نێچیرڤان بارزانی، سەرۆكێ هەرێما كوردستانێ دوهی ب سەرەدانەكا فەرمی گەهشتە تەهرانێ و دێ ل گەل سەركردەیێن وی وەلاتی كۆم بیت.
بڕیارە ئەڤرۆ سەرۆكێ هەرێما كوردستانێ ل گەل عەلی خامنەیی رێبەرێ كۆمارا ئیسلامی یا ئیرانێ، ئیبراهیم رەئیسی سەرۆككۆمارێ‌ ئیرانێ و محەمەد باقر قالیباف سەرۆكێ پەرلەمانێ وی وەلاتی كۆم ببیت.
سەرۆكێ دیوانا سەرۆكاتیا هەرێما كوردستانێ ل دۆر سەرەدانا سەرۆكێ‌ هەرێمێ‌ راگەهاند؛ ئارمانجا سەرەكی یا سەرەدانا نێچیرڤان بارزانی، سەرۆكێ هەرێما كوردستانێ بۆ تەهرانێ، ب هێزكرن و نووكرنا پەیوەندیێن دوقۆلییە.
فەوزی هەریری ئاشكرا ژی كر كو پەیوەندیەكا سیاسی و ئابۆری یا دێرین د ناڤبەرا هەرێما كوردستانێ و ئیرانێ دا یا هەی و گۆت: (هەروەكو چاوا مە ل گەل توركیا باشترین پەیوەندی هەنە، دڤێت ب هەمان ئاراستە ل گەل ئیرانێ ژی بزاڤێ بكەین، لێ د هەمان دەم دا پێدڤیە ئیران رێزێ ل سەروەرییا ئیراقێ و هەرێما كوردستانێ بگریت).
هەروەسا نازم دەباغ، نوونەرێ‌ حكومەتا هەرێما كوردستانێ‌ ل تەهرانێ‌ راگەهاند، سەرەدانا سەرۆكێ هەرێما كوردستانێ بۆ ئیراقێ‌ گرنگیەكا تایبەت هەیە و كۆمارا ئیسلامیا ئیرانێ‌ و حكومەتا هەرێما كوردستانێ‌ هەڤپەیمانیەكا ستراتیژی یا دێرین یا هەی).

سەرۆكێ دیوانا سەرۆكایەتییا هەرێما كوردستانێ راگەهاند: ئارمانجا سەرەكی یا سەرەدانا نێچیرڤان بارزانی، سەرۆكێ هەرێما كوردستانێ بۆ تەهرانێ، ب هێزكرن و نووكرنا پەیوەندیێن دوقۆلییە. ب پێدڤی ژی دزانیت، ئیران رێزێ ل سەرەوەرییا ئیراقێ و هەرێما كوردستانێ بگریت.
دوهی ئێكشەمبی 5/5/2024، فەوزی هەریری، سەرۆكێ دیوانا سەرۆكایەتییا هەرێما كوردستانێ سەبارەت سەرەدانا نێچیرڤان بارزانی، سەرۆكێ هەرێما كوردستانێ بۆ تەهرانێ، گوت» سەرۆكێ هەرێما كوردستانێ چەندین جاران ب شێوەیەكێ فەرمی بۆ سەرەدانا تەهرانێ هاتییە داخوازكرن. نوكە رەوش یا گونجای بوو، بۆ ئەوێ چەندێ سەرەدان بهێتە ئەنجامدان».
هەریری گوت ژی» پەیوەندییەكا سیاسی و ئابۆری یا دێرین د ناڤبەرا هەرێما كوردستانێ و ئیرانێدا یا هەی» هەروەسا گوت ژی» هەروەكو چاوان مە ل گەل توركیا باشترین پەیوەندی یا هەی، دڤێت هەمان ئاراستە ل گەل ئیرانێ بزاڤێ بكەین، بەلێ د هەمان دەمدا پێدڤییە ئیران رێزێ ل سەروەرییا ئیراقێ و هەرێما كوردستانێ بگریت».
