وەزارەتا دەرڤە یا ئەمریكا راگەهاند: ئاگەهداری بزاڤێن سەرۆكێ هەرێما كوردستانێ و ئالیێن ئیراقی نە بۆ دیاركرنا ژڤانەكی بۆ ئەنجامدانا هەلبژارتنێن ئازاد ل هەرێما كوردستانێ.
ماتیۆ میلەر، پەیڤدارێ وەزارەتا دەرڤە یا ئەمریكا سەبارەت هەلبژارتنێن پەرلەمانێ كوردستانێ و هەلوەستێ پارتی دیموكراتی كوردستان و سەرەدانا بالیۆزا ئەمریكا بۆ هەرێما كوردستانێ گۆت» د ئەوێ چەندێ دگەهین كو سەرۆكێ هەرێما كوردستانێ و دەستهەلاتدار و پارتێن سیاسی یێن ئیراقی چالاكانە كاردكەن بۆ پێنگاڤێن خوە یێن داهاتی».
میلەری ئاماژە كر كو هاندانا ئەوان بزاڤان دكەن بۆ دیاركرنا ژڤانەكی بۆ هەلبژارتنێن دادپەروەرانە و ئازاد و گەلەك باش ل هەرێما كوردستانێ.
ئەڤە د دەمەكیدایە، پشتی رۆژەكێ ژ كۆمبوونێن خوە ل گەل سەرۆك بارزانی، سەرۆكێ هەرێما كوردستانێ و سەرۆكێ حوكمەتا هەرێما كوردستانێ، ل رۆژا ئێكشەمبی 31/3/2024 ئەلینا رۆمانووسكی، بالیۆزا ئەمریكا ل ئیراقێ راگەهاندبوو» ژ پێخەمەت ئەنجامدانا هەلبژارتنێن پاقژ و زەلال د نێزیكترین دەمدا، من هاندانا پارتی دیموكراتی كوردستان دا کو كاری ل گەل هەموو پارتێن سیاسی یێن كوردستانێ و بەغدا بكەت».
ل رۆژا 18/3/2024 مەكتەبا سیاسی یا پارتی دیموكراتی كوردستان بەیاننامەیەك سەبارەت رەوشا نوكە یا ئیراقێ، پەیوەندیێن هەولێرێ وبەغدا، هەلبژارتنێن پەرلەمانێ كوردستانێ، بڕیارێن دادگەها فیدرالی بەلاڤكربوو و تێدا راگەهاندبوو» ب بەرژەوەندییا گەل و نیشتمانێ خوە دزانین كو پارتییا مە نەچیتە بن بارێ پەسەندكرنا بڕیارا نە دستووری و سیستەمەكێ سەپاندی ژ دەرڤەی ئیرادەیا گەلێ هەرێما كوردستانێ و دەزگەهێن وێ یێن دستووری و پشكداریێ د هەلبژارتنان دا نەكەت كو ب نە قانوونی و نە دستووری و دبن سیبەرا سیستەمەكێ سەپاندیدا بهێنە ئەنجامدان».

ئەندامەكێ مەكتەبا سیاسی یا پارتی دیموكراتی كوردستان ئاماژێ ب ئەوێ چەندێ دكەت كو نەتەوەیێن ئێكگرتی و هەڤپەیمانییا نێڤدەولەتی و هەتا ئەمریكا ژی تێگەهشتن بۆ نیگەرانیێن پارتی یا هەی سەبارەت هەلبژارتنێن پەرلەمانێ كوردستانێ، هەروەسا دبێژیت، هەلبژارتن ب ئەوی شێوەیێ دیزاینا پێشوەخت بۆ هاتییە كرن، د بەرژەوەندییا كوردستانێ و پاشەرۆژا پڕۆسەیا وێ یا سیاسیدا نینە.
عەلی حسێن، ئەندامێ مەكتەبا سیاسی یا پارتی دیموكراتی كوردستان و بەرپرسێ مەكتەبا رێكخستنا پارتی ل پارێزگەها سلێمانیێ و هەلەبجە گۆت» سەرۆك بارزانی هەر ژ پشتی سەرهلدانا 1991 دوپاتی ل ئەوێ چەندێ كریە دڤێت خەلكێ كوردستانێ ب شێوەیەكێ دیموكراسی هەلبژارتنان ئەنجام بدەت و دەنگ ب بەربژار و هێزێن سیاسی بدەت».
