دوهی دوشەمبی 24/6/2024، مەسرور بارزانی، سەرۆكێ حوكمەتا هەرێما كوردستانێ پێشوازی ل هانس ساندی، بالیۆزێ هولەندا ل ئیراقێ كر كو ب هەلكەفتا ب دووماهی هاتنا ئەركێ وی سەرەدانا سەرۆكێ حوكمەتێ كربوو.
مەسرور بارزانی، سەرۆكێ حوكمەتا هەرێمێ سوپاسییا بالیۆزێ هولەندا كر بۆ بزاڤ و كاركرنا وی ژ پێخەمەت پێشڤەبرنا زێدەتر یا پەیوەندیێن دو قۆلی.
هەروەسا سوپاس و پێزانین بۆ پشتەڤانییا بەردەوام یا هولەندا ل شەرێ بەرهنگارییا تیرۆرستێن داعشێ و پشتەڤانییا چاكسازیێن حوكمەتا هەرێما كوردستانێ د بوارێ هەمەجۆركرنا ئابۆری و ب تایبەتی كەرتێ چاندنێ كر.
سەرۆكێ حوكمەتا هەرێمێ هیڤییا سەركەفتنێ بۆ بالیۆزێ هولەندا خواست د ئەركێ وی یێ داهاتیدا.
ژ ئالیێ خوەڤە بالیۆزێ هولەندا، ئاماژە ب پەیوەندیێن ب هێز د ناڤبەرا هەرێما كوردستانێ و هولەندا كر كو رێژەیا لێكگوهارتنا بازرگانی د ناڤبەرا هەردو ئالییاندا دو جاركی زێدەتر بوویە و خواستا وەلاتێ خوە بۆ پێشڤەبرنا زێدەتر یا پەیوەندییان ل گەل حوكمەتا هەرێما كوردستانێ دوپاتكر.
دووماهی پێشهاتێن رەوشا گشتییا ئیراقێ و دەڤەرێ و گرنگییا هەلبژارتنێن پەرلەمانێ كوردستانێ د دەمەكێ گونجایدا ل ئەڤسالە، تەوەرەكێ دی یێ دانوستاندنان بوو.

پەیڤدارێ پارتی دیموكراتی كوردستان راگەهاند: ئەڤرۆ هەلبژارتنێن ئۆرگانێن پارتی دیموكراتی كوردستان دێ هێنە ئەنجامدان كو دێ دەمێ رۆژەكێ ڤەكێشیت و 17 لق پشكداریێ د هەلبژارتناندا دكەن.
مەحمود محەمەد، ئەندامێ دەستەیا كارگێرییا مەكتەبا سیاسی و پەیڤدارێ پارتی دیموكراتی كوردستان د كۆنگرەیەكێ رۆژنامەڤانیدا سەبارەت هەلبژارتنێن ئۆرگانێن پارتی دیموكراتی كوردستان گوت» ئەوا نوكە دهێتە كرن هەلبژارتنێن ئۆرگانێن ناڤخوەیێن حزبێ نە كو ب گۆڕەی بڕیارا كۆنگرەیێ 14 دڤێت بهێنە ئەنجامدان، لەوما لژنەیەكا بلند یا هاتییە دروستكرن و بۆ هەر مەكتەبەكا رێكخستنا پارێزگەهەكێ، لژنەیەكا تایبەت هاتییە دروستكرن، د هەلبژارتناندا 17 لق د پشكدارن و ئەوان ژی لژنە یێن بۆ هاتینە دیاركرن، لژنە ژی بۆ ناوچان ژی یێن هاتینە دروستكرن كو ل سنۆرێ ئەوان لقاندانە».
پەیڤدارێ پارتی گوت ژی» د ئێك دەمدا دێ دەست ب هەلبژارتنان هێتە كرن، ل سێشەمبی هەلبژارتن بۆ ستافێ ئۆرگانێن ژ بنكەی هەتا سەری دەست پێ دكەت و چەندین رۆژان دێ بەردەوام بیت، ب گۆڕەی قەبارەیێ ئۆرگانان، چونكە دبیت هەموو وەكو ئێك تمام نەبن».
مەحمود محەمەد ئاماژە ب ئەوێ چەندێ ژی كر» سەدان كادرێن پێشكەفتی د ناڤ لژنەیان دانە بۆ بڕێڤەبرنا كاران، هەروەسا پترییا هەڤالێن مەكتەبا سیاسی و هەڤالێن لژنەیا ناڤەندی و كادرێن كەڤن كو بەرپرسێن لقان بوون و رۆل هەبوو د كارێ حزبایەتیێ دا دناڤ لژنەیان دانە».
پەیڤدارێ پارتی دیاركر ژی» ب گۆڕەی ئەوی سیستەمێ ل پەیڕەوێ ناڤخوەیێ حزبێ دا هەی ل دەستپێكێ هەلبژارتن ژ خوارێ دێ دەستپێكەن ئانكو ل بنكان و پشتی ب دووماهی هاتنێ ژ بنەكان دێ رێكخراو هێنە هەلبژارتن پاشی دێ سنۆرێ ناوچان هێنە هەلبژارتن، پاشی هەموو پێكڤە دێ لقەكێ هەلبژێرن، دەمێ ئەو ب دووماهی دهێن لقێن سنۆرێ مەكتەبا رێكخستنا هەر پارێزگەهەكێ دێ بەرپرسێن پشكێن ناڤ مەكتەبا رێكخستنێ هەلبژێرن».
