ئه‌ڤرۆ نیوز، زنار تۆڤى:

ده‌رهێنه‌رێ كورد سه‌هیم عۆمه‌ر خه‌لیفه‌، بۆ ئه‌ڤرۆ نیوز دیار كر: ئه‌ڤ ساله‌ وى ب فلمه‌كێ دكیۆمێنتارى ب ناڤێ ” گۆشه‌كا مۆلێنبێك”، كو پشكه‌كه‌ ژ برۆكسل پشكدارى د فلمه‌ فیسته‌ڤالا دهۆكێ دا كریه‌، هه‌روه‌سا فلمه‌ فیسته‌ڤالا دهۆكێ ئێكه‌ ژ فیسته‌ڤالێن هه‌ره‌ باش، چونكى ب ڤێ رێكێ ئه‌م هه‌موو ده‌رهێنه‌ر و ئه‌كته‌ر و فلمسازێن كورد و بیانى ئێك دبینین و هه‌ڤنیاسینه‌كا باش ژى دناڤبه‌را مه‌ دا دروست دبیت، ئه‌ڤ باشترین ده‌لیڤه‌ بۆ مه‌.

ناڤهاتى گۆت ژى: ئه‌ڤه‌ جارا شه‌شێ یه‌ ئه‌و پشكداریێ د فلمه‌ فیسته‌ڤالا دهۆكێ دا دكه‌ت، هه‌روه‌سا ب دیتنا وى د هه‌موو فیسته‌ڤالێن جیهانى ژى دا كێماسى هه‌نه‌، هه‌ر چه‌نده‌ د یا دهۆكێ ژى دا كێماسى هه‌نه‌، لێ سه‌ره‌راى هندێ فیسته‌ڤالا دهۆكێ باشترین فلمه‌ فیسته‌ڤالا كوردى یه‌ و ستانداردێن وێ گه‌له‌ك نێزیكى یێن جیهانى نه‌ و تشتێن گه‌له‌ك باش تێدا هه‌نه‌، چونكى گه‌له‌ك ووركشۆپ و پانێل هه‌نه‌ و گه‌له‌ك ده‌رهێنه‌رێن جیهانى و فلمێن باش تێدا پشكدارن، دیسان د ئالیێ راگه‌هاندنێ ژى دا گه‌له‌ك گرنگى پێ دهێته‌ دان، هه‌روه‌سا ئه‌ڤ ساله‌ وه‌ك رێكخستن و هاتنا مێهڤانان گه‌له‌ك ژ سالا بورى باشتره‌، سال بۆ سالێ فیسته‌ڤالا دهۆكێ باشتره‌.

ئه‌و ده‌رهێنه‌رێ كورد زێده‌تر دبێژیت: پێدڤیه‌ د ئالیێ پێشه‌وازیا مێهڤانان دا پتر گرنگى پێ بهێته‌ دان، دڤێت د ڤان فیسته‌ڤالان دا گه‌نجێن مه‌ فێر ببنه‌ سینه‌مایێ و فلمسازیێ و هه‌موو وارێن دیتر و گه‌له‌ك ووركشۆپ بهێنه‌ ئه‌نجامدان، دڤێت ئه‌م خه‌لكێ خوه‌ فێر بكه‌نه‌ چاوانیا چێكرنا فلمان و داهێنانێن سینه‌مایى، هه‌ر چه‌نده‌ سالانه‌ گه‌له‌ك فلم ناهێنه‌ چێكرن، له‌وما ستێرێن سینه‌مایێ یێن باش چێنابن، لێ هه‌كه‌ سالانه‌ گه‌له‌ك فلم بهێنه‌ چێكرن، دێ مه‌ ستیرێن باش ژى هه‌بن، هه‌روه‌سا سینه‌ما كوردى یا باشه‌، لێ وه‌كو پێدڤى فلمێن كوردى ناهێنه‌ چێكرن، دیسا هه‌تا نوكه‌ وه‌كو پێدڤى هۆلێن سینه‌مایى ژى نینن، دیسان دڤێت بزاڤ بهێنه‌ كرن، كو ئێدى خه‌لكێ مه‌ حه‌ز ژ سینه‌مایێ بكه‌ن و بهێنه‌ به‌رێ خوه‌ بده‌نه‌ فلمان، هه‌روه‌سا هه‌كه‌ ب رێژه‌كا باش فلمێن كوردى بهێنه‌ چێكرن دێ رۆلێ ژنێ ژى پتر هێته‌ نیشاندان و ئه‌كته‌رێن ژن ژى دێ گه‌هنه‌ ئاسته‌كێ هه‌ره‌ بلند د سینه‌ما كوردى دا.

ئەڤرۆ نیوز ، زنار تۆڤی:

ئەڤرۆ پێنجشەمبی 12 ئیلۆنا 2019 ل دەمژمێر 11 سپێدێ پانێلێ بەرھەمئینانا ھەڤبەش دناڤبەرا حوکمەتا ھەرێمێ و بەغدا دا ھاتە پێشکێشکرن.
پانێلێ بەرھەمئینانا ھەڤبەش ژ ئالیێ دکتور بەیار مستەفای ڤە ھاتە برێڤەبرن.

