ئەڤرۆ، ھۆشەنگ تاجر:

ب دەستپێشخەریا نۆم چۆمسکی زانایێ ناڤدارێ ئەمریکی و ھژمارەک کەساتیێن ناڤدار و خوەدان خەلاتێ نوبل یێ ئاشتیێ ل 30 وەلاتێن جیھانێ خوەنیشادان بۆ کۆبانێ ھاتنە کرن و پشکداربوویێن خوەنیشادانان دیار کرن کو کۆبانێ بوویە سیمبۆلا مرۆڤاتیێ ل ھەمبەر شەرێ تیرۆرێ و دڤێت ل ھەموو جھەکێ خەلک پشتەڤانیێ ل بەرخوەدانا کۆبانێ بکەن.
ئاژانسا رویترز و گەلەک دەزگەھێن دی یێن راگەھاندنێ دیار کرن کو ب دەستپێخەریا نۆم چۆمسکی زانایێ ناڤدارێ ئەمریکی و ئەلدولف بریسی یێ ئەرجەنتنی و خوەدانێ خەلاتا نۆبل و ھژمارەک چالاکڤانێن ناڤدار ئێکێ مەھا 11 واتە دوھی وەک رۆژا جیھانی یا کۆبانێ ب چالاکیان ل 30 وەلاتێن جیھانێ و 93 باژاران ھاتە پیرۆز کرن و پشکداربوویێن خوەنیشادانێ دیار کرن کو کۆبانێ بوویە سیمبۆلا شەرێ روناھیێ ل ھەمبەر تاریتیێ و بەرخوەدانا کوردان ل کۆبانێ بەرخوەدانا مرۆڤاتیێ یە ل دژی کۆلەتیێ.
ل باژارێ بەلخ ل ئەفغانستانێ ب ھزاران وەلاتیێن ئەفغانی خوەنیشادانەک ل پێشبەری نوونەراتیا نەتەوێن ھەڤگرتی ل وی وەلاتی ساز کرن و ب دروشمێن کۆبانێ سیمبۆلا بەرخوەدانا مرۆڤاتیێ یە ل دژی زۆرداریێ داخواز ژ نەتەوێن ھەڤگرتی کرن کو ب ھەموو رەنگەکێ ھاریکاریا ئاوارێن کۆبانێ بکەن یێن کو ژ بەر زۆرداریا داعشێ ل تورکیا ئاکنجی بووینە و ھەروەسا داخواز ژ وەلاتێن ھەڤپەیمان ژی کرن کو ب رەنگەکێ دژوار ھێرش بنگەھێن داعشێ ل کۆبانێ بکەن دا کو ئەو رێکخراوا تیرۆرستی ل کۆبانێ ژناڤ بچیت و کۆبانێ بھێتە ئازادکرن.
ل وەلاتێ ھندێ ژی ب ھزاران وەلاتی خوەنیشادانەک ساز کرن و پشتەڤانیا خوە بۆ گەلێ کورد و بەرخوەدانا کۆبانێ دیار کرن و راگەھاندن کو داعش دۆژمنێ ھەموو مرۆڤاتیێ یە و ئەڤرۆکە کورد و ب تایبەتی ژی باژارێ کۆبانێ ل سەر ناڤێ مرۆڤاتیێ ل دژی تیرۆرا داعشێ شەری دکەن و بەرخوەدانیێ دکەن و ئەرکێ ھەموو جیھانێ یە کو خوەدان ل کۆبانێ دەربکەڤن و پشتەڤانیێ ل وی باژاری بکەن و نابیت ب چو رەنگەکی کۆبانێ بکەڤیتە دەستێ تیرۆرستێن داعشێ.
ل باژارێ پاریس ژی ب ھزاران خوەنیشادەران پشتەڤانیا خوە بۆ کۆبانێ دیار کرن و ھەروەسا نەرازیبوونا خوە ل ھەمبەر ھەلویستێ تورکیا یێ ل ھەمبەر کۆبانێ دیار کرن و داخواز ژ سەرۆک کۆمارێ تورکیا کرن کو رێ بدەت دا ھاریکاریێن سەربازی و مرۆڤی ب ساناھی بگەھنە دەستێ شەرڤانێن کورد، و د خوەنیشادانێ دا ب سەدان خەلکێ فرەنسا ژی دیار کرن کو ئەو بەرھەڤن بچنە کۆبانێ و شەرێ داعشێ بکەن، چونکو داعش ل کۆبانێ شەرێ مرۆڤاتیێ دکەت و خەلکێ کورد ل کۆبانێ ژی ل سەر ناڤێ جیھانێ شەرێ تیرۆرێ دکەن و داخواز ژ فرەنسا و وەلاتێن دی یێن ئورۆپا کرن کو ب ھەموو رەنگەکی ھاریکاریا کوردان بکەن و وان ب تنێ نەھێلن.
پشتی خوەنیشادانێ سەرۆک فرەنسا ژی د پرێس کۆنفرانسەکی دا دیار کر کو فرەنسا بزاڤێن مەزن کرینە و ئەو ھاریکاریا نھا بۆ کۆبانێ دھێتە کرن ئێکە ژ بەرھەمێ بزاڤێن مە یێن دبلۆماسی و مە ژ بۆ سەرۆک کۆمارێ تورکیا ژی دیار کر کو کۆبانێ بۆ مە گەلەک گرنگە و دڤێت تورکیا ژی ھەموو ئاسانکاریان بکەت دا ھاریکاری بگەھنە دەستێ خەلکێ کۆبانێ.
ل ئەمریکا، ئوسترالیا و ئیرانێ و گەلەک وەلاتێن دی یێن جیھانێ خوەنیشادانێن پشتەڤانیێ بۆ کۆبانێ ھاتە کرن و ل تورکیا ژی خوەنیشادان ل گەلەک باژاران ھاتنە کرن، لێ پۆلیسێن تورکیا ھێرشی خوەنیشادەران کرن و گەلەک ژ وان ھاتنە گرتن و ھژمارەک وەلاتێن کورد و تورک ژی ھاتنە بریندارکرن. وەزیرێ ناڤخوە یێ تورکیا ژی دیار کر کو دەستووری بۆ ڤان خوەنیشادانان نەھاتبوونە دان و ب رەنگەکی نەقانوونی ھاتینە کرن و ژ بەر وێ یەکێ ژی ھێزێن مە نەچار بوون کو دەستێوەردانێ د خوەنیشادانان دا بکەن و ل تورکیا چو ھێزەک نەشێت بێی رزامەندیا حوکمەتێ خوەنیشادانان بکەت و رەوشا وەلاتێ مە ئالۆز بکەت.