ئه‌ڤرۆنيوز:
سه‌رۆكێ ئه‌مريكى دونالد ترامپ ب نهێنى هاته عيراقێ وپشتى زڤريى هاتنا خوه ئاشكراكر.
سارا سانده‌رز، په‌يڤدارا كوچا سپى گۆت” دونالد ترامپى سه‌ره‌دانا عيراقێ كر ول وێرێ سه‌ره‌دانا شيره‌تكار وسه‌ربازێن ئه‌مريكى كر”.
كه‌نالێ ئێن بى سى نيوز يێ ئه‌مريكى ژى وێنێن ترامپى ل عيراقێ به‌لاڤكرن ونڤيسى ( سه‌رۆك ترامپ ل عيراقێ).
ئه‌ڤرۆنيوز:
شاره‌زايه‌كێ سه‌قاى يێ عيراقى دياركر كو سپێده‌يا سوباهى پێنجشه‌مبى 27/12/2018 پێله‌كا بارانێ دێ هه‌موو ده‌ڤه‌رێن عيراقێ ب خوه‌ڤه‌گريت ول سپێده‌يا ئه‌ينيێ 28/12/2018 دێ ب دووماهى هێت.
ساده‌ق عه‌تيه، شاره‌زايێ سه‌قاى يێ عيراقى زێده‌تر گۆت” ل رۆژا شه‌مبيێ 29/12/2018 پێله‌كا سه‌رمايێ دێ عيراقێ ڤه‌گريت ب تايبه‌تى هه‌رێما كوردستانێ كو پلێن گه‌رمێ ل كوردستانێ دێ چنه دبن سفرێ دا ودێ به‌فر باريت”.
گۆت ژى” ل رۆژێن پێنجشه‌مبى وئه‌ينيێ دێ بارانێن زۆر ل دهۆكێ وهه‌ولێرێ وسلێمانيێ وكه‌ركووكێ وباكوورێ مووسلێ بارن”.
ئه‌ڤرۆ نیۆز، ئه‌میر ئه‌ترووشى
لیژنا دووڤچوونا بازاری ل قایمقامیا دهۆكێ سه‌ره‌دانا چه‌ندین جهان ل تاخێ ماسیكا2 و زركا دا و د ڤێ سه‌ره‌دانێ دا نانپێژیه‌ك هاته داخستن.
د. ئاراز، ئه‌ندامێ لیژنا دووڤچوونێ بۆ ئه‌ڤرۆ نیۆز دیار كر، ئه‌ڤرۆ رۆژا چوارشه‌مبى 26/12/2018، لیژنا دووڤچوونا بازاری ل قايمقامیا دهۆكێ سه‌ره‌دانا چه‌ندین ماركێت و خوارنگه‌ه و جهێن بازرگانی كرن و ژ نێزیكی هایداری ره‌وشا ڤان جهان و پێگیریا وان ب رێنمایێن ساخله‌میێ بوون.
دكتور ئاراز گۆت: نانپێژیا پێل ل جادا 30 مه‌ترى ل تاخێ ماسیكا2 ژ به‌ر نه‌بونا ده‌ستووریا ساخله‌میێ بۆ ماوێ سێ رۆژان هاته داخستن و ماركێتا چار برا ب كوژمێ (٣٠٠) هزار دیناران هاته سزادان ژ به‌ر هه‌بوونا كه‌ره‌ستێن ئێكسپایه‌ر.
ئه‌ڤرۆنيوز:
پشتى حه‌فتيه‌كێ ژ بريارا سه‌رۆكێ ئه‌مريكى ب ڤه‌كێشانا هێزێن ئه‌مريكى ژ سووريێ، به‌رپرسه‌كێ عيراقێ ئاشكرا دكه‌ت كو له‌شكرێ ئه‌مريكى دو بنگه‌هێن دى يێن له‌شكرى ل رۆژئاڤايێ عيراقێ ونێزيكى سنورێ سووريێ دروست دكه‌ت.