ل دووڤ سەرۆكێ دیوانا سەرۆكایەتییا هەرێما كوردستانێ» ئارمانجا سەرەدانا نێچیرڤان بارزانی، سەرۆكێ هەرێما كوردستانێ بۆ تەهرانێ، ب هێزكرن و نووكرنا پەیوەندییانە د هەموو بواراندا».
ئاماژە كر ژی» د گەشبینین كێشە هەكە هەبن، بهێنە چارەسەركرن».
سەرۆكێ دیوانا سەرۆكایەتییا هەرێما كوردستانێ دوپاتی ل ئەوێ چەندێ كر» ئەم چو جاران ناهێلین هیچ مەترسییەك ژ هەرێما كوردستانێ ل سەر ئیرانێ، توركیا و سووریێ بهێتە كرن».
ئەو شاندێ ل گەل سەرۆكێ هەرێما كوردستانێ بۆ تەهرانێ، پێك دهێت ژ جێگرێن سەرۆكێ هەرێمێ و وەزیرێ ناڤخوەیی ل حوكمەتا هەرێما كوردستانێ و سەرۆكێ دیوانا سەرۆكایەتییا هەرێما كوردستانێ و هەژمارەكا بەرپرسێن هەرێما كوردستانێ. سەرۆكایەتییا هەرێما كوردستانێ د بەیاننامەیەكێدا بەلاڤكر» نێچیرڤان بارزانی دێ ل گەل بەرپرسێن بلند یێن كۆمارا ئیسلامییا ئیرانێ كۆمبیت و سەبارەت پێشڤەبرنا پەیوەندیێن ئیرانێ ل گەل ئیراقێ و هەرێما كوردستانێ و هاریكارییا هەڤپشك د ناڤبەرا ئەواندا، هەروەسا سەبارەت پێشهاتێن دەڤەرێ ب گشتێ، دێ گەنگەشێ كەن».

سەرۆكێ حوكمەتا هەرێما كوردستانێ راگەهاند: دخوازین زانكۆ و ناڤەندێن مە یێن ئەكادیمی، ل ئاستێ پێشكەفتنێن ب لەز یێن ئەڤی سەردەمیدا بن و ببنە هاریكارێن پڕۆسەیا گەشەپێدانا ژێرخانەیا مە یا ئابۆری. هەروەسا دوپات ل ئەوێ چەندێ كر كو چو جاران قەیران مە سار ناكەن ژ ئەوێ چەندێ گرنگییەكەكا تمام ب پێشئێخستن و پێشڤەبرنا خواندنێ و زانكۆیێن خوە بدەین.
دوهی ئێكشەمبی 5/5/2024، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، دیدارا خواندنا بلند یا هەرێما كوردستانێ و ئوردنێ ل هەولێرا پایتەخت، ب پشكدارییا شاندەكێ بلند یێ وەزارەتا خواندنا بلند یا ئوردنی و هەژمارەكا مەزن ژ زانكۆیێن ئوردنێ و هەرێما كوردستانێ بڕێڤەچوو.
د دیدارێدا، سەرۆكێ حوكمەتا هەرێما كوردستانێ پەیڤەك پێشكێشكر و ئەڤە دەقێ وێیە:
ب خێرهاتنەكا گەرم ل مێهڤانێن بەرێز، شاندێ ئوردنی دكەم بۆ هەرێما كوردستانێ و سوپاسییا رێكخەرێن ئەڤێ دیدارا گرنگ دكەم و هیڤییا سەركەفتنێ بۆ كارێن وان دخوازم.
هیڤیدارم د دەمێ ئەڤان چەند رۆژاندا، ئەنجام و راسپاردەیێن گرنگ و ب مفا بهێنە بەرچاڤكرن هەروەسا ئەڤ دیدارە، ببیتە جهێ پێشئێخستنا زێدەتر یا خواندنا بلند ل هەرێما كوردستانێ.
مە رێز و پێزانین یێن هەین بۆ هاریكاری و هەماهەنگییا ئوردنێ ل گەل حوكمەتا هەرێما كوردستانێ د بوارێن جۆراوجۆر دا.
