نێچیرڤان بارزانی، سەرۆكێ هەرێما كوردستانێ د پەیوەندییەكا تەلەفۆنی دا، پیرۆزباهی ل ئیلهام ئەلییەڤ ، سەرۆكێ كۆمارا ئازەربایجانێ كر ب هەلكەفتا جارەكادی هەلبژارتنا ئەوی وەكو سەرۆكێ وەلاتێ ئازەربایجانێ.
نێچیرڤان بارزانی هیڤییا سەركەفتنێ بۆ ئەلییەڤی و پێشكەفتنا بەردەوام بۆ وەلاتێ وی خواست و دوپاتكر كو هەرێما كوردستانێ دخوازیت پەیوەندیێن وێ ل گەل ئازەربایجانێ وهاریكارییا هەڤپشك د ناڤبەرا هەرێمێ و ئازەربایجانێ بەر ب پێشڤە بچیت، ژ ئالیێ خوەڤە سەرۆكێ ئازەربایجانێ سوپاسیا سەرۆكێ هەرێما كوردستانێ كر و خواستا وەلاتێ خوە بۆ پێشڤەبرنا پەیوەندییان ل گەل ئیراقێ و هەرێما كوردستانێ دوپاتكر، هەروەسا هەردو ئالییان باس ل دوماهی دیدارا د ناڤبەرا ئەوان دا ل باكو پایتەختنا ئازەربایجانێ كر.

سەرۆكێ هەرێما كوردستانێ، نێچیرڤان د پەیوەندییەكا تەلەفۆنی دا ل گەل سەلاحەدین محەمەد بەهائەدین، ئەمیندارێ گشتیێ ئێكگرتوویا ئیسلامی كوردستان، پیرۆزباهییا سالڤەگەرا 30 یا راگەهاندنا ئێكگرتووی ل ئەوی و سەركردایەتی و جەماوەرێ ئێكگرتووی كر و هیڤییا سەركەفتنێ بۆ خواست، هەروەسا رۆلێ ئێكگرتووی د ژیانا سیاسی یا هەرێما كوردستانێ دا بلند هەلسەنگاند.
ژ ئالیێ خوەڤە سەلاحەدین محەمەد بەهائەدین، ئەمیندارێ گشتیێ ئێكگرتووی ئیسلامی كوردستان، سوپاسییا خوە و سەركردایەتی و جەماوەرێ ئێكگرتووی بۆ پەیوەندی و پیرۆزباهییا سەرۆكێ هەرێما كوردستانێ دەربڕی و هیڤییا سەركەفتنێ بۆ خواست.

سەرۆكێ حوكمەتا هەرێما كوردستانێ، مەسرور بارزانی پێشوازی ل یاشار گولەر، وەزیرێ بەرگرییا توركی و شاندێ دگەلدا كر و د كۆمبوونەكێ دا دوپاتی ل گرنگییا بەردەوامبوونا هەماهەنگی و هاریكارییا هەڤپشك ژ پێخەمەت ئاسایش و ئارامییا هەرێما كوردستانێ و ئیراقێ و دەڤەرێ هاتە كرن.
وەزیرێ بەرگرییا توركی هەڤخەمییا خوە بۆ گیان ژدەستدانا قوربانیێن هێرشا هەولێرێ دەربڕی و ئاماژەكر كو هیچ بەهانە بۆ ئەوێ هێرشێ نەبوون.
سەرۆكێ حوكمەتا هەرێمێ خواستا هەرێمێ بۆ پێشڤەبرنا پەیوەندیێن دوقۆلی ل سەر بنەمایێ هەڤسنۆرییا باش و بەرژەوەندیێن هەڤپشك دوپاتكر. هەروەسا دیاركر ژی هەرێما كوردستانێ وەكو هەردەم دێ فاكتەرەكێ ئاسایش و سەقامگیریێ بیت و رێكێ ژی نادەت ببیتە جهێ گەف و مەترسیێ بۆ هەڤسنۆرێن مە.

سەرۆكێ حوكمەتا هەرێما كوردستانێ، مەسرور بارزانی د چاڤپێكەفتنەكێ دا ل گەل كەنالێ NBC یێ ئەمریكی راگەهاند: سروشتێ گەفان یێ هاتییە گوهارتن و مە پێدڤی ب هاریكارییا زێدەتر ژ روویێ لەشكری و ئابۆری و سیاسی ڤە هەیە، چونكە ئەو ئاستەنگێن روو ب روویی مە بووین دجودانە ژ گەفێن داعشێ كو پێكڤە روو ب روویێ ئەوان بووین لەوما پێشبینییا هاریكارییا زێدەتر ژ ئەمریكا دكەین.
