ب چاڤدێریا سەرۆكێ بۆردا ئەمیندارێن زانینگەها ئەمریكی یا كوردستانێ ل دهۆكێ، مەسرۆر بارزانی، و ئامادەبوونا سەرۆكێ هەرێما كوردستانێ نێچیرڤان بارزانی و سەرۆککۆمارێ ئیراقێ عبد اللطيف رشيد و ب دەھان بەرپرسێن بیانی و ئیراقی و هەرێما كوردستانێ، ئاهەنگا شەشەمین گەڕا دەرچۆنا قوتابیێن زانینگەها ئەمریكی-كوردستان ل دهۆكێ، هاتە گێڕان.
سەرۆكێ زانكۆیێ ب خێرهاتنا مێهڤانان كر و رەوشا زانینگەهێ و ئاستێ خواندنێ بۆ ئامادەیان دیار كر. پاشی سەرۆككۆمارێ ئیراقێ پەیڤەك خواند و تێدا گۆت: ئەم دخەبتین دا ژ ئاستەنگان دەرباز بین.
پاشی سەرۆكێ هەرێمێ پەیڤەك پێشكێش كر و ئاماژە ب چەندین مژارێن گرنگ دا، و گۆت: پێدڤیە وەلات ل پێش و ل سەلالی هەرتشتی بت و گۆت: پێدڤیە گەنجێن مە، بەرگریێ ل ژیانێ و بەهایێن مرۆڤی بكەن. ھەروەسا، پشكداری د چارەكرنا قەیرانێن جیهانێ دا بكەن چونكی ئاڕێشە یێن هەمیانن. هەروەسا سەرۆكێ هەرێمێ ئاماژە ب چارەكرنا ئاڕێشەیێن ل ناڤبەرا ھەولێرێ و بەغدا كر. ل دوماھیێ گۆت: من باوەری ب شیانێن گەنجان هەیە و من باوەری هەیە سوبەهی دێ ژ ئەڤرۆ چێتر بت.
پاشی سەرۆک وەزیرێن هەرێمێ مەسرۆر بارزانی پەیڤەک پێشکێشکر و ئاماژە ب چەندین بابەتێن گرنگ دا و گۆت: پێدڤیە سیستەمێ خواندنێ دگەل یێن جیهانی بگونجینین. د گۆتنا خوە دا، داکۆکی ل گونجاندنا ئابۆرا هەرێمێ دگەل یا جیهانێ کر. هەروەسا خانم شرین خێرۆ وەک سیمبۆلەکا ڕزگاربووی ژ داعشێ و خوەڕاگریێ خەلات کر.

چاڤدێرێن سیاسی ل هەرێما كوردستانێ ئاماژێ دكەن، پشتی سەرەدانا ئەڤێ دووماهیێ یا مەسرور بارزانی، سەرۆكێ حوكمەتا هەرێما كوردستانێ بۆ بەغدا قۆناغەكا نوو د پەیوەندیێن د ناڤبەرا هەردو حوكمەتێن فیدرال و هەرێما كوردستانێ پەیدابوویە، هەروەسا ئاماژێ دكەن كو حوكمەتا هەرێما كوردستانێ هەموو بەهانەیێن حوكمەتا فیدرال نەهێلان.
ڤیان دەخیل، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گۆت » سەرەدانا مەسرور بارزانی بۆ بەغدا بۆ چارەسەركرنا ئەو كێشەیێن كو د ناڤبەرا بەغدا و هەولێرێدا هێشتا ماین».
ئاماژەكر» چەندین كێشە یێن ماین كو هەتا نوكە نەهاتینە چارەسەركرن، مەسرور بارزانی یێ رژدە ل سەر ئەوێ چەندێ ب سەرەدانا وی بۆ بەغدا مافێ خەلكێ كوردستانێ و مووچەهۆران وەربگریت، ل گەل ئەوێ چەندێ ئەو مافەكێ دستوورییە، بەلێ نە تێكگەهشتنا هندەك ژ سیاسەتمەداران ل بەغدا رێكێ نادەت پشكەكا مەزن ژ ئەوان كێشەیان بهێنە چارەسەركرن».
ل دۆر پرسا بودجەی و مووچەیێن خەلكێ كوردستانێ گۆت » قانوونا بودجەی ژ بابەتێن گرنگ یێن دانوستاندنێن د ناڤبەرا بەغدا و هەولێرێدا یە و چەند رۆژێن بهێت دێ دەنگ ل سەر بودجەی هێتە دان، سەرۆكێ حوكمەتا هەرێمێ د سەرەدانا خوە دا بۆ بەغدا ل سەر پرسا بودجەی و مافێن خەلكێ كوردستانێ ئاخڤت و هەموو بزاڤكرن مافێ خەلكێ كوردستانێ یێ پاراستی بیت».
پتر گۆت » نوكە تێكگەهشتنەك بۆ چارەسەركرنا كێشەیێن كوردستانێ یا هەی، بەلێ كێشەیا بجهئینانێ ژی یا هەی، لەوما گەلەك جاران سەرۆكێ هەرێما كوردستانێ و سەرۆكێ حوكمەتا هەرێما كوردستانێ دهێنە بەغدا».
سەبارەت كێشەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ ژی، پەیڤدارا فراكسیۆنا پارتی دیموكراتی كوردستان ل جڤاتا نوونەرێن ئیراقێ گۆت » مادەیا 140 مادەیەكا دستوورییە و پێدڤییە بهێتە بجهئینان، بجهئینانا ئەوێ مادەیێ گەلەك ژ كێشەیان دێ هێنە چارەسەركرن» هەروەسا ئاماژەكر» رێككەفتنا شنگالێ یا گرنگە بوو بەلێ هندەك ئالییان نەهێلا بهێتە بجهئینان».
ئەوژی گۆت » سەرۆكێ حوكمەتا هەرێما كوردستانێ و پارتی دیموكراتی كوردستان د رژدن ل سەر بدەستڤەئینانا مافێن خەلكێ كوردستانێ» .
شێروان دوبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت » ژ ئەنجامێ سەرەدانا مەسرور بارزانی، سەرۆكێ حوكمەتا هەرێما كوردستانێ، پەیام و هەلوەستێن سەركردەیێن شیعی بەرانبەر هەرێما كوردستانێ یێن هاتینە گوهۆڕین و بەر ب ئەرێنی دچن.
شیروانی گۆت ژی» حوكمەتا هەرێما كوردستانێ هەموو بەهانەیێن حوكمەتا فیدرال یێن بڕین و هیچ بەهانەیەك نەمایە هەتاكو ئالیێ ئیراقی پێگیر نەبیت بەرانبەر مافێن هەرێما كوردستانێ».