عەلی حسێن گۆت ژی» پارتی هەر ژ سالا 1992 هەتا دووماهی هەلبژارتنێن ئیراقێ كو ل چریا ئێكێ 2021 هاتینە ئەنجامدان، پێشەنگ و ل پلەیا ئێكێ بوو».
رۆهنكر ژی» پارتی بەردەوام دوپاتكرییە كو پێدڤییە پڕۆسەیا هەلبژارتنان ل كوردستانێ یا دیموكراسی بیت و پارتی ل دو سالێن بۆری سەرەكیترین ئالیێن سیاسی بوو كو پێداگیربوو ل سەر هەلبژارتنێن پەرلەمانێ كوردستانێ».
باس ل ئەوێ چەندێ ژی كر» هەموو خەلكێ كوردستانێ و قونسلخانەیێن وەلاتان و نەتەوەیێن ئێكگرتی ژی دیدەڤانن كو پارتی هۆكارێ گیروبوونا هەلبژارتنان نەبوو، بلكو ئەو ئالی هۆكار بوو كو ئەجندەیێن دی تێكهەلی هەلبژارتنان كریە».
پتر گۆت» پارتی ل گەل هەلبژارتنێن زەلال و دەربڕینێ ژ هەموو پێكهاتەیێن كوردستانێ بكەت و تایبەتمەندیێن هەرێما كوردستانێ بپارێزیت و رێك نەهێتە دان ب تێكهەلكرنا ئەجندەیێن هەرێمی ب بابەتێ هەلبژارتنان كو دیزاینا پێشوەخت بۆ هاتییە كرن».
عەلی حسێن رۆناهی ئێخستە سەر ئەوێ چەندێ ژی كو ناڤەرۆكا ئەجندەیێن ئیراقی و هەرێمی، گرێدای بڕیارێن دادگەها فیدرالی نە كو شوینا جڤاتا نوونەران و دەزگەهێن دی گرتیە».
ئەوژی بەرچاڤكر» بەلاڤكرنا بازنەیێن هەلبژارتنێن پەرلەمانێ كوردستانێ و نەهێلانا كورسیێن كۆتایا و نەخواندنا پەنجەمۆرێن هزاران دەنگدەرێن كورد نەخاسمە د هەلبژارتنێن جڤاتێن پارێزگەهاندا، پەیامەك تێدایە كو دیزاینەكا پێشوەخت بۆ هەلبژارتنێن پەرلەمانێ كوردستانێ هاتییە دانان و د بەرژەوەندییا هەرێما كوردستانێ و پاشەڕۆژا پڕۆسەیا وێ یا سیاسیدا نینە و لێدانا هەرێما كوردستانێ و ب ئارمانجگرتنا پارتییە ژ بەر كو پارتی و سەرۆك بارزانی خودانێن ئەزموونا كوردستانێ نە».
ئەوی ئەندامێ مەكتەبا سیاسی یا پارتی دیاركر ژی» نەتەوەیێن ئێكگرتی و هەڤپەیمانییا نێڤدەولەتی و هەتا ئەمریكا ژی تێگەهشتن بۆ نیگەرانی و نەرازیبوونێن پارتی هەیە سەبارەت هەلبژارتنێن پەرلەمانێ كوردستانێ ب ئەوی شێوەیێ سەپاندی كو پارتی رەت دكەت».
خویاكر ژی» ئالیێن سیاسی یێن كوردستانی ئەوێ راستیێ دزانن هەلبژارتن بیێ پارتی سەركەفتی نابن، بەلێ ژ بەر جەماوەرێ خوە دڤێت هەلوەستێ جودا ژ پارتی نیشان بدەن».

بەرپرسێ لقێ چار یێ پارتی دیموكراتی كوردستان ل دۆر هەلوەستێ پارتی سەبارەت پشكدارینەكرنێ د هەلبژارتنێن پەرلەمانێ كوردستانێدا راگەهاند، ئەو هەلبژارتن كو بڕیارە ل 10/6/2024 بهێنە ئەنجامدان، پێشتر ب مفایێ ئالییەكێ دەرڤە دیزاین بۆ هاتییە كرن و نابیت پشكداری د هەلبژارتنێن ئەڤی شێوەیدا بهێتە كرن كو پێشبینی و دووماهییا ئەوان هاتییە دیاركرن. هەرڤدەم دبێژیت: هەكە بێی پارتی هەلبژارتن بهێنە ئەنجامدان دێ ئیراق و هەرێما كوردستانێ تووشی كێشەیان بن.
