شاندەكێ بلند یێ هەرێما كوردستانێ ل تەهرانێ پشكداری د بەهییا ئیبراهیم رەئیسی سەرۆك كۆمارێ ئیرانێ و وەزیرێ دەرڤەیێ وی وەلاتیدا كر و هەڤخەمییا خوە و هەرێما كوردستانێ گەهاندە سەركردایەتی و حوكمەت و گەلێ كۆمارا ئیسلامییا ئیرانێ و خێزان و كەسوكارێن وان.
شاندێ بلند یێ هەرێما كوردستانێ پێكهاتبوو ژ نێچیرڤان بارزانی، سەرۆكێ هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ، مستەفا سەید قادر، جێگرێ سەرۆكێ هەرێما كوردستانێ، قوباد تالەبانی، جێگرێ سەرۆكێ حوكمەتا هەرێما كوردستانێ و رێبەر ئەحمەد، وەزیرێ ناڤخوەیی ل حوكمەتا هەرێما كوردستانێ.

نێچیرڤان بارزانی، سەرۆكێ هەرێما كوردستانێ ل ئەبو زەبی ل گەل محەمەد بن زاید ئال نەهیان، سەرۆكێ ئیماراتێ كۆمبوو. هەردو ئالییان دوپاتی ل پێشڤەبرنا پەیوەندییان د بوارێن ئابۆری و بازرگانی و هاریكارییا وزێ دا، هەروەسا باس ل دەلیڤەیێن وەبەرئێنانا ئیماراتی ل ئیراقێ و هەرێمێ هاتە كرن، سەبارەت رەوشا رۆژهەلاتا ناڤین، هەردو ئالی د هەڤڕا بوون ل سەر گرنگییا پێكڤە كاركرنێ و هاریكارییا هەڤپشك و هەمەلایەنە بۆ پاراستنا ئارامی و سەقامگیریێ و رێگركرنێ ل بەرفرەهبوونا زێدەتر یا ئالۆزییان.
پەیوەندیێن هەولێرێ و بەغدا ل گەل وەلاتێن دەوروبەر و دەڤەرێ، گوهۆڕینا سەقای و چەند پرسێن جهێ گرنگییا هەردو ئالییان، ئالییەكێ دی یێ كۆمبوونێ بوو.

سەرۆكێ حوكمەتا هەرێما كوردستانێ، مەسرور بارزانی،  پێشوازی ل تارق عەبدوللا ئەلفەرەج، بالیۆزێ كوێتێ ل ئیراقێ و شاندەكێ د گەلدا كر. د كۆمبوونەكێدا مەسرور بارزانی دوپاتی ل گرنگییا ب هێزكرنا پەیوەندیێن دۆستانە د ناڤبەرا هەرێما كوردستانێ و دەولەتا كوێتێدا كر كو دیرۆكەكا هەڤپشك ژ بەرهنگارییا ستەم و دكتاتۆریەتێ یا هەی. ژ ئالیێ خوەڤە بالیۆزێ كوێتێ ل ئیراقێ دیاركر كو وەلاتێ وی ب چاڤێ رێزێ و گرنگیێ ل رۆل و پێگەهێ هەرێما كوردستانێ دنێریت و خواستا وەلاتێ خوە بۆ پێشڤەبرنا پەیوەندیێن دو قۆلی دوپاتكر. هەروەسا باس ل دەلیڤەیێن پێشڤەبرنا وەبەرئێنانا كوێتێ ل هەرێمێ د بوارێن جۆراوجۆر دا هاتە كرن.

فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان پێشوازی ل (مەكسیم روبین) قۆنسلێ گشتیێ دەولەتا رووسیا ل هەولێرێ كر.
د روونشتنەكێدا فازل میرانی رۆناهی ئێخستە سەر پەیوەندیێن دیرۆكی د ناڤبەرا رووسیا و گەلێ كوردستانێدا و سوپاسییا دەولەتا رووسیا كر بۆ پێشوازیێ ل بارزانیێ نەمر و هەڤالێن وی بۆ دەمێ 12 سالان و هەروەسا دانا ڤیزا خواندنێ بۆ هەژمارەكا بەرچاڤ یا ئەندامێن شۆڕەشیا كوردستانێ.
