دوهی دوشەمبی 14/4/2025، نێچیرڤان بارزانی، سەرۆكێ هەرێما كوردستانێ د رێوڕەسمەكێ فەرمیدا ل كۆچكا ئەلیزێ ل پاریس، ژ ئالیێ ئیمانوێل ماكرۆن، سەرۆكێ فرەنسا هاتە پێشوازی كرن.
سەرۆكایەتییا هەرێما كوردستانێ د بەیاننامەیەكێ دا راگەهاند» د كۆمبوونەكا دو قۆلیدا، هەردو سەرۆكان ب هێزكرنا پەیوەندیێن فرەنسا ل گەل ئیراقێ و هەرێما كوردستانێ و بەفرەهكرنا هاریكارییا هەڤپشك د ناڤبەرا واندا گەنگەشەكر، سەرۆكێ هەرێمێ سوپاسی و پێزانین بۆ پشتەڤانییا بەردەوام یا فرەنسا و سەرۆك ماكرۆنی ل ئیراقێ و هەرێما كوردستانێ، دوپاتكر» .
سەرۆكایەتییا هەرێمێ دیاركر ژی» هەردو ئالییان دوپاتی ل خواستا دولایەنی بۆ زێدەتر پێشڤەبرنا پەیوەندییان د هەموو واراندا كر، هەروەسا هەردو ئالی د هەڤڕا بوون ل سەر گرنگییا پاراستنا ئارامییا ئیراقێ و دوورئێخستنا وەلاتی ژ ئالۆزیێن دەڤەرێ».
د تەوەرەكێ دی كۆمبوونێدا، ل دۆر دوماهی پێشهاتێن رۆژهەلاتا ناڤین، رەوشا سووریێ و مەترسیێن تیرۆرێ و بەردەوامییا گەفێن داعشێ، بیر و بۆچوون لێكگۆهارتن. هەردو ئالییان داكۆكی ل گرنگییا مسۆگەركرنا مافێن كوردان و پێكهاتەیان ل سووریێ و دانوستاندنێ و تێكگەهشتنێ بۆ چارەسەركرنا ئاشتییانەیا كێشەیان ل دەڤەرێ، كر.

سەرۆكێ هەرێما كوردستانێ ب هەلكەفتا سالڤەگەڕا ئەنفالێ پەیامەكا بەلاڤكر و تێدا راگەهاند: حوكمەتا ئیراقا فیدرال، بەرپرسیارەتییا قانوونی و ئەخلاقی یا هەی د قەرەبووكرنا كەسوكارێن ئەنفالكرییان ژ هەموو روویەكیڤە.
ل سالا 1988 ژ ئالیێ رژێما بەرێ یا ئیراقێ ڤە زێدەتر ژ 182 هزار زارۆك و ژن و زەلامێن كورد ل هەوێن ئەنفالێدا بوونە قوربانی، ئەڤرۆ 37 سال ب سەردا دەرباز دبن. نێچیرڤان بارزانی، سەرۆكێ هەرێما كوردستانێ دبێژیت» ئەنفال ئێك ژ درندەترین تاوانێن جینۆسایدێ بوو د دیرۆكێدا، كو هێشتا كاریگەریێن وێ یێن ئازاربەخش د ویژدان و بیرا گەلێ مە دا د بەرهەڤن».
سەرۆكێ هەرێما كوردستانێ ئاماژە ب وێ چەندێ كر» د ڤێ هەلكەفتێدا، ب رێزڤە شەهیدێن ئەنفالكری دئینینە بیرا خوە و سلاڤان ل بنەمال و كەسوكارێن وان یێن خۆڕاگر دكەین، دوپات دكەین كو حوكمەتا ئیراقا فیدرالی، بەرپرسیارەتییا قانوونی و ئەخلاقی یا هەی د قەرەبووكرنا كەسوكارێن ئەنفالكرییان ژ هەموو روویەكیڤە» هەڤدەم ب پێدڤی ژی زانی كو حوكمەتا فیدرالی» بڕیارا دادگەها بلند یا تاوانان ل ئیراقێ بجه بینیت، كو ئەنفال وەكو جینۆساید و تاوانا دژی مرۆڤایەتیێ دایە نیاسین».