ئاری هەرسین، بەرپرسێ لقێ چار یێ پارتی گۆت» هەر كی پشكداریێ د هەلبژارتناندا بكەت یان نە، یێ ئازادە، ئەم حزبەكا مەبدەئی نە و هەكە پشكدارینەكرن د هەلبژارتناندا د زیانا مە ب خوە ژی دا بیت، ژ مەبدەئێ خوە لانادەین».
ئاری هەرسین گۆت ژی» هەكە بێی پارتی هەلبژارتنێن پەرلەمانێ كوردستانێ بهێنە ئەنجامدان، دێ ئیراق و هەرێما كوردستانێ تووشی كێشەیان بن».
دوپاتكر ژی» یونامی نەشێت میسداقییەتێ ب ئەوان هەلبژارتنان بدەت، چونكە پیلان یێن بۆ هاتینە داڕێشتن و ئەنجامێن وان ژی یێن هاتینە دیاركرن» هەروەسا گۆت» سەرۆك بارزانی تنێ سەرۆكێ حزبەكێ نینە بەلكو سەرۆكێ كوردستانێ و هزرا نەتەوەیەكییە».
پێشتر ژی سەربەست لەزگین، ئەندامێ مەكتەبا سیاسی یا پارتی دیموكراتی كوردستان و بەرپرسێ مەكتەبا رێكخستنا پارتی ل پارێزگەها دهۆكێ گۆتبوو» هەلوەستێ پارتی نەهاتییە گوهۆڕین و دوپاتیێ ل دووماهی بەیاننامەیا مەكتەبا سیاسی یا خوە دكەین و ب ئەڤی شێوەیێ نوكە پشكداریێ د هەلبژارتنێن پەرلەمانێ كوردستانێدا ناكەین».

ل دۆر هەلوەستێ پارتی دیموكراتی كوردستان سەبارەت هەلبژارتنێن خولا شەشێ یا پەرلەمانێ كوردستانێ، ئەندامەكێ پێشتر یێ پەرلەمانێ كوردستانێ ژ فراكسیۆنا پارتی دیموكراتی كوردستان راگەهاند، هەلوەستێ پارتی دیموكراتی كوردستان ل دۆر پشكدارینەكرنێ د هەلبژارتنێن پەرلەمانێ كوردستانێدا هەلوەستەكێ گرنگ و دیرۆكی بوو.
فازل بەشارەتی، ئەندامێ خۆلا سێی یا پەرلەمانێ كوردستانێ ژ فراكسیۆنا پارتی دیموكراتی كوردستان گۆت» هەلوەستێ پارتی دیموكراتی كوردستان بۆ ژناڤبرنا ئەوێ پیلانێ بوو كو بۆ پڕۆسەیا هەلبژارتنان و دیموكراسیێ هاتبوو بەرهەڤكرن».
فازل بەشارەتی ئەوژی راگەهاند، دیرۆك و هەلوەستێ پارتی دیموكراتی كوردستان هەر ئەو چەندە ژێ دهاتە چاڤەڕێكرن.
هەروەسا گۆت ژی» پێشبینی دهاتە كرن هەموو پارت و ئالیێن سیاسی پشتەڤانییا پارتی كربا، چونكە پارتی هەست ب ئەوێ پیلانگیریێ كربوو كو بۆ پڕۆسەیا هەلبژارتنێن خولا شەشێ یا پەرلەمانێ كوردستانێ هاتبوو بەرهەڤكرن».
ئەوی ئەندامێ پێشتر یێ پەرلەمانێ كوردستانێ ئەوچەندە ژی بەرچاڤكر» بەرهەڤی بۆ ئەڤان هەلبژارتنێن پەرلەمانێ كوردستانێ ژ دەرڤەی ئیرادەیا خەلكێ كوردستانێ بوو، ب رامانا ئەوێ چەندێ ئەو دەنگێن كو بڕیار بوو خەلكێ كوردستانێ بدەن، دا بنە تشتەكێ رەمزی، چونكە بەری هەلبژارتنان كورسیێن ئالییان هاتبوو دیاركرن».
فازل بەشارەتی هوشداری ژی دا» ئەوا دا ل گەل هەلبژارتناندا هێتە كرن مەترسییەكا مەزن بوو بۆ پاشەڕۆژا هەرێما كوردستانێ».

