هەولێر، قائید میرۆ

بەرپرسەكێ پارتی دیموكراتی كوردستان ئاشكراكر، پارتی یا بەرهەڤە بۆ پشكداریێ د پرۆسەیا هەلبژارتنێن پەرلەمانێ كوردستانێدا و دبێژیت، پارتی یا خوە بەرهەڤكری بۆ هەلبژارتنان و شانسێ پارتی ژی ژ هەموو ئالیێن دی یێن سیاسی زێدەتر بۆ بدەستڤەئینانا دەنگان وئەم د پشتڕاستین دێ ئەنجامێن باش بۆ پارتی هەبن ودێ رێژەیەكا مەزن یا دەنگان بدەستڤەئینیت.
كرمانج عزەت، بەرپرسێ لقێ ٢٦ێ پارتی دیموكراتی كوردستان بۆ رۆژنامەیا (ئەڤرۆ) گۆت « ل دەستپێكێ ژی مە داخواز نەكربوو پرۆسەیا هەلبژارتنان بڕێڤە نەچیت، تنێ پارتی گۆتبوو مە تێبینی ل سەر رێڤەچوونا پرۆسەیا هەلبژارتنان یێن هەین و پشكداریێ ناكەین، د دەمێ نوكەدا تێكگەهشتنێن باش بۆ ئەنجامدانا پرۆسەیا هەلبژارتنێن پەرلەمانێ كوردستانێ و چارەسەركرنا ئاریشەیێن هەمبەری ئەڤێ پرۆسەیێ یێن هەین، لەوڕاژی پارتی بڕیاردایە پشكداریێ د پرۆسەیا هەلبژارتنان بكەت و بەرهەڤی ژی ژئالیێ پارتی دیموكراتی كوردستان یێن هاتینە كرن ول كۆمسیۆنێ ژی ناڤێ خوە یێ تۆماركری، ئەم خەلكێ كوردستانێ پشتڕاست دكەین نوكەژی شانسێ پارتی ژ هەموو ئالیێن سیاسی یێن هەرێما كوردستانێ زێدەترە بۆ پرۆسەیا هەلبژارتنان و هەموو ئالیێن سیاسی ئالییەكی بیت و پارتی تنێ ئالییەكی بیت، پارتی دێ شانس زێدەتربیت، چونكە پارتی جەماوەرەكێ خۆڕاگر یێ هەی و د هەموو هەلبژارتناندا پێگەهێ جەماوەریێ پارتی دیار دبیت و پێگەهێ ئالیێن دی ژی یێ دیارە».
كرمانج عزەت گۆت ژی» مە باش یا بەرهەڤكری بۆ پشكداریێ د هەلبژارتنانجا و ئەڤێجارێ جەماوەرەكێ مەزن دێ بەینە سەر سندووقێن دەنگدانێ و بەرۆڤاژی هەموو ئەو پیلان و ئاستەنگێن نەحەزێن پارتی بۆ پارتی بەرهەڤكرین دێ رێژەیەكا مەزن یا دەنگان بدەستڤە ئینین، ئەو كار و خزمەتێن پارتی پێشكێشی خەلكێ كوردستانێ كرین دیدەڤانن بۆ هەلسەنگاندنا پارتی وهەلوەستێ پارتی د هەموو پرساندا یێ خویا بوو لەوما هەلوەستێ ئالیێن دی ژی یێ خویابوو، ئەز باوەرم هەكە رۆژا دەنگدانێ هات و خەلكی پشكداری كر دێ خەلك بڕیارا خوە دەت كیش ئالی هەلبژێریت. وەكو حزب مە باش یا خوە بەرهەڤكری و ب تمامی د بەرهەڤین بۆ هەلبژارتنان، ل سەر ئاستێن جودا پارتی یا كار دكەت بەر ب پرۆسەیا هەلبژارنان وهەردەمێ ژڤانێ ئەنجامدانا هەلبژارتنان هاتە دیاركرن ئەم ژی دێ بەرهەڤبین و پشكداریێ كەین».

سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ راگەهاند: د هەشت سالێن بۆریدا 9 تاخێن ئەرەبا ل كەركووكێ یێن هاتینە دروستكرن، كو هەر ئێك ژوان دو جار هندی تاخێن رەحیماوە و شۆڕیجە نە. هەروەسا دبێژیت، رۆژ ل دووڤ رۆژێ ب ئەرەبكرن، جوداهی، داگیركرنا زەڤیێن كورد و توركمانان یا زێدەتر دبیت.
