ئەڤرۆ نیوز:
به‌غدا ل هه‌مبه‌ری پێدانا شایستێن دارایی یێن هه‌رێما كوردستانێ‌ مه‌رجان بۆ حوكمه‌تا هه‌رێمێ‌ ددانیت و دڤێت حوكمه‌تا هه‌رێمێ‌ رۆژانه‌ پابه‌ند بیت ب هنارتنا 250 هزار به‌رمیلێن نه‌فتێ‌ و راده‌ستكرنا وی داهاتی بۆ كۆمپانیا سۆمۆ.
ئه‌ندامه‌كێ‌ لیژنا دارایی ل په‌رله‌مانێ‌ عیراقێ‌ بۆ رۆژناما ئه‌ڤرۆ دیاركر: په‌رله‌مانتارێن كورد پێشنیارێن خوه‌ یێن داینه‌ وه‌زاره‌تا دارایی و وێ‌ لیژنا حكومی یاكو ره‌شنڤیسێ‌ بۆدجێ‌ سالا 2018 دانیت، رێژا هه‌رێمێ‌ ژ مووچێ‌ زیندانیێن سیاسی و ئه‌نفالكریان و چاڤدێریا جڤاكی، هه‌موو د گرێداینه‌ ب ڤرێكرنا 250 هزار به‌رمێلێن نه‌فتێ‌ د رۆژانه‌ دا، هه‌كه‌ هه‌رێما كوردستانێ‌ پابه‌ندی ڤی مه‌رجی نه‌بیت، عێراق دێ‌ بژارده‌كا دی وه‌كو یا سالا بوری ب كار ئینیت و دێ‌ گۆژمه‌كێ‌ پاره‌ی هنێریت، بۆ مووچێ‌ فه‌رمانبه‌ران و چو پارێ‌ زێده‌تر نا هنێریت، هزر ل بژارده‌یا دویێ‌ نه‌كریه‌، چونكی ئه‌ڤه‌ كارێ‌ مه‌ نینه‌، هه‌كه‌ پێگیری پێ‌ نه‌هێته‌ كرن، ئه‌ڤ چه‌نده‌ دێ‌ مینیته‌ ل سه‌ر رێككه‌فتنه‌كا سیاسی وه‌كو سالا بوری، په‌یوه‌ندی وه‌كو به‌رێ‌ مینن، ئه‌ڤه‌ بژارده‌كا خرابه‌، چونكی نوكه‌ ره‌وش هه‌موو یا هاتیه‌ گوهۆرین و ل به‌رژه‌وه‌ندا هه‌رێمێ‌ دایه‌، هه‌كه‌ پێگیریێ‌ پێ‌ بكه‌ت، د بیته‌ ئه‌گه‌ره‌ك ژی كو وه‌زیرێ‌ دارایی و سه‌رۆك وه‌زێن عیراقێ‌ ژی ئیحراج نه‌بن، چونكی هه‌لویستێ‌ عادل عه‌بدولمه‌هدی ل گه‌ل كوردانه‌، هه‌ر ژ كێشا بۆدجه‌ی و پێشمه‌رگه‌ی و مادێ‌ 140 و ئه‌و كێشێن دیتر یێن ماینه‌ هه‌لاویستی.
د.ئه‌حمه‌د سه‌فار ئه‌ندامێ‌ لیژنا دارایی یه‌ ل په‌رله‌مانێ‌ عیراقێ‌ زێده‌تر دبێژیت: كوردان نه‌ه خالێن سه‌ره‌كی یێن داینه‌ وێ‌ لیژنا حكومی و دڤێت ئه‌و پێ‌ پابه‌ند بن، مه‌ جه‌خت ل سه‌ر هندێ‌ كریه‌، كو داخوازیێن مه‌ بهێنه‌ بجهئینان، دیسا ئه‌ڤه‌ ل سه‌ر هه‌رێمێ‌ دمینیت، كانێ‌ دێ‌ ب چو رێك ئیدارا وی مالی كه‌ت یێ‌ كو ژ به‌غدا دهێت، دێ‌ چاوا ل سه‌ر هه‌موو كه‌رتان به‌لاڤ كه‌ت، هه‌كه‌ بندیوار نه‌مینن و مووچه‌ ب دادپه‌روه‌رانه‌ بهێته‌ دابه‌شكرن، ئه‌و پاره‌ تێرا هه‌رێمێ‌ كه‌ت، هه‌ر چه‌نده‌ هه‌تا نوكه‌ ئه‌م وه‌كو كورد د گه‌شبین نینین، ژبۆ هنارتنا موسته‌حه‌قاتێن پێشمه‌رگێ‌ هه‌رێما كوردستانێ‌ ژ لایێ‌ حوكمه‌تا به‌غدا ڤه‌، لێ‌ دیسا ئه‌ڤه‌ ژی دێ‌ مینیته‌ لدووڤ په‌یوه‌ندیێن سیاسی، هه‌ر چه‌نده‌ نوكه‌ دیتنا عه‌ره‌بان ژ به‌ری نوكه‌ باشتره‌ و دیسا نو كه‌ ژی كورد د ئێك ده‌نگن، لێ‌ هه‌كه‌ كورد پابه‌ند نه‌بن، رێككه‌فتنا بۆدجه‌ی نامینیت.