د پشكەكا پەیاما نێچیرڤان بارزانی دا دوپاتی ل وێ چەندێ كریە» هەموو ئالیێن پەیوەندیدارێن هەرێما كوردستانێ كار دكەن بۆ پێشكێشكرنا پشتەڤانیێ و چاڤدێریێ بۆ بنەمالێن شەهیدان، ئاڤەدانكرنا دەڤەرێن ئەنفالكری، دیتن و زڤراندنا رووفاتێن وان بۆ نیتشمانی، هەروەسا دێ بەردەوام بین د بزاڤێن خوە دا بۆ ب دەستڤەئینانا دانپێدانا نێڤدەولەتییا تمام ب تاوانێ ئەنفالێ وەكو جینۆساید».
سەرۆكێ هەرێما كوردستانێ رۆهنكر ژی» قەوارە و دەستكەفتێن هەرێما كوردستانێ، بەرهەمێ قوربانیدانا شەهیدانە. د ڤێ هەلكەفتێدا، داكۆكیێ ل ئێكڕێزیێ و پێكڤەكاركرنێ بۆ پاراستنا مافێن مە یێن دستووری و دروستكرنا پاشەڕۆژەكا باشتر یا پڕ ژ دادپەروەریێ و ئاشتیێ بۆ گەلێ كوردستانێ دكەین».

دوهی دوشەمبی 14/4/2024 جڤاتا نوونەرێن ئیراقێ ب شێوەیەكێ فەرمی قانوونا ب پارێزگەهبوونا هەلەبجە پەسەندكر، ب ڤێ چەندێ ژی هەلەبجە دبیتە پارێزگەها چارێ ل هەرێما كوردستانێ و یا 19 ل ئیراقێ.
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ ب هەلكەفتا ب پارێزگەهبوونا هەلەبجە پیرۆزباهی ل خەلكێ هەلەبجە و هەرێما كوردستانێ كر و گۆت» كێمترین پاداشتا قوربانی و ئێش و ئازارێن هەلەبجە و خەلكێ وێ یێ خەباتكەرە».
سەرۆكێ هەرێما كوردستانێ د پەیاما خوە دا گۆت ژی» ب هەلكەفتا دەنگدان و پەسەندكرنا جڤاتا نوونەرێن ئیراقێ ل سەر ب پارێزگەهبوونا هەلەبجە، ب گەرمی پیرۆزباهیێ ل خەلكێ هەلەبجە و هەموو هەرێما كوردستانێ دكەم. سوپاس و پێزانین و دەستخوەشی پێشكێشی جڤاتا نوونەرێن ئیراقێ و هەموو ئالییەكی ل هەرێما كوردستانێ و ئیراقێ دكەم كو د ڤێ پرۆسەیا درێژدا هاریكارێن مە بوون. ئەڤ جهێ خوەشحالییا مە و هەموو گەلێ كوردستانێیە».
نێچیرڤان بارزانی خویاكر» بۆ باشتر خزمەتكرنا خەلكێ هەلەبجە، هەر زوو مە ل هەرێما كوردستانێ پرۆسەیا ب پارێزگەهبوونا هەلەبجە دەستپێكر، تمامبوونا پێرابوونان ل ئیراقێ و ب فەرمی ناساندنا وێ وەكو پارێزگەه، كێمترین پاداشتا قوربانی و ئێش و ئازارێن هەلەبجە و خەلكێ وێ یێ خەباتكەرە، هیڤیدارین ببیتە ئەگەرێ باشتربوونا ژیار و ڤەژاندن و گەشەكرن و پێشكەفتنا هەلەبجە د هەموو واراندا. ئەركێ مە هەموو ئالییەكییە، خزمەتا هەلەبجە بكەین».
گۆت ژی» هەر ب ڤێ هەلكەفتێ ب رێزڤە شەهیدێن هەلەبجە و هەموو كوردستانێ د ئینینە بیرا خوە و سلاڤان بۆ گیانێ وان یێ پاقژ دهنێرین».