هەروەسا ئاماژەكر» ل رۆژێن بهێت وەزارەتا پەترۆلا ئیراقێ و وەزارەتا سامانێن سروشتی ل حوكمەتا هەرێما كوردستانێ و كۆمپانیێن پەترۆلێ كو ل هەرێما كوردستانێ كار دكەن دێ كۆمبن و هەكە رێككەفتنا دووماهیێ هاتە كرن، پرسا پەترۆلێ دێ چارەسەر بیت و كێشەیا مووچەی و بودجەی دێ چارەسەر بیت».
هەروەسا گۆت » پشتی سەرەدانا مەسرور بارزانی بۆ بەغدا، قۆناغەكا نوو د پەیوەندیێن هەردو ئالییاندا دێ پەیدا بیت و كێشەیا دارایی نامینیت و هەماهەنگییەكا زێدەتر دێ دروست بیت» .
ژ ئالیێ خوەڤە دانا جەزا، ئەندامێ بەرێ یێ جڤاتا نوونەرێن ئیراقێ ژ فراكسیۆنا پارتی گۆت » سەرەدانا مەسرور بارزانی، سەرۆكێ حوكمەتا هەرێمێ بۆ بەغدا د ئەڤی دەمێدا یا گرنگ و فرەمینبەری بوو، ژ بەر كو سەرەدان تنێ بۆ ئالیێ بەرپرسێن حوكمەتا فیدرال نەبوو، بەلكو بۆ ئالیێ كەسانێن بڕیار بدەستێن سیاسی ژی بوو» .
گۆت ژی» ئەوێ سەرەدانێ دێ كاریگەرییەكا گرنگ ل سەر تێكگەهشتنێ و پەیداكرنا واقعەكێ نوو بۆ پەیوەندیێن د ناڤبەرا بەغدا و هەولێرێدا هەبیت».
پتر گۆت » ژ بەر كو سەرەدانەكا گرنگ و هەستیار بوو، لەوما ل سەر ئاستێ راگەهاندنا ئیراقێ ژی رەنگڤەدان هەبوو و ب گرنگی رۆناهی ئێخستە سەر ئەوێ سەرەدانێ».
ئاماژەكر» پشكەك ژ ئالی و كەسایەتیێن سیاسی یێن ئیراقی باش دزانن كێشەیێن د ناڤبەرا بەغدا و هەولێرێدا چنە، بەلێ دەمێ چەندین سالایە ئەو كێشە وەكو كارتێن فشارێ دژی هەرێما كوردستانێ بكاردئینن».
رێبوار بابكەیی، بەرپرسێ لقێ 10 یێ پارتی دیموكراتی كوردستان ژی ئاماژەكر» حوكمەتا ئیراقێ هەموو ئامراز بەرانبەر هەرێما كوردستانێ تاقیكرن، بەلێ یا سەركەفتی نەبوو، لەوما ئێك ئامراز یێ مای تاقیبكەت، ئەو ژی دانوستاندنە، ئەڤ چەندە ژی د بەرژەوەندییا هەردو ئالییاندایە».
گۆت ژی» لۆجیكێ دانوستاندنێ، ئێك ژ بنەما و ستراتیژییەتێن مەسرور بارزانی ،سەرۆكێ حوكمەتا هەرێمێیە ب تایبەتی د رەفتاركرنێدا ل گەل حوكمەتا فیدرالی و ژ بۆ بدەستڤەئینانا خوەشگوزەرانیێ و زڤراندنا مافێ خەلكێ كوردستانێ، هەست ب وەستیانێ ناكەت، سەرەدانا ئەڤێ دووماهیێ ژی بۆ بەغدا ئەو راستییە سەلماند».
دیسا گۆت » پێشڤەچوونا ئەرینێ د پەیوەندیێن ئیرانێ و هەرێما كوردستانێدا یێن پەیدا بووین، ئەڤێ چەندێ ژی كاریگەرییا ئەرێنی ل سەر پەیوەندیێن د ناڤبەرا بەغدا و هەولێرێدا دێ هەبیت، كو ئەڤ ژی ئەو لۆژیكا ستراتیژییە كو مەسرور بارزانی د رەفتاركرنێ و مانۆرێن سیاسیدا كار ل سەر دكەت».
رۆهنكر ژی» تێكگەهشتنەكا نوو ژ ئالیێ هێزێن شیعی یا دروست بووی، كو یێن گەهشتینە ئەوێ باوەریێ پرس ل گەل هەرێما كوردستانێ ب رێكا دستووری و جڤاتا نوونەرێن ئیراقێ دێ هێنە چارەسەركرن».

بەرپرسەكێ پارتی دیموكراتی كوردستان راگەهاند: ب ئەوان گوهۆڕینێن نوكە رووداین، پارتی دیموكراتی كوردستان دێ پشكداریێ د هەلبژارتنێن پەرلەمانێ كوردستانێدا كەت.
ئاری هەرسین، بەرپرسێ لقێ چار یێ پارتی دیموكراتی كوردستان د كۆنفرانسەكێ رۆژنامەڤانیدا، ل دۆر پشكدارییا پارتی د هەلبژارتنێن پەرلەمانێ كوردستانێدا راگەهاند» ئەم هەردەم د بەرهەڤبووین بۆ هەلبژارتنان، بەلێ مە هندەك تێبینی ل سەر میكانیزمێن بڕێڤەچوونا هەلبژارتنان هەبوون. ل گەل ئەوان گوهۆڕینێن نوكە روداین، بەلێ ئەم دێ پشكداریێ د هەلبژارتناندا كەین».
ب گۆڕەی نڤیسارەكا عومەر ئەحمەد، سەرۆكێ جڤاتا كۆمسیارێن كۆمسیۆنا بلند یا سەربخوە یا هەلبژارتنان ل ئیراقێ كو ئاراستەی نڤیسینگەها فەوزی هەریری، سەرۆكێ دیوانا سەرۆكایەتییا هەرێما كوردستانێ هاتییە كرن، كۆمسیۆنێ پێشنیازكرییە هەلبژارتنێن خولا شەشێ یا پەرلەمانێ كوردستانێ ل 5/9/2024 بهێنە ئەنجامدان.
ل دووڤ ئاخڤتنا ئاری هەرسین، پێشنیازا كۆمسیۆنا بلند یا سەربخوە یا هەلبژاتنان ل ئیراقێ دێ بۆ سەرۆكێ هەرێما كوردستانێ هێتە بەرچاڤكرن و ئەوژی ب دانوستاندنێ ل گەل ئالیێن سیاسی ل هەرێما كوردستانێ كو بوویە نەریتەك، دێ ژڤانەكێ نوو بۆ ئەنجامدانا هەلبژارتنێن پەرلەمانێ كوردستانێ دیار كەت».
