ئه‌ڤرۆنيوز:

په‌يڤدارێ فه‌رميێ پارتى ديموكراتى كوردستان راگه‌هاند، سه‌باره‌ت ب وێ پێزانينا نه‌دروست كو ل چه‌ند مالپه‌ر وناڤه‌ندێن ميديايى ل سه‌ر زارێ په‌رله‌مانتاره‌كێ ده‌وله‌تا قانوونێ ب ناڤێ (ره‌سول رازى) هاتيه‌ به‌لاكرن، كو پارتى 350 هزار فه‌رمانبه‌رێن وه‌همى دحوكمه‌تێ دا يێن هه‌ين ومووچێن وان وه‌ردگريت، ژ سه‌رى هه‌تا بنى ئه‌و پێزانينه‌ يا دروست نينه‌.

مه‌حموود محه‌مه‌د په‌يڤدارێ فه‌رمى يێ  پارتى ديموكرتى كوردستان، ئه‌ڤرۆ سێشه‌مبى 27/2/2018 گۆت” بۆ خه‌لكێ عيراقێ ب گشتى وهه‌رێما كوردستانێ ب تايبه‌تى رادگه‌هينين كو ئه‌ڤ پێزانينا نه‌دروست بزاڤه‌كا جه‌واشه‌كاريه‌، پێزانينێن وى په‌رله‌مانتارى ب خوه‌ دوه‌همى نه‌ وتنێ بۆ خوه‌ دياركرنێ تۆمه‌ت ئاراسته‌ى پارتى ديموكراتى كوردستان كريه‌”.

گۆت ژى” ئارمانج ژ به‌لاڤكرنا وان جۆره‌ ده‌نگوباسێن نه‌دروست ژئاليێ ره‌سول رازى وهه‌ڤشێوێن وى بۆ سه‌رنج لادانا خه‌لكى يه‌ ل سه‌ر وێ گه‌نده‌ليا مه‌زن ئه‌وا دكه‌رتێن له‌شكرى وكاره‌بێ وپرۆژێن وه‌همى يێ دى يێن خزمه‌تگوزارى ل باشوور وناڤه‌راستا عيراقێ كو دهێته‌ ته‌خمينكرن ب سه‌دان مليار دۆلار هاتبنه‌ هه‌ده‌ردان وپارێن وان چوبن سه‌ر حيسابێن به‌رپرسان وبه‌ريكێن وان جۆره‌ بۆختانچيان وهه‌ڤشێوێن وان، هه‌روه‌سا بزاڤێ دكه‌ن ب ڤان جۆره‌ تۆمه‌تان زێده‌تر گرفتان بێخنه‌ به‌رده‌م چاره‌سه‌ركرنا كێشێن به‌غدا وهه‌وليرێ وره‌وشێ نه‌سه‌قامگير تر بكه‌ن، بۆ وێ چه‌ندێ ئه‌و بخوه‌ د ئاڤا شێلى دا زێده‌تر ماسيان بگرن”.

په‌يڤدارێ پارتى دياركر كو ل هه‌رێما كوردستانێ دده‌مێ بۆرى دا، سيسته‌مێ بايۆمه‌ترى بۆ تۆماركرنا فه‌رمانبه‌ران هاتيه‌ ئه‌نجامدان، هه‌رێما كوردستانێ كارى ب گۆره‌ى قانوونێ دكه‌ت وفه‌رمانبه‌ر مولكێ راسته‌قينه‌يێ حوكمه‌تێ نه‌ نه‌كو يێن حزبان.

لە هەرێمی کوردستان لە ماوەی رابردوودا سیستەمی بایۆمەتری بۆ تۆماری فەرمانبەران ئەنجام درا، هەرێمی کوردستان کار بەگوێرەی یاسا دەکات و فەرمانبەران موڵکی راستەقینەی حکوومەتن نەوەک هی حزبەکان بن.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى،راگه‌هاند، ئه‌مريكى به‌رده‌وام دووپاتيێ ل سه‌ر گرنگيا په‌يوه‌نديان وبه‌رده‌واميا وان ل گه‌ل هه‌رێما كوردستانێ دكه‌ن وهه‌رده‌مێ گرفت بكه‌ڤيته‌ وان په‌يوه‌نديان، دبه‌رهه‌ڤن بۆ چاره‌سه‌ركرنێ، دياركر ژى ئه‌مريكا دوي باوه‌ريێ دايه‌، هه‌رێما كوردستانێ پێگه‌هه‌كێ گرنگ ل رۆژهه‌لاتا ناڤه‌راست يا هه‌ى ودێ گرنگيێ ژى پێ ده‌ن.

