چاڤدێرەكێ سیاسی دبێژیت، هەڤوەلاتیێن كوردستانێ ل رۆژا 20 ئۆكتۆبەرێ ب دەنگدانا خوە بۆ پارتی دیموكراتی كوردستان، ئەو حزبە ل سەر ئاستێ ناڤخوە و هەرێمایەتی و نێڤدەولەتی ب هێز هێلا، هەروەسا دیاركر: نوكە دەمێ وێ چەندێیە حزبێن سەركەفتی د هەلبژارتناندا حوكمەتەكێ پێكبینن كو ب هێز كارێن خوە بكەت بۆ ڤەژاندنا ئابووری و دانوستاندنێن جدی ل گەل بەغدا و ب هێزكرنا دیپلۆماسیەتا هەرێما كوردستانێ ل گەل وەلاتێن جیهانێ.
د.سامان شالی، چاڤدێرێ سیاسی و شارەزایێ پەیوەندیێن نێڤدەولەتی گۆت» ل هەلبژارتنێن 20 ئۆكتۆبەرێ یێن پەرلەمانێ كوردستانێ، پارتی وەكو هێزا ئێكێ ما، ئەڤە ژی یا گرنگە بۆ ئاشایش و ئارامییا هەرێما كوردستانێ، پارتی سۆزا وێ چەندێ ب هەڤوەلاتییان دابوو، كوردستانێ ب هێزتر بكەت و گرنگیێ ب داهاتێ ناڤخوە بدەت ژ روویێ چاندنێ و پیشەسازیێ و گەشتوگوزارێ».
شالی گۆت ژی» سەركەفتنا پڕۆسەیا هەلبژارتنان بۆ جڤاكێ نێڤدەولەتی یا گرنگە بوو، كو هێزەكا دیموكراتی وەكو پارتی، ب هێز بمینیت و پەیوەندیێن هەرێما كوردستانێ ل گەل وەلاتێن جیهانێ پێشڤە ببەت، ل سالێن بۆری ل سەر دەستێ سەرۆكێ هەرێمێ و سەرۆكێ حوكمەتێ، ئەو پەیوەندییە هاتبوونە پێشڤەبرن».
رۆهنكر ژی» یا گرنگە پەیوەندیێن ناڤخوەیی زێدەتر بهێنە پێشڤەبرن و ببیتە چەترەك بۆ هەموو حزبان، حوكمەتەكا ب هێز بهێتە دروستكرن، هەروەسا دانوستاندنێن ب هێز ل گەل حوكمەتا بەغدا بهێنە دەستپێكرن بۆ وەرگرتنا هەموو مافێن خەلكێ كوردستانێ، كو د دستووریدا ئاماژە بۆ هاتییە كرن».
د. سامان شالی ئەوژی گۆت» پێدڤییە حوكمەتا داهاتی یا هەرێمێ پێنگاڤێن هوور بۆ دوورئێخستنا هەرێما كوردستانێ ژ وی شەڕێ ل دەڤەری هەی، گۆتارا حوكمەتا داهاتی گەلەك یا گرنگە، پێدڤییە پەرلەمان كار ل سەر وێ چەندێ بكەت شەرعییەتێ بدەتە هەموو دەزگەهێن كوردستانێ، لەوما دڤێت ب زووەترین دەم حوكمەت بهێتە پێكئینان، بێگومان پارتی ژی دێ رۆلێ سەرەكی تێدا هەبیت، ب باوەرییا من پارتی وەكو هەموو جاران بۆ پاراستنا ئاسایشا كوردستانێ، ژ بەهرا خوە دێ بۆ ئالیێن دی تەرخان كەت و لەز د پێكئینانا حوكمەتێدا هێتە كرن».

