ئه‌ڤرۆنيوز:
ئێڤاريا دره‌نگ يا ئه‌ڤرۆ شه‌مبيێ 10/3/2018 كه‌سه‌كى سه‌را كێشه‌كا ئه‌ردى سێ برا كوشتن ل گونده‌كێ ده‌وروبه‌رێ باژێرێ هه‌ولێرێ.
ل گوندێ (دوشيوان) يێب سه‌ر باژێركێ قوشته‌په ل سنورێ پارێزگه‌ها هه‌ولێرێ، ل سه‌ر كێشه‌كا ئه‌ردى سێ كه‌س هاتن كوشتن كو هه‌رسێ برايێن ئێكن ودو ژوان خێزاندارن.
بكوژێ وان هه‌رسێ برايان هه‌ر مرۆڤێ وانه وپشتى روودانێ بۆ جهه‌كێ نه‌ديار يێ ره‌ڤى.
ئەڤرۆ نیوز ، نەوزاد هلوری:
ب هەلکەفتا سالروژا سەرهلدانا قەزا سوران ، رێکخراوا وار بو پاراستنا ژینگەهێ ، گۆل لسەر نەخوشان دابەشکرن. دڤی واریدا ماهر ئیدلیبی ، سەروکێ رێکخراوا وار بو پاراستنا ژینگەهێ بو ئەڤرو نیوز گوت: (ب هەلکەفتا سالروژا سەرهلدانا قەزا سوران و قەزا چومان و دەڤەرا بالەکایەتی و قەزا مێرگەسوور و قەزا رەواندوز ، ل دژی رژێما بەعس ، مە وەکو رێکخراوا وار ب هەڤکاری ل گەل بەنزینخانا چوارچەل 100 گولێن جوراوجور لسەر ئافرەتێن نەخوشخانا زاروکبوونێ دابەشکرن)
زێدەتر گوت : (زاروکێن نوو پەیدا دبن هێمایێ نوویایێ یە و ، ب مەرەما دابینکرنا ژینگەهەکا یاخلەم بو زاروکان ئەڤ چالاکی هاتە ئەنجامدان)
ئه‌ڤرۆ نيوز:
مه‌كته‌با سياسى يا پارتى ديموكراتى كوردستان، ب هه‌لكه‌فتا 48 ساليا رێككه‌فتنا 11 ئادارا 1970 ێ، په‌يامه‌ك به‌لاڤ كريه و پيرۆزباهي ل هه‌موو گه‌لێ كوردستانێ دكه‌ت.
د په‌يامێ دا ئاماژه ب وێ يه‌كێ كريه كو ل سه‌ر ئاستێ ده‌ڤه‌رێ و جيهانێ مه گه‌له‌ك پێدڤى ب كار و خه‌باتا به‌رده‌وام هه‌يه ژ ئاليێ سياسى و دبلوماسى ڤه بۆ بهێزكرن و پاراستن و به‌ره‌ڤانيكرن ژ قه‌وارێ سياسى يێ شه‌رعى يێ هه‌رێما كوردستانێ و ده‌ستكه‌فتێن مه و بده‌ستڤه‌ئينانا هه‌موو مافێن گه‌لێ مه.
ئه‌ڤرۆينوز:
ئه‌ندامه‌كێ جڤاتا نوونه‌رێن عيراقێ ژ ره‌وتێ سه‌درى راگه‌هاند، هه‌تا نوكه حوكمه‌تا عه‌بادى ناڤێن گه‌نده‌لكاران وباده‌كێن مه‌زن ومه‌ترسيدارێن گه‌نده‌ليێ ئاشكرا نه‌كرينه.
عه‌بدولعه‌زيز زالمى، په‌رله‌مانتارێ ره‌وتێ سه‌درى ل جڤاتا نوونه‌رين عيراقێ گۆت” هه‌تا نوكه مه نه‌ديتيه ئاليه‌كێ په‌يوه‌نديدار ب نه‌هێلانا گه‌نده‌ليێ گه‌نده‌لێن مه‌زن يان باده‌كێن مه‌زن ومه‌ترسيدار يێن گه‌نده‌ليێ ئاشكرا بكه‌ن”.