سەرۆك مەسعود بارزانی، ب هەلكەفتا جەژنا قیامە یا حەزرەتێ عیسا (س.خ) و سەرێ سالێ (ئەكیتۆ) پیرۆزباهی ل وەلاتیێن كریستیانێن كوردستانێ و ئیراقێ و جیهانێ كر.

دەقێ پەیاما سەرۆك بارزانی:

ب هەلكەفتا جەژنا قیامەتا حەزرەتێ مەسیح (س.خ) گەرمترین پیرۆزباهیێن خوە ئاراستەی خووشك و برایێن كریستیان ل كوردستانێ و ئیراقێ و سەرانسەری جیهانێ دكەم. هەڤدەم ب هەلكفەتا سەرێ سالا نوو و جەژنێن ئەكیتۆ پیرۆزباهیێ ل گەلێ كلدان سریان ئاشووری ل كوردستانێ و ئیراقێ و هەموو جیهانێ دكەم و هیڤییا خێر و خوەشیێ و بەختەوەریێ بۆ دخوازم.
ب ئەڤێ هەلكەفتێ هیڤیخوازم كەلتوورێ پێكڤەژیانێ و برایەتیێ و تەبایێ د ناڤبەرا هەموو پێكهاتەیێن نەتەوەیی و ئایینی ل كوردستانێ و ئیراقێ یێ پاراستی بیت و ب هێزتر بیت و سەرەرای دوپاتكرنا پشتەڤانییا خوە بۆ ماف و داخوازیێن رەوا یێن هەموو پێكهاتەیان دووپاتیێ ل ئەوێ چەندێ دكەم كو ل بن هیچ بەهانە و بیانوویەكی نابیت پاشڤەچوون ب فەرهەنگا پێكڤەژیانێ و مافێ خووشك وبرایێن كریستییان و پێكهاتەیێن نەتەوەیی و ئایینی یێن كوردستانێ و ئیراقێ بهێتە كرن.

سەرۆكێ هەرێما كوردستانێ، نێچیرڤان بارزانی د پەیامەكێدا سەرێ سالا نوو یا بابلی ئاشووری و جەژنا ئەكیتۆ ل خووشك و برایێن كلدانی سریانی ئاشووری و هەموو وەلاتیێن كریستیان پیرۆز كر.
د پەیاما سەرۆكێ هەرێمێ دا هاتییە» سەرێ سالا نوو یا بابلی ئاشووری و جەژنا ئەكیتۆ ل خووشك و برایێن كلدانی سریانی ئاشووری و هەموو وەلاتیێن كریستیان ل هەرێما كوردستانێ و ئیراقێ و جیهانێ پیرۆز دكەم.هیڤییا بێهنڤەدان و جەژنەكا ئارام و ئاسوودە و سالەكا نوو یا پڕی سەركەفتن بۆ دخوازم».
ژ ئالییەكێ دی ڤە، سەرۆكێ هەرێما كوردستانێ د پەیامەكێدا پیرۆزباهییا جەژنا قیامە ل كریستیانان كر و دبێژیت، هەرێما كوردستانێ وەكو هەردەم ب وەلاتێ فرەكەلتوور و پێكڤەژیان و هەڤدوو قەبوولكرن و لێبۆرینێ بۆ هەموو ئایین و نەتەوەیێن خوە دێ مینیت.
نێچیرڤان بارزانی، سەرۆكێ هەرێما كوردستانێ د پەیامەكێدا دبێژیت» جەژنا قیامەیا حەزرەتێ مەسیح (س.خ) ب گەرمی ل هەموو وەلاتیێن خوە یێن كریستیان ل كوردستانێ، ئیراقێ و جیهانێ پیرۆز دكەم، هیڤییا جەژنەكا ئاسودەیی بۆ دخوازم، هیڤیدارم خوەشی و ئارامی دگەل خوە دا بینیت و ئاشتی بال ب سەر هەموو جیهانێ و مرۆڤایەتیێدا بگریت».
نێچیرڤان بارزانی گوت ژی» د ئەڤێ جەژنا پیرۆز دا دوپات دكەین، هەرێما كوردستانێ وەكو هەردەم دێ ب وەلاتێ فرەكەلتووری و پێكڤەژیان و هەڤدوقەبوولكرن و لێبۆرینێ بۆ هەموو ئایین و نەتەوەیێن خوە مینیت و ژ پێخەمەت ئەڤێ چەندێ ژی دا دێ د كار و بزاڤێن خوە دا د بەردەوام بین».
