ئه‌ڤرۆ نيوز:
رێڤه‌به‌ريا پۆليسێن پارێزگه‌ها دهۆكێ ئاگه‌هداريه‌ك به‌لاڤكر كو ئه‌ڤا ل خوارێ ژى ده‌قێ وێ يه:
خوشبەختانە پروسا ھەلبژارتنێن پەرلەمانێ کوردستانێ ب رێک و پێکی و شارستانی برێڤەچوو و ل ھەر دوو روژێن دەنگدانا تایبەت و گشتی خەلکێ مە ب شێوەیەکێ سەردەمیانە پشکداربوون کو ئەڤ چەندە بو ھەر تاکەکێ کورد و ھەڤال و دوستێن مللەتێ مە ژی جھێ شانازیێ یە.
وەکو رێڤەبەریا پولیسێن پارێزگەھا دھوکێ ل ھەر ھەلکەفت و بیرەوەریەکێ پێش وەخت پلانا ئێمناھیێ ددارێژین و ب ھەمی شیانا کار دکەین داکو لایەنێ ئێمناھیێ ب پارێزین..
ل ڤێ ھەلبژارتنێ مە شیا ب ھەڤکاریا دەزگایێن دی یێن ئێمناھیێ و پشتەڤانیا وەلاتیێن خو یێن دلسوز ب باشترین شێوە و بێ ھاتنە پێشا ئاریشە و گرفتان ڤێ پروسێ دەرباز بکەین و ببینە پرەک بوو بەرقرارکرنا ئارامیێ و ب ساناھی ئێخستنا رێکێ ژبو وەلاتیان و کارێ کومسیونێ.
وەلاتیێن خوشتڤی..
نوکە ئەم یێ چاڤەرێ راگەھاندنا ئەنجامان دکەین کو ژلایێ کومسیونا سەربخو یا ھەلبژارتنا بھێنە راگەھاندن داخوازا مە ئەوە ب شێوەکێ سەردەمیانە و شارستانی پێشوازی ل ئەنجامان بھێتە کرن و دویرکەڤن ژ رەفتارێن تێکدانا رەوشا باژێری و تایبەت ھاڤێتنا گولەیان …
ژبەرکو گەلەک جاران ئەڤ چەندە بویە ئەگەرێ شینی و تازیێ ل ناڤا ھندەک مالان و گەلەک کەسان ل ڤان دەلیڤان گیانێ خوە ژ دەست دایە یان ب سەختی بریندار بوینە و ژیانا وان کەفتیە د مەترسیێ دا
وەکو ئەوا بەری چەند روژان ل سلێمانی و چەمچەمال ھاتیە پێش کو (٢) کەسا گیانێ خو ژدەست دایە و (٣) یێن دی بریندار بوینە ب ئەگەرێ تەقەکرنێ ..
لەورا ھیڤیدارین ژ وەلاتیێن خو دویرکەڤن ژ ڤان رەنگێن دەربرینا خوشیێ ، دیسان داخازێ ژ ھەمی کاندیدێن سەرکەفتی دکەین ھاریکار بن دگەل مەدا و کەس و کارێن خو ئاگەھدار بکەن ب ھیچ رەنگەکی گوللە نەھێنە ھاڤێتن و ھەر کەسێ رابیتن ب ھاڤێتنا گولەیان دێ ژلایێ مەڤە ھێتە دەستەسەرکرن و رەوانەکرن بوو دادگەھێ .
رێڤەبەریا پولیسێن پارێزگەھا دھوک
4/10/2018
ئه‌ڤرۆ نيوز:
سه‌رۆكێ هه‌ڤيه‌پمانيا سائيرۆن راگه‌هاند، ساله‌ك مۆله‌ت ب حوكمه‌تا نوو هاتيه دان دا كو روو ب روويێ گه‌نده‌ليێ ببن و كارێن خوه ب باشى ئه‌نجام بده‌ن.
موقته‌دا سه‌در، سه‌رۆكێ هه‌ڤپه‌يمانيا سائيرۆن د تويته‌كى دا نڤيسيه كو رێكه‌فتن ل سه‌ر وێ چه‌ندێ كو كابينا نوو يا حوكمه‌تێ ب سه‌رۆكاتيا عادل عه‌بدولمه‌هدى بۆ ماوێ ساله‌كێ ل ژێر چاڤدێريێ دابيت و پاشان هه‌لسه‌نگاندن بۆ كاران بكه‌ت.