فه‌رحان دلێمى، ئه‌ندامێ جڤاتا پارێزگه‌ها ئه‌نبار گۆت” له‌شكرێ ئه‌مريكى دو بنگه‌هێن نوو ل ده‌ڤه‌رێن ده‌شتێ ل ئه‌نبار دروست دكه‌ت”.
گۆت ژى” بنگه‌هێ له‌شكرى يێ ئێكێ ل باكوورێ باژێركێ رومانه يه يێ سه‌ر ب قه‌زا قايم ڤه ل سه‌ر سنورێ سووريێ ب دووراتيا 360كيلۆمه‌تران ژ رۆژئاڤايێ رومادى سه‌نته‌رێ پارێزگه‌ها ئه‌نبار وبنگه‌هێ له‌شكرى يێ دويێ ژى ل رۆژهه‌لاتا باژێرێ روتبه دهێته دروستكرن ب دووراتيا 310 كيلۆمه‌تران ژ رۆژئاڤايێ رومادى كو تنێ 100 كيلۆمه‌تران ژسنورێ سووريێ دووره”.
دياركر” دروستكرنا وان هه‌ردو بنگه‌هێن له‌شكرى بۆ هاريكاريا هێزێن عيراقى يه دكونترۆلكرنا سنورانه ورێگرتنه ژهاتنا چه‌كدارێن داعشێ بۆ ناڤ ئاخا عيراقێ”.
ئەڤرۆ نیوز، هۆشەنگ تاجر:
د. رەزوان بادینی سیاسەتمەدارێ رۆژئاڤایێ کوردستانێ بۆ ئەڤرۆ نیوز دیار کر کو تورکیا دخوازیت هەموو دەستهەلاتا کوردان ل رۆژئاڤایێ کوردستانێ و باکورێ سووریێ ژناڤ ببەت، ژ بەر هندێ ژی پشتی بریارا ترامپی تورک هەست دکەن کو سەرکەفتیێ ڤان روودانانن و دخوازن هەر زوو ئەنجامەکێ ب دلێ خوە بدەستڤە بینن.
ناڤهاتی هەروەسا دیار کر کو هەلویستێ روسیا وەکو یێ تورکیا نینە و روسیا دخوازیت کورد بگەهنە هندەک مافێن خوە و کورد د پاشەرۆژا سووریێ دا خوەدان رۆل بن، چونکو روسیا دزانیت هەتا کورد نەگەهنە مافێن خوە رەوشا سووریێ ژی ئارام نابیت.
ل دۆر پەیوەندیێن تورکیا و روسیا پشتی ڤەکێشانا هێزێن ئەمریکا ژ سووریێ ژی سیاسەتمەدارێ رۆژئاڤایێ کوردستانێ دیار کر کو رەنگە پشتی ڤەکێشانا هێزێن ئەمریکا هەلویستێ روسیا ل هەمبەر تورکیا ژی وەکو بەرێ نەبیت و بهێتە گوهۆرین. هندەک بەرپرسێن روسیا نها دبێژن تورکیا ل دۆر روودانێن ل سوووریێ راستیان بۆ مە ئاشکرا ناکەت، بابەتێ هەڤدیتنا پوتین و ئەردۆگانی ژی راست نەبوو و روسیا ژ هندەک تشتێن تورکیا دلگرانە.
ل دۆر هەڤدیتنێن شاندەکێ رێڤەبەریا باکورێ سووریێ و بەرپرسێن روسیا ژی دکتوری دیار کر کو هەڤدیتن هەنە لێ هەتا نها ناڤەرۆکا هەڤدیتنان ئاشکرا نەبوویە و رەوش ب گشتی ئالۆزە و مرۆڤ نزانیت کا دێ چ روو دەت.