فەهمی بورهان، سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ، بۆ دووڤچوونا رەوشا كەركووكێ، سەرەدانا وی باژێری كربوو و ل گەل بەرپرسێن پارتی دیموكراتی كوردستان و ئێكەتی نیشتمانی كوردستان، بزاڤا گۆڕان، ئێكگرتوو ئیسلامی كوردستان و كۆمەلا دادگەری ل وی باژێری كۆمبوو.
فەهمی بورهان د داخۆیانییەكا رۆژنامەڤانیدا گۆت » كورد پشكەك نینن ژ دەستهەلاتا سیاسی و ئیداری ل كەركووكێ، دڤێت ئەوێ قۆناغێ دەرباز بكەین. رۆژ ل دووڤ رۆژێ رووبەرێ ب ئەرەبكرن، جوداهی د خزمەتگوزارییان و داگیركرنا زەڤیێن كورد و توركمانان یا زێدەتر دبیت. پێدڤییە رێ ل ئەوێ ب ئەرەبكرنێ بهێتە گرتن، كو ب ئەجیندایێن جودا ل ئەوی باژێرێ یا هەی».
فەهمی بورهان زێدەتر باس ل كاریگەریێن ب ئەرەبكرنێ كر و گۆت » ل هەشت سالێن بۆری 9 تاخێن ئەرەبا ل باژێرێ كەركووكێ یێن هاتینە دروستكرن، هەر تاخەك جارەكێ یان دو جاران ژ تاخێن رەحیماوە و شۆڕیجە مەزنترە، ژ مەزنترین تاخێن هەولێر، سلێمانیێ و دهۆكێ ژی مەزنترە».
ب دیتنا سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ، دیموگرافییا كەركووكێ یا هاتییە گوهۆڕین و گۆت » ئەوژی مەترسییەكا مەزنە و نابیت ب ساناهی دەرباز ببیت، رۆژانە خەلكی ژ دیالا، سەلاحەدین، ناڤەڕاست و باشوورێ ئیراقێ دئیننە كەركووكێ و ناسنامە و فۆرمێن ئاهێن خوارنێ بۆ دهێنە درۆستكرن».
سەبارەت پۆستێن كەركووكێ، گۆت » د هەشت سالێن بۆریدا 110 پۆست ژ دەستێ كوردان چوون. ئەوا دهێتە كرن ستەمەكا رۆهنە ل جوگرافییا كەركووكێ ئەوژی تنێ ب پارێزگەرێ ب وەكالەت نەهاتییە كرن».
سەبارەت كێشەیا زەڤیێن كەركووكێ و جوتیاران، گۆت » كێشە بەروەخت یێن هاتینە چارەسەركرن. هەموو كێشەیێن كەركووكێ ل گەل هەڤدو د گرێداینە، دڤێت پێكڤە بهێنە چارەسەركرن. روودان، هەلوەست و ئەجیندا وەسا نیشان ددەن، كو نیازەكا جدی بۆ چارەسەركرنا وان نەبیت و كەركووك یا ل بەردەم ب ئەرەبكرنا نوو».
پشتی زڤرینێ ژ كەركووكێ، سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ دێ راپۆرتەكێ ل دۆر رەوشا كەركووكێ ئاراستەی سەرۆكایەتییا جڤاتا وەزیرێن هەرێما كوردستانێ و بۆ سەرۆكێن هەموو هێزێن سیاسی ژی كەت، بۆ ئەوێ چەندێ بزانن رەوشا كەركووكێ گەهشتییە كیڤە.
سەبارەت هەلبژارتنا پارێزگەرێ نوو یێ كەركووكێ، فەهمی بورهان دبێژیت» مە ئومێد یا هەی پشتی جەژنا قوربانی كۆمبوونا جڤاتا پارێزگەها كەركووكێ بهێتە كرن، پرسا پارێزگەرێ كەركووكێ دێ ئێكلابیت. ئەوا ل كۆمبوونان مە تێبینی كری، پێكهاتەیێ ئەرەب وەكو پێدڤی ناهێتە پێش، بۆ گەنگەشا جدی ب مەبەستا دانانا پارێزگەرێ كەركووكێ».