گۆتژى: “ئامانجا مه ژ دانانا كه‌سه‌كێ بێلايه‌ن بۆ پۆستێ سه‌رۆك وه‌زيرێن عيراقێ، زالبوونه ل سه‌ر گه‌نده‌لى و پێكئينانا حوكمه‌ته‌كێ يه كو دوور بيت ژ گوشارا لايه‌نێن سياسى”.
سه‌در ته‌كست ل سه‌ر وێ چه‌ندێ دكه‌ت كو ئه‌و چو كه‌سه‌كى ژ ناڤ هه‌ڤپه‌يمانيا خوه بۆ پۆستێ وه‌زيريێ د ناڤ حوكمه‌تێ دا به‌ربژار ناكه‌ت.
ئاماژه ب وێ چه‌ندێ ژى كر كو د ئه‌گه‌رێ شكه‌ستئينانا حوكمه‌تا نوو يا عيراقێ ئه‌و دێ ل دژى حوكمه‌تێ خوه‌نيشاندانان كه‌ن.
ئه‌ڤرۆ نيوز:
ئه‌ڤرۆ سه‌رۆك مه‌سعود بارزانى د رێيا تله‌فۆنێ دا په‌يوه‌ندى ب عادل عه‌بدولمه‌هدى، به‌ربژارێ راسپاردى بۆ پێكئينانا حوكمه‌تا نوو يا عيراقێ كر.
دێ وێ په‌يوه‌نديا تله‌فۆنى دا، سه‌رۆك بارزانى، عادل عه‌بدولمه‌هدى وه‌كو خه‌باتكاره‌كێ دێرين و دوسكێ گه‌لێ كوردستانێ وه‌سفكر.
سه‌رۆك بارزانى پشتراستيا خوه ده‌ربڕى كو عادل عه‌بدولمه‌هدى هه‌رده‌م به‌رژه‌وه‌نديا عيراقێ و كوردستانێ ل به‌ر چاڤ وه‌ربگريت و پشته‌ڤانيا ته‌مام يا خوه بۆ بزاڤێن وان بۆ پێكئينانا كابينا نوو يا حوكمه‌تا عيراقێ يا فيدرال راگه‌هاند كو هيڤيا سه‌ركه‌فتنێ بۆ خواست.
ئەڤرۆ نیوز، نەوزاد ھلۆری:
ب مەرەما پاراستنا سەر و سیما و جوانیا باژێرێ شێلادزێ ، و باژێرڤانیا شێلادزێ ب ھەڤکاری ل گەل سەخبێریا کارەبا شێلادزێ رابوون ب راکرنا وێنە و پوستەر و ئالایێن لیست و قەوارێن سیاسیێن پشکدار د ھەلبژارتنێن پەرلەمانێ کوردستانێ ئەڤا کو چەند روژێن بوری ھاتیەکرن.
ئازاد رێکانی سەرپەرشتیارێ راکرنا بەرمایکێن بانگەشا ھەلبژارتنان ل شێلادزێ دایە دیارکرن کو ئەڤرۆ و سوبەھی ئەو دێ ب ئەرکێ راکرنا بەرمایکێن بانگەشا ھەلبژاردنان رابرن ل سنوورێ باژێرڤانیا شێلادزێ و گوت: (پێدڤی بو لایەنێن سیاسی و بەربژار پشتی دوماھی ھاتنا بانگەشا ھەلبژارتنان وێنە و درۆشمێن خوە راکربانە بەلێ دیارە ھەر لیست و قەوارەکێ سیاسی بەرماکێن خوە بجھھێلاینە و بو وان خەم ژی نینە کو سەر و سیمایێ باژێری تێکبچیت و نەجوان بیت، ژبەرڤێ مە ب فەردیت کو رابین ب راکرنا بەرمایکێن بانگەشا ھەلبژارتنان یێن ھەموو لیست و قەوارێن سیاسی و بەربژاران)
زێدەتر گۆت: (سوپاس بو خودێ راکرنا بەرمایکان بەردەوامە و ئەڤرۆ ھەتا سوبەھی دێ ھەمووان راکەین و ل جھەکێ تایبەت سوژین ، و دنھادا سەرو سیمایێ شێلادزێ جوانیەکا تایبەت بخوڤە گرت ، چونکە بەشەک ل لایەنێن سیاسی ھێشتا درۆشم و بەرمایکێن بانگەشا ھەلبژارتێن بەرێ نەراکرینە و ھێشتا دداناینە)
ل سنوورێ قەزا ئامێدیێ وەکو ھەر دەڤەرەکا دی یا کوردستانێ 29 قەوارێن سیاسی ھەڤرکی بو دەستئێخستنا 61 ھەزار دەنگێن دەڤەرێ دکر کو ژ وانان 21 ھزار دەنگ دکەڤنە سەنتەرێ ناحیا شێلادزێ، و پشتی ھەڤرکییەکا زور 11 بەربژار تنێ ل قەزا ئامێدیێ گەھشتنە پەرلەمانێ کوردستانێ.