مەحمود محەمەد ئاماژەكر» مەرج نوكە ناهێنە دیاركرن بۆ چاوانییا هەلبژارتنان، بەلكو مەرج دناڤ پەیڕەوێ ناڤخوە دا هاتینە دیاركرن، هەڤدەم رێنماییێن دیاركری ژی یێن هەین بۆ چاوانییا شرۆڤەكرنا ئەوان مەرجێن د ناڤ پەیڕەوێ ناڤخوەیی دا هەین، ئانكو هەم مە پەیڕەو یێ هەی و هەم ژی رینمایی و شرۆڤەكرنا پەیڕەوی ژی مە یا هەی بۆ ئەوێ چەندێ ئەو پڕۆسە ب شێوەیەكێ سەركەفتی بهێتە ئەنجامدان».
هەڤدەم د كۆنفرانسێ رۆژنامەڤانیدا مەحمود محەمەد رۆهنكر» ئەوا ئەڤرۆ دهێتە ئەنجامدان هەلبژارتنێن ئۆرگانێن حزبێ یە، دەمەكە مە نیاز هەبوو ئەوان هەلبژارتنێن ناڤخوەیی ئەنجام بدەین بەلێ ژ ئەگەرێ ئەوان روودانێن كو دهاتنە پێش د شیاندا نەبوو بهێنە ئەنجامدان، لەوما ب پێدڤی هاتە زانین ئەڤێ پڕۆسەیێ دەست پێ بكەین، هەروەسا پڕۆسەیەكا دی یا گرنگ یا ل بەراهییا مە ئەوژی هەلبژارتنێن پەرلەمانێ كوردستانێ نە».
پەیڤدارێ پارتی باس ل ئەوێ چەندێ ژی كر» مە دەستەیەكا دی یا هەی ئەو ژی دەستەیا چاڤدێریێ و دووڤچوونێیە بۆ هەلبژارتنێن ناڤخوەیی ئەڤە ژی بۆ ئەوێ چەندێیە كو چاڤدێرییا پڕۆسەیێ بكەت و هیچ كێشەیەك دروست نەبیت، هەر هەڤالەكێ گازندەیەك هەبیت دێ دەستەیا چاڤدێرییا و دووڤچوونێ چارەسەركەت».
مەحمود محەمەد ئاماژەكر» كادرێن ئافرەت دێ پشكدار بن ژ بنكەیان هەتا لقان، ئانكو ئافرەت ب كۆتا پشكدار نابن بەلكو دڤێت ب رێژە پشكدار بن، چونكە د پەیڕەوی دا پشكدارییا ئافرەتێ كرییە بڕیار».

سەرۆكایەتییا هەرێما كوردستانێ ل گەل حزب و ئالیێن سیاسی یێن كوردستانێ د پەیوەندیێ دایە بۆ دیاركرنا ژڤانێ نوو یێ هەلبژارتنێن پەرلەمانێ كوردستانێ، حزبێن سیاسی یێن كوردستانی بۆچوونا خوە ئێخستییە پێشبەری سەرۆكایەتییا هەرێما كوردستانێ و هەموو پێشهات بە ر ب ئەوێ چەندێ نە كو هەلبژارتنێن پەرلەمانێ كوردستانێ ل مەها 10 یا ئەڤسالە بهێنە ئەنجامدان.
ل دووڤ پێزانینان، پەیوەندی و راوێژل سەرۆكایەتییا هەرێما كوردستانێ ل گەل حزب و ئالیێن سیاسی ل هەرێما كوردستانێ یا دەستپێكری بۆ دیاركرنا ژڤانەكێ نوو بۆ هەلبژارتنێن خولا شەشێ یا پەرلەمانێ كوردستانێ. سەرۆكایەتییا هەرێمێ ل گەل هندەك ئالیێن سیاسی راوێژ كرییە و ل رۆژێن داهاتی دێ ل گەل هندەك ئالیێن دی ژی كەت. بۆ ئەوێ مەبەستێ ژی ئالیێن سیاسی ل هەرێما كوردستانێ بۆچوونێن خوە ئێخستینە پێشبەری سەرۆكایەتییا هەرێما كوردستانێ.
باپیر كاكەمەلا، سكرتێرێ حزبا رەنجدەرێن كوردستانێ دیاركر» وەكو هەموو جارێن دی سەرۆكایەتییا هەرێما كوردستانێ راوێژ ل گەل ئالیێن سیاسی ل هەرێما كوردستانێ كرییە و دبیت ل ناڤەڕاستا مەها چریا ئێكی یا بهێت دا هەلبژارتنێن پەرلەمانێ كوردستانێ بهێنە ئەنجامدان، چونكە كۆمسیۆنا بلند یا سەربخوە یا هەلبژارتنان ل ئیراقێ هەر ژ رۆژا دیاركرنا ژڤانێ هەلبژارتنان پێدڤی ب 100 رۆژان یا هەی بۆ خوە بەرهەڤكرنێ بۆ ئەنجامدانا هەلبژارتنان».
ژ ئالیێ خوەڤە بێستون حەمە سالح، بەرپرسێ مەكتەبا هەلبژارتن یا كۆمەلا دادگەریل كوردستانێ د داخۆیانییەكا رۆژنامەڤانیدا گوت» سەرۆكایەتییا هەرێما كوردستانێ پەیوەندی ب هەموو ئالیێن سیاسی كرییە بۆ ئەوێ چەندێ بۆچوونێن وان ل دۆر ژڤانێ هەلبژارتنێن پەرلەمانێ كوردستانێ وەربگریت، چاڤەڕێ ژی دهێتە كرن د ئەڤێ حەفتیێدا ژڤانێ هەلبژارتنان بهێتە دیاركرن».
هەروەسا دیاركر» مە هیچ پێشنیازەك بۆ دیاركرنا ژڤانێ هەلبژارتنێن پەرلەمانێ كوردستانێ بەرچاڤ نەكرییە، بەلێ هەر هەر ژڤانەك بهێتە دیاركرن پێدڤییە هەموو ئالیێن سیاسی پێگیر پێ و ئەو ژڤان نەهێتە گوهۆڕین».