ناڤهاتی د دووماهیا ئاخڤتنا خوە دا ئەو یەک ژی دیار کر کو هەموو دەمەکێ روسیا ژ هەلویستێ تورکیا ب گومان بوویە، هەبوونا هێزێن ئەمریکا ل سووریێ وەسا کربوو کو روسیا پێدڤی ب تورکیا بیت، لێ نها ئەو یەک نەما و ئەز ب باوەرم دێ ساربوون د پەیوەندیێن روسیا و تورکیا دا دروست بن و رەنگە ئەو یەک د بەرژەوەندیا کوردان دا بیت.
ئەڤرۆ نیوز، لەزگین جوقی:
بەرپرسا کارێن نۆشداری ل رێڤەبەریا گشتی یا ساخلەمیا پارێزگەھا دھۆکێ دیار کر کو بۆ باشتر خزمەتکرنا وەلاتیان ل سالا 2019ێ ساخلەمیا دھۆکێ دگەل رێکخراوا IMCخۆلەکا دوو رۆژی بۆ 25 کارمەند و نۆشداران ل سەر ھەوارھاتنا بلەز ڤەکر.
د. وەفا سالح روشدی، بەرپرسا کارێن نۆشداری ل رێڤەبەریا گشتی یا ساخلەمیا پارێزگەھا دھۆکێ دیار کر کو مەرەم پێ ئەوە پتر کارێ ساخلەمیێ بھێتە پێشڤەبرن دوارێ ھەوارھاتنا بلەز دا، چونکو دەمێ کەسەک تووشی روودانەکی دبیت یان ھەر حالەتەکێ دی پێدڤیە سەرەدەریا نۆشداران یا دروست دگەل دا بھێتە کرن ھەتا ژ جھێ روودانێ بۆ نەخۆشخانێ دھێتە ڤەگوھاستن، ژ بەر کو ئەڤ قووناغە گەلەک یا ھەستیارە بۆ پاراستنا ساخلەمیا برینداری یان کەسێ تووشی روودانێ بووی.
ژ ئالیێ خوە ڤە ھەیسم عەبدی، بەرپرسێ بنگەھێ ھەوارھاتنا بلەز 122 ل دھۆکێ دیار کر کو ئەڤ جۆرێن خۆلێن مەشقدانی گەلەک دگرنگن بۆ ستافێ ھەوارھاتنا بلەز داکو باشتر خزمەتا وان کەسان بھێتەکرن یێن تووشی روودانێن ھەمە جۆر دبن دەمێ ژ لایێ کارمەندێن ھەوارھاتنا بلەز ڤە دھێنە ڤەگوھاستن بۆ نەخۆشخانان.
ناڤھاتی ئاشکرا کر کو سەنتەرێ ھەوار ھاتنا بلەز ب 11 کارمەندان ڤە پشکداری د ڤێ خۆلی دا کریە داکو دگەل پشکدارێن دی یێن ژ دەڤەرێن جۆدا جۆدا ھاتینە دھۆکێ پێکڤە کار بکەن و مفایی ژ خۆلی وەرگرن و گۆت: “ئەم وەکو ستافێ 122 ب شێوەیەکێ پراکتیکی و تیوری د ڤێ خۆلێ دا د پشکدارین و سەربوورا خوە نیشا وان پشکداران د دەین دەمێ کەسەک د مەترسیێ دا بیت دێ چەوا ژ وێ مەترسیێ رزگاربیت”.
ئه‌ڤرۆ نیوز:
ئه‌ڤرو سپێدێ 26-12-2018ل هولا رێڤه‌به‌ریا پولیسان ب ئاماده‌بونا فه‌رهاد ئه‌مین ئه‌تروشی پارێزگه‌رێ دهوكێ وسه‌روكێ دادگه‌ها تێهه‌لچونێ وسه‌روكێن زانكویێن دهوكێ ونه‌وروز وچه‌ند به‌رپرسێن حزبی وئیداری وله‌شكری رێ ورسمێن ڤه‌كرنا تاقیگه‌هێن به‌لگێن گونه‌هان هاتنه گێران.
