ئەڤرۆ نیوز، رێوار مزیری:
عەبدولسەمەد تێلی، سەرۆکێ لیژنا پیشەسازی و سامانێن سرۆشتی ل جڤاتا پارێزگەها دهۆکێ ئەڤرۆ رۆژا 20/2/2019ێ د کونگرەکێ رۆژنامەڤانی دا ئەگەرێن کێمیا کارەبا دهۆکێ بۆ رایا گشتی دانە دیارکرن و دیار کر کو ژ بەر هەمان ئەگەر وی سکالا ل سەر وەزیرێ کارەبا هەرێما کوردستانێ ب وەکالەت و وەزیرێ سامانێن سرۆشتی یێ حوکمەتا هەرێما کوردستانێ تومار کر.
ئه‌ڤرۆ نیوز:
ب هه‌لكه‌فتا 18 شواتێ رۆژا دامه‌زراندنا ئێكه‌تیا قوتابی و لاوان ئه‌ڤرو ل هولا گه‌له‌ریا دهوك و ل ژێر چاڤدێریا فه‌رهاد ئه‌مین ئه‌تروشی پارێزگه‌رێ دهوكێ، ناڤه‌ندا دهۆك یا چالاكی و پێگه‌هاندنا لاوان پێشانگه‌هه‌كا شێوه‌كاری بۆ شه‌ش گه‌نجا ژ كچ و كوران رێكخست و درێورسمه‌كێ تایبه‌ت دا ژلایێ به‌هزاد عه‌لی ئاده‌م جێگرێ پارێزگه‌رێ دهۆكێ هاته ڤه‌كرن.
جێگرێ پارێزگه‌رێ دهۆكێ گه‌ریانه‌ك ل ناڤ پێشانگه‌هێ كر و ژنێزیك سه‌حكره به‌رهه‌مێن پێشانگه‌هێ و ب ناڤێ پارێزگه‌رێ دهۆكێ پیرۆزباهی و ده‌ستخۆشی ل پشكدارێن پێشانگه‌هێ كر و پشته‌ڤانیا پارێزگه‌هێ بۆ ڤان جوره كارێن هونه‌ری نیشادا.
شه‌ش گه‌نجا ب 33 تابلویێن شێوه‌كاری پشكداری د پێشانگه‌هێ دا كربوو، ئه‌و ژی (تانیا مه‌حموود – ئه‌حمه‌د خه‌لیل – رێبه‌ر خالد – دیلان نزار – ژوان جاسم – كاروان ڤان) بوون.
ئەڤرۆ نیوز، سەباخ زوھێر زێباری:
ئەڤرۆ ل ھولا کونفرانسا ل ئاکرێ ب ئامادەبوونا بەرپرسا سەندیکا ھونەرمەندێن کوردستانێ لقێ – دھوکێ و مالباتا ھونەرمەند ئیسماعیل ئاکرەی چلیا وی ھاتە ساخکرن و ھونەرێ ناڤبری ھاتە بەحسکرن و فلمەکێ دیکیومێنتاری ل سەر ھونەرێ وی یێ ڤەشارتی ھاتە نیشاندان.
کاوە زوھێر رێڤەبەرێ رەوشەنبیری و ھونەری ل ئاکرێ بۆ ئەڤرۆ نیوز ددەتە دیارکرن کو ھونەرمەند ئیسماعیل سالح ئاکرەی ئێک ژوان ھونەرمەندان بوویە کو دوارێ شانویێ دا ل دەست پێکا سالێن حەفتێیاندا ل وەلاتێ ئیرانێ رولەکێ بەرچاڤ ھەبوویە، پشتی سەرھلدانێ ڤەگەریا ھەرێما کوردستانێ و ل ئاکرێ دەست ب کارێ ھونەری کریە.
وی گرنگیەکا تایبەت دابوو ب ھونەرێ ڤەشارتی و کەسەکێ بەرنیاس بوو ل سەر ئاستێ ھەرێما کوردستانێ، ھەروەسا شیا ببیتە ئێکەمین کەس ل سەر ئاستێ ھەرێما کوردستانێ و سەنتەرەکێ ڤەکەت ل ئاکرێ ب ناڤێ سەنتەرێ ھونەرێ ڤەشارتی، ھەروەسا دبوارێ شانویێ و فلمێن سینەمایی دا رولەکێ بەرچاڤ ھەبوویە.
ئه‌ڤرۆ نيوز:
ئه‌ڤرۆ رۆژا چارشه‌مبى 20ى شوباتا 2019ێ مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ پێشوازى ل نافۆمى هاشيمۆتۆ بالوێزێ يابان ل عيراقێ كر.