خوەشحالین كو مە پەیوەندییەكا دێرین و دۆستانە ل گەل وەلاتێ ئوردنێ ب رێبەرایەتییا شاه عەبدوللایێ دویێ یا هەی، كو ل قۆناغێن جودا دا، هاریكار و پشتەڤانێ هەرێما كوردستانێ بوو.
پێشئێخستن و پێشڤەبرنا خواندنێ و ناڤەند و دەزگەهێن مە یێن ئەكادیمی، ئێك ژ كارێن مە یێن بەراهیێیە كو دخوازین زانكۆ و ناڤەندێن مە یێن ئەكادیمی، ل ئاستێ پێشكەفتنێن ب لەز یێن ئەڤی سەردەمیدا بن و ببنە هاریكارێن پڕۆسەیا گەشەپێدانا ژێرخانەیا مە یا ئابۆری.
راستە ل سالێن بۆری، تووشی چەندین قەیرانێن جۆراو جۆر بووین و ب سەر گەلەك ژ وان ژی زال بووین، بەلێ چەند مە كێشە و قەیران ژی هەبن، چو جاران مە سار ناكەن ژ ئەوێ چەندێ گرنگییەكا تمام ب پێشئێخستن و بەر ب پێشڤەبرنا خواندن و زانكۆیێن خوە بدەین. پێدڤییە زانكۆیێن مە، هاریكارێن مەبن بۆ دیتنا چارەسەریێ بۆ كێشە و قەیرانێن روو ب روویێ مە دبن و ب رێكا پلان و نەخشەرێكەكا زانستییانە، هاریكارییا حوكمەتێ بكەن بۆ ئەوێ چەندێ درێژیێ ب بەرنامەیێ چاكسازییا هەمەئالییانەیا خوە بدەت.
مە چاڤەڕێبوونەكا مەزن ژ زانكۆیان یا هەی بۆ ئەوێ چەندێ رۆلێ خوە یێ كاریگەر و كارا نەكو تنێ وەكو بنگەهەكێ زانستیێ فێركاری و پێگەهاندنا نڤشێن مە بگێرن، بەلكو دەزگەهێن زیندی رۆشەنگیری و لڤینێن نویخوازی و داهێنانێ ژی بن.
هەردەم خوازیارێن ئەوێ چەندێ نە كو ئارامی و سەقامگیری ل هەرێما كوردستانێ و ئیراقێ و دەڤەرێ و جیهانێ ب گشتی هەبیت. د ئەڤی چارچۆڤەی ژی دا، هەرێما كوردستانێ هەردەم بزاڤ كریە و كاری كریە بۆ ئەوێ چەندێ رۆلەكێ ئەرێنی هەبیت د دابینكرن و پاراستنا سەقامگیریێدا، چونكە تنێ ل رەوشەكا سەقامگیردا، دشێین كار ل سەر پێشئێخستنا جڤاكێ خوە د هەموو بواراندا بكەین بۆ ئەوێ چەندێ بگەهینە ئاستێ وەلات و جڤاكێن پێشكەفتی، كو ئەم ژ روویێ سامانێ مرۆڤی و مادی، هیچ ژ ئەوان جڤاكان كێمتر نینین و تنێ مە پێدڤی ب رەوشەكا ئارام و سەقامگیر و بڕێڤەبرنەكا ژیر و زانستی و داهێنەر یا هەی بۆ ئەوێ چەندێ ل ئاستێ پێشكەفتنێن سەردەمدا بین.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: د نوكە دا پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقێ د ئەرێنی نە و تێكگەهشتنەكا باش یا هەی بۆ ئەوێ چەندێ بشێین ل دۆر كێشەیان بگەهینە رێككەفتنێ.
د . ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ د داخۆیانییەكا رۆژنامەڤانیدا گۆت» سەرۆكێ حوكمەتا هەرێما كوردستانێ ل دووماهییا سالا 2023 سەرەدانا بەغدا كربوو و تێكگەهشتن د ناڤبەرا سەرۆكێ حوكمەتا هەرێمێ و ئیراقێ دروست بوو و پاشی سەرەدانا ئەمریكا كر، پشتی ئەوێ چەندێ ژی تێكگەهشتنەكا باش د ناڤبەرا سەرۆكێ حوكمەتا هەرێمێ و ئیراقێ دروستبوو و بەری جەژنا رەمەزانێ دو مووچە هاتنە دان، نوكە ژی بڕیارە مووچەكێ دی ژی بهێتە دان، راسپاردەیا سەرۆكێ حوكمەتا هەرێمێ بۆ تیما حوكمەتێ ئەوە بابەتێ داهاتێ نە پەترۆلی ژی د چارچۆڤێ سەرەدان و دانوستاندنێن د ناڤبەرا هەردو حوكمەتاندا بهێتە ئێكلاكرن».
د. ڤیان سەبری گوت ژی» دانوستاندنێن د ناڤبەرا حوكمەتا هەرێما كوردستانێ و ئیراقێ یێن چووینە قۆناغێن نوو و د ئەرێنی نە و سەرۆكێ هەرێما كوردستانێ پشكداری د دو كۆمبوونێن ئیئتیلافا بڕێڤەبرنا دەولەتێدا كریە و دخوازین پترییا كێشەیان ب دانوستاندنێ بهێنە چارەسەركرن. دانوستاندن ل سەر كۆمەكا پرسان د ناڤ ئیئتیلافا بڕێڤەبرنا دەولەتێدا دێ هێنە كرن، ژ ئەوان ژی هەلبژارتنا سەرۆكێ جڤاتا نوونەرێن ئیراقێ كو مافێ سووننەیایە، ل ئەوی بابەتێ گرنگ سووننە بخوە بگەهنە رێككەفتنێ و میكانیزمەك بهێتە دانان و پاشی پەیڕەوێ ناڤخوەیی بهێتە راستڤەكرن یان ژی ئەو ب خوە بەربژارەكی دیار بكەن، لەوما چاڤەڕێی سوننەیان دكەین بگەهنە رێككەفتنێ، وی دەمی كێشەیا دیاركرنا سەرۆكێ نوو یێ جڤاتا نوونەران نامینیت، هەر میكانیزمەكا بدانن ژی ئەم دێ پشتەڤانیێ لێكەین».
د. ڤیانێ خویاكر» بڕیارە ل 9/5/2024 بێهنڤەدانا قانووندانانێ دەستپێبكەت، هەكە خشتەیێ بودجەی ژ ئالیێ حوكمەتا ئیراقێ ڤە بۆ راستڤەكرنێ بگەهیت دێ بێهنڤەدان هێتە درێژكرن، ئەم د بەرهەڤین بۆ ئەوێ چەندێ بودجە بهێتە راستڤەكرن لەوما د شیاندایە د دەمێ بێهنڤەدانا جڤاتا نوونەراندا كۆمبوونا نە ئاسایی بهێتە ئەنجامدان بۆ هەلبژارتنا سەرۆكێ جڤاتا نوونەران هەكە سوننە بگەهنە رێككەفتنێ یان ژی بۆ دانوستاندنێ ل دۆر خشتەیێن بودجەی».
رۆهنكر ژی» حوكمەتا هەرێما كوردستانێ و حوكمەتا ئیراقێ ژی ب تایبەتی سەرۆك وەزیرێن ئیراقێ و سەرۆكێ حوكمەتا هەرێمێ دخوازن پەیوەندییەكا باش هەبیت، لەوما تێكگەهشتنەكا باش ل سەر بودجەی و مووچەی یا هەی، لەوما هەردو حوكمەت بزاڤێ دكەن پێنگاڤان بهاڤێژن بۆ ئەوێ چەندێ بگەهنە رێككەفتنێ، كێشە ژی زێدەتر تەكنیكی نە و گەلەك جاران كو دچنە دناڤ هووردەكارییاندا بۆ ئەوێ چەندێ بچنە د بوارێ بجهئینانێدا دەم بۆ دڤێت، نیەتا باش یا هەی بۆ ئەوێ چەندێ كێشە بهێنە چارەسەركرن، نابیت ژی هەموو مەهەكێ ب تایبەت بۆ مووچەی وەزارەتا داراییا ئیراقێ كێشەیا تەكنیكی دروست بكەت، پێدڤییە ئەو كێشەیێن تەكینیكی ب دووماهی بهێن و ئێدی گرفت نەهێنە دروستكرن».