فازل میرانی دوپاتكر كو پەیوەندی ل گەل حوكمەت و گەلێ رووسیا رۆژ ب رۆژێ ب هێزتر دبن و هیڤیخوازین ئەڤ پەیوەندییە بەر ب پێشڤەتر بچن.
میرانی ئاماژەكر كو دەڤەر د قۆناغەكا هەستیاردا دەرباز دبیت و ل ئیراقا فیدرال پرەنسیبێ (سازان و هەڤسەنگی و هەڤپشكی) یێ هاتییە تێكدان و كار پێ ناهێتە كرن و رێككەفتنێن د ناڤبەرا هەرێما كوردستانێ و ئیراقا فیدرالدا كار پێ ناهێتە كرن و ئەڤە پاشەڕۆژا ئیراقێ دئێخیتە د مەترسیێدا.
ل دۆر رەوشا ناڤخوەییا هەرێما كوردستانێ، فازل میرانی دوپاتكر كو هەلبژارتنێن پەرلەمانێ كوردستانێ دێ هێنە ئەنجامدان و هەموو ئالیێن سیاسی یێن هەرێما كوردستانێ ل سەر ئەنجامدانا هەلبژارتنان د هەڤڕانە و هەر ئاریشەكا هەبیت ژی دشێین ب تێكگەهشتنێ بهێنە چارەسەركرن.
ژ ئالیێ خوەڤە مەكسیم روبین، قۆنسلێ گشتیێ دەولەتا رووسیا ل هەولێرێ پەیوەندیێن دو قۆلی د ناڤبەرا گەلێ رووسیا و گەلێ كوردستانێ ب دیرۆكی و سەركەفتی هەژمارتن. هەروەسا خوەشحالییا خوە دیاركر ب كارێ خوە ل هەولێرێ و هیڤی خواست كوردستان هەر د پێشكەفتن و سەركەفتنێ دا بیت.

پەیڤدارێ سەرۆكایەتییا هەرێما كوردستانێ راگەهاند: چاڤەڕێ دهێتە كرن د ئەڤان رۆژاندا كۆمسیۆنا بلند یا سەربخوە یا هەلبژارتنان ل ئیراقێ كۆمببیت و پێداچوونێ د بەرنامەیێ هەلبژارتناندا بكەت و ئەم چاڤەڕێی بڕیارا كۆمسیۆنێ دكەین».
دلشاد شەهاب، پەیڤدارێ سەرۆكایەتییا هەرێما كوردستانێ گوت» هەتا نوكە كۆمسیۆن یا پێگیرە ب ئەوی ژڤانێ بۆ هاتییە دیاركرن، هەكە نەشێت د ئەوی ژڤانیدا هەلبژارتنێن پەرلەمانێ كوردستانێ ئەنجام بدەت، دڤێت مە ئاگەهدار بكەت و هەردەمێ كۆمسیۆنێ ئەم ئاگەهداركرین، دێ ژڤانەكێ نوو بۆ ئەنجامدانا هەلبژارتنان هێتە دیاركرن».
ژ ئالییەكێ دی ڤە، جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ راگەهاندبوو كو ئەو نەشێن ل 10/6/2024 هەلبژارتنێن پەرلەمانێ كوردستانێ ئەنجام بدەن، لەوما ب نڤیسارا فەرمی دێ داخوازێ ژ سەرۆكایەتییا هەرێما كوردستانێ كەن، ژڤانەكێ نوو بۆ هەلبژارتنێن خولا شەشێ یا پەرلەمانێ كوردستانێ دیار بكەت.
جومانە غەلای گوت» بڕیارا دادگەها فیدرالی و دەستەیا جڤاتا دادوەرییا هەلبژارتنان، كاریگەری ل سەر خستەیێ كارێ كۆمسیۆنێ دروستكر بۆ ئەنجامدانا هەلبژارتنا ل 10/6/2024 ژ ئەگەرێ وی چەندێ كۆمسیۆن نەشییا د ئەوی ژڤانیدا هەلبژارتنان بڕێڤەببەت».