د ديداره‌كێ دا كو قونسلێ گشتى يێ يابان ل هه‌ولێر ئاماده ببوو، دووماهى پێشهاتێن ده‌ڤه‌رێ و به‌رفره‌هكرنا په‌يوه‌نديان و ده‌رفه‌تا وه‌به‌رهێنانێ ل هه‌رێما كوردستانێ گه‌نگه‌شه كر.
مه‌سرور بارزانى سۆپاسيا گه‌ل و حوكمه‌تا يابانێ كر بۆ هاريكاريكرن و پشته‌ڤانيا وان ل ماوێ بۆرى كو پێشكێشى هه‌رێما كوردستانێ كرينه.
ژ لايێ خوه ڤه بالوێزێ يابان هيڤيا سه‌ركه‌فتنێ بۆ مه‌سرور بارزانى خواست ل سه‌رۆكاتيكرنا كابينا داهاتى يا حوكمه‌تا هه‌رێما كوردستانێ، هه‌ڤده‌م ئاماده‌يا وه‌لاتێ خوه بۆ پشته‌ڤانى و هاريكاريكرن و پشكدايكرن د به‌ر ب پێشڤه‌چوونا ژێرخانا هه‌رێما كوردستانێ د وارێن جودا دا، نيشان دا.
د پشكه‌كا دى يا ديدارێ دا دانوستاندن ل سه‌ر رۆلێ كۆمپانيێن يابان د وارێ ئاڤه‌ندانكرن و گه‌شه‌پێدانێ دا كر و ته‌كست ل سه‌ر وێ چه‌ندێ كر كو هه‌رێما كوردستانێ ژينگه‌هه‌كا به‌رهه‌ڤه د وارێ وه‌به‌رهێنانێ و وارێن دى يێن جودا دا.
ئه‌ڤرۆ نيوز:
له‌تيف عومه‌ر، ئاخفتنكه‌رێ ب ناڤێ ئێكه‌تى نشتيمانى كوردستان راگه‌هاند كو پشتى هه‌لبژارتنا ده‌سته‌يا سه‌رۆكاتيا په‌رله‌مانى قووناغه‌كا نوو د ره‌وشا سياسى يا هه‌رێما كوردستانێ دا هاته پێش.
گۆتژى: “ئێكه‌تى گۆتن و هه‌لويستێن نوو دێ هه‌بن و ئه‌و هه‌لويست و گۆتن د جودانه ژ يێن به‌رى نها خستينه به‌ر چاڤ”.
ئه‌ڤرۆ مه‌كته‌با سياسى يا ئێكه‌تى نشتيمانى كوردستان ل سلێمانيێ ل گه‌ل هه‌موو ئورگان و ناڤه‌ندێن بڕيارا حزبا وان كۆمبوو بۆ دانوستاندن ل سه‌ر هه‌لويستێ ئێكه‌تيێ ل دۆر وان گوهۆڕينێن د پرۆسا سياسى يا هه‌رێما كوردستانێ دا.
رۆژا 18ى شوباتا 2019ێ بێ ئاماده‌بوونا فراكسيۆنا كه‌سك ل په‌رله‌مانێ كوردستانێ ده‌سته‌يا سه‌رۆكاتيێ هاته هه‌لبژارتن.
ئەڤرۆ نیوز، سالار دۆسکی:
ئەندامەکێ جڤاتا نوونەرێن عیراقێ دیارکر کو بلا خەلکێ کوردستانێ یێ پشست راست بیت دێ قانوونا بۆدجھێ ھێتە جێبەجێکرن و گیرۆبوون ب تنێ ئەگەرێن تەکنیکی نە د ناڤبەرا ھەر دو وەزارەتان دا.
د. ئەحمەد سەفار، ئەندامێ جڤاتا نوونەرێن عیراقێ ژ فراکسیونا پارتی دیموکراتی کوردستان بۆ ئەڤرۆ نیوز گۆت: “قانوونا بۆدجا عیراقێ ل جڤاتا نوونەرێن عیراقێ پەسەند بوویە و حەفتیا داھاتی دێ کەڤیتە دبیاڤێ بجھئینانێ دا و دڤێت ھەردو وەزارەتێن دارایی ل ھەرێمێ و عیراقێ جێبەجێ بکەن، کارێ تەکینکی د ناڤبەرا ھەردو وەزارەتان و دڤێت پشکا ھەرێما کوردستانێ بھێتە رەوانەکرن و قانوون بھێـتە بجھئینان ژ رێکەفتی 1/1/2019ێ.