هەروەسا گۆت » پێكهاتەیێ توركمان ژی یێ نیگەرانە، چونكە توركمانان هیچ مفایەك ژ ئەڤێ گیروبوونێ نەدیتییە، شەش مەهە راكان جبووری ب وەكالەت ب كەیفا خوە و بێ چاڤدێری یێ كاردكەت ودرێژیێ ب كارێن خوە ددەت» دیاركر ژی» هیچ كەسەك ژ ئەڤێ رەوشێ یێ مفادار نینە، ژ بلی پێكهاتەیێ ئەرەبی و ب دیاركری حزبا راكان جبووری و راكان جبووری ب خوە ژی».

وەزیرێ پەترۆلا ئیراقێ ئاشكراكر: پێشڤەچوون بۆ گەهشتن ب رێككەفتنێ ل دۆر دەستپێكرنا هنارتنا پەترۆلا هەرێما كوردستانێ یا هەی و ل گەل توركیا د دانوستاندنان داینە.
حەیان عەبدولغەنی، وەزیرێ پەترۆلا ئیراقێ گوت» بۆ دەستپێكرنا هنارتنا پەترۆلا هەرێما كوردستانێ دێ ل گەل حوكمەتا توركیا دەست ب دانوستاندنان كەین».
وەزیرێ پەترۆلا ئیراقێ دوپاتكر د دانوستاندنێن وان دا ل گەل حوكمەتا هەرێما كوردستانێ و كۆمپانیێن پەترۆل و غازێ كو ل هەرێما كوردستانێ كار دكەن، پێشڤەچوونەكا باش یا هەی بۆ گەهشتن ب رێككەفتنێ.
ل رۆژا 9/6/2024، ئومێد سەباح، سەرۆكێ دیوانا سەرۆكایەتییا جڤاتا وەزیرێن هەرێما كوردستانێ كو سەرۆكایەتییا شاندێ دانوستاندكارێ حوكمەتا هەرێما كوردستانێ دكر، د بەرپەرێ خوە یێ فەیسبووكی بەلاڤكربوو كو ل بەغدا، شاندێ حوكمەتا هەرێما كوردستانێ و كۆمپانیێن پەترۆلی ل گەل حەیان عەبدولغەنی، وەزیرێ پەترۆلا ئیراقێ و بەرپرسێن وەزارەتا پەترۆلا ئیراقێ كۆمببوو.
ئومێد سەباح ئاماژە كربوو» د كۆمبوونێدا، دوپاتی ل سەر پرسێن د ناڤبەرا حوكمەتا هەرێما كوردستانێ و حوكمەتا ئیراقێ و وەزارەتا سامانێن سروشتی و وەزارەتا پەترۆلا ئیراقێ و خەرجیێن كۆمپانیێن پەترۆلێ و بابەتێ پڕۆسەیا هنارتنا پەترۆلا هەرێما كوردستانێ و تێچوویێ كۆمپانیێن پەترۆلی و میكانیزمێن رێچارەیێ بۆ ئەوان پرسان هاتنە گەنگەشە كرن».

سەرۆكێ حوكمەتا هەرێما كوردستانێ راگەهاند: ئەم ل گەل بەغدا یێن گەهشتینە قۆناغا دووماهیێ ژ چارەسەركرنا كێشەیان مووچەیان، هەروەسا دیاركر: خۆڕاگرییا مووچەخۆران رێگر بوو ل پیلانا هندەك كەس و ئالییان كو بۆ مەرەمێن تایبەت یێن خوە، دخواست هەرێما كوردستانێ لاواز بكەن.
دوهی ئێكشەمبی 9/6/2024، مەسرور بارزانی، سەرۆكێ حوكمەتا هەرێما كوردستانێ د رێورەسمێ ڤەكرنا سەنتەرێ (ئیگل پۆست) یێ تایبەت ب ڤەگوهاستن و گەهاندنێ ل هەولێرێ پەیڤەك پێشكێشكر و راگەهاند» ئەڤ سەنتەرە دێ بیتە ئەگەرێ زێدەتر پێكڤە گرێدانا باژێر و دەڤەرێن هەرێما كوردستانێ، هەروەسا گرێدانا وان ب دەڤەرێن دی یێن ئیراقێ و جیهانی».
