ئه‌ڤرۆنيوز:

هه‌ر ئێك ژ بزاڤا گۆران وئێكه‌تى نيشتمانى كوردستان ل به‌ره‌ ل گه‌ل ده‌ستپێكرنا هه‌وا هه‌لبژارتنان، دوسيێن نه‌قانوونى يێن شاسوار عه‌بدولواحدى ڤه‌كه‌ن وتووشى پێرابوونێن قانوونى بكه‌ن، سه‌ره‌راى وێ چه‌ندێ دبيت ژبه‌ر ئازادكرنا وى ب كه‌فاله‌ت دده‌مێ بۆرى دا، جاره‌كا دى شاسوارى به‌ر ب دادگه‌هێ وده‌سته‌سه‌ركرنێ ڤه‌ ببه‌ن.

نه‌وه‌ى نوێ كو حزبه‌كا نوويه‌ ول سه‌رده‌مێ ئه‌نجامدانا ريفراندۆما هه‌رێما كوردستانێ ژئاليێ شاسوار عه‌بدولواحدى ‌ سه‌رۆكێ گرۆپا كۆمپانيێن ناليا ڤه‌ هاتبوو دروستكرن، نوكه‌ ده‌ست ب هه‌وا هه‌لبژارتنان كريه‌ وهێرشێ دكه‌ته‌ سه‌ر ئێكه‌تيێ وپارتى وگۆران، به‌لێ بۆ به‌رسڤدانێ، ئێكه‌تى وگۆران مژوولى ڤه‌كرنا دوسييێن نه‌قانوونى يێن شاسوارى نه‌ تاكو ل ده‌مێ هه‌وا هه‌لبژارتنان دا دژى وى بكاربينن ووى تووشى پێرابوونێن قانوونى بكه‌ن.

سامان گرميانى، ئه‌ندامێ سه‌ركردايه‌تيا ئێكه‌تيێ راگه‌هاند” ئێكه‌تى حزبه‌كا مه‌زنه‌ و بدرێژيا ديرۆكا خوه‌ نه‌يار هه‌بوون وبه‌رده‌وام ئێكه‌تى مه‌زن وبه‌رفرهه دبيت”.

سامانى دداخۆيانيه‌كێ دا بۆ وشه‌ نه‌ ڤه‌شارت كو حزبا وى هيڤيداره‌ په‌يوه‌ندى وێ ل گه‌ل ئاليان دباش بن، به‌لێ دووپات دكه‌ت ژى كو ئێكه‌تى بۆ به‌رسڤجانا هه‌ر ئاليه‌كى كو هێرشا نه‌ره‌وا بكه‌ته‌ سه‌ر، ده‌ست وپێن وێ سپى نينن.

 وى ئه‌ندامێ سه‌ركردايه‌تيا ئێكه‌تيێ دياركر كو ئه‌و ئاگه‌هدارى وێ چه‌ندێ نينه‌ كو ئێكه‌تى بزاڤا ساخكرنا دوسييێن شاسوار عه‌بدولواحدى يه‌ وراكێشانا وى بۆ دادگه‌هێ.

دوسييا پشكێن پرۆژێ گه‌شتياريێ چاڤيلاند وئه‌و ئه‌ردێ پرۆژێ ناڤبرى ل سه‌ر هاتيه‌ دروستكرن ل گه‌ل ئه‌نجامدانا كارێ نه‌قانوونى دناڤ چاڤيلاند دا وه‌كو دروستكرنا ڤيللان كو پێشتر دپرۆژه‌ى دا نه‌بوون، ل گه‌ل دوسييا 40 مليۆن دۆلاران كو شاسوار قه‌ردارێ حوكمه‌تێ يه‌ وئه‌و سه‌رپێچيێن ل سه‌ر جادا 120 مترى ل سلێمانيێ، ژ دوسيێين گرنگێن ل به‌رده‌ستێ گۆرانێ وئێكه‌تيێ دا كو دخوازن بلڤينن وشاسوارى پێ بده‌نه‌ دادگه‌هێ.

فه‌يسه‌ل حه‌مه‌ سالح، ئه‌ندامێ جڤاتا نيشتمانى يا بزاڤا گۆران بۆ وشه‌ گۆت” ل ده‌ستپێكا هێرشێن شاسوارى ونه‌وه‌ى نوێ، گۆران به‌رسڤ نه‌دا، به‌لێ نوكه‌ گۆران ژى يا هاتيه‌ ده‌نگ وپێدڤيه‌ شاسوار بچيته‌ دقالبێ خوه‌ دا”.

گۆت ژى” شاسوار خوه‌ گه‌له‌ك مه‌زن دبينيت وهزر دكه‌ت كو دشێت گه‌له‌ك تشتان بكه‌ت، به‌لێ وه‌سا نينه‌ وهه‌لبژارتن دێ سه‌لمينن كا قه‌بارێ شاسوارى چه‌نده‌”.

ل دۆر لڤاندنا دوسيێان دژى شاسوارى، گۆت” گۆران دێ به‌رده‌وامبيت ل سه‌ر به‌رسڤدانا وى ودياركرنا روويێ راسته‌قينه‌يێ وى”.

ئه‌ڤرۆنيوز:

سه‌رۆك وه‌زيرێن عيراقێ، ئه‌ڤرۆ شه‌مبيێ 7/4/2018 په‌يوه‌نديه‌كا ته‌له‌فونى ل گه‌ل سه‌رۆك بارزانى ئه‌نجامدا.