هەرچەندە نێچیرڤان بارزانی، سەرۆكێ هەرێما كوردستانێ رۆژا 10/6/2024 بۆ ئەنجامدانا هەلبژارتنێن خولا شەشێ یا پەرلەمانێ كوردستانێ دەستنیشانكربوو، بەلێ ژ ئەگەرێ پشكدارینەكرنا پارتی دیموكراتی كوردستان و پێكهاتەیان، ژ بەر بڕیارا دادگەها بلند یا فیدرالی ل ئیراقێ بۆ هەلوەشاندنا 11 كورسیێن كوتایا ل پەرلەمانێ كوردستانێ و دەستێوەردانەكا دەرەكی و بەرهەڤكرنا دیزاینا پێشوەخت بۆ هەلبژارتنان، هەلبژارتن جارەكادی هاتبوونە پاشئێخستن.
جەستەیا دادوەرییا هەلبژارتنان كو سەر ب جڤاتا بلند یا دادوەریێ ل ئیراقێ ڤەیە، د بەرسڤا هەژمارەكا سكالایێن پێشكێشكری ژ ئالیێ پێكهاتەیێن هەرێما كوردستانێ، بڕیار دا ژ 100 كورسیێن پەرلەمانێ كوردستانێ، پێنج كورسی بۆ پێكهاتەیان بهێنە تەرخانكرن، ئانكو 95 كورسیێن گشتی و پێنج كورسیێن دی ژی دێ تایبەت بن ب پێكهاتەیان.
ل رۆژا 21/5/2024 دادگەها بلند یا فیدرالی ل ئیراقێ بڕیارا دەستەیا دادوەرییا هەلبژارتنان پەسەند كر، ب گۆڕەی دەقێ بڕیارێ كو ل رۆژا 20/5/2024 هاتبوو دەركرن، پێنج كورسیێن كوتایا پێكهاتەیان ب ئەڤی شێوەی ب سەر پارێزگەهێن هەرێما كوردستانێ دێ هێنە بەلاڤكرن:
1- هەولێر: دو كورسی ( ئێك بۆ مەسیحییان و ئێك بۆ توركمانان).
2- سلێمانیێ: دو كورسی (ئێك بۆ مەسیحییان و ئێك بۆ توركمانان).
3- دهۆك: ئێك كورسی بۆ ئەرمەنا.

هەولێر، قائید میرۆ

بەرپرسەكێ پارتی دیموكراتی كوردستان ل كەركووكێ راگەهاند، هێشتا رێككەفتنا دووماهیێ ل دۆر بەلاڤكرنا پۆستێن پارێزگەها كەركووكێ نەهاتییەكرن و دبێژیت، مەرجێ پارتی ئەوە كوردەكێ بێلایەن پۆستێ پارێزگارێ كەركووكێ وەربگریت و هەرسێ پێكهاتەژی پەسەند بكەن.
محەمەد كەمال، بەرپرسێ لقێ سێ یێ پارتی ل كەركووكێ بۆ رۆژنامەیا (ئەڤرۆ) گۆت « هێشتا رێككەفتنا دووماهیێ ل دۆر كاراكرنا جڤاتا پارێزگەها كەركووكێ و بەلاڤكرنا پۆستێن ئەڤێ پارێزگەهێ نەهاتییە ئەنجامدان، تنێ ل دووماهی كۆمبوون محەمەد شیاع سۆدانی، سەرۆك وەزیرێن ئیراقێ داخوازكرییە بهەر ئاوایەكێ هەبیت پێدڤییە دەمەكێ نێزیك جڤاتا پارێزگەها كەركووكێ بهێتە كاراكرن و دەست بكارێن خوە بكەت، بەلێ وەكو رێككەفتن نەهاتییەكرن و ئالیێن سیاسی و پێكهاتەیێن كەركووكێ نەگەهشتینە رێككەفتنێ، كۆمبوون و دانوستاندن ژی د بەردەوامن بۆ گەهشتن ب رێككەفتنێ، چونكە پارێزگەها كەركووكێ تایبەتمەندییا خوە یا هەی و پێدڤییە هەموو پێكهاتەیێن پارێزگەهێ بگەهنە ئەنجامەكی و رازییبن ل سەر دانانا پارێزگاری و بەلاڤكرنا پۆستێن پارێزگەهێ.
محەمەد كەمال ئاماژەكر» قانوون بخوە رێگر و ئاستەنگە ل كەركووكێ كو پێكهاتەیێن كەركووكێ نەگەهنە رێككەفتنێ، چونكە كورسیێن جڤاتا پارێزگەها كەركووكێ ب شێوەیەكی هاتینە بەلاڤكرن یێن بووینە ئاستەنگ چو ئالی نەشێن بێی رێككەفتن جڤاتا پارێزگەهێ دەست ب كۆمبوونێن خوە بكەت و پارێزگار بهێتە دیاركرن، مادەم ب گۆڕەی قانوونێ جڤاتا پارێزگەهێ نەشێت كۆمبیت و رێككەفتن ژی نەهێتەكرن ئاریشە ب هەلاویستی دمینیت و ناگەهنە چو ئەنجامان».
رۆهنكر ژی» بۆچوونا پارتی ل دۆر رەوشا كەركووكێ ئەوە لەز بهێتەكرن بۆ كاراكرنا جڤاتا پارێزگەها كەركووكێ و ل دۆر هەلبژارتنا پارێزگاری ژی مەرجێ پارتی بۆ دانانا پارێزگارێ كەركووكێ ئەوە پۆستێ پارێزگاری بۆ كوردان بیت، چونكە كورد پێكهاتەیا سەرەكییا كەركووكێ نە ومافێ كوردانە پۆستێ پارێزگاری وەربگرن، بەلێ پارتی دگەل وێ چەندێیە كوردەكێ بێلایەن ئەڤی پۆستی بڕێڤەببەت، ئەو كەسێ دبیتە پارێزگار ژی ژئالیێ هەموو نەتەوەیێن كەركووكێ ڤە بهێتە پەسەندكرن و رازیبوون ل سەر هەبیت، نوكە و بەری نوكە ژی پارتی بەردەوام بزاڤ كرینە ئاریشەیێن كەركووكێ بهێنە چارەسەركرن و وەكو پارێزگەهێن دی یێن ئیراقێ پشتی هەلبژارتنان پارێزگار هاتنە هەلبژارتن و پۆستێن ئیداری ل پارێزگەهان هاتنە بەلاڤكرن، تنێ ل پارێزگەها كەركووكێ نەبیت كو ژ بەر هەڤڕكییا ئالیێن سیاسی هەتا نوكە رێككەفتن نەهاتیەكرن».

مەسرور بارزانی، سەرۆكێ حوكمەتا هەرێما كوردستانێ بۆ كۆمبوونێ ل گەل محەمەد شیاع سودانی، سەرۆك وەزیرێن ئیراقا فیدرال و بەرپرسێن دی یێن حوكمەتا ئیراقێ و سەركردە و بەرپرسێن ئالیێن سیاسی یێن ئیراقێ سەرەدانا بەغدا كر.
