ئەڤرۆ نیوز، ئەمیر ئەترووشی:

حوکمەتا عیراقێ بریار دابوو ل سەر بۆدجا سالا 2018 یا جڤاتا پارێزگەھا نەینەوا ھەر رزگاربوویەکێ ئێزدی 560 ھزار دیناران وەکو ھاریکاری بدەتێ، بەلێ ھەتا نوکە ئەو پارە نەھاتیە دان.
حسێن قائیدی، بەرپرسێ نڤیسینگەھا رزگاربوویێن کوردێن ئێزدی بۆ ئەڤرۆ نیوز دیار کر، د بۆدجا سالا 2018 یا جڤاتا پارێزگەھا نەینەوا کۆژمێ ملیار دیناران بۆ رزگاربوویێن کوردێن ئێزدی ھاتبوونە تەرخانکرن، ژ بۆ ھندێ ھەر رزگاربوویەک 560 ھزار دیناران وەکو دیاری وەربگریت، بەلێ ھەتا نوکە ئەو پارە نەھاتیە مەزاختن و د ئەڤ سالە دا چو رزگاربوویان ئەڤ پارە وەرنەگرتیە.
قائیدی ئاشکرا ژی کر کو ناھێتە ڤەشارتن ل سالا 2017 جڤاتا پارێزگەھا نەینەوا 560 ھزار دینار دابوونە ھەر رزگاربوویەکی، بەلێ ل سالا 2018 ئەڤ پارە نەھاتیە مەزاختن و چو دیار نینە ژی کا دێ حوکمەتا عیراقێ وی پارەی دەتە رزگاربوویان یان ژی نە.

ئەڤرۆ نیوز، لەزگین جوقی:

گەرا ئێکێ یا ئێزدیێن بووینە قوربانیێن دەستێن رێکخراوا تیرۆرستێن داعش کو پێکھاتی بوون ژ 20 خێزانان چوونە وەلاتی فرەنسا ل سەر داخوازیا وی وەلاتی.

وەلاتێ فرەنسا ل 25 ئۆکتۆبەرا ئەڤ سالا بریار دابوو ب سەدان خێزانیێن ئێزدی یێن بووینە قوربانیێن دەستێ داعش وەربگریت.
خەیری بۆزانی، رێڤەبەرێ گشتی یێ کاروبارێن ئێزدیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ بۆ ئەڤرۆ نیوز دیار کر کو ئەڤ ھژمارا خێزانیێن ئێزدی ب ریێا وان نەچووینە دەرڤەی وەلاتی و گۆت: “نادیە موراد بالیۆزا نیازپاکیێ ل نەتەوەیێن ئێکگرتی پێشوازی ل ڤێ ھژمارا خێزانێن ئێزدی کر ل وەلاتێ فرەنسا”.

حسێن کورو قائێدی، رێڤەبەری نڤیسینگەھا رزگارکرنا رەڤاندیێن ئێزدی سەر ب نڤیسینگەھا سەرۆکێ حوکمەتا ھەرێما کوردستانی ڤە دیار کر کو رێکەفتنەک د ناڤبەرا حوکمەتا ھەرێما کوردستانێ و ئەلمانیا دا ھاتبوو کرن کو رزگاربوویێن ئێزدی بچنە وەلاتێ ئەلمانیا بۆ وەرگرتنا چارسەریێ ل سالا 2015ی پشتی دووڤچوون ھاتیە کرن دیاربوویە ھەتا ھزار و 100 کەسان یێن چووینە وەلاتێ ئەلماینا ژوان ژی پتر ژ 240 کەسان نەکەفتینە ددەستێن تیرۆرستێن داعش دا و یێن چووینە وەلاتێ ئەلمانیا و ئەڤە بوویە جھێ نەرازیبوونا خەلکی ئێزدیان، چونکو بەرنامە بۆ چارەسەریا زەرمەندێن دەستێن تیرۆرستی داعش ھاتبوو دانان نە بۆ خەلکێ دی یێ نە زەرمەند.

ناڤھاتی ئاماژە دا وێ چەندێ کو ھەتا نوکە سێ ھزار و 334 رەڤاندیێن ئێزدی یێن ژ دەستێن تیرۆرستێن داعش ھاتینە رزگارکرن و ئوپەراسیۆنێن رزگارکرنا رەڤاندیان دێ د بەردەوام بن ھەتا ئێک رەڤاندی مابیت دێ کار بۆ رزگارکرنا وان یێ بەردەوام بیت.

ئەڤرۆ نیوز، قائید میرۆ:

لێگەریان بۆ دیتنا تەرمێن پەنابەرێن ھەرێما کوردستانێ ل دەریا ئیجە دا یا بەردەوامە و بەرپرسەکێ پەنابەران ژی ئاشکرا کر کو رۆژانە وێنێن تەرمێن خەندقیان دگەھنە فیدڕاسیۆنا پەنابەران و ل دۆر پەنابەرێن زاخۆ ژی دبێژیت، ھێشتا تەرمێن 10 کۆچبەرێن زاخۆ د ناڤ دەریا ئیجەدا ماینە و بزاڤێن دیتنێ ژی بەردەوامن.

ئاری جەلال، سەرۆکێ فیدڕاسیۆنا پەنابەران ل ھەرێما کوردستانێ بۆ ئەڤرۆ نیوز دیار کر کو رۆژانە ب رێیێن جودا وێنە و بادەکێن تەرمێن پەنابەران دگەھنە بەردەستێ وان، بەلێ ئەو تەرمێن خەلکێ عیراقێ و ھەرێما کوردستانێ نەبن ئەو دووڤچوونێ بۆ ناکەن گۆت: “دووڤچوون و ڵگەریان بۆ تەرمێن پەنابەرێن ھەرێما کوردستانێ دھێتەکرن”.

ل دۆر چاڤەرەنڤیسێ تەرمێن قوربانیێن زاخۆ ئاری جەلال دیار کر کو ھەتا نوکە تەرمێن 10 قوربانیێن قەزا زاخۆ ل دەریا ئیجە دا ماینە و نەھاتینە دیتن، بەلێ بزاڤێن وان د بەردەوامن بۆ دیتنا تەرمێن وان قوربانیان، و گۆت: “بادەکەکا تایبەت بۆ ھاتیە ڤەکرن و ئەم دەستا ژێ بەرنادەین ھەتا جارەکێ دھێنە دیتن، چونکی کەس و کارێن وان چاڤەڕێ دکەن و ب تنێ چار ژوان کۆچبەرێن زاخۆ تەرمێن وانا ھاتینە دیتن و ڤەگەڕاندن بۆ ھەرێما کوردستانێ”.