كۆمسیۆنا بلند یا سەربخوە یا هەلبژارتنان ل ئیراقێ دێ هەلبژارتنێن خولا شەشێ یا پەرلەمانێ كوردستانێ بڕێڤەبەت، بیستون حەمە سالح دبێژیت» گرنگە بەری ب دووماهی هاتنا ژیێ كۆمسیۆنا بلند یا سەربخوە یا هەلبژارتنان ل ئیراقێ كو ژیێ وێ ل (7/1/2025) دێ ب دووماهی هێت، هەلبژارتنێن پەرلەمانێ كوردستانێ بهێنە ئەنجامدان».
ناڤبری ئاماژەكر» ئالیێن سیاسی ل هەرێما كوردستانێ زێدەتر باس ل ژڤانەكی دكەن بۆ ئەنجامدانا هەلبژارتنێن پەرلەمانێ كوردستانێ كو د ناڤبەرا 15/10/2024 بۆ 1/11/2024 دا بیت».
پێشتر ژی كۆمسیۆنا بلند یا سەربخوە یا هەلبژارتنان ل ئیراقێ بۆ بڕێڤەبرنا هەلبژارتنا خولا شەشێ یا پەرلەمانێ كوردستانێ، رۆژا 5/9/2024 پێشنیازكربوو و ب نڤیسارەكا فەرمی ژی پێشنیازا خوە ئاراستەی سەرۆكایەتییا هەرێما كوردستانێ كربوو.
ل رۆژا شەمبیێ 4/6/2024، جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ د داخۆیانییەكا رۆژنامەڤانیدا راگەهاندبوو» جڤاتا كۆمسیاران رازیبوون ل سەر بڕیارا زڤرینا پێنج كورسییان بۆ پێكهاتەیان ل پەرلەمانێ كوردستانێ نیشاندایە، كورسیێن پێكهاتەیان ژی ب ئەڤی شێوەی ب سەر پارێزگەهاندا دێ هێنە بەلاڤكرن: ل پارێزگەها هەولێر 34 كورسی دو كورسی ژ وان بۆ پێكهاتەیێن توركمان و كریستییان، ل پارێزگەها سلێمانیێ 38 كورسی كو دو كورسی بۆ پێكهاتەیێن توركمان و كریستییان، ل پارێزگەها دهۆكێ 25 كورسی كو ئێك كورسی بۆ پێكهاتەیێ كریستییان، ل پارێزگەها هەلەبجە سێ كورسێ كو هیچ كورسییەك بۆ پێكهاتەیان نەهاتە تەرخانكرن.
ئەڤە د دەمەكی دایە، پێشتر دەستەیا دادوەرییا هەلبژارتنان كو سەر ب جڤاتا بلند یا دادوەری ل ئیراقێ ڤەیە، د بەرسڤا هەژمارەكا سكالایێن هاتینە پێشێشكرن ژ ئالیێ پێكهاتەیێن هەرێما كوردستانێ ڤە، بڕیار دا ژ 100 كورسیێن پەرلەمانێ كوردستانێ، پێنج كورسی بۆ پێكهاتەیان بهێنە تەرخانكرن. ئانكو 95 كورسی دێ گشتی بن، پێنح كورسیێن دی ژی دێ تایبەت بن بۆ پێكهاتەیان.
ل 21/5/2024، دادگەها فیدرالییا بلند ل ئیراقێ بڕیارا دەستەیا دادوەرییا هەلبژارتنان پەسەندكربوو.

پاتریاركێ كلدانی ل ئیراقێ و جیهانێ پەیامەكێ سوپاسیێ ئاراستەی سەرۆك بارزانی، نێچیرڤان بارزانی سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ دكەت و تێدا دبێژیت: من سوپاسی و پێزانین بۆ سەركردایەتییا هەرێما كوردستانێ یێن هەین.
كاردینال لویس رۆفائێل ساكۆ، پاتریاركێ كلدانی ل ئیراقێ و جیهانێ بەری زڤرینا وی بۆ بارەگەهێ خوە ل بەغدا، د بەیاننامەیەكێدا سوپاسی و پێزانێن خوە ئاراستەی سەركردایەتییا هەرێما كوردستانێ كرن و تێدا دبێژیت» بۆ كشتاندنا مەرسوومێ سەرۆكایەتییا كۆمارا ئیراقێ، سوپاس بۆ ئەوی هەلوەست و پێشوازییا گەرم ژ ئالیێ سەركردایەتییا هەرێما كوردستانێ ل من هاتییە كرن».
هەروەسا د پەیاما خوە دا بۆ سەركردایەتییا هەرێما كوردستانێ دبێژیت، سوپاسییا هەوە دكەم و هەلوەستێ هەوە بلند د هەلسەنگینم د رەفتاركرنا راست و دروست دا، وەكو ئەوا سەرۆك بارزانی د پەیامەكێدا ل تۆرا ئێكسدا هەلوەستێ خوە بۆ دووڤچوونا فەرمانەكا دیوانا سەرۆكایەتییا كۆمارێ بەلاڤكری.
هەر د پەیاما خوە دا، كاردینال ستاكۆ نڤیسی، سوپاس بۆ خودای ل دووماهیێ ژ ئەگەرێ دەستپێشخەرییا محەمەد شیاع سۆدانی، سەرۆك وەزیرێن ئیراقێ شاشی هاتنە راستڤەكرن، ئەڤێ چەندێ ژی ب پێدڤییەكا گرنگ دزانم بۆ سەقامگیرییا وەلاتی، چونكە هیچ رێكەكا دی بۆ چارەسەركرنا كێشەیان و چاكسازییا رەوشان ب دروست نزانم، ژ بلی دانوستاندنێن وێرەك و حەكیمانە كو ئەم هەموو ل سەر ئێك هەلوەست بین.
