ئه‌ڤرۆ نيوز: نيوار محه‌مه‌د سه‌ليم:

پشتى ب دووماهى ئينانا ئه‌ركێن حه‌جێ، حه‌جيه‌كێ دى يێ پارێزگه‌ها دهۆكێ ل سعوديێ چو به‌ر دلۆڤانيا خودێ.

مه‌ريوان نه‌قشه‌به‌ندى ئاخفتنكه‌رێ ب ناڤێ وه‌زاره‌تا ئه‌وقافا حوكمه‌تا هه‌رێما كوردستانێ و سه‌رپه‌رشتێ تيما راگه‌هاندنا حه‌جيان راگه‌هاند كو شه‌ڤا بۆرى حاجى “داود مسته‌فا قاسم” كو خه‌لكێ پارێزگه‌ها دهۆكه‌ و ژ دايكبوويێ 1955 يه‌ و ب ڤێ چه‌ندێ ژى دبيته‌ حه‌جيێ سيێ ل هه‌رێما كوردستانێ و يێ دويێ ل دهۆكێ گيانێ خوه‌ ژ ده‌ست دده‌ت.

خۆيا ژى كر كو پشتى ل حه‌ره‌مێ مه‌ككێ نڤێژا مريان ل سه‌ر كرى، ل باژێرێ مه‌ككێ ب ئاماده‌بوونا رێڤه‌به‌رێ ئه‌وقافا دهۆكێ هاته‌ ڤه‌شارتن.

به‌رى نوكه‌ ژى هه‌ڤژينا ڤى كه‌سى خه‌ديجا شه‌عبان ل رۆژا 26\9\2014 چووبوو به‌ر دلۆڤانيا خودێ و ل باژێرێ مه‌ككه‌ها پيرۆز هاتبوو ڤه‌شارتن.

رۆژا پێنجشه‌مبى 9\10 كاروانێ ئێكێ يێ حه‌جيێن كوردستانێ دێ ژ وه‌لاتێ سعوديێ ڤه‌گه‌ريته‌ هه‌رێما كوردستانێ.

ئه‌ڤرۆ نیۆز: KDP.info-DW
پشتى هه‌یڤه‌كێ ل سه‌ر بڕیارا حوكمه‌تا ئه‌لمانى ل دۆر هنارتنا چه‌ك و كه‌لوپه‌لێن له‌شكرى بۆ هه‌رێما كوردستانێ، راهێنه‌رێن ئه‌لمانى ده‌ست ب مه‌شق و راهێنانكرنا هژماره‌كا پێشمه‌رگه‌یان ل نێزیكى هه‌ولێرێ سه‌باره‌ت چه‌وانیا بكارئینانا چه‌كێ پێشكه‌فتى دژى تیرۆرستێن داعشێ كرن.
راهێنه‌رێن ئه‌لمانى ل رێككه‌فتى 6 /10 / 2014 ده‌ست ب وانه‌یێن مه‌شق و راهێنانا پێشمه‌رگه‌ى ل بنگه‌هێ له‌شكرى ێ (به‌نسلاوا) ل هولێرا پایته‌خت كرن.
ل به‌راهیێ ده‌ست ب وانه‌یێن تیورى كرن، ئه‌ڤه‌ژى بۆ جارا ئێكێ یه‌ پشتى شه‌رێ جیهانیێ دوێ سه‌باره‌ت وه‌لاتێ ئه‌لمانیا كو پشكداریه‌كا ب ڤى ره‌نگى بكه‌ت، سه‌ره‌راى كو به‌رلین پشكداریا د هێرشێن ئه‌سمانى ل سه‌ر بنگه‌هێن داعشێ ره‌تكر بوو.
هه‌ڤده‌م هاریكاریا وه‌لاتێ ئه‌لمانى ب هزران پارچێن چه‌كى یێن هێرشكرنێ و فیشه‌ك و چه‌كێ گران ژى بتایبه‌تى ره‌شاش دوشكه‌ و موشه‌كێن دژى تانك و مووشه‌كێن دوور هاڤێژ بۆ هه‌رێما كوردستانێ ره‌وانه‌كرینه‌.
راهێنه‌ر میجۆر فلوریان ئاران یێ ئه‌لمانى گۆت: پێشمه‌رگه‌ یێن نوكه‌ دمه‌شقێ دا شاره‌زایه‌كا مه‌زن هه‌یه‌، بتنێ رۆلێ مه‌ ل سه‌ر چه‌وانیا بكارئینانا چه‌كێ نوو یێ پێشكه‌فتى مایه‌، زێده‌بارى دیاركر، پێشمه‌رگه‌ شاره‌زایه‌كا مه‌زن ل سه‌ر بكارئینانا چه‌كێ كلاشینكوفێ هه‌یه‌ به‌لێ چو پێزانێن ل دۆر چه‌كێ نوو یێ ئه‌لمانى نینه‌.
هه‌روه‌سا ئه‌فسه‌رێ پێشره‌و كاروان بابان گۆت: نوكه‌ راهێنان ل سه‌ر شێوێ گرۆپان دهێته‌ ئه‌نجامدان كو هه‌ر گرۆپه‌ك ژ 30 كه‌سان پێكدهێن.

ئه‌ڤرۆ نيوز:

ژێده‌ره‌كى بۆ مالپه‌رێ ئه‌ڤرۆ نيوز دياركر كو به‌رپرسێ لقا 8 پا پارتى ديموكراتى كوردستان سه‌ربه‌ست له‌زگين بريندار بوو و شۆفێره‌كێ وى گيانێ خوه‌ ژ ده‌ست دا.

ئه‌ڤرۆ دانێ مه‌غره‌ب ل گۆنده‌كێ عين فه‌ره‌ج ل نێزيك پرديا بۆمبه‌كا چاندى د رێيا وان دا په‌قى و ئه‌نجامێ ڤێ چه‌ندێ دا، ئێك ژ شۆفێرێن سه‌ربه‌ست له‌زگين ب ناڤێ خورتۆ نائف سندورى گيانێ خوه‌ ژ ده‌ست دا و هه‌ر ئێك ژ سه‌ربه‌ست له‌زگين به‌رپرسێ لقا 8 يا پارتى ديموكراتى كوردستان و ته‌حسين كه‌مه‌كى ئێكه‌ ژ فه‌رماندێن له‌شكرێ كوردستانێ سه‌ر ب وه‌زاره‌تا پێشمه‌رگه‌ى ڤه‌.

ل دووڤ ئه‌و پێزانينێن ب ده‌ست ئه‌ڤرۆ نيوز كه‌فتين، ره‌وشا سه‌ربه‌ست له‌زگين و ته‌حسين كه‌مه‌كى يا باشه‌.