ئاماژەكر ژی» پشتی درێژكرنا دەمێ كاركرنا كۆمسیۆنێ بۆ شەش مەهێن دی تاكو دەستپێكا 2025، جڤاتا كۆمسیاران یا پێگیرە هەلبژارتنێن پەرلەمانێ كوردستانێ ب گۆڕەی پێڤەرێن نێڤدەولەتی بڕێڤەببەت».

جێگرا سەرۆكێ حزبا چاكسازییا توركمانی راگەهاند: هەكە سكالایا ئێكەتی نیشتمانی كوردستانی نەبا، دادگەها فیدرالی ل ئیراقێ بەرامبەر پێكهاتەیان دەستڤەكری نەدبوو.
مونا قەهوەچی، جێگرا سەرۆكێ حزبا چاكسازییا توركمانی و سكرتێرا خولا پێنجێ یا پەرلەمانێ كوردستانێ گوت» زڤراندنا كورسیێن كۆتایا زڤراندنا شكۆیێ پێكهاتەیێن كوردستانێیە و بەلگەیە ل سەر ئەوێ چەندێ بێی پێكهاتەیان، هەلبژارتنێن پەرلەمانێ كوردستانێ ناهێنە ئەنجامدان».
مونا قەهوەچی دیاركر ژی» سنورداركرنا رێژە و هەژمارا پێكهاتەیان، پێنگاڤەكە بۆ لێدانا ناسنامەیا وان و مەترسیێ د ئێخیتە سەر چارەنڤیسێ وان».
جێگرا سەرۆكێ حزبا چاكسازییا توركمانی گوت ژی» بڕیارا ڤێ دوماهیێ یا دادگەها فیدالی جهێ حێبەتێیە، ژ ئالییەكی ئەو پێنج كورسیێن ب گۆڕەی بڕیارا دادگەها فیدرالی زڤرین، هەتا كۆمسیۆن ب خوە ژی نزانیت چاوان ب سەر پێكهاتەیان بەلاڤ بكەت».
ناڤبریێ باس ل ئەوێ چەندێ ژی كر» ب رێژەیا 95% توركمان یێن ل هەولێرێ و هەژمارەكا گەلەك كێم یێن ل سلێمانیێ هەین، كو ناگەهیتە ئەوێ چەندێ ئێك كورسی بدەستڤەبینن».
قەهوەچی دوپاتكر ژی» ئەوا ل بەرامبەر پێكهاتەیان دهێتە كرن، جۆرەكێ پلانگیریێیە» هەروەسا رۆهنكر» زڤرینا كورسیێن پێكهاتەیان بۆ بەرژەوەندییا پێكهاتەیان نینە، بەلكو بۆ بەرژەوەندییا ئالییەكێ سیاسییە».

شارەزایەكێ بوارێ هەلبژارتنان ئاماژە ب ئەویچ چەندێ دكەت، پارتی یا رژدە ل سەر هەلوەستێ خوە و پێشبینیێ دكەت هەلبژارتن بكەڤنە مەهێن دووماهیێ یێن ئەڤسالە. هەروەسا دبێژیت، دەستەك پشت دیاركرنا نەخشەیێ هەلبژارتنان یێ هەی و پەیداكرنا ئاریشەیان بۆ 400 هزار دەنگدەران باشترین بەلگەیە بۆ ڤێ چەندێ.
یەحیا پالانی، شارەزایێ بوارێ هەلبژارتنان بۆ رۆژنامەیا (ئەڤرۆ) گوت « ئەو هەلبژارتنێن هاتینە دیاركرن بەری نوكە یێن هاتینە دیزاینكرن و دژی هەرێما كوردستانێ دهێنە بكارئینان، لەوڕاژی پارتی دیموكراتی كوردستان ب دەركرنا بەیاننامەیەكێ هەلوەستێ خوە دیاركر و پارتی نوكە ژی یا رژدە ل سەر هەلوەستێ خوە هەكە هەلبژارتن ب ڤی شێوەی بهێنە ئەنجامدان پارتی پشكداریێ ناكەت، پارتی بایكۆتا پڕۆسەیا هەلبژارتنان نەكریە، بەلكو یا دیاركری ئەم ب ڤی شێوەی پشكداریێ د پرۆسەیەكا هەلبژارتناندا ناكەین كو پێشوەخت دیزان بۆ هاتبیتەكرن و هندەك لایەنێن دژی هەرێما كوردستانێ دەست تێدا هەبن، هەلوەستێ پارتی هەلوەستێ كوردایەتیە و ئالیێن دی ژی ئەڤێ راستیێ باش دزانن هەلبژارتنێن ب ڤی رەنگی د بەرژەوەندیا هەرێما كوردستانێدا نینن، بۆ نموونە پەنجەمۆرا نێزیكی 400 هزار دەنگدەران ناهێتە ڤەخواندن، باشە پرسیار و گومان ل ڤێرە دەستپێدكەت و هەمان ئەو دەنگدەرێن نوكە ئاریشە بۆ هاتییە پەیداكرن و پەنجەمۆرا وان ڤەناخوینیت د هەلبژارتنێن بۆریدا پشكداربووینە و چو ئاریشە نەبوویە، پترییا ئەوان دەنگدەرێن ئاریشەیا پەنجەمۆرێ هەی دەنگدەر و ئەندام و لایەنگرێن پارتی نە، ئەڤە یا دیارە دەست ل پشت ئەڤێ پیلانێ یێ هەی».