سەرۆكێ هەرێما كوردستانێ داخوازكر ژی» ئەڤێ جەژنا پیرۆز بكەینە دەلیڤەیا ب هێزكرنا برایەتیێ و ئێكڕێزیێ و تەباییێ د ناڤبەرا هەموو پێكهاتەیێن كوردستانێدا و پێكڤە ب گیانێ بەرپرسیارەتییا هەڤپشك، ئەركێن خوە بەرامبەر وەلاتی و پاراستنا ماف و قەوارەیێ دستووریێ هەرێما كوردستانێ بجهبینین و دەست دناڤ دەستدا بۆ پاشەڕۆژەكا باشتر بۆ نڤشێن مە كار بكەین».

زنار تۆڤی:

نوونەرێ حوكمەتا هەرێما كوردستانێ ل فرەنسا راگەهاند: فرەنسا پشتەڤانییێ ل حوكمەتا هەرێما كوردستانێ دكەت و داخواز دكەت هەرێما كوردستانێ و بەغدا ل دووڤ دستووری ئاریشەیێن خوە چارەسەر بكەن.
عەلی دۆلەمەری، نوونەرێ حوكمەتا هەرێما كوردستانێ ل فرەنسا بۆ رۆژنامەیا (ئەڤرۆ) گوت» فرەنسا ئێك ژ وان وەلاتانە یێن كو هەردەم پشتەڤانییێ ل هەرێما كوردستانێ دكەت، سەرەدانا ئەڤێجارێ یا شاندێ حوكمەتا هەرێما كوردستانێ یا سەركەفتی بوو، چونكی هەرێما كوردستانێ بۆ فرەنسا یا گرنگە و ئەوان پشتەڤانییا خوە ژی بۆ حوكمەتا هەرێما كوردستانێ دوپات كرییە».
ناڤهاتی گوت ژی» فرەنسا دوپاتی ل سەر ئەوێ چەندێ كرییە كو پێدڤییە ئیراق ئاریشەیێن خوە ل گەل هەرێما كوردستانێ دچارچوڤەیێ دستووریدا چارەسەر بكەت و مافێن هەرێما كوردستانێ بدەت، چونكی ئەو د دلگرانن ژ ئەوێ چەندێ كو ئەو ئاریشە د بەردەوام بن، لەوما ئارامییا ئیراقێ و هەرێما كوردستانێ یا گرێدایە ب چارەسەركرنا ئاریشەیێن د ناڤبەرا هەرێما كوردستانێ و ئیراقێدا».
عەلی دۆلەمەری ئەو ژی گوت» د دیرۆكێدا جارا ئێكێیە ل سیناتا فرەنسا بیرەوەرییا نەورۆزێ ب پشكدارییا شاندێ حوكمەتا هەرێما كوردستانێ دهێتە كرن، ئەڤە پێنگاڤەكا گرنگە بۆ هەرێما كوردستانێ، وەلاتێ فرەنسا گەلەك گرنگییێ ب هەرێما كوردستانێ ددەت، هەروەسا فرەنسا دوپاتیێ ل سەر ئەوێ چەندێ دكەت كو پێدڤییە ئاریشەیێن د ناڤبەرا بەغدا و هەرێما كوردستانێدا بهێنە چارەسەركرن، ئەو كار دكەن ئاریشەیێن دناڤبەرا هەردو ئالییان ب دانوستاندنێ و ل دووڤ دستووری ئیراقێ بهێنە چارەسەركرن».

شرۆڤەكارەكێ سیاسی ئاشكراكر، پیلانێن مەترسیدار بۆ راستڤەكرنا دستوورێ ئیراقێ یێن هەین و دخوازن هەرێما كوردستانێ بهێتە پارچەكرن و دەنگ ل سەر راستڤەكرنا دستووری دژی هەرێما كوردستانێ بهێتەدان. هەروەسا دبێژیت، پێدڤییە دەستهەلاتا هەرێما كوردستانێ ئاگەهداری ئەوان بزاڤان بیت، چونكە هەر وی دەمی دستوورێ هاتییە پەسەندكرن بزاڤێن دژی دستووری هاتینە دەستپێكرن.