سەرۆكێ حوكمەتا هەرێما كوردستانێ گۆت ژی» مە پێدڤی ب هاریكارییا زێدەتر یا ئەمریكایە و مەبەستا مە ئەو نینە مە پێدڤی ب سەربازێن زێدەترە، نەخێر مە پێدڤی ب شیانێن لەشكری یێن زێدەترە بۆ ئەوێ چەندێ شیانێن لەشكری یێن پێشمەرگەی بگەهنە ئاستەكی نەكو تنێ بەرگریێ ژ خەلكێ خوە بكەین بەلكو بەرگریێ ژ هەموو ئەوێن ل هەرێما كوردستانێ ژی بكەین».
« گرنگ نینە كی ل پشت كریارێن تیرۆرستییە، پێدڤی یە ئەم روو ب روویێ تیرۆرێ ب خوە ببین» ئەڤە پێناسەیا مەسرور بارزانی، سەرۆكێ حوكمەتا هەرێمێ یە بۆ شەڕێ دژی تیرۆرێ، دچاڤپێكەفتنا تایبەت دا ل گەل كەنالێ NBC یێ ئەمریكی، كو هەڤدەم بوو ل گەل هێرشێن درۆنی یێن ئەمریكا ل بەغدا و كوشتنا دو سەركردەیێن حەشدا شەعبی، هندەك ژ سیاسیێن بەغدا ژی داخوازا ب دوماهئینانێ ب ئەركێ لەشكرێ ئەمریكی ل ئیراقێ دكەن.
مەسرور بارزانی دبێژیت: جۆرێ گەفان یێ هاتییە گوهارتن و مە پێدڤی ب هاریكارییا زێدەتر و مانا ئەمریكا و هەڤپەیمانایە».
مەسرور بارزانی رۆهنكر ژی: سروشتێ گەفان یێ هاتییە گوهارتن و ب دیتنا مە ئەم پێدڤی ب هاریكارییا زێدەترین ژ روویێ لەشكری، ئابۆری و سیاسی ڤە. چونكە ئەو ئاستەنگێن روو ب روویێ مە بووین د جودانە ژ گەفێن داعشێ كو پێكڤە روو ب روو بووین. پێشبینییا هاریكارییا زێدەتر دكەین ژ ئەمریكا. هەڤپەیمانێن مە یێن ئەمریكی دبێژنە مە دخوازین كوردستانەكا ب هێز ببینین چاوان؟ ئانكو پێدڤییە ژ روویێ ئابۆری، سیاسی و لەشكری ب هێز بین بۆ ئەوێ چەندێ بشێین ل بەرامبەر گەفان خوە بپارێزین».
سەرۆكێ حوكمەتا هەرێما باس ل ئەوێ چەندێ ژی كر: وەكو دزانن بەری چەند رۆژان ب درۆن و مۆشەكان هێرش ل سەر مە هاتە كرن و مە شیانێن ئەوێ چەندێ نینن خوە ل بەرامبەر بپارێزین. دەمێ دبێژین مە پێدڤی ب هاریكارییا زێدەتر یا ئەمریكایە مەبەستا مە ئەو نینە مە پێدڤی ب سەربازێن زێدەترە، نەخێر مە پێدڤی ب شیانێن لەشكری یێن زێدەتر بۆ ئەوێ چەندێ شیانێن لەشكری یێن پێشمەرگەی بگەهنە ئاستەكی نەكو تنێ بەرگریێ ژ خوە و خەلكێ خوە بكەین، بەلكو بەرگریێ ژ هەموو ئەوان ژی بكەین كو ل هەرێما كوردستانێ نە».
هەروەسا گۆت» هۆكارێ هەبوونا سەربازێن ئەمریكا و هەڤپەیمانان ل ئیراقێ ئەوە، ئیراق یا بەرهەڤ نەبوو بۆ روو ب رووبوونا ئەوان گەفان و پڕكرنا ڤالاهییان، نوكە ژی ب دیتنا مە هێزێن ئیراقی ئەو شیان نینن كو د بەرهەڤ بن بۆ روو ب رووبوونا ئەوان ئاستەنگان، لەوما هەبوونا ئەمریكا یا گرنگە بۆ پشتەڤانیێ ل ئەوان هێزان، هەتا ئەوی دەمێ سەقامگیری مسۆگەر دبیت».