یەحیا پالانی گۆت ژی» ئەز باوەرم ب هیچ شێوەیەكی هەلبژارتن ل مەها خزیرانا ئەڤسالە بڕێڤە ناچن و دێ هێنە پاشئێخستن، ب دیتنا من ئەڤسالە دێ پرۆسەیا هەلبژارتنان بڕێڤەچیت و كەڤیتە د مەها ئەیلوولێ یان چریا ئێكێ دا، مادەم هەر هەتا نوكە هەلبژارتن نەهاتینە ئەنجامدان چو ئاریشە تێدا نینە هەكە چەند مەهێن دی ژی نەهێنە ئەنجامدان، هەكە ژیێ كۆمسیۆنا بلند یا سەربخوە یا هەلبژارتنان ل ئیراقێ بهێتە درێژكرن و ئاستەنگێن قانوونی نەبن گەلەك ئاسایی یە هەلبژارتن بكەڤنە د دوماهییا ئەڤسالەدا، بەلێ پرۆسەیەك بهێتە بڕێڤەبرن چو ئاریشە تێدا نەبن، هەلبژارتن بۆ خەلكییە و ل هەموو جیهانێ وەلاتی پشكداریێ دكەن، مادەم پارتی دیموكراتی كوردستان ژی بایكۆتا هەلبژارتنان كریە یا خویایە خەلكێ كوردستانێ ژی پشكداریێ ناكەت و هەموو ئالیێن سیاسی دزانن خەلك بێی پارتی پشكداریێ د پرۆسەیا هەلبژارتناندا ناكەت».

ب هەلكەفتا بورینا 48 سالا ل سەر دەسپێكرنا شورەشا گولانا پێشكەفتن خواز، دچارچووڤێ‌ بەرنامەكێ‌ ئێكگرتیێ‌ ئەكادیمی و نەتەوەیی دا كو گرێدایی ب شورەشا گولانێ‌ ڤە، لقێ‌ ئێك یێ‌ پارتی دیموكراتی كوردستان دا خیڤەتەگەهەگ ل گوندێ‌ كەمەكا رێكئێخست.
ل دەسپێكێ‌ و پشتی چەندین سروود و ستران و چالاكیێن هونەری كو گرێدایی مێژوو و خەبات و بەرخودانا گەلێ‌ مە ل شورەشا 26ی گولانێ‌ هاتینە گۆتن و نمایشكرن.