كاردینال لویس روفائێل ساكۆ، پاتریاركێ كلدانی ل ئیراقێ و جیهانێ ل دووماهییا پەیاما خوە رەخنێ ل سیستەم و سیاسەتا دەستهەلاتدارییا ئیراقێ دگریت و دبێژیت» ب خراب بەلاڤكرن و شۆركرنا دەستهەلاتێ و قۆرخكرنا دەستهەلاتێ ئاشتەوایی بدەستڤەناهێتن، لەوما بەلاڤكرنا دەستهەلاتان دڤێت ل سەر بنەمایێ دستووری بیت بۆ ئەوێ چەندێ حوكمڕانییەكا باش و دیموكراسی بۆ خزمەتكرنا وەلاتی و وەلاتییان بدەسڤەبهێتن.

دوهی ئێكشەمبی 23/6/2024، ل سەلاحەدین سەرۆك مەسعود بارزانی پێشوازی ل ئاندرۆ دیزلی كونسۆلێ گشتیێ نوو یێ بریتانیا ل هەولێرێ كر.
د دیدارەكێدا كو رۆزی كەیڤ، جێگرا بالیۆزێ بریتانیا ل ئیراقێ بەرهەڤ بووی، سەرۆك بارزانی سەرەرای ب خێر هاتنا شاندێ مێهڤان هیڤییا سەركەفتنێ بۆ قونسلێ نوو یێ بریتانیا ل هەولێرێ خواست د ئەركێ وی یێ نوو دا. هەروەسا ئاماژە ب پەیوەندیێن دۆستانە و دیرۆكی د ناڤبەرا گەلێ كوردستانێ و بریتانیا كر و هیڤی خواست پەیوەندی بەردەوام بن و زێدەتر بەر ب پێشڤە بچن.
ژ ئالیێ خوەڤە قۆنسلێ گشتیێ بریتانیا ل هەولێرێ سوپاسییا هەلوەستێ سەرۆك بارزانی كر و باس ل پەیوەندیێن د ناڤبەرا گەل و حوكمەتا هەرێما كوردستانێ و بریتانیا كر و بەرهەڤییا خوە نیشاندا بۆ بەردەوامیدان و باشتركرنا ئەوان پەیوەندییان.
رەوشا سیاسییا ئیراقێ و دەڤەرێ و مەترسیێن تیرۆرێ تەوەرەكێ دی یێ ئەڤێ دیدارێ بوون.

بەرپرسەكێ پارتی دیموكراتی كوردستان دبێژیت، پارتی بڕیاردایە پشكداریێ د پڕۆسەیا هەلبژارتنێن پەرلەمانێ كوردستانێ دا بكەت و لیستا بەربژارێن پارتی ژی یا بەرهەڤە وهەردەمێ دەرگەهێ پێشكێشكرنا ناڤێن بەربژاران هاتە ڤەكرن، پارتی دێ ناڤێن بەربژارێن خوە پێشكێشی كۆمسیۆنا بلند یا سەربخوە یا هەلبژارتنان ل ئیراقێ كەت.
شێخ ستار عەوالانی، بەرپرسێ لقێ 21 ێ پارتی دیموكراتی كوردستان بۆ رۆژنامەیا (ئەڤرۆ) گۆت « پارتی ل هەرێما كوردستانێ حزبا داهێنەرا دیموكراتیەتێیە و چو ئالیێن سیاسی نەشێن ئەڤێ مزایەدێ ب پارتی بفرۆشن، چونكە پشتی سەرهەلدانێ سەرۆك بارزانی ئێكەم كەس بوویە داخوازا ئەنجامدانا هەلبژارتنان كری و ل هەموو هەلبژارتنێن هەرێما كوردستانێ پارتی هێزا ئێكێ بوویە، نوكە ژی هەلبژارتن بهێنە ئەنجامدان دێ هەر پارتی دیموكراتی كوردستان هێزا ئێكێ بیت و چو ئالیێن سیاسی نەشێن هەڤڕكیا پارتی بكەن، چونكە پارتی هەم جەماوەرەكێ دلسۆز یێ هەی و هەم سەرۆك و سەركردایەتیەكا ب هێز ژی یا هەی، دەمێ پارتی گۆت ی پشكداریێ د پرۆسەیا هەلبژارتناندا ناكەین ژ پێخەمەت ئەنجامدانا پرۆسەیەكا ساخلەم و زەلال بوویە، مەرجێن پارتی ژی د دیاربوون كو داخوازا ڤەگەڕاندنا كورسیێن كۆتایا دكر، ژ بەر كو هەر ژ دەستپێكا شۆڕەشێن كوردان هەموو پێكهاتەیێن هەرێما كوردستانێ پشكداربووینە و وان ژی مینا گەلێ كورد خەبات كریە هەتا ئەوژی بگەهنە مافێن خوە، هەركەسەكێ دیرۆك خواند بیت ئەڤێ راستیێ ژی دزانیت كو پێكهاتەیێن هەرێما كوردستانێ رۆلەكێ مەزن د شۆڕەشا ئەیلوولا مەزن دا هەبوو، خالەكادی یا گەلەك گرنگ بۆ هەموو دەنگدەر و ئالیێن سیاسی ئەوبوو پارتی رازینەبوو نێزیكی 400 هزار كەس ل هەرێما كوردستانێ بهێنە بێبەهركرن ژ پڕۆسەیا دەنگدانێ د هەلبژارتناندا، كو ئەو هەموو دەنگدەرێن پارتی ب تنێ نەبوون بەلكو یێن ئالیێن دی ژی تێدا بوون و پارتی پێداگیری كر هەموو ئەو دەنگدەرێن ئاریشە بۆ هاتییە پەیداكرن مافێ دەنگدانێ یێ هەی و نابیت بهێنە بێبەهركرن ژ ئەوی مافی، نوكە پشكەك ژ داخوازیێن پارتی یێن هاتینە بجهئینان و پشكەك ژی ماینە، بەلێ سەركردایەتیا پارتی بڕیاردایە پشكداریێ دپڕۆسەیا هەلبژارتناندا بكەت و ئەم چاڤەڕێی فەرمانا سەرۆكێ هەرێما كوردستانێ دكەین بۆ دیاركرنا ژڤانەكێ نوو بۆ ئەنجامدانا هەلبژارتنێن پەرلەمانێ كوردستانێ».