ب فەرمانا وەزارەتا ناڤخوە یا تورکیا هەڤسەرۆکێ باژێرڤانیێن سێ باژێڕێن باکورێ کوردستانێ ژ کاری هاتنە دوورخستن و ل جهێ وان قەیووم هاتنە دانان، ئەحمەد تورک ژی نەرازیبوونا خوە ل هەمبەر دانانا قەیوومان دیار کر و راگەهاند ب دانانا قەیوومان پرسا کوردی ل تورکیا ناهێتە چارەسەرکرن.

دوهی ب فەرمانا وەزارەتا ناڤخوە یا تورکیا هەڤسەرۆکێن باژێرڤانیێن مێردین، باتمان و خەلفەتی یێن باکورێ کوردستانێ ژ کاری هاتنە دوورخستن و ب جهێ وان قەیومان هاتنە دانان، ئەحمەد تورک هەڤسەرۆکێ باژێرڤانیا مێردینێ کو ب جهێ وی قەیوما هاتیە دانان بۆ دەزگەهێن راگەهاندنا تورکیا دیار کر، دەستهەلاتا نها یا تورکیا بەحسێ ئاشتیێ و چارەسەرکرنا پرسا کوردی دکەت، لێ د هەمان دەمی دا رێزێ ل ئیرادا گەلێ کورد ناگریت، دانانا قەیومان ئانکۆ بێ رێزی بەرامبەر ب دەنگێ خەلکی یە، لێ ئەم ل هەمبەر زۆلم و زۆرداریا دەستهەلاتا نها و سیاسەتا قەیومان بێدەنگ نابین و دێ خەباتا مە بۆ ئازادیێ و ئاشتیێ ل تورکیا یا بەردەوام بیت.
ئۆزگور ئۆزەل سەرۆکێ گشتی یێ پارتا کۆماریا گەل ژی دیار کر، مخابن دەستهەلاتا نها شەرمێ ژ خوە ناکەت، رێزێ ل ئیرادە و دەنگێ خەلکی ناگریت، ڤان رۆژان بەحسێ براتیا کورد و تورکان دکەن، ئەردۆغان دبێژیت کۆماریا تورکیا چەند یا تورکان بیت وەسا یا کوردانە ژی، لێ رێزێ ل دەنگێ وەلاتیێن کورد ناگریت و ب دانانا قەیومان پرسێن هەی ئالۆزتر لێ دکەت و گۆت: (وەکو پارتا کۆماریا گەل ئەم ب توندی دانانا قەیومان بۆ سێ باژێران شەرمزار دکەین و ئەو یەک نیشا ددەت ئەردۆغانی نەڤێت پرسا کوردی ل تورکیا چارەسەر بکەت، چو پرۆژەیێن دەستهەلاتێ ژی بۆ چارەسەرکرنا پرسا کوردی نینن، مخابن ب دانانا قەیومان جارەکا دی دەستهەلاتێ نەڤێت ئاشتی و ئارامی ل تورکیا هەبیت و بێگومان ئەڤ سیاسەتە دێ تورکیا تووشی قەیرانەکا دی یا مەزن کەت).
چاڤدێرێن سیاسی ژی ل تورکیا و باکورێ کوردستانێ دیار دکەن، دانانا قەیومان دربەکا گەلەک مەزن بوو ل ڤێ قۆناغێ کەفتی، چونکی هیڤیەکا نوو ل دەڤ کوردان ل تورکیا هەبوو کو دبیت جارەکا دی قۆناغا ئاشتیێ ل تورکیا دەستپێ بکەت و دووماهی ب شەڕێ چەندین سالان ل تورکیا بهێت، لێ ب دانانا قەیومان هاتە سەلماند کو چو پرۆژەیێن دەستهەلاتا ئەرۆغانی بۆ چارەسەرکرنا پرسا کوردی نینن، بەلکو دەستهەلاتێ دڤێت ل ژێر ناڤێ ئاشتیێ جارەکا دی کوردان بخاپینیت و نەهێلیت ئەو ببنە مفادارێن گوهۆڕینێن نها ل دەڤەرێ، ژ بەر ڤێ یەکێ ژی نها باوەریا کوردان ب گۆتنێن ئەردۆغانی نەماینە و دانانا قەیومان دێ کاریگەریەکا خوە یا گەلەک خراب ل رەوشا نها یا تورکیا کەت، ئەو یەک دێ زیانەکا خوە یا مەزن بۆ دەستهەلاتێ ژی هەبیت.