سەربەست لەزگین، بەرپرسێ‌ مەكتەبا رێكخستنا پارێزگەها دهۆك یا پارتی دیموكراتی كوردستان د پەیڤەكێ‌ دا دیاركر كو شورەشا 26 گولانێ‌ قۆناغەكا گەلەك گرنگ و یا هەستیار بوو دمێژوویا گەلێ‌ كوردستانێ‌ دا و ب سەرفەرازی هاتیە تۆماركرن و گۆت: دەمێ‌ مرۆڤ بەحسێ‌ دەسپێكا شورەشا 26ی گولانێ‌ دكەت، مرۆڤ نەشێت بەحسێ‌ شورەشا ئیلونا مەزن نەكەت كو شورەشا گولانێ‌ تەمامكەر و درێژەپێدانا خەبات و بەرخودانا مللەتێ‌ كورد بوویە، شورەشا ئیلونا مەزن مەزنترین شورەش وكاریگەرترین شورەش بوو دمێژوویا گەلێ‌ كوردستانێ‌ دا، جارا ئێكێ‌ بوو ب فەرماندەیا بارزانیێ‌ نەمر هەمی كوردستان دئێك چەپەر دا و بن ئێك ئالا ڤە و بن ئێك سەركردایەتی ڤە خەبات و تێكوشان دكر و ب هەمی تەخ و چین ڤە هەر ژ زاخۆ هەتا خانەقین و مەندەلی و هەمی پێكهاتێن كوردستانێ‌ تێدا دپشكداربوون و ئەڤە نموونەك ل مێژوویێ‌ و رەنگە دووبارە نەبوویەڤە.
بەرپرسێ‌ مەكتەبا رێكخستنا دهۆكێ‌ دیاركر ژی، سەر ئەنجامێ‌ رۆلێ‌ شورەشا ئیلونا مەزن رێكەفتنا 11 ئادارێ‌ یا مێژوویی هاتە تۆماركرن كو بەربنیاتی یێ‌ فیدرالی و دەسكەفتێن ئەڤرۆ بۆ وی سەردەمی هاتنەدانان، لایەنەكێ‌ دیێ‌ گرنگ ئەو بوو كو كورد و كوردستانی ل جیهانێ‌ هاتنە ناساندن و ئەگەر ئەڤان سالێن دووماهیێ‌ ژی ئەگەر ل هەر وەلاتەكی تو چووبایێ‌ و تەگۆتبایێ‌ كوردم رەنگە نەزانی با كێشا كوردی چیە و كورد كیڤەنە، بەلێ‌ ئەگەر گۆتبا بارزانی مە هەر ئێكسەر رۆل و كاریگەری یا بارزانیێ‌ نەمر ل هەر چار كنارێن جیهانێ‌ دەنگڤەدان بوو، لەوما شورەشا ئیلونێ‌ دهێتە هەژمارتن مەزنترین و كاریگەرترین شورەش.
سەربەست لەزگین گۆت: ب سەرۆكاتیا بارزانیێ‌ نەمر هەمی دەما دەرفەتێن ئاشتیێ‌ دڤەكری بوون لێ‌ ڤێ‌ عەقلیەتێ‌ نەهێلا كێشا كوردی ب رەنگەكێ‌ دروست و ئاشتییانە چارەسەر بیت و ئەڤا كو ل ئیراقێ‌ هاتی و گورانكاریێن دووف دا هاتین هەمی ڤەدگەریت وی سەردەمی چونكە رەورەوێ‌ روودانا ل ئیراقێ‌ ب شێوەكێ‌ دی چوو سەخمراتی وێ‌ عەقلیەتا دكتاتوری و فاشزمێ‌ یا كو نەهێلای كێشا كوردی چارسەربیت و هەمی دەما ل دەرفەتێ‌ دگەریان دێ‌ چاوا سەركوت و تیرۆركەن و دێ‌ چاوا چەك و جەبلغانێن مەزن ب دەست خوە ڤەئین و هەمی هزرا وان ئەو بوو كو دێ‌ ب وێ‌ رێكێ‌ شێن هەمی گەلێ‌ كوردستانێ‌ ب دووماهی ئینن، لێ‌ مێژوویێ‌ دووپاتكر كو دڤێت كێشا كوردی جهێ‌ خوەیێ‌ دروست بگریتن، مخابن ئیراق یا بەرهەڤ بوو ئاخ و وەلاتێ‌ خوە بدەتە هندەك وەلاتێن دی ب تنێ‌ رێگریێ‌ ل بزاڤا رزگاریخوازا گەلێ‌ كوردستانێ‌ بكەت و دەمێ‌ نسكۆیا سالا 1975ێ‌ دروست بووی و هوون هەمی ئاگەهدارن كو كارەسەتەكا گەلەك مەزن بوو ل سەر گەلێ‌ كوردستانێ‌ و بزاڤا وێ‌ هات و كاودانێن نەخۆش ل سەر وەلاتێ‌ مە دەربازبوون و رێژا هەرە مەزن یا خەلكێ‌ كوردستانێ‌ رادەستی بەعسیابوون و رێژەكا گەلەك مەزن ژی كو پتر ژ 200 هزار كەسان ل كوردستانێ‌ و ب هەمی پێكهات و نەتەوە و بێ‌ جوداهی چارەنووسێ‌ خوە ل گەل بارزانیێ‌ نەمر گرێدا و دەربەدەری ئیرانێ‌ و توركیا و سوریا بوون و پشكا هەرە مەزن بەرەف ئیرانێ‌ چوون و پشكەكا دی هەر چەكێ‌ خوە ژ ملێن خوە ڤەنەكر و هەر مانە ل سەر ئەوان سنوران و ئەوان گوندان و چارڤەرێكر دێ‌ چەوا فەرمان بۆ هێت و دێ‌ چەوا جارەكا دی شێن رێكخستنە ڤە و جارەكا دی دێ‌ چاوا شێن رێكا خەبات و بەرخودانێ‌ گرنە ڤە .
