا دروست ل كەركووكێ بهێتە بەرقەراركرن، ئەم بەرگریێ ژ مافێن هەموو نەتەوەیان دكەین، نەك تنێ كورد، بەلكو ژ ئەرەب و توركمان و كریستیان و هەموو تەخ و چینەكێ دكەین، دزانین كو ڤی خەلكی چ ئازارەك دیتییە، هەژی وێ چەندێ نینن ئێدی ب ڤی جۆری ژبەر وێ چەندێ كو دەستهەلاتەكا نە هەژی نەشیایە حوكمڕانییەكا دروست بڕێڤەببەت، ئەم ببینە قوربانی دەستێ ڤێ جۆرێ حوكمڕانیێ، دڤێت رێڕەوێ حوكمڕانیێ ل بەغدا بهێتە راستڤەكرن، دڤێت مافێن خەلكێ ئیراقێ هەموویێ وەكهەڤ بهێنە بجهئینان و كەركووك و هەموو باژێرێن دی ل باكوورێ ئیراقێ و باشووری و رۆژهەلات و رۆژئاڤایێ ئیراقێ، هەموو ببن ئەرك ل سەر ملێ ڤان خوشك و برایان كو نوونەرێن راستەقینەیێن پارتی نە، ل وێرێ بەرگریێ ژ مافێن هەر هەموویان بكەن.
دزانین كو خەلكێ ئیراقێ گەلەك وەك مە مخابن هاتینە چەوساندن، رێگری ل پێشئێخستنا ڤی وەلاتی هەیە، ل دابینكرنا خزمەتگوزارییان بۆ هەموو وەلاتییان، باژێرێن دی یێن ئیراقێ مخابن دبینین كو ژیانا وان چەند یا دژوارە، ئایا ئیراقێ ژێدەرێن سروشتی نینە؟ داهات نینە؟ شیان نینن؟ بەلێ یێن هەین، بەلێ ئیدارەیەكا تمام یا وی داهاتی نەهاتییە كرن و ب شێوەیەكێ وەكهەڤ خزمەتگوزاری بۆ خەلكی نەهاتینە كرن. ئەركێ مەیە ل بەغدا پارێزگاریێ ژ وەكهەڤیێ بكەین، ژ دادپەروەریێ بكەین، ئەركێ مەیە پارێزگاریێ و پشتەڤانیێ ل مافێن هەموو تاكەكێ ڤی وەلاتی بكەین. هەكە خوەشگوزەرانی ل ئیراقێ بەرقەرار بیت، خەلكی ژیانەكا بەختەوەر هەبیت، ئاسوودە بیت، ئارام بیت، پشتڕاست بن كوردستان ب هەمووڤە دێ زێدەتر پێشكەفتیتر بیت و خوەشگوزارەنییا زێدەتر تێدا هێتە بجهئینان.
كەسەك دلسۆزێ كەركووكێ بیت ، تنێ ب درووشمان نائاخڤیت، دێ هیت ب كریار، ب شێوەیەكێ پراكتیكی، ب كریار دێ خزمەتا خەلكێ كەركووكێ كەت، ئایا هوون د رازی نە ب ڤێ جۆرێ ژیانا نوكە ل كەركووكێ و دەڤەرێن ڤەقەتیایێن دی یێن كوردستانێ هەی؟ ئانكو دەست ل ناڤ دەست هەڤدو، دڤێت بزاڤەكا جدی بكەین بۆ وێ چەندێ هەموو پشكێن كوردستانێ ب دەڤەرێن ڤەقەتیای ڤە، ب دەڤەرێن داگیركری ژی ڤە، هەموو مفادار بن ژ وان خزمەتگوزاریێن كو پارتی دشێت بۆ هەوە بكەت.
خوشك وبرایان..