ل دۆر بەرهەڤیێن پارتی دیموكراتی كوردستان و لیستا بەربژارێن پارتی بۆ هەلبژارتنێن پەرلەمانێ كوردستانێ، بەرپرسێ لقێ 21 گۆت » پارتی بەرهەڤی بۆ ئەنجامدانا هەلبژارتنان یێن كرین و ل سەر ئاستێن جودا پارتی بەرهەڤیێن خوە كرینە و هەردەمێ ژڤانێ هەلبژارتنان ژی ژلایێ سەرۆكێ هەرێما كوردستانێ ڤە هاتە دیاركرن دگەل رێنمایێن كۆمسیۆنێ دێ پارتی ژی پتر بەرهەڤیێن خوە كەت».
سەبارەت شێوازێ هەلبژارتنان ژی، دبێژیت» ئەڤێجارێ هەلبژارتنێن هەرێما كوردستانێ ل سەر چار بازنەیان هاتینە بەلاڤكرن، ئانكو دێ چار بازنەیێن هەلبژارتنان هەبن و ب گۆڕەی بڕیار و رێنمایێن كۆمسیۆنا بلند یا سەربخوە یا هەلبژارتنان ل ئیراقێ ل هەر بازنەیەكێ چەند كۆرسی هەبن پارتی دشێت دو بەرامبەر بەربژاران دیار بكەت، لیستا بەربژارێن پارتی ژی یا بەرهەڤە و هەردەمێ كۆمسیۆنا هەلبژارتنان دەرگەهێ پێشكێشكرنا ناڤێن بەربژاران ڤەكر، بێگومان دێ پارتی ژی لیستا بەریژارێن خوە پێشكێشی كۆمسیۆنێ كەت، ب گۆڕەی ئەو دابەشكارییا هاتییەكرن پارتی بۆ هەر دەڤەرەكێ بەربژارێن خوە یێن هەین».

ئەندامەكێ لژنا پەترۆل و غازێ ل جڤاتا نوونەرێن ئیراقێ راگەهاند: هەرچەندە وەزارەتا پەترۆلا ئیراقێ ب بەهانەیا هۆكارێ تەكنیكی دخوازیت چارەسەرییا بادەكا پەترۆلا هەرێمێ گیرۆ ببیت، بەلێ سەرۆكێ حوكمەتا هەرێما كوردستانێ و سەرۆك وەزیرێن ئیراقێ د رژدن ئەو كێشە بهێتە چارەسەركرن.
د. سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی و ئەندامێ لژنا پەترۆل و غازێ ل جڤاتا ناڤبری گۆت » پێشتر بڕیار بوو پڕۆژەیێ پەترۆل و غازێ بهێتە هنارتن بۆ جڤاتا نوونەران و بهێتە پەسەندكرن، بەلێ پاشی نەهاتە هنارتن و هاتە گیروكرن، بەلێ هیچ پەیوەندی ب ئەوێ چەندێ ڤە نینە ببیتە ئاستەنگ بۆ دوبارە هنارتنا پەترۆلا هەرێما كوردستانێ بۆ دەرڤە، چونكە نوكە دانوستاندنێن بەردەوام دهێنە كرن و پێنگاڤێن باش ژی یێن هاتینە هاڤێتن، بۆ ئەوێ چەندێ دوبارە هنارتنا پەترۆلا هەرێمێ بۆ دەرڤە دەستپێبكەت و ئەوی قانوونە ژی زێدەتر كەرتێ پەترۆلێ رێك دئێخیت».
گۆت ژی» سەرۆكێ حوكمەتا هەرێما كوردستانێ هەموو بزاڤ كرینە ئەو كێشە بهێتە چارەسەركرن و كۆمپانیێن پەترۆلێ ل هەرێمێ زیاندار نەبن، بەلێ وەزارەتا پەترۆلا ئیراقێ دخوازیت ب بەهانەیا تەكنیكی ئەوێ پرسێ گیرو بكەت و دخوازن هنارتنا پەترۆلا بەسرە بهێتە زێدەكرن، هەرچەندە راستە تێچوویێ پەترۆلا ئەوان كێمترە، بەلێ ژ روویێ ستراتیژی ڤە شاشییەكا مەزنە، چونكە هنارتنا پەترۆلا زێدەتر بۆ بەندەرێ جەیهان، ئەلتەرناتیڤی زێدە دكەت و مەترسیێن زێدەتر دروست دكەت، كو هەر دەمەكی كێشەیەك دروست ببیت، كێشە مەزنتر دبیت، لەوما نوكە تاكە ئاستەنگ و هۆكار ل پێشبەری دوبارە هنارتنا پەترۆلێ بۆ دەرڤە، تێچوویا دەرئێنانا پەترۆلا هەرێما كوردستانێیە».