ئەڤرۆ نیوز:
ئه‌ندامه‌كێ‌ فراكسیۆنا پارتی ل په‌رله‌مانێ‌ عیراقێ‌ راگه‌هاند، من راپۆرته‌كا فه‌رمی به‌رهه‌ڤكریه‌، بۆ هندێ‌ ئه‌و كه‌سێن د ڤان سالێن بۆری دا زیان ژ بۆردومانا فرۆكێن توركیا دیتی ژلایێ‌ حكومه‌تا عیراقێ‌ ڤه‌ بهێنه‌ قه‌ره‌بووكرن و گۆت: من وه‌كو ئه‌ندامێ‌ لیژنا په‌یوه‌ندیێن ده‌رڤه‌ ل په‌رله‌مانێ‌ عیراقێ‌ ئه‌ڤ راپۆرته‌ به‌رهه‌ڤكریه‌ و دێ‌ داخواز ژ هه‌موو په‌رله‌مانتاران كه‌م پشته‌ڤانیا داخوازیا من بكه‌ن، چونكو نها ب ده‌هان گۆند و مولكێ‌ هاوولاتیان و گیانێن وان بووینه‌ قوربانی ڤێ‌ بۆردومانێ‌.

به‌یار دوسكی، ئه‌ندامێ‌ لیژنا په‌یوه‌ندیێن ده‌رڤه‌ ل په‌رله‌مانێ‌ عیراقێ‌، تایبه‌ت بۆ ئه‌ڤرۆ دیار كر، من راپۆرته‌ك نڤێسیه‌ و د روونشتنا بهێت یا په‌رله‌مانێ‌ عێراقێ‌ دا، دێ‌ ب شێوه‌یه‌كێ‌ فه‌رمی پێشكێشی سه‌رۆكێ‌ په‌رله‌مانی و حكوومه‌تا عیراقێ‌ كه‌م، بۆ هندێ‌ ئه‌و هاوولاتیێن ژ بۆردومانا فرۆكێن توركیا و په‌كه‌كێ‌ زه‌ره‌رمه‌ند بووین هه‌موو بهێنه‌ قه‌ره‌بووكرن و مافێ‌ وان نه‌هێته‌ خوارن.
دوسكی ئاماژه‌ ب هندێ‌ دا كو من وه‌كو ئه‌ندامێ‌ لیژنا په‌یوه‌ندیێن ده‌رڤه‌ ل په‌رله‌مانێ‌ عیراقێ‌ ئه‌ڤ راپۆرته‌ به‌رهه‌ڤكریه‌ و دێ‌ داخواز ژ هه‌موو په‌رله‌مانتاران كه‌م پشته‌ڤانیا داخوازیا من بكه‌ن، چونكو نها ب ده‌هان گۆند و مولكێ‌ هاوولاتیان و گیانێن وان بووینه‌ قوربانی ڤێ‌ بۆردومانێ‌ و پێدڤیه‌ مافێن وان ژی بهێنه‌ دان و گۆتیشی: ئه‌گه‌ر په‌رله‌مان و حكوومه‌ت پشته‌ڤانیا داخوازیا من بكه‌ن، دێ‌ هه‌موو زانیاریان و ناڤێن زه‌ره‌رمه‌ندان كۆم كه‌م و ده‌مه‌ وان.
ئدریس هه‌ركی، ژ لژنا ئه‌منی و نافخوه‌ یا جڤاتا پارێزگه‌ها دهۆك گۆت: (بابه‌تێ‌ بوردومان و توپبارانكرنا هه‌رێما كوردستانێ‌ ب گشتی و ده‌ڤه‌را ئامێدیێ‌ ب تایبه‌تی ژلایێ‌ فرۆكه‌ و سوپایێ‌ توركیا ب هه‌لویست و ده‌رئێخستنا به‌یاننامه‌ و خوه‌پێشاندان و ره‌تكرنێ‌ ناهێته‌ راگرتن و چاره‌سه‌ركرن، به‌لكو ب ڤی ره‌نگی دێ‌ به‌رده‌وام بیت و قوربانیێن زێده‌تر ژی دهێنه‌ چاڤه‌رێكرن، ژ به‌ر كو بابه‌ت سیاسی یه‌ و به‌زاندنه‌كا روون و ئاشكرا یا  سه‌روه‌ریا هه‌رێم و عیراقێ‌ یه‌ ژلایێ‌ توركیا، راگرتنا بوردومان و توپبارانكرنا توركیا تنێ‌ دڤێت ب هێزه‌كا چه‌كدار بیت).
خویاژی كر كو ل سالا 1991 هه‌تا نوكه‌ زێده‌تر ژ 30 وه‌لاتیێن شێلادزێ‌ و ده‌ڤه‌را ئامێدیێ‌ ژ به‌ر بۆردومانا فرۆكێن تۆركیا هاتینه‌ شه‌هیدكرن و هژماره‌كا دن ژی بریندار و به‌رزه‌ بووینه‌، نێزیكێ‌ 200 گوندێن ده‌ڤه‌رێ‌ ژی مه‌ترسیا بوردومانێ‌ ل سه‌ر هه‌یه‌ و خه‌لك نه‌شێت بچیته‌ سه‌ر ره‌ز و بیستان و جه و وارێن خوه‌ و بێ‌ به‌هر بووینه‌ ژ هه‌موو خێر و بێرێن گوندێن خوه‌.
ل رۆژا 20/9/2018 هه‌تا نوكه‌ فروكێن توركیا 98 جاران، توپخانه‌یێن سوپایێ‌ توركیا ژی 87 جاران ده‌ڤه‌را ئامێدیێ‌ بوردومان و توپبارانكریه‌، د ئه‌نجام دا زێده‌باری زیانێن ماددی دهه‌مان ده‌م دا نێزیكێ‌ 20 كه‌س ژی هاتینه‌ شه‌هید و برینداركرن.