خویاكر ژی» هەكە ئەمریكا خوە ڤەكێشیت، دێ ڤالاهییەك دروست بیت، دترسم ئەو ڤالاهییە ژ ئالیەكێ هێزەكا نە د بەرژەوەندییا ئیراقێ و مە هەموویان دا بهێتە پڕكرن، ئانكو هێزەك پڕ بكەت ببیتە مەترسی ل سەر دەڤەرێ».
سەبارت راگرتنا هنارتنا پەترۆلا هەرێما كوردستانێ گۆت: راگرتنا هنارتنا پەترۆلی و نەدانا پشكا بودجەیا هەرێما كوردستانێ بارگرانی دروستكرییە و خەلك تووشی كێشەیان بوویە، كۆمپانیێن بیانی ژی كو هندەك ژ ئەوان ئەمریكی نە و ل هەرێما كوردستانێ وەبەرئێنان كرییە تووشی كێشەیان بووینە. بەلێ سەرۆك وەزیرێن ئیراقا فیدرال نیازپاكی نیشاندایە و ئومێد یا هەی كێشە بهێنە چارەسەركرن».
زێدەبوونا هێرشێن درۆنی و مۆشەكی، ئاماژەیەكا رۆهنە كو شەڕەكێ نوو ل دەڤەرێ دەستپێكرییە. هەرێما كوردستانێ ژی یا دوور نینە ژ ئاگرێ ئەڤی شەڕی. هەرچەندە هەرێما كوردستانێ هیچ دەمەكی نەبوویە گەف بۆ سەر هەڤسنۆرێن خوە و هەموو دەمان فاكتەرێ سەقامگیریێ بوو ل دەڤەرێ. سەبارەت ئەڤێ چەندێ، سەرۆكێ حوكمەتا هەرێما كوردستانێ گۆت» ئەم پێناسەیا تیرۆرێ باش دزانین، گرنگ نینە كی ل پشت ئەڤان كریارێن تیرۆرستییە، پێدڤییە ئەم رێگریێ ل كریارێن تیرۆرستی ب خوە بكەین. پێدڤییە روو ب روویێ تیرۆرێ ببین، نەكو ئەوێ ل پشت كریارێ. ئەڤە دیتنا منە ل دۆر ئەوێ هەماهەنگی و هاریكارییا مە ل گەل ئەمریكا و هەڤپەیمانێن مە هەی. بۆ ئەوێ چەندێ ژی ب پشتڕاستی ڤە مە پێدڤی ب پشتەڤانییا ئەمریكا یا هەی. بێی هاریكاری و پشتەڤانییا ئەمریكا گەلەك یا ب زەحمەتە و دێ گەلەك ئاستەنگ هەبن».
گۆت ژی: ئەم ل هەموو دەمان ل بەراهییا شەڕێ دژی تیرۆرێ بووین. وەكو دۆست و هەڤپەیمان ژی دڤێت مە ژی شیان هەبن، مە پێدڤی ب پشتەڤانییا ئەمریكا هەیە. لەشكرێ ئەمریكی گەلەك پشتەڤان و هاریكارێ ئیراقێ بوو د شەڕێ دژی تیرۆرێ دا و مانا لەشكرێ ئەمریكی ل هەرێما كوردستانێ یا پێدڤییە، مە هیچ دەمەكی داخوازا ڤەكێشانا لەشكرێ ئەمریكی نەكرییە».
ئاماژەكر: ئەمریكا دشێت زێدەتر بكەت ژ ئەوێ چەندا تنێ ل دەمێ كوشتنا سەربازێن وێ دا ب شێوەیەكێ سنۆردار بەرسڤێ بدەت. دشێت سیستەمێ بەرگرییا ئەسمانی و چەكێ پێشكەفتی و راهێنانێن زێدەتر بدەتە پێشمەرگەی».

بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان، فازل میرانی ل بارەگەهێ مەكتەبا سیاسی پێشوازی ل یان برێم، قۆنسلێ گشتیێ فرەنسا ل هەولێرێ كر.
فازل میرانی سەرەرای ب خێرهاتنێ پیرۆزباهی ل یان برێم كر ب هەلكەفتا دەستبكاربوونا ئەوی وەكو قۆنسلێ گشتیێ فرەنسا ل هەولێرێ و هیڤی خواست د ئەركێ خوە دا یێ سەركەفتی بیت. هەروەسا پەیوەندیێن دوقۆلی د ناڤبەرا فرەنسا و هەرێما كوردستانێ ب دیرۆكی و گەلەك سەركەفتی هەژمارتن و رۆلێ گەل و حوكمەتا فرەنسا د پشتەڤانیكرنا گەلێ كوردستانێ و هەرێما كوردستانێ ب گرنگ دا زانین.