حه‌يده‌ر عه‌بادى، سه‌رۆك وه‌زيرێن عيراقێ دوێ په‌يوه‌نديا ته‌له‌فونى دا، سه‌ره‌خوه‌شى ل سه‌رۆك بارزانى كر ب وه‌غه‌ركرنا دلوڤان ئدريس بارزانى.

ئه‌ڤرۆ نیوز ، نه‌وزاد هلۆرى:

ژ دوهى وه‌ره‌ هه‌تا ئێڤاریا ئه‌ڤرۆ فرۆكێن توركیا ده‌ڤه‌را سیده‌كان بوردومان دكه‌ن و ژ ئه‌نجامێ بوردومانا وان 120 خێزانێن گوندێن قه‌زا سۆران مال و حالێن خوه‌ هێلان و ئاواره‌ی ده‌ڤه‌رێن دى ب تایبه‌تى سیده‌كان بوون.

ژێده‌ره‌كێ ل ناحیا سیده‌كان بۆ ئه‌ڤرۆ نیوز گۆت”شه‌ڤا بۆرى هه‌تا ئێڤاریا ئه‌ڤرۆ فروكه‌ و توبخانه‌یێن توركیا چه‌ند گونده‌كێن سنورێ ناحیا سیده‌كان بوردومان دكه‌ت ب تایبه‌تى گوندێن هێرت ، لێلكان ، گوره‌شا ، به‌ره‌سه‌نان ، خه‌لیفان ، هه‌لگیران  و سیران  و خه‌لكێ ئه‌وان گوندان ، گوندێن خوه‌ به‌رداینه‌ و قه‌ستا مالێن كه‌سوكار و سنورێ ناحیا سیده‌كان كریه‌ كو هژمارا وان نێزیكێ 120 خێزانایه‌”.

زێده‌تر گۆت” هه‌ر ژ ئه‌نجامێ ‌وان بوردومانان، دو كه‌س ژى ب گرانى برینداربووینه‌  و نها بوردومان نه‌مایه‌ و هنده‌ك ژ وان وه‌لاتیان زڤرینه‌ڤه‌ سه‌ر گوندێن خوه‌”.

هه‌ر ئه‌ڤرۆ فروكێن توركیا ده‌ڤه‌را نێروه‌ورێكان و دوسكیا ل سنوورێ قه‌زا ئامێدیێ بوردومانكریه‌ ، به‌لێ چو زیان نه‌بوون.

ئه‌ڤرۆنيوز:

ژ ئه‌نجامێ روودانه‌كا هاتنوچوونێ، پشتى نيڤرۆيا ئه‌ڤرۆ ئه‌ينيێ 6/4/2018، كه‌سه‌كى گيانێ خوه‌ ژده‌ست دا وپێنج كه‌س ژى برينداربوون كو هه‌موو ژ ئێك خێزانێ بوون.

رائيد (دلاوه‌ر له‌تيف) په‌يڤدارێ پۆليسێن هاتنوچوونێ ل قه‌زا سۆران دداخۆيانيه‌كا رۆژنامه‌ڤانى دا، راگه‌هاند” ترومبێله‌كا ژ جۆرێ تويۆتا لاندگرۆز ل گرێ باپشتيان ل قه‌زا سۆران وه‌رگه‌ريا ودئه‌نجامدا كچه‌كا 14 سالى گيانێ خوه‌ ژده‌ست دا وشوفێر وپێنج كه‌سێن دى برينداربوون كو هه‌موو ئێك خێزان بوون”.

ئه‌ڤرۆنيوز:

كۆمسيۆنا بلند يا هه‌لبژارتنان ل عيراقێ راگه‌هاند، په‌سه‌ندكرنا دووماهيێ بۆ 7188 به‌ربژێرێن هه‌لبژارتنێن جڤاتا نوونه‌رێن عيراقێ هاتيه كرن ودياركر ژى كو هژماره‌كا به‌ربژاران هاتينه‌ دوورخستن ژبه‌ر پرسێن گرێدايى قانوونا لێپرسينێ ودادپه‌روه‌ريێ.

حازم ئه‌لرودينى، ئه‌ندامێ جڤاتا كۆميساران ل كۆمسيۆنا بلند يا هه‌لبژارتنانل عيراقێ گۆت” كۆمسيۆنێ هه‌موو كارێن هووربينيێ ل دۆر ناڤێن به‌ربژارێن هه‌لبژارتنێن جڤاتا نوونه‌ران يێن تايبه‌ت ب پێرابوونێن ناڤخوه‌يى وباوه‌رنامێ وقانوونا لێپرسينێ ودادپه‌روه‌ريێ ووه‌رگرتنا ناڤێن شوونگر بۆ يێن دوورخستى، ب دووماهى ئيناينه‌”.

ئه‌لرودينى زێده‌تر بۆ ئاژانسا (المعله‌مه‌) يا عيراقى زێده‌تر گۆت” 7188 به‌ربژار ل هه‌موو پارێزگه‌هێن عيراقێ يێن هاتينه‌ په‌سه‌ندكرن وهنده‌ك ژى يێن هاتينه‌ دوورخستن ژبه‌ر پێرابوونێن قانوونا لێپرسينێ ودادپه‌روه‌ريێ وهێشتا جهێن وان ماينه‌ ڤالا”.

دهێته‌ زانين، كۆمسيۆنا بلند يا هه‌لبژارتنان ل هه‌يڤا كانوونا دويێ 2018 راگه‌هاندبوو” 10 هزار كه‌سان خوه‌ به‌ربژاركريه‌ بۆ هه‌لبژارتنێن جڤاتا نوونه‌رێن عيراقێ كو دێ ل 15/5/2018 هێنه‌ ئه‌نجامدان”.