سەرۆكێ حوكمەتا هەرێما كوردستانێ، پێشوازی ل قۆنسلێ گشتیێ دەولەتا ئیماراتێ ل هەرێما كوردستانێ كر كو ب هەلكەفتا دووماهی هاتنا ئەركێ وی، سەرەدانا سەرۆكێ حوكمەتا هەرێمێ كربوو.
دوهی ئێكشەمبی 3/11/2024، مەسرور بارزانی، سەرۆكێ حوكمەتا هەرێما كوردستانێ ، پێشوازی ل ئەحمەد ئەلزاهری، قۆنسلێ گشتیێ دەولەتا ئیماراتێ ل هەرێما كوردستانێ كر كو ب هەلكەفتا ب دووماهی هاتنا ئەركێ وی، سەرەدانا سەرۆكێ حوكمەتێ كربوو.
سەرۆكێ حوكمەتا هەرێما كوردستانێ سەرەرای ئاماژەدانێ ب پەیوەندیێن ب هێز د ناڤبەرا هەرێما كوردستانێ و ئیماراتێ دا، سوپاسییا قۆنسلی ژی كر كو ل ڤان سالێن دووماهیێ، رۆلەكێ گرنگ د پێشڤەبرنا پەیوەندیێن دو ئالیدا هەبوو.
قۆنسلێ گشتیێ ئیماراتێ، پەیوەندیێن د ناڤبەرا وەلاتێ خوە و هەرێما كوردستانێ ب ستراتیژی هەژمارتن و دوپاتی ل ب هێزكرنا هاریكاریێ و هەماهەنگیێ د ناڤبەرا هەردو ئالییاندا د وارێن جودا جودا دا كر.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: پڕۆژەیێ (هەژمارا من) گەلەك ژ (تەوتین) ێ بەرفرەهترە و هیچ كێشەیەكا تەكنیكی و قانوونی تێدا نینە. هەروەسا دبێژیت: ئەوا دهێتە كرن تنێ بۆ مەبەستا سیاسی و تێكدانێیە، ئەگەر نە حوكمەتا ئیراقێ هەڤشێوەی بانكێن دی دێ مامەلێ ل گەل بانكێن هەژمارا من كەت، لەوما پڕۆسە هەتا دووماهیێ دێ بەردەوام بیت.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ل دۆر پڕۆژەیێ (هەژمارا من) گۆت» ئەو پڕۆژەیە د بەرژەوەندییا فەرمانبەر و مووچەخۆرێن هەرێما كوردستانێ دایە و گەلەك ژ (تەوتین) ێ بەرفرەهترە و فەرمانبەر دێ زێدەتر مفای ژێ وەرگرن، ئەو بانكێن كو د ڤی پڕۆژەیدا هەین، هەموو ل بانكا ناڤەندی د تۆمار كرینە و ئیراق ژی ب وی پڕۆژەی یا رازی یە و هیچ گرفتەك نینە، لەوما پڕۆسەیا تۆماركرنا فەرمانبەران ژی د وێ پڕۆژەیدا یا بەردەوامە و هەژمارەكا مەزن یا فەرمانبەرخوە تۆمار كریە و حوكمەتا هەرێما كوردستانێ ژی یا رژدە ل سەر وێ چەندێ كاركرن ل سەر پڕۆژەی هەتا دووماهیی یێ بەردەوام بیت».