لبه‌راهیێ لیوا تارق احمد رێڤه‌به‌رێ پولیسێن پارێزگه‌ها دهوكێ په‌یڤه‌ك پێشكێشكر وگرنگیا ڤه‌كرنا تاقیگه‌هێن به‌لگێن گونه‌هان به‌رچاڤكر وگوت: به‌ری نوكه بو ئاشكرنا به‌لگێن گرنگ مه به‌لگه بو تاقیگه‌ها مه‌لبه‌ندی ل هه‌ولێرێ دهنارتن وهنده‌ك جارا دناڤبه‌را 20 -50روژا ئه‌نجام گیروودبو لێ ب ڤه‌كرنا تاقیگه‌هێن به‌لگێن گونه‌هان ل دهوكێ هه‌موو كار ئاسانتر لێ دهێن وب كێمتر ژ48ده‌م ژمێرا به‌لگێن تاوانێ دێ هێنه ئاشكراكرن.
هه‌روه‌سا ئاماژه دا به‌رنامێن پێشئێخستنا كار وئه‌ركێن پولیسا وسیسته‌مێ نووی یێ ئه‌لكترونی یێ رێڤه‌به‌ریێن پولیسا پێ كاردكه‌ن وسوپاسیا وه‌زاره‌تا نافخو وپارێزگه‌ها دهوكێ كر بو پشته‌ڤانیا به‌رده‌وام بو سازیێن پولیسا ل سنورێ پارێزگه‌هێ.
پاش فلمه‌كێ دیكیومه‌نتاری ل دور دانان وب كارئینانا ئامیره‌تێن تاقیگه‌هێن به‌لگێن گونه‌هان هاته نمایشكرن.
هه‌ر بڤێ هه‌لكه‌فتێ پارێزگه‌رێ دهوكێ دپه‌یڤه‌كێدا پیروزباهی ل رێڤه‌به‌ریا پولیسان كر بو ڤه‌كرنا تاقیگه‌ها وده‌ست خوشی ل وان هه‌موو سازی وئه‌فسه‌ر وپولیسان كر یێن مه‌شق وراهێنان ل سه‌ر ب كارئینانا ئامیره‌تێن تاقیگه‌هان كرین وسه‌ركه‌فتن بو خواست .
هه‌روه‌سا گوت: ئه‌ركێ حكومه‌تێ وسازیێن ئێمناهیێ یه ئاسایش وئارامیێ بو وه‌لاتیان په‌یداكه‌ت وب ڤه‌كرنا ڤان تاقیگه‌هان ئاسایش وئارامی پتر دێ هێته به‌رقراكرن.
ل دوماهیێ ته‌كه‌زی ل سه‌ر پتر هه‌ڤكاریێ كر دناڤبه‌را سازیێن ئێمناهیێ ودادگه‌هان بو وێ یه‌كێ پتر ئارامی وئاسایشا وه‌لاتیان ل سنورێ پارێزگه‌هێ بهێته پاراستن وپششته‌ڤانیا كارگێریا پارێزگه‌هێ نیشاندا بو هه‌ر هاریكاریه‌كێ .
ئەڤرۆ نیوز، لەزگین جوقی:
بەرپرسێ کۆمکارا زیندانیێن سیاسی ل پارێزگەھا دھۆکێ بۆ ئەڤرۆ نیوز دیار کر کو جڤاتا وەزیران رازیبوون ل سەر قووناغەکا دی یا ناڤێن ئەنفالکریان و زیندانیێن سیاسی یێن دھۆکێ کر.
کامل زێوەیى، بەرپرسێ کۆمکارا زیندانیێن سیاسی ل پارێزگەھا دھۆکێ دیار کر کو بەری چەند رۆژان قووناغا بەلاڤکرنا 261 پارچێن ئەردی ل سەر زیندانیێن سیاسی ب دووماھیی ھات و نوکە کار ل سەر قووناغەکا دی یا بەلاڤکرنا پارچێن ئەردی ل سەر زیندانیێن سیاسی دھێتە کرن، ھەتا نوکە ئاشکرا نەبوویە قووناغا بھێت دێ چەند زیندانیێن سیاسی ژ وەرگرتنا پارچێن ئەردی مفاداربن و گۆت: “نوکە کار یێ بۆ وێ چەندێ دھێتەکرن ئەو زیندانیێن سیاسی یێن ئەرد وەرنەگرتین ھەموو د چەندین قووناغان دا پارچێن ئەردی وەرگرن”.