ئەو كۆمپانی و سەنتەرە دەزگەهەكێ هەڤپشك یێ كەرتێ تایبەت و وەزارەتا ڤەگوهاستن و گەهاندنێ یە ل حوكمەتا هەرێما كوردستانێ، ب مەبەستا پێشڤەبرنا خزمەتگوزاریێن پۆستەی هاتییە پێكئینان. مەسرور بارزانی گۆت» ئەڤە پشكەكە ژ پلان و بەرنامەیێن حوكمەتێ، بۆ ب سەردەمیكرنا خزمەتگوزاریێن گشتی و ب دیجیتالكرنا وان، هەروەسا كێمكرنا بیروكراسیێ».
سەرۆكێ حوكمەتا هەرێما كوردستانێ گۆت ژی» د ئەڤی سەردەمیدا پۆستە و گەهاندن دەزگەهەكێ گەلەك گرنگ و چالاكە و خزمەتەكا زۆر دگەهینیتە وەلاتییان و ئاسانكاریێن زۆر بۆ بڕێڤەبرنا ژیار و كاروبارێن رۆژانە یێن وەلاتییان دروست دكەت».
دیاركر ژی» دابینكرنا ئەڤێ خزمەتگوزاریێ ب شێوەیەكێ پێشكەفتی، دێ بیتە ئەگەرێ كێمكرنا قەرەبالغیێ و بارگرانیێ ل سەر دەزگەهێن حوكمەتا هەرێما كوردستانێ و كەرتێ تایبەت، هەروەسا دێ بیتە هۆكارەك بۆ بەر ب پێشڤەبرن و گەشەپێدانا لێكگوهارتنا بازرگانییا ئەلكترۆنی د ناڤبەرا هەرێما كوردستانێ و دەرڤەی وەلاتێدا».
مەسرور بارزانی د پەیڤا خوە دا باس ل سیستەمێ ناڤونیشان و ئەدرەسان ژی كر و گۆت» پێدڤییە هەرێما كوردستانێ ب شێوەیەكێ گونجای و سەردەمیانە بهێتە رێكخستن و دڤێت ئالیێن پەیوەندیدار د زووترین دەمدا ل سەر ئەڤی بابەتێ كاربكەن».
سەبارەت مووچەیێن فەرمانبەران ژی، مەسرور بارزانی گۆت» مووچەخۆر پالپشت، پشتەڤان، بێهنفرەه و د خۆڕاگر بوون، ئەو پیلانا كو هندەك كەس و ئالییان بۆ مەرەمێن تایبەت یێن خوە بكارئینای و دخواست قەوارەیێ هەرێما كوردستانێ ب بلەاڤكرنا مووچەی و بودجەی ل سەر پارێزگەهاندنا لاواز بكەن، خۆڕاگرییا ئەوان (مووچەخۆران) وەكر سەرنەگریت».
سەرۆكێ حوكمەتا هەرێما كوردستانێ دیاركر ژی» بەردەوام ل گەل سەرۆك وەزیرێن حوكمەتا فیدرالی د پەیوەندیێدا بووین و ئەم یێن گەهشتینە قۆناغا دووماهیێ، هیڤیدارم كو ئەم بشێین د خزمەتا هەوەیێن خوەشتڤیدا كارەكی بكەین كو بابەتێ بودجە و مووچەی ب شێوەیەكێ بنەڕەتی بهێتە چارەسەركرن».
هەروەسا ئاماژەكر» هیڤیدارین د دەمەكێ نێزیكدا بەری جەژنێ، هەموو مووچەیێن مەها چار یێن هێزێن ئەمنی و مەها پێنج ژی بۆ هەموو مووچەخۆران بهێنە دابینكرن».
رۆهنكر ژی» هیڤیدارم ئێدی بابەتێ مووچەی نەبیتە دەنگوباسێ دەزگەهێن راگەهاندنێ و ئەم بشێین پەیوەندیێن خوە ل گەل حوكمەتا فیدرالی بێخینە سەر ئاستەكێ دروست و بەر ب پەیوەندیێن باشتر ژی پێنگاڤان ب هاڤێژین».

دوهی ئێكشەمبی 9/6/2024، نێچیرڤان بارزانی، سەرۆكێ هەرێما كوردستانێ ل هەولێرێ ل گەل پاتریك دۆرێل، بالیۆزێ فرەنسا ل ئیراقێ كۆمبوو.
د كۆمبوونەكێدا هەردو ئالییان داكۆكی ل پێشڤەبرنا پەیوەندیێن فرەنسا ل گەل ئیراقێ و هەرێما كوردستانێ كر و رۆناهی ئێخستە سەر دەلیڤەیێن بەرفرەهكرنا هاریكارییا هەڤپشك د هەموو بواراندا.