مە دەستوورەك نڤیسی و مە دەنگ ل سەر دا كو ئیراق ببیتە وەلاتەكێ دیموكراسی و فیدرالی كو مافێ هەموو پێكهاتەیان تێدا بهێتە مسۆگەركرن، كو كەس نەشێت دەستووری بن پێ بكەت، بەلێ كو دبنیین رێگری دهێتە كرن د بجهئینانا مادەیێن دەستووریدا، د جهئینانا مادەیا 140، بودجەی، ژیارا خەلكی، هەموو هاتنە كرن ب كارت و فشارێن سیاسی، ڤێجارێ مە بژاردەیێن دی ل بەردەست نینن ژبلی وێ چەندێ بچینە بەغدا و ل وێرێ شەڕی ل سەر ڤان مافان بكەین. ئەڤ هەلبژارتنە د گرنگن بۆ وێ چەندێ ئێدی چاڤەڕێ نەبیت خەلك ب بیرو بۆچوونێن شۆڤینی، ب هزرەكا داگیركەرانە هزر د داگیركرنا كوردستانێدا بكەت یان هزر د چارەسەریێن دی دا بكەت، هزر د وێ چەندێ دا بكەت كوردستان داگیر بكەت ئەم چاڤەڕێ وێ چەندێ نابین پیلان بهێنە داڕێشتن، دڤێت ئەم خوە پیلانێن وان ل بەغدا ب هەلوەشینین. لەوما گرنگە دەنگ ب ڤان نوونەران بدەن كو بچنە بەغدا و ل وێرێ رێگریێ ل وێ پیلانگێریێ بكەن، دڤێت دەنگ ب وان خوشك و برایان بدەن بۆ وێ چەندێ بچن ل وێرێ بەرگریێ ژ مافێن هەوە بكەن.
نابیت ئەم چاڤەڕێ بین، خەلك، ئالیێن دی هەڤپەیمانیێ دروست بكەن، نوكەژ ی سۆزا وێ چەندێ ددەن و دبێژن دێ هێین قەوارەیێ هەرێما كوردستانێ تێك دەین، نەشێن، هوون نەشێن بهێن جارەكادی كوردستانێ داگیر بكەن، بەلێ ڤێجارێ مە پێدڤی ب وێ چەندێ نەبیت بچین شەڕی بكەین و بەرگریێ ژ مافێن خوە بكەین، ڤێجارێ پێدڤییە ئەڤ شەڕە ل جڤاتا نوونەران بهێتە كرن، پێدڤییە ڤێجارێ ئەڤ شەڕە ب شێوەیەكێ قانوونی بهێتە كرن، دڤێت ئەڤ خوشك وبرایە بچن ل بەغدا كارەكێ وەسا بكەن دەستوور وەك خوە بهێتە بجهئینان، فیدرالییەت بهێتە چەسپاندن، دیموكراسییەت بهێتە چەسپاندن، ئێدی رێ نادەین ئیراق بەر ب ناڤەندیبوونێ و دیكتاتۆریییەتێ وبۆ پاشڤە بزڤریت.
ئەوا جهێ دلخوەشیێیە خوشك و برایان، ل ڤێ بانگەشەیێ دبینین ل سەر ئاستێ هەموو كوردستانێ كو دهێتە كرن و گەلەك دلێ من یێ پێخوەشە كو دبینم گەلەك گەنجان روو ل پارتی كریە، ئەڤە مەزنترین ئومێدە بۆ پاشەرۆژا وەلاتێ مە. مە ژی بەرنامە هەیە بۆ گەنجان، دڤێت گەنجێن مە ژیانەكا باشتر و بەرختەوەرتر هەبیت، ئێدی چاڤەڕێ وێ چەندێ نەكەن بزانن بەلكو دێ شەڕ بیت یان خودێ نەكەت تشتەكێ نەچاڤەڕێكری رووبدەت، دڤێت گەنجێن مەژی وەك وەلاتێن پێشكەفتی، خودانێن دەلیڤەیێن وەكهەڤ بن بۆ كاركرنێ، خودانێن كارێن خوە بن، ژیارەكا هەژی هەبیت، ئەو ئومێد و باوەریێن وان هەین بشێن بكەنە راستی، پارتی دشێت هاریكارییا هەوە بكەت، چونكە مە چەندین پڕۆژە هەنە بۆ هاریكارییا گەنجان كو گەنج ب خوە بشێت هاریكارییا خوە بكەت. مخابن ل بەغدا هەتا نوكە ژی رێگری دهێتە كرن كو خەلك ل هەرێما كوردستانێ بهێتە دامەزراندن، هەتا ل كەركووكێ ژی ناهێلن خواندنا كوردی هەبیت و كێشە بۆ دورستكرینە مە بۆ هەموو گەنجان بەرنامە هەیە، بەلێ وان بەرنامەیان پێدڤی ب پشتەڤانییا هەوەژی هەیە، دشێین پێكڤە بەرنامەیێن سەربێیخین، دشێین پێكڤە ئەجیندایێن خوە بكەینە راستی، چاوان پێشتر ئەو تشتێن كو ب دیتنا خەلكی خەونن و مە كرنە راستی، ڤێجارێ ژی ب پشتەڤانییا هەوە، ب باوەرییا هەوە ب پارتی و بەربژارێن پارتی، ب سەرئێخستنا لیستا 275، دشێین وان خەونێن میان بكەینە راستی.