د. ڤیانێ ئەوژی گۆت» جهێ داخێیە ئالییەكێ سیاسی ل جڤاتا نوونەرێن ئیراقێ ب هاریكارییا هندەك پەرلەمانتاران ئیمزا كۆمكرینە بۆ وێ چەندێ (هەژمارا من) نەمینیت و مووچەخۆرێن هەرێما كوردستانێ بهێنە تەوتین كرن، كو ڤێ چەندێ هیچ بەرژەوەندییا فەرمانبەر و مووچەخۆرێن هەرێما كوردستانێ تێدا نینە و ئەوا دهێتە كرن بۆ مەبەستەكا سیاسییە، ئەگەر نە پڕۆژەیێ (هەژمارا من) پڕۆژەیەكێ گەلەك گرنگە و دان پێدان ژی یا پێ هاتییە كرن، لەوما ئەو بزاڤێن دهێنە كرن بۆ دژایەتیكرنا وی پڕۆژەی، دێ شكەستنێ ئینن، ژ بەر كو یا دیارە ئارمانجا دژایەتیكرنا پڕۆژەی بۆ لاوازكرنا هەرێما كوردستانێیە، كو ئەڤە ژی ب هیچ جۆرەكی جهێ قبوولكرنێ نینە».
سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ئاماژە كر» پڕۆژەیێ (هەژمارا من) ژ روویێ قانوونی و تەكنیكیڤە هیچ گرفتەك نینە، بەلێ مەبەستا وان تێكدانە، چونكە د هەلبژارتناندا نەشییان ئەوا وان دخوازت ب دەستڤەبینن، نوكە یێن هاتین ب هەر جۆرەكێ بیت دژایەتییا هەرێما كوردستانێ بكەن».
دوپاتكر ژی» ئەو بانكێن د ڤی پڕۆژەیدا د پشكدار، هیچ ژ وان یێن كەسی نینن و هەموو ئەو بانكن كو حوكمەتا ئیراقێ مامەلێ د گەلدا دكەت و هەڤشێوەیێ بانكێن دی د قانوونی نە، لەوما ئەوێن بانگەشەیا وێ چەندێ دكەن كو ئەو بانكە د كەسی نە، چ راستی بۆ نینە و بانكێن قانوونی نە و د تۆمار كرینە و حوكمەتا ئیراقێ مامەلە د گەلدا دكەت».

دوهی ئێكشەمبی 3/11/2024 فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدا ل گەل محەمەد تمیم، جێگرێ سەرۆك وەزیرێن ئیراقێ و وەزیرێ پلاندانانێ كۆمبوو.
د كۆمبوونێدا گەنگەشە ل سەر هندەك پرسێن تەكنیكی یێن تایبەت ب سەرژمێرییا گشتی یا ئاكنجیبوویان، زێدەباری تێبینیێن حوكمەتا هەرێما كوردستانێ ل سەر پڕۆسەیا سەرژمێریێ.
هەروەسا دوپاتی ل سەرچارەسەركرنا وان تێبینییان هاتە كرن، ژ وان ژی یێن گرێدای ب ئاوارەیان و دەربەدەركرییان و ل بەرچاڤوەرگرتنا وان د پڕۆسەیا سەرژمێریێدا كو دێ ل ڤێ مەهێ هێتە ئەنجامدان.
ژ ئالییەكێ دی ڤە باس ل بابەتێ هەژمارا فەرمانبەریێ یا فەرمانبەرێن هەرێما كوردستانێ و تمامكرنا بابەتێ بایۆمەتریێ و پێدڤییا ب لەز تمامكرنا وێ پڕۆسەیێ بەری دووماهییا ئەڤسالە.

هەولێر، قائید میرۆ

سەرۆكێ دەستەیا گشتییا دەڤەرێن كوردستانی یێن دەرڤەی ئیدارەیا هەرێما كوردستانێ راگەهاند، سەرژمێرییا گشتی یا ئاكنجیبوویان هەكە ب ڤی شێوەی بهێتە ئەنجامدان مەترسییە ل سەر دەڤەرێن كوردستانی و دبێژیت، كوردان مەرج بۆ ئەنجامدانا سەرژمێریێ ل دەڤەرێن كوردستانی یێن هەین و مەرجێن خوەژی پێشكێشی حوكمەتا ئیراقێ یێن كرین.