سەرۆكایەتییا هەرێما كوردستانێ د بەیاننامەیەكێ بەلاڤكر» سەرۆكێ هەرێما كوردستانێ و بالیۆزێ فرەنسا ل ئیراقێ د كۆمبوونێدا بۆچوون ل دۆر رەوشا هەرێما كوردستانێ لیكگوهارتن و د هەڤڕابوون ل سەر ئەنجامدانا هەلبژارتنێن پەرلەمانێ كوردستانێ ل دەمەكێ گونجای د ئەڤسالەدا ب پشكدارییا هەموو ئالیێن سیاسی و پێكهاتەیێن هەرێما كوردستانێ».
د تەوەرەكێ دی یێ كۆمبوونێدا باس ل گرنگییا دانوستاندنێن چارەسەركرنا كێشەیێن هەولێر – بەغدا هاتە كرن و بەرە و پێشڤەچوونا پەیوەندیێن هەردو ئالییان ب ئەرێنی هاتنە هەلسەنگاندن. سەبارەت ئەڤێ چەندێ بالیۆزێ فرەنسا ل ئیراقێ بزاڤێن سەرۆكێ هەرێما كوردستانێ بلند هەلسەنگاندن و پشتەڤانییا وەلاتێ خوە بۆ چارەسەركرنا كێشەیان دیاركر.
پاراستنا سەقامگیرییا سیاسییا ئیراقێ، رەوشا دەڤەرێ و چەند پرسێن جهێ گرنگییا هەڤپشك، ئالییەكێ دی ئەوێ كۆمبوونێ بوو.

پەیڤدارا كۆمسیۆنا بلند یا سەربخوە یا هەلبژارتنان ل ئیراقێ راگەهاند: پارتی دیموكراتی كوردستان ب فەرمی ئەو ئاگەهدار كرینە كو دێ پشكداریێ د هەلبژارتنێن پەرلەمانێ كوردستانێدا كەت، هەروەسا دیاركر كو دەرگەهێ وەرگرتنا لیستا بەربژارێن هەلبژارتنێن پەرلەمانێ كوردستانێ پاشی دێ هێتە ڤەكرن.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ د داخۆیانییەكا رۆژنامەڤانیدا گۆت» پارتی دیموكراتی كوردستان كۆمسیۆنا هەلبژارتنان ل ئیراقێ ئاگەهداركرییە د پشكداریكرنا وێ د هەلبژارتنێن خولا شەشێ یا پەرلەمانێ كوردستانێدا».
پەیڤدارا كۆمسیۆنا بلند یا سەربخوە یا هەلبژارتنان ل ئیراقێ گۆت ژی» پارتی دیموكراتی كوردستان نڤیسارا پشكداریكرنێ د هەلبژارتنێن پەرلەمانێ كوردستانێدا بۆ فەرمانگەها كاروبارێن پارت و رێكخستنێن سیاسی ل كۆمسیۆنا بلند یا سەربخوە یا هەلبژارتنان ل ئیراقێ هنارتییە».

شرۆڤەكارەكێ سیاسی دبێژیت: ئێكهەلویستییا هێز و ئالیێن سیاسی یێن كوردستانێ نیشانا سەركەفتنێیە، هەروەسا گۆت ژی هەكە ل ئاستێ پرسێن سیاسی یێن ناڤخوەیی و دەركی ئێكدەنگی هەبیت، دێ گەلەك كێشە و پرس هێنە چارەسەركرن.
ئاسۆ فایق، شرۆڤەكارێ سیاسی بۆ رۆژنامەیا (ئەڤرۆ) گۆت» دەمێ سەرۆك بارزانی و رەحمەتی مام جەلال، ب ئێكهەلویست چووینە بەغدا و پشكداری د نڤیسینا دستوورێ ئیراقێدا كری، شیان مافێن كوردان تێدا بهێنە جهگیركرن، هەردەمێ د پێكڤە شیان دەستگەفتان بدەستڤە بینن. ئاسۆ فایق گۆت ژی» ئەو پەرت و بەلاڤبوونا هەی و هەموو تشتێ خوە رادەستی حوكمەت و دادگەها فیدرالی بكەین، پەرلەمانێ مە نەمینیت و حوكمەت ببیتە كاربڕێكەر هەموو دزڤریت بۆ نەبوونا ئێكگرتنێ. نوكە پێنكاڤ د باشن بۆ ئەوێ چەندێ ئێكگرتن بهێتە دروستكرن بۆ بەرژەوەندییا ئاخ و خەلكێ كوردستانێ».