د. محەمەد ئەحمەد، شرۆڤەكارێ سیاسی وئەندامێ بەری یێ پەرلەمانێ كوردستانێ بۆ رۆژنامەیا (ئەڤرۆ) گوت» هەر ژ دەمێ دستووری نوكە یێ ئیراقێ هاتییە پەسەندكرن و دەركرن بانگەشە و دژایەتیا دستووری هاتییە دەستپێكرن، بەلێ ژبەر ئەوان پێرابوونێن بۆ راستڤەكرنا دستووری هاتینە دیاركرن، چونكە رێكارێن راستڤەكرنا دستووری ژئالیێ دستووری ڤە هاتینە دانان و پێدڤییە ب گۆڕەی ئەڤان مەرج و رێكارێن هاتینە دیاركرن دستوورێ ئیراقێ بهێتە راستڤەكرن، ئێك ژ بەندێن دستوورێ ئیراقێ ئەوە هەكە بەندەك یان هەموو بەندێن دستووری ژبلی پرەنسیپێن بنەڕەتی هاتنە بەرهەڤكرن بۆ قۆناغا راستڤەكرنێ وی دەمی دڤێت بكەڤیتە راپرسیێ و دەنگ ل سەر بهێتە دان ب رێكا راپرسییا گشتی بۆ راستڤەكرنا دستوورێ ئیراقێ، هەكە هەموو پارێزگەهێن ئیراقێ ب (بەلێ) دەنگ ل سەر راستڤەكرنا دستووری بدەن، بەلێ ل سێ پارێزگەهان رەتكر ئەڤە دستوور ناهێتە راستڤەكرن و سەرناگریت، بەرۆڤاژی هەكە ل سێ پارێزگەهان ژی دەنگ ل سەر دستووری بهێتەدان ئەڤە بێگومان دێ هێتە راستڤەكرن و دێ سەر گریت».
ئەڤی شرۆڤەكارێ سیاسی زێدەتر گوت» ئەڤە دەمەكە خەلكەكی خوە بەرهەڤ كریە بۆ وێ چەندێ هەرێما كوردستانێ بهێتە پەرت و بەلاڤكرن و لێك جوداكرن، هەتا دو ل سەر سێ یا خەلكی راستڤەكرنا دستووری رەت نەكەت و پیلانا وان سەر بكەڤیت بۆ راستڤەكرنا دستووری، ئەز باوەرم نوكە پڕۆژەیێ راستڤەكرنا دستووری یێ بەرهەڤە و هەردەمێ بۆ بچیتە سەر یان دەم یێ گونجای بیت دێ راپرسی ل سەر راستڤەكرنا دستووری هێتەكرن، هەكە بهێت و ئەڤێ پیلانێ سەرگرت ئەڤە دێ قەوارەیێ سیاسی و دستووریێ هەرێما كوردستانێ ب ئاڤێ دا چیت، ژ بەر كو وەكو من ئاماژە بۆ كری یێ بەرهەڤییان دكەن بۆ دەربازكرنا راستڤەكرنا دستووی و دوبارە دبێژم هەكە سەربگریت دێ شێن ب ساناهی دەربازكەن، لەوڕاژی كار ل سەر لێك جوداكرنا هەرێما كوردستانێ دهێتەكرن و دخوازن بەرهەڤیێن باش بهێنەكرن هەتا دەمێ راپرسیێ دو ل سەر سێ یا سێ پارێزگەهێن هەرێما كوردستانێ دەنگێ نەخێر بۆ راستڤەكرنا دستووری نەدەن».

عەزیز هەورامی:

دادوەر، كوردەوان نەقشبەندی بۆ رۆژنامەیا (ئەڤرۆ) راگەهاند: پێگەهێ پارتی دیموكراتی كوردستان ل هەرێما كوردستانێ و ئیراقێ یێ دیارە و ئایدیۆلۆژییا پارتی حزبەكا دیموكراتیخوازا نەتەوەیییە، دەمێ هەست ب هەبوونا مەترسییان بكەت ژ پاشڤەچوونا دیموكراسیێ د پڕۆسەیا سیاسییا ئیراقێدا، مافێ وێیە هەلویستێ وەربگریت. ئەوا پارتی راگەهاندی. بایكۆتا هەلبژارتنان نینە بەلكو هەلویستەكێ سیاسییە و دخوازیت ئەوێ چەندێ بگەهینیتە سیاسەتمەدارێن ئیراقێ ئەوێن ل پشت بڕیارێن دادگەها فیدرال و بێژیتێ قەبوول ناكەین كو مەترسی بكەڤیتە سەر قەوارەیێ هەرێما كوردستانێ.