دیاركر ژی» سەرۆكێ حوكمەتا هەرێمێ و سەرۆك وەزیرێن ئیراقێ د رژدن ل سەر ئەوێ چەندێ كو كێشە بهێتە چارەسەركرن، بەلێ كێشە ل وەزارەتا پەترۆلا ئیراقێیە و ئەو هۆكارن كێشە ب لەز نەهێتە چارەسەركرن، ژ بەر كو ناخوازن هنارتنا پەترۆلا هەرێما كوردستانێ بۆ دەرڤە دەستپێبكەت و دخوازن هەردەم كارتەكا فشارێ بیت د دەستێ ئەواندا دژی هەرێما كوردستانێ بكاربینن و دخوازن گرفتان بۆ كۆمپانیێن هەرێمێ دروست بكەن و سزا بدەن، پلان ژی یا دەرەكییە بۆ ئەوێ چەندێ دەلیڤەیێن وەبەرئێنانا پەترۆلێ ل هەرێمێ كێمتر ببن، بەلێ چارەسەرییا ئەوێ پرسێ د قۆناغا دووماهیێ دایە و ل دووماهی كۆمبوون باسێ هەموو پرسان یا هاتییە كرن».
خویاكر» نوكە هەردو ئالی د دانوستاندنێن گەرم دانە و چاڤەڕێ دهێتە كرن د دەمەكێ كێمدا چارەسەرییا دووماهیێ بۆ بهێتە كرن و هنارتنا پەترۆلێ هەرێمێ دەستپێبكەت».
د. سەباحی رۆهنكر ژی» ب قەلەم و كاخەز و داتا، زیانا راگرتنا هنارتنا پەترۆلا هەرێما كوردستانێ بۆ دەرڤە دگەهیتە 16 ملیار دۆلاران، لەوما گرنگە ب لەز پڕۆسەیا هنارتنا پەترۆلا هەرێمێ بۆ دەرڤە دەستپێبكەت».

هاریكارێ بەرپرسێ مەكتەبا رێكخستنا پارتی دیموكراتی كوردستان ل سلێمانیێ – هەلەبجە راگەهاند: ل رۆژا سێشەمبی 25/6/2024 كۆنفرانسێن ناڤخوەیی یێن پارتی دێ دەست پێكەن و سەرۆك بارزانی ب خوە دێ چاڤدێرییا پڕۆسەیێ كەت، هەروەسا دیاركر :بەرهەڤیێن تمام یێن هاتینە كرن و هەموو پێدڤی ژی یێن هاتینە دابینكرن.
دیاری حسێن، هاریكارێ بەرپرسێ مەكتەبا رێكخستنا پارتی دیموكراتی كوردستان ل سلێمانیێ – هەلەبجە گۆت » بەرهەڤیێن تمام یێن هاتینە كرن بۆ دەستپێكرنا كۆنفرانسێ ناڤخوەیێ حزبێ، لژنەیەكا بلند یا هاتییە دروستكرن و ل سەر ئاستێ مەكتەبا رێكخستنێ و ل سەر ئاستێ لقان ژی لژنە یێن هاتینە دروستكرن، ل سەر ئاستێ ناوچان ژی ب هەمان شێوە لژنە یێن هاتینە دروستكرن، بۆ هەموو ئۆرگانێن حزبی ژی لژنە یێن هاتینە دروستكرن بۆ هەلبژارتنان، پڕۆسە ژی ل دەمێ خوە دێ دەستپێكەت و ل دەستپێكێ ل بنكە و رێكخراوان، پاشی ل لژنێن ناوچان و پاشی ل لقان و مەكتەبێن رێكخستنان دێ بڕێڤەچیت».
دیار حسێن گۆت ژی» چاڤەڕێ دهێتە كرن ب كێمتر ژ دو حەفتییان پڕۆسە ب دووماهی بهێت و ئەنجام ژی بهێنە راگەهاندن، ب جۆرەكی بەرهەڤی هاتییە كرن پڕۆسە بێ گرفت بڕێڤەبچیت، چونكە كۆنفرانسێن حزبی ل هەر لقەكێ جودا دێ هێتە ئەنجامدان».
ئاماژەكر» سەرۆك بارزانی ژی دێ چاڤدێرییا پرۆسێ كەت، نەكو تنێ كۆنفرانسان، بەلكو ئەو ب خوە دێ چاڤدێرییا هەموو كاران كەت و ل دەمێ پێدڤی دا دێ رێنماییان دەركەت».

ئەندامەكێ سەركردایەتییا پارتی دیموكراتی كوردستان دبێژیت: د كۆنفرانسێن ناڤخوەیی یێن پارتی دیموكراتی كوردستان دا گوهۆڕینێن گرنگ دێ هێنە ئەنجامدان و دێ رۆلەكێ زێدەتر ب ئافرەتان هێتە دان.
هیوا گەیلانی، ئەندامێ سەركردایەتییا پارتی د داخۆیانییەكا رۆژنامەڤانیدا ل دۆر گرێدانا كۆنفرانسێن ناڤخوەیی پشتی كۆنگرەیێ 14 یێ پارتی گۆت » ئەنجامدانا كۆنفرانس و هەلبژارتنێن ناڤخوەیی یێن حزبی ب رێكا دەنگدانێ، پڕۆسەیەكا دیموكراتییا گەلەك گرنگە بۆ مە، هەم بڕیارا كۆنگرەیە و هەم ل پەیڕەوێ ناڤخوە ئاماژە پێ هاتییە دان كو دڤێت ب هەلبژارتنان بهێتە دیاركرن، ژ بەر ئەڤان هۆكاران گرنگە كادر نوونەرێن خوە ب هەلبژێرن، هەروەسا دێ خوینا نوو ب دەمارێن حزبێ دا لڤینێ كەت و دەلیڤەیا گونجای بۆ كادر و ئەندامێن مە هێتە پەیداكرن و هەر كادرەكی ماف یێ هەی بۆ هەر پلەیەكا حزبی خوە بەربژار كەت».
پتر گۆت » ئەڤە باشترین دەلیڤەیە بۆ ئەوێن دەمەكێ زۆرە نەهاتینە پێش، ژ بلی ئەڤێ چەندێ ژی ڤێجارێ ئافرەتان شانسەكێ مەزن یێ هەی بهێنە پێش چونكە ل هەموو ئۆرگانان ئەوان پشك یا هەی، ئەڤە ژی باوەربوونا پارتییە ب مافێ ئافرەتان، نوكە ژی هەموو پێرابوون یێن تمام بووین و دێ بزاڤێ كەین د دەمەكێ كێمدا كۆنفرانسان تمام بكەین».