ئەڤرۆ نيوز، نیوار محەمەد سەلیم:
باژێرڤانیا دھۆکێ ب ھەڤکاریا رێڤەبەریا کارەبا دھۆکێ دەست ب ژێڤەکرن و راکرنا پاشمایێن ھەلبژارتنان یێن لایەنێن سیاسی و بەربژاران کر و ب ھیڤی نە د ماوێ حەفتیەکێ دا وان پاشمایان ھەموویان راکەن.
ئیسماعیل مستەفا، بەرپرسێ پەیوەندی و راگەھاندنێ ل رێڤەبەریا باژێرڤانیا دھۆکێ راگەھاند کو رۆژا سێشەمبی کۆمبوونەک ل گەل رێڤەبەریا باژێرڤانیا رۆژھەلا و رۆژئاڤا و ئەندازەیا پارکان ھاتە کرن و تێدا بڕیار ھاتە دان کو پاشمایێن ھەلبژارتنان نەھێلن.
ئیسماعیل مستەفایی گۆت: “ھەردیسان مە وەکو باژێرڤانی رەزامەندیا کۆمسیۆنێ و لایەنێن سیاسی ژی وەرگرتیە و د ڤێ پرۆسێ دا رێڤەبەریا کارەبا دھۆکێ ژی ھاریکاریا مە دکەت”.
ب گۆرەیی رێنمایێن کۆمسیۆنا بلندا سەربەخۆیا ھەلبژارتن و راپرسیێ ل ھەرێما کوردستانێ بڕیارە لایەنێن سیاسی و بەربژار د ماوێ ھەیڤەکێ دا پاشمایێن ھەلبژارتنان ھەلگرن، بەلێ ل ھەموو ھەلبژارتنان باژێرڤانیا دھۆکێ ب ھەڤکاریا لایەنێن دی ڤێ پرۆسێ ئەنجام ددەت.
بەرپرسێ پەیوەندی و راگەھاندنێ ل رێڤەبەریا باژێرڤانیا دھۆکێ ل دۆر ڤێ چەندێ گۆت: “ھەر چەندە ب گۆرەیی رێنمایان ھەیڤەک بۆ لایەنێن سیاسی و بەربژاران ھاتیە دیارکرن و نێزیکی 80% ژ پۆستەران ھاتینە ھەلگرتن، بەلێ مە وەکو باژێرڤانی خواست ڤی دیمەنێ نھا ل ناڤ باژێرێ ھەیی نەھێلین”.
زێدەتر گۆت: “ل گەلەک جھان کارتێکرن ل جاددێ و ناڤەندێن جاددێ دھێتە کرن و گەلەک جاران ئەو پۆستەر و لۆگۆیێن لایەنێن سیاسی دکەڤن و گەلەک جاران ژی کارتێکرنێ ل کەسکاتیا سەر شووستە و پارکان دکەت”.
دا زانین ژی کو ئەوان گەلەک سەرپێچی دێکیۆمێنت کرینە ب رەنگێ وێنە و ڤیدیۆ و داینە دەستێ کۆمسیۆنێ بۆ وێ چەندێ ئەو لایەنێن سەرپێچی کرین بھێنە سزادان.
نەڤەشارت ژی کو سێ تیمێن باژێرڤانیێ و کۆمپانیا ئەرتووش ژی پێکڤە کار دکەن و گۆت: “ب ھیڤی نە د ماوێ حەفتیەکێ دا باژێری ھەموویێ پاقژ بکەین”.
ئەڤرۆ نيوز:
جێگرێ سەرۆکێ ئەمریکا جێمس ماتیس راگەھاند کو دڤێت روسیا بەرنامێ دروستکرنا ساروخێن ئەتۆمی بدەتە راگرتن، ھەکە روسیا ل سەر ڤێ بەرنامێ بەردەوام بیت ئەم دێ نەچار بین ھێرشی بنگەھێن دروستکرنا وان چەکان بکەین و ژناڤ ببەین.