سەرۆكێ حوكمەتا هەرێمێ د پۆستەكێ تۆرا جڤاكییا ئێكس (تویتەرا بەرێ) ل دۆر سەرەدانا خوە بۆ بەغدا ئاماژەكر» ل بەغدامە بۆ دوپاتكرنێ ل سەر دابینكرنا مافێن خەلكێ كوردستانێ و چارەسەركرنا ناكۆكییان ب رێكا دانوستاندنێ و ل سەر بنەمایێ دستووری» .
سەرۆكێ حوكمەتا هەرێمێ د پشكەكا دی یا پۆستێ خوە دا دوپاتی ل ئەوێ چەندێ كر» دڤێت سەقامگیری و ئابۆرەكێ ب هێز كارێ مە یێ بەراهیێ بیت».
ل دەستپێكا سەرەدانا خوە سەرۆكێ حوكمەتا هەرێما كوردستانێ سەرەدانا قاسم ئەعرەجی، شیرەتكارێ ئاسایشا نیشتمانییا ئیراقێ كر و پاشی هەردویان د كۆنفرانسەكێ رۆژنامەڤانیدا بەرسڤا هەژمارەكا پرسیارێن رۆژنامەڤانان دا.
سەرۆكێ حوكمەتا هەرێما كوردستانێ د كۆنفرانسێ رۆژنامەڤانیدا راگەهاند» بۆ چارەسەركرنا ئەو كێشەیێن ماین، تشتەكێ گەلەك ئاسایییە بهێین ل بەغدا ل گەل هەموو بەرپرسان، دیدار و دانوستاندنان بكەین، ئێكەم كۆمبوونا مە ل گەل قاسم ئەعرەجی، شیرەتكارێ ئاسایشا نیشتمانییا ئیراقێ بوو كو برایەكێ مە یێ خوەشتڤی و ئەزیزە».
سەرۆكێ حوكمەتا هەرێما كوردستانێ ئاماژە ب ئەوێ چەندێ ژی كر» ئارمانجەكا دی یا ئەڤێ سەرەدانێ، ب مەبەستا ب هێزكرنا ئەوان پەیوەندیێن باشن كو نوكە نێزیكە بكەڤنە سەر رێرەوێ خوە».
د بەرسڤا پرسیارەكێ ل دۆر كێشەیا مووچەیێن وەزارەتا پێشمەرگەی و هێزێن ئەمنی، مەسرور بارزانی گوت» دێ چارەسەر بیت».
ژ ئالیێ خوەڤە قاسم ئەعرەجی، شیرەتكارێ ئاسایشا نیشتمانییا ئیراقێ ل دۆر سەرەدانا سەرۆكێ حوكمەتا هەرێما كوردستانێ بۆ بەغدا راگەهاند» تێكگەهشتنا د ناڤبەرا بەغدا و هەولێرێدا هێزەكا زێدەتر ددەتە ئیراقێ، خەالێن مە یێن هەڤپشك گەلەكن و كار دكەین بۆ بجهئینانا دستووری و دانا شایستەیێن دارایی یێن هەرێما كوردستانێ.
سەرۆكێ حوكمەتا هەرێما كوردستانێ د دو پۆستاندا ل تۆرا جڤاكییا ئێكس (تویتەرا بەرێ) ناڤەرۆكا كۆمبوونا خوە ل گەل قاسم ئەعرەجی ئاشكراكر.
سەرۆكێ حوكمەتا هەرێمێ ئاماژە ب ئەوێ چەندێ كر» ل گەل قاسم ئەعرەجی، شیرەتكارێ ئاسایشا نیشتمانییا ئیراقێ د هەڤڕابووین كو هەرێما كوردستانێ، هەرێمەكا دستوورییە و ی هێزبوونا هەرێما كوردستانێ ب هێزبوونا ئیراقێیە و بەرۆڤاژی ژی، لەوما دڤێت باشترین پەیوەندی د ناڤبەرا هەرێما كوردستانێ و حوكمەتا فیدرالیدا هەبیت».
مەسرور بارزانی دیاركر ژی» من دوپاتكر كو ژ روویێ ئەمنی ڤە هەماهەنگییەكا باش د ناڤبەرا هەرێما كوردستانێ و حوكمەتا فیدرالیدا یا هەی و هیڤیدارین ئەڤ هەماهەنگییا باش د هەموو بوارێن دی ژی دا رەنگڤەدەت».
هەر ل بەغدا، سەرۆكێ حوكمەتا هەرێما كوردستانێ ل بەغدا، ل گەل محەمەد شیاع سودانی، سەرۆك وەزیرێن ئیراقا فیدرال كۆمبوو.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونەكێدا رەوشا ئیراقێ ب گشتی و گرنگییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا ل سەر بنەمایێ دستووری هاتە گەنگەشەكرن.
وەكو د بەیاننامەیا حوكمەتا هەرێمێدا هاتی» هەردو ئالی د هەڤڕابوون ل سەر پێدڤییا بەردەوامبوونا دانوستاندنێن ئاڤاكەر بۆ چارەسەركرنا كێشەیان كو د بەرژەوەندییا هەموو پێكهات و وەلاتیێن ئیراقێدا بیت».
مەسرور بارزانی، سەرۆكێ حوكمەتا هەرێما كوردستانێ د درێژییا سەرەدانا خوە دا بۆ بەغدا ل گەل فالح فەیاز، سەرۆكێ دەستەیا حەشدا شەعبی كۆمبوو.
سەبارەت ئەوێ كۆمبوونێ، مالپەرێ فەرمیێ حوكمەتا هەرێما كوردستانێ بەلاڤكر كو دانوستاندن ل دۆر گرنگییا چارەسەركرنا كێشەیێن هەلاویستی د ناڤبەرا هەرێما كوردستانێ و حوكمەتا فیدرالیدا هاتنە كرن ل گەل دوپاتكرنێ ل رێكخستنا هەماهەنگیێن د ناڤبەرا هەردو ئالییاندا بۆ بەهنگارییا گەفێن تیرۆرێ.
هەر د بەردەوامییا كۆمبوونێن خوە دا ل بەغدا، مەسرور بارزانی، سەرۆكێ حوكمەتا هەرێما كوردستانێ و ئەمیندارێ گشتیێ (عەسائیب ئەهلولحەق)، دوماهی گوهۆڕین و پێشهاتێن ئیراقێ و بزاڤێن چارەسەركرنا كێشەیێن د ناڤبەرا حوكمەتا فیدرالی و هەرێما كوردستانێدا و گرنگییا دابینكرنا ماف و شایستەیێن دارایی یێن خەلكێ كوردستانێ ل سەر بنەمایێ دستووری گەنگەشە كرن.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونا د ناڤبەرا مەسرور بارزانی، سەرۆكێ حوكمەتا هەرێمێ و قەیس خەزعەلی، ئەمیندارێ گشتیێ عەسائیب ئەهلولحەق یا ئیراقی باس ل دوماهی پێشهاتێن ئیراقێ و بزاڤێن چارەسەركرنا كێشەیێن د ناڤبەرا حوكمەتا فیدرالی و هەرێما كوردستانێ و گرنگییا دابینكرنا ماف و شایستەیێن دارایی یێن خەلكێ كوردستانێ ل سەر بنەمایێ دستوورێ ئیراقێ هاتە كرن.
