ئه‌ڤرۆ نيوز:
جۆن بۆلتن، شيره‌تكارێ ئاسايشا نه‌ته‌وى يا ئه‌مريكا راگه‌هاند، دۆنالد تره‌مپ، سه‌رۆكێ ئه‌مريكا دێ عادل عه‌بدولمه‌هدى سه‌رۆك وه‌زيرێن عيراقێ گازى كۆچكا سپى كه‌ت و ل هيڤيا وێ چه‌ندێ ينه پێشوازيێ لێ بكه‌ين.
بۆلتن، ئێكه ژ وان كه‌سێن ل گه‌ل سه‌رۆكێ ئه‌مريكا سه‌ره‌دانا بنگه‌هێ له‌شكرى يێ ئه‌مريكى ل ئه‌سه‌د ل ئه‌نبار كرى.
بۆلتن گۆت: “سه‌رۆك تره‌مپ دێ ژ نێزيك ل گه‌ل سه‌ركردێن له‌شكرى ل عيراقێ به‌ر ب پێشڤه‌چوون و پێنگاڤێن سه‌ركه‌فتنا ته‌مامى ب سه‌ر داعش دا به‌حس كه‌ت.
ئه‌ڤرۆ نيوز:
ئاخفتنكه‌رێ ب ناڤێ وه‌زاره‌تا ژ ده‌رڤه يا ئيرانێ سه‌ره‌دانا دۆنالد تره‌مپ بۆ عيراقێ ب سه‌ره‌دانه‌كا دزيانه ناڤ دبه‌ت و وه‌سان دده‌ته زانين كو سفكاتى بوو ب سه‌روه‌ريا عيراقێ.
به‌هرام قاسمى، ئاخفتنكه‌رێ ب ناڤێ وه‌زاره‌تا ژ ده‌رڤه يا ئيرانێ راگه‌هاند: “سه‌ره‌دانا ب دزيڤه يا دۆنالد تره‌مپ هه‌ڤدژى قانوونێن دبلۆماسيه و سڤكاتيه ب سه‌روه‌ريا عيراقێ، هێزێن ده‌ره‌كى يێن وان دوور يان نێزيك دێ نه‌چار بن خوه ژ هه‌موو ده‌ڤه‌رێ ڤه‌كێشن”.
ئه‌ڤرۆنيوز:
فه‌رماندێن حه‌شدا شه‌عبى وپه‌كه‌كێ ونوونه‌رێن عه‌ره‌بێن سونه وشيعێن شنگالێ، پێكئيانانا جڤاته‌كێ بۆ ب رێڤه‌برنا شنگالێ راگه‌هاند.
دراگه‌هاندنه‌كێ دا كو ئاراسته‌ى حوكمه‌تا عيراقى ولايه‌نێن په‌يوه‌نديدار يێن عيراقى كريه، پشكه‌ك ژ كه‌سايه‌تى ووه‌لاتيێن شنگالێ جڤاته‌كا به‌روه‌خت بۆ وى باژێرى دياركر.
حه‌يده‌ر شه‌شۆ، سه‌رۆكێ حزبا ديموكراتيا ئێزدى بۆ كوردستان 24 گۆت” ئه‌م ل سه‌ر دامه‌زراندنێ وێ جڤاتێ درازى نينين”.
گۆت ژى” ئه‌م بۆ وێ كۆمبوونێ هاتبووينه داخوازكرن، به‌لێ به‌رهه‌ڤ نه‌بووين چونكى جڤاته‌كا نه‌قانوونى ونه شه‌رعى يه وپه‌كه‌كه وحه‌شدا شه‌عبى باش دزانن كو ئه‌و پێنگاڤه دژى به‌رژه‌وه‌نديا شنگالێ يه وجادا شنگالى ژى ب ڤێ ره‌فتارێ يا رازى نينه”.
دياركر”هه‌ر ده‌مه‌كێ پارێزگه‌رێ نه‌ينه‌و فه‌رمانا دامه‌زراندنا ڤى جۆره جڤاتێ ده‌ربكه‌ت، دێ پێ رازى بين”.
مه‌حما خه‌ليل، قايمقامێ شنگالێ دبێژيت” ژبه‌ر وان گرۆپێن چه‌كدار ره‌وشا ئه‌منى يا شنگالێ خرابتر بوويه، هه‌كه ره‌وشا نوكه هه‌ى يا به‌رده‌وام بيت، ئه‌گه‌ر يێ هه‌ى شه‌ر وكاره‌ساتێن مه‌زن ددووڤ دا بهێن”.
خوياكر” ب زڤرينا پێشمه‌رگه‌ى بۆ شنگالێ وده‌ركه‌فتنا گرۆپێن چه‌كدار، دێ ئارامى بۆ قه‌زا شنگالێ زڤريت وئاواره ژى دێ زڤرن”.