ژ ئالییەكێ دیڤە، پشتی پەسەندكرنا قانوونا ب پارێزگەهبوونا نێچیرڤان بارزانی، سەرۆكێ هەرێما كوردستانێ كو بۆ كۆمبوونێ ل گەل سەرۆكێ فرەنسا ل پاریس بوو، ب تەلەفۆنێ ل گەل نوخشە ناسح، پارێزگەرێ هەلەبجە ب وەكالەت ئاخڤت.
نوخشە ناسح ب سەرۆكێ هەرێمێ راگەهاند» ب ناڤێ خوە و هەموو كەسوكارێن شەهیدان و پارێزگەها هەلەبجە، زۆر سوپاسییا هەلوەستێ جوان یێ جەنابێ تە دكەین. دزانین تو ل دەرڤەی وەلاتی، بەلێ دلێ تە هەر یێ ل گەل هەلەبجە».

سەرۆكێ حوكمەتا هەرێما كوردستانێ راگەهاند: پێدڤییە بەغدا كەسوكار و بنەمال و هەموو زیانڤێكەفتیێن جینۆسایدا ئەنفالێ و هەموو ستەملێكریێن دی یێن دەستێ رژێما بەعس، ژ روویێ مادی و مەعنەوی ڤە قەرەبوو بكەت.
مەسرور بارزانی، سەرۆكێ حوكمەتا هەرێما كوردستانێ گۆت» ل سالڤەگەڕا 35 یا هەوێن ئەنفالێ، ب رێزڤە بیرئینانا شەهیدان و قوربایێن جینۆسایدا (ئەنفال)ێ دكەین، كو رژێما بەرێ یا ئیراقێ، ب دەهان هزار خەلكێ بێتاوانێ كوردستانێ راكێشایە بیابانێن باشوور و ناڤەڕاستا ئیراقێ و ل گۆڕێن ب كۆم بێسەروشوین كرن».
سەرۆكێ حوكمەتا هەرێما كوردستانێ گۆت ژی» جینۆسایدا ئەنفالێ، تاوانكارییەكا مەزن بوو ل دژی ئاخ و خەلكێ كوردستانێ هاتیە ئەنجامدان و هەتا نوكە ژی، دەرئەنجامێن وێ كۆمكۆژیێ هەر یێن ماین».
مەسرور بارزانی دیاركر ژی» پێدڤییە حوكمەتا فیدرال، ب هەستكرن ب ئەرك و بەرپرسیارەتییا قانوونی و دستووری و ئەخلاقی یا خوە، كەسوكار و بنەمال و هەموو زیانڤێكەفتیێن جینۆسایدا ئەنفالێ و هەموو ستەملێكریێن دی یێن دەستێ رژێما بەعس، ژ روویێ مادی و مەعنەویڤە قەرەبوو بكەت».
د ڤێ هەلكەفتێدا، سەرۆكێ حوكمەتا هەرێما كوردستانێ پێگیریبوونا حوكمەتێ» ب زێدەتر خزمەتكرنا كەسوكار و بنەمالێن سەربلندێن ئەنفالكری و شەهیدێن كوردستانێ دوپات دكەت».

مەسرور بارزانی، سەرۆكێ حوكمەتا هەرێما كوردستانێ، پەیامەكا پیرۆزباهیێ ئاراستەی نووری مالكی، ئەمیندارێ گشتیێ حزبا دەعوەیا ئیسلامی كر، ب هەلكەفتا سەركەفتنا كۆنگرەیێ گشتیێ 19 یێ حزبا ناڤبری و هەلبژارتنا وی وەك ئەمیندارێ گشتی.
د پشكەكا دی یا پەیاما خوە دا، مەسرور بارزانی، سەرەرای پیرۆزباهیێ، هیڤییا سەركەفتنێ بۆ مالكی د ئەرك و بەرپرسیارەتییا وی دا خواست.

دوهی دوشەمبی 14 نیسانا 2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل تۆماسۆ سانسۆنێ، قۆنسلێ گشتیێ نوو یێ ئیتالیا ل هەرێما كوردستانێ كر.