فازل میرانی كورتییەك ل سەر كوردستانێ و گەلێ كوردستانێ پێشكێشكر و دوپاتكر سەرەرای ئالۆزییان هەرێما كوردستانێ جهەكێ هەرە سەقامگیرە ل دەڤەرێ و كێشەیێن د ناڤبەرا بەغدا و هەولێرێ دا ل سەر جۆرێ هزركرنێ و مێشكێ دەستهەلاتدارێن بەغدایە نەكو كەسان و ئاریشەیا هەرە گرنگ پێشێلكرنا بڕگەیێن دستوورێ ئیراقێ یە و بجهنەئینانا وی ژ ئالیێ حوكمەتا ئیراقێ ڤە.
فازل میرانی هەڤڕێزییا هێزێن سیاسییێن كوردستانی ب گرنگ بۆ ئەڤێ قۆناغێ هەژمارت.

د بەردەوامییا سەرەدانا خوە دا بۆ ئەمریكا، شاندێ سەرۆكایەتییا هەرێما كوردستانێ هەژمارەكا كۆمبوونان ل گەل بەرپرسێن بلند یێن ئەمریكی ل كۆچكا سپی و وەزارەتا دەرڤە و وەزارەتا بەرگریێ (پێنتاگۆن) ئەنجامدا ل دۆر دوماهی پێشهاتان و پێشڤەبرنا پەیوەندیێن ئەمریكا ل
گەل هەرێما كوردستانێ د چارچۆڤەیێ رێككەفتنا ستراتیژی د ناڤبەرا ئیراقێ و ئەمریكا دا.
كۆمبوون ل گەل هەر ئێك ژ ئاكۆس هۆكستاین مەنە شیرەتكارێ سەرۆكێ ئەمریكی بۆ كاروبارێن وزێ و وەبەرئێنانێ ل كۆچكا سپی، ئەزرا زیا، برێكارێ وەزیرێ دەرڤەی بۆ ئاسایشا سڤیل و دیموكراسیێ و مافێن مرۆڤی، دانیێل شاپیرۆ، جێگرێ هاریكارێ وەزیرێ بەرگریێ بۆ كاروبارێن رۆژهەلاتا ناڤین و ڤیكتۆریا تایلۆر، جێگرا هاریكارێ وەزیرێ دەرڤە بۆ كاروبارێن رۆژهەلاتا نێزیك، بڕێڤەچوون.
د كۆمبوونان دا پرسا وزێ و گرنگییا هنارتنا پەترۆلا هەرێما كوردستانێ، هەلبژارتنێن داهاتی یێن پەرلەمانێ كوردستانێ، پەیوەندیێن هەولێرێ و بەغدا، رەوشا پێكهاتە و ئاوارەیان، ئازادییا رادەربڕینێ و مافێن مرۆڤی، بجهئینانا رێككەفتنا شنگالێ، پڕۆسەیا چاكسازیێ ل وەزارەتا پێشمەرگەی ل حوكمەتا هەرێمێ و ئێكخستنا پێشمەرگەی، دوماهی پێشهاتێن رەوشا ئالۆز یا رۆژهەلاتا ناڤین و شەڕێ غەزە و ئەنجامێن وی، دانوستاندن ل سەر هاتە كرن.
شاندێ سەرۆكایەتییا هەرێما كوردستانێ پێكهاتبوو ژ فەوزی حەریری، سەرۆكێ دیوانا سەرۆكایەتییا هەرێمێ، فەلاح مستەفا، هاریكارێ سەرۆكێ هەرێمێ بۆ كاروبارێن سیاسەتا دەرڤە و نیاز سالح، بەرپرسێ پەیوەندیێن دەرڤە و دبلۆماسی ل سەرۆكایەتییا هەرێمێ و تریفە عەزیز نوونەرا حوكمەتا هەرێمێ ل واشنتۆن، بۆ دیدار و كۆمبوونێ ل گەل بەرپرسێن ئەمریكی د سەردانەكا چەند رۆژی دانە بۆ ئەمریكا.