ژ ئالییەكێ دی ڤە مەسرور بارزانی، سەرۆكێ حوكمەتا هەرێما كوردستانێ ل بەغدا ل گەل نوری مالكی، سەرۆكێ هەڤپەیمانییا دەولەتا قانوونێ كۆمبوو.
ب گۆڕەی بەیاننامەیەكا حوكمەتا هەرێما كوردستانی، د دیدارەكێدا رەوشا گشتییا ئیراقێ و پێنگاڤێن چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا هاتە گەنگەشەكرن.
هەردو ئالییان دوپاتی ل پێدڤییا چارەسەركرنا كێشەیان ب رێكا دانوستاندنێ و رێزگرتنێ ل سیستەمی فیدرالیێ ئیراقێ و قەوارەیێ دستووریێ هەرێما كوردستانێ و پاراستنا مافێن خەلكێ كوردستانێ، ب تایبەتی پشكا بودجەی و شایستەیێن دارایی یێن هەرێما كوردستانێ د چارچۆڤەیێ بودجەیا گشتییا فیدرالیدا.
هەروەسا دوپاتی ل گرنگییا بەردەومابوونا هەماهەنگیێ و هاریكاریێ د ناڤبەرا هێز و ئالیێن سیاسی یێن ئیراقی ژ پێخەمەت دەربازكرنا كێشە و ئاستەنگان هاتە كرن ب گۆڕەی رێككەفتنا ئالیێن سیاسی یێن ئیدارەیا دەولەتێ و كارنامەیا كابینەیا وەزاری یا حوكمەتا فیدرالی.
نوری مالكی خوەشحالییا خوە بەرانبەر سەرەدانا سەرۆكێ حوكمەتا هەرێمێ دباركر و ئاماژكر، ئەم هەموو د رژدین بۆ چارەسەركرنا پرس و كێشەیێن د ناڤبەرا بەغدا و هەولێرێدا.
سەرۆكێ هەڤپەیمانییا دەولەتا قانوونێ دیاركر ژی» سەرۆكێ حوكمەتا هەرێمێ مەسرور بارزانی سیاسەتەكا ستراتیژییا درێژخاەین نەكو تەكتیكی بۆ چارەسەركرنا پرس و كێشەیان بكاردئینیت«.
نوری مالكی رۆهنكر ژی كو هەردو ئالییان باس ل كێشەیێن د ناڤبەرا بەغدا و هەولێرێدا كر و بۆچوونەك یا هەی بۆ چارەسەركرنا پرسا مووچەیێن فەرمانبەرێن هەرێما كوردستانێ و ئاماژەكر كو پێدڤییە ب گۆڕەی دستووری فەرمانبەر و خەلكێ هەرێما كوردستانێ بگەهنە ماف و شایستەیێن خوە .
مالكی باسێ ئەوێ چەندێ ژی، كار دكەین بۆ ئەوێ چەندێ كێشە ب شێوەیەكێ بنەڕەتی بهێنە چارەسەركرن تاكو دوبارە نەبن.
هەر ل بەغدا و د كۆمبوونا د ناڤبەرا مەسرور بارزانی، سەرۆكێ حوكمەتا هەرێمێ و هادی عامری، ئەمیندارێ گشتیێ رێكخراوا بەدر و سەرۆكێ هەڤپەیمانییا ( نە بنی)، هەردو ئالی د هەڤڕا بوون ل سەر مافێ موچەخۆرێن هەرێما كوردستانێ كو وەكو ئیراقێ بشێن بانكا دلخوازا خوە ب هەلبژێرن بۆ وەرگرتنا مووچەیێن خوە،
هەر ل بەغدا مەسرور بارزانی، سەرۆكێ حوكمەتا هەرێما كوردستانێ ل گەل خەمیس خەنجر، سەرۆكێ هەڤپەیمانییا سیادە كۆمبوو.
سەرۆكێ حوكمەتا هەرێمێ د پێگەهێ خوە یێ تایبەتدا ل تۆرا جڤاكییا ئێكس بەلاڤكر» ماف و ئەركێن مە د دستووریدا ب رۆهنی یێن هاتینە دیاركرن».
هەڤدەم دبێژیت» مە ئەركێن خوە یێن بجهئیناین و چاڤەڕێی نە بەغدا ژی پێگیری دابینكرنا مافێ مووچەخۆرێن هەرێما كوردستانێ بیت».
سەرۆكێ حوكمەتا هەرێمێ ئاماژە ب ئەوێ چەندێ ژی كر» من داخواز ژ خەمیس خەنجەر كر بەردەوام بیت ل سەر دانوستاندنێ ل سەر ئەڤی بابەتی».
هەر ل بەغدا مەسرور بارزانی، سەرۆكێ حوكمەتا هەرێما كوردستانێ ل گەل محسن مەندەلاوی، سەرۆكێ جڤاتا نوونەرێن ئیراقێ ب وەكالەت كۆمبوو، د دیدارەكێدا دوپاتی ل گرنگییا دابینكرنا مافێن دستووری و شایستەیێن دارایی یێن هەرێما كوردستانێ د بودجەیا گشتییا فیدرالیدا هاتە كرن.
ژ ئالیێەكێ دی ڤە، سەرۆكێ حوكمەتا هەرێما كوردستانێ ل بەغدا ل گەل فائق زێدان، سەرۆكێ جڤاتا بلند یا دادوەریێ ل ئیراقێ كۆمبوو، د دیدارەكێدا هەردو ئالی د هەڤڕابوون كو دستوور بۆ ئەوێ چەندێیە مافێن هەموو گەلێن ئیراقێ و ژ وان ژی دا هەرێما كوردستانێ دەستەبەر بكەت، هەروەسا دڤێت بنەمایەك بوو بۆ چارەسەركرنا ناكۆكیێن د ناڤبەرا بەغدا و هەولێرێدا.
د كۆمبوونا د ناڤبەرا سەرۆكێ حوكمەتا هەریچمێ و عەبدولسادە فرێجی، ئەمیندارێ گشتیێ هەڤپەیمانییا نەهج یا ئیراقی دوپاتی ل پێدڤییا پشتەڤانییا بزاڤێن چارەسكرنا كێشەیێن بەغدا و هەولێرێدا ب تایبەتی دابینكرنا شایستەیێن دارایی یێن هەرێما كوردستانێ هاتە كرن.