دداخۆيانيه‌كا رۆژنامه‌ڤانى دا،مه‌سرور بارزانى شيره‌تكارێ جڤاتا ئاسايشا هه‌رێما كوردستانێ، ل دۆر سه‌ره‌دانا خوه‌ بۆ ئه‌مريكا گۆت” مه‌ره‌ما مه‌ ژ وێ سه‌ره‌دانێ، دانوستاندن بوو ل دۆر چه‌ند پرسێن گرنگ وه‌كو په‌يوه‌نديێن هه‌رێما كوردستانێ وئه‌مريكا وئه‌و ره‌وشا نوكه‌ ل عيراقێ هه‌ى، زێده‌بارى به‌حسێ په‌يوه‌نديێن هه‌ولێرێ وبه‌غدا”.

زێده‌تر گۆت” هه‌تا نوكه‌ مه‌ چه‌ندين ديدار وكۆمبوون ل دۆر وان پرسان ل گه‌ل به‌رپرسێن كوچكا سپى وئه‌مريكا ب گشتى ئه‌نجامداينه‌، ژوان ژى روونشتنه‌كا تايبه‌ت ل گه‌ل هێربرت ماك ماسته‌ر شيره‌تكارێ ئاسايشا نه‌ته‌وى يا ئه‌مريكى هه‌بوو، هه‌روه‌سا مه‌ چه‌ندين ديدار ل وه‌زاره‌تا ده‌رڤه‌ يا ئه‌مريكى ئه‌نجامدان ول پاشه‌رۆژێ ژى دێ مه‌ چه‌ندين ديدار ل گه‌ل سيناتۆر وئه‌ندامێن كونگرسێ ئه‌مريكى هه‌بن”.

شيره‌تكارێ جڤاتا ئاسايشا هه‌رێمێ ل دۆر ناڤه‌رۆكا ديدار وكۆمبوونين خوه‌ ل گه‌ل به‌رپرسێن ئه‌مريكى، گۆت” زێده‌تر مه‌ به‌حسێ ره‌وشا گشتى يا هه‌رێما كوردستانێ كريه‌، په‌يوه‌نديێن دناڤبه‌را مه‌ وبه‌غدا ته‌وه‌ره‌كێ سه‌ره‌كى يێ وان دانوستاندنان بوو، مه‌ به‌حسێ وێ چه‌ندێ كر كو ئه‌وا ل سه‌ر ملێ هه‌رێما كوردستانێ مه‌ يێ بجهئيناى، ب تايبه‌ت بجهئينانا  دستوورێ عيراقێ ژ مادێ ئێكێ هه‌تا دووماهى برگه‌، ب ديتنا مه‌ ئه‌وبوو كو ئێدى پێدڤي حوكمه‌تا به‌غدا ئه‌ركێ خوه‌ بجهبينيت، ب تايبه‌تى دهنارتنا مووچێ خه‌لكێ كوردستانێ وڤه‌كرنا فرۆكخانێن هه‌رێمێ”.

ل دۆر هه‌وليستێ به‌رپرسێن ئه‌مريكى  د وان ديدار وكۆمبوونان دا، مه‌سرور بارزانى گۆت” ئه‌مريكى به‌رده‌وام به‌حسێ وێ چه‌ندێ دكه‌ن كو په‌يوه‌نديێن وان ل گه‌ل هه‌رێما كوردستانێ گرنگيا خوه‌ يا تايبه‌ت يا هه‌ى ودێ دبه‌رده‌وام بن ل سه‌ر ب هێزكرنا وان په‌يوه‌نديان، هه‌تا نوكه‌ هه‌كه‌ ل هنده‌ك جهان گرفت دوان په‌يوه‌نديان دا دروست ببيت، دبه‌رهه‌ڤن بۆ چاره‌سه‌ريا وان گرفتان وئه‌و دوێ باوه‌ريێ دانه‌ كو هه‌رێما كوردستانێ پشكه‌كا گه‌له‌ك گرنگه‌ ل رۆژهه‌لاتا ناڤه‌راست وئه‌مريكا ژى گرنگيێ ب وى پێگه‌هێ گرنگ دده‌ت”.

ل دۆر داعشێ، مه‌سرور بارزانى گۆت” داعشێ ژ روويێ له‌شكرى ڤه‌ شكه‌ستن يا ئيناى وئه‌و جهێن داگيركرين هاتينه‌ رزگاركرن، به‌لێ ئه‌ڤه‌ رامانا وێ چه‌ندێ نينه‌ كو داعش ب تمامى هاتبيته‌ شكاندن، چونكى ل چه‌ندين جهان سه‌رێ خوه‌ يێ هلداى وهه‌تا نوكه‌ چه‌ندين هێرش ل سنورێ كه‌ركووكێ ل سه‌ر هێزێن ئه‌منى يێن ئه‌نجامداين” دووپات كر ژى” بۆ وێ چه‌ندێ كو داعش وهه‌ڤشێوێن وێ نه‌مينن، پێدڤيه‌ ئه‌و فاكته‌رێن دبنه‌ هوكارێ سه‌رهلدانا وان گرۆپێن تيرۆرستى، بهێنه‌ چاره‌سه‌ركرن، به‌لێ هه‌تا نوكو عيراقێ پێنگاڤ بۆ چاره‌سه‌ركرنێ نه‌هاڤێتينه‌”.