چاڤدێرەکێ سیاسی یێ رۆژهەلاتێ کوردستانێ دیار کر، سەرەدانا سەرۆکێ هەرێما کوردستانێ بۆ ئیرانێ د دەمەکێ گەلەک گرنگ دایە، چونکی هەرێما کوردستانێ پەیوەندیێن دیرۆکی ل گەل ئیرانێ هەنە، ژ بۆ چارەسەرکرنا ئاریشێن ل گەل بەغدایێ ژی بێگومان ئەڤ سەرەدانە دێ گەلەک یا گرنگ بیت.

مەسعود مورادی چاڤدێرێ سیاسی یێ رۆژهەلاتێ کوردستانێ سەبارەت ب سەرەدانا نێچیرڤان بارزانی سەرۆکێ هەرێما کوردستانێ بۆ ئیرانێ دیار کر، بەری هەر تشتەکێ ئەم دزانین ئیران وەلاتەک گەلەک کاریگەرە ل ئیراقێ، هەروەسا کاریگەریا ئیرانێ ل سەر پشکەک ژ پارتێن سیاسی ل هەرێما کوردستانێ ژی هەیە، د دەمێن بۆری دا گەلەک ئالۆزی د ناڤبەرا هەولێر و بەغدایێ دا هەبوون، وەکو دیار ئیرانێ جارەکێ ژی ب رەنگەکێ راستەوخوە ئێرشی هەولێرێ کر، لێ ئەو یەک زیانێن خوە یێن مەزن بۆ ئیرانێ هەبوون و گۆت: (سەرۆکێ هەرێما کوردستانێ شیا د دەمەکێ کورت دا چەند جاران سەرەدانا بەغدا بکەت، نها پەیوەندیێن هەولێر و بەغدا بەر ب قۆناغەکا نوو ڤە دچن، ژ بۆ کو هەولێر و بەغدا بشێن ئاریشێن هەی ب تەمامی چارەسەر بکەن گرنگە هەرێما کوردستانێ پەیوەندیێن خوە ل گەل ئیرانێ ژی باشتر بکەت، ژ بەر ڤێ یەکێ ژی سەرەدانا سەرۆکێ هەرێما کوردستانێ بەرێز نێچیرڤان بارزانی بۆ تەهرانێ گەلەک گرنگە و ئەز باوەرم دێ ئەنجامێن خوە یێن گەلەک باش بۆ هەرێما کوردستانێ ژی هەبیت).
چاڤدێرێ سیاسی ئەو یەک ژی دیار کر، رۆژهەلاتا ناڤین ب گشتی د قۆناغەکا گەلەک هەستیار دایە، چاڤەرێی گەلەک گوهۆڕینان دهێتە کرن، ئیران و تورکیا وەکو دو وەلاتێن زلهێزێن دەڤەرێ هەڤڕکیەکا مەزن ل سەر ئیراقێ و هەرێما کوردستانێ دکەن، ژ بەر ڤێ یەکێ ژی گەلەک گرنگە هەرێما کوردستانێ ژی د گوهۆڕینێن نها ل دەڤەرێ دا خوەدان رۆل بیت، ژ بەر ڤێ یەکێ ژی سەرەدانا ڤێجارێ تا سەرۆکێ هەرێما کوردستانێ بۆ ئیرانێ دێ یا جودا بیت و دشێت ببیتە ئەگەرێ دەستپێکرنا قۆناغەکا نوو و گۆت: (هەکە پەیوەندیێن هەرێما کوردستانێ ب تایبەتی ژی پارتی ل گەل ئیرانێ باشتر لێ بهێن دێ ئێرشێن گرۆپێن چەکدار ل سەر هەولێرێ ب تەمامی هێنە راگرتن و هەلوەستێ بەغدا ژی ل هەمبەر هەرێما کوردستانێ دێ نەرمتر لێ هێت).