ھەمان ئەندامێ جڤاتا نوونەران گۆتنێن بریکارێ بەرێ یێ وەزارەتا دارایی یا عیراقێ رەتکرن و ب زانیاریێن کەڤن ب ناڤکرن، دیارکر کو بلا خەلکێ پشست راست بیت دێ بۆدجە ھێت و دێ کەڤیتە بیاڤێ بجھئینانێ دا.
ئەڤرۆ نیوز:
پشتی ل یاریا شەڤا بوری یانا بەرشەلۆنا نەشیای سەرکەفتنێ ل سەر یانا لیون توماربکەت ژ چارچوڤێ یاریێن ئێکێ ژ قوناغا ١٦ یا چامپیونیز لیگ دەمێ وەکھەڤبووی ل گەل یاریگەھا لیون بێ گول یاریزانێ و پشتی یاریێ یاریزانێ ھێلا ناڤینا بەرشەلۆنا سێرجیو بوسکیتس بۆ مارکا دیارکر ئەو نابینت یاریا دوێ بوو ئەوان یا ب زەحمەت بیت و دەلیڤەیا دەربازبوونا ئەوان بوو قوناغا ٨ گەلەک باشترە ژ یا لیون.
زێدەتر بوسکیتس دیارکر ل یاریا شەڤا بوری ژی ئاستێ تیما ئەوان یێ باش بوو ھەردیسان یاریزانێن ئەوان شیان ئاستەکێ بلند پێشکێش بکەن و ب دیتنا ئەوی چ مەترسی ل سەر یانا بەرشەلۆنا نین بوو یاریا کامپ نوو دەلیڤەیا دەربازبوونا ئەوان گەلەک باشترە ژ یا ھەڤرکا ئەوان ژبەرکو ئەو دێ یاری ل ناڤ ئەرد و جەماوەرێ خوە کەن .
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا ره‌وشه‌نبيرى و هۆنه‌رى راگه‌هاند كو ب هه‌لكه‌فتا رۆژا جيهانى يا زمانێ دايكێ ئه‌و دێ سميناره‌كێ بۆ دو كه‌سێن تايبه‌تمه‌ند د وارێ زمانى دا رێك ئێخن.
ئه‌مير عه‌لى، جێگرێ رێڤه‌به‌رێ گشتى يێ ره‌وشه‌نبيرى و هۆنه‌رى ل دهۆكێ د داخۆيانيه‌كێ دا بۆ ئه‌ڤرۆ نيوز گۆت: “سوبه‌هى 21ى شوباتا 2019ێ و ب هه‌لكه‌فتا رۆژا جيهانى يا زمانێ دايكێ دێ سيمناره‌كێ بۆ هه‌ر ئێك ژ د. فازل عومه‌ر و زمانزان حه‌سه‌ن چه‌مانى ل هۆلا رێڤه‌به‌ريا گشتى يا ره‌وشه‌نبيرى و هۆنه‌رى گێريت”.
زێده‌تر گۆت: “د ڤێ سمينارێ دا، د. فازل عومه‌ر دێ ژ لايێ زانستى ڤه به‌حس ل زمانێ دايكێ كه‌ت و زمانزان حه‌سه‌ن چه‌مانى ژى دێ ژ لايێ زمانى ڤه به‌حس ل زمانێ دايكێ كه‌ت”.
ئاشكه‌را ژى كر كو ئه‌ڤ سيمينارا دێ ل ده‌مژمێر 11:00 هێته ئه‌نجام دان ب مه‌ره‌ما وێ چه‌ندێ يه ژ لايه‌كى ڤه رۆژا جيهانى يا زمانێ دايكێ وه‌كو رۆژه‌كا جيهانى بهێته ساخكرن و ژ لايه‌كێ دى ژى ڤه، دێ گرنگيا وێ رۆژێ هێته دياركرن، “بۆ مه وه‌كو كورد ژ هه‌موو ملله‌تان پتر پێدڤى ب ساخكرنا ڤێ رۆژێ ينه”.
ئەڤرۆ نیوز:
راھێنەرێ یانا لیون یا فرەنسی برونو جینیسیو سەرەرای وێ وەکھەڤیا ل شەڤا بوری ل ناڤ ئەرد و جەماوەرێ خوە ل گەل یانا بەرشەلۆنا ژ چارچوڤێ یاریێن ئێکێ ژ قوناغا ١٦ یا چامپیونیز لیگا ئورۆیا دیارکر تیما ئەوان یاریەکا ب ھێز ئەنجامدا و ژ ئاستێ تیما خوە و یاریزانێن خوە یێ رازیبوو.