ب گۆڕەی بەیاننامەیەكا حوكمەتا هەرێما كوردستانێ» مەسرور بارزانی پیرۆزباهییا دەستبكاربوونێ ل قۆنسلێ گشتیێ نوو یێ ئیتالیا ل هەرێما كوردستانێ كر و هیڤییا سەركەفتنێ د ئەركێ وی دا بۆ خواست، هەڤدەم پشتەڤانییا حوكمەتا هەرێما كوردستانێ ژی بۆ دیاركر».
د بەیاننامەیا حوكمەتا هەرێمێ دا ئاماژە هاتیە كرن» قۆنسلێ گشتیێ نوو ئیتالیا ل هەرێما كوردستانێ، بەرهەڤییا وەلاتێ خوە بۆ زێدەتر پێشڤەبرنا پەیوەندیێن دو ئالییانە د وارێن جۆرا و جۆردا دوپاتكر».
بزاڤ و دانوستاندنێن پێكئینانا كابینەیا نوو یا حوكمەتا هەرێما كوردستانێ و رەوشا گشتییا ئیراقێ و دەڤەرێ، پشكەكا دی یا دانوستاندنان بوو.

د هەلبژارتنێن هەرێمی ئانکۆ یێن باژێرڤانیان ل وەلاتێ فینلەندا کوردان شیان سەرکەفتنا دیرۆکی تۆمار بکەن و ٩ بەربژارێن کورد بوونە ئەندامێن جڤاتا باژێرڤانیان و هەروەسا ٧ بەربژارێن کورد ژی وەکو ئەندامێن یەدەک شیان دەنگێن باش بدەستڤە بینن.
د ڤێ دەربارێ دا د. مەجید حەقی بسپۆرێ کاروبارێن سیاسی ل وەلاتێ فینلەندا دیار کر، کوردێن ژ هەر چار پارچەیێن کوردستانێ شیان رێکخستنەکا باش دروست بکەن و د پرۆسیسا دەنگدانێ دا ژی کوردان گەلەک هاریکاریا هەڤدو کرن و بێگومان سەرکەفتنا کوردان د هەلبژارتنێن هەرێمی ل فینلەندا دا گەلەک گرنگە و دێ کاریگەریا خوە ل سەر پێگەهێ کوردان کەت، چونکی دەمێ نوونەرێن زێدە یێن کوردان بچنە جڤاتا باژێرڤانیان دێ شێن پتر خزمەتا کوردان کەن.
هەژی ئاماژەپێدانێ یە کو ل گۆر ئامارێن فەرمی زێدەتر ژ ١٨ هزار کورد ل وەلاتێ فینلەندا دژین و د ڤان هەلبژارتنان دا ٣٧ کوردێن ژ هەر چار پارچەیێن کوردستانێ خوە ژ بۆ هەلبژارتنان بەربژار کربوون.

فەرماندارێ گشتی یێ هێزێن سووریا دیموکرات دیار دکەت، وان دڤێت هەموو پرسێن هەی د ناڤبەرا هێزێن سیاسی یێن رۆژئاڤایێ کوردستانێ دا چارەسەر بکەن دا کورد وەکو ئێک شاند ل گەل شامێ دانوستاندنان بکەن و ژ بۆ ڤێ یەکێ ژی دێ کۆنگرە هێتە ساز کرن.

مەزلوم عەبدی فەرماندارێ گشتی یێ هێزێن سووریا دیموکرات د داخویانیەکێ دا راگەهاند، نها رەوشا رۆژئاڤایێ کوردستانێ ئارامە و ئێرشێن تورکیا یێن ل سەر بەنداڤا تشرینێ ژی هاتینە راگرتن، وان ل گەل شامێ سەبارەت ب بەنداڤا تشرینێ رێککەفتنەک ئیمزا کرینە و ل گۆر رێککەفتنێ دێ رێڤەبەریا نها یا بەنداڤێ وەکو خوە مینیت و دێ ب هەڤپشکی ل گەل شامێ کاروبارێن پێدڤی بۆ بەنداڤێ هێنە کرن و گۆت: (مە هەتا نها چەندین رێککەفتن ل گەل شامێ ئیمزا کرینە و ئارمانجا مە یا سەرەکی ئەوە دا شەڕێ چەندین سالان ل سووریێ ب دووماهی بهێت، چونکی پێدڤیا هەموو خەلکێ سووریێ ب ئاشتیێ هەیە و بێگومان ئەمریکا و فرەنسا رۆلەکێ کاریگەر دگێرن و هەتا نها ژی رێککەفتن وەکو خوە دهێنە بجهئینان و ئەو یەک ژی جهێ دلخوەشیێ یە).
