سەرۆك بارزانی پێشوازی ل ڤیكتۆریا تەیلەر، جێگرا وەزیرێ دەرڤەیێ ئەمریكا كر، د كۆمبوونەكێ دا باس ل سەرەدانا سەرۆكێ حوكمەتا هەرێمێ بۆ واشنتۆن هاتە كرن و ب سەرەدانەكا سەركەفتی هاتە هەژمارتن. هەروەسا باس ل پەیوەندیێن د ناڤبەرا حوكمەتا هەرێمێ و بەغدا هاتە كرن و دوپاتی ل پێدڤییا پاراستنا سەقامگیرییا ئیراقێ و رۆلێ هێزێن هەڤپەیمانان د سەقامگیرییا ئیراقێ و دەڤەرێ هاتە كرن. سەرۆك بارزانی پشتەڤانییا خوە بۆ ئەنجامدانا هەلبژارتنان دوپاتكر و نێگەرانییا خوە ل دۆر بڕیارا دادگەها فیدرالی یا نەهێلانا كورسیێن كۆتایا پێكهاتەیان بەرچاڤكر و ئەو بڕیار ب زیانگەهاندن ب پڕۆسەیا دیموكراسی هەژمارت.

سەرۆك مەسعود بارزانی ل سەلاحەدین پێشوازی ل شاندێ لژنەیا هەرێم و پارێزگەهان ل جڤاتا نوونەرێن ئیراقێ ب سەرۆكایەتییا خالد سامەرایی كر.
د كۆمبوونەكێ دا شاندێ لژنەیا هەرێم و پارێزگەهان ل جڤاتا نوونەرێن ئیراقێ ئەزموونا هەرێما كوردستانێ د بوارێ كاروبارێن پێشڤەبرنا پارێزگەهان و هەروەسا پێكئینانا ئیدارەیێن سەربخوە ل زاخۆ و سۆران و راپەرین بلند هەلسەنگاند، هەروەسا ئەو شاندە خوازیارێن وێ چەندێ بوون كو ئەو ئەزموونە بۆ جهێن دی یێن ئیراقێ ژی بهێتە ڤەگۆهاستن. باسكرن ل رەوشا سیاسی ل ئیراقێ تەوەرەكێ دی یێ كۆمبوونێ بوو.

سەرۆك بارزانی ل پیرمام پێشوازی ل محەمەد حەلبۆسی، سەرۆكێ حزبا تەقەدووم و سەرۆكێ بەرێ یێ جڤاتا نوونەرێن ئیراقێ كر.
بارەگەهێ بارزانی د بەیاننامەیەكێ دا بەلاڤكر» هەردو ئالییان باس ل رەوشا سیاسی ل ئیراقێ و دووماهی پێشهاتان كر». هەوەرسا» دوپاتی ل پێگیربوونێ ب دستووری و تێكگەهشتنا ئالیێن سیاسی یێن ئیراقێ هاتە كرن ژ پێخەمەت دەستەبەركرنا سەقامگیرییا سیاسی و باشتركرنا كاروبارێن دامودەزگەهێن دەولەتێ».