چاڤدێرێ سیاسی یێ رۆژهەلاتێ کوردستانێ ئەو یەک ژی دیار کر، بهێزبوونا پێگەهێ هەرێما کوردستانێ دێ بیتە ئەگەرێ ڤێ یەکێ جارەکا دی حسابەکا تایبەت بۆ کوردان ل رۆژهەلاتا ناڤین بهێتە کرن، د دەمێن بۆری دا گەلەک پیلان ل دژی هەرێما کوردستانێ هاتنە گێران، لێ ژ بۆ ئیرانێ و هەموو ئالیەکێ ژی هاتە سەلماندن کو هەرێما کوردستانێ هەردەم فاکتەرێ ئارامیێ بوویە، ژ بەر ڤێ یەکێ ژی سەرەدانا سەرۆکێ هەرێما کوردستانێ بۆ ئیرانێ دێ ئەنجامێن خوە یێن باش بۆ هەرێما کوردستانێ هەبیت.

سەرۆك مەسعود بارزانی ب مەبەستا ژ نێزیك ئاگەهداربون ل خیڤەتگەها تایبەت یا گەنج و لاوێن كوردستانا سووریێ ل دەڤەرا بارزان، سەرەدانا ئەوێ خیڤەتگەهێ كر كو ئەو خیڤەتگەهە دچارچۆڤەیێ خۆلێن گەشەپێدانا مرۆڤیدا بۆ لاو و گەنجان ژ ئالیێ دەزگەهێ خێرخوازیێ بارزانی ڤە دهێنە ئەنجامدان. كار و چالاكیێن ئەوێ خیڤەتگەهێ ژی، سەرەدانا مەیدانی بۆ شوونوارێن دیرۆكی و گوتنا وانەیێن تیۆری و بابەتێن گرێدای ژێنگەهپارێزیێ و پێكڤەژیانێ بخوەڤە دگریت. هەر د چارچۆڤەیێ ئەوی پرۆگرامی دا ژی، كار و چالاكیێن دەزگەهێ خێرخوازیێ بارزانی ل كوردستانا سووریێ ب شێوەیێ ئینفۆگرافیك هاتنە نیشاندان.

سەرۆكێ هەرێما كوردستانێ، نێچیرڤان بارزانی پێشوازی ل شاندەكێ جڤاتا پیران یێ ئەمریكی كر ب سەرۆكایەتییا سێناتۆرجۆنی ئێرنتس وسێناتۆر تێد باد. شاندێ ئەمریكی بەردەوامییا پشتەڤانییا وەلاتێ خوە بۆ ئیراقێ و هەرێمێ دوپاتكر و دیاركر كو ئەمریكا وەكو هەڤپەیمانەك گرنگیێ پەیوەندییان ل گەل هەرێما كوردستانێ ددەت و رۆلێ پێشمەرگەی ژی د شكاندنا داعشێ دا و پاراستنا ئارامی و سەقامگیریێ ل ئیراقێ بلند هەلسەنگاند. ژ ئالیێ خوەڤە سەرۆكێ هەرێمێ سوپاسییا بەردەوامییا پشتەڤانییا جڤاتا پیران و كۆنگرێسێ ئەمریكی ل ئیراقێ و هەرێما كوردستانێ كر و دوپاتی ل خواستا ئیراقێ و هەرێمێ بۆ پێشڤەبرنا هاریكارییا هەڤپشك و پەیوەندییان ل گەل ئەمریكا كر.