سه‌رجان مەحمود:

وەلاتیێن کورد ل تورکیا و باکورێ کوردستانێ داخواز ژ هەموو هێزێن سیاسی یێن کورد دکەن ژ بۆ هەلبژارتنێن باژێرڤانیان بەرەیەکێ ئاڤا بکەن و وەسا پشکداریێ د هەلبژارتنان دا بکەن، چونکی هەکە هێزێن کوردی ئێکگرتی بن ئەو یەک دێ کاریگەریەکا گەلەک مەزن هەبیت و دێ بیتە ئەگەرێ بهێزبوونا پێگەهێ کوردان ل تورکیا.

ل تورکیا بۆ هه‌لبژارتنێن باژێرڤانیان نێزیکی پێنجی رۆژ ماینه‌ و پارتێن تورک د ناڤبه‌را خوه‌ دا هه‌ڤپه‌یمانیان ساز دکه‌ن و ل باکورێ کوردستانێ د ناڤبه‌را پارتێن کورد دا هه‌تا نها چو هەڤپەیمانی دروست نه‌بووینه‌. سازی، کۆمه‌له‌ و رێکخراوێن کورد ل باکورێ کوردستانێ بۆ سه‌رکه‌فتنێن مه‌زن داخواز ژ هه‌موو پارت و ئالیێن سیاسی یێن کورد دکه‌ن کو بۆ به‌رژه‌وه‌ندیێن گشتی یێن کوردان هه‌ڤپه‌یمانیه‌کا کوردی دروست بکه‌ن.
ل تورکیا پارتا داد و گه‌شه‌پێدان و پارتا بزاڤا نه‌ته‌وه‌په‌رست پێکڤه‌ وه‌ک هه‌ڤپه‌یمان پشکداریێ د هه‌لبژارتنێن باژێرڤانیان دا دکه‌ن و ل ئالیێ ئۆپۆزسیۆنێ ڤه‌ هه‌تا نها هه‌ڤپه‌یمانیه‌ک نه‌هاتیه‌ راگه‌هاندن و ئەو یه‌ک ده‌ستێ ده‌ستهه‌لاتێ ل هه‌مبه‌ر ئۆپۆزسیۆنێ بهێزتر دکه‌ت. ل باژێرێن وه‌ک ئسته‌نبۆل، ئه‌نقه‌ره‌، ئه‌زمیر، ئه‌دەنا، مێرسین و ئانتالیا ژی ئاکپارتی و پارتا کۆماری دەست ب بزاڤێن مەزن کرینە دا بشێن پشتەڤانیا کوردان بدەستڤە بینن، لێ دەم پارتی ژی دوهی بەربژارێن خوە بۆ باژێرێ ئستەنبولێ ئاشکرا کر و داخواز ژ دەنگدەرێن خوە ژی کر پشتەڤانیێ ل بەربژارێن وان بکەن، ژ بەر ڤێ یەکێ ژی دهێتە چاڤەرێکرن کو ل باژێرێن مەزن یێن تورکیا هەڤڕکیەکا مەزن د ناڤبەرا ئاکپارتیێ و ئالیێن دی دا هەبیت.
ل ئالیێ دی ل دووڤ ئاژانسێن هه‌رێمی د حه‌فتیا بهێت دا دێ شانده‌کێ ده‌م پارتی سه‌ره‌دانا پارتێن دی یێن کوردستانی که‌ت و بۆ دروستکرنا هه‌ڤپه‌یمانیه‌کا کوردستانی دێ گه‌نگه‌شه‌ هێنه‌ ده‌ستپێ کرن. د ڤێ مژارێ دا سازیێن جڤاکێ سڤیل داخوازێ ژ ده‌م پارتیێ و پارتێن دی یێن کوردی دکه‌ن کو ب ره‌نگه‌کی زه‌لال هه‌ڤپه‌یمانیه‌کا‌ کوردستانی راگه‌هینن و وەکو بەرەیەکێ کوردستانی پشکداریێ د هەلبژارتنێن باژێرڤانیان ل تورکیا دا بکەن، چونکی ئەو یەک دێ بیتە ئەگەرێ بهێزبوونا دەنگێ کوردان.
ئەو یەک د دەمەکێ دایە کو بەری نها چەندین پارتێن کوردی ل باکورێ کوردستانێ ژی دیار کربوون دڤێت ژ بۆ هەلبژارتنێن ڤێجارێ یێ باژێرڤانیان هەموو هێزێن کورد پێکڤە پشکداریێ بکەن دا پێگەهێ کوردان ل تورکیا بهێزتر لێ بهێت.