كۆمسیۆنا بلند یا سەربخوە یا هەلبژارتنان ل ئیراقێ لژنەیەكا ناڤەندی بۆ بڕێڤەبرنا هەلبژارتنێن ئەڤسالە یێن پەرلەمانێ كوردستانێ پێكئینا.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ د داخۆیانییەكا رۆژنامەڤانیدا گۆت» ئەو لژنەیە ب سەرۆكایەتییا عەباس فەرحان، سەرۆكێ ئیدارەیا هەلبژارتنان و ئەندامەتییا هەژمارەكا رێڤەبەرێن گشتی، فەرمانبەرێن تەكنیكی، كارگێری، قانوونی و دارایی یێن تایبەتمەند بۆ بڕێڤەبرنا هەلبژارتنێن پەرلەمانێ كوردستانێ هاتییە پێكئینان».
ل دۆر ئەركێ لژنەیا ناڤبری، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ دبێژیت» لژنە دێ كاركەت بۆ بجهئینانا ئەو بڕیار و سیستەمێن كو ژ ئالیێ جڤاتا كۆمسیارێن كۆمسیۆنا بلند یا سەربخوە یا هەلبژارتنان ل ئیراقێ دهێنە دەركرن».
ئاماژەكر ژی» بەرهەڤكرنا پلانەكا تەكنیكی بۆ پڕۆسەیا هەلبژارتنێن پەرلەمانێ كوردستانێ و پێداچوون بۆ كارێ پێكهاتەیێن كارگێری یێن دی ئەوێن ب سەر كۆمسیۆنێ ڤە بۆ بڕێڤەبرنا كار وچالاكیێن تایبەت ب پڕۆسەیێ دێ پشكەكا دی یا ئەركێن لژنێ بیت».
ژ ئالییەكێ دی ڤە جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ گۆت» تۆماركرن و نووكرنا تۆمارێن دەنگدانێ هەتا 10/3/2024 یا ڤەكری بوو بۆ دەنگدەران ژ بۆ تۆماركرنا پێزانینێن خوە و پاشی كارتا دەنگدانێ بۆ بهێتە دەركرن».
ل رۆژا ئێكشەمبی 3/3/2024 نێچیرڤان بارزانی، سەرۆكێ هەرێما كوردستانێ د مەرسومەكا هەرێمی دا، ژڤانێ ئەنجامدانا هەلبژارتنێن خۆلا شەشێ یا پەرلەمانێ كوردستانێ دەستنیشانكربوو كو رۆژا 10/6/2024 دێ هەلبژارتن هێنە ئەنجامدان»

زنار تۆڤی:

سەرۆكێ پەیمانگەها ڤەكۆلینێن ئەمریكی _ كوردی راگەهاند: ئەمریكا ب گرنگی ڤە د نێریتە هەرێما كوردستانێ، هەروەسا ئەمریكا هەرێما كوردستانێ ب هەڤپشكا خوە یا ستراتیژی دبینیت و بكارئینانا چەمكێ كوردستانەكا ب هێز ژ ئالیێ ئەنتۆنی بلینكن، وەزیرێ دەرڤەیێ ئەمریكا، بەلگەیە ل سەر ئەوێ چەندێ، كو هەرێما كوردستانێ ئەو دەڤەرە یا كو جهێ باوەرییا ئەمریكا.
كارۆخ خۆشناو، سەرۆكێ پەیمانگەها ڤەكۆلینێن ئەمریكی _ كوردی بۆ رۆژنامەیا (ئەڤرۆ) گۆت»ئەمریكا پێگەهێ جیۆپۆلیتیكییێ هەرێما كوردستانێ ب گرنگ دزانیت، لەوما د ئاستەكێ بلند دا پێشوازی ل سەرۆكێ حوكمەتا هەرێما كوردستانێ كر ل ئەمریكا، هەروەسا بكارئینانا هێزا نەرم یان دبلۆماسییەتێ وەكرییە، كو ئەو نیگەرانییا هەیی نەمینیت، یاكو كۆمەكا ئالییان ب تایبەتی ل دادگەها فیدرالی دڤێت هەرێما كوردستانێ ل “قالبی” بدەن” یان قەوارەیێ هەرێما كوردستانێ سنووردار بكەن، بەلێ سەرەدانا سەرۆكێ حوكمەتێ بۆ ئەمریكا و داڤۆس و سەرەدانا سەرۆكێ هەرێما كوردستانێ بۆ میونشن، ئەو ئاستەنگ نەهێلان».
ناڤهاتی ئەو ژی گۆت» گرنگییا هەرێما كوردستانێ بۆ ئەمریكا بۆ چار خالان ڤەدگەریت، یا ئێكێ پێگەهێ هەرێما كوردستانێ ژ روویێ سیاسی و دیپلۆماسی ڤە، یا دووێ ئاستێ ئابۆری و وزێ، یا سێیێ ئاستێ بەرقراربوونا ئاساییشێ و بەرهنگاربوونا تیرۆرێ، چونكی هەرێما كوردستانێ سەلماندییە، كو هەرێمێ ژ پێش جیهانا ئازادڤە شەڕێ تیرۆرێ دكەت، یا چارێ ژی رێزگرتنە ل بهایێن وێ یێن بلند، ئەڤە ژی ل دەف ئەمریكا و جڤاكێ نێڤدەولەتی د گرنگن وەكو مافێ مرۆڤی، دیموكراسی و پێگەهێ پێكڤە ژیانێ ل كوردستانێ».
كارۆخی ئەو چەند ژی گۆت»هەرێما كوردستانێ باوەرییەكا بلند ژ ئالیێ جڤاكێ نێڤدەولەتی ڤە هەیە، هەروەسا بكارئینانا چەمكێ كوردستانەكا ب هێز ژ ئالیێ ئەنتۆنی وەزیرێ دەرڤە یێ ئەمریكا بلینكن، بەلگەیە ل سەر ئەوێ چەندێ كو هەرێما كوردستانێ ئەو دەڤەرە یاكو ئەمریكا باوەری پێ هەی، د پاشەڕۆژێ دا ژی دێ وەكو هەڤپشكەكا ستراتیژییا ئەمریكا مینیت».

