ئەڤرۆ نیوز ، زنار تۆڤی:

ئەڤرۆ دوشەمبی پێلەكا سەرمایێ‌ دەڤەرا كانی ماسێ‌ ڤەگرت و د ئەنجامدا رێژەكا باش یا بەفرێ‌ ل سەنتەرێ‌  و خالا گۆمركا سەرزێری باریە.

سەربەست سەبری ئاكرەیی رێڤەبەرێ‌ ناحیا كانی ماسێ‌ بۆ ئەڤرۆ نیوز دیاركر: ئەڤرۆ دوشەمبی 24/12/2018 رێژەكا باش یا بەفرێ‌ ل سەنتەرێ‌ ناحیا كانی ماسێ‌ و گوندێن ڤێ‌ دەڤەرێ‌ باریە و هەر ل گەل بارینا بەفرێ‌ تیمێن رامالینا بەفرێ‌ رێيێن سەرەكی یێن ناحیا كانی ماسێ‌ ل گەل خالا گۆمركا سەرزێری ژ بەفرێ‌ رامالینە.

گۆت ژى” دیسا ئەو رێیا ژ ناحیا بامەرنێ‌ دهێتە كۆمەلگەها بریفكا ل ناحیا كانی ماسێ‌ چەندین وەلاتیێن ناحیا كانی ماسێ‌ مابوونە ئاسێ‌ ژ ئەگەرێ‌ بارینا بەفرەكا زۆر، هەر چەندە ئەو گوند نە ب سەر ناحیا كانی ماسێ‌ ڤەنە، لێ‌ مە تیمێ‌ رامالینا بەفرێ‌ یا كانی ماسێ‌ بۆ وان ڤرێكرینە و ئەم شیاینە وێ‌ رێ‌ بۆ وان وەلاتیان ڤەكەین و دیسا رێیا گۆمركا سەرزێری هەر زوو هاتیە ڤەكرن، هەروەسا نوكە خەلك دشێن ب رەنگەكێ‌ ئاسایی هاتنوچوونێ‌ ل ڤێ‌ دەڤەرێ‌ بكەن و دیسا چەندین وەلاتیان ژی هاتنوچوون ل خالا گۆمركا سەرزێری ژی كریە”.

دياركر” ئەڤرۆ 16 و نیڤ سەنتیمەترێن بەفرێ‌ ل سەنتەرێ‌ ناحیا كانی ماسێ‌ بارینە و هەروەسا ل خالا گۆمركا سەرزێری 20 سەنتیمەترێن بەفرێ‌ بارینە”.

ئه‌ڤرۆ نیوز، نه‌وزاد هلۆرى:

 هژماره‌كا وه‌لاتیان ئه‌ڤرۆ دوشه‌مبى 24/12/2018 قه‌ستا چیایێ گاره‌ى ل سنوورێ ناحیا چه‌مانكێ كربوو، هنده‌ك ژ وان ژبه‌ر هاتنا به‌فرێ ئاسێ ببوون، تيمێن به‌ره‌ڤانیا باژێرى ل ده‌ڤه‌رێ شیان دو خێزانان ل چه‌مانكێ كو دبه‌فرێ دا ئاسێ ببوون رزگار بكه‌ن.

 بێوار عه‌بدولعه‌زیز، به‌رپرسێ راگه‌هاندنا به‌ره‌ڤانیا باژێرى ل پارێزگه‌ها دهۆكێ بۆ ئه‌ڤرۆ نیوز گۆت: (ئه‌و هه‌ردو خێزانێن كو ژ ئه‌گه‌رێ هاتنا به‌فرێ ل سنوورێ ناحیا چه‌مانكێ ئاسێ بووىن هاتنه‌ رزگاركرن، هه‌ر ل چه‌مانكێ ژ ئه‌گه‌رێ به‌فرێ ترومبێله‌ك ژى توشى روودانه‌كا ته‌حسینا ل سه‌ر به‌فرێ ببوو، تيمێن به‌ره‌ڤانیا باژێرى شیان  شوفێرێ ترومبێلێ ب بریندارى رزگار بكه‌ن).

 زێده‌تر گۆت: (داخوازێ ژ وه‌لاتيان دكه‌ين  ل ده‌مێ بارینا به‌فرێ قه‌ستا ده‌ڤه‌رێن چیایى و جهێن ئاسێ نه‌كه‌ن، چونكى هه‌ر به‌فربارینه‌ك دێ بیته‌ ئه‌گه‌رێ وێ چه‌ندێ كو ئه‌و تووشى روودانێن ئاسێ بوونا دناڤ به‌فرێ ببن).