ئەڤرۆ نیوز ،بارزان مزووری :
رێڤەبەرێ بەلاڤكرنا ئاڤا شێخان، مەجید عبدالكریم، بۆ ئەڤرۆ نیوز دیار كر كو ژبۆ دروستكرنا ئێكەم پرۆژێ ستراتیژی یێ ئاڤێ ل قەزا شێخان ب هەماهەنگی دگەل رێڤەبەریا ئاڤا دەوروبەرێن پارێزگەها دهۆكێ پێداچوون هاتیە كرن ئاڤا هەرسێ رووبارێن “خازر ،نێردوش،گومل” ل نێزیك پرا مەندان دبیتە ئێك رووبار كو مەزنترین پرۆژێ ئاڤا ڤەخارنێ بو قەزا شێخان بهێته دروست كرن ،
گۆت ژى : ئەڤ پرۆژە 80% دێ ئاڤێ دەتە دەڤەرا شێخان رۆژانە دشێت 5 هزار مترێن چارگوشە يێن ئاڤێ بدەتە مالان بتنێ ئاڤا ڤی پرۆژەی ناگەهیتە دەڤەرا ئەتروش وب ئه‌نجامدانا وى دێ 90% دەرگەهێن بیرێن ئاڤێ ل ده‌ڤه‌رێ هێنه داخستن ،
ناڤهاتی خوياكر: ل سنورێ ناحیا كەلەكچی دو هزار كانیێن ئاڤێ یێن هەین، به‌لێ ئاڤا وان ب هەروە دچیتە درووبارێ خازردا ورێژەكا كێم ژوان كانیان بۆ چاندنێ دهێنه بكارئینان وژئاڤا وان كانيان دێ مه‌زنترين پرۆژێ ئاڤێ ژێ دروست بيت.
ئه‌ڤرۆنيوز:
هژماره‌كا مووشه‌كان نيڤرۆيا ئه‌ڤرۆ پێنجشه‌مبى 27/12/2018 ل نێزيك باليۆزخانا ئه‌مريكى ل به‌غدا كه‌فتن خار.
ئه‌و هێرشا مووشه‌كى ل سه‌ر باليۆزخانا ئه‌مريكى ل به‌غدا، ل دووڤ مالپه‌رێ كوردستان تى ڤى، پشتى گه‌فێن توند يێن قه‌يس خه‌زعه‌لى، سه‌رۆكێ ميليشيا عه‌صائيب ئه‌هلولحه‌ق، هاته ئه‌نجامدان.
قه‌يس خه‌زعه‌لى، داواز ژ سه‌رۆكێ ئه‌مريكى دونالد ترامپ كريه هێزێن وه‌لاتێ خوه ژ عيراقێ ڤه‌كێشيت وگۆت” هه‌كه نه‌هێنه ڤه‌كێشان، مه ئه‌زموون وشيان يێن هه‌ين كو هێزێن ئه‌مريكى نه‌چار بكه‌ين ژ عيراقێ ده‌ربكه‌ڤن”.
ئه‌ڤرۆ نيوز:
مەسرور بارزانی شیرەتکارێ جڤاتا ئاساییشا ھەرێما کوردستانێ، پێشوازی ل جینین ھینیس بلاسخارت نوونەرا نوو یا سکرتێرێ گشتی یێ نەتەوەیێن ئێکگرتی ل ئیراقێ کر، سەرباری پیرۆزباھیێن خوە ل ئەرکێ نوو یێ بلاسخارتێ، بەرھەڤییا ھەرێما کوردستانێ بۆ ھەماھەنگی و کارئاسانی د بجھئینانا ئەرکێن وێ دا نیشان دا.
جینین ھینیس بلاسخارت نوونەرا نوو یا سکرتێرێ گشتی یێ نەتەوەیێن ئێکگرتی ل ئیراقێ پشته‌ڤانيا خوه بۆ كابينا بهێت يا حوكمه‌تێ نيشا دا .
د تەوەرەکێ دى دا ھەردو ئالیان بەحس ل کێشەیێن ئیراقێ و ئەگەرێن پاشخستنا چارەکرنا وان کر، ل سەر وێ پرسێ مەسرور بارزانی ئاماژە ب گرنگییا بجھئینانا تەمام یا دەستووری و دامەزراندنا سازیێن فیدرال کر.
ئه‌ڤرۆنيوز:
سه‌رۆك بارزانى ئه‌ڤرۆ پێنجشه‌مبى 27/12/2018 پێشوازى ل جێنين هێنيس نوونه‌را تايبه‌ت يا سكرتێرێ گشتى يێ نه‌ته‌وێن ئێكگرتى ل عيراقێ كر.