چاڤدێرێن سیاسی ژی دیار دکەن، رێژەیەکا زۆر دەنگدەرێن کورد ل تورکیا و باکورێ کوردستانێ هەنە، هەکە هێزێن کوردی بشێن بەرەیەکێ کوردستانی ل تورکیا ئاڤا بکەن و کارێن باش بکەن ئەو یەک دێ کاریگەریەکا خوە یا گەلەک مەزن هەبیت، چونکی هەکە بەرەیەکێ کوردستانی بهێتە ئاڤاکرن رێژەیەکا ئێکجار زۆر ژ دەنگدەرێن کورد دێ دەنگێ خوە دەنە هێزێن کوردستانی و ئەو یەک دێ بیتە ئەگەرێ بهێزبوونا پێگەهێ کوردان ل تورکیا، هەکە کورد د ناڤا خوە دا ئێکگرتی بن بێگومان دەستهەلاتا تورکیا ژی دێ یا نەچار بیت پشتی هەلبژارتنان حسابەکا تایبەت بۆ کوردان بکەت، مخابن د هەلبژارتنێن بۆری دا ئەو یەک نەهاتە کرن، ژ بەر هندێ ژی پێگەهێ کوردان لاواز بوو.

سەرۆكێ هەرێما كوردستانێ د كۆمبوونەكێ دا ل گەل قۆنسلێ كۆریا باشوور ل هەرێما كوردستانێ و سەرۆكێ رێكخراوا كۆیكا یا كۆری، پەیوەندیێن هەرێما كوردستانێ و كۆریا باشوور بلند هەلسەنگاندن.
نێچیرڤان بارزانی، سەرۆكێ هەرێما كوردستانێ دوهی سێشەمبی 6/2/2024 پێشوازی ل سۆنگ چۆل لیم، قۆنسلێ گشتیێ كۆریا باشوور ل هەرێما كوردستانێ و كۆ هیسۆك، سەرۆكێ رێكخراوا كۆیكا یا كۆری كر.
سەرۆكایەتییا هەرێما كوردستانێ راگەهاند» د كۆمبوونەكێ دا، پێشڤەبرنا پەیوەندیێن كۆریا باشوور ل گەل هەرێما كوردستانێ و كار و چالاكیێن رێكخراوا كۆیكا یا كۆری ل هەرێما كوردستانێ هاتە باسكرن. كو چەندین سالە هاریكارییا هەرێما كوردستانێ دكەت و چەندین پڕۆژەیێن خزمەتگوزاری ل دەڤەرێن جودا یێن هەرێما كوردستانێ بجهئیناینە».
نێچیرڤان بارزانی پەیوەندی و دۆستایەتییا كۆریا باشوور ل گەل هەرێما كوردستانێ بلند هەلسەنگاند، ب تایبەتی ئاماژە ب ئەوان كار و چالاكییان كر كو رێكخراوا كۆیكا یا كۆری ل چەندین كەرت و بوارێن جودا جودا دا بۆ هاریكارییا خەلكێ هەرێما كوردستانێ ئەنجام ددەت، هەروەسا باس ل كار و خزمەتا تیما زەیتون یا لەشكرێ كۆری كر كو بەری 20 سالان هاتییە هەرێما كوردستانێ و پەیوەندیێن هەرێمێ و كۆریا باشوور ب هێزكرین.

دوهی سێشەمبی 6/2/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل جەیمس گۆلدمان، قۆنسلێ گشتیێ نوو یێ بریتانیا ل هەرێما كوردستانێ كر.
سەرۆكێ حوكمەتا هەرێمێ پیرۆزباهیا دەستبكاربوونێ ل قۆنسلێ گشتی یێ نوو یێ بریتانیا كر و هیڤیا سەركەفتنێ بۆ خواست و پشتەڤانییا حوكمەتا هەرێما كوردستانێ دیاركر ژ پێحەمەت پێشڤەبرنا زێدەتر یا پەیوەندیێن دو ئالی.
قۆنسلێ گشتیێ بریتانیا، سوپاسییا هاریكاری و هەماهەنگییا دەزگەهێن حوكمەتا هەرێما كوردستانێ كر و بەرهەڤییا وەلاتێ خوە بۆ پتر ب هێزكرنا پەیوەندییان ل گەل هەرێما كوردستانێ دوپاتكر.
د پشكەكا دی یا دیدارێ دا، دووماهی پێشهاتێن ئیراقێ و دەڤەرێ و گرنگییا دابینكرن و پاراستنا مافێن دستووری یێن هەرێما كوردستانێ هاتە باسكرن.