سەرۆكێ حوكمەتا هەرێما كوردستانێ، مەسرور بارزانی پێشوازی ل زیاد عەلی، وەزیرێ كارەبا ئیراقێ كر و هەردو ئالییان گەنگەشە ل دۆر كار و پرۆژە و چاكسازیێن كەرتێ كارەبێ و پێدڤییا بەردەوامبوونا هەماهەنگیێ د ناڤبەرا بەغدا و هەولێرێدا ژ پێخەمەت باشتركرنا رەوشا كارەبێ كر. سەرۆكێ حوكمەتا هەرێمێ ئاماژە ب هێرشا تیرۆرستییا چەند رۆژێن بۆری ل سەر پڕۆژەیێ غازا كۆرمۆر كر و دوپاتكر كو هێرشكرن ل سەر ژێرخانەیا ئابۆرییا هەرێمێ، زیان بۆ هەموو وەلاتیێن ئیراقێ یا هەی و پێدڤییە دووماهی ب ئەوان هێرشان بهێتە دان. هەروەسا بەرهەڤییا هەرێمێ بۆ هەر هاریكاری و هەماهەنگییەكا پێدڤی ل گەل بەغدا دیاركر ژ پێخەمەت گەشەپێدانا ژێرخانەیا وزێ كو پێدڤییە ئەنجامدانا هەر كار و پڕۆژەیەكی ژی تنێ ب رێكا دەزگەهێن فەرمی یێن حوكمەتا هەرێمێ بیت.

دوهی شەمبیێ 4/5/2024 مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ جڤاتا پیران یێ ئەمریكی كر كو یێ پێكهاتی بوو ژ هەردو سێناتۆران تێد باد و جۆنی ئێرنتس.
ب گۆڕەی بەیاننامەیەكا حوكمەتا هەرێما كوردستانێ، د كۆمبوونەكێدا كو ئەلینا رۆمانووسكی، بالیۆزا ئەمریكا ل ئیراقێ و مارك سترۆ، قونسلێ گشتیێ ئەمریكا ل هەرێما كوردستانێ بەرهەڤبووین، دانوستاندن ل دۆر پێشڤەبرنا پەیوەندیێن دو قۆلی و دووماهی پێشهاتێن ئیراقێ و گرنگییا پاراستنا مافێن دستووری و شایستەیێن دارایی یێن هەرێما كوردستانێ هاتە كرن.
شاندێ جڤاتا پیران یێ ئەمریكی، وەكو د بەیاننامەیا حوكمەتا هەرێمێدا هاتی» پشتەڤانییا وەلاتێ خوە بۆ پاراستنا ئاسایش و ئارامییا هەرێما كوردستانێ دوپاتكر».
ژ ئالیێ خوەڤە سەرۆكێ حوكمەتا هەرێما كوردستانێ سوپاسییا بەردەوامییا پشتەڤانییا ئەمریكا كر، ب تایبەتی ل پشتەڤانیكرنا پێشمەرگەیدا. دوپاتی ژی ل گرنگییا چارەسەركرنا كێشەیێن هەرێما كوردستانێ و حوكمەتا فیدرال ل سەر بنەمایێ دستووری و رێككەفتنان و هەروەسا رێزگرتن ل سیستەمێ فیدرالی و قەوارەیێ دستووریێ هەرێما كوردستانێ كر.
تەوەرەكێ دی یێ دانوستاندنان یێ تایبەت بوو ب هەلبژارتنێن پەرلەمانێ كوردستانێ، سەبارەت ئەڤێ چەندێ دوپاتی ل گرنگییا ئەنجامدانا هەلبژارتنێن ئازاد و زەلال و دادپەروەرانە، ب پشكدارییا هەموو ئالییان و پاراستنا مافێ پێكهاتەیان هاتە كرن.

د بەیاننامەیەكێدا، فراكسیۆنا پارتی دیموكراتی كوردستان ل جڤاتا نوونەرێن ئیراقێ، داخواز دكەت هەلبژارتنێن پاقژ و زەلال بهێنە ئەنجامدان و هەموو پێكهاتە پشكداریێ تێدا بكەن.