داخوازێ ژ هەوە دكەن ل رۆژا هەلبژارتنان، ئەم هەموو پێكڤە بچینە سەر سندووقێن دەنگدانێ، ئەم و كەسوكارێن مە، دۆست و نیاسێن خوە پالدەین بچن بۆ دەنگدانێ، ئافرەتێن خوەشتڤی، خوشك و دایكان، هوون نیڤا جڤاكی نە، دزێت هوون ژی هاریكارییا مە بكەن، دەنگی بدەنە خزبا خوە، دەنگی بدەنە باوەرپێكریێن خوە، دەنگی بدەنە لیستا 275 یا پارتی دیموكراتی كوردستان، بەر ب سەركەفتنێ، بەر ب هەلبژارتنێن سەركەفتی بۆ پارتی دیموكراتی كوردستان.

دیدار، هۆشەنگ تاجر:

نڤیسەرەکێ ناڤدار یێ رۆژئاڤایێ کوردستانێ دیار دکەت، دەنگدان ب لیستا ٢٧٥ یا پارتی دیموکراتی کوردستان ئەرکەک نەتەوەیی یە، دەنگدان ب لیستا سەرۆک بارزانی خوەدان دەرکەفتنە ژ شۆرەشا ئیلۆنێ و کۆمارا کوردستانێ و هەموو شۆرەشێن دی یێن کوردستانێ.

کۆنێ رەش نڤیسەرێ ناڤدار یێ رۆژئاڤایێ کوردستانێ د دیدارەکا تایبەت دا بۆ رۆژنامەیا ئەڤرۆ دیار کر، دەنگدان ب لیستا پارتی دیموکراتی کوردستان ئەرکەک نەتەوەیی یێ تاکێ کوردستانێ یە، چونکی لیستا ٢٧٥ لیستا نەتەویی یە، لیستا شۆرەش و بەرخوەدان و قوربانیدانێ یە، دەنگدان ب لیستا سەرۆک بارزانی خوەدان دەرکەفتنە ژ کۆمارا کوردستانێ، شۆرەشا ئیلۆنێ و هەموو شۆرەشێن دی یێن گەلێ کوردستانێ، کو کوردان ب هزاران قوربانی بۆ ئازادیێ دان و ئەڤرۆکە لیستا پارتی نوونەراتیا وان شۆرەشان و دەستکەفتیان دکەت.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دەنگدان ب لیستا ٢٧٥ دەنگدانە ب ئازادیا نها ل هەرێما کوردستانێ هەی، دەنگدانە ب پێکڤەژیانا ئازادانە یا هەموو ئایینان و پێکهاتەیێن ل هەرێما کوردستانێ کو ب سالانە پێکڤە دژین، چونکی ئەڤا نها ل هەرێما کوردستانێ هەی بەرهەمێ شۆرەش و قوربانیدانا گەلێ کوردستانێ یە ب سەرکێشیا پارتی دیموکراتی کوردستان و گۆت: (دەنگدان ب لیستا سەرۆک بارزانی دەنگدانە ب پێشمەرگەیێن ئازادیا کوردستانێ، ئەو پێشمەرگەیێن ب خوونا خوە شیان هەرێما کوردستانێ بپارێزن، ژ بەر ڤێ یەکێ ژی لیستا پارتی دیموکراتی کوردستان نها نوونەراتیا ئازادیێ، پێکڤەژیانێ، خزمەتێ و پێشکەفتنێ دکەت، دەمێ بەرێ خوە ددەمە لیستا ٢٧٥ یا پارتی ئەڤ هەموو تشتە دهێنە بەرچاڤێن من، ئانکو لیستا پارتی تنێ لیستەک ژ ناڤێ هندەک کەسان نینە، بەلکو بەرهەمێ خەبات و قوربانیدانا ب سالان یا گەلێ کوردستانێ یە).