دياركر ژى” ناڤێن به‌رپرسێن سياسى يێن مه‌زن يێن دوان باده‌كان دا هه‌ين وكه‌سايه‌تيێ سياسى يێ هه‌ين يێن بووينه خودانێن سامانه‌كێ مه‌زن وهه‌كه هووربينى وڤه‌كۆلين ل ژێده‌رێن داهاتێن وان بهێته كرن، دێ ديار بيت كو يێن ل سه‌ر سامانێ گشتى زه‌نگين بووين”.
جه‌ختیشی كرده‌وه، كه سه‌رانى گه‌وره‌ى سیاسه‌ت، له‌و دۆسیییانه‌دا، تێوه‌گلاون، گوتیشی: “كه‌سایه‌تی سیاسیی هه‌ن، بوون به‌خاه‌نى سه‌روه‌ت و سامانێكى زۆر، ئه‌گه‌ر وردبینی و لێكۆڵینه‌وه له‌سه‌رچاوه‌ى داهاتیان بكرێت، ده‌رده‌كه‌وێت كه له‌سه‌ر سامانى گشتیی ده‌وڵه‌مه‌ن بوون”.
حه‌يده‌ر عه‌بادى سه‌رۆك وه‌زيرێن عيراقێ چه‌ندين جاران سوزا دژايه‌تيا گه‌نده‌ليێ دابوو، به‌رى سێ هه‌يڤان ژ ب دووماهى هاتنا ويلايه‌تا وى، دانپێدان كر كو سه‌ركه‌فتن ل سه‌ر گه‌نده‌ليێ كاره‌كێ ئه‌سته‌مه وئاشكراكر ژى كو گه‌نده‌لان پارێن خوه يێن هنارتينه ده‌رڤه‌ى عيراقێ.
ئه‌ڤرۆنيوز:
حوكمه‌تا هه‌رێما كوردستانێ بريارا تاپۆكرنا وان خانيێن ئاكنجيبوونێ ئه‌وێن دكه‌ڤنه حه‌ره‌مێن گوندان ده‌ركر.
حوكمه‌تا هه‌رێمێ ئه‌ڤرۆ شه‌مبيێ 10/3/2018 دمالپه‌رێ خوه يێ فه‌رمى دا به‌لاڤكر” ب فه‌رمانا قوباد تاله‌بانى سه‌رۆكێ جڤاتا وه‌زيران ب وه‌كاله‌ت، دو لژنه هاتنه پێكئينان بۆ ته‌مليك كرنا وان خانيێن ئاكنجيبوونێ ئه‌وێن دكه‌ڤنه حه‌ره‌مێ گوندان”.
زێده‌تر دياركر” پشتى كۆمبوونه‌كا تايبه‌ت ب كێشێن تاپۆكرنا خانيێن ئاكنجيبوونێ ل حه‌ره‌مێ گوندان، كو نێچيرڤان بارزانى سه‌رۆكێ جڤاتا وه‌زيران وقوباد تاله‌بانى جێگرێ سه‌رۆك وه‌زيران ووه‌زير وئاليێن په‌يوه‌نديدار به‌رهه‌ڤ بووين، قوباد تاله‌بانى سه‌رۆكێ جڤاتا وه‌زيران ب وه‌كاله‌ت، ئيمزا ل سه‌ر دو فه‌رمانان كريه ب هژمارێن 862 و863 ل 20/2/2018 ب مه‌ره‌ما تاپۆكرنا وان خانيێن ئاكنجيبوونێ ئه‌وێن دكه‌ڤنه حه‌ره‌مێ گوندان”.
ل دووڤ وێ فه‌رمانێ، دو لژنێن تايبه‌ت ژ وه‌زاره‌ت وده‌زگه‌هێن په‌يوه‌نديدار دێ هێنه پێكئينان بۆ وێ چه‌ندێ ئه‌و فه‌رمانه ب پشت به‌ستن ب قانوونێ بهێنه بجهئينان، لژنێن ناڤبرى ژى دێ نوونه‌رێ هه‌ر ئێك ژ وه‌زاره‌تێن داد وباژيرڤانيان وگه‌شتوگوزار وچاندن وژێده‌رێن ئاڤێ ودارايێ وئابوورى وريڤه‌به‌ريا تۆماركرنا خانوبه‌ران پێكهێن.