عەزیز هەورامی:

جەلیل ئازادیخواز سیاسەتمەدارێ كورد ل ئەمریكا بۆ رۆژنامەیا ئەڤرۆ راگەهاند، كورد وەكو ستراتیژ پێدڤی ب بەرفرەهكرن و ب هێزكرنا پەیوەندییانە ل گەل رۆژئاڤا و ب تایبەتی ئەمریكا یا هەی و ئەڤە پێدڤییەكا ستراتیژییە بۆ كوردان.
جەلیل ئازادیخواز زێدەتر دبێژیت» هاتنا مەسرور بارزانی، سەرۆكێ حوكمەتا هەرێما كوردستانێ بۆ ئەمریكا و دیدارا وی ل گەل وەزیرێ دەرڤە و مەزنە بەرپرسێن دی یێن ئەمریكا، د ئەڤێ رەوشێ دا، كو دوژمنێن گەلێ كورد و نوونەرێن ئیرانێ ل ئیراقێ دەستێوەردانا جدی د كاروبارێن كوردستانێ دا دكەن و كێشەیان بۆ دروست دكەن ژ روویێ ئابۆری و سیاسی و ئەمنی ڤە، دۆستایەتی و هەڤبەرژەوەندی بوونا ئەمریكا و كوردان، د ئەڤێ قۆناغێدا یا گرنگە ب تایبەتی سەرۆكێ حوكمەتا هەرێما كوردستانێ ب داخوازنامەیەكا فەرمی سەرەدانا ئەمریكا كریە».
زێدەتر رۆهنكر» داخوازكرنا سەرۆكێ حوكمەتا هەرێما كوردستانێ بۆ سەرەدانا ئەمریكا و ئەنجامدانا وی بۆ چەندین كۆمبوونان بۆمە دیار دكەن كو بۆ ئەمریكا یا گرنگە پەیوەندیێن خوە ب هێزتر و بەرفرەهتر بكەن ل گەل هەرێما كوردستانێ، د رەوشێن قەیران و هەستیار دا، ئەوان پێدڤی ب راوێژكرنێ ل گەل بەرپرسێن بلند یێن هەرێما كوردستانێ یا هەی، ئەڤە ژی دیار دكەت هەرێما كوردستانێ تاكو چ ئاستەكی پێدڤی ب پەیوەندیێ ل گەل ئەمریكا و رۆژئاڤای یا هەی».
دیاركر ژی» ل سالا 2017، پشتی ریفراندۆما سەربخوەییا كوردستانێ، هێرشێن ئیرانێ و ئیراقێ و ئابلۆقەیا توركیا ل سەر كوردستانێ، ئەمریكا ل ئەوی دەمێ بانگەشەیا ئەوێ چەندێ دكر كو مە كوردستانەكا ب هێز دڤێت د ئیراقێ دا، د رەوشا نوكە ژی دا ئەمریكی دخوازن كوردستانەكا ب هێز و پێشكەفتی هەبیت و ئەڤی كیانێ دستووری و فەرمی د چارچۆڤەیێ دەولەتا ئیراقێ دا بپارێزن».
خویاكر» ئەمریكا دخوازیت هەرێما كوردستانێ د مامەلا نێڤدەولەتی و هەرێمایەتی دا رۆلی ببینیت، د راستی ژی دا ئەو رۆلێ هەرێما كوردستانێ دیتی یێ ئەرێنی بوو، هەرێما كوردستانێ ژ روویێ ئەمنی جهێ دلگرانیێ نینە و پشتبەستن پێ دهێتە كرن، ژ روویێ بازرگانی و دیپلۆماسی و ئازادییان و پێكڤەژیانا نەتەوە و ئایینان یا قەبوولكریە».

