ئەڤرۆ نیوز، نیوار محەمەد سەلیم:
رێڤەبەرێ راگەھاندنێ ل رێڤەبەریا گشتی یا پەروەردا پارێزگەھا دھۆکێ راگەھاند کو رێڤەبەریا وان ب ھەڤکاریا رێکخراوا جیھانی یا یونسێف دێ رابن ب ئەنجامدانا ورکشوپەکا دو رۆژی ل دۆر ئەگەرێن نزمیا رێژێن دەرچوونێ ل ئەزموونێن گشتی ل پارێزگەھا دھۆکێ.
ئەحمەد عەبدوللا زوبێر، رێڤەبەرێ راگەھاندنێ ل رێڤەبەریا گشتی یا پەروەردا پارێزگەھا دھۆکێ، د داخۆیانیەکێ دا بۆ ئەڤرۆ نیوز گۆت: “ئەڤرۆ رۆژا چارشەمبی 12ی کانوونا ئێکێ 2018 بۆ جارا ئێکێ ل سەر ئاستێ کوردستانێ دێ ورکشوپەک ل دۆر ئەگەرێن نزمیا رێژێن دەرچوونێ ل ئەزموونێن گشتی ل پارێزگەھا دھۆکێ ھێتە ئەنجامدان”.
زێدەتر گۆت: “ب چاڤدێریا رێڤەبەریا گشتی یا پەروەردا پارێزگەھا دھۆکێ و رێکخراوا یونسێف ئەڤ ورکشوپە بۆ دەمێ دو رۆژان ل ئوتێلا دلشاد پەلاس ژ دەمژمێر 9:00ی سپێدێ ھەتا 4:00ی ئێڤاری ھێتە ئەنجام دان”.
رێڤەبەرێ راگەھاندنێ ل رێڤەبەریا گشتی یا پەروەردا پارێزگەھا دھۆکێ ئاشکەرا ژی کر کو د ڤێ ورکشوپێ دا دێ ئەگەرێن نزمیا رێژێن دەرچوونێ ل ئەزموونێن گشتی ل پارێزگەھا دھۆکێ ھێنە گەنگەشە کرن و گۆت: “چەندین داتایێن گرێدایی رێژێن دەرچوونێ یێن ژ سالا 1992 ھەتا نھا دێ ھێنە بەرچاڤکرن و گەلەک داتایێن دی یێن گرێدای ئەزموونان و چاوانیا بەرسڤدانێ ھێنە بەرچاڤکرن”.
ئەحمەد عەبدولا زوبێر خویا ژی کر کو سەرەرایی ڤێ چەندێ دێ گەلەک کەسێن شارەزا ژ ناڤخۆ و دەرڤەی پارێزگەھێ ھێنە مێھڤانکرن و بەحس ل ئەگەرێن نزمیا رێژێن دەرچوونێ ل ئەزموونێن گشتی ل پارێزگەھا دھۆکێ کەن و ل دووماھیێ ژی دێ رێیێن چارەسەریێ بۆ ڤان ئەنجامێن نزم ھێنە دیارکرن و پاشان ژی وەکو یاداشنامەک دێ بۆ جھێن بەرپرس ھێتە رەوانەکرن.
نيشاندان