سەبارەت ئەوێ چەندێ نەدبوو بەری هەلبژارتنێن پەرلەمانێ كوردستانێ كۆنفرانس بهێنە ئەنجامدان» گەیلانی گۆت » پارتی باوەری ب كادر و جەماوەر و لانگرێن خوە یا هەی، لەوما هیچ ترسەك نینە بەرۆڤاژی خواستا جەماوەرێ پارتی ل سەر كۆنفرانسایە و ئومێدەوارێن كاریگەرییەكا باش هەبیت».
سەبارەت جوداهییا ئەڤان كۆنفرانسان ل گەل یێن دی، گۆت » بابەتێ گرنگیدانا زێدەتر ب ئافرەتان كو دڤێت ل هەموو ئۆرگانان ئافرەت هەبن جوداهییەكا رۆهنە، رێنمایا تایبەت یا سەرۆك بارزانی گەهشتییە كو دڤێت ئەڤ كۆنفرانسە ب ئارانی و دیموكراتییانە بڕێڤەبچن و دەلیڤەیا ئێكسان ژی بۆ هەموو كادران بهێتە پەیداكرن و هیچ بەرپرسەكێ بلند یێ حزبی دەستێوەردانێ د هەلبژارتناندا نەكەت، راستەوخوە سەرۆك بارزانی دێ سەرپەرشتیێ كەت و ژ نێزیك ژی دێ چاڤدێریێ كەت».

دوهی سێشەمبی 11/6/2024، مەسرور بارزانی، سەرۆكێ حوكمەتا هەرێما كوردستانێ، بەرێ بنیاتێ پڕۆژەیێ هەڤچەرخ یێ عەلوا ئاكرێ دانا و د رێورەسمێ دانانا بەرێ بنیاتی پەیڤەك پێشكێشكر و ئەڤە دەقێ وێیە:
جهێ دلخوەشیێیە كو دبینین هەر رۆژ ل جهەكێ كوردستانێ، بەرێ بنیاتی بۆ پڕۆژەیەكی دهێتە دانان یان پڕۆژەیەك دهێتە بجهئینان و پێشكەفتن ل كوردستانێ یا بەردەوامە.
خوەشحالم جارەكادی دهیچمە دەڤەرا ئاكرێ و بەردەڕەش و ل قەزا ئاكرێ مە بۆ دانانا بەرێ بنیاتی بۆ پڕۆژەیەكێ گرنگ كو پڕۆژەیێ بازارێ هەڤجەرخ یێ فێقی و عەلوێیە.
ئاكرێ ئێك ژ كەڤنترین باژێرێن كوردستانێیە و ئێك ژ كەڤنترین قەزایێن كوردستانێ و ئیراقێیە، دیرۆكەكا گەلەك كەڤن یا هەی. ژ روویێ جوگرافی و ئابۆری ڤە، دەڤەرەكا گەلەك گرنگ و زەنگینە، ب تایبەتی ژی د بوارێ چاندنێدا. ژ روویێ گەتوگوزاری ژی دەڤەرەكا گرنگە و چەندین جهێن گەشتیاری یێن لێ هەین. پلانا حوكمەتا مە ئەوە كو د ئەڤان هەردو بواراندا ئەڤێ دەڤەرێ زۆرتر پێشبێخین و دەلیڤەیێن كاری پەیدا بكەین.
بەری كو بهێمە ڤێرێ، من سەرەدانا هندەك جوتیاران كر ل زەڤیێن چاندنا پتاتان و ل گەل هەژمارەكا ئەوان جوتیاران ئاخڤتم و من گوهلێگرت، جهێ دلخوەشیێیە كو دبینین بەرهەمێ پتاتێ ل كوردستانێ رۆژ ب رۆژ زێدەتر دبیت و نوكە گەلەك زێدەتر ژ پێدڤییا ناڤخوەیی، پتات ل كوردستانێ دهێتە بەرهەمئینان و شێوەیێ چاندنێ ژی بەر ب شێوەیەكێ زانستی و پێشكەفتی دچیت. ئەڤ بەرهەمە نە تنێ بۆ كوردستانێ، بەلكو دشیاندایە پێدڤییا هەموو ئیراقێ ژی دابین بكەت و پێنگاڤێن پێدڤی ژی یێن هاتینە هاڤێتن بۆ هنارتنا بەرهەمێ پتاتا خۆمالییا كوردستانێ بۆ دەرڤەی وەلاتی، دیارە خواستەكا مەزن ژی یا ل سەر هەی.
د چارچۆڤەیێ بەرنامەیێ هەمەجۆركرنا داهاتێن كوردستانێ ژ ئالیێ ئەڤێ حوكمەتێ ڤە، مە گەلەك گرنگی ب بابەتێ چاندنێ ل كوردستانێ دایە و مە شۆڕەشەك ل چاكسازییا چاندنێ ل كوردستانێ یا دەستپێكری. بەلێ ئەڤە دەستپێكە، هێشتا گەلەك پێنگاڤ یێن ماین بۆ ئەوێ چەندێ ئەم بشێین كەرتێ چاندنێ ل كوردستانێ بگەهینینە ئاستەكێ ستانداردێ جیهانێ كو نەكو هەر تنێ مفا بۆ خەلكێ ئەڤێ دەڤەرێ و جوتیاران هەبیت، بەلكو ببیتە سەلكا خۆراكی بۆ هەموو ئیراقێ و بۆ دەڤەرێ ژی. ئەڤە ژی دیسان دێ رێخوەشكەر بیت بۆ ئەوێ چەندێ ل كەرتێ پیشەسازی و دروستكرنا كارگەهان ژی پێنگاڤێن دی بهێنە هاڤێتن و دەلیڤەیێن كاری د ئەڤان بواراندا ژی زێدەتر بهێنە پەیداكرن.