ل ئالیێ دی نوونەرێ ئەمریکا د ناتۆیێ دا ژی راگەھاند کو دڤێت روسیا رێزێ ل پەیمانێن ئاشتیێ ل جیھانێ بگریت و نابیت ب رێیا دروستکرنا ساروخێن نوو کو ھەلگرێ چەکێن ئەتۆمی نە ببیتە مەترسی ل سەر ئاشتیا جیھانێ، ئەو یەک ژ ئالیێ مە ڤە ناھێتە قەبوول کرن و مە بەری نھا ژی ھۆشداری دایە روسیا کو دروستکرنا ڤان جۆرە ساروخان رابگریت.
چاڤدێرێن سیاسی ژی دیار دکەن کو ناکۆکیێن ئەمریکا و روسیا ل رۆژھەلاتا ناڤین و ئورۆپا بەرفرەھتر لێ دھێن و ئەمریکا دخوازیت ئاستەنگیان ل ھەمبەر بھێزبوونا روسیا د بیاڤێن سیاسی، ئابووری و سەربازی دا دروست بکەت.
ئەڤرۆ نيوز:
وەزیرێ دەرڤە یێ سووریێ وەلید موعەیم راگەھاند کو دەم یێ ھاتی پەیوەندیێن تورکیا و سووریێ ئاسایی ببن، لێ ژ بەر ھندێ ژی مە چەندین مەرجێن خوە یێن سەرەکی ھەنە کو دڤێت تورکیا وان مەرجان بجە بینیت و گۆت: (بەری ھەر تشتەکێ دڤێت تورکیا ھەموو ھێزێن خوە یێن سەربازی ژ ئاخا سووریێ ڤەکێشیت و یا دی ژی دڤێت تورکیا ھاریکاریا گرۆپێن ھشکباوەر نەکەت و چەکێن کو بەری نھا داینە وان گرۆپێن ژی دڤێت ژ وان وەربگریت و ھەکە ئەو یەک ھاتە کرن وی دەمی چو ئاستەنگی ل ھەمبەر ئاسایی بوونا پەیوەندیێن مە و تورکیا نامینن).
ناڤبری ئەو یەک ژی دیار کر کو تورکیا ھەر ژ دەمێ دەستپێکرنا ئالۆزیێن سووریێ ھەتا نھا گەلەک ئاریشە بۆ وەلاتێن مە دروست کرینە، لێ دڤێت تورکیا پێداچوونێ د ھەلویستێ خوە دا بکەت.
ئه‌ڤرۆ نيوز:
رۆژناما تایمز یا بریتانی د راپۆرتەکێ دا دیار کریە کو ھەتا نھا ژی تورکیا نەشیایە سیاسەتەکا راست و دروست ل ھەمبەر ھەر دو وەلاتێن زلھێز یێن جیھانێ ئانکۆ روسیا و ئەمریکا برێڤە ببەت و نھا پتر ژ ھەر دەمەکێ تورکیا تەنگاڤە و دڤێت ئەردۆگان بریارەکا راست بدەت، ھەکە ھەتا چەند مەھێن دی تورکیا ھندەک بریارێن راست نەدەت دێ ئابوورێ تورکیا ژناڤ چیت و رەنگە تورکیا نەشێت ئێدی مووچێن کارمەندێن خوە ژی بدەت.
د بەردەوامیا راپۆرتێ دا ھاتیە دیار کرن کو ئەمریکا و روسیا داخوازیێن خوە ژ تورکیا ھەنە و ھەتا نھا تورکیا نەشیایە داخوازیێن وان بجە بینیت، ئەمریکا دخوازیت تورکیا قەشە برۆنسۆنی ئازاد بکەت و ھاریکاریا گرۆپێن ھشکباوەر ل سووریێ نەکەت و ل ھەمبەر ڤێ یەکێ ژی روسیا دخوازیت تورکیا ل ھەمبەر ئەمریکا بکار بینیت د رۆژ ب رۆژێ ئەڤ ناکۆکیە مەزنتر لێ دھێن، د راستی دا نھا تورکیا د ناڤبەرا ھەر دو وەلاتێن زلھێز یێ جیھانێ دا ئاسێ بوویە و نزانیت کا دێ خوە نێزیکی کیژ ئالیەکێ کەت.
رۆژناما بریتانی ئاماژە ب سەرەدانا ئەردۆگانی یا بۆ ئەلمانیا دکەت و دیار دکەت کو ئەردۆگانی نەشیا بەرپرسێن ئەلمانیا رازی بکەت کو د بیاڤێن ئابووری دا ھاریکاریا تورکیا بکەن، ئانکۆ سەرەدانا ئەردۆگانی بێ ئەنجام ما و ئەو یەک ژی نیشا ددەت کو دێ رەوشا تورکیا یا ناڤخوەیی پتر ئالۆز بیت.
نيشاندان