سەرۆك مەسعود بارزانی راگەهاند، هەلوەشاندنا كورسیێن پێكهاتەیان ل پەرلەمانێ كوردستانێ لێدانە ل پرسا هەڤپشكیێ و پێكەڤەژیانێ. باس ل ئەوێ چەندێ ژی كر، مانا هێزێن هەڤپەیمانییا نێڤدەولەتی ل ئیراقێ پرسەكا نیشتمانییە و گرێدای هەموو پێكهاتەیانە.
سەرۆك بارزانی ل سەلاحەدین پێشوازی ل گلین مایلز، بالیۆزێ ئوسترالیا ل ئیراقێ كر.
ب گۆڕەی بەیاننامەیەكێ بارەگەهێ بارزانی» د دیدارەكێدا بالیۆزێ ئوسترالیا پەیوەندیێن دوقۆلی د ناڤبەرا وەلاتێ خوە و هەرێما كوردستانێ دا بلند هەلسەنگاندن و خواستا وەلاتێ خوە بۆ ب هێزكرنا ئەوان پەیوەندییان بەرچاڤكر».
د پشكەكا دی یا دیدارێدا» باس ل هەلبژارتنێن پەرلەمانی ل هەرێما كوردستانێ هاتە كرن» كو بڕیارە ل 10/6/2024 بهێنە ئەنجامدان.» ل دۆر ئەڤی بابەتی پرسا دژوارییا ئەنجامدانا پرۆسەیێ بێ پشكدارییا هەموو پێكهاتەیان هاتە كرن، ژ بەر كو هەلوەشاندنا كۆتایا پێكهاتەیان لێدانە ل پرسا هەڤپشكیێ و پێكڤەژیانێ».
ئەو ژی هاتە بەرچاڤكرن» هەرێما كوردستانێ هەردەم پێداگیری ل سەر پێكڤەژیانێ كریە كو ئێكە ژ ئەوان بنەمایێن سەرەكی كو پشكداریكرن د پڕۆسەیا سیاسیدا ل هەرێمێ ل سەر هاتییە ئاڤاكرن».
د پشكەكا دی یا بەریاننامەیا بارەگەهێ بارزانی دا هاتییە» پێكهاتە پشكەكا نە ڤەبڕن ژ گەلێ كوردستانێ و ژ بەر ب هێزبوونا هەڤڕكییان دبیت بێی هەبوونا كۆتا نەشێن نوونەرایەتییا خوە ل پەرلەمانێ كوردستانێ بدەستڤە بینن».
د تەوەرەكێ دی یێ دیدارێدا، باس مانا هێزێن هەڤپەیمانییا نێڤدەولەتی ل ئیراقێ هاتە كرن، سەرۆك بارزانی ئاماژە ب ئەوێ چەندێ كر» ئەڤە پرسەكا نیشتمانییە و گرێدای هەموو پێكهاتەیان و پێدڤییە د ئەڤی روانگەهیدا بابەتێ مەترسیێن پەیدابوونا تیرۆرێ ل بەرچاڤ بهێتە وەرگرتن».

