ئه‌ڤرۆ نيوز:

ژێده‌ره‌كێ هێزێن سوريا ديموكرات (هه‌سه‌ده‌) ئێڤاريا ئه‌ڤرۆ راگه‌هاند كو هێزێن وێ بێ چه‌ك ب سه‌رپه‌رشتيا خاچا سوور يا نێڤده‌وله‌تى خوه‌ ژ سه‌رێ كانيێ ڤه‌كێشا، پشتى ده‌مه‌كێ كێم ژ خوه‌ ڤه‌كێشانا هێزێن هه‌سه‌دێ، له‌شكرێ توركى و ميليشيێن عه‌ره‌بى يێن هه‌ڤپه‌يمانێن توركيا چوونه‌ دناڤ وى باژێرى دا.

هێزێن هه‌سه‌دێ و يه‌په‌كێ ب سه‌رپه‌رشتيا خاچا سوور يا نێڤده‌وله‌تى بێ چه‌ك چوونه‌ ده‌رڤه‌ى باژێرێ سه‌رێ كانيێ و به‌ر ب حه‌سه‌كه‌ چوون، هژماره‌كا مه‌زن يا خه‌لكێ سه‌رێ كانيێ ژى د گه‌لدا بوون.

ژ لايێ خوه‌ڤه‌ ئاژانسا (سانا) يا ده‌نگوباسانيا سوورى به‌لاڤكر كو له‌شكرێ توركى و ميليشيايێن هه‌ڤپه‌يمانێن وى چوونه‌ دناڤ سه‌رێ كانيێ دا.

ڤه‌كێشانا هێزێن هه‌سه‌دێ و يه‌په‌كێ، د چارچۆڤێ وێ رێككه‌فتنێ دا دهێت ئه‌وا ئه‌مريكا و توركيا ل 17 ڤێ هه‌يڤێ بۆ ئاگربه‌ستێ ل رۆژئاڤايێ كوردستانێ ئيمزاكرى، ب ڤى شێوه‌ى پێدڤيه‌ هه‌سه‌ده‌ ب كووراتيا 32 كيلۆمه‌تران ژ ده‌ڤه‌رێ سنورى د ناڤبه‌را سووريێ و توركيا خوه‌ ڤه‌كێشيت.

بۆ ده‌مێ 11 رۆژان هێرشا له‌شكرێ توركى بۆ سه‌ر رۆژئاڤايێ كوردستانێ يا به‌رده‌وام بوو وهه‌تا ئه‌ڤرۆ ژى نه‌ شيابوو باژێرێ سه‌رێ كانيێ كونترۆل بكه‌ت.

ئه‌ڤرۆ نيوز:

وه‌زيرێ ناڤخوه‌ ل هه‌رێما كوردستانێ راگه‌هاند، دێ هه‌موو بزاڤان كه‌ين كو ب باشترين شێوه‌ پێشوازيێ ل په‌نابه‌ران بكه‌ين، ئه‌وژى ل سه‌ر راسپارده‌يا سه‌رۆكێ حوكمه‌تا هه‌رێمێ.

رێبه‌ر ئه‌حمه‌د، وه‌زيرێ ناڤخوه‌ ل هه‌رێما كوردستانێ ئه‌ڤرۆ ئێكشه‌مبى 20/10/2019 د كۆنگره‌كێ رۆژنامه‌ڤانى دا گۆت”هه‌رێما كوردستانێ وه‌كو هه‌موو جاران دێ په‌ناگه‌هه‌كا ئارام بيت بۆ په‌نابه‌ران و سه‌رۆكێ حوكمه‌تا هه‌رێما كوردستانێ ژى ئه‌م راسپاردينه‌ كو ب باشترين شێوه‌ خزمه‌تا په‌نابه‌ران بهێته‌ كرن”.

ئه‌ڤرۆ نیوز:

رۆژناما تایمز یا بریتانى چیرۆكا زارۆیه‌كێ كورد ب ناڤێ (محه‌مه‌د حه‌مید)  ڤه‌دگێریت كو ژیێ وى 13 سالن و ل ده‌مێ بۆردومانا توركى ل سه‌ر ده‌ڤه‌را (سه‌رێ كانیێ) ل رۆژئاڤایێ كوردستانێ، له‌شێ وى ب تمامى ب مادا فسفۆرێ سپى د سۆژیت.

رۆژناما بریتانى دبێژیت” سوتنا محه‌مه‌د حه‌میدى به‌لگه‌كێ ب هێزه‌ ژ وان به‌لگێن دسه‌لمینن كو توركیا چه‌كێ قه‌ده‌غه‌كرى دژى كوردێن رۆژئاڤا بكارئینایه‌”.