مالپەرێ فەرمیێ حوكمەتا هەرێما كوردستانێ پەلاڤكر، مەسرور بارزانی، سەرۆكێ حوكمەتا هەرێما كوردستانێ ل دوماهی ویستگەها سەرەدانا خوە بۆ بەغدا، ل گەل عەمار حەكیم، رێبەرێ باسكێ نیشتمانیێ حیكمە كۆمبوو و هەردو ئالییان باس ل رەوشا سیاسی وگشتییا ئیراقێ و بزاڤێن چارەسەركرنا كێشەیێن د ناڤبەرا حوكمەتا هەرێما كوردستانێ و حوكمەتا فیدرالیدا كر و د هەڤڕابوون ل سەر گرنگییا چارەسەركرنا كێشەیان ب شێوەیەكێ بنەڕەتی و ل سەر بنەمایێ دستووری و پاراستنا مافێن خەلكێ كوردستانێ و هەموو پێكهاتەیێن ئیراقێ.

وەزارەتا دەرڤە یا ئەمریکا راگەهاند کو رەوش ل رۆژئاڤایێ کوردستانێ و باکورێ سووریێ بۆ هەلبژارتنان یا گونجای نینە و چاڤدێرێن سیاسی ژی دیار دکەن، نها گەلەک ئاریشە ل رۆژئاڤایێ کوردستانێ هەنە و هەتا ئەو ئاریشە نەهێنە چارەسەرکرن برێڤەچوونا هەلبژارتنان چو مفایەکا خوە بۆ کوردان.

وەزارەتا دەرڤە یا ئەمریکا راگەهاند، بەرپرسێن رێڤەبەریا خوەسەر یا باکورێ سووریێ بەحسێ هەلبژارتنان دکەن، یا راست هەلبژارتن گەلەک گرنگن، لێ نها رەوش بۆ هەلبژارتنان ل رێڤەبەریا خوەسەر یا باکورێ سووریێ گونجای نینە و ژ بەر ڤێ یەکێ ژی ئەم وەسا دبینین هەکە نها هەلبژارتن بهێنە کرن ژی چو تشتەکێ چارەسەر ناکەت و رەنگە ببیتە ئەگەرێ ئالۆزیێن نوو.
ل ئالیێ دی سالح موسلیم هەڤسەرۆکێ پەیەدێ ژی راگەهاند، هەلبژارتن مافەکێ رەوا یێ کوردان و خەلکێن دی یە یێن کو نها ل رێڤەبەریا خوەسەر و رۆژئاڤایێ کوردستانێ دژین و ژ بەر ڤێ یەکێ ژی گەلەک گرنگە هەلبژارتن بهێنە کرن، هەلبژارتن دێ بیتە ئەگەرێ دەستپێکرنا قۆناغەکا نوو و دێ کاریگەریا خوە یا گەلەک باش بۆ پاشەرۆژا رۆژئاڤایێ کوردستانێ هەبیت، لێ مخابن تورکیا و هندەک وەلاتێن دی ل دژی هەلبژارتنانە و ب تایبەتی ژی تورکیا دڤێت جارەکا دی ب رێیا ئۆپۆراسیۆنێن سەربازی و ئێرشێن ئەسمانی ئالۆزیان دروست بکەت دا هەلبژارتن نەهێنە کرن، لێ وەکو رێڤەبەریا خوەسەر ئەو رژدن هەلبژارتن ل باکورێ سووریێ و رۆژئاڤایێ کوردستانێ بهێنە کرن.
ل ئالیێ دی بەری دو رۆژان رەجەب تەیب ئەردۆغانێ سەرۆک کۆمارێ تورکیا ژی راگەهاند، ئەو رێ نادەن هێزەکا تیرۆرستی ل ژێر ناڤێ هەلبژارتنان پێگەهێ خوە ل سەر سنۆرێ تورکیا بهێز بکەت و ئاریشان بۆ تورکیا دروست بکەت، وەکو تورکیا ئەو ژ نێزیکڤە دووڤچوونا رەوشێ دکەن و دێ یا پێدڤی ژی هێنە کرن، چونکی پاراستنا ئاسایشا تورکیا بۆ وان گەلەک یا گرنگە و هەر هێزەک ببیتە مەترسی تورکیا دێ ب توندی بەرسڤا وێ هێزێ دەت.
چاڤدێرێن سیاسی ژی دیار دکەن، رەوش بۆ هەلبژارتنان ل رۆژئاڤایێ کوردستانێ یا گونجای نینە، چونکی هێشتا هەر دو جڤاتێن کوردی یێن رۆژئاڤایێ کوردستانێ ئاریشێن هەی د ناڤبەرا خوە دا چارەسەر نەکرینە و ل ئالیێ دی مەترسیێن مەزن ژی ل سەر رۆژئاڤایێ کوردستانێ هەنە، نها دڤێت رێڤەبەریا خوەسەر کار بۆ چارەسەرکرنا ئاریشێن هەی بکەت، چونکی ب هەلبژارتنان چو پرسەک ناهێتە چارەسەر کرن و هەکە نها هەلبژارتن بهێنە کرن ژی دێ پرسێن هەی ئالۆزتر لێ هێن.
بەرپرسێن رێڤەبەریا خوەسەر دیار دکەن وان دڤێت ل رۆژا ١١ ڤێ مەهێ ل دەڤەرێن ل ژێر دەستهەلاتا خوە هەلبژارتنان بکەن و ئەو دبێژن پتر ژ سێ ملیۆن کەسان ژی مافێ دەنگدانێ هەیە.

سەرۆك مەسعود بارزانی پەیامەك ب هەلكەفتا سالڤەگەڕا 48 یا شۆڕەشا گۆلانێ بەلاڤكر و ئەڤە دەقێ وێ یە:
شۆرەشا گولانێ قۆناغەكا گرنگ یا دیرۆكا گەلێ مە و ئەزموونەكا پڕ بها یا خۆڕاگریێ و رابوونا گەلێ كوردستانێیە. د رەوشا پشتێ نسكۆیێ و ئاوارەیێ و ل بن فشارێن جۆرا و جۆر یێن نەیاراندا ب پلانەكا هوور و باوەرییەكا بلند شۆڕەشا گولانێ هاتە هەلكرن. شۆڕەشا گولانێ كو هەلگرا بها و ئارمانجێن شۆڕەشا ئەیلوولا مەزن بوو پەیامەكا رۆهن ب هەموو نەحەزان و نەیارێن گەلێ كوردستانێ گەهاند، كو سەرەرای ب هێزبوون و ستەمكارییا دوژمنان و هەبوونا پیلانەكا جۆرا و جۆر، گەلێ كوردستانێ خوە بدەستڤە نادەت و رۆلێن وی خەباتا خوە بۆ مەیدانا راستەقینەیا خەباتێ كو ئاخا پیرۆز یا كوردستانێیە دێ ڤەگوهێزن.