سەرۆك بارازنی ل سالڤەگەڕا سەرهلدانا پیرۆز یا گەلێ كوردستانێ پەیامەك بەلاڤكر، تێدا دبێژیت» سەرهلدان پەیامەكا گەلەك رۆهن بوو كو سەرەرای ب هێزییا داگیركەران، ئیرادەیا سەربلندییێ و ئازادیخوازییێ هەردەم د ناخێ مرۆڤێ كوردستانی دا هەبوو و دێ مینیت ژی.
سەرۆك مەسعود بارزانی دوهی سێشەمبی 5/3/2024 ب هەلكەفتا سالڤەگەڕا 33 یا سەرهلدانا پیرۆز پەیامەك بەلاڤكر و تێدا دبێژیت» سەرهلدان پەیامەكا گەلەك رۆهن بوو كو سەرەرای ب هێزییا داگیركەران، ئیرادەیا ژیانا سەربلندیێ و ئازادیخوازیێ هەردەم د ناخێ مرۆڤێ كوردستانی دا هەبوو و دێ مینیت ژی».
سەرۆك بارزانی گۆت ژی: دەستكەفتێن سەرهلدانێ مولكێ گەلێ كوردستانێ و نەڤییێن داهاتی نە. ل سالڤەگەرا سەرهلدانا گەلێ كوردستانێ دوپاتیێ ل ئەوێ چەندێ دكەین كو پێدڤییە دەستكەفت و ئارمانج و بهایێن سەرهلدانێ ب بلندی بمینن و بهێنە پاراستن و ب هێزتركرن. نابیت د هیچ رەوشەكێ و ل بن هیچ فشارەكێدا بهێنە ژبیركرن و شێواندن».

سەرۆكێ هەرێما كوردستانێ ب هەلكەفتا سالڤەگەرا سەرهلدانا پیرۆز دبێژیت، گەلێ كوردستانێ ب ئێكڕێزیێ دشێت ل بەرامبەر گەفێن سەر قەوارەیێ دستووریێ هەرێما كوردستانێ ب راوەستیت.
دوهی سێشەمبی 5/3/2024، نێچیرڤان بارزانی، سەرۆكێ هەرێما كوردستانێ پەیامەك ب هەلكەفتا سالڤەگەرا 33 یا سەرهلدانا پیرۆز یا گەلێ كوردستانێ بەلاڤكر.
سەرۆكێ هەرێما كوردستانێ د پەیاما خوە دا دبێژیت» دیرۆكێ یا سەلماندی كو ناكۆكی و دوبەرەكی، ئەزموونین گەلەك تەحلن و زیانێن مەزن ل پێگەه و دەلیڤە و دەستكەفتان دایە».
نێچیرڤان بارزانی ئاماژە كر ژی» گەلێ كوردستانێ كو ل پێنجێ ئادارا 1991 ل رانیە دەرگەهێ سەرهلدانێ گیانێ خوە ل سەر دەست دانا وژ پێخەمەت ئازادیێ سەرهلدا، دوماهی ب ئێك ژ دژوارترین سەردەمێن ستەم و دیكتاتۆریەتی ئینا. ئێدی چو جاران دەست ژ ئازادیێ و ئارمانجێن پیرۆز یێن سەرهلدانێ نا بەردەت».