سەربەست لەزگین ئەو ژی گۆت: پشتی سالا 1975ێ‌ و ب چەند هەیڤەكێن كێم ل هەیڤا نیسانێ‌ بوو و جەنابێ‌ شەهیدێ‌ جانەمەرگ ئدریس بارزانی و جەنابێ‌ سەرۆك مەسعود بارزانی داخاز ژ بارزانیێ‌ نەمر كر كو دەستویردان بۆ بهێـتەدان كو چالاكی و رێكخستن و سەروبەرێ‌ خوە دوبارە خوە رێك بێخن و چالاكیێن خوە دوبارە بكەن و ل كاودانێن گەلەك نەخۆش دا و ب چاڤدێری و تۆندوتیژی یا ئیرانێ‌ یا وی سەردەمی و كاودانێن گەلەك دژوار ڤە، چونكە ئیرانێ‌ وی دەمی سەرەدەریەكا نەجوان ل گەل خەلكێ‌ مە دكر ئەوێن قەستا ئیرانێ‌ كرین و هەر هندەك هنارتنە جهەكی و پرت و بەلاڤەكرن، لێ‌ سەركردایەتی و جەنابێ‌ سەرۆك مەسعود بارزانی و شەهیدێ‌ هەردەم ساخ ئدریس بارزانی ل هەیڤا چار ل نەغەدێ‌ چەند كومبوونەك ئەنجام دان و چەند هەڤالەكێن سەركردایەتیێ‌ ل گەل ئاخفتن و گەنگەشەكرن ب وێ‌ مەبەستێ‌ ب چ شێوە جارەكادی دێ‌ خوە رێك ئێخن و دەست ب خەباتێ‌ كەنە ڤە و هەیڤا 10 سالا 1975 بەیانەك ب هەردو زمانێن كوردی و عەرەبی دەركەفت ب وێ‌ مەبەستێ‌ دەست ب رێكخستن و چالاكیێن خوە بكەنە ڤە و مورالەك و خوینەكا دی دناڤا خەلكێ‌ كوردستانێ‌ دا دروست بوو ڤە، كارو خەباتەكا مەزن وی سەردەمی هاتەكرن هەر دناڤا كوردستانێ‌ دا و دناڤا پەناهندا دا ل ئیرانێ‌ و هەتا ل سەر ئاستێ‌ ئەورۆپا و كونفرانسێ‌ بەرلینێ‌ یێ‌ بناڤ و دەنگە و هەمی برادەر زانن و خەلكێ‌ دەربەدەری توركیا و سوریێ‌ بووی و ئەڤە قۆناغەكا سەخت و دژوار بوو ل سەر گەل و مللەت و شورەش و پارتی دیموكراتی كوردستان دا دەربازبووی و هەمی ئارمانج ئەو بوون دێ‌ چەوا جارەكا دی شورەشێ‌ دەست پێ‌ كەینە ڤە. و رێكخستنا كارێ‌ حزبی و لەشكەری و پێشمەرگەی و هەمی جها پەیوەندی پێ‌ هاتەكرن و بن سەرپەرشتی یا سەركردایەتی یا بەروەخت و 26ی گولانێ‌ ئێكەم شەهید ل دەڤەرا حاجی ئومەران گیانێ‌ خوە ژ دەست دا و گیانێ‌ وی وەك سومبلەك بۆ دەسپێكەك بۆ دەسپێكا شورەشا 26لا گولانێ‌ و شورەش د گەلەك قۆناغا دا دەربازبوو و سەرنشیفی و سەر ئەفرازی و خوراگریێن مەزن هاتنە ئەنجامدان و رژێما بەعس قەد لێڤەنەبوو ژ عەقلیەت و هزرێن خوەیێن بەرێ‌ و هەمی بزاڤ دكرن سەركوتكرنا بزاڤا رزگاریخوازا گەلێ‌ كوردستانێ‌ بكەت.