ل سالڤەگەڕا 48 یا شۆڕەشا گولانێ، سلاڤان بۆ گیانێ ئێكەمین شەهیدێ شۆڕەشا گولانێ شەهید سەید عەبدوللا حاجی ئۆمەرانی و هەموو شەهیدێن كورد و كوردستانێ د هنێرین و ئەوان خەباتكەر و قەهرەمان ژی چو جاران ناهێنە ژبیركرن كو د خەباتا پێشمەرگایەتی و حزبی و خەباتا نهێنێ دناڤ باژێران و د ئاوارەیێدا رۆل د شۆڕەشا گولانێدا هەبوو و قوربانی داینە و دیرۆك بۆ گەلێ خوە دروستكری. ئەو دەستكەفتێن بدەستڤەهاتین بەرهەمێ خوینا شەهیدان و رەنج و وەستیانا گەل و پێشمەرگە و خەباتكەرێن شۆڕەشا گولانێ و هەموو شۆڕەشێن گەلێ كوردستانێ نە.

سەرۆكێ هەرێما كوردستانێ ب هەلكەفتا سالڤەگەڕا 48 یا شۆڕەشا گولانێ پەیامەك بەلاڤكر و ئەڤە دەقێ وێ یە:
د دەمەكیدا بیرئینانا 48 سالییا هەلكرنا شۆڕەشا گولانێ دكەین، سلاڤان بۆ گیانێ پاقژێ شەهیدان دهنێرین و ب رێزڤە بیرئینانا وان دكەین.سلاڤ ل هەموو پێشمەرگە و كادر و هەموو ئەوان قەهرەمان و جامێرێن ب هەر شێوەیەكێ بیت، د رێزێن شۆڕەشێدا خەباتكری.
شۆڕەشا گولانێ رابوونا مللەتەكێ بوو كو ژ پێخەمەت ئازادیێ و سەرفەرازیێدا بەرهەڤی گیانبەخشێنێ و هەموو قوربانیدانەكێ بوو. د شۆڕەشا گولانێدا، گەلێ كوردستانێ سەلماند كو چو جاران داگیرانێ ناكەت و ئارمانجا شۆڕەشا ئەیلوولا مەزن ب رێبەرییا بارزانیێ نەمر هەتا سەركەفتنێ یا بەردەوامە.
كۆمبوونا هێز و ئالیێن كوردستانی ل سەر ئارمانجەكا بلند، بەرهەمێ شۆڕەشا گولانێ بوو كو ل دووماهیێ سەرهلدانا ئادارا 1991 سەرئێخست و ئازادی و فیدرالی و قەوارەیێ دستووریێ هەرێما كوردستانێ د دووڤدا هات. ب ڤێ هەلكەفتێ دوپاتیێ ل تێكگەهشتنا هەڤپشك دكەین كو نوكە و پاشەڕۆژەكا باشتر بۆ گەلێ كوردستانێ مسۆگەر دكەت.

مەسرور بارزانی، جێگرێ سەرۆكێ پارتی دیموكراتی كوردستان ل سالڤەگەڕا 48 یا هەلكرنا شۆڕەشا گولانێ، پەیامەك بەلاڤكر و ئەڤە دەقێ وێ یە:
ل سالڤەگەڕا 48 یا هەلكرنا شۆڕەشا گولانێ، گەرمترین پیرۆزباهییان ئاراستەی سەرۆك بارزانی و پێشمەرگێن قەهرەمان و هەموو پێشمەرگە و خەباتكەرێن پشكدارێن شۆڕەشێ دكەم.
شۆڕەشا گولانێ كو درێژەپێدەرا شۆڕەشا ئێلۆنا مەزن بوو ب رێبەرییا بارزانیێ نەمر، هیڤی و ئومێدەكا مەزن بۆ خەلكێ كوردستانێ زڤراند و پیلانگێرییا دوژمنێن گەلێ كوردستانێ شكاند كو دخواست دووماهیێ ب شۆڕەش و خەباتا رەوایا خەلكێ كوردستانێ ژ پێخەمەت مافێن وی یێن رەوا بینن، چونكە خۆڕاگرییا خەلكێ كوردستانێ و ئێكڕێزی و هەڤهەلویستییا هێز و ئالیێن كوردستانی، بۆ ئەگەرێ بدەستڤەئینانا چەندین دەستكەفتێن نیشتمانی یێن مەزن ئەوژی سەرهلدانا 1991 و هەلبژارتنێن پەرلەمانی و پێكئینانا حوكمەتا هەرێما كوردستانێ.
ل سالڤەگەڕا 48 یا هەلكرنا شۆڕەشاگولانێ، ب رێز و پێزانینڤە بیرئینانا هەموو خەباتكەرێن پشكدارێن ئەڤێ شۆڕەشێ دكەین ب تایبەتی سەركردەیێ هەردەم ساخ ئدریس بارزانی.

مەكتەبا سیاسییا پارتی دیموكراتی كوردستان
ب هەلكەفتا سالڤەگەڕا 48 یا هەلكرنا شۆڕەشا گولانێ، پەیامەك بەلاڤكر و تێدا هاتییە:
48 سال ب سەر دەستپێكرنا شۆڕەشا گولانا پێشكەفتنخواز دەرباز دبن، ئەو شۆڕەشا ب رێبەری و رێنمایێن بارزانیێ نەمر هاتییە هەلكرن. دەستپێكرنا شۆڕەشا گولانێ خەونا داگیركەر و دوژمنان ئێخستە چالێ و سەلماند كورد ژ پیلانێن نێڤدەولەتی ب هێزترە.
چار سال پشتی رێككەفتنا 11 ئادارێ و ئەو دەمێ رژێما بەعش خوە ژ پێگیریێن رێككەفتنێ و مافێن رەوایێن كوردان و كوردستانییەتا كەركووكێ ڤەددزی، سەركردایەتییا پارتی و شۆڕەشا كوردی د ناڤبەرا رازیبوون ب ئەوی واقعێ تەحل و دوبارە بەر ب چەك و چیایان، رێكا دویێ هەلبژارد ب پشتەڤانییا پێشمەرگەی و خەلكێ كوردستانێ درێژی ب شۆڕەشا ئەیلوولا مەزن و داكۆكی ژ مافێن رەوایێن گەلێ مە دا، دیسان خوە رێكخست و ل 26 گولانا سالا 1976 و ل چیایێن كوردستانێ دوبارە دەست ب شۆڕەشێ هاتە كرن و سەنگەرێن شەرەفمەندیێ یێن بەرگریێ هاتنە ئاڤاكرن.
دەستپێكرنا شۆڕەشا گولانێ بۆ دۆست و دوژمنان سەلماند، كو شۆڕەشا مللەتەكێ مافخاز و خودان كێشەیەكا رەوایە، لەوما نە ب ئاگری و ئاسنی، نە ب پیلانێن نێڤدەولەتی و نە ب بۆهژاندن و فشاران ناهێتە ژناڤبرن، پارتی و رێبازا بارزانی ژی ئەو پارت و پارت و رێبازە نینن، كو ب وێ فشار و گەف و دوژمنكاریێ مەیدانێ چۆل بكەن و رێكێ بدەن مافێن كوردان بهێنە ژناڤبرن، هەروەسا دەستپێكرنا شۆڕەشێ سەلماند تاكە رێكا چارەسەركرنا دۆزا كوردی دانپێدانە ب هەموو مافێن نەتەوەیێ یێن مللەتێ كورد.