ئه‌ڤرۆنيوز، بارزان مزوورى

ئەڤرۆ نیۆز، قائید میرۆ
ل دەمژمێر چاری ئێڤاريا ئەڤرۆ فڕۆکەیێن ھەڤپەیمانان ل قەزا مەخموور ھێرشێن ئاسمانی کرینە سەر چەکدارێن داعش و ژێدەرەکێ پێشمەرگەی ژی دبێژیت، زیانێن مەزن يێن گه‌هشتينه‌ داعشێ.
ژێدەرەکی ل میحوەرێ مەخموور بۆ ئەڤرۆ نیۆز دیارکر” ئێڤاریا ئەڤرۆ دوشه‌مبى 24/12/2018 فڕۆکەیێن ھەڤپەیمانان بنکە و بارەگایێن چەکدارێن داعش ل چیایێ قەرەچۆغ و گوندێن عەلیە رەش و گرەڕەش بوردۆمانکرن و ھەتا نوکە پێنج جاران ھەڤپەیمانان ھێرشکریە سەر داعش و ھێشتاژی بوردۆمان یا بەردەوامە.
وى ژێدەری  ئاشکراکر” بوردۆمان پشتی گەھشتنا زانیاریان ھات، کو چەکدارێن داعشێ ل دەڤەرا قەزا مەخموور دەست ب لڤینان کریە و نیەتێن خراپ ھەنە، لەوڕا پشتی ھەماھەنگیا دناڤبەرا پێشمەرگەى و ھەڤپەیمانان، ھێرشێن ئەسمانی ھاتنە دەستپێکرن و پێشمەرگە ژی د سەنگەرادا یێ بەرھەڤە بۆ بەرسڤدانا ھەر ھێرشەکا داعشێ”.
ل دۆر زیانێن ئەڤرۆ ب داعشێ کەفتین، وى ژێدەرێ پێشمەرگەی گۆت” ھێشتا زیان ددیارنینن، چونكى بوردۆمان د بەردەوامن، بەلێ زیانێن زۆر یێن مادی و گیانی يێن گەھشتینە چەکدارێن داعشێ، چونكى ھژمارەکا بارەگایێن وان يێن ھاتینە وێرانکرن”.

شێخان ،بارزان مزووری:

رۆژا ب ھەلکەفتنا حەزرەتێ مەسیح کو ئێکەم رۆژ دکەڤیتە ٢٥ کانونا ئێکێ ٢٠١٨ مەسیحێن دەشتا مووسل ژی بەرھەڤیێن باش کرینە بۆ ئەنجامدانا رێورەسمێن ڤێ جەژنێ ل ناحیا ئەلقوش ھەر مالەکێ دارەکا سەر سالێ خەملاندیە دناڤ مالێ دا نمایشکریە مەسیحیێن وێ دەڤەرێ دبێژن ئەڤ جەژنە ب دو جەژنان دھێته‌ ھژمارتن.

غەزوان یوسف، قەشێ دێرا ناحیا ئەلقوش بۆ ئەڤرۆ نیوز ئاشکرا کر کو ئەڤ سال ژی وەکو ھەموو سالێن بۆری ب دلخوه‌شی دێ پێشوازیا ڤێ جەژنێ کەین ل بن سیبه‌را ھێزێن ئاسایشێ و پێشمەرگێن قەھرەمان ژبەر وێ ئارامیا پێشمەرگەی وئاسایشێ بۆمە دابین کری  کوردستان یا بوویە لاندکا پێکڤەژیانا ھەموو ئایینان.

مریانا سالم ، ئێک ژ کچێن مەسیحی ل ناحیا ئەلقوش بۆ ئەڤرۆ نیوز دیار کر کو د ئەڤ ساله‌ دا جەژن دێ یا جودا بیت ل گەل سالێن بۆری، ژبەرکو سالێن بۆری پێشمەرگە ل بەرسینگێ دوژمنی بوو و ئەم د ئارام نەبووین ژ گێرانا رێورەسمان و دلێ مە ل دووڤ وان ڤە بوو، بەلێ ئەڤ ساله‌ دو جەژن دێ مە ھەبن. ئێک ژوان جەژنا حەزرەتا مەسیح ویا دى ژی جەژنا سەرکەفتنا پێشمەرگێن قەھرەمانه‌.

گوت ژی: ل ئێڤاریا رۆژا جەژنێ گەلەک جۆرێن خوارنێ دھێنه‌ دروست کرن وئه‌م به‌ر ب دێرێ ڤه‌ دچین بۆ ئەنجامدانا رێورەسمێن ئاینی یێن جەژنێ.

فیراس حەنا، ئێک ژ مەسیحیێن دەشتا مووسلێ یه‌ بۆ ئەڤرۆنیوز دیار کر کو چەند مال ل ناحیا ئەلقوش ھەنە، ھندى وان دارێن سەرێ سالێ ھاتینە دانان دناڤ مالان دا، چو مال نەماینە کو دارەکا سەر سالێ تێدا نه‌هاتبیته‌ دانان.