دديداره‌كێ دا سه‌رۆك بارزانى پێروزباهيا ده‌ست بكاربوونا جێنين هێنيس كر وه‌كو نوونه‌را نوو يا سكرتێرێ گشتى يێ نه‌ته‌وێن ئێكگرتى ل عيراقێ وهيڤيا سه‌ركه‌فتنێ بۆ خواست.
هه‌ر دوێ ديدارێ دا شه‌رێ دژى تيرۆرێ ونه‌ترسيێن هزرا تيرۆرێ ل سه‌ر ئاسايشا عيراقێ وده‌ڤه‌رێ هاته به‌حسكرن وسه‌رۆك بارزانى راگه‌هاند، راسته داعش ژ روويێ له‌شكرى ڤه‌ه هاته شكاندن، به‌لێ پێدڤيه هوكارێن سه‌رهلدانا تيرۆرێ بهێنه نه‌مينن، هه‌كه نه مه‌ترسيا تيرۆرێ ب شێوه‌كێ دى دێ سه‌رهلده‌ت وب پێدڤى ژى زانى كو شه‌رێ هزرى وجڤاكى وئابوورى دژى تيرۆرێ بهێته كرن.
هه‌ر دوێ كۆمبوونێ دا به‌حسێ په‌يوه‌نديێن هه‌رێما كوردستانێ وبه‌غدا وسه‌ره‌دانا هه‌يڤا بۆرى يا سه‌رۆك بارزانى بۆ به‌غدا هاته كرن وسه‌رۆك بارزانى پشته‌ڤانيا خوه بۆ عادل عه‌بدولمه‌هدى سه‌رۆك وه‌زيرێن عيراقێ نيشان دا وب سياسه‌تمه‌داره‌كێ مه‌زن ولايه‌نگرێ دانوستاندنێ هژمارت كو ب باشى دۆزا ره‌وا يا گه‌لێ كوردستانێ دگه‌هيت ودياركر كو كوردستان به‌رده‌وام رێيا لێكتێگه‌هشتنێ وديالۆكێ بۆ چاره‌كرنا كێشان دگريته به‌ر.
ئەڤرۆ نیوز:
ل سەلاحەدین ئەڤرۆ رۆژا پێنج شەمبی 27/12/2018 سەروک بارزانی پێشوازی ل سەروک وەزیرێن ڤاتیکان کاردینال پێترو پارولین و شاندێ دگەل دا کر، و د کومبوونەکێ دا بەحس ل فەرھەنگا پێکڤە ژیانێ و ئێکدو قەبوولکرنێ زێدەباری پەیوەندیێن ھەولێر و بەغدا و پرسا تیرورێ ھاتە کرن.
د دیدارەکێ دا سەروک وەزیرێن ڤاتیکان سلاڤ رێزێن تایبەت یێن قەداسەتا پاپایێ ڤاتیکان ب سەروک مەسعود بارزانی را گەھاندن، دیسان دەستخوشی ل سەروک بارزانی ھاتە کرن بۆ بزاڤێن وی یێن بەردەوام بۆ پێکئینانا حوکمەتا نوو یا ھەرێما کوردستانێ دیسان پاراستنا مەسیحیێن ل کوردستانێ و عیراقێ.
دووڤ دا سەروک وەزیرێن ڤاتیکان ئارمانجا سەرەدانا خوە بۆ ھەرێما کوردستانێ روون کر و راگەھاند ئەو دێ بزاڤێ کەن بارودوخێ ھەرێمێ و عیراقێ باشتر بکەن دیسان داخواز ژ سەروک بارزانی کر بارودوخێ ناوچەیێن نەینەوا و مووسل ژ لایێ ئەمن و ئاسایشێ ڤە باشتر بکەن داکو ئاوارەیێن ڤان دەڤەران ڤەگەرن.
د بەردەوامیا ئاخفتنا خوە دا سەروک وەزیرێن ڤاتیکان دلخوشیا خوە ھەمبەر پێکڤەژیان و ئیکدو قەبوولکرن و ئەمن و ئاسایشا ھەرێما کوردستانێ دیارکر دیسان دەستخوشی ل سەرو مەسعود بارزانی کر بەرامبەر رولێ وی بۆ باشترکرنا پەیوەندیێن ناڤبەرا ھەولێر و بەغدا و نەھێلانا کێشەیێن ناڤبەرا ھەردو لایان دا.
دەربارەی شەرێ تیرورستان ژی سەروک وەزیرێن ڤاتیکان ئاشکرا کر وی پێزانین ھەبووینە ل سەر وان قوربانیێن خەلکێ ھەرێما کوردستانێ داین د شەرێ ھەمبەر تیرورستان دا و خواست بەردەامی ب نەھێلانا ھزرا تیروری بھێتە کرن داکو بھێتە بنبرکرن.