سه‌باره‌ت پرۆسا ريفراندۆما سه‌ربخوه‌يا كوردستانێ، مه‌سرور بارزانى دياركر” ريفراندۆم ده‌ربرينا هه‌ستێ نه‌ته‌وه‌كى يه‌ بۆ وێ چه‌ندێ بژارده‌يا ژيانا خوه‌ ل پاشه‌رۆژێ ديار بكه‌ت، كو دخوازيت چاوان بژيت، ئه‌ڤه‌ رامانا وێ چه‌ندێ نينه‌ كو ئه‌م واقعى نينين، يان ژى نه‌شێن لێكدانێن نوكه‌ يێن جيهانێ بخوينين، ئه‌م دوێ باوه‌ريێ دابووين كو ريفراندۆم دێ رێگريێ ل وێ هێرشا نه‌ره‌وا كه‌ت ئه‌وا ل سه‌ر هه‌رێما كوردستانێ هاتيه‌ كرن، مه‌ پێدڤى ب گره‌نتيا نێڤده‌وله‌تى هه‌بوو، بۆ وێ چه‌ندێ رێگريێ ل خوينرشتنێ ووان كاره‌ساتان بكه‌ين، كو ب ده‌هان ساله‌ تووشى نه‌ته‌وێ كورد بووين، به‌لێ مخاين ب روويه‌كى دى شرۆڤه‌ بۆ هاته‌ كرن، ئه‌م يێ دوێ باوه‌ريێ دا ئه‌و شرۆڤه‌كرنه‌ يا مه‌به‌ستدار بوو، چونكى به‌رده‌وام مه‌ره‌مه‌م بۆ بچووكرنا ده‌ستهه‌لات وسنورێ هه‌رێما كوردستانێ هه‌بوو، بۆ وێ مه‌ره‌مێ ژى مه‌ ريفراندۆم وه‌كو بيانۆ بكارئينا، هه‌كه‌ نه‌ ده‌ره‌نجامێن ريفراندۆمێ ب چو شێوه‌كى دوى ئاستى دا نه‌بوون كو هيرشه‌كا نه‌ره‌وا ژ وى جۆرى ل سه‌ر هه‌رێما كوردستانێ بهێته‌ كرن “.

ئه‌ڤرۆنيوز:

وه‌زيرێ ساخله‌ميێ ل هه‌رێما كوردستانێ راگه‌هاند” دو لژنێن هوربينيێ ژ به‌غدا يێن هاتينه‌ هه‌رێمێ ولژنه‌كێ ئه‌ركێ خوه‌ يێ ب دووماهى ئيناى وهووربينيا دويێ ژى دێ پرۆسه‌كا درێژ خايه‌ن بيت.

رێكه‌وت حه‌مه‌ ره‌شيد، وه‌زيرێ ساخله‌ميێ ل هه‌رێما كوردستانێ دكونفرانسه‌كێ رۆژنامه‌ڤانى دا ئه‌ڤرۆ سێشه‌مبى 27/2/2018، ل هه‌ولێرێ گۆت” لژنێن به‌غدا دو جۆرێن هووربينيێ دكه‌ن، هووربينيا ئه‌لكترۆنى كو ل سه‌ر بنه‌مايێ سيسته‌مێ بايۆمه‌تريێ هه‌رێمێ كار ل سه‌ر كرى ول دووڤ ئاخڤتنا نوونه‌رێ مه‌ دوێ لژنێ دا، ئه‌و كاره‌ يێ ب دووماهى هاتى”.

گۆت ژى” هووربينيا  دويێ، هووربينيا ده‌ستى يه‌ كو ل سه‌ر دوسێيا كه‌سى دهيته‌ كرن وئه‌ڤه‌ پرۆسه‌كا درێژخايه‌نه‌ ووه‌سا زوو ب دووماهى ناهێت”.

دياركر” راپۆرتا لژنێن هووربينيێ يێن هاتينه‌ بلندكرن بۆ سه‌رۆكاتيا حوكمه‌تا عيراقێ، چاڤه‌رێى سه‌رۆك وه‌زيرێن عيراقێ نه‌ بۆ برياردانێ ل سه‌ر وهنارتنا مووچێ فه‌رمانبه‌ران”.