دەمێ من ل گەل ئەڤان جوتیارن گەنگەشە دكر، هندەك گازندە هەبوون، ئێك ژ ئەوان گازندەیان ئەو بوو كو بەرهەمێ پتاتێ ژ دەرڤە و ژ هندەك سنۆران دهێتە هەرێما كوردستانێ كو دبیت كاریگەرییەكا نەرێنی ل سەر بەرهەمێ ناڤخوەیێ جوتیاران هەبیت. ئەم وەكو حوكمەت دێ دووڤچوونێ ل سەر ئەڤی بابەتی كەین. وەزیرا چاندنێ یا ل ڤێرێ و ل گەل وەزارەتا دارایی ژی دێ دووڤچوونێ كەین بۆ ئەوێ چەندێ ب مەبەستا پشتەڤانییا جوتیاران، ئەو بەرهەمێن كو ل ناڤ هەرێما كوردستانێ دهێنە بەرهەمئینان، رێكێ نەدەین ژ دەرڤە بهێن، بۆ ئەوێ چەندێ پشتەڤانییا جوتیاران یا بەردەوام بیت. هەكە مە دیت ژی كو ب شێوەیەكێ نە قانوونی ئەم كارە دهێتە كرن، پێرابوونێن پێدڤی دێ ل بەرامبەر هێنە وەرگرتن. ژ ئالییەكێ دی داخوازییا وان جوتیاران ئەوبوو كو بابەتێ ئاڤێ و بەنداڤان بهێتە چارەسەركرن. هەر د بەرنامەیێ حوكمەتێ دایە كو ئەم چەندین بنداڤێن دی ژی دروست بكەین، ئێك ژوان بەنداڤا (ئیسماڤا باكرمان) كو دێ مفایەكێ مەزن گەهینیتە دەشتا ناڤكۆرێ و جوتیارێن دەشتا ناڤكۆرێ و بەرهەمێ ئەوان زەڤیێن گەلەك ب خێر و بەركەت ژی دێ گەلەك زێدەتر لێكەت.
هەر د بەرنامەیێ حوكمەتا هەرێما كوردستانێ و د چارچۆڤەیێ گرنگیدان ب هەموو دەڤەرێن كوردستانێ، مە گرنگییەكا مەزن ژی ب سنۆرێ ئاكرێ دایە، چەندین پڕۆژە د بوارێن رێك و پرا و ئاڤێ و كارەبێ و ئاڤاكرنا قوتابخانەیان و دروستكرنا زانكۆیێ ل ئاكرێ یێن هاتینە ئەنجامدان.
وەلاتیێن خوەشتڤی پێدڤی ب خزمەتكرنەكا زێدەترە، ب پشتڕاستی ڤە ل پاشەڕۆژێ گەلەك پڕۆژەیێن دی بۆ وان دێ هێنە بجهئینان.
ئارمانجا سەرەكییا مە هەمەجۆركرنا ئابۆری و ژێدەرێن داهاتی و دروستكرنا ژێرخانەیەكا ب هێزە د چارچۆڤەیێ گرنگیدان و پێشئێخستنا كەرتێ چاندنێ، ئەڤە ژی ئێك بوو ژ وان كارێن كو مە هەتا نوكە ئەنجامداین. بۆ ڤێ مەبەستێ ب هاریكاری ل گەل كەرتێ تایبەت، كە دەست ب ئەنجامدانا چەندین پڕۆژەیێن گرنگ كریە ژ وان دروستكرنا چەند دەڤەرێن پیشەسازییا خوارنێ و ب بازاركرنا گەنمێ هەرێما كوردستانێ و هنارتنا بەرهەمێ جوتیارێن مە بۆ بازارێن دەرڤە. مە چەندین بەنداڤێن جۆراوجۆر ل دەڤەرێ جودا دروستكرینە كو دێ بنە پشتەڤان بۆ بەرهەمێ خۆمالی و جوتیاران، هەروەكو من باسكری. هەروەسا د بەرنامەیێ مەدایە و مە ل گەل حوكمەتا فیدرالی ژی دانوستاندن كریە ل سەر دەستپێكرن ب دروستكرنا بەنداڤا ئیسماڤا.
دەڤەرا ئاكرێ ب چەندین بەرهەمێن چاندنێ یا ناڤدارە، وەكو برنج و پتات و تەحین و سماق، مە هندەك ژ وان ل ڤێرێ دیتن. بێگومان دێ هاریكارییا وان كەین كو ئەڤ بەرهەمە بهێتە هنارتن بۆ دەرڤە، هەرچەندە ئەز یێ ئاگەهدارم كو هنارتنا هندەك ژ ئەوان بەرهەمان یا دەستپێكری و بۆ دەرڤە دهێنە هنارتن، بەلێ دێ بزاڤێن خوە كەین بۆ ئەوێ چەندێ بازارێن زێدەتر بۆ بەرهەمێ ناڤخوەیی و بۆ هەموو جوتیارێن كوردستانێ ببینین.
دەستخوەشیێ ل كۆمپانییا جێبەجێكار دكەم بۆ ئەڤێ پڕۆژەیێ گرنگ و پێدڤییە ل سەر ئاستێ ستانداردێ نێڤدەولەتی بیت، هەروەسا ئەز د وێ باوەریێ دامە كو دێ پشتەڤانییەكا زێدەتر بۆ جوتیاران پەیدا كەت، ڤەكرنا ئەڤێ بازاری، دێ بیتە پالپشتییەك بۆ پێشئێخستنا كەرتێ چاندنێ ل سەر ئاستێ كوردستانێ.