ژلایێ خوە ڤە سەروک مەسعود بارزانی پێشوازیەکا گەرم ل سەروک وەزیرێن ڤاتیکان و شاندێ دگەل دا کر دیسان سوپاسیا قەداسەتا پاپایێ ڤاتیکان کر، پاشان ئاماژە ب فەرھەنگا پێکڤەژیانا خەلکێ ھەرێما کوردستانێ کر و راگەھاند، ل دەمێ ھێرشا تیرورستێن داعش خویشک برایێن مەسیحی ئاگەھدارکرینە ئەوان ژی ھەمان چارەنڤیسێ ھەڤپشک ھەیە د مرن و ژیانێ پێکڤە ھەیە.
سەروک بارزانی بەحس ل تاوانێن تیرورستێن داعش و قوربانیدانا خەلکێ کوردستانێ کر و ئەو چەندە ژی دیارکر پێدڤیە ل سەر کومەلگەھێ نیڤدەولەتی زێدەتر پشتەڤانیا خووشک و برایێن مەسیحی بکەت داکو ل وەلاتێ خوە بمینن ديسان داکو وەلاتێ خوە بجە نەھێلن.
سەروک بارزانی داخواز ژ کومەلگەھێ نیڤدەولەتی کر زێدەتر ھاریکاری و پشتەڤانیا ژین و ژیارا ھەموو پێکھاتەیان بکەت تایبەت ئاوارەیان، دیسان سەروک بارزانی ب شانازی ڤە بەحس ل فەرھەنگا پێکڤە ژیان و رێزگرتنا خەلکێ ھەرێما کوردستانێ بەرامبەر ئێکدو قەبوول کرن کر.
دەربارەی مەترسیا تیرورێ ژی ئاماژە دا وێ چەندێ کو ئەگەر وان ئەگەرێن پەیدابوونا تیرورێ چارەسەر نەکەن د ئایندەکێ نزیک دا دێ مەترسیەکا مەزنتر پەیداکەت.
ل دووماھیێ سەروک بارزانی ئاماژە دا پەیوەندیێن ناڤبەرا ھەولێر و بەغدا دا و دیارکر ھەردەم ئەو دگەل زمانێ دیالوگێ نە بۆ چارەسەریا کێشەیان و نوکە مژوولی چارەسەریا ڤان کێشەیانین و سەروک وەزیرێن عیراقێ عادل عەبدولمەھدی پشتەڤانیا خوە دیارکریە بۆ چارەسەریا ھەموو کێشەیان و باشترکرنا ژیانا خەلکی.
ئەڤرۆ نیۆز، قائید میرۆ:
سکرتێرا ئێکەتیا ئافرەتێن کوردستانێ ئاشکرا کر، تنێ د ئەڤسالە دا نێزیکی ٣٠٠ ئاریشەیێن ژنان ل پەیمانگەھا خێزانی یێن سەر ب ئێکەتیا ئافرەتێن کوردستانێ ھەنە و دبێژیت، ھندەک ژوان دھێنە ھنارتن بۆ دادگەھێ.
زێدەتر دکتۆرا ڤیان سلێمان، سکرتێرا ئێکەتیا ئافرەتێن کوردستانێ بۆ ئەڤرۆ نیۆز دیارکر” تنێ د ئەڤسالە دا ٢٠١٨ێ نێزیکی ٣٠٠ کەیسێن ژنان ل ئێکەتیا ئافرەتێن کوردستانێ ھەنە و ئەڤان ژنێن ئاریشە ھەی سەرەدانامە کریە بۆ چارەسەرکرنا ئاریشەیێن وان، مە پەیمانگەھەکا تایبەت بۆ پرسێن جڤاکی و خێزانێ ھەنە و بەردەوامژی کار دکەین بۆ دو مەرەما ئێک ئاریشە بھێنە چارەسەکرن و یا دوێی ژی رێژا توندوتیژیێ بھێتە کێمکرن.
دکتۆرا ڤیان سلێمان ئاماژەکر” ئەف کەیسێن ژنان یێن ل ئێکەتیا ئافرەتان ھەین ب رێیا کەسێن بسپۆر و سکرتاریەتێ دھێنە چارەسەرکرن، لێ یێن نەھێنە چارەسەرکرن ب رێیا پارێزەرێن مە دھێنە ھنارتن بۆ دادگەھێ، ئەڤێن پێدڤی ب رێڤەبەرایەتیا توندوتیژیێ ھەبیت دھێنە رەوانەکرن و ھەر ئێک ب شێوازێ خوە دھێتە چارەسەرکرن، چونکە ھندەک ئاریشە ھەنە ب ساناھی دھێنە چارەسەرکرن و یێن دژوار ژی دھێنە ھنارتن بۆ دادگەھێ.
نيشاندان