وی شرۆڤەكارێ سیاسی دیاركر ژی» ب پشتڕاستی ڤە دبێژم، تنێ مە ئێك هەلویست هەبیت دێ ئەڤێ قۆناغا كەفتینە تێدا دەرباز كەین، هەكە ژ روویێ ئابۆری و سیاسی و ئەمنی ڤە ئێك هەلویست بین كێشە رووب روویێ مە نابن».
ئاماژەكر» پێدڤییە بگەهینە خالێن هەڤپشك بۆ بڕێڤەبرنا هەلبژارتنێن زەلال و ئارام و دیموكراسی، تاكو وەلاتی ب ئازادی بەر ب سندووقێن دەنگدانێ بچن و دەنگێن خوە بدەن بۆ دیاركرنا نوونەرێن خوە ل پەرلەمانێ كوردستانێ و پێكئینانا حوكمەتا هەرێما كوردستانێ».
پتر گۆت» سەرۆكایەتییا هەرێما كوردستانێ ل سەردەمێ سەرۆك مەسعود بارزانی و نوكە ژی ل سەردەمێ نێچیرڤان بارزانی، پرا كۆمكرنا ئالییان بوو، نێچیرڤان بارزانی، سەرۆكێ هەرێما كوردستانێ كەسایەتییەكێ دبلۆماسییە ل سەر ئاستێ نێڤدەولەتی، سەرۆكایەتییا هەرێما كوردستانێ ل دۆر گەلەك ناكۆكیێن د ناڤبەرا ئالیێن سیاسی شیایە ئەوان ئالییان كۆمبكەت و د گەلەك پرسێن هەڤپشكدا بگەهنە رێككەفتنێ».
هەروەسا خۆیاكر» دووماهی سەرەدانا سەرۆكێ هەرێما كوردستانێ و جێگرێن سەرۆكێ هەرێمێ بۆ ئیرانێ و كۆمبوون ل گەل مەزنە بەرپرسێن ئەوی وەلاتی ژ وان ژی رێبەرێ بلند یێ ئیرانێ، دەستكەفتەكێ گەلەك باشبوو ژ روویێ ئابۆری و ئاسایشێ ڤە، هەروەسا هەكە روودانا كەفتنا فرۆكەیا سەرۆك كۆمارا ئیسلامییا ئیرانێ و وەغەركرنا وی نەهاتبا روودان، دا سەرۆكێ كۆمارا ئیسلامییا ئیرانێ سەرەدانا هەولێرێ كەت، ئەڤە پێنگاڤێن مەزن بوون كو هاتینە هاڤێتن»

هەولێر، قائید میرۆ

سەرۆكێ دەستەیا دەڤەرێن كوردستانی ئاشكراكر، د دەمێ نوكەدا رەوشا دەڤەرێن كوردستانی یێن ژ دەرڤەی ئیدارەیا هەرێما كوردستانێ زێدەتر یێن ئالۆزبووین، بەلێ مە هندەك سۆز ژ بەغدا یێن وەرگرتێن بۆ چارەسەركرنا ئاریشەیان و دبێژیت، مخابن دیاردەیا ب شیعەكرنا دەڤەرێن كوردستانێ ژی هاتیە دەستپێكرن و هەكە ب مەرەم ئەو بابەتە بهێتەكرن دێ رەوشێ ئالۆزكەت.