نڤیسەرێ ناڤدار یێ رۆژئاڤایێ کوردستانێ ئەو یەک ژی دیار کر، دەمێ بەرێ خوە ددەمە لیستا ٢٧٥ یا پارتی مەشا دیرۆکی یا بارزانیێ نەمر بۆ سۆڤیەتا بەرێ دهێتە بیرا من، بەرخوەدانەکا بێ وێنە یا بارزانیێ نەمر ژ بۆ ئازادیا کوردستانێ دهێتە بیرا من، خەباتەکا مەزن یا ب سالان بۆ بدەستڤەئینانا مافێن رەوا یێن گەلێ کوردستانێ دهێتە بیرا من و گۆت: (لیستا سەرۆک بارزانی تنێ نوونەراتیا کوردان ناکەت، لیستا ٢٧٥ نوونەراتیا کوردان، ئێزدیان و هەموو نەتەوە و پێکهاتەیێن دی یێن ل هەرێما کوردستانێ دکەت، ب سالانە چەندین نەتەوە و پێکهاتەیێن جودا جودا ل هەرێما کوردستانێ پێکڤە د ناڤ ئازادیێ دا دژین و نها ژی لیستا ٢٧٥ یا پارتی دیموکراتی کوردستان نوونەراتیا وان هەموو نەتەوەیان و پێکهاتەیان دکەت و ژ بەر ڤێ یەکێ ژی دەنگدان ب لیستا پارتی د هەمان دەمی دا دەنگدانە ب ئازادیێ، پێکڤەژیانێ و خوەدان دەرکەفتنە ژ دەستکەفتیێن ل هەرێما کوردستانێ کو بەرهەمی خوونا ب هزاران پێشمەرگەیێن قارەمانە).
ناڤهاتی د دووماهیا ئاخڤتنا خوە دا ئەو یەک ژی دیار کر، ژ بۆ پێشکەفتنێن زێدەتر، ژ بۆ کوردستانەکا ئازاد، ژ بۆ خزمەتێن زێدەتر و ژ بۆ بەردەوامیا پێکڤەژیانێ و کوردستانە ئارام گرنگە هەموو دەنگدەرێن هەرێما کوردستانێ دەنگێ خوە بدەنە لیستا ٢٧٥ و گۆت: (پشتەڤانیێ ل لیستا ٢٧٥ دکەم و هیڤیدارم لیستا ٢٧٥ کو وەکو من گۆتی نوونەراتیا هەموو پێکهاتەیێ ل هەرێما کوردستانێ دکەت، بشێت د ڤان هەلبژارتنان دا سەرکەفتنەکا مەزن بدەستڤە بینیت، سەرکەفتنا لیستا پارتی دیموکراتی کورستان سەرکەفتنا کوردان و هەموو پێکهاتەیێن دی یێن هەرێما کوردستانێ یە، کو ب سالانە پێکڤە ب ئازادی دژین).

دوهی سێشەمبی 21/10/2025، ل باژێرێ هەولێرێ، سەرۆك بارزانی ل گەل پشكەك ژ خەلكێ هەولێرێ كۆمبوو.