شۆڕەشا گولانێ، وەكو درێژەپێدەرا شۆڕەشا ئەیلوولا مەزن و ئارمانجێن وێ، ژ بلی ئەوێ چەندێ ئەو نە ئومێدی ڤەرەڤاند، كو ل نسكۆیێ هاتێیە پێش، بو دەستپێكا قۆناغەكا دی یا خەباتا كوردایەتیێ ژی، كو سەرەرای ئاستەنگ و كێشەیان، شیا درێژیێ ب ئەوێ خەباتا رەوا بدەت تاكو پێكئینانا بەرەیێ كوردستانی و كۆمبوونا هەموو هێزێن سیاسی ل دەوروبەرێ ئێك ئارمانج و ئەوژی بوو هێڤێن و داینەمۆیا سەرهلدانا پیرۆزا سالا 1991، كو ئاسۆیەكێ نوو ل پێشبەری گەلێ كورد ڤەكر، پاشی گەلێ كورد ب سەربلندی و ل سەر ئاخا خوە دەستهەلاتا دیموكراسییانە یا مللی یا خوە د چارچۆڤەیێ هەرێما كوردستانێدا دامەزراند.
ئەڤرۆ دەمێ بیرئینانا ئەوێ شۆڕەشا مەزن دكەین، گەلێ مە قۆناغەكا گەلەك دوور و درێژ بڕییە و سەدان ئەڤرازی و نشیڤی یێن دی ژی دەربازكرینە و چەندین لوغم و مین و پیلانێن دی ژناڤبرینە و دوبارە ل پاشەڕۆژو ئاسۆیەكێ گەش دنێریت، پارتی كو ئەو هەموو پیلان دژی هاتینە كرن، وەكو پێشڕەوا كوردایەتیێ و ب پشتەڤانییا مللەتی، حزبا هەژمار ئێكە ل ئیراقێ و كوردستانێ، هەلویستێن وێ یێن سیاسی و خۆڕاگری و داكۆكییا مەردانە ژ ئاخ و مافێ گەلێ كوردستانێ، هندا دی پێگەه و باوەری ل سەر هەموو ئاستەنگان ب هێزكرییە و بەرنامەیێ نیشتمانسازی و ئاڤەدانخوازیێ وێ ژی جهێ ئومێدا جەماوەرییە، ب هێزكرنا رێزێن ناڤخوەیی ژی وەكرییە هەژی پێشڕەوایەتی و هیڤییێن گەلێ مە بیت.
د دەمەكیدا بیرئینانا شۆڕەشا گولانێ دكەین، ب باوەرییەكا مەزن ڤە بەر ب كوردستانەكا سەقامگیر پێنگاڤان د هاڤێژین، بۆ ب هێزكرنا پێگەهێ سیاسی و ئابۆری و دیپلۆماسیێ هەرێمێ و دوپاتییا پشتەڤانییا مە ل دەزگەهێن سەروەریێن سەرۆكایەتییا هەرێما و حوكمەتەكا ب هێز و سەرانسەری دكەین، كو ل ئاستێ ئەركێن قۆناغێدا بن و بشێن سەقامگیرییا كوردستانێ وەكو هەردەم بپارێزن و ژیانا خەلكی بەر ب باشتر و باشتر ژی ببەن، هەڤدەم كاراكرنا پەرلەمانێ كوردستانێ ب هەلبژارتنێن پەسەند كری ژ ئالیێ مللەتیڤە، هەلبەت ئەڤێ چەندێ ژی پێدڤی ب ئێكڕێزیێ و ئێكهەلویستییا نەتەوەیی و نیشتمانی یا هەی، ئەوێ ئێكڕێزییا، كو پارتییا مە زۆرترین نەرمی ژ پێخەمەتێ وی بەرچاڤكری بۆ چارەسەركرنا كێشەیێن هەلاویستی د ناڤ هەرێمێدا و ئەوێن گرێدای ب دانوستاندنێن د ناڤبەرا حوكمەتا هەرێما كوردستانێ و حوكمەتا فیدرالی ل دۆر هەلبژارتنان و بودجەی و شایستەیێن دارایی یێن هەرێما كوردستانێ، ژ ئالییەكێ و ل ئەوێ دەرفەتێ جارەكا دی دوپاتیێ ل سەر پرەنسیپێن هەڤپشكی و هەڤسەنگی و سازانێ بۆ چارەسەركرنا كێشەیان ل ئیراقا فیدرالدا دكەین.
د ئەڤێ هەلكەفتێدا، هەم دیسان سۆز و پەیمانان بۆ گەلێ كوردستانێ و سەرۆك مەسعود بارزانی دوپات دكەین، وەكو هەردەم ل سەر هەمان رێبازا رەسەن و راستەقینەیا كوردایەتی و نەتەوەیی و نیشتمانییا مە بەردەوام بین بۆ پاراستنا قەوارەیێ سیاسیێ شەرعیێ هەرێما كوردستانێ و دەستكەفتێن مە، هەروەسا ب هێزكرنا بنەمایێن ئاشتەوایێ و دیموكراسیێ و كەلتوورێ لێبۆرینێ و پێكڤەژیانێ.
ب ئەڤێ هەلكەفتێ سلاڤ بۆ دامەزرێنەر و رابەر و داڕێژەرێ رێبازا كوردایەتیێ (مستەفا بارزانیێ نەمر) و كاك ( ئدریسێ هەردەم ساخ) و هەموو شەهیدێن رێكا سەروەری و ئازادی و رزگارییا كوردستانێ.
ب هەلكفەتا شۆڕەشا گولانێ، سۆزێ بۆ گیانێ پاقژێ شەهیدان نوو دكەین درێژەپێدەرێن رێبازا وان بین، كو رێبازا كوردایەتیێ و نیشتمانپەروەریێیە بۆ پاراستنا ئەوان ئەزموون و دەستكەفتان، كو بەرهەمێ خوینا ب بها یا وانە.
سلاڤ ل گیانێ شەهیدان و سلاڤ و رێزێ بۆ مالبات و كوسوكارێن وان یێن سەربلند دهنێرین، سلاڤ بۆ بیرئینانا ئەوان خەباتكەرێن كو گەشەیا شۆڕەشێ بوون.
گەرمترین پیرۆزباهییان ل ئەندام و لایەنگر و دۆست و جەماوەرێ پارتییا خوە و هەموو خەلكێ كوردستانێ دكەین، ب تایبەتی ژی ئێك ب ئێك پێشمەرگێن مە یێن قەهرەمان كو ب جامێرییا وان كوردستان یا ئارام وسەربلند و پاراستییە.