د خیڤەتگەها هاتیە رێخستن ژلایێ‌ لقێ‌ ئێك یێ‌ پارتی دیموكراتی كوردستان، كو تێدا هژمارەكا مەزن ژ پێشمەرگێن قارەمان و وەلاتیان ئامادەببون و بوو دەمێ‌ دو رۆژان ب چالاكیێن جودا جودا دێ‌ یا بەردەوام بیت، د. نەوزاد عەبدوللا بەرپرسێ‌ لقێ‌ ئێك یا پارتی دیموكراتی كوردستان پەیڤەك پێشكێشكر و تێدا، سەرەرای ب خێرهاتنا خێزان و كەسوكارێن شەهیدان و مالباتێن پێشمەرگێن قارەمان و مێهڤانان و رێڤەبەر و بەرپرسێن دامودەزگەهێن حزبی و حكۆمی بۆ پشكداریا وان د خیڤەتگەها 26ێ‌ گولانا پێشكەفتخواز دا، دیاركر كو ئارمانج ژ ڤەكرن و رێكخستنا وێ‌ خیڤەتگەهێ‌ ل پێناڤێ بەرزڕاگرتنا ژیوارێ ڤێ شۆرەشێ و ئاشناكرنا تەخا گەنج و قوتابی و نڤشێ نوی ب كاودان و قۆناغێن خەباتێ و خۆڕاگری و داستان و سەركەفتنێن پێشمەرگێن قەهرەمان دگەل بەرچاڤكرنا خەباتا ڕێكخستیێن ناڤخۆ و زیندانیێن سیاسی نەخاسمە وان كادرێن دەستپێكی یێن پشكدار د هەلكرنا چریسكا شورەشێ و هەمی دام دەزگایێن شۆڕشێ، كو گەنج و لاوێن مە بشێن بەراوەردیا كەتوارێ شۆرەشێ دگەل یێ ئەڤرۆ بكەن و گۆت: لەوما مە وەكـو لقێ ئێك یێ پــارتی دیموكـراتی كوردســتان هــزر د ڤەكرنا خیـڤەتگەهەكا سیاسی و رەوشەنبیری یـا پـڕی برگـە و بزاڤ و چالاكیێن جـورا و جـور دا كر، وەك دەربـرینـەك ژ وان بیـرهاتن و رۆژێـن ســەخت و دژوارێن پێشمەرگێن قەهرەمان دگەل ژیایێن و بەراوردكرنا ئەوێ ژیانا ب زەحمەت دگەل واقعێ ئەڤرۆ.
بەرپرسێ‌ لقێ‌ ئێك یێ‌ پارتی دیموكراتی كوردستان دیاركر كو خیڤەتگەها 26ی گۆلانێ ژ 8 كەپران پێك دهێت كو هەمبێزا بەشەك ژ وان بزاڤ و چالاكی شـۆڕەشێ بكەت و روویێ راستەقینە و پراكتیكی یێ شورەشێ، بۆ پشكدارێن خیڤەتگەهێ ب ڤەگوهێزیت.