نه‌ورز قازى، سه‌رۆكێ فه‌رمانگه‌ها قانوونى ل سه‌رۆكاتيا جڤاتا وه‌زيران دداخۆيانيه‌كێ دا راگه‌هاند” ئيمزاكرنا وان هه‌ردو فه‌رمانان( 862 و863) ل سه‌ر بنه‌مايێ قانوونا هژمار 12 يا سالا 2012 ورێنمايێن سالا 2017 هاتينه ده‌ركرن”.
ل دۆر هژمارا وان خانيێن كو دێ هێنه تاپۆكرن ب گۆره‌ى وێ فه‌رمانێ، نه‌وروز قازى گۆت” ل دووڤ وان ئامارێن ل به‌رده‌ستێ مه ومه كار ل سه‌ر كرى، زێده‌تر ژ 80 هزار خێزانان ژ هه‌موو باژێر وباژێركێن هه‌رێما كوردستانێ دێ مفاداربن”.
ئه‌ڤرۆنيوز:
ئه‌ڤرۆ شه‌مبيێ 10/3/2018 سندووقا دراڤى يا نێڤده‌وله‌تى، بودجا عيراقێ يا سالا 2018 ره‌تكر كو جڤاتا نوونه‌رێن عيراقێ ل رۆژا شه‌مبيا بۆرى په‌سه‌ندكربوو.
سه‌لام سمێسم شاره‌زایا ئابووری يا عيراقى راگه‌هاند، ئه‌ڤرۆ سندووقا دراڤى يا نێڤده‌وله‌تى بودجا عيراقێ ره‌تكر، چونكى ل گه‌ل وێ رێككه‌فتنێ ناگونجيت ئه‌وا دناڤبه‌را سنووقا ناڤبرى وعيراقێ هاتيه ئه‌نجامدان.
ل دووڤ وێ رێككه‌فتنا ئاماژه بۆ هاتيه كرن، عيراق دهيته پێگيرى كرن ب بجهئينانا چه‌ندين مه‌رجان ژوان ژى هه‌لوه‌شاندنا هنده‌ك پۆستان وگران نه‌كرنا بارێ بودجێ ل سالا 2018.
وێ شاره‌زايا ئابوورى يا عيراقى زێده‌تر بۆ سايتێ (اصداء نيوز) گۆت” ئێك ژ ئه‌گه‌رێن ره‌تكرنا بودجێ ژلايێ سندووقا دراڤى يا نێڤده‌وله‌تى ڤه، ئه‌وه كو ژبۆ پرۆپاگندا هه‌لبژارتنان له‌ز دده‌ربازكرنا بودجێ دا هاته كرن”.
ئەڤرو نیوز، نەوزاد هلۆری:
ده‌مه‌كه هندەك كەسێن نەنياس چەند گورێن سێ گورستانێن ناحيا شێروان تێكداینە و بەردوام ژی جار جار دهێنە تێكدان و هەتا نها ژی كەس نەهاتیە ده‌سته‌سه‌ركرن، رێڤەبەرێ ناحیا شێروانا مەزن دیاركر كو گومان دهێتەكرن ئەو كەسە ژ توركیا یان ئیرانێ هاتبنە دەڤەرێ و ب دووڤ گه‌نجينا و پارچێن شینواران دگەریێن.
بارزان عەبدوللا شێروانی وەلاتیەكێ گوندێ ” لێرێ” یا سەر ب ناحیا شێروانی مەزنە ل دەڤەرا بارزان بۆ ئەڤرۆ نیوز گۆت” چەند رۆژەكە ل سێ گورستانێن دەڤەرێ و ئێك ژ وان گورستانان گورستانا گوندێ مەیە ژلایی هندەك كەسێن نەنياس ڤە دهێتە تێكدان و هەستیكێن وان گوران هاتینە دەرئینان و پارچێن گوسكا ل وان جهان هێلاینە و چووینە و مە ژی دووبارە ئەو هەستیك كۆمكرینە و ڤەشارتینەڤە”.