فراكسیۆنا پارتی ل جڤاتا نوونەرێن ئیراقێ، داخوازكر ژی تیما یونامی و جڤاكێ نێڤدەولەتی و چاڤدێرێن نێڤدەولەتی باشتر و بەرفرەهتر چاڤدێرییا پڕۆسەیا هەلبژارتنان بكەن و رۆهن كر»پارتی دوپاتیێ ل ئەوێ چەندێ دكەت دەلیڤە بهێتە خوەشكرن بۆ ئەنجامدانا هەلبژارتنێن زەلال و هەموو ئالیێن سیاسی و پێكهاتەیێن هەرێما كوردستانێ پشكداریێ تێدا بكەن و دووربن ژ سەپاندنا ئیرادە و ئەنجام و دابەشكارییا پێشوەخت».
د بەیاننامەیا فراكسیۆنا پارتی ل جڤاتا نوونەرێن ئیراقێدا هاتییە ژی» ب حێبەتییەكا مەزن ڤە بەیاننامەیەك ژ ئالیێ هەژمارەكا فراكسیۆنێن جڤاتا نوونەرێن ئیراقێ دەركەفتییە، ل دۆر هەلبژارتنێن جڤاتا نوونەرێن كوردستانێ، ئەم ل پارتی دیموكراتی كوردستان دوپاتیێ ل سەر چەند خالان دكەین».
د بەیاننامەیا فراكسیۆنا پارتی دا ئاماژە ب ئەوێ چەندێ ژی هاتییە كرن» پارتی دیموكراتی كوردستان ئێكەمین هێزا سیاسییا كوردستانی بوو ب رێكا سەرۆك بارزانی و ل بهارا سالا 1991 ل كۆمبوونەكا جەماوەری ل كۆیە باس ل ئەوێ چەندێ كر كو دڤێت شەرعییەتا شۆڕەشگێری ڤەگوهێزین بۆ شەرعییەتا دستووری و دیموكراسی ب رێكا هەلبژارتنان».
د خالەكا دی یا بەیاننامەیێدا هاتییە» ل سالا 1992 هەتا دووماهی هەلبژارتن، پارتی دیموكراتی كوردستان سەركەفتییەكا ئێكێ بوو و هیچ دەمەكی ترس ژ هەلبژارتنان نەبوو، چونكە پشتگەرما ئەندام و لایەنگر و دۆستێن پارتییامە و نیشتمانپەروەرێن كوردستانێیە».
فراكسیۆنا پارتی دوپاتكر» دەمێ دو سالایە پارتی داخواز دكەت هەلبژارتن بهێنە ئەنجامدان بەلێ هندەك ئالی و ب تایبەت ئەوێن نوكە بەیاننامەیان دنڤیسن ب خوە باش دزانن كیش ئالی رێگربوو ل پێشبەری ئەنجامدانا هەلبژارتنان و ئەوێ ژی دزانن كو كیش ئالیێ سیاسی بوو دگوت، هەكە هەلبژارتن ژی بهێتە ئەنجامدان ناهێلین سندووقێن دەنگدانێ ژ دیگەلە و وێڤە بهێنە دانان و ناهێلین ل سنوورێ سلێمانیێ هەلبژارتن بهێنە ئەنجامدان».
هەروەسا دبێژیت» پارتی دیموكراتی كوردستان هەردەم ل گەل ئەنجامدانا هەلبژارتنان بوو و دێ دگەلدا ژی بیت ب مەرجەكی ئیرادەیا خەلكێ كوردستانێ یا پاراستی بیت و دوور بیت ژ داڕێشتنا پێشوەخت و ئەو تێبینی و سەرنجێن پارتی تێبینیێن نەتەوەیەكینە و پارتی ل گەل هەلبژارتنێن زەلال و دوور ژ دەستێوەردانێیە».
هەڤدەم فراكسیۆنا پارتی ل جڤاتا نوونەرێن ئیراقێ راگەهاند» پارتی دیموكراتی كوردستان ل گەل ئەوێ چەندێیە هەلبژارتن بهێنە ئەنجامدان و مافێ هەموو پێكهاتەیان یێ پاراستی بیت و نابیت پێكهاتەیان نوونەر د جڤاتا نوونەرێن ئیراقێ و جڤاتێن پارێزگەهێن ئیراقێدا هەبیت و ل جڤاتا نوونەرێن ئیراقێ بهێنە بێبەهركرن».