دەربارەی گرنگیا خیڤەتگەهێ‌ ژی دیاركر كو وان چەند ئارمانج هەنە ژوانژی، سەلماندنا هەبوونا سەركردایەتیەكا بهێز یا شورەشێ ب سەرۆكاتیا سەرۆك بارزانی كو مللەتێ كوردستانێ ژ بێ ئۆمێدیێ رزگار بكەت، هەروەسا بەرز ڕاگرتنا ڤێ رۆژا پیرۆز، كو ڤەرێژا خۆراگریا پێشمەرگێن قەهرەمان و شەهیدێن پارستنا كەرامەت و پیرۆزیێن كوردستانێ نە، دگەل نیشاندانا رۆلێ كاریگەر یێ ئافرەتا كورد چ ل رێكخستنێن نهێنی یان ژی ل خەباتا پارتایەتی و دیسا پشكداریكرنا نفشێ نوی، بتایبەت قوتابیێن زانكویێ ل پشكێن مێژوویێ دناڤا برگە و بەرنامێ خیڤەتگەهێ دا، دیسا مفا وەرگرتن ژ ڤان جورە كەرنەڤال و سالڤەگەران، كو ببنە كەلتۆرەكێ سـالانە بۆ دەكومێنتكرن و ئەكادیمیكرنا سەربۆرێن قارەمانێن كوردستانێ، و ئەرشیفكرنا كەل و پەل و بەلگەنامێن سەردەمێ شۆڕەشێ‌ دگەل پەیداكرنا دەلیڤێن ئەنجامدانا ڤەكولینێن زانستی لدۆر شورەشێ بۆ قوتابیێن پشكا مێژوویێ و نیشاندانا ئیرادەو و خوراگری و ئازایەتی یا پشكدارێن شورەشی.
د.نەوزاد عەبدوللای دیاركر ژی، چەندین برگە و تەوەرێن دی یێن گرنگ ل دو رۆژێن خیڤەتگەها گۆلانێ دا دێ هێنە پێشكێشكرن، بۆ جێبەجێكرنا پشكەك ژ وی بەرنامێ لسەر مە ئاماژە پێ دای، كو پێك دهێت ژ ئامادەكرنا 8 كەپران لسەر شێوازێ رۆژانێن شورەشێ، و ڤەگێرانا بیرەوەریێن وی سەردەمی بۆ قوتابی و گەنج و لاوو، و ئافرەتان، ژلایێ بەشەك ژ پێشمەرگێن شورەشێ، ئەوژی كەپرێن (بێتەل، چالاكیێن لەشكەری، ساخلەمی و دختورێن شورەشێ، راگەهاندن و ئێزگە، رێكخراوێن جەماوەری و پیشەیی، بەشێ سیاسی و كادرێن شورەشێ، رێكخستنێن نهێنی و زیندانیێن سیاسی، مامۆستا و خواندنگەهێن شورەشێ) ب خۆڤە دگریت و گۆتژی: زێدەباری برگێن مە ئاماژە پێ دایی دێ‌ ل خیڤەتگەهێ‌ پێشكێشكرنا 3 كورتە فلمێن دەكۆمێنتاری ل دۆر شرۆڤەكرنا داستان و رۆژانێن شۆڕەشێ و دیسان نیشاندانا كەل و پەلێن لسەر دەمێ شورەشێ و شرۆڤەكرنا كار و بەرنامێ هەر كەپرەكێ ژلایێ بەشەك ژ پێشمەرگێن گۆلانێ یێن دناڤا رۆژانێن گەرمێن شورەشێ دا دەربازبووین، دگەل ئەنجامدانا چالاكیێن هونەری، لەشكەری، رەوشەنبیری، و پێشكێشكرنا نەدوێن سـیاسی، دگەل خواندانا (هـۆزان و ڤەگێرانا سەرهاتی، گوتنا سـترانێن نەتـەوەیی، سـیـاسـی)، دگەل نمایشكرنا شانۆگەریا شێرەژنێن پالپشتێن شورەشێن كوردستانێ و پێشكێشكرنا 3 پانێلان و 10 سمیناران ل دۆر بابەت و تەوەرێن جودا جودا، دگەل بەرچاڤكرنا رولێ ساخلەمی و دختورێن شورەشێ و بەرداوردی دگەل زانستێ سەردەم و زێدەباری ڤەگێرنا سەربوور و سەرهاتیێن پێشمەرگە و زیندانیێن سیاس. و گۆت: هیڤیدارم ئەم بشێین ڤێ‌ چالاكیێ‌ ل گورەی مەزناهی و قوربانیێن شورەشا گولانا پێشكەفتنخواز پێشكێش بكەین، و سالانە وەكو نەریتەك لسەر د بەردەوام بین.