ل دەستپێکێ مھەنەد حەیال نوونەرێ وەزارەتا رەوشەنبیری ل عیراقێ گۆت: بەحسێ وان خالان کر، یێن کو دڤێت بەغدا ھاریکاریا ھەرێمێ بکەت و دیار کر: دڤێت پرەک بھێتە ئاڤاکرن دناڤبەرا بەغدا و ھەرێمێ د وارێ سینەمایێ و ھەرێمێ و بەغدا گەلەک گەنجێن خودان شیان ھەنە د ڤی واری دا کۆم بکەن، لەوما تاکە رێک ئەوە کو ئەم بەرەف سینەما سەربەخوە بچین، دڤێت ئەم بەرەف ڤێ خالێ بچین.

بابەکر درەی رێڤەبەرێ سینەمایێ ل سلێمانیێ گۆت: دڤێت بەرھەمێن خۆمالی د فیستەڤالێ دا ھەبن، چۆنکی فلمێن خۆمالی نەبن، باشتر فیستەڤال نەھێنە کرن، ھەروەسا بەحسێ ھندێ کر، کو پەیوەندیێن ھەرێمێ د گەلەک واران دا د ئاستێ پێدڤی دا نینە، دڤێت ھەرێم خودان دەزگەھەکێ بەرھەمئینانا فلمان بیت، دیسان ھەتانوکە دەزگەھێن بەرھەمئینانا فلمان ل بەغدا وەکو پێدڤی نینە، گەلەک تشت ھەتانوکە د روون و ئاشکرا نینن، پەیوەندیێن دناڤبەرا ھەرێمێ و بەغدا وەکو پێدڤی نینن، لاوازبوونا بازرگانیا فلمان ل عیراقێ و د ڤان سالان دا چ فلمێن عێراقی خەلات وەرنەگرتینە ل جیھانێ.

ئەحمەد سامر جیھاد رەخنەگرەکێ سینەمایی یە ل عیراقێ دبێژیت: دڤێت مە خالێن ھەڤپشک ھەبن د وارێ سینەمایێ دا، یا باش ئەوە بگەھینە خالەکێ و چارەسەریان ببینین، ژ پێخەمەت بشێین رێیەکێ ببینین ژبۆ چێکرنا فلمان ل عێراقێ و ھەرێمێ، پشتی 2003 دۆخێ عیراقێ ھاتە گوھۆڕین و سینەما ژی ھاتە گوھۆرین و گەلەک دەرھێنەرێن گەنج فلم ل سەر کیستێ خوە چێکەن و چەندین خەلات ژی وەرگرتینە، لێ بزاڤێن کەسوکی نەشێن سینەمایێ پێشڤە ببەن، دیسان سینەما عێراقی ما سینەمایەکا پاشکەفتی، چونکی نەشیا کارێن ھەڤبەش بکەت و ئەم نەشیاینە مفای ژ سەربۆرێن دەرڤە وەربگرین، دیسا ئەوا سیاسەتمەدار خراب دکەن، سینەما دشێت وێ چەندێ چارەسەر بکەت، لەوما دڤێت ئەم کارێن ھەڤپشک بکەین و ئاستێ سینەمایێ باشتر لێ بکەین و ئەزمۆنێن خۆ لێک ب گوھۆرین، ب ڤێ چەندێ دێ گەھینە خالێن گەلەک باش.

ئەیۆب رەمەزان رێڤەبەرێ رەوشەنبیری و ھونەری ل پارێزگەھا دھۆکێ گۆت: ھەتانوکە ل عیراقێ و ھەرێمێ ژی وارێ رەوشەنبیری نەبوویە ئەولەویاتا کارێ وان، ھەر چەندە مە ڤیایە کارێن ھەڤبەش ل گەل بەغدا بکەین، دیسان مە کارێن ھەڤپشک ل گەل ئورۆپا کرینە، ڤێ چەندێ مە سەرکەفتن ئینایە، دیسان ئەم شیاینە د کارێن ھەڤپشک دا شارەزایەکا باش وەربگرین، ئەڤە خالەکا گەلەکا ئەرێنی یە، گۆت ژی: دڤێت بازارێ ھەڤپشک دناڤبەرا ھەرێمێ و بەغدا بھێتە چێکرن و فلم ژی ب ھەڤپشک ژی بھێنە چێکرن و دڤێت کارێن ھونەری ب ئازادانە بھێنە کرن و سانسۆر ل سەر نەبیت، دڤێت کۆمپانی کارێ پرۆدەکشنێ بکەن.

ل دوماھیێ ژی بەرھەڤبوویان چەندین پرسیار ئاراستەی پانێلیستان کرن، دانوستاندن ل سەر چەندین تەوەرێن گرنگ ھاتە کرن.