بریاره‌ ئه‌ڤ زارۆیه‌ ب مه‌ره‌ما چاره‌سه‌ركرنێ ژ لایێ ده‌زگه‌هێ بارزانى یێ خێرخوازى بهێته‌ باژێرێ هه‌ولێرێ.

دهێته‌ زانین ل رۆژا ئه‌ینیا بۆرى 18/10/2019 رێكخراوا لێبۆرینا نێڤده‌وله‌تى راگه‌هاندبوو كو توركیا و گرۆپ و میلیشیان تاوانێن شه‌رى ل رۆژئاڤایێ كوردستانێ ئه‌نجامداینه‌.

ئه‌ڤرۆ نیوز، عه‌زیز ره‌سول

په‌یڤدارێ پۆلیسێن پارێزگه‌ها هه‌له‌بجه‌ بۆ ئه‌ڤرۆ نیوز راگه‌هاند، ژ ئه‌گه‌رێ بریسیه‌كێ گه‌نجه‌كى گیانێ خوه‌ ژ ده‌ست دا و گه‌نجه‌كى دى ژى ب گرانى بریندار بوو.

به‌رزان عوسمان، په‌یڤدارێ پۆلیسێن پارێزگه‌ها هه‌له‌بجه‌ گۆت” ئێڤاریا ئه‌ڤرۆ شه‌مبیێ 19/10/2019 ژ ئه‌گه‌رێ لێدانا بریسیان ل سنورێ گوندێن ده‌ڤه‌را نه‌ورۆلى ل پارێزگه‌ها هه‌له‌بجه‌، گه‌نجه‌كێ 24 سالى ب ناڤێ ( ئاران ئه‌ركان) گیانێ خوه‌ ژ ده‌ست دا”.

گۆت ژى” د هه‌مان روودانێ دا گه‌نجه‌كێ دى كو د ژیێ 19 سالیێ دایه‌ ب گرانى بریندار بوو و نوكه‌ یێ ل بن چاڤدێریا نوشداران دا”.

ئه‌ڤرۆ نیوز:

نوونه‌رێ حوكمه‌تا هه‌رێما كوردستانێ ل به‌غدا راگه‌هاند، ئه‌و ده‌نگوباسێن ل دۆر ره‌تكرنا داخوازیێن هه‌ریمێ ژ لایێ به‌غدا ڤه‌ سه‌باره‌ت بودجێ هاتینه‌ به‌لاڤكرن، د راست نینن و دانوستاندنێن هه‌ردو لایه‌نان د به‌رده‌وامن و لێكنێزیكبوونه‌كا باش یا هه‌ى بۆ وێ چه‌ندێ بگه‌هنه‌ رێككه‌فتنێ، بریاره‌ ژى پشتى موحه‌ره‌مێ، شاندێ هه‌ریمێ سه‌ره‌دانا به‌غدا بكه‌ت.

فارس عیسا، نوونه‌رێ حوكمه‌تا هه‌ریما كوردستانێ ل به‌غدا  د داخۆیانیه‌كا رۆژنامه‌ڤانى دا، گۆت” دانوستاندنێن به‌رده‌وام ل سه‌ر ئاستێ وه‌زاره‌تان و په‌یوه‌ندیێن به‌رده‌وام د ناڤبه‌را هه‌رێمێ و به‌غدا یێن هه‌ین بۆ وێ چه‌ندێ ل دۆر به‌هرا هه‌رێما كوردستانێ د پرۆژه‌ قانوونا بودجا گشتى بۆ سالا 2020 بگه‌هنه‌ رێككه‌فتنێ، د نوكه‌ ژى دا لێكنێزیكبوونه‌كا باش د ناڤبه‌را هه‌ردو لایه‌نان دا یا هه‌ى و دێ د به‌رده‌وام بن هه‌تا دگه‌هنه‌ رێككه‌فتنا دووماهیێ، ئه‌و ده‌نگوباسێن هاتینه‌ به‌لاڤكرن ژى كو حوكمه‌تا عیراقێ داخوازیێن هه‌رێمێ ل دۆر به‌هرا وێ ژ بودجه‌ى یێن ره‌تكرین، د راست نینن و هیچ ده‌نگوباسه‌كێ ژ وى جۆرى نینه‌، چونكى هێشتا رێككه‌فتن نه‌هاتیه‌ كرن”.

عیساى زێده‌تر بۆ مالپه‌رێ فه‌رمیێ پارتى گۆت” بریاره‌ پشتى هه‌لكه‌فتێن موحه‌ره‌مێ، شاندێ حوكمه‌تا هه‌رێما كوردستانێ سه‌ره‌دانا به‌غدا بكه‌ت و ل سه‌ر پرسا به‌هرا هه‌رێمێ ژ بودجه‌ى دانوستاندنان بكه‌ت و ئه‌و پرسه‌ بهێته‌ ئێكلاكرن”.