زێدەتر جینیسیو راھێنەرێ لیون بوو رۆژناما مارکا ئیسپانی دیارکر راستە بەرشەلۆنا ل ڤێ دووماھیێ نە ل ئاستێ خوە یێ پێدڤی یە لێ ئەو یانە دێ ھەر مینیت ئێک ژ باشترین یانێن جیھانێ و ئەو ب ئەنجامێ یاریێ یێ رازیبوو ژبەرکو ئەو ل گەل ئێک ژ باشترین یانێن جیھانێ وەکھەڤبوویە.
راھێنەرێ لیون ئەو چەندە ژی ئاشکراکر راستە یاریا دوێ بوو ئەوان دێ گەلەک یا ب زەحمەت بیت ژبەرکو دێ ل ناڤ ئەرد و جەماوەرێ بەرشەلۆنا یاریێ کەن لێ ب دیتنا ئەوی ل یاریا کامپ نوو ھەموو پێشبینی دێ ڤەکری بن بوو ھەردو یانە و د شیانێن ئەوان دا ھەیە بشێن ئەنجامەکێ باش توماربکەن و سوپرایزەکێ بوو ھەموو جەماوەرێ وەرزشی ل ئورۆپا توماربکەن.
ئه‌ڤرۆ نيوز:
بڕياره ئه‌ڤرۆ ل باژێرێ سلێمانيێ كۆمبوونه‌كا به‌فره‌هـ د ناڤ سه‌ركردايه‌تى و ئورگانێن ئێكه‌تيێ دا ب رێڤه بچيت و تێدا هه‌لويستێ خوه د ده‌رباره‌ى پشكداريكرن د پرۆسا سياسى يا هه‌رێما كوردستانێ دا گه‌نگه‌شه بكه‌ت.
له‌تيف شێخ عومه‌ر، ئاخفتنكه‌رێ ب ناڤێ ئێكه‌تى نشتيمانى كوردستان بۆ ميديا حزبا خوه راگه‌هاند كو مه‌كته‌با سياسى يا ئێكه‌تيێ دێ كۆمبوونه‌كا به‌رفره‌هـ بۆ جڤاتا ناڤه‌ندى و مه‌لبه‌ند و كۆميته‌يان ئه‌نجام ده‌ت، “پتريا كادران دێ تێدا د پشكدار بن”.
ئاشكه‌را ژى كر كو گشتاندنا مه‌كته‌با سياسى كو ئاراسته‌ى جڤاتا ناڤه‌ندى و مه‌لبه‌ند و كۆميتان كريه، يا تايبه‌ته ب به‌رچاڤكرنا دووماهى هه‌لويستێ ئێكه‌تيێ ده‌رباره‌ى گورانكاريێن سياسى بۆ كادران روون كه‌ت.
ب گۆره‌ى پێزانينێن ئه‌ڤرۆ نيوز د كۆمبوونا ئێكه‌تيێ يا ئه‌ڤرۆ دا دێ دووماهى هه‌لويستێ وێ حزبێ هێته دان ل هه‌مبه‌ر هه‌ر بژارده‌كا وان هه‌ى كو هنده‌ك سه‌ركردێن وێ داخوازا دو ئيداره‌ى و هنده‌ك ژى يا ئۆپۆزسيۆن بوون و هنده‌ك ژى يا پشكداريكرن د حوكمه‌تێ دا دكه‌ن. دبيت بڕيار ل سه‌ر ده‌ستنيشانكرنا رۆژا ئه‌نجامدانا كۆنگرێ ئێكه‌تيێ يێ چارێ ژى بهێته دان.
ئه‌ڤ كۆمبوونه پشتى وێ چه‌ندێ هات كو ل 18ى شوباتا 2019ێ كۆمبوونا په‌رله‌مانێ كوردستانێ بێ ئاماده‌بوونا ئێكه‌تى نشتيمانى كوردستان هاته ئه‌نجام دان و تێدا ده‌سته‌يا سه‌رۆكاتيا په‌رله‌مانى هاته هه‌لبژارتن.
ل به‌رى كانديدكرنا به‌ربژارا خوه بۆ سه‌رۆكاتيا په‌رله‌مانى، هێمن هه‌ورامى، به‌رى بهێته به‌ربژاركرن بۆ جێگرێ ئێكێ يێ سه‌رۆكێ په‌رله‌مانى ب ناڤێ پارتى ديموكراتى كوردستان راگه‌هاند كو هه‌رده‌ما ئێكه‌تى رازى بوو پۆستێ سه‌رۆكاتيا په‌رله‌مانى وه‌ربگريت، ئه‌و د ئاماده نه سه‌رۆكا په‌رله‌مانى ده‌ست ژ كار بكێشيت و ئێكه‌تيه‌ك بۆ ڤى پۆستى خوه به‌ربژار كه‌ت و ئه‌و ده‌نگى پێ بده‌ن.
نيشاندان