فەهمی بورهان، سەرۆكێ دەستەیا گشتییا دەڤەرێن كوردستانی یێن دەرڤەی ئیدارەیا هەرێما كوردستانێ بۆ رۆژنامەیا (ئەڤرۆ) گۆت « هەرێما كوردستانێ ل گەل ئەنجامدانا پڕۆسەیا سەرژمێرییا گشتییە ل ئیراقێ، بەلێ هەر ژ دەستپێكا ئەنجامدانا ئێكەم پڕۆسەیا سەرژمێریێ ل ئیراقێ كوردان ئەزموونەكا نەخوەش ل گەل سەرژمێریێ یا هەی و ناخوازین سەرژمێرییا ئەڤسالەژی وەكو یا سەردەمێ بەرێ ببیتە ئەگەرێ تێكچوونا رەوشا دەڤەرێن كوردستانی، كوردان تێبینی ل سەر ئەنجامدانا سەرژمێریێ ل دەڤەرێن كوردستانی یێن هەین و د كۆمبوونا سەرۆكایەتییا جڤاتا وەزیراندا مە داخوازیێن خوە كرینە رادەستی حوكمەتا ئیراقێ یێن كرین، كوردان مەرج بۆ ئەنجامدانا سەرژمێریێ ل دەڤەرێن كوردستانی یێن هەین، چونكە یا خویایە رەوشا دەڤەرێن كوردستانێ هەر ژ خانەقینێ هەتا شنگالێ نەهاتیسە ئاساییكرن و مادەیێ 140 ژ دستوورێ ئیراقێ نەهاتییە بجهئینان، ئەڤەژی ئەگەرەكە بۆ تێكدانا رەوشا وان دەڤەران، ب تایبەتی پشتی شەڕێ تیرۆرستێن داعشێ هەژمارەكا مەزن یا خەلكێ شنگالێ ئاوارەبووینە و نەكو تنێ ل هەرێما كوردستانێ ماینە و ڤەنەگەڕیاینە بۆ دەڤەرێن خوە و هندەك ژوان چووینە دەرڤەی وەلاتی، هەروەسا هەژمارەكا مەزن یا عەرەبێن هاوردە یێن هاتینە دەڤەرێن كوردستانی، ب تایبەتی ل كەركووكێ یێن هاتینە ئاكنجی كرن».
فەهمی بورهان گۆت ژی» مەرجێ كوردان و حوكمەتا هەرێما كوردستانێ ئەوە د دەمێ ئەنجامدان سەرژمێریێ هەموو ئاوارەیێن كەركووكێ و شنگالێ و دەڤەرێن كوردستانی ل هەر دەڤەرەكێ جێهگیرببن ل سەر دەڤەرێن خوە بهێنە تۆماركرن، هەروەسا عەرەبێن هاوردە یێن هاتینە كەركووك و دەڤەرێن كوردستانی ل سەر دەڤەرێن كوردستانی نەهێنە هەژماركرن بۆ گۆهۆڕینا دیموگرافییا وان دەڤەران، مە لیژنەیەكا بلند ل بەغدا یا هەی و چەندین جاران ژی شاندێ هەرێما كوردستانێ سەرەدانا بەغدا كریە بۆ ڤێ مەرەمێ، دانوستاندن د ناڤبەرا هەرێما كوردستانێ و حوكمەتا فیدڕالدا د بەردەوامن بۆ چارەسەركرنا وان گومانێن كوردان ل سەر پڕۆسەیا سەرژمێریێ هەین و وەزارەتا پلاندانانا ئیراقێ نوكە مژوولی چارەسەركرنا وان ئاریشایە، مە باوەری ب دانوستاندنان بۆ چارەسەركرنا هەر ئاریشەیەكێ یا هەی، لەوڕا ژی دێ چاڤەڕێی بەغدا كەین بۆ دیتنا چارەسەریێن پێدڤی و بەرچاڤ وەرگرتنا مەرج و داخوازیێن هەرێما كوردستانێ».