پارتی ب گۆڕەی ئەوێ چەندێ زوورترین بەرپرسیارەتی دكەڤیتە سەرێ ملێ وێ، حزبا ئێكێیە و پێكئینەرا سەرەكییا حوكمەتا هەرێما كوردستانێیە، دڤێت ب هووری چاڤدێرییا رەفتار و بڕیارێن سیاسی و بڕیارێن دادگەها فیدرال بكەت، ب تایبەت د ئەڤان سالێن دووماهیێ دا ل ئیراقێ هەست دهێتە كرن بەرامبەر هەرێما كوردستانێ بڕیار ب رێكا دادگەها فیدرال ڤە دژی مافێن دستووری یێن كوردستانێ دەردكەڤن هەروەسا دژی دەستهەلاتێن كوردستانێ و ماف و شایستەیێن وێ دەركەفتینە، پێدڤی بوو ل سەر پارتی هەلویستی وەربگریت و پێدڤی بوو هەلویستێ زووتر هەبا ب تایبەت ل دەمێ تۆماركرن وئێكلاكرنا سكالایا دژی قانوونا هەلبژارتنێن كوردستانێ».
ئاماژەكر» دادگەها فیدرال ل سالا 2021 هاتە ئەكتیفكرن و قانوونا پێكئینانا دادگەها فیدرال ل جڤاتا نوونەرێن ئیراقێ هاتە راستڤەكرن و هەكە لێنێرینەكێ ل بڕیارێن وێ بكەین د ئەڤی دەمێ كورت دا زوورترین بڕیار دژی هەرێما كوردستانێ دەركرینە، زێدەتر ژ مادەیان هەنە و نەهاتینە بجهئینان كو پەیوەندی ب مافێن پێكهاتەیێن ئیراقێ و ژئەوان ژی مافێ گەلێ كوردستانێ. ئیراقا پشتی سەدام حسێنی ل سەر رێككەفتنەكا دستووری هاتیە ئاڤاكرن، ب گۆڕەی دستووری هەرسێ پێكهاتەیێن كورد و ئەرەبێن سوننە و شیعە هەڤسەنگییەكا دستووری ل بەرچاڤ وەرگرتنا دستووری بۆ ئەوان هاتییە كرن، دادگەها فیدرال ئەڤ هەڤسەنگییا دستووری ل بەرچاڤ وەرنەگرتییە كو د راستڤەكرنا قانوونا هەژمار 30 یا سالا 2005 ئاماژە پێ هاتییە كرن و ل مادەیا 93 ژ دستوورێ ئیراقێ دەستهەلاتێن دادگەها فیدرال ب رۆهنی هاتینە دیاركرن، دەستهەلاتا وێ یا ئێكێ ئەوە چاڤدێرییا دستووریبوونا قانوونا بكەت كو ل ئیراقێ دهێنە بجهئینان، د ئەوی چارچۆڤەیدا نەشیایە كارێن خوە بكەت، دروستتر بێژین یا ژ رێڕەوێ دەستهەلاتا خوە لادای و گەلەك جاران دژی قەوارەیێ هەرێما كوردستانێ بڕیاران ددەت، لەوما ئەو بڕیارێن دهێنە ژ ئالیێ ئەوێ دادگەهێ ڤە دژی كوردستانێ دهێنە دەركرن، بڕیارێن سیاسی نە نەكو قانوونی. ل هەموو ئەو وەلاتێن سیستەمێ فیدرال دهێتە پەیڕەوكرن، دادگەها فیدرال هەبوون لێ هەیە و دیرۆكا بڕیارێن ئەوان هەكە بهێتە خواندن، دەمێ ناكۆكی د ناڤبەرا هەرێمان و حوكمەتێن ناڤەندیدا دروست دبیت، دادگەها فیدرال هەرێمان پتر ل بەرچاڤ وەردگریت بۆ پاراستنا سیستەمێ فیدرالبوونا وەلاتێن خوە و پێدڤییە ئارمانجا دادگەها فیدرال پاراستنا مافێن هەموو ئیراقێ بیت و ب تایبەت پاراستنا سیستەمێ فیدرال، بەلێ بەرۆڤاژی هەموو بڕیارێن ئەڤێ دادگەهێ بێ دەستهەلاتكرن و بچووكرنا قەوارەیێ قانوونیێ هەرێما كوردستانێ یە».
