زاخۆ، دلۆڤان هالۆ:
ب ئامادەبوونا سەربەست لەزگین، ئەندامێ مەكتەبا سیاسی یا پارتی و بەرپرسێ مەكتەبا ڕێكخستنا پارێزگەها دهۆكێ، عومەر ئۆرەی، بەرپرسێ لقێ هەشت یێ پارتی ل زاخۆ و گوهدار شێخۆ سەرپەشتێ ئیدارا سەربخوە یا زاخۆ، ب هەلكەفتا 37 سالیا هەوا ئەنفالێن بەهدینان، دوهی 27/8/2025 پێشانگەهەكا فۆتۆگرافی یا ئەنفالان هاتە ڤەكرن و بەرپرسێ مەكتەبا رێكخستنێ ل هۆلا لقێ هەشت یێ پارتی سمینارەك بۆ ئەندام و لایەنگرێن پارتی ل سنۆرێ لقێ و هژمارەكا بەرپرسێن ئیداری و لەشكری و مالباتێن شەهیدان و ئەنفالكریان و پێشمەرگەیێن قەهرەمان و كەسایەتیێن زاخۆ پێشكێشكر.
سەربەست لەزگین د سمینارا خوە دا گۆت: «ئەنفالا بەهـدینان ئێك ژ بەرپەرێن ڕەشێن ڕژێما ژ ناڤچوویا ئیراقێ یە، برینەكە چو جاران ناهێتە دەرمانكرن، ڕژێما بەعس ب ئەنفالا بارزان و گەرمیان و حەلەبجە و وێرانكرنا كوردستانێ ب گرتن و ئەشكەنجەدانا خەلكی، تێهنا خوە نەشكاند، لەورا پەنا برە بەر ڤێ تاوانا هۆڤانە ل دژی خەلكێ سڤیل و بێ گونەهـێ بەهدینان».
گۆتژی: «د ئەنجام دا گەلێ كوردستانێ و خەلكێ خوە ڕاگر و قەهرەمان و فیداكار و كورد پەروەرێ دەڤەرا بەهـدینان سەركەفت، وەكو چیایێن كوردستانێ سەرفەراز بوون و ئەنجامدەرێن تاوانا ئەنفالا بەهدینان ژی گەهشتنە سزایێ خوە و چوونە د زبلدانا دیرۆكێ دا».
نيشاندان