وەلاتێن جیهانێ ب گەرمی پێشوازی ل دەستیشانكرنا ژڤانێ هەلبژارتنێن هەرێما كوردستانێ ژ ئالیێ نێچیرڤان بارزانی، سەرۆكێ هەرێما كوردستانێ دكەن و دوپاتیێ ل ئەوێ چەندێ دكەن كو هەلبژارتنێن بهێت یێن هەرێما كوردستانێ و رەوایەتییا سیستەمێ وێ یێ دیموكراسی گەلەك د گرنگن.
نێچیرڤان بارزانی، سەرۆكێ هەرێما كوردستانێ ل رۆژا ئێكشەمبییا بۆری 3/3/2024 د فەرمانەكا هەرێمی دا رۆژا 10/6/2024 وەكو ژڤانێ ئەنجامدانا هەلبژارتنێن پەرلەمانێ كوردستانێ دەستنیشانكر و ئەڤ بڕیارە سەرۆكێ هەرێما كوردستانێ ژ ئالیێ بالیۆزخانە و قونسلخانەیێن وەلاتان ڤە ب گەرمی پێشوازی لێ هاتە كرن.
قۆنسلخانەیا گشتییا ئەمریكا ل هەولێرێ د پێگەهێ خوە دا ل تۆرا جڤاكییا (ئێكس) پێشوازی ل دەستنیشانكرنا ژڤانێ هەلبژارتنێن پەرلەمانێ كوردستانێ كر و راگەهاند» پشتەڤانیێ ل هەلبژارتنێن ئازاد و دادپەروەرانە دكەین كو بۆ دیموكراسییەكا ساخلەم و پاشەڕۆژا هەرێما كوردستانا ئیراقێ گەلەك یا گرنگە».
هەڤدەم قۆنسلخانەیا گشتییا بریتانیا ل هەولێرێ د وێبسایتێ خوە دا پێشوازی ل بڕیارێ كر و راگەهاند» بۆ ئەوێ چەندێ گەلێ كوردستان دەربڕینێ ژ دەنگێ خوە بكەت و بۆ پاشەڕۆژا هەرێما كوردستانێ ژی، هەلبژارتن گەلەك د گرنگن.
نەتەوەیێن ئێكگرتی ژی پێشوازی ل بڕیارا سەرۆكێ هەرێما كوردستانێ كر د دەستنیشانكرنا ژڤانێ ئەنجامدانا هەلبژارتنێن پەرلەمانێ كوردستانێ. كلاودیۆ كۆردۆن، جێگرێ هنارتیێ تایبەتێ سكرتێرێ گشتیێ نەتەوەیێن ئێكگرتی ل ئیراقێ هیڤی خواست كو ئێدی ئاستەنگ ل پێشبەری هەلبژارتنێن پەرلەمانێ كوردستانێ نەهێنە دروستكرن.
گوت ژی» د بەرهەڤین بۆ بەردەوامیدانێ ب دابینكرنا پشتەڤانیێ بۆ هەلبژارتنێن پەرلەمانێ كوردستانێ».
ژ ئالیێ خوەڤە قۆنسلخانەیا ئەلمانیا ل هەولێرێ بەلاڤكر» پێشوازیێ ل بڕیارا نێچیرڤان بارزانی، سەرۆكێ هەرێما كوردستانێ دكەین بۆ ئەنجامدانا هەلبژارتنێن بهێت یێن پەرلەمانێ كوردستانێ ل 10/6/2024. هەلبژارتنێن دادپەروەرانە و ئازاد بنەمایەكێ گرنگە بۆ ب هێزكرنا سەقامگیرییا دیموكراسی ل هەرێما كوردستانێ و رەوایەتییا سیستەمێ وێ یێ سیاسی».
هەڤشێوەیێ قۆنسلخانەیێن دی، قۆنسلخانەیا ئیتالیا ل هەولێرێ پشتی كو پێشوازی ل بڕیارا نێچیرڤان بارزانی، سەرۆكێ هەرێما كوردستانێ كری، راگەهاند» هاندانا هەموو ئالییان دكەین پڕۆسەیا هەلبژارتنێن پاقژ، ئازاد و دادپەروەرانە بڕێڤەببەن» .
قۆنسلخانەیا گشتییا هولەندا ژی پێشوازی ل بڕیارا سەرۆكێ هەرێما كوردستانێ كر و راگەهاند» هەلبژارتنێن ئازاد و دادپەروەرانە وەكو ئۆكسجینێیە بۆ هەر دیموكراسییەتەكێ».
هەڤدەم، یان برایێم، قۆنسلێ گشتیێ فڕەنسا ل هەولێرێ ب ناڤێ قۆنسلخانەیا فڕەنسا پێشوازی ل دەستنیشانكرنا هەلبژارتنێن پەرلەمانێ كوردستانێ ل رۆژا 10/6/2024 ژ ئالیێ سەرۆكێ هەرێما كوردستانێ كر.
قۆنسلێ فڕەنسی دیاركر» رێكخستنا هەلبژارتێن ئازاد د بەرژەوەندییا مە هەموویان دایە».
پشتەڤانییا وەلاتێ كەنەدا ل بڕیارا سەرۆكێ هەرێما كوردستانێ ب رێكا بالیۆزخانەیا وێ بوو ل ئیراقێ، كاسی بۆنكا، بالیۆزێ كەنەدا ل ئیراقێ د پێگەهێ خوە یێ تایبەت دا ل تۆرا جڤاكییا (ئێكس) راگەهاند» هەلبژارتنێن پەرلەمانێ هەرێما كوردستانا ئیراقێ ل رۆژا 10/6/2024 هاتە پشتراستكرن. كەنەدا هاندانا هەلبژارتنێن ئازاد و دادپەروەرانە دكەت ل ئیراقێ».