ئاماژە كر « دادگەها فیدرال ل سەردەمێ حوكمڕانییا مەدەنی یا پۆل برێمەر و بەری دانانا دستووری هاتییە پێكئینان و پاشی بۆ دەمەكی هاتنە راوەستاندن تاكو سالا 2021 جڤاتا نوونەرێن ئیراقێ ل شوینا ئەوێ چەندێ ب گۆڕەی مادەیێن 92-93-94 كو د دستوورێ ئیراقێدا هاتی دادگەها فیدرال یا نوو بهێتە پێكئینان، دەستهەلاتدارێن شیعە ل جڤاتا نوونەرێن ئیراقێ راستڤەكرنەك كر د قانوونا دادگەها فیدرال هەژمار 30 یا سالا 2005 و د راستڤەكرنێ ژی دا هاتییە دڤێت پێكهاتەیێن ئیراقێ ل بەرچاڤ بهێنە وەرگرتن و هەڤسەنگییا دستووری ل دادگەها فیدرال ل بەرچاڤ بهێتە وەرگرتن، كورد و سوننە و شیعە هەڤسەنگییا دستووری ل بەرچاڤ وەرگرن بەلێ نوكە ئەوژی یا پێشێلكری، ئەوبوو دادوەر عەبدولرەحمان زێبارێ ئەندامێ دادگەها فیدرال بوو ل سەر پێكهاتەیێ كوردی ئەو دادگەه بجه هێلا ژ ئەگەرێ پێشێلكرنا مافێن هەرێما كوردستانێ».
هەروەسا دیاركر» دشیاندایە جڤاتا نوونەرێن ئیراقێ ب ساناهی هەكە د راستگۆ بن ل گەل هەرێما كوردستانێ، ب گۆڕەی دستووری و ب قانوونەكا نوو پڕۆژەیەك بهێتە هنارتن بۆ جڤاتا نوونەران و دەنگ ل سەر بهێتە دان و ئەڤ دادگەهە بهێتە ژ كارئێخستن و دادگەها نوو جهێ وێ بگریت و هەموو نەتەوەیێن ئیراقێ د پاراستی بن و گرنگە دادگەها فیدرال دادگەهەكا بێلایەن بیت و پارێزەرا هەموو پێكهاتەیێن ئیراقێ و سیستەمێ فیدرالیەتا دەولەتێ بیت و هەموو هەست ب ئەوێ چەندێ بكەن د یەكسانن و مافێن وان د پاراستی نە».

سەرۆك مەسعود بارزانی، دوهی پێشوازی ل خانم ئەلینا رۆمانسكی بالیۆزا ئەمریكا ل ئیراقێ‌ كر.
د دیدارەكێ‌ دا، رەوشا سیاسی یا ئیراقێ‌ و دەڤەرێ‌ گەنگەشە كر و رۆناهی بەردا سەر رەوشا ناڤخۆییا هەرێما كوردستانێ‌ و هەلبژارتنێن پەرلەمانێ‌ كوردستانێ‌، د ڤی واری دا، بالیۆزا ئەمریكا ل ئیراقێ‌ راگەهاند، كو د تێبینیێن پارتی ل دۆر هەلبژارتنان دگەهن و مەرج و داخوازیێن پارتی ل گەل یونامی و ئالیێن سیاسی یێن ئیراقێ‌ یێن باسكرین و ئەمریكا د خوازیت هەرێما كوردستانێ‌ یا بهێز و سەقامگیر بیت و ل گەل ئالیێن دی بۆ گەهشتنا چارەیەكێ‌ دیالۆگ دێ‌ یا بەردەوام بیت.
ژ ئالیێ‌ خۆ ڤە، سەرۆك بارزانی سوپاسیا دۆستایەتیا ئەمریكا كر و راگەهاند، گرفتا هەرێما كوردستانێ‌ هەلبژارتن بتنێ‌ نینن، بەلكو قووت و مووچەیێ‌ خەلكی و سیاسەتا نەدروستا دژی هەرێما كوردستانێ‌ ژی نە.
سەرۆك بارزانی، ئاماژە ژی كر كو پارتی ل گەل هەلبژارتنایە، لێ‌ دگەل وان هەلبژارتنایە كو د شەفاف بن و دەربڕینێ‌ ژ ئیرادەیا گەلێ‌ كوردستانێ‌ بكەت و د دوور بن ژ دەستێوەردانێن دەرەكی و سەپاندنا شێوازێ‌ نەقانوونی ب رەنگەكی كو بەری ئەنجامدانا هەلبژارتنان، ئەنجامان د بەرژەوەندیا خۆ دا ئێكلا بكەن و گۆت: (نابیت هەلبژارتن بیێ‌ پشكداریا پێكهاتەیان برێڤە بچن).