ئه‌ڤرۆ نيوز:
نوونەرێ ھاکپارێ ل ھەرێما کوردستانێ دیار دکەت کو ھەدەپە ب جھێ گرنگیێ بدەتە پرسا کوردی پتر دژبەریا حوکمەتێ دکەت و وەکو پارتەکا چەپ سیاسەتێ دکەت، ژ بەر ھندێ ژی سیاسەتا وێ پارتیێ خزمەتا چارەکرنا پرسا کوردی ناکەت و مخابن ناھێلیت ئالیێن دی یێن کوردی ژی ل تورکیا کار بۆ چارەکرنا پرسا کوردی بکەن.
زانا سەزەن نوونەرێ پارتیا ماف و ئازادیان (ھاکپار) ل ھەرێما کوردستانێ د دیدارەکا تایبەت دا ل گەل رۆژناما ئەڤرۆ دیار کر کو ھەدەپێ ٨٠ پەرلەمانتار ل پەرلەمانێ تورکیا ھەنە، لێ مخابن پرانیا وان کورد نینن و پرسا کوردی د خەما وان دا نینە، یا دی سیاسەتا ھەدەپێ ب خوە ژی ئاستەنگیان ل ھەمبەر چارەکرنا پرسا کوردی دروست دکەت و گۆت: (ھەدەپە ب جھێ کو کار بۆ چارەکرنا پرسا کوردی بکەت، وەکو پارتەکا چەپ یا تورکی کار دکەت، کارێ ھەدەپێ ئەڤە نینە دژبەریا حوکمەتێ بکەت و بێژیت دڤێت حوکمەت ژناڤ بچیت، چونکو پرسا کوردی ل تورکیا ل گەل دەولەتێ یە و دەولەتا نھا یا تورکیا دەولەتەکا نەتەوەپەرستە و ژ بەر ھندێ ژی رێبازێن سیاسی یێن ھەدەپێ ئاستەنگیان دروست دکەن و ھەتا نھا وان چو بەرنامە بۆ چارەکرنا پرسا کوردی ل تورکیا نینن).
ناڤبری ئەو یەک ژی دیار کر کو پرسا کوردی پرسا سەرەکی یا تورکیا یە و ھەتا ئەڤ پرسە د ناڤا تورکیا دا نەھێتە چارەکرن تورکیا نەشێت ببیتە ئەندامێ ئێکەتیا ئورۆپا ژی، لێ مخابن ژ بەر ئالۆزیێن ل تورکیا و سیاسەتا نەتەپەرستی یا ئەردۆگانی نھا کەس نەشێت وەکو بەرێ زێدە بەحسێ کوردان بکەت، رۆژانە رۆژنامەڤان و نڤیسەر دھێنە گرتن و د زیندان دانە، ب سەدان سەرۆکێ باژێرڤانیان یێن باکورێ کوردستانێ ل گەل سیاسەتمەدارێن کورد ل زیندانێن تورکیا دانە و گۆت: (زۆرداریەکا مەزن ل گەلێ مە دھێتە کرن، لێ وەکو من گۆتی سیاسەتا ھەدەپێ ژی بوویە ئەگەرێ ھندێ کو ئاستەنگی بۆ چارەکرنا پرسا کوردی دروست بووینە).
نوونەرێ پارتیا ماف و ئازادیان ل ھەرێما کوردستانێ ئەو یەک ژی دیار کر کو پارتیا مە د بەرنامێ خوە دا بەحسێ چارەکرنا پرسا کوردی ل تورکیا کریە. مە دڤێت پرسا کوردی د سیستەمەکێ فیدرالی دا بھێتە چارەکرن و کورد بگەھنە مافێن خوە، لێ ژ بەر سیاسەتێن فاشیستی یێن دەولەتا تورکیا و شاشیێن کو ھەدەپە دکەت رێ ناھێتە دان ئەم ل سەر بەرنامێ خوە کار بکەین و ھەتا نھا ژی گەلەک ئالۆزی بۆ مە دروست کرینە، لێ ئەم دێ ل سەر رێبازا خوە یا راست بۆ بدەستڤەئینانا مافێن نەتەوی یێن گەلێ خوە ل تورکیا کار کەین و گۆت: (مخابن پارتەکا وەکو ھەدەپێ کو ٨٠ پەرلەمانتارێن خوە ھەنە چو بەرنامێن خوە بۆ بدەستڤەئینانا مافێن نەتەوی یێن گەلێ مە ل باکور نینە، ڤێ یەکێ ژی وەسا کریە کو ئەڤرۆکە وەکو جاران ل ئورۆپا بەحسێ مافێن کوردان ناھێتە کرن).
ناڤھاتی د دووماھیا ئاخڤتنا خوە دا ئەو یەک ژی دیار کو دڤێت ھەموو ھێزێن کوردی ل باکور پێکڤە بەرنامەکێ دانێن و کار بۆ چارەکرنا پرسا کوردی بکەن، مخابن نھا کورد د ناڤا خوە دا پارچە بووینە و ڤێ یەکێ ژی کارتێکرنەکا خراب ل دەنگێ کوردان و داخوازیێن وان کریە.
نيشاندان