زێدەتر گۆت”گورستانا موسا مەعریب ، گورستانا شەهید دەریا پەل ، گورستانا موناسبا مەزن و گورستانا كەوان ژ وان گورستانانە ل سنوورێ ناحیا شێروانی مەزن كو هاتینە تێكدان كو دیروكا دروستبوونا وان ژی دزڤریت بۆ سەردەمێ عەلەویان و پێكهاتەێن ئاینێن دى یێن بەری ئیسلامێ كو چەندین گورێن سریانی و عەلەوی و زەردەشتی و سائیبی تێدانه”.
ب گۆرەی ئاخڤتنێن ناڤبری، ئێك ژ وان گورێن كو هاتیە كولان و دەرئینان گوره‌كێ سەردەمێ دەولەتا عوسمانیان بوویە.
كوڤان رەشید، رێڤەبەرێ ناحیا شێروانی مەزن بۆ ئەڤرۆ نیوز گۆت” ده‌مه‌كە چەند كەسێن نەنياس ب دزی و ڤەشاری ڤە فێربووینە كو گورێن چەند گورستانێن سنورێ ناحیا شێروانی مەزن د كولن و هەستیكان دەردئینن و سەحا ناڤ گوران دكەن كا چو گه‌نجينه و پارچێن شینواران دناڤ دا نینن”.
زێدەتر گۆت” هەتا نها چو پێزانين ل سەر وان كەسان نینە ، بەلێ گومان دهێتەكرن كو ئەو كەسە ژ ده‌رڤه‌ى هەرێما كوردستانێ هاتبن ب تایبەتی ژ توركیا و ئیرانێ، ژ بەركو ئەو كەسێن ئەو گور كولاین گه‌له‌ك ب شارەزایی كولاینە و ب دووڤ بەلگە و نەخشەیان هاتینە و گه‌له‌ك ب شارەزایی و ب پلانەك دارشتی گەهشتینە وان گورستانان و زوو ژى يێن زڤرین ڤە”.
زێده‌تر گۆت” مە هەموو هێزێن ئەمنی ئاگەهداركرینە و چاڤدێریێن بەردەوام ل وان گورستانان دكەین و هەر كەسەكێ كو دەست ل گەل وان هەبیت دێ هێتەده‌سته‌سه‌ركرن و گەهیتە سزایێ خوە یێ قانوونی”.
ناڤبری دیاركر ژی كو ناحیا شێروانی مەزن دكه‌ڤيته سه‌ر سنور باكوورێ كوردستانێ و و پشكه‌ك ژ گوندێن ناحيێ دكەڤنە ژێر دەستهەلاتا پەكەكێ.
ئه‌ڤرۆنيوز:
چالاكڤانێن تۆرێن جڤاكى پارچه ڤيديۆيه‌كا كه‌سايه‌تيێ ئايينى يێ عيراقێ وبه‌ربژار بۆ هه‌لبژارتنێن په‌رله‌مانێ عيراقێ (خالد الملا) به‌لاڤ دكه‌ن كو ديداره‌كه ل گه‌ل كه‌نالێ (الاتجاه) يێ عيراقى كو دوێ ديدارێ دا دبێژيت هنده‌ك كه‌سايه‌تيێن داعشى دێ پشكداريێ دهه‌لبژارتنان دا كه‌ن وسه‌ركه‌ڤن بۆ په‌رله‌مانێ عيراقێ.
دوێ پارچه ڤيديۆيێ دا، خالد الملا دبێژيت” بۆ وه‌لاتيێ عيراقى هه‌يه خوه به‌ربژاركه‌ت بۆ هه‌لبژارتنان هه‌تاكو داعشى ژى بيت”.
دياركر دكه‌ت ژى كو ئه‌و پێشبينيێ دكه‌ت هنده‌ك داعشى بگه‌هنه په‌رله‌مانى وهه‌تاكو سه‌رۆكاتيا په‌رله‌مانى ژى داعشيه‌ك وه‌رگريت.
هه‌لبژارتنێن په‌رله‌مانێ عيراقێ ل رۆژا 12/5/2018 دێ هێنه ئه‌نجامدان.
ئه‌ڤرۆنيوز:
ته‌رمێ گه‌نجه‌كێ 19 سالى ئه‌ڤرۆ شه‌مبيێ 10/3/2018 هاته ديتن كو خه‌لكێ ناحيا سيده‌كانه يا ب سه‌ر قه‌زا سۆران ڤه.