د پەیڤەكێدا سەرۆك بارزانی خوەشحالییا خوە ب كۆمبوونێ دەربڕی و راگەهاند» دەمێ باسێ هەولێرێ دهێتە كرن ئانكو باسێ دیرۆكا چەند هزار سالێن ڤی وەلاتی دهێتە كرن و ئەڤرۆ هەولێر پایتەختە و جهێ ڤەحەویانا هەموو لێقەومایەكی و هەموو ئازادیخوازەكییە».
د پەیڤا خوە دا سەرۆك بارزانی باس ل هەلبژارتنێن خولا شەشێ یا جڤاتا نوونەرێن ئیراقێ كر و ئاماژە ب وێ چەندێ كر هەموو هەلبژارتن د گرنگن و سەبارەت مە تشتەكێ مەبدەئییە و مە باوەری ب وێ چەندێ هەیە كو مللەت بڕیارێ ل چارەنڤیسێ خوە بدەت هەروەكو ل مەها ئادارا 1991 ل دەمێ سەرهلدانێ ل كۆیە من داخوازكری هەلبژارتن بهێنە ئەنجامدان و مللەت بڕیارا خوە بدەت.
سەرۆك بارزانی دوپاتكر كو پێدڤییە هەلبژارتنێن پاقژ د سەقایەكێ ئارامدا بهێنە ئەنجامدان.
هەروەسا سەرۆك بارزانی باس ل قووناغێن هەلبژارتنان كر ل ئیراقێ ژ سالا 2005 و هەتا نوكە سەرەرای بەرچاڤكرنا سەرنج و تێبینییان ل سەر قانوونا نوكە یا هەلبژارتنان ل ئیراقێ، دوپاتكر ژی كو ژ بەر بەرژەوەندییا گشتی دێ پشكداریێ د هەلبژارتناندا كەین و هیڤیدارین پشتی ڤان هەلبژارتنان گوهۆڕین بهێنە كرن و خەلكەك بهێت كو هەست ب بەپرسیارەتیێ بكەت و چارەسەرییا كێشەیان بهێتە كرن.
سەرۆك بارزانی بۆ بەرهەڤبوویان گوت» هەلوەست و بۆچوونا هەوە گەلەك یا گرنگە و هەموو تشت یێن ل بەرچاڤێن هەوە و ئەوا هوون ب باش دزانن بۆ هەولێرێ و كوردستانێ و ئیراقێ ژی، هوون وێ بڕیارێ بدەن».
ل دۆر كاروانێ ئاڤەدانیێ و پڕۆژەیێن خزمەتگوزاری، سەرۆك بارزانی گوت» گەلەك پڕۆژە یێن هاتینە ئەنجامدان، ئەڤە منەت تێدا نینە و ئەو كارێ حوكمەتێیە، پارتی بۆ وێ چەندێ دروست بوویە خزمەتا ڤی مللەتی بكەت، پارتی هەر چ بكەت بۆ ڤی مللەتی و بۆ هەولێرێ هێشتا كێمە».
هەر د پەیڤا خوە دا سەرۆك بارزانی هەلوەستێ مەردانە و دۆستانەیێ خەلكێ هەولێرێ باسكر ل دەمێ پرۆسەیا ئەنفالا بارزانییان و ئەنفالا سالا 1988 و راگەهاند» هیچ دەمەكی قەنجییا خەلكێ هەولێرێ ناهێتە ژبیركرن و هەتا ماینە قەردارێن هەوەینە».
هەروەسا سەرۆك بارزانی راگەهاند» هەولێر باژێرێ پێكڤەژیانێیە، فەرهەنگا پێكڤەژیانێ فەرهەنگەكا زەنگینە و ئەم پێ د سەربلندین و ب هێزترین چەك بوویە د دەستێ مەدا ل دەرڤە و ل هەموو ناڤەندێن نێڤدەولەتی كو شانازیێ پێ دكەین و پێدڤییە ئەڤ فەرهەنگە بۆ نڤشێن داهاتی ب بهێتە ب هێزتركرن».