فەرماندارێ گشتی یێ هێزێن سووریا دیموکرات ئەو یەک ژی دیار کر، ژ بۆ وان گەلەک یا گرنگە ئاریشەیێن هەی ل رۆژئاڤایێ کوردستانێ ب تەمامی بهێنە چارەسەرکرن و کورد ل سووریێ پێکڤە کار بکەن و ژ بۆ ڤێ یەکێ ژی نها بەرهەڤی بۆ سازکرنا کۆنگرەیەکێ نەتەوەیی دهێتە کرن، بێگومان ئارمانجا سەرەکی یا کۆنگرەی ئەوە دا پرسێن هەی بهێنە چارەسەرکرن و کورد وەکو ئێک شاند ل گەل شامێ دانوستاندنان بکەن.
سەبارەت ب پاشەرۆژا رۆژئاڤایێ کوردستانێ ژی مەزلوم عەبدی دیار کر، هەلوەستێ تورکیا نها گەلەک باش هاتیە گوهۆڕین و ئەم وەسا هەست دکەین کو دێ تورکیا هەبوونا رێڤەبەریا خوەسەر قەبوول کەت، چونکی کوردان ل سووریێ دڤێت هەرێمەکا خوە هەبیت و خوە برێڤە ببەن، بێگومان هەتا نها تورکیا ئاریشە دروست دکرن، لێ نها هەلوەستێ تورکیا ژی باش بوویە و مە دڤێت ب رێیا دانوستاندنان ل گەل شامێ بابەتێ پاشەرۆژا رۆژئاڤایێ کوردستانێ ژی ئێکلا بکەین و گۆت: (بێگومان هەموو وەلاتیێن رۆژئاڤایێ کوردستانێ دخوازن رێڤەبەریا خوەسەر هەبیت و ئەو یەک ژی د چارچۆڤەیێ سووریایەک نوو دا بیت، بێگومان د دانوستاندنێن ل گەل شامێ دا ئەو یەک ژی دێ چارەسەر بیت).
چاڤدێرێن سیاسی ژی وەسا دبینن قۆناغا ئاشتیێ یا ل تورکیا دەستپێکریە کاریگەریا خوە یا باش ل سەر رۆژئاڤایێ کوردستانێ ژی کریە و پشتەڤانیا ئەمریکا و فرەنسا یا بۆ کوردان ل سووریێ ژی وەسا کریە تورکیا نەچار بیت هەلوەستێ خوە ل هەمبەر مافێن گەلێ کورد ل سووریێ بگوهۆڕیت.

سەرۆك بارزانی ل سالڤەگەڕا 45 یا جینۆسایدكرنا كوردێن فەیلێ، د پەیامەكێدا ل تۆرا جڤاكی یا (ئێكس) دا دبێژیت: خوشك و برایێن فەیلی، رۆلەكێ گرنگ د بزاڤا رزگاریخوازا كوردستانی و دۆزا نەتەوەیی یا گەلێ مە دا هەبوو و جینۆسایدكرنا كوردێن فەیلی، پشكەك بوو ژ پلانا داڕشتی یا رژێما بەرێ یا ئیراقێ بۆ ژ ناڤبرنا گەلێ كوردستانێ.