ناڤھاتی ئەو ژی ئاشکرا کر کو نوکە لیژنە یا ل سەر پەسەندکرنا ناڤێن نوو یێن سیاسی کاردکەت، چونکی دێ ھەموو ھێنە پشتکراستکرن و پاشی ھێنە راگەھاندن و گۆت: “نوکە لیستا ب ناڤێن 507 کەسان رازیبوون ژ لایێ جڤاتا وەزیران ڤە ل سەر ھاتیە کرن ڤە ھەروەسا ژی لیستەکا دی ژی ھاتیە ئەو ژی نێزیکی 300 ناڤێن ئەنفالکریان تێدانە و نوکە کار یێ ل سەر دھێتەکرن بۆ پشتراستبوونێ و ئەڤە ھەموو دێ ژ ئیمتیازاتان مفاداربن”.
ل دووماھیێ بەرپرسێ کۆمکارا زیندانیێن سیاسی ل پارێزگەھا دھۆکێ خویا کر کو بەری نوکە ھەر زیندانیەکێ سیاسی ل گۆر سالێن زیندانکرنێ ھاریکاری وەردگرت، بەلێ نوکە ئەڤ جۆری ھاریکاریێ ھاتیە ڕاگرتن و گۆت: “ھەکە رەوشا دارایی یا ھەرێما کوردستانێ باش بیت دێ دەست ب دانا ڤێ ھاریکاریێ ھێتەکرن ڤە”.
ئەڤرۆ نیوز، مەحمود نھێلی:
ل دووڤ ئامارەکا دادگەھا بەرایی یا دێرەلۆکێ د ئەڤ سالە دا ھژمارا گرێبەستێن ھەڤژینیێ ل دادگەھا دێرەلۆکێ گەھشتیە 386 حالەتان کو 19 ژ وان یێن دەرەکی نە و بتنێ دھێنە پەسەند کرن و ئەڤ ئامارە بەراورد ل گەل ئامارێن سالا بۆری کێم بووینە کو د بەرامبەر دا ل سالا بۆری 442 تومارێن پێکئینانا گرێبەستێن ھەڤژینیێ ھەبوون و ژ وانا 49 دەرڤەی دادگەھێ بووینە.
پارێزەر رزگار کەرەم، بۆ ئەڤرۆ نیوز دیار کر کو ل دووڤ ڤان ئاماران چو جوداھیەکا مەزن ل گەل سالێن بۆری نینە، بتنێ جوداھی یا د ھەڤژینیا دەرکی دا و گۆت: “ئەگەرێن ڤێ چەندێ ژی ڤەدگەرن کو خەلکێ ڤێ دەڤەرێ ھەموو ئەون یێن دەربەدەر بووین و ھندەک ژ وانا ژی ل دەرڤەی وەلاتی و ل تورکیا و ئیرانێ ھاتینە ڤە و ژ نوو گرێبەستێن ھەڤژینێی دروست دکەن، ھەروەسا ھندەک حالەتێن دی ژی یێن ھەین وەکو ژ ئەگەرێ بچووکاتیا تەمەنی ژ لایێ دادگەھێ ڤە نەھێنە مارکرن و ل دەرڤەی دادگەھێ مارە برین ئەنجامدایە، لێ ئەڤ حالەتە گەلەک دکێمن ب تایبەت ئەڤ سالە نەبووینە”.
ناڤھاتی ئاماژە دا وێ چەندێ کو ھەکە ڤێ خێزانێ زارۆ ھەبن و ژ لایێ رێنمایان ڤە د دروست بن ژ لایێ قانوونی ژی ڤە دروستە ئەو گرێبەست بێ ئاریشە دێ ھێتە پەسەندکرن.
نيشاندان