رائيد (هه‌وار ئه‌رگۆشى) په‌يڤدارێ رێڤه‌به‌ريا پۆليسێن سۆران دداخۆيانيه‌كا رۆژنامه‌ڤانى دا گۆت” ل سپێده‌يا ئه‌ڤرۆ شه‌مبيێ، ئه‌م هاتينه ئاگه‌هداركرن ب هه‌بوونا ته‌رمه‌كى، پشتى گه‌هشتنا تيمێن مه دياربوو كو ته‌رمێ گه‌نجه‌كێ 19 ساليێ يه وب گوله‌يان گيانێ خوه ژده‌ست دايه”.
گۆت ژى” ته‌رمێ وى گه‌نجى هاته هنارتن بۆ نوشداريا داد وڤه‌كۆلينێ ل دۆر روودانێ يا ده‌ستپێكرى”.
ئه‌ڤرۆنيوز:
راهێنه‌رێ يانا ريال مه‌دريد ده‌رگه‌هێن ئيمزاكرنا گرێبه‌ستێ ل گه‌ل يارێكه‌رێ به‌رازيلى نيمار هێرشبه‌رێ يانا باريس سان جيرمان يا فه‌ره‌نسى ڤه‌كرن.
چه‌ندين گۆتن ل دۆر پاشه‌رۆژا نيمارى ل گه‌ل يانا خوه يا فه‌ره‌نسى دهێنه به‌لاڤكرن كو ب گۆژمێ 222 مليۆن يورۆيان ژ به‌رشه‌لونا كرى بوو وبوويه گرانترين ياريكه‌ر دديرۆكێ دا، به‌لێ ل دووڤ راپۆرتێن رۆژنامه‌ڤانى، نيمار يێ كه‌يفخوه‌ش نينه ل گه‌ل يانا باريس سان جيرمان ب تايبه‌تى پشتى ده‌ركه‌فتنا وێ ژ خۆلا قاره‌مانێن ئورۆپا دقۆناغا 16 دا ل سه‌ر ده‌ستێ ريال مه‌دريد.
ژێده‌رێن رۆژنامه‌ڤانى ئاماژێ دده‌ن كو يانا فه‌ره‌نسى داخوازا 400 مليۆن يورۆيان بۆ فرۆتنا نيمارى دكه‌ت وريال مه‌دريد يا به‌رهه‌ڤه بۆ دانا وى گۆژمێ پاره‌ى بۆ ئينانا نيمارى بۆ ناڤ رێزێن خوه، لدۆر ڤێ چه‌ندێ ژى رۆژنامه‌ڤانه‌كى پرسيار ژ زێنلدين زێدان راهێنه‌رێ ريال كر كا ئايا ريال يا به‌رهه‌ڤه كوژمێ 400 مليۆن يورۆيان بۆ ئينانا نيمارى بده‌ت، دبه‌رسڤێ دا زێدانى ب دوور نه‌ديت ئه‌ڤ چه‌نده بهێته كرن.
زێدانى دياركر ژى، به‌رى چه‌ند هه‌يڤان 222 مليۆن يورۆ بۆ ڤه‌گوهاستنا نيمارى هاتن دان وئه‌ڤ گۆژمێ مه‌زن نوكه يێن هه‌ين بۆ ڤه‌گوهاستنا ياريكه‌رێن دوى ئاستى دا وده‌مێ ريال مه‌دريد ب گۆژمێ 72 مليۆن يورۆيان گرێبه‌ست ل گه‌ل من ئيمزاكرى، وى ده‌مى من هزركر كو ئه‌ڤه تشته‌كێ ئه‌سته‌مه ونيمار ژى ياريكه‌ره‌كێ گونجايه بۆ هه‌ر تيمه‌كێ.
رۆژناما ئاس يا ئيسپانى ئه‌ڤ داخۆيانيا زێدانى وه‌كو ئاماژه‌ك هژماره‌ت بۆ نيه‌تا ريال مه‌دريد بۆ ئيمزاكرنا گرێبه‌سته‌كێ ل گه‌ل نيمارى.
نيشاندان