ب گۆڕەی بەیاننامەیەكا بارەگەهێ بارزانی، دوهی چارشەمبی 30/10/2024 سەرۆك مەسعود بارزانی ل سەلاحەدین پێشوازی ل ئەحمەد ئیبراهیم ئەلزاهری، قۆنسلێ گشتیێ دەولەتا ئیماراتێ ل هەولێرێ كر، ب هەلكەفتا ب دووماهی هاتنا ئەركێن وی و خاترخواستنێ سەرەدانا سەرۆك بارزانی كری.
د دیدارەكێدا سەرۆك بارزانی سوپاسییا ئەرك و وەستییانا قۆنسلێ گشتیێ دەولەتا ئیماراتێ ل هەولێرێ كر و هیڤییا سەركەفتنێ بۆ خواست.
هەر د وێ دیدارێدا دوپاتی ل پێشڤەبرنا پەیوەندییان و دۆستایەتیێ د ناڤبەرا گەلێ كوردستانێ و گەلێ ئیماراتێ هاتە كرن.

دوهی چارشەمبی 30/10/2024 نێچیرڤان بارزانی، سەرۆكێ هەرێما كوردستانێ، پێشوازی ل سەرۆك و ئەندامێن كۆمسیۆنا بلند یا سەربخوە یا هەلبژارتنان ل ئیراقێ و هەموو وان تیمێن كۆمسیۆنێ كر، كو سەرپەرشتییا هەلبژارتنێن پەرلەمانێ كوردستانێ كری و سەركەفتییانە پڕۆسەیا دەنگدانێ بڕێڤەبر.
نێچیرڤان بارزانی، سوپاسی و پێزانین بۆ ئەرك و كارێ كۆمسیۆنێ و بۆ پشتەڤانی و هاریكارییا سەرۆك وەزیرێن ئیراقا فیدرال و دەستهەلاتا داوەرییا ئیراقێ دوپاتكر و خزمەت و وەستییانا وان د ڕێڤەبرن و سەرئێخستنا هەلبژارتنێن پەرلەمانێ كوردستانێ بلند هەلسەنگاند، هەروەسا داكۆكی ل سەر وێ چەندێ كر كو ب هەموو پیڤەران، ئەڤ هەلبژارتنە بۆ هەرێما كوردستانێ گەلەك د گرنگ بوون.
سەرۆكێ هەرێما كوردستانێ ئاماژە ب وێ چەندێ ژی كر كو سەركەفتنا هەلبژارتنان، ئەنجامێ رۆل و دلسۆزی و هاریكارییا كۆمسیۆنێ بوو ل گەل هەموو ئالیێن پەیوەندیدار ل هەرێما كوردستانێ، بۆ وێ چەندێ ژی، دەستخوەشی لێ كر و هیڤییا سەركەفتنێ بۆ خواست.
ژ ئالیێ خوەڤە كۆمسیۆنا بلند یا سەربخوە یا هەلبژارتنان ل ئیراقێ پیرۆزباهییا سەركەفتنا هەلبژارتنێن پەرلەمانێ كوردستانێ ل نێچیرڤان بارزانی و هەرێما كوردستانێ كر و هەموو پڕۆسە بلند هەلسەنگاند، كو هەر ژ بانگەشەیا هەلبژارتنان تاكو ئەنجامدانا دەنگدانێ، پڕۆسەیەكێ سەركەفتی بوو، ب شێوەیەكی كو جارا ئێكێیە ل ئیراقێ و هەرێما كوردستانێ، هیچ تانەیەكا سوور ل سەر هەلبژارتنان نەهاتبیتە تۆماركرن.