دەقێ پەیاما سەرۆك بارزانی:
ل سالڤەگەڕا 45 یا جینۆسایدكرنا كوردێن فەیلی، سلاڤ بۆ گیانێ پاقژ یێ شەهیدێن كوردێن فەیلی و هەموو شەهیدێن رێكا ئازادییا كوردستانێ دهنێرین. خوشك و برایێن فەیلی رۆلەكێ گرنگ دبزاڤا رزگاریخوازا كوردستانی و دۆزا نەتەوەیی یا گەلێ مە دا هەبوو و جینۆسایدكرنا كوردێن فەیلی، پشكەك بوو ژ پلانا داڕشتی یا رژێما بەرێ یا ئیراقێ بۆ ژناڤبرنا گەلێ كوردستانێ.
دهێتە زانین، جینۆسایدكرنا كوردێن فەیلی ل ئیراقێ ب چەندین قۆناغان دەستپێكر و ل سەردەمێ پاشایەتیێ هەتاكو رژێما بەعس. مەزنترین قۆناغ ل سەردەمێ رژێما بەعس بوو، پشتی ل سالا 1980 ب گۆڕەی بڕیارا 666 یا رژێما بەعس، كوردێن فەیلی ژ مالێن خوە هاتنە دەركرن و هاتنە بێبەهركرن و بڕیار هاتە دان هەموو مولكێن وان ژێ بهێنە ستاندن.
ب گۆڕەی ئاماران ل سالێن هەشتییان ل چەرخێ بۆری، زێدەتر ژ 22 هزار گەنجێن فەیلی هاتنە بەرزەكرن، هەروەسا پێنج هزار كاسبكار و بازرگانێن فەیلی هاتنە بن ئاخكرن، هەروەسا 600 هزار كوردێن فەیلی ل ئیراقێ هاتنە دەركرن بۆ ئیرانێ، ئەڤە ژ بلی گیان ژدەستدانا چەندین كەسان ب رێكا دەربەدەریێدا.

سەرۆك بارزانی ل سالڤەگەڕا 66 یا دەرچوونا وێ، پیرۆزباهی ل سەرنڤیسەر و رۆژنامەڤان و كارمەندێن رۆژنامەیا (خەبات) كر .
سەرۆك بارزانی د پەیاما خوە یا پیرۆزباهیێ دا گۆت» ب هەلكەفتا سالڤەگەڕا 66 یا دەرچوونا ئاشكرا یا رۆژنامەیا (خەبات) پیرۆزباهییەكا گەرم ل هەوە دكەم، ب تایبەت كو رۆژنامەیا خەبات یا بوویە تۆمارگەهەكا گرنگ یا خەباتا گەلێ مە ل قۆناغێن جودا جودا».
سەرۆك بارزانی گۆت ژی» رۆژنامەیا (خەبات) ل هەموو ویستگەهێن خوە یێن كاری د پێگیریبوونێ ب بهایێن نەتەوەیی و نیشتمانی و گەهاندنا پەیاما پێكڤەژیانێ و ئاشتیخوازیێدا دەنگەكێ سەركەفتی و رەسەن یێ گەلێ مە بوو، ل سالڤەگەڕا ب ئاشكرا دەرچوونا رۆژنامەیا هەوە دەستخوەشیێ ل هەوە دكەم و هیڤییا زێدەتر سەركەفتنێ بۆ هەوە دكەم».
ژ ئالیێ خوەڤە مەسرور بارزانی، جێگرێ سەرۆكێ پارتی دیموكراتی كوردستان پەیامەكا پیرۆزباهیێ ئاراستەی سەنڤیسەر و دەستەیا نڤیسەران و كارمەندێن رۆژنامەیا (خەبات) كر و تێدا گۆت» رۆژنامەیا خەبات، دیرۆكەكا پڕ ژ سەروەریێ د كاروانێ رۆژنامەگەرییا كوردیدا یا هەی وخزمەتەكا مەزن یا زمان و كەلتوور و رەوشنبیرییا كوردی كریە و ئامرازەكا گرنگ و راستگۆیا گەهاندنا پەیاما ئاشتیخوازنەیا گەلێ كوردستانێ و پێشڤەبرنا هزر و بیرێن نیشتمانپەروەرانە و پێكڤەژیانا ئاشتییانە بوو».