فەهمی بورهان، سەرۆكێ دەستەیا دەڤەرێن كوردستانی بۆ رۆژنامەیا (ئەڤرۆ) گۆت» ئاریشەیێن دەڤەرێن كوردستانی یێن ژ دەرڤەی ئیدارەیا هەرێما كوردستانێ هەر د بەردەوامن ول هەموو دەڤەران ئاریشە یێن هەین، پترییا ئاریشەیێن هەین ژی یێن ئەردی و جوتیارانە، لادانا بەرپرسێن كورد ل ئیدارەیێن وان دەڤەرێن بن دەستهەلاتا حوكمەتا فیدڕال و چەندین ئاریشەیێن دی ژی یێن هەین، ئاریشەیەكا دی ل ڤێ دووماهیێ یا سەرهەلدای ئەوژی ئەم هەست دكەین بێهنا شیعەگەریێ ل دەڤەرێن كوردستانی دهێت، هیڤیدارین ئەو شیعەگەری ب پلان و مەرەم نەبیت هەكە دێ رەوشا ئەوان دەڤەران گەلەك ئالۆزبیت، چونكە ب شیعەكرنا ئەوان دەڤەران پێشهاتەكا مەترسیدارە و پێدڤییە بهێتە راگرتن، ب دیتنا پشتی هەلبژارتنێن جڤاتێن پارێزگەهان ب تایبەتی ل كەركووكێ و نەینەوا گوهۆڕین ل دەڤەرێن كوردستانی یێن ژ دەرڤەی ئیدارەیا هەرێما كوردستانێ یێن پەیدابووین، هەكە رێككەفتن هەبیت و پارێزگارەكێ كورد بۆ كەركووكێ بهێتە دیاركرن ئەم باوەرین دێ هێشتا كاریگەری هەبن ل سەر چارەسەركرنا ئاریشەیێن ل كەركووكێ نوكە هەین، چونكە مخابن گەلەك جاران لەشكرێ ئیراقێ و دەزگەهێن ئیداری دەستێوەردانێ د ئاریشەیان دا دكەن و كاری بۆ بەرژەوەندیێن ئەرەبێن دەڤەرێ دكەن دژی كوردان، بێگومان كوردان ژی نوكە چو دەستهەلات نینە ل دەڤەرێن كێشە ل سەر».
سەرۆكێ دەستەیا دەڤەرێن كوردستانی یێن ژ دەرڤەی ئیدارەیا هەرێما كوردستانێ گۆت ژی» ل چەند رۆژێن بۆری وەكو شاندێ هەرێما كوردستانێ مە سەرەدانا بەغدا كر و ل گەل ئالیێن پەیوەندیدار چەندین كۆمبوون هاتنە ئەنجامدان، د سەرەدانا ڤێجارێدا بۆمە ئەو راستییە دیاربوو نوكە دەستهەلاتدارێن بەغدا یێن گەهشتینە ئەوێ باوەریێ هەرێما كوردستانێ یا رژدە ل سەر بجهئینانا مادەیێ ١٤٠ و چارەسەركرنا ئاریشەیا ئەوان دەڤەران، هەروەسا هندەك سۆز مە وەرگرتن ب تایبەتی وەزیرێ چاندنێ سۆزدایە دێ گوژمەكێ پارەی بۆ ئەرەبێن هاوردە هێتە مەزاختن هەتا ئەردێ كوردان داگیر نەكەن و ڤەگەڕن بۆ دەڤەرێن خوە، وەزیرێ داد و شاخەوان عەبدوللا، جێگرێ سەرۆكێ جڤاتا نوونەرێن ئیراقێ و وەزیرێ داد ژی گەلەك هاریكارن بۆ ئارامكرنا رەوشا ئەوان دەڤەران، ئەم ژی رژدین ل سەر چارەسەركرنا ئاریشەیێن ئەوان دەڤەران، چونكە مە دو ئاریشە ل دەڤەرێن كوردستانی یێن ژ دەرڤەی ئیدارەیا هەرێما كوردستانێ زێدەتر یێن هەین ئەوژی ئاریشەیا ئەرد و زەڤیێن جوتیاران دگەل ئینانا ئەرەبێن هاوردە و پەیداكرنا ئاریشەیان بۆ كوردێن ئەوان دەڤەران».

مامۆستایەکێ زانکۆیێ ل وەلاتێ فرەنسا دیار دکەت دڤێت نها داخوازیا سەرەکی یا کوردان ل تورکیا بابەتێ پەروەردا ب زمانێ کوردی بیت، چونکی ل تورکیا مەترسی ل سەر زمانێ کوردی هەیە و رێژەیا ئاخڤتنا ب کوردی د ناڤ گەنجان دا کێم بوویە، ئەو یەک ژی مەترسیەکا گەلەک مەزنە.