سەرۆكێ هەرێما كوردستانێ راگەهاند: بانگەشەیا هەلبژارتنان و پشكداریكرنا خەلكی ل هەلبژارتنێن خولا شەشێ یا پەرلەمانێ كوردستانێ، ئەو چەندە دیاركر كو پڕۆسەیا دیموكراسی ل هەرێما كوردستانێ ب شێوەیەكێ باش و ل سەر رێكەكا دروست یا گەشە دكەت.
نێچیرڤان بارزانی، سەرۆكێ هەرێما كوردستانێ ل دیدارا مێری ل دوماهی پانێلدا ئاخڤت.
دەستپێكا ئاخڤتنێن سەرۆكێ هەرێما كوردستانێ ل دۆر هەلبژارتنێن خولا شەشێ یا پەرلەمانێ كوردستانێ بوو. نێچیرڤان بارزانی گۆت» هەلبژارتنێن پەرلەمانێ كوردستانێ پرسەكا گرنگ بوو بۆ هەرێما كوردستانێ، هەلبژارتن ژێدەرێ رەوایەتی دانێیە ب دەستهەلاتا هەرێما كوردستانێ و پاشئێخستنا هەلبژارتنان بۆ هەرێما كوردستانێ گەلەك یا خراب بوو».
سەرۆكێ هەرێما كوردستانێ د چارچۆڤەیێ ئاخڤتنێن خوە دا ل دیدارا مێری گۆت ژی» هەلبژارتن د گرنگن، ژ بەر كو رەوایەتییا دەستهەلاتێ ددەتە هەر كەسەكی كو د هەلبژارتناندا ب سەركەڤیت. هەرێما كوردستانێ و ئیراقێ ژی ئەو مودێلە یا هەلبژارتی، پرسا دیموكراسییەتێ و دەستهەلاتێ ب رێكا سندووقا دەنگدانێ بیت».
ل دۆر سەركەفتیێ پڕۆسەیا هەلبژارتێن پەرلەمانێ كوردستانێ، نێچیرڤان بارزانی راگەهاند» سەركەفتیێ مەزن د ڤان هەلبژارتناندا، گەلێ كوردستانێ و ئیراقێ بوون، یا كێم نینە نێزیكی 72% ژ دەنگدەران پشكداری د هەلبژارتناندا كری».
د پشكەكا دی یا ئاخڤتنێن خوە دا هەر ل دۆر هەلبژارتنێن پەرلەمانێ كوردستانێ، سەرۆكێ هەرێما كوردستانێ دیاركر» خوەشبەختانە دبێژین هەمبەركرن ل گەل هەلبژارتنێن دی، پڕۆسەیا دیموكراسی ل كوردستانێ ب شێوەیەكێ باش و ل سەر رێكەكا دروست یا گەشە دكەت. د چارچۆڤەیێ پڕۆسەیەكا دیموكراسیدا گەلێ كوردستانێ سەلماند پێدڤییە زێدەتر ژی بۆ بهێتە كرن. هوون ب نێرنە وێ چەندێ دو حزبێن هەڤڕك د ئێك دەمدا ل هەولێرێ بانگەشەیەكا مەزن یا هەلبژارتنان دكر و هیچ كێشەیەك ژی نەهاتە روودان».
سەرۆكێ هەرێما كوردستانێ هەروەسا راگەهاند» مە هەلبژارتنێن گەلەك سەركەفتی ئەنجامدا، كو ژ سالا 1991 ، ئەڤە گرنگترین هەلبژارتنێن هەرێما كوردستانێ بوون، نوكە دەمێ وێ چەندێیە دوبارە دەست ب وێ چەندێ بكەین مودێلەكا رێكوپێك ببینین كا چاوان ل گەل بەغدا كێشەیان چارەسەر بكەین، بەلێ ئەڤ كێشە ل دەستپێكێ ب وێ چەندێ چارەسەر دبن، ناڤمالا خوە رێكبێخی، تە حوكمەتەكا كارا و ب هێز هەبیت، كو بزاڤ بهێتە كرن تێكگەهشتن و چارەسەرییا كێشەیان ل گەل بەغدا بهێتە دیتن».