سەبارەت هەڤبەندیێن هەولێرێ و بەغدا سەرۆك بارزانی گوت» مە وەسا هزر دكر پشتی 2003 دێ دەلیڤەیەكا زێرین هێتە پێش كو هەموو تاكەكێ ئیراقی بگەهیتە ماف و ئەركێ خوە لەوما چووینە بەغدا و ب هەموو نیەتەكا پاقژ مە بزاڤكر تاكو گەهشتینە قووناغا بەرهەڤكرنا دەستووری ل سالا 2005 كو بۆ وی دەمی و نوكە و پاشەڕۆژێ ژی پشكا وێ چەندێ تشتێن ئەرێنی تێدانە كو كار پێ بهێتە كرن و مفا ژێ بهێتە وەرگرتن و ئەم پشتەڤانییا وی دەستووری دكەین بەلێ مخابن ژ ئالیێ حوكمەتا بەغدایێ ڤە نەهاتە بجهئینان، نوكە ژی گەلەك تشتێن كو پەیوەندی هەیە ب هەرێما كوردستانێ و ب قانوونێن رژێما بەعس ڤە حوكم دكەن».
سەبارەت وێ چەندێ كو ئیراق وەلاتەكێ فرەنەتەوە و فرە مەزهەب و فرەئایینە، سەرۆك بارزانی باس ل بزاڤان بۆ چەسپاندنا مافێن پێكهاتەیان د دەستووریدا كر و راگەهاند» هەكە كورد نەبان، ب نیاز نەبوون وێ بڕگەیێ د دەستووریدا بچەسپینن».
سەرۆك بارزانی هیڤی خواست هەموو ئالی بزڤرن بۆ دەستووری و كێشە بهێنە چارەسەركرن و ئێدی مافێن دەستووری و قانوونی یێن خەلكێ كوردستانێ نەهێتە بنپێكرن.
هەر د وێ كۆمبوونێدا سەرۆك بارزانی دوپاتی ل بەردەوامییا برایەتی و پێكڤەژیانێ كر و د وی چارچۆڤەیدا باس ل سەردەمێ شۆڕشا ئیلۆنێ كر كو عەرەب و مەسیحی و توركمان د سەركردایەتییا شۆڕشێدا بوون.
ل دۆر رەوشا كوردستانێ و پرسا پێكئینانا حوكمەتا نوو، سەرۆك بارزانی دوبارە دوپاتكر كو بەری هەلبژارتنێن جڤاتا نوونەرێن ئیراقێ حوكمەتا نوو بهێتە پێكئینان.
د پشكەكا دی یا وێ كۆمبوونێدا سەرۆك بارزانی ئاماژە ب وان پڕۆژەیێن ستراتیژی كر كو ل هەرێما كوردستانێ دهێنە بجهئینان و ب تایبەت دروستكرنا بەنداڤان كو دێ كاریگەرییەكا مەزن هەبیت د پاراستنا ئاڤێدا ل كوردستانێ و روو ب رووبوونا قەیرانا ئاڤێ ل پاشەڕۆژێ.
دوپاتی ژی ل پاراستنا ژینگەهێ و پێشڤەبرنا كەلتوورێ ژینگەهپارێزیێ كر.
ل دووماهیێ سەرۆك بارزانی گوت» ژ هەولێرێ و هەولێرییان فێری رەوشت و مرۆڤدۆستیێ و مەردایەتیێ دبین».

دوهی سێشەمبی 21/10/2025، ل پیرمام سەرۆك مەسعود بارزانی پێشوازی ل ئانل بۆرا ئینان، بالیۆزێ توركیا ل ئیراقێ كر.
د دیدارەكێدا كو ئێرمان تۆپچو، قونسلێ گشتیێ توركیا ل هەوێرێ ژی بەرهەڤبوو، باس ل رەوشا سیاسییا ئیراقێ و دەڤەرێ ب گشتی و هەلبژارتنێن داهاتی یێن جڤاتا نوونەرێن ئیراقێ هاتە كرن.