پرۆفیسۆر مستەفا ئاکین مامۆستایێ زانکۆیێ ل وەلاتێ فرەنسا دیار کر، نها ل تورکیا و باکورێ کوردستانێ مەترسیێن گەلەک مەزن ل سەر زمانێ کوردی هەنە، ب تایبەتی ژی ل باژێرێن باکورێ کوردستانێ رێژەیا ئاخڤتنا ب زمانێ کوردی هەر یا کێم دبیت، ژ بەر ڤێ یەکێ ژی گەلەک گرنگە کو نها ئێک ژ داخوازیێن سەرەکی یێن کوردان ل تورکیا بابەتێ پەروەردا ب زمانێ کوردی بیت و گۆت: (دڤێت هەموو سازی و رێکخستنێن کوردی ل تورکیا و باکورێ کوردستانێ دەست ب کەمپینێن مەزن بۆ پەروەردا ب زمانێ کوردی بکەن، نها دەمەک گونجایە و دڤێت ژ بۆ ڤێ یەکێ ژی کار بهێتە کرن، دڤێت سیستەمێ نها یێ پەروەردێ ل تورکیا بهێتە گوهۆڕین و وەکو چارەسەری ژی دڤێت زمانێ کوردی ببیتە زمانێ فەرمی یێ پەروەردێ ل تورکیا، ئانکۆ ل گەل زمانێ تورکی دڤێت زمانێ کوردی ژی ببیتە زمانێ فەرمی یێ پەروەردێ).
مامۆستایێ زانکۆیێ ئەو یەک ژی دیار کر، هەردەم مەترسی ل سەر زمانێ کوردی هەبووینە، لێ نها ژ بەر پێشڤەچوونا میدیا جڤاکی رۆژانە خەلک زمانێ کوردی بکار دئینن، لێ ئەو یەک گەلەک کێمە و دڤێت زمانێ کوردی ببیتە زمانێ فەرمی یێ پەروەردێ و هەروەسا گەلەک گرنگە سازی و رێکخستنێن کوردی ل باکورێ کوردستانێ ب رێیا چالاکیێن جودا جودا داخواز ژ خەلکی بکەن، هەم ل میدیا جڤاکی و هەم ژی ل مالێ و جهێن کاری ب کوردی بئاخڤن، ل میدیا جڤاکی هەموو نێرینێن خوە ب کوردی بنڤیسن، ئەو یەک دێ بیتە ئەگەرێ پێشڤەچوونا زمانێ کوردی و گۆت: (نها ل هەرێما کوردستانێ چەندین زانکۆ هەنە، ب هزاران قۆتابخانە ب زمانێ کوردی هەنە و هەروەسا ب سەدان تی ڤی هەنە، ئەو یەک گەلەک گرنگە و دڤێت ل باکورێ کوردستانێ ژی کار بۆ پێشڤەبرنا زمانێ کوردی بهێتە کرن، پێشڤەچوونا زمانێ کوردی دێ بیتە ئەگەرێ پێشڤەچوونا گەلەک بیاڤێن دی بۆ گەلێ کورد، ڤێجا گرنگە پارتێن سیاسی، سازی و رێکخستنێن کوردی نها ب رەنگەکێ جدی کار بۆ ڤێ یەکێ بکەن دا کو زمانێ کوردی ل گەل زمانێ تورکی ل تورکیا ببیتە زمانێ فەرمی یێ پەروەردێ).
پرۆفیسۆر مستەفا ئاکین د دووماهیا ئاخڤتنا خوە دا ئەو یەک ژی دیار کر، زمانێ کوردی ئێکە ژ زمانێن هەری دەولەمەند ل جیهانێ، سەرەرای زۆرداریێ و قەدەغەکرنێ، لێ زمانێ کوردی ژناڤ نەچوویە و ئەڤرۆکە ژی دڤێت هەم ب هەموو شیانێن خوە کار بۆ پێشڤەبرنا زمانێ کوردی بکەین.

سەرۆك مەسعود بارزانی دوهی ل سەلاحەدین پێشوازی ل محەمەد جەمیل ئەلمیاحی پارێزگارێ‌ واست و شاندەكێ‌ هەڤپەیمانیا واست ئەجمەل كر.
د دیدارەكێ‌ دا، رەوشا سیاسی و ئاستەنگێن پێشبەری سەقامگیری و گەشەپێدانا پارێزگەهێن ئیراقێ‌ گەنگەشە كر.
هەر د ڤێ‌ دیدارێ‌ دا، دوپاتی ل هەماهەنگی و كارێ‌ هەڤپشك د ناڤبەرا هەرێما كوردستانێ‌ و پارێزگەها واست و پارێزگەهێن دی یێن ئیراقێ‌ دا كر، ئەو ژی ژ پێخەمەت خزمەتكرنا وەلاتیان و ئاڤەدانی و مسۆگەربوونا سەقامگیری و گەشەكرنێ‌ د وارێن جودا جودا دا.