سەرۆكێ هەرێما كوردستانێ گۆت ژی» رەفتارا بەغدا ل گەل هەرێما كوردستانێ رەفتارەكا فیدرالی نینە، هەموو تشتەكە تنێ فیدرالی نینە، بەلكو رەفتارەكا گەلەك ناڤەندییە. من ئەڤ ئاخڤتنە ب راشكاوانە ل گەل برایێن مە ل بەغدا ژی یا كری» .
«كلیلا چارەسەریێ ئەوە، بەغدا دڤێت ل گەل هەرێما كوردستانێ كێشەیان چارەسەر بكەت، ژ سالا 2003 هەر ئەم یێن دبێژین دستوور، چارەسەرییە، بەلێ ب راستی ئەم وێ چەندێ نابینین» ئەڤە وەكو نێچیرڤان بارزانی باس دكەت، كو گۆت ژی» ڤان هەلبژارتنان دەلیڤەیەكا مەزن و نوو پەیداكر بۆ وێ چەندێ ل گەل بەغدا بگەهینە چارەسەرییەكێ كو جهێ رازیبوونا هەموو ئالییەكی بیت» .
سەبارەت پرسا راگرتنا هنارتنا پەترۆلا هەرێما كوردستانێ ژ ئالیێ ئیراقێ ڤە، سەرۆكێ هەرێما كوردستانێ گۆت» زیاندارا ئێكی ژ راگرتنا هنارتنا پەترۆلا هەرێما كوردستانێ، ئیراقە. داخوازێ ژ بەغدا دكەم ب شێوەیەكێ دروست و عاقلانە و ب شێوەیەكێ ئابوورییانە هزر د وی بابەتێدا بكەت. ب باوەرییا من چارەسەرییا دروست ئەوە جارەكا دی پەترۆلا هەرێما كوردستانێ وەكو پەترۆلا ئیراقێ ب رێكا بۆرییان بهێتە هنارتن. كێشە ل توركییا نینە بەلكو یا ل بەغدا».
پشكەكا دی ژ ئاخڤتنێن نێچیرڤان بارزانی، سەرۆكێ هەرێما كوردستانێ ل دیدارا مێری:
-ئالیێن ئۆپۆزسیۆنێ ژی پشكەكن ژ ڤی مللەتی و ژ ئالیێن سیاسی یێن هەرێما كوردستانێ.
-ئێدی هەلبژارتن دەرباز بوون و نابیت هەر د رەوشا هەلبژارتناندا بیت و دژی هەڤدو باخڤین.
-هەموو هێزێن سیاسی یێن هەرێما كوردستانێ یێن ل پێشبەری ئەزموونەكا مەزن دا، 72% ژ دەنگدەران پشكداری د دەنگدانێدا كر و ب ئالییان دبێژین: دڤێت د ئاستێ چاڤەڕێبوونا مە دا بن.
-هەكە لەزێ د پێكئینانا حوكمەتێ دا نەكەین، دێ زیاندار بین، چونكە رەوشا دەڤەرێ د گوهۆڕینێ دایە.
-مە قۆناغا دو ئیدارەیی یا دەربازكری.
-ئەوا گرۆپێن چەكدار ل ئیراقێ دكەن، د بەرژەوەندییا ئیراقێدا نینە. دڤێت ئیراق خوە دوور بكەت ژ ئاگرێ ل دەڤەرێ هەی.
-ب دیتنا هندەك ئالییان پەترۆل بابەتەكێ سیاسییە، بەلێ ئەم وەسا نابینین، چونكە پەترۆل بابەتەكێ ئابوورییە. ب سوپاسیڤە توركیا رێك دا پەترۆلی بهنێرینە دەرڤە و توركیا مفا ژێ نەكر.
-دڤێت ئالی تێبگەهن ئەم دوژمنێن هەڤدو نینین و هەڤڕكێن هەڤدوینە.