گرێدای ب هەرێما كوردستانێ ڤە دوماهی پێنگاڤ بۆ پێكئینانا كابینەیا نوو یا حوكمەتا هەرێما كوردستانێ وپ رۆسەیا هنارتنا پەترۆلا هەرێما كوردستانێ ب رێیا بەندەرێ جەیهان یێ توركی گەنگەشە ل سەر هاتە كرن.
هەڤبەندیێن د ناڤبەرا توركیا ل گەل ئیراقێ و هەرێما كوردستانێ تەوەرەكێ دی یێ ڤێ دیدارێ بوو، هەردو ئالییان دوپاتی ل بەردەوامی و پێشڤەبرنا هەڤبەندییێن د ناڤبەرا هەرێما كوردستانێ و توركیا د هەموو واراندا كر.

دوهی سێشەمبی 21/10/2025، نێچیرڤان بارزانی، سەرۆكێ هەرێما كوردستانێ، پێشوازی ل فەریقێ ئێكێ یێ رۆكن عەبدولئەمیر رەشید یارەللا، سوپاسالارێ ئیراقێ و شاندەكێ د گەلدا كر كو ژ هەمارەكا پلەدارێن بلند یێن لەشكری و ئەمنی پێكهاتبوو.
سەرۆكایەتییا هەرێما كوردستانێ بەلاڤكر» د كۆمبوونەكێدا كو سوپاسالارێ پێشمەرگەی و بەرپرسێن وەزارەتا پپێشمەرگە، بەرهەڤ بووین، هاریكارییا هەڤپشك یا لەشكرێ ئیراقێ و پێشەرگەی ل گەل هەڤپەیمانییا نێڤدەولەتی، هەروەسا هەڤبەندیێن لەشكری و ئەمنی یێن ئیراقێ و ئەمریكا د چارچۆڤەیێ رێككەفتنا دو ئالییانەیا ئەمنی د ناڤبەرا واندنا، مەترسیێن تیرۆرێ و رەوشا سووریێ، هاتنە گەنگەشەكرن.
هەردو ئالی هەڤڕا بوون كو داعشی هێشتا مەترسییەكا راستەقینەیە و گەفە ل ئاسایش و ئارامییا ئیراقێ و سووریێ. سەبارەت ڤێ چەندێ سەرۆكێ هەرێما كوردستانێ دوپاتكر كو ئیراق و هەرێما كوردستانێ بۆ بەرهنگاربوونا گەف و مەترسیێن تیرۆرێ و د چارچۆڤەیێ رێككەفتنێن ئەمنی یێن ئیراقێدا، هێشتا پێدڤی ب هاریكاری و پشتەڤانییا هەڤپەیمانییا نێڤدەولەتی هەیە.
سەرۆكێ هەرێمێ هەروەسا رێز بۆ رۆلێ لەشكرێ ئیراقێ د بەرقەراكرنا ئاسایش و ئارامیێ ل وەلاتێ هەبوو، هەروەسا ب هێزكرنا هاریكارییا هەڤپشك یا پێشمەرگەی و لەشكرێ ئیراقێ ب پێدڤی هەژمارت. ژ ئالیێ خوەڤە سوپاسالارێ ئیراقێ دوپاتكر كو نوكە هاریكاری د ناڤبەرا لەشكری وپێشمەرگەیدا د باشترین رەوشدایە و ل دۆر ڤێ چەندێ رۆلێ سوپاسالارێ پێشمەرگەی بلند هەلسەنگاند.
پاراستنا ئاسایشا سنووری و رەوشا دەرگەهێن سنووری ب تایبەتی د ناڤبەرا سووریێ و ئیراقێدا، ب دوماهیهاتنا ئەركێ هەڤپەیمانییا نێڤدەولەتی ل ئیراقێ ل ئیلۆنا 2026 و رەوشا پشتی ڤێ قووناغێ، تەوەرەكێ دی یێ كۆمبوونێ بوو.