ئەڤرۆ نیوز، نەوزاد ھلۆری:

ھەیسەم زێباری ئێکە ژ وەلاتیێن ناحیا دینارتێ دیارکر کو ئەڤرو چویە سەرێ چیایێ پیرس و بەفرەکا زور ل چیایێ پیرس باری یە.

زێدەتر بو ئەڤرۆ نیوز گۆت: ل چیایێ پیرس نێزیکێ میرتەکا بەفرێ باری یە، ھەتا نوکە ژی بەفر بارین یا بەردەوامە، تیمێن رامالینا بەفرێ ژی بەردەوامن ل سەر لادان و رامالینا بەفرێ ل سەرێ چایی، لێ پێدڤی یە شوفێر ھوشیارێ خوە بن ژ بەرکو جادا چیایێ پیرس ل ھەندەک جھان حلیسوکە و بەفر بارین ژی یا بەردەوامە.

ئەڤرۆ نیوز، نەوزاد ھلۆری:

ژئەگەرێ ھەبوونا شەری و بوردومان و توپبارانا فروکە و سوپایێ تورکیا بۆ دەڤەرا بارزان، ھەتا نوکە پتری ٨٠ گوندێن قەزا مێرگەسوور نەھاتینە ئاڤاکرن، کو ژ وانان ٥٤ گوندێن ناحیا شێروان مەزنن.

کوڤان شێروانی، رێڤەبەرێ ناحیا شێروان مەزن بو ئەڤرۆ نیوز گۆت: ئەڤە چەندین سالە خەلکێ گوندێن ناحیا شێروان مەزن چاڤەرێ وێ یەکێ دکەن کو دەڤەرا وان ئارامیا وێ بزڤریت ڤە و جارەکا دن ئەو ژی بچنە سەر گوندەوارێن خوە، بەلێ ژبەر بوردومان و توپبارانا فروکە و سوپایێ تورکیا ھەتا نوکە کەس نەوێریت بچیتە سەر گوندێن خوە.

زێدەتر گۆت: نوکە تنێ ١٨ گوندێن ناحیا شێروانی مەزن ئاڤەدانن و ئەڤێن دن ھەموو ھاتینە چولکرن، و ژیانا خەلکێ وان گوندان نەخوش بوویە، ژبەرکو بێ بەھر بوینە ژ رەز و بیستان و جھـ و وارێن خوە.

ناڤبری ئەو چەندە ژی دیارکر پێدڤی یە لایەنێن شولەژێ ب جدی کار ل سەر وێ یەکێ بکەن کو ئەمن و ئارامیێ بۆ دەڤەرێ بزڤرینن ڤە و زێدەتر گۆت: ژیانا خەلکێ گوندان ل سەر تەش و کەوالی و چاندنێ یە، نوکە کو وەرزێ زستانێ یە تیمێن رامالینا بەفرێ نەشێن بچنە وان گوندان چونکی مەترسیا بوردومانێ ھەیە.

ئەڤرۆ نیوز ، زنار تۆڤی:

د ماوێ 24 دەمژمێرێن بوریدا پێلەکا سەرمایێ ناحیا کانی ماسێ ڤەگرتیە و د ئەنجامدا رێژەکا باش یا بەفرێ ل سەنتەرێ ناحیا کانی ماسێ و خالا گۆمرکا سەرزێری باریە و نوکە ژی بەفر بەردەوام یا دباریت و رێیا چەندین گوندان ژی هاتیە گرتن.
سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز دیارکر: کو ل شەڤا بوری هەتا نوکە ب رەنگەکێ بەردەوام بەفر یا ل ناحیا کانی ماسێ دباریت و هەتا نوکە 55 سم بەفرێ ل سەنتەرێ ناحیا کانی ماسێ بارینە و ل دەرگەهێ سەرزێری ژی 65 سم بەفرێ بارینە و لدووڤ پێشبینیان، ئەڤرۆ رێژا بارینا بەفرێ ل سەرزێری دێ گەهیتە 80 سم، ل سەنتەرێ ناحیێ ژی دێ گەهیتە 65 سم، ئەڤرۆ ژی بەفر دێ یا بەردەوامبیت. ناڤهاتی گوت ژی: هەر ل سپێدەهیا ئەڤرۆ تیمینێن رامالینا بەفرێ دەست ب رامالینا بەفرێ کریه ل جادێن سەرەکی و رێکێن سەرەکی هاتینە ڤەکرن، لدووڤدا دێ رێکێن گوندان ژی ڤەکەین، هەروەسا مە داخواز ژ خەلکێ و رێڤنگان کریە، کو ژ رێکێن سەرەکی دەرنەکەڤن،داکو ئاسێ نەبن، ژ ئەگەرێ بارینا بەفرێ، چونکی رێژەکا باش یا بەفرێ ل ڤێ دەڤەرێ باریە.

ئەڤرۆ نیوز، مەحمود نھێلی:

سەرۆکێ باژێرڤانیا ئامێدیێ بۆ ئەڤرۆ نیوز دیارکر ئەو بەردەوامن ل سەر ڤەکرنا جادەیێن دەرڤە یێن سنورێ قەزا ئامێدیێ و د نوکە دا رێ یێن تەڤایا قەزا ئامێدیێ د ڤەکرینە.

ئەندازیار ئەڤراز حەسەن سەرۆکێ باژێرڤانیا ئامێدیێ دیارکر، پشتی ڤەکرنا جادەیێن دەرڤە نوکە ئەو مژیلی ڤەکرنا جادەیێن نافخوەیی یێن سەنتەرێ قەزایێ نە ، لێ ھێشتا ب دروستی نەھاتینە ڤەکرن.

ھەر دڤی درەبارەی دا رائید بەیار ئیبراھیم ئەفسەرێ پولیسێن ھاتن و چونا ئامێدیێ بو ئەڤرۆ نیوز خویاکر، کو ھەر ل سیارەتیکا ھەتا د گەھیتە گوندێ بەرچی یێ سەر ناحیا دێرەلۆک ڤە جادە یێن تژی بەفرن و بەردەوام ژلایێ تیمێن پاقژکرنا جادەیان دھێنە مالین لێ ژ بەر بەردەوامیا بارینا بەفرێ رێ تژی بەفر دبنە ڤە و گۆت: ھەر چەندە تا نوکە چ روودانێن ھاتن و چونێ دروست نەبوونە لێ ھاتن و چون گەلەک یا کێمە یا زەحمەتە.

ناڤھاتی داخاز ژ ھاولاتیان و شوفێران ژی کر بتنێ بو کارێن فەر نەبن ھاتن و چون نەکەن دێ باشتر بیت، دیسان دەست خوەشی ل تیمێن پاقژکرنێ ژی کر، کو یێن بەردەوامن ل سەر ڤەکرنا جادەیان.

ژلایێ خوە ڤە ھاشم یەحیا بەرپرسێ پشکا کەشناسیا ئامێدیێ بۆ ئەڤرۆ نیوز دیار کر کو دوھی ب شەڤ تا نوکە بەفر بارین یا بەردەوامە و گۆت: ل کانی ماسێ ٤٥ سەنتيم و ل سەرسنکێ ٢٢ سەمتیم و ل سەنتەرێ قەزا ئامێدیێ ژی ٢٠ سەنتیمێن بەفرێ بارینە.

فوتو : مەحمود نهێلی:
بارینا بەفرێ ل سنوورێ قەزا ئامێدیێ دەست